Bohoḱ pereć hende jeleń

Uṕre nạkić oram,

Aynom kajar met́kuṭire

Dulạṛ te thoṛa jot́am.

Jion ḍahar taṛam hor re

Jaoge sajao koḱme,

Ńapam lenre dulạṛ met́te

Thoṛagan koyoḱ ạńme.

Horoḱ kaḱme lutur mũ re

Pagra arhõ mạkṛi

Jaoge kaso bande koḱme

Joroṅ araḱ sạṛi.

Oṛaḱ mutul joba baha

Sut́re bahaḱ mehaḱ

Juri luṭire muluć landa

Thoṛagan emań mehaḱ.

Leṅga tire jeleń rama

JAoge pạlis kaḱme,

Taṛawanaḱ juri kaṭa

Jaoge alta kaḱme.

Lolo setoṅ ńapamlenre

Lajaote alom sãohãḱ,

Coṭ mũ reaḱ udgạr daḱ tam

Jot́ katamạń nahaḱ.

Santal somaj eneć sereń

Jaoge jiạṛ kaḱme

Ponḍge oṛaḱ potao tayom

Araḱ sasaṅ pạṛme.

Akhṛa relaṅ ńapam lenre

Thoṛagan oṛhẽyẽń me,

Udgạr lenre ańcar tamte

Jot́ ocowạńme.

Monre dulạṛ tahẽlen khan

Emme usạrate,

Okte rege bachao joṅme

Jion juri gate.

Sareć lenre hạrić pạsir

Iń hõ emạń me haḱ.

Jahãtis rem disạ lińre

Thoṛagan heloạńme.

Tala ńindạ phesbukre

Ceṭiń re selediń me.

Pạl porob heseć sekreć

Iń hõ disạyiń me,

Jom sareć hạrić pạsir

Gocha cokowạń me.

Lạkạ cetan celakoma

Ạḍi ãṭ ko botoren

Thoṛa ghạṛi tayom khange

Jisu Mạsie seṭeren.

E guru bańcao bonme

Celako menlet́

Jisu tiye tulket́

Sokojoḱ ḍheoko bhagaoket́.

Jerusalem naṅgrahare

Soetan jisue biḍạudi

Ona biḍạure jisu do

Soetane bhagao kedi.

Kại manwako bańcao lạgit́

Jisu jiwie emket́

Pe din tayom Jisu Mạsi

Gujuḱe bhagaoket́.

Jisu Mạsiaḱ dosar hijuḱ

Joto manwa bon disạema,

Ona khạtir apan – ạpin

Kại kobon bhagao ma.

Casa do ko casa

Phosol ko ubjạo,

Casa re bon asoḱ

Jomaḱ ko jogaṛ abon.

Casa babon nisṛạuko

Disạm ren gorob kanko,

Casa kạmi baṅ kạṭića

Onate alobon lajaḱ.

Santal hoṛ koaḱ ạricạli

Sanam jạti khon ạḍi soros,

Sereń duraṅ ar eneć sogoe

Sanam jạti khon ạḍi rạskạ.

Horoḱ- bandi ar sajsaṕṛao

Sanam jạti khon ạḍi napae,

Jom ńu ar isin basaṅ

Sanam jạti khon ạḍi sebel.

Man manot ar dulạṛ sodor

Sanam jạti khon ạḍi sabasi,

Pal porob ar bapla bihạ

Sanam jạti khon ạḍi begar.

Sạgại hoho ar roṛ landa

Sanam jạti khon ạḍi soṛom,

Santal hoṛ koaḱ ạricạli

Alobon at́ ocoe somaj khonaṅ.

Saṕ dohoe mabon joto kote

Jogao joton mabon gharońj kore,

Santal hoṛ koaḱ ạri- cạli

Sanam jạti khon ạḍi soros.

Ańjom pe e gidrạkoge

Kạṭić khonge school tege

Calaḱ hoyoḱ okte nạpitrege

Akel bidiạ hameṭ lạgit́ tege.

Gogo, baba, ạyurkoaḱ uskur tege

Laha ape aema aema akel tege

Cecet́ko ar akelan koaḱ katha koge

Atenpe lutur ar mon ontor tege.

Hoyoḱgea pe maraṅ akelan koge

Man ar chiar pe ńama apnatege

Bạdại hiskạ mon baṅ tahẽlenre

Lekman hoṛko pe hoyoḱa unre.

Sabasi sarhao ńama pe tin re

Isoraḱ aema bhor ńapame unre

Boge jionpe khemaoa tin re

Aṭkarape khạṭi ge suluk monre.

Hoyoḱ sanań joto koren

Sạri boge gate

Suk dukre okte nạpit

Seledoḱạń usạrate.

Hoyoḱ sanań goṭa boehar

Saṛ akan baha,

Heṛem rasa sãote mońj so

Emạń jãhã tãhã.

Hoyoḱ sanań setaḱ simraḱ

Kuku ḍubur potam

Ińaḱ aṛaṅ ańjomkate

Ebhenoḱko sanam.

Hoyoḱ sanań boge ạyurić

Gharońj ar somaj lahaḱ

Budh ạkil ar dulạṛ jemon

Jaoge j oar bahaḱ.

Hoyoḱ sanań jharna patal

Juḍạsi reaṛ daḱ

Lolo setoṅ hoṛmo jiwi

Jotogeń jiạṛ kaḱ.

Uḍạḱ sanań serma puri

Isore hoho kana,

Jion khemao horre dinạm

Nonkań kukmu kana.

Uni ge sạri gogo

Okoe do bedon kosto te nawa sirjone emoḱ kan

Uni ge sạri gogo

okoe do gidrạ haraḱ ar ketẹć lạgit́ hirlạ toa dare

Uni ge sạri gogo

Okoe do ńut ńindại gungut́ ko aćren gidrạko

Uni ge sạri gogo

Okoe do lolo ar reaṛ re jomaḱe tear setaḱ re

Uni ge sạri gogo

Okoe do sapṛao kate gidrại kul kae school te

Uni ge sạri gogo

Okoe doe tạṅgi akat́ gidrạ ruạṛ okte

Uni ge sạri gogo

Okoe do ruạ haso ar duk re sore tahẽn bohoḱ ṭhen

Uni ge sạri gogo

Okoe do duk gharońj re reaṛ jharna daḱ kane.

Iń ren menae kukmũ rạni

Ńutum tae do Suru Dhạni.

Jaogiń ńapam jạpit́ okto

Iń do uniren ạḍi bhokto.

Aenom kajar mẽt kuṭi

Golap baha tae roṅ luṭi.

Lutur re tae jhạmkur pagra

Uni lạgit́ ińma pagla.

Hoṭoḱ re tae toa mala

Tire tae sona bala.

Mũ tae ma meru ṭhonṭa

Ona ńelte ińma koṅka.

Landa tae ma muluć muluć

Sạṅgiń khoniń ńele poloḱ poloḱ.

Muṭhạn tae ma ạḍi coṛoḱ

Ńel lekhanem ạḍi bhoṛoḱ.

Roṛ tae ma keneć doṛeć

Rạskạ monre kedeć kedeć.

Beṅget́ tae ma dulạṛ pereć

Ńapam toraliń coḱ cereć.

Nui monren kukmũ rạni

Tis bae hoyoḱ ińren sạri juri.

Amdo sasaṅdaḱ piạ cẽṛẽ

Cedaḱem piạe eṛe – eṛe

Peṛa ko hijuḱ amaḱ raḱte

Rạskạ seṭerako ona okte.

Amdom hoyen goḍet́ cẽṛẽ

Daṛan kanam dare ḍar re.

Dulạṛ gate bạnuḱkotiń

Calaḱ me piạ am do ạtiń.

Dulạṛ sanam rege ińaḱ

Bań bujhạua bạṛić bhage.

Ari cạli manao abon

Rilạ mala somaj tabon.

E piạ … Lại me dhạrti manwa

Dulạṛ mabon nẽhor joṅa.

Ohogeń leṭećlea,

Caḱ onka dom roṛet́a

Hoṛko daṛeaḱgea

Caḱ am bam daṛeaḱa?

Leṭejre hõ baṅre hõ,

Kurumuṭuime arhõ,

Mit́ dhaore baṅre hõ

Leṭejam sae dhaore tho!

Ohogeń leṭećlea,

Onka bam roṛ baṛaea;

Asket lelha gidrạge,

Bạnuḱtaea cet́ dhejge.

Iń doń ńelet́me kana,

Onkan gidrạm baṅ kana;

Cedaḱ adom monea,

Ohogeń leṭećlea.

Daḱtem bololen nạ̃hi

Paeraḱ cedam hako sik,

Mit́ bar dhao gurlen nạ̃hi!

Taḱṛam cedam hoṛ sik,

Khaṭaolen bam caṭaoa?

Casle nạ̃him arjaoa.

Ma tobe nit moneme

Alom hapeḱ dhurạuḱme.