Sedae jugre mit́ṭen atore barea meromkin tahẽkana. Mit́din unkin do mit́ sãotekin gatećkan tahẽkana. Gatećkan jokhenge banar merom mit́ṭen ghaḍlaḱrekin ńurena. Ạḍi dhao kurumuṭu katet́ rehõ ona ghaḍlaḱ khon bạkin rakaṕ daṛeada. Mit́ okte mit́ṭen meromaḱ do ghaḍlaḱ khon onḍoṅoḱ reaḱ as cabayentaea. Onate ghaḍlaḱrege duṛuṕ hapeyena.

Menkhan eṭagić merom do bae as chuṭạulena. Ghaḍlaḱ khon onḍoṅoḱ reaḱ ạḍi ãṭe kurumuṭukeda. Ar “bhe!” “bhe!” kikiạuate hohoeda. Ṭhik inạ okterege mit́ hoṛ ona ghaḍlaḱ aṛete parom calaḱkan tahẽkana. Khange uni meromaḱ kikiạue ańjom ńamkeda ar ghaḍlaḱre boloyente banar merome udhạrket́kinạ.

Sikhnạt: Mit́ dhao bam daṛeaḱ khan sae dhao kạmi lạgit́ kurumuṭui me.

Mit́din ạḍi setaḱre tạruṕ do jomaḱ sendrae onḍokena. Ado bại bạite bir bhitrite taṛam idiet́ tahẽkana ar jomaḱe sendraet́ tahẽkana. Uni do jel, horo ar cẽṛẽ hõe sendraet́koa. Menkhan enhiloḱ uniaḱ moloṅ do ạḍi bạṛić tahẽkana. Goṭa din sendra katet́ hõ celege bae ńamlet́koa. Reṅgećte tạruṕ aḱ lać hõ jal jalaoḱ kantaea.

Cando hõe hạsurena enrehõ jãhãn jomaḱge bae ńamlet́te aćaḱ tahẽn ṭhạ̃i seće ruạṛena. Inạ jokhenge mit́ṭen horoe ńel ńamkedea. Tạruṕ do noa laha horo bae ńel akat́koa. Horo ńelte ạḍi ãṭe hahaṛayente teṅgo urić katet́e ńelkedea. Ado mone monete hudiskeda, nui do cet́ lekan janwar kanae.

Horo hõ tạruṕe ńel ńamkedea. Botorte ṭhapṛaḱ bhitri bohoḱe bolokeda. Tạruṕ do horo sore senena are ji baṛakedea. Khange thoṛa ghạṛić tayom horo do bohoḱe onḍoṅkeda.

Tạruṕ aḱ lać reṅgećte jal jalaoḱ kantaea, adoe hudiskeda, goṭa din cet́ge bạń jom akada, eṭaḱ jomaḱ bạń ńamlekhan nuigeń jomea. Adoe hudisket́ lekage kạmikeda. Tạruṕ do mit́ donte horoe saṕkedea are ger kedea. Menkhan bae seṭeć daṛeadea, ente horo ṭhapra do ạḍi keṭećgea, ḍaṭa hõ hasokedea. Mit́ dhao, bar dhaoe ger kedea, menkhan ṭhoḱ ṭhoḱ saḍe kana, menkeam jạnić dhirige geret́ kana. Tạruṕ doe ạṛisente mengot́keda, nui doe cet́ lekan janwar kana. Ḍaṭa hõ ḍaṭa hasokedeń do.

Ado bại bạite horo bohoḱe onḍoṅkeda. Adoe menkeda, nonkate do bam jom daṛeạńa, judim jomeń khan mit́ṭen kạmi hoyoḱtama. Daḱre giḍikạńme. Daḱreń ńurlen khange ińaḱ ṭhapra hõ lạbidoḱa. Enḍekhan ạḍi algate lạbit́gem jomeńa. Ado tạruṕ hõe hudiskeda, horo do daḱreń aṛaḱlege, enḍekhane lạbidoḱa ar algateń jomea. Onate horo saṕkate pukhri daḱre aṛaḱ kedea. Horo do daḱre pheḍen são sãote ti-jaṅga-bohoḱe onḍoṅkeda ar ạḍi sạṅgińe paera calaoena. Tạruṕ do sạṅgiń khone koyoḱ hapekeda. Aćaḱ mẽt́ laha khon horoe dạṛkeda, tạruṕ cet́ge bae ceka daṛeada. Ona pukhri aṛere teṅgo hapekate bohoḱ kuḍbur kate raṅgaote ḍaṭae ger urićkeda. Inạkate bại bạite aćaḱ tahẽn ṭhạ̃i seće ruạṛ calaoena.

Ar horo hõ rạskạte aćaḱ oṛaḱe calaoena, rạskạte mon monte menkeda, bud tahẽlenkhan jãhã tin maraṅ bạirigem harao daṛeaea.

Modon ńutuman mit́ṭen casa hoṛe tahẽkana. Modonaḱ do oloḱ paṛhao baṅ tahẽkantaea. Menkhan ạḍi budane tahẽkana. Uni do aema lekanaḱ aṛaḱ sakame caset́kan tahẽkana. Ar dinạm hiloḱ ako ato mucạt́re lagaoḱkan moṛ re aṛaḱ sakame ạkhrińet́ kan tahẽkana. Ar nonkate aćaḱ soṅsar mońjge calaḱkan tahẽkana.

Mit́din mit́ṭeć misṭi dokandar modon takoaḱ ato talate parom calaḱkan tahẽkana. Ado Modonaḱ ututeaḱ dokane ńelket́ khan ṭaṭka ututeaḱ ńelte kiriń sanakedea. Ado modone metadea mit́ KG ḍheṛos ar mit́ KG poṭol ar mit́ KG beṅgaṛ emạńme. Ado uni Misṭi ala joto saoda oṛaḱte idikeda. Ado pinḍare duṛuṕ kateće hudisoḱ kana noako ututeaḱiń ạguket́ ojon do ṭhikgea se baṅ? Soṅ legayạń. Adoe soṅkeda jotoge 900 gram kate menaḱa. Uni misṭi dokandar do ạḍi kajake raṅgoena ar Modon ṭhene calaoena. Misṭi dokandar ãṭ aṛaṅte Modone metadea cedaḱ 900 gram kate ututeaḱ dom ạkhrińeda? Hoṛem ṭhokayet́koa. Ar iń hõm ṭhoka kedińa!

Modone menkeda bạbu mit́din amaḱ dokaniń senlena ar ciniń kirińleda. Iń do rėngeć hoṛ sosoṅaḱ kiriń leka ṭaka poesa do bạnuḱtińa. Enhiloḱ amaḱ dokan khon mit́ KG ciniń kirińlet́ ona mit́ KG cinige mit́ seć dohokate am ṭhen ututeaḱ soṅ kategiń emat́me tahẽkana. Noa katha ańjom kate uni misṭi ala do ạḍi ãṭe lajaoena. Ar jãhãn katha bae roṛleda.

Mit́din mit́ṭen hoṛ aćren hopone metadea, “E beṭa, senkate bir khon thoṛa kaṭ maḱ ạguime. Khange uni koṛa do kaṭ baḍohi soṅgekedete birtekin senena. Mit́ṭen darere uni koṛa doe dećena ar kaṭ baḍohi ona dare maḱe hukumadea.

Ackage mit́ṭen ạkilan hoṛ ona aṛete calaḱkan tahẽkana. Uni hoṛ do uni murkhạ lelha gidrạwaḱ katha ańjomte menkeda, “Noa do cet́em cekaeda? Oka darerem duṛuṕ akana, ona dare maḱem khojoḱ kana!” Lelha koṛa doe hahaṛayena. Uni doe kulikedea, “ado cekaena?” Uni hoṛ doe menkeda, “Hẽ boka, dare maḱ lekhan ona sãote am hõ latarrem ńurhạḱa. Ona kathate lelha koṛa do dare khon ạḍi usạrae pheḍena ar uni ạkilan hoṛ ạḍi ãṭe sarhaokedea.

Ado uni koṛa do ạkilan hoṛe metadea, “am do ạḍi bud ar ạkilan hoṛ kanam. Cekate iń hõ am lekan bud ar ạkilan hoṛiń hoyoḱa, onam cet́ạńa?” Ạkilan hoṛ do uni koṛa cecet́e hẽḱkeda. Ado ać okakoe cet́ade ona sanamaḱ do ạḍi mon lagaokatet́e cet́ keda ar onka lekae kạmi idikeda. Khange bại bạite uni koṛa hõ ạkilan hoṛe hoyena.

Cecet́aḱ: Sikhnạt hameṭ reaḱ jãhãn umer bạnuḱa. Sikhnạt do jãhãn umer rege hoe daṛeaḱa.

Mit́ṭen kulại ać tinạḱ kajake dạṛ daṛeaḱa ona do bhagetege baḍaea, ar ona iạtege jaoge horoe neṅghao edekan tahẽkana bại bạite dạṛ, laṛaoḱ karonte. Mit́din horo do dạṛ lạgit́ kulại sãoe ekraṛkeda. Kulại do aćaḱ pạtiạu menaḱtaea je ạḍi usạrae dạṛ daṛeaḱa, ar dạṛ haparaore algate jitạu daṛeaḱ karonte horowaḱ ekraṛ doe aṅgoćkeda.

Dạṛ haparaokin ehoṕkeda, ar kulại do ạḍi sạṅgińe dạṛ lahayena, ar ạḍi tayomre horoe dạṛ bạgiadea. Kulại do bhage dạṛ karonte ać ạḍi maraṅe hudisena ar ạḍi gorobe bujhạuet́kan tahẽkana, are goṭakeda noa dare umulre thoragane jirạuḱa. Are hudiskeda aema somoe do menaḱa dạṛ haparao cabae lạgit́. Menkhan horo aćaḱ mon keṭeć kate, baṅ thirkate laha seće sen idiyena.

Tinre kulạiye ebhenena, ạḍi kajake bhabnaena are ńelkeda, ente horo do mucạt dag sorre seter akana. Kulại do kajakte dạdạṛe dhurauena, menkhan ạḍi bilom hoeakantaea. Inạḱtege horo do mucạt́ dage paromkeda.

Onatege noa sạbitoḱ kana, bại bạite ar mon keṭeć kate kạmi lekhan jãhãlekanaḱ haparaorem jitạuḱa.

Mit́ṭen atore kuń tahẽkana. Ona kuń do kathae bhutạhage tahẽkana. Tinre atoren hoṛko daḱ loe lạgit́ko senoḱkan tahẽn, unre tin pichạ bạlṭin kuńreko pheḍa, un pichạ eken bạlṭin rakaboḱa. Nonkan hahaṛa ghoṭna goṭa ato pasnaoena, kuń do mit́ṭen bhut aḱ oṛaḱ kana. Ạḍi botoran mit́ṭen bhute basoḱ kana.

Menkhan tinạḱ din nonka calaḱa? Onko hoṛ do daḱ jạruṛako kana. Onate mit́ṭen mimạṅsae jạruṛ kana. Menkhan ona kuńre okoe pheḍoḱa? Okoe hõ bako reben kana. Ackage mit́ṭen juạn koṛa kuńre pheḍoḱe rebenena. Adoe menkeda, Iń pheḍoḱa kuńre. Ińaḱ ḍanḍare baber tolkate pheḍkạńpe. Menkhan mit́ṭen cukti menaḱa, jemon ińren baba hõ ona baber reaḱ mit́ aṛe saṕkat́. Atoren hoṛ ona kathateko hahaṛayena. Atore nunạḱgan darmoṭ hoṛ menaḱko rehõ cedaḱ ać baba do jạruṛ kana? Pạhilre ạḍiganko bujhạu baṛawadea. Enrehõ okoeaḱ kathage bae luturada, ghane ghane inạ mit́ kathage roṛeda. Onate ać babako ạgukedea. Inạkate joto hoṛte kuńreko pheḍkedea. Bhitri bolokateće ńelkeda, kuńre mit́ṭen gạ̃ṛĩ menaea.

Nui gạ̃ṛĩ ge bạlṭine hataoet́ tahẽkana. Khange uni koṛa do gạ̃ṛĩ tarenre dohokedea ar baber ore hukumat́koa. Gạ̃ṛĩ do uni koṛawaḱ tarenre tahẽkante baberko saṕ akat́ hoṛko do pạhilre gạ̃ṛĩ aḱ muṭhạnko ńelńamkeda. Ackage uni gạ̃ṛĩ aḱ muṭhạn ńelteko hudiskeda, bhute rakaṕ hijuḱkana. Onate joto hoṛ baber aṛaḱ giḍikateko dạṛkeda. Menkhan mit́ hoṛ ona baber bae aṛaḱleda. Uni do ar jãhãe doe baṅ kana, uni hoṛ do kanae ać baba.

Ạḍi haron kosṭote aćren koṛae or rakaṕ kedea. Nonkate aćren koṛa gujuḱ dosa khone bańcao ruạṛena. Ado unre joto hoṛko bujhạukeda cedaḱ ać baba babere saṕ ocokedea. Ente, dhạrtire tinre aema lekan muskil dosako heć paṛaoabon, unre joto hoṛ sạṅgińko senlen rehõ baba/gogo do tisrehõ gidrạ khon bako pharakoḱa ar sạṅgińte hõ bako calaḱa. Onate baba gogo dulạṛkin do joto hoṛaḱge maraṅ dạyik kana.

Mit́ṭen atore mit́ hoṛe tahẽkana. Uniaḱ mit́ṭen ḍaṅgra khamar tahẽkantaea. Onate aema lekan Karbạri uni then ḍaṅgra kiriń lạgit́ ko hijuḱkan tahẽkana. Mit́din thoṛa jạruṛ kạmi karonaḱte khamar mạlik do bajar seće calaoena. Onate uni do ḍaṅgra ạkhriń dạyik aćren hopone emadea.

Are metadea, “ beṭa, teheń do mit́ṭen karbạri ḍaṅgra kirińe hijuḱa. Uni ṭhen khon ḍaṅgra dam 20 goṭen sona kạuḍi hataome. Hoi beṭa?” Ado uniren hopone roṛ ruạṛkeda, “Ṭhikgea baba.”

Khange uni karbari do ḍaṅgra kirińe hećena. Khamar mạlik ren hopon do ać babawaḱ katha lekage mimit́ goṭen ḍaṅgra reaḱ dam 20 goṭen sona kạuḍi khojkeda. Uni karbạri do ḍaṅgra ńel tayome menkeda, E beṭa, “nunạḱ kạuḍi ma bạń ạguakat́. Baṅkhan mit́ṭen ḍaṅgra emạńme, ńindạ bhitrite nãhãḱ  jãhã lekatege kạuḍiń ạgu seṭerama.

Sạrige uni mạlik ren hopon uni karbạri kathate pạtiạuente mit́ṭen ḍaṅgarae emgot́adea. Uni baeman karbạri do ḍaṅgrae idikedea. Menkhan ar bae ruạṛ hećlena.

Sikhnạt: Ạnạṛi hoṛ cetanre tis hõ ạḍi algate alom pạtiạuḱa.

Mit́ atore miṭ́en haṛam hoṛe tahẽkana. Uniren barea kuṛikin tahẽkana. Unkinaḱ do bapla hoeakan tahẽkana. Mit́din uni haṛam hoṛ do aćren kuṛikinaḱ oṛaḱ ńapamoḱe senena. Pạhilre aćreń maraṅ kuṛi aḱ oṛaḱe sen lahaena. Ado uni maraṅ kuṛi doe metadea, “Baba, koeme jemon usạra serma daḱe jạṛi. Baṅkhan sanam phosolko nosṭo cabaḱtińa.” Khange ać baba doe menkeda, “Acha ṭhikgea.”

Inạkate uni hoṛ do hudińić kuṛi ṭhene senena. Uni kuṛi hõ ać babae metadea, “Baba hasa reaḱ tụkuć celaṅ rohoṛ lạgit́ ạḍi ãṭ setoṅ jạruṛạṅ kana. E ba, koeme jemon serma dak aloe jạṛi.”

Nonkate uni hoṛ do ạḍi muskil dosare paṛaoena. Barea kuṛiaḱ bar lekkan khojoḱaḱ, okoe lạgit́e koea! Ado ạḍigan hudis ganḍonkate aćren huḍiń kuṛi metadea, “E go, amaḱ ṭukuć celaṅ do culhạ pheḍre dohokaḱme. Enḍekhan setoṅ reaḱ ãc bae ńamlere hõ ạḍi usạra algatege rohoṛoḱa. Are metadea, “koe me jemon usạrate serma daḱe jạṛi. Baṅkhan am didiaḱ joto phosol ko nosṭoḱtaea.”

Ado uniren huḍiń kuṛi doe menkeda, “Ṭhikgea baba. Onkage hoekoḱma. Nonkate unkinren babawaḱ goṭa lekate banar boeha kuṛiaḱge bhạilại hoyena.

Sikhnạt:  Bud ar akel tahẽlen khan joto lekan muskil dosa reaḱ algatege mimạṅsa hoyoḱa  

Mit́ dhao mit́ṭen Mahasoe hoṛ mit́ṭen casa hoṛ thoṛa kạuḍi em kateye metadea, noa kạuḍi do ạḍi jotonte dohoeme enḍekhan ạḍiganem lahatiḱa. Casa hoṛ do bohoḱre mathol latarre kạuḍi dohokate oṛaḱe calaoena. Adoe hudiskeda, oṛaḱ calaokate kạuḍi do almạrire jotonte dohoea.

Khan oṛaḱ calaḱ horre mit́ṭen pajhar casawaḱ bohoḱ khon mathole idikeda. Ona sãote kạuḍi hõe idi torakeda. Muskilre paṛao akan casa do arhõ Mahasoe hoṛ ṭhene calaoena. Adoe metaekana, “Mahasoe, am oka kạuḍim emadiń tahẽkan ona do ińaḱ bohoḱre mathol latarreń doholeda. Menkhan pajhar do ińaḱ mathol selet́ kạuḍi hõe idikeda.”

Mahasoe do uni casa hoṛ arhõ thoṛa kạuḍi emadea. Adoe metadea, “noa kạuḍite phosol reaḱ itạ kirińme ar onako er me. Ar ṭhikte onako itạ jotonme. Ńelme, ạḍi ḍher phosol hoyoḱa. Arhõe metadea, “onako phosol ạkhriń lekhan ạḍiganem lahanti daṛeaḱa.”

Khange uni casa hoṛ doe bujhạu ńamkeda, Mahasoe do ona kạuḍi jotonte dohokaḱ do bae metadiń tahẽkana, bickom ona kạuḍite itạ kiriń kate jotonte cas base metadiń tahẽkana.

Sikhnạt: Bud ar kạmi beohar lekhan ạḍi bhage lahanti hoe daṛeaḱa

Piprạ ato talare̠ ạḍi maraṅ mit́ṭe̠n pukhri menaḱa. Ona pukhri beṛhaetege ona atore̠n ho̠ṛ do̠ko bo̠so̠t akana. Lạṭu kho̠n kạṭić jo̠to̠ ho̠ṛge ona pukhrire̠ko paeraḱa ar kićrić, ṭukuć, celaṅ, emanteaḱko saphaea. Pukhri purub aṛere̠ Sạgun ar Bạjun takowaḱ oṛaḱ. Sạgun bạbuwaḱ umer do̠ 6 serma ar Bạjunaḱ do̠ 4 serma. Ne̠s kho̠nge Sạgun do̠ iskul calaḱe̠ e̠ho̠ṕ akana, ar Bạjun do̠ oṛaḱregeye̠ gate baṛaea. Unkin ać go̠go̠ baba do̠ pạṭ kạmikin kạmia. Dinạmge unkin do̠ Bạjun do̠ho̠ oṭokate̠ kạmikin calaḱa, Kạmi calaḱ lahare̠ unkin ać go̠go̠ do̠e mana kạkina, mạt mạt pukhrire̠ paeraḱ alo̠ben calaḱa.

Mit́ athwar hilạḱ iskul chuṭi tahẽ̠kante̠ Sạgun do̠ oṛaḱ regeye̠ tahẽ̠kana. In hilạḱ setaḱre̠ kạmi calaḱ lahare̠ ać go̠go̠ do sạgune̠ bakhẽ̠ṛ oṭoadea je Bạjune̠m ńe̠l do̠ho̠yea ar eskar eskar pukhrire̠ paeraḱ alo̠m calaḱa.

Tikin o̠kte̠ unkin do̠ bahre̠re̠kin gateḱkan tahẽ̠na, un okte̠ atore̠n lạṭu gidrạko pukhrire̠ko paeraḱkan tahẽ̠na, onko ńe̠lte̠ unkin hõ̠ paeraḱ sanake̠t́kina. Onate̠ unkin hõ̠ pukhri mit́ aṛere̠ ḍạbrạḱ lạgit́kin phe̠ḍena. Ḍạbrạḱ ḍạbrạḱte̠ tinre̠co̠ Bạjun do̠ daḱre̠ye̠ unum at́ena. Sạgun ać boeha bae ńe̠l ńamledete̠ ạḍi ãṭe̠ bo̠to̠rena ar hape hapete̠ daḱ kho̠n rakaṕkate̠ oṛaḱe̠ calaoena. Ać go̠go̠ tạkin do̠ tikin oṛaḱ ruạṛ kate̠ Bạjun bạkin ńe̠lńame kante̠ Sạgunkin kulikedea uni hõ̠ bae lại le̠t́te̠ dhãoṛã dhạ̃uṛĩ sendrakin e̠ho̠ṕena. Me̠nkhan okare̠ hõ̠ bạkin ńamledea.

Ạyuṕ bela atore̠n mit́ṭe̠n maejiu do̠ pukhri ghaṭre̠ thạri gasao se̠nkate̠ ńe̠lkedae je Sạgun bạbu ma daḱre̠ye̠ campel akan. Ona ńe̠lkate̠ uni do̠ kạumạu o̠ho̠e e̠ho̠ṕena. Kạumạu ańjo̠mkate̠ ato ṭolare̠n jo̠to̠ ho̠ṛko jarwaena ar daḱ kho̠n ko owar rakaṕ ạgu kedea. Niạ tayo̠m kho̠n Bạjun do̠ ar tishõ̠ ać go̠go̠ baba tạkinaḱ katha bae be̠bataoa.

Tumạl: Ańjo̠m jo̠ṅ jạṛ