Ale oṛaḱ mutulre

Kạhũ cẽṛẽ menae

Sim hopon ńelte

Cạṛuṕ cạṛuṕ donae.

Sim hopon ńelte

Ulidaḱ joroḱ tae

Dilgema bạnuḱtae

Sim eṅga menae.

Ciạṕ ciạṕ sim hopon

Nana hunạr aṛaṅ

Kumbṛukoae mente kạhũ

Menaege kalaṅ ḍolaṅ.

Raḱ reaḱ dheć bạnuḱ

Eken ka – ka

Thạri perećem emai rehõ

Bae joma daka.

Jeńjle koḱae seta leka

Uni lebṛa kạhũ

Ạkhạiniwantei laga kede

Ale tala bạhu.

Baṅgladisạm ạḍi mońj

Ńeloḱ bagan leka

Ona talare menaḱ bona

Abo baha leka.

Menaḱ bona hindu camar

Ar hõ muslạ ar hõ kamar

Ar hõ aema jạti.

Hiskạ bạḍae bạgikate

Tãhẽnabon mit́ sate

Mońjge milạuate

Jomabon ńuyabon

Disạm talarege

Disạm tabon dulạṛabon

Mone jiwitege.

Iń do jisuń dulạṛede kana.

Onare bạnuḱ jãhãn mana.

Leḍha ṭhunṭạ ar kãṛã,

Jisue hoho abon kana.

Onate sanam boeha misera,

Jisu dulạṛ tahẽn tabon ma.

Hindu, boddho, muslạ kristan,

Jisue dulạṛet́bon kan.

Jisue dulạṛet́bon kana,

Onare banuḱ jãhãn mana.

Pạhil tirem janamena

Hoyenam manwa

Ańjomedam roṛ landa

Eken nãwã nãwã.

Setaḱ ạyuṕ gogo aṛaṅ

Boeha dulạṛ rạskạ

Bại bại tem hiṛiń keda

Ehoṕ kedam hiskạ.

Daṛan kanam oloṅ pholoṅ

Jom ńuedam pạrwạ hạnḍi

Oṛaḱ duạr bạgi kate

Bạihạṛ getam ṭạnḍi.

Hanko ńelkom aḍe gate

School teko calaḱ kan

Puthi khata hobor kate

Oloḱ geko sẽṛa kan.

Hạnḍi pạrwạ bạgi kate

Puthi khata sabme

Oloḱ paṛhaoḱ  sẽṛa kate

Santal somaj ạyur me.

Hạnḍi pạrwạ bis kana

Eken menaḱ jala

Boeha dulạṛ joṛao kate

Gathao me somaj mala.

Coṭ sermaren Ipil

Jiṛiṕ jiṛiṕ gaṅga gitil

Hahaṛa getam noa sirjon

Soros getam joto khon.

Coṭre uḍạuḱ cẽṛẽko

Gaḍa daḱre chilbilạuḱ hako

Tinạḱ hahaṛa sirjon amaḱ

Soros getam sirjon sanamaḱ.

Bir buru ar jharna

Hira mạnik ar sona

Juḍạsi sirjon ar hahaṛa ạḍige

Sirjon joto amaḱ sorosge.

Dareko jo bahate pereć

Dạr kore cẽṛẽ koaḱ cereć

Jotoko amaḱ sirjonte kusi

Hahaṛa sirjontam ar juḍạsi.

Dhạrti ma pereć Manwa kote

Sirjạu kedam dhạrti sajaote

Dhạrti leka Manwakoaḱ mon

Monre sirjạume hahaṛa sirjon.

Bohoḱ pereć hende jeleń

Uṕre nạkić oram,

Aynom kajar met́kuṭire

Dulạṛ te thoṛa jot́am.

Jion ḍahar taṛam hor re

Jaoge sajao koḱme,

Ńapam lenre dulạṛ met́te

Thoṛagan koyoḱ ạńme.

Horoḱ kaḱme lutur mũ re

Pagra arhõ mạkṛi

Jaoge kaso bande koḱme

Joroṅ araḱ sạṛi.

Oṛaḱ mutul joba baha

Sut́re bahaḱ mehaḱ

Juri luṭire muluć landa

Thoṛagan emań mehaḱ.

Leṅga tire jeleń rama

JAoge pạlis kaḱme,

Taṛawanaḱ juri kaṭa

Jaoge alta kaḱme.

Lolo setoṅ ńapamlenre

Lajaote alom sãohãḱ,

Coṭ mũ reaḱ udgạr daḱ tam

Jot́ katamạń nahaḱ.

Santal somaj eneć sereń

Jaoge jiạṛ kaḱme

Ponḍge oṛaḱ potao tayom

Araḱ sasaṅ pạṛme.

Akhṛa relaṅ ńapam lenre

Thoṛagan oṛhẽyẽń me,

Udgạr lenre ańcar tamte

Jot́ ocowạńme.

Monre dulạṛ tahẽlen khan

Emme usạrate,

Okte rege bachao joṅme

Jion juri gate.

Sareć lenre hạrić pạsir

Iń hõ emạń me haḱ.

Jahãtis rem disạ lińre

Thoṛagan heloạńme.

Tala ńindạ phesbukre

Ceṭiń re selediń me.

Pạl porob heseć sekreć

Iń hõ disạyiń me,

Jom sareć hạrić pạsir

Gocha cokowạń me.

Lạkạ cetan celakoma

Ạḍi ãṭ ko botoren

Thoṛa ghạṛi tayom khange

Jisu Mạsie seṭeren.

E guru bańcao bonme

Celako menlet́

Jisu tiye tulket́

Sokojoḱ ḍheoko bhagaoket́.

Jerusalem naṅgrahare

Soetan jisue biḍạudi

Ona biḍạure jisu do

Soetane bhagao kedi.

Kại manwako bańcao lạgit́

Jisu jiwie emket́

Pe din tayom Jisu Mạsi

Gujuḱe bhagaoket́.

Jisu Mạsiaḱ dosar hijuḱ

Joto manwa bon disạema,

Ona khạtir apan – ạpin

Kại kobon bhagao ma.

Casa do ko casa

Phosol ko ubjạo,

Casa re bon asoḱ

Jomaḱ ko jogaṛ abon.

Casa babon nisṛạuko

Disạm ren gorob kanko,

Casa kạmi baṅ kạṭića

Onate alobon lajaḱ.

Santal hoṛ koaḱ ạricạli

Sanam jạti khon ạḍi soros,

Sereń duraṅ ar eneć sogoe

Sanam jạti khon ạḍi rạskạ.

Horoḱ- bandi ar sajsaṕṛao

Sanam jạti khon ạḍi napae,

Jom ńu ar isin basaṅ

Sanam jạti khon ạḍi sebel.

Man manot ar dulạṛ sodor

Sanam jạti khon ạḍi sabasi,

Pal porob ar bapla bihạ

Sanam jạti khon ạḍi begar.

Sạgại hoho ar roṛ landa

Sanam jạti khon ạḍi soṛom,

Santal hoṛ koaḱ ạricạli

Alobon at́ ocoe somaj khonaṅ.

Saṕ dohoe mabon joto kote

Jogao joton mabon gharońj kore,

Santal hoṛ koaḱ ạri- cạli

Sanam jạti khon ạḍi soros.

Ańjom pe e gidrạkoge

Kạṭić khonge school tege

Calaḱ hoyoḱ okte nạpitrege

Akel bidiạ hameṭ lạgit́ tege.

Gogo, baba, ạyurkoaḱ uskur tege

Laha ape aema aema akel tege

Cecet́ko ar akelan koaḱ katha koge

Atenpe lutur ar mon ontor tege.

Hoyoḱgea pe maraṅ akelan koge

Man ar chiar pe ńama apnatege

Bạdại hiskạ mon baṅ tahẽlenre

Lekman hoṛko pe hoyoḱa unre.

Sabasi sarhao ńama pe tin re

Isoraḱ aema bhor ńapame unre

Boge jionpe khemaoa tin re

Aṭkarape khạṭi ge suluk monre.