Lo̠kho̠n do̠ saradinman dhuṛire̠ye̠ gate baṛaea. Paera hõ kisni leka ce̠ṭe̠ ce̠ṭe̠ye̠ paeraḱa, mo̠jte̠ bae iskir saphaḱa. Rabaṅ se̠ṭe̠re̠n khan ho̠ṛmo̠ ro̠do̠t́entaea ar luṭi jaṅgako paṛaḱentaea. Onate̠ taṛamte̠ do̠ jaṅga hasoye ar ro̠ṛ landa te̠do̠ moca hasoye.

Mit́din iskulre̠ mahaso̠eye̠ kulikedea, “Teheń setaḱ ce̠t́e̠m jo̠m ạgukeda? Ar uni do̠ moca hasokedete̠ moca coelo kate̠ye̠ me̠nkeda, Pu—pu—pu—puṭhu”ar ańjo̠mkate̠ jo̠to̠ko landaoadea. Ado̠ mahaso̠eye̠ metat́koa sapha sạphi bape̠ tahẽ̠le̠nkhan nonkage hoyoḱtapea.

Sedae jugre̠ mit́ disạmre̠ ạḍi maraṅ mit́ṭe̠n Rakkase tahẽ̠kana. Uniaḱ ạḍi maraṅ mit́ṭe̠n bagan tahẽ̠kantea. Ona baganre̠do̠ celehõ bae bo̠lo̠ ocoakokan tahẽna. Onate̠ uniaḱ baganre̠do̠ ce̠t́ baha hõ baṅ bahaḱkantae tahẽna.

Mit́din uni do̠ peṛaho̠ṛo̠ḱe̠ calaoena. Ona okte̠re̠ gidrạko do̠ gateḱko bo̠lo̠ena. Rakkas do̠ raḱ ańjo̠mte̠ uni gidrạ ṭhe̠ne̠ calaoena. Uni gidrạ ńe̠lte̠ daya he̠ćadea are̠ metadea teheń kho̠n dinạm nonḍe̠ gateḱ pe̠ hijuḱa.

Unkho̠n onko gidrạko do̠ ona baganre̠ gateḱko e̠ho̠ṕe̠na. Ar baganre̠hõ nana hunạr bahakote̠ baha pe̠rećena. Ar uni Rakkas hõ gidrạko são gateḱe̠ e̠ho̠ṕe̠na.

Tumạl: MLE Pạhil Kilạs

Munuaḱ janam dinre baba do̠ bajar kho̠n mit́ṭen putul ạgukate munu ać go̠go̠e emadea. Go̠go̠ do̠ munu hahaṛa ocoe lạgit́ parko̠m latarre putule oko kadea. Munu jạpit́ kho̠ne ebhenen khan go̠go̠ ar baba do̠ uniaḱ janam din ńutumtekin sarhao kedea ar janam din reaḱ sandes sendra ńutumtekin metadea. Munu pạhile mo̠nekeda go̠go̠ paseć ać lạgit́e khir dakawakada. Cedaḱje uni khir daka ạḍi ãṭe kusiaḱa, menkhan khir daka so̠ to̠ baṅ ńamoḱ kana.

Munu do̠ mit́ oṛaḱ kho̠n ar mit́ oṛaḱe dạṛ idikeda are dạṛ ạgueda, menkhan tho̠ṛa hõ aćaḱ janam din reaḱ sandes do̠ bae ńel ńameda. Uni do̠ aćaḱ parko̠m ar bạlis latare sendrakeda menkhan okare hõ sandes do̠ bạnuḱa. Okare menaḱa sandes? Uni do̠ parko̠m latare uyuṅ keda, ar mẽt́ do̠ ulḍhạ lekayentaea. Parko̠m latarre uni do̠e ńelkeda aćaḱ janam din ńutumte maraṅ o̠kho̠ć putul.

Mit́ serma do̠ kajak bạrsạte hoṛoko sanam ḍubạ cabaena ar go̠ćena. Ona iạte Jhunkạ tako do̠ ạḍiko haro̠nena. Maraṅ din hõ seṭerena ar atoren jo̠to̠ gidrạko baba go̠go̠ sãote nãwã kicrić kiriń hạtteko calaḱkana.

Jhunkạ do̠ mo̠n bạṛić kate oṛaḱreye duṛuṕ akana. Ayuṕ bela Jhunkạ do̠ ać baba akoren pea geḍe saṕkate hạtteye calaoena. Uni do̠ geḍe ạkhriń kate Jhunkạ lạgit́ aṅgroṕe kiriń keda.

Maraṅ din setaḱre go̠go̠ do̠ Jhunkạ ho̠ho̠ beret́kate hutum saphaḱe metadea. Jhunkạ do̠ mo̠n bạṛić kateye beret́ena are hutum saphaena. Ona o̠kte go̠go̠ do̠ nãwã aṅgroṕe ạgukeda are metadea, no̠ḱo̠e tam nãwã aṅgroṕ.

Ińaḱ ńutum do̠ Baha ar ale ato ńutum do̠ Nimghuṭu. Iń do̠ kuṛi gidrạ kạnạń, ińaḱ umer do̠ 5 bo̠cho̠r. Ińren mit́ṭen kạṭić boeha menaea ńutumtae do̠ Dhumạ. Thoṛa reṅgeć lekhange jo̠jo̠m lạgit́ murukteye raga.

Ale oṛaḱre mero̠m ho̠po̠n menaea. Iń do̠ ho̠bo̠rkateń dulạṛea. Uni do̠ jo̠to̠ jo̠khećge taeno̠m taeno̠mteye pańja baṛaińa. Iń do̠ hako utu tuluć daka jo̠miń kusiaḱa. Iń do̠ MLE Iskulreń paṛhaoḱa ar dinạm Iskulteń calaḱa. Iń do̠ ińaḱ Iskul ạḍi ãṭiń kusiaḱa. Iń do̠ chubi ãkao hõ ạḍi ãṭiń kusiaḱa. Oloḱ paṛhao do̠ ạḍi mo̠jiń ạikạua. Lạṭu kateć iń do̠ didi muniń hoyoḱa.

Tumạl: Ańjo̠m jo̠ṅ jạṛ

Lukhibar hilo̠ḱ Kando̠n ar Ro̠ma do̠ baba sãote̠ Kako̠nhaṭkin calaoena. Unre̠ kako̠nhaṭre̠ do̠ mela hoyoḱkan tahẽna. Kando̠n Ar Ro̠ma tako do̠ Taliṭola re̠ko tahẽ̠na. Kando̠n ar Ro̠ma do̠ melare̠ Jililạḍu ar Jilạpikin hataokeda. Ar gateḱ lạgit́ Ro̠ṭe̠ sagaṛkin hataokeda.

Jilạpi, Jililạḍu ar Ro̠ṭe̠ sagaṛ hatao kate̠ Kando̠n ar Ro̠ma do̠ baba são oṛaḱkin ruạṛena. Oṛaḱre̠ he̠ć kate̠ Kando̠n ar Ro̠ma do̠ go̠go̠kin ho̠ho̠adea ar ạguakat́ jo̠maḱkin emadea.

Go̠go̠ do̠ Ro̠ma ar Kando̠n Jililạḍu ar Jilạpie e̠m hạṭińat́kina. Ro̠ma  ar Kando̠n Jililạḍu ar Jilạpi jo̠m kate̠ ạḍikin rạskạina. Ar gateko sãote̠ kulhire̠ Ro̠ṭe̠ sagaṛ o̠rbaṛaekin eho̠ṕena.

Ona do̠ tahẽ̠kana setoṅ din, ạḍi ãṭ lo̠lo̠ paṛaoakana. Setoṅte̠ pukhri ar gạḍiạko jo̠to̠ ro̠ho̠ṛ cabao akana. Goḍa kohõ paṛaḱ utạrakana. Ho̠rten ho̠ṛko do̠ calaḱ teko laṅgaekhan baṛ̣e dare latarre̠ jirạḱ lạgit́ko duṛuṕena.

Duṛuṕ reaṛ kate̠ onko do̠ dare coṭ sećko ko̠yo̠ḱkeda ar mit́ ho̠ṛ do̠e me̠nkeda, “Niạ do̠ ce̠t́ lekan dare kana? Un maraṅ dare ar jo̠ ma kạṭić kạṭić, ar ho̠ṛaḱ jahan kạmirege baṅ lagaḱa.” Ona ańjo̠mte̠ dare do̠ ạḍi duke ạikạukeda. Mo̠n mo̠nte̠ye̠ me̠nkeda, “ińaḱ umulregeko jirạuena, ar ińaḱ geko oktaeda!”

Raṅgaote̠ uni do̠ mit́ṭe̠n jo̠ uni ho̠ṛaḱ bo̠ho̠ḱre̠ye̠ ńurkeda, ar uni ho̠ṛe metadea, ińaḱ jo̠ Tale baṅkhan Kanṭhaṛ jo̠ leka tahẽ̠lenkhan ce̠t́ hạl hoekoḱtama?

Mit́din mit́ṭen Sim sạnḍi do̠ casoḱe goṭa keda, uni do̠ hoṛo casoḱ lạgit́ goḍae niṭ keda. Ado̠ uni do̠ ḍaṅgra ṭhene calaoena are metadea e ḍaṅgra goḍań si lạgit́ ma go̠ṛo̠ańme. Iń do̠ ạḍigiń ạujhaṛgea ar bạń go̠ṛo̠ daṛeama.

Sim sạnḍi do̠ mero̠m ṭhene calaoena are metadea e mero̠m goḍań si lạgit́ ma go̠ṛo̠ańme. Iń do̠ ạḍigiń ạujhaṛgea ar bạń go̠ṛo̠ daṛeama.

Sim sạnḍi eskar tege goḍae sikeda. Ona tayo̠m uni do̠ hoṛo ro̠ho̠e lạgit́ arhõ ḍaṅgra ar mero̠m ṭhene calaoena are metat́kina, hoṛoń ro̠ho̠e lạgit́ ma go̠ṛo̠ạńben. Unkin do̠kin menkeda ạḍiliń ạujhaṛgea bạliń go̠ṛo̠ daṛeama.

Sim sạnḍi do̠ eskar tege hoṛoe ro̠ho̠e keda. Hoṛo do̠ ạḍi mońj geleyena ar beleyena. Hoṛo get́ ar dal lạgit́ arhõ unkin ṭhene calaoena menkhan unkin do̠ bạkin go̠ṛo̠adea. Sim sạnḍi do̠ eskar tege hoṛoe get́keda, dal keda ar caole kateye daka keda. Ona o̠kte mero̠m ar ḍaṅgra kin hećena arkin metadea ạliń hõ daka emalińme. Sim sạnḍi do̠e metat́kina iń eskargeń kạmi akada iń eskargeń jo̠ma.

Rubi bạbu do̠ Sạpạri, Kanṭhaṛ ar Jạnum dareye̠ ro̠ho̠e akada. Rubi bạbutako oṛaḱ lahare̠ mit́ṭe̠n ul dare menaḱa. Darere̠ thoka thoka ul jo̠ akana. Uni do̠ darere̠ de̠ćkate̠ bele ule̠ tiạḱkeda. Bele ul do̠ ạḍi ãṭge sebela.

Rubi takoaḱ oṛaḱ kuḍạmre̠ aema Kaera dare menaḱa. Kaera darekore̠ khạdhi kạndhi Kaera jo̠ akana. Uni do̠ dinạmge jo̠ye̠ jo̠ma. Jo̠ jo̠m do̠ ho̠ṛmo̠ lạgit́ jạruṛa.

Reaṛ okte cẽṛẽ do otre duṛuṕ kate jeḍeroḱkan tahẽkana. Ona okte toyo do bại bạite hećkateće ger kedea. Cẽṛẽ do toyowaḱ moca khon bańcao lạgit́te ạḍi ãṭe kurumuṭukeda. Menkhan bae daṛelena. Cẽṛẽ doe menkeda, alom jomeńa, bilikaḱgeń. Bili hopon kate lạṭuḱako, lạṭu kate bele hoponoḱako ar aema cẽṛẽ ko hoyoḱa. Ar oṛaḱre duṛuṕ kate mimit́ goṭeć katem jom daṛeakoa.

Cẽṛẽ aḱ katha ańjomte toyo do ạḍie kusiyena. Duṛuṕ kate jodi cẽṛẽ ren Raj iń hoyoḱ, bạń goćmea. Toyo do cẽṛẽye aṛaḱ kadea. Rạskạte cẽṛẽ do dare ḍạrre aṕena. Ar toyo do cahaṕ kateye koyoḱkeda.