Ńapam Ńapam Ńapam hoyoḱa mit́din

Unredo ạḍi rạskạ baṅ hoyoḱa,

Menkhan ńapam do hoyoḱ talaṅgea.

Enhiloḱ ukoḱ reaḱ em kurumuṭuiea iń ńelte

Enhiloḱ iń ńelte bam landaea,

Enhiloḱ iń ńelte bam koyoga

Menkhan ńapam do hoyoḱ talaṅ gea.

Enhiloḱ in kusiaḱ aṅgroṕ bam horoga,

Iń hõ am kusiaḱ aṅgroṕ bạń horoga

Menkhan ńapam do hoyoḱ talaṅ gea.

Tislaṅ ńapamoḱa, okare, balaṅ baḍaea

Enhiloḱ ińaḱ ti am bam saṕtińa,

Enhiloḱ amaḱ ti iń bạń saptama

Menkhan ńapam do hoyoḱ talaṅ gea.

Ńapam hoyena mit́ din ….

Hạṭiạ re, bazarre, horre, bapla oṛaḱre, gạḍire, busre

Menkhan dulạṛ ma baṅ tahẽlen laha leka

Tobe ńapam do hoylen gea to.

Ackage mit́ din ńapam hoyena re̠l gạdi cetanre

Iń mań duṛuṕ akan siṭ re,

Amem teṅgo akan iń aṛere.

Ńel sãoteń teṅgoyena, emaḱ meạń duṛuṕ siṭ

Bam duṛuṕ len edrite, joro kedam mẽt́ daḱ ạḍi okore

Menkhan ńapam do hoylen gea to.

Ńapam Ńapam Ńapam hoyena eyae gel umerre

Amaḱ koyok ar ińaḱ koyok re roṛ do banuḱa,

Joroyena mẽt́daḱ eken, jot begor upại banuḱa

Cabayena sedae dulạṛ, goso mosot́te

Daṛege ma cabayen cekań sotoḱ me

Mon rema tahẽyen dulạṛ pereć ge

Menkhan ńapam do hoylen talaṅ gea to.

Lintạ loyoṛ podda setu benaokedae ho Sheikh Hasina

Badha tahẽkana akoṭ tahẽkana,

Enhõe benaokeda podda setu.

Joharaeabon sarhaoeabon,

Hoṛ lạgit́ bhạlạianaḱge kạmikeda.

Ol tahẽna itihas sakamre

Baṅ benaoḱ podda setui benaokeda.

Bạisạk jusṭi cando ạyuṕ bela

Hende rimil rakaṕen ńut́ge,

Hoe daḱ darae kan hud hud

Pạchim disom khon botorge.

Hende rimil guḍ gudạḱ kan

Oktoreye huḍuret́ diṛim diṛim.

Cẽṛẽ ciprut́ ko cero beroet́

Ponḍ kõk ko uḍạuḱ kan coṭ seć.

Gogo oṛaḱre uduṛ dupuṛ

Hana noaye aderet́ harephare,

Gupi koṛako gupiṭạnḍi khon

Gại ḍaṅgra ko piḍgạuket́ko.

Kạmi hoṛko dạṛ ạguet́ akbak,

Ato oṛaḱte umuloḱ lạgit́.

Hoe kedaye gurlạ gurli radrad,

Daḱ kedaye jhomor jhomor.

Oṭaṅ idikedae oṛaḱ duạr ko,

Rạput́ idikedae dare ḍạrko.

Okayenam baba sirjon mạlik

Dhạrtire ko̠ro̠na virus hećakana,

Dayawalem baba mãyãwalem

Korona khon baba de bańcaolem.

Ko̠ro̠na virus halaṅme, samṭaome

Dorẽore giḍime,

Danaleme baba nawa dhạrti.

Niạ ṭola peaj ṭola

Niạ ṭola rạsun ṭola,

Niạ ṭola mosola ṭola

Mosola ṭola dada jhiṭạṅe jhaṛaṅ.

Durgạpur gutugalaṅ

Ḍạhu ṭola huduke huduke huduk (2)

Ocinpur bajarre g̃ạṛĩ

Kạki jạ̃ṛĩ dokaneḱ (2)

Mase kạki gạ̃ṛĩ do̠ jạ̃ṛĩ do̠r kuliyem

Bejae bajar bejae coṛa do̠r.

Mit́ kaṭae kuṭuṅa

Bejae jokhae tulạya

Ṭaka reaḱ saṛe solo se̠r

Saṛe solo ser. (2)

Gate gatelaṅ tahẽkana

Haere ạḍi gatelaṅ tahẽkana,

Ińko jãwãekediń

Am ko jãwãeket́me

Gate mãyã chaḍaoen.

Ne sakam sabme

Gate mãyã re̠t́me

Do ạtu golkam gaḍa daḱre.

Baṅ bogea pạurạ tạṛi

Baṅ bogea hạnḍi,

Baṅ bogea oṛaḱ begor

Tahen bilạn ṭanḍi.

Baṅ bogea siknạt begor

Eskar tahẽn loṛo,

Baṅ bogea eṭaḱ hoṛaḱ

Jahan jinis kombṛo.

Baṅ bogea ạkhriń caba

Khet baṛge oṛaḱ ḍinḍạ,

Baṅ bogea kuṛi-koṛa ropoṛ

Ńutre tala ńindạ.

Baṅ bogea gidrạ samaṅ

Juri pạri kạphạriạ,

Baṅ bogea begor bujhạu

Hoṛko tuluć kiriạ.

Janamenam tejo leka,

Go̠go̠ baba ho̠bo̠r re.

Dulạṛteko harake̠t́me,

Gharo̠ńj talare.

Loka ho̠bo̠r co̠ḱ ce̠re̠ć,

Gharo̠ńj dulạṛ tam

Putli bandem cet́ ke̠t́ khan pharak enaem.

Go̠go̠ dulạṛ koṛam cetan,

Baba dulạṛ taren re̠.

Buḍi dulạṛ khilḍu e̠ne̠ć,

Buḍạ dulạṛ rehet́ re̠.

Umạr amaḱ hoye̠n tama,

Gel bar – pe̠.

Dulạṛ jo̠to̠ hiṛiń kateḱ,

Me̠nedam khecalidińape̠.

Go̠go̠e metamkan am do̠

Mo̠nte o̠lo̠ḱ me̠.

Babae metamkan am do̠ napae tahẽ̠n me̠.

Go̠ babawaḱ jo̠to̠ katham

Deya giḍike̠t́.

Hạnḍi pạurạ emanteaḱ

Jo̠to̠m hameṭe̠t́.

Go̠ babawaḱ as tahẽ̠kan

Hara meakin.

Kukmu jo̠to̠m

Rạput́ keda dukem e̠maḱkin.

Jiṅgi amaḱ tear lạgit́

Juạn o̠kte̠kan.

Juạn o̠kte̠ paro̠moḱkan,

Hudis ruạṛtam.

Gol Gol Gol

Noa dhạrti puri gol

Gol Gol Gol

Jom Ñure gonḍogol.

Gol Gol Gol

Katha roṛre gonḍogol.

Gol Gol Gol

Cạl colonre gonḍogol

Gol Gol Gol

Am ińre gonḍogol

Gol Gol Gol

Somaj talare gonḍogol.

Gol Gol Gol

Jạt jạtre gonḍogol

Gol Gol Gol

Disạm disạmre gonḍogol.

Gol Gol Gol

Aboaḱ hudis cintạre gonḍogol

Gol Gol Gol

Jotoge gonḍogol.