Aema din laha reaḱ katha. Mit́ bir-gajaṛre ạḍi utạr cẽṛẽ-cipṛutko basoḱkan tahẽkana. Mit́te sulukreko tahẽkana. Ackage ona birre maraṅ utạr Hạti he̠ćena. Hạti aḱ ma ente maraṅ okoć hoṛmotae,,,,!! Jaṅgatae moṭa macha. Ekal sũṛtae ma sermae tiog leka,,,,! Nawa peṛa daram lạgit́ jo̠to̠ cẽṛẽ-cipṛut́ko he̠ć samṭaoena. Hạti acaḱ hoṛmo reaḱ dil daṛe go̠ro̠baḱ kana. Ạḍi kajake taraj garajena. Uniaḱ taraj garaj aṅjomte goṭa bir-gajaṛ dalkaoena.

Cẽṛẽ ciprut́ko do̠ bo̠to̠rteko tharbasaoena, ar goḍoko hõ bhugạḱte bo̠lo̠yena. Eṭaḱ eṭaḱ jib-janwarko hõko dạṛ rophayena . Nonkage dinko calao idiyena. Ackage mit́din Hạti aćaḱ sũṛte Je̠l ho̠po̠ne tul rakaṕkedea are capat́ giḍikadea. Onka leka kạṭić janwar muć jaṅgatey lebet́ gańjaokedea. Noa ńelte birren raj Tạruṕ hõ bo̠to̠r ehoṕadea. Ar Kul hõ hạti aḍepase calaḱ baṅe rebenoḱkan tahẽkana. Ạḍi muskil dosareko tahẽkana sanam janwar ko. Onate jo̠to̠ as bhorsa Toyo cetanre.

Ado nindara leka Toyo aćaḱ bud ạkile so̠do̠rket́a. Hạti ṭhene he̠ćena are joharae kana, E maharaj am co jo̠to̠ janwar kho̠nem sẽṛa ar daṛege. Sạrige am do̠m so̠ro̠sgea. Amaḱ do̠ rajaḱ duṛuṕaḱge lek kantama. Dela iń sãote. Gaḍa hanasare sanamko am taṅgire menaḱ hataṛkoa, joharamako mente. “Hạti noa aṅjomte mo̠nre rạska capeadea. Ado̠ hạti sãoe mohnḍayena. Inạ tayom hạti do̠ gaḍae paera paromkeda. Hạti mon montey khondroṅkeda, nui kạṭić Toyo gaḍae paromen khan enḍekhan cedaḱ in do̠ bạń daṛeaḱa? Jo̠to̠ khonge maco̠ń sẽṛa ar dilange. Tinre gaḍae pheḍena hamal hoṛmo karonaḱte unumoḱe dhurạuena. Ado̠e karajoḱ kana ma rukhiạińpe, menkhan celege bako rukhiạledea, bickom sanamko rạskạko bujhạukeda. Arko memenkana, nit do̠le sạdhinena ar heseć seḱrejo̠ḱko portonkeda.

Sikhạuna: Nijte go̠ro̠boḱ do̠ baṅ bogea.

Mit́ṭen Kul Toyo sabea mentey dho̠mkaokedea. Toyo do̠ ekal Kule nehõrae kana, E maharaj niạ dhaoteć ikạkạńme. Ińaḱ sareć jiṅgi am sebareń jamaṛkoḱa honaṅ. Jo̠to̠waḱgeń kạmitama. Jãhãn kamkajre bạń eḱṛe botećkema. Toyo aḱ nonkan se̠be̠l-so̠ṛo̠m kathatey khalas kadea.

Inạ tayom Kul do̠ Toyo batlaoadea, Calaḱte iń lạgit́ mit́ṭen janwar saṕ ạguạńme. Kulaḱ batlao leka bir sendrae mohnḍayena. Me̠nkhan celege bae ńamlet́koa. Ackage ać samaṅre mit́ṭen Gadhae he̠ćena. Ado̠ Toyo do̠ uni Gadhae metadea, ‘ E Gadha boeha un kho̠n amge co̠ń ńam baṛaet́me. Bir-gajaṛren maharaj am lạgit́ kuṛại ante tạṅgi tãṛãḱre menaea. Onate nẽotame lạgit́iń he̠ćakan do̠.

Enḍekhan Me dela iń saõ, amtet́ge kuṛại ataṅme. Ado̠ Toyo aḱ kathate mạluṅkate Gadha do̠ uni sãoe mohnḍa maṛaṅena. Kul ṭhen mohńjam torage ekal jhapṭaoate saṕe dilkeda. Me̠nkhan Gadha do̠ bo̠to̠rtey tharbasaoena are dạṛ pharakkeda. Niạ dhao Kul do̠ Toyo cetanre ạḍi ãṭe edreyena. Cet́ lekanićem ạgukedea. Baḍagiri! Ma mucạt́ dhao ạtiń emamkana. Do̠ calaojoṅme, Gadha ruạrem. Arhõm kại lekhan bạń ikạmea. Ado̠ sạrige Toyo arhõ Gadha ṭhene calaoena are metaekana. E boeha, Kul mama ma co̠ am hạṛube mo̠nelet́. Cedaḱ bacham ḍạrkeda. Gadhae me̠n go̠t́keda, Mase̠ sạrige ado̠! Iń mań hudislet́ pase̠ć jo̠meń lạgíte nonkaḱ kan tahẽkana.

Dela enḍekhan, inạ tayom arhõkin calaoena. Niạ dhao Kul aćaḱ kusi-sana leka Gadha sap kate raktaoate cusạu go̠ć kedea. Ado̠ Toyo metadea, tin dhạbić bạń hijuḱ ma pahra hataṛem nahak. Toyo menkeda, Ṭhikgea maharaj.

Mit́ dhao mit́ṭen horo dare umulrey jirạujoṅ kan tahẽkana ar ona darere mit́ṭen cẽṛẽ aḱ tukạ tahẽkana. Un jo̠khenge horo do̠ cẽṛẽ metaekana, ‘Cet́lekan tukạm benaojoṅ kana? Noare baṅdo menaḱ cal-chạuni baṅdo jãhãn cõ̠hõ̠ḱ! Amaḱ tearaḱ tukạ kho̠naḱ ińaḱ oṛaḱ oka do̠ deare menaḱtiń ńeloḱte hõ napaegea.

Ado̠ cẽṛẽ roṛ ruạṛadea, “ Sạrige ńeloḱte ạḍi bạṛićgea, Me̠nkhan ińiń tearakat́ oṛaḱ ạḍigeń dulạṛeda. Ado̠ Horo hõe menkeda, Oṛaḱtam metaḱme tukạ nonka bạṛić, pase̠ć ińaḱ biń kạńcur ṭhaṕraḱem lalocaḱ kana”.

Ado̠ onka leka cẽṛẽye menkeda, Oṛaḱtiń bạṛićgea, Menkhan noare ińren gharońj hoṛko são gateko hõko tahẽ daṛeaḱa. Ar amaḱ ṭhapṛaḱ ńeloḱte napaegea, Enrehõm eskargea. E̠nte am são okoe hõ baṅko tahẽ daṛeaḱa.

Mit́din Somraṭ Akbor ar Birbol kin gapalmaraoeda, mit́ okte ackage Birbole kuklikedea- Ma se̠ lạitalaṅme, Dhạrtire jo̠to̠ kho̠n maraṅ hạtiạr cet́ kana me̠nte? Birbole roṛ ruạṛadea, Jo̠to̠ kho̠n maraṅaḱ hạtiạr do̠ Biswạs metaḱme mo̠nre biswạs tahẽn jạruṛa.

Birbol aḱ nonkan roṛ ruạṛte Abbar ạḍigan bae uput́lena. Onate mo̠nrey gathao do̠ho̠kada. Are hudiskeda okte nạpitreń bidạu legaea nahaḱ.

Mit́din Akbor ren hạti pal kho̠n mit́ṭen hạti paglayena. Hạtitko pagla lekhan khańcareko do̠hokakoa, je̠no okoeaḱ hõ aloe laksan. Ado̠ Akbor hõ noa ạt se̠ opso̠rrege Birbol aḱ keṭeć biswạs bidạue kurumuṭukeda, Cet́lekate nui hạti kho̠n rukhiại ńama honaṅ. Onate Raj sabhate hạjiroḱe metawadea.

Ar note Maharaj Somraṭ aćren kạmiạkoe batlaoket́koa, Birbole he̠ćlen khan khańca jhićkaḱpe nahaḱ. Inạkate menwana, ńel maṛaṅlegeń cet́ leka biswạsge maraṅ hạtiạr kana me̠nte.

Birbol do̠ Raj sabhate seṭeren torage, uni hạtiaḱ khańcako jhićkeda. Uni pagla hạti ma Birbol ńelte e̠kal aḍrao aḍraote uni se̠ngey dạdạṛ kan. Me̠nkhan hạtiaḱ nonkan dạr hijuḱ ńelte Birbol do̠ mo̠netey hudiskeda, pase̠ć Somraṭaḱ batlao kangea. Ińaḱ biswạs bidạu lạgit́ege nonkae kạmikana. Birbol sạrige ạḍi calak-cạtur ar kajaḱ biswạs monan hoṛ kanae. Ado̠ oka sećge bae dạṛleda. Ente dạrkate jahan porho bạnuḱanaṅ.

Ar hạti ma birbol ṭhene he̠ć so̠rena. Ackage Birbol mit́ṭen seta hạti laha lahate dạdạr kane ńel ńamkedea. Ado̠ Birbol ạḍi harephare setawaḱ tayom jaṅga saṕkate hạti se̠ne capat́kedea. Pagla Hạti ma e̠kal uni setawaḱ bhuḱ ańjo̠mte tharbasaoena. Onate laha se̠n baṅkate tayo̠m se̠ngeye pạclạ ruạṛena. Note Akbor sanamaḱe ńeńel kan tahẽkana. Ar nõḱõe nonkate porman keda, Dhạrtire jo̠to̠ kho̠n maraṅ hạtiạr do̠ Biswạs kana. Ente jahan dhiri tạnićtey capat́lekhan sạrige hạti arhõ bạṛti raṅgaokoḱa. Me̠nkhan ạḍi bud salaḱ hạti bo̠to̠re uduḱadea. Ar hạti uni ṭhen senoḱe bo̠to̠rena. Birbol aḱ mo̠nre diṛho biswạs tahẽkantaete hạti kho̠n rukhiại ńamkeda. Enḍete bujhạuḱ kana, sạrige Dhạrtire jo̠to̠ kho̠n maraṅ hạtiạr do̠ Biswạs kana mente.

Mit́din mit́ gạ̃ṛĩ mo̠n asketkate gaḍa ḍhipteye taṛamet́ tahẽkana. Gaḍa ḍhipre mit́ṭen Horo do̠ setoṅrey duṛuṕ akan tahẽkana. Ado̠e kulikedea, Cedaḱ boeha mo̠nem asket́ akat́tama? Ona kathage alo̠m mena, casa ko sanam kaera dareko tot́ giḍiakada, jo̠maḱ cet́ge bạnuḱanaṅ, Onate gaḍa ḍhipteń taṛam kana, ar Gạ̃ṛĩ aḱ mẽtdaḱ ṭhoṕ ṭhoṕ jo̠ro̠ḱ kantaea.

Ado̠ gạ̃ṛi aḱ duk ńelte Horo mãyã he̠ćadea, “ are metaekana haere boeha cedaḱem raraḱkana. Dela alaṅ pạri kaeralaṅ cas-abadjoṅa. EnḍekhanThoṛadin tayom alaṅaḱ pho̠so̠l alaṅgelaṅ jo̠ma nahaḱ. Dela enḍekhan.

Ado̠ Gạ̃ṛĩ ar Horo mit́ sãote birkin monhḍayena, one dhaṅgladhas akat́ kaera dare samṭaokate ar mit́ ṭoṭhare ro̠ho̠ekin goṭakeda. Me̠nkhan Gạ̃ṛĩ do̠e bhạbit́ena, ać ma ente alagatege jahan daregey de̠ć daṛeaḱ, ar jãhãn usul dare muthnire kaera dare ro̠ho̠e lekhan Horo ar bae tioḱ daṛeaḱa. Ado̠ sạrige Gạ̃ṛĩ do̠ kaera dare nạrko̠ṛ dare co̠t́rey do̠ho̠ oṭokada.

Me̠nkhan Horo do̠ ạḍi jo̠to̠nte kaera dare bit́keda. Thoṛadin tayom unkin do̠ dare ńeńelkin he̠ćena. Ado̠ Gạ̃ṛĩ aḱ do̠ baṅ o̠mo̠n akantaea, dare cetanre tis hõ jahan dare hoyoḱa? Ar Horo aḱ dare mońjge hara akantae ar dare pe̠re̠ć kaera jo̠ beleakana. Ado̠ Gạ̃ṛĩ ma ekkal darere de̠ćkate kaera jo̠mem dhurạuen. Dayage bacha dare latarre duṛuṕ akan Horo do̠e menet́kana, “ De̠se̠ boeha thoṛa emạńme, nase̠tege hoyoḱtińa.

Me̠nkhan Gạ̃ṛĩ do̠ cet́ ar Horoaḱ kathae disạea? Uniaḱ kạmigema eṭaḱko e̠ḱṛeko. Ado̠ Gạ̃ṛĩ aḱ nonkan beohar ńelte Horo do̠ edre ńõḱena. Ado̠e hudiskeda, cekateń ucrạuea. Nonka men jo̠khenge disạ he̠ćdea.

Gạ̃ṛĩ tin okte jo̠m bhagaokate dare co̠ṭregey jạpit́ akat́ tahẽkana, un okte Horo do̠ ạḍi utạr ro̠ho̠ṛ maḱko dare gonḍarey bit́keda. Ar ackage kikiạuena, “ Tayaṅe hijuḱkana boeha. Horo aḱ kikiạu ańjo̠mte Gạ̃ṛĩ do̠e ebhenena, ar ekkal ona do̠ho̠ akat́ maḱregey ńurena. Ado̠ uni Horo do̠ Gạ̃ṛĩ kaṭra kuṭrạ kateć ako jạt ṭhene ạkhrińkedea. Ar hijuḱ okte memen hõ bae hiṛińleda, Ape jạtiaḱ je̠lpe jo̠jo̠m kana.

Horo aḱ nonkan dil ńelte Gạ̃ṛĩ Raj ekkale raṅgaoena, onko do̠ akoaḱ ṭheṅgakote dadalko ńir he̠ćena. Pạhilte Horo dadalko he̠ćen khan Horo do̠ landau dhurạuena are menkeda, Ińaḱ noa ṭhapra rạput́kate dadal okoege bape daṛeaḱa. Un okte budgạṛiạ Gạ̃ṛĩ do̠e metat́koa, delabon daḱrebo giḍikaea. Onkoaḱ katha anjo̠mte dayage bacha Horo do̠e raḱ mẽt́hakeda. Are memenkana alope giḍińa, baṅkhaniń gujuḱa honaṅ. Ado̠ okoe hõ uniaḱ katha bako hetaowada. Sạrige daḱreko giḍikedea. Inạ thoṛa ghạṛi khange maraṅ utạr lobster antey buhelena. Ado̠ uni lobster ńelte Gạ̃ṛĩkoaḱ uli daḱ sarsaoentakoa. Ado̠ko kuliede kana, cekam saṕkedea nun maraṅ lobster do̠? Ạḍi sibil so̠ṛo̠mko kulikedea. Cedaḱiń lạiapea? Ado̠ko mit́julteko kulikana, ma lạime, jao hiloḱge mit́ṭenkate lobster saṕkatećle jo̠m ocomea nahaḱ. Ar amaḱ jiṅgire jãhãnaḱge bam haronoḱa. Nunạḱpe nehõrạń kana,enḍkhaniń lạia, menkhan biswạs alope at́tińa. Baṅa, Baṅa, lạime boeha. Ma ańjo̠mtabonpe, pheḍoḱ okte ińaḱ jaṅgare dhiriko toljoṅ katećiń unumena, un oktege lobster iń jo̠jo̠me he̠ćena, ar saṕkateń rakaṕena.

Ar ona katha leka sạrige Gạ̃ṛĩko hõ akoaḱ jaṅgare dhiri tolkateć daḱreko donkeda. Menkhan dayage ar bako rakaṕ daṛeada. Nonkage ańjo̠moḱa, Gạ̃ṛĩ koaḱ nonkan hewa menaḱtakoa. Onko do̠ hoṛko birudre ghạṛi ghạṛi nonka kathako cala ar akote akoko bhagao ocoḱa.

Mit́ ho̠ṛren mit́ṭen ạsul Geḍey tahẽkana. Uniren barea ho̠po̠nkin tahẽkantaea. Uni eṅgat Geḍe do̠ jao hiloḱge ho̠po̠nkin sãotey dãṛã baṛae, jo̠m ńu are e̠ne̠ć khilạḍoḱ kan tahẽkana. Ar ńuhum torage ho̠po̠nkin oṛaḱteye ạguyet́kin tahẽkana. Ado̠ nonkage ạḍi boge dinko khemaoet́ tahẽkana.

Jao hiloḱ lekage uni Geḍe ar ho̠po̠nkin oṛaḱteko he̠ć samṭaoena. Ackage enhiloḱ mit́ṭen Toyo onḍey he̠ćena are Eṅgat Geḍey metaekana, ho̠po̠nkin do̠ń jo̠mkintama. Ma dinkin e̠m maṛaṅạńme. Toyo aḱ nonkan kathate Geḍe do̠ bo̠to̠rtey tharbasaoena ar e̠kkal kajakte raraḱe dhurạuena. Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ… Pẽḱ pẽḱ pẽḱ…

Ado̠ Geḍeren mạlik raḱe ańjo̠m ńamkeda. Ado̠e hudisket́a, sạrige pase̠n jãhãn mũskilrey paṛaoakana. Ado̠ uni ho̠ṛ do̠ maṛaṅ o̠kho̠ć ṭheṅgawantey calaoena. Ṭheṅgawantey laha hijuḱkan ho̠ṛ ńelte Toyo do̠ jiwi ṭonṭa bo̠to̠rtey dạṛjo̠ṅana. Enkatege eṅgat Geḍe ar ho̠po̠nkin bańcaoena, ado̠ kusi ar rawal mo̠nanteko japit́ maṛaṅkeda.

Gaḍate beṛhae ạcurakan mit́ bir gajaṛre mit́ṭen Tạruṕ ho̠po̠ne baso̠k kan tahẽkana. Ńeloḱte huḍińe tahẽkanre hõ ạḍi budane tahẽkana. Aćaḱ jo̠maḱ aćtegeye tumạljoṅa. Me̠nkhan jao hiloḱge goḍo ar hako bạṛite jo̠met́ko tahẽkana. Din hiloḱ cet́ tejo̠ ar hako jo̠m mońj ạukạuḱa? E̠ṭakaḱ hõ jo̠m jạruṛa.

Mit́din ackage jel (Deer) jo̠m sanakedea. Unạḱ Kul Jel sendrayet́ko! E̠nrehõ mẽt́ mũṭhạn thoṛa Tạruṕ lekage. Onate birren ado̠mko do̠ Tạruṕ re̠n kạki menteko manotea. Noa do̠ ko̠m katha kana? Me̠nkhan uni Jel ma goć kate bae jo̠m daṛeae. Arhõ ać ṭhene ho̠ho̠ae rehõ bae so̠ro̠ḱa. Ado̠ onate mo̠ne mo̠nete ganḍonena, cet́iń cekaea mente?

Ado̠ mit́din huḍiń macha mit́ṭen Jele ńam maṛaṅkedea. Ho̠po̠n Tạruṕe kulikedea, Oprom kadińgeam? Jel do̠ bo̠to̠r salaḱe roṛ ruạṛkeda opromge. Ạte ńam baṛaet́kan Tạruṕ do̠ Jele metaekana, Baḍaeam iń do̠ Sundorbon re menae Royel Bengol Tiger ren huḍiń mama kạnạń.

Onḍegeń tahẽkana. Me̠nkhan ho̠r hiṛiń khạtir iń gogo são nonḍege menańa. Ạpuń arhõ mit́ṭene bạhujoṅ akante raṅgaote sạńgińre menaḱ hataṛlińa. To̠be ạḍi usạra onḍeliń ruạṛa. Nitiń menlekhangeń jo̠m daṛeama. Menkhan jãhãeak bạń laksana. Onate bạń jo̠m akat́mea. Me̠nkhan iń são jãhãe bạṛiće beoharle khan sạjại hisạbteń jo̠megea. E̠kkal Jel bo̠to̠rtey tharbasao cabayena. Ado̠ ńelme uni Tạruṕ do̠e bujhạukeda sạrige Jel do̠e bo̠to̠roḱ kana mente. Onatey metadea, cet́iń metama onage kạmime enḍekhaniń aṛaḱ kama honaṅ. Jel tharbasaoateye menkeda, jo̠to̠waḱgeń ańjo̠ma. E̠nrehõ alom jo̠meńa.

Tạruṕ ma ạḍi ãṭe rạskạyena! ado̠e metadea, ma e̠kkal sojhete teńgonme, jo̠hań jal tama. Jel do̠ sojhetey teṅgoyena ar Tạruṕ do̠ uniaḱ joha jajale dhurạuena. Ạḍi kajake heseć sekrećjoṅana, ente nonkatege toa jo̠m sana do̠e meṭaoket́a. Tạruṕ mo̠n mo̠ntey hudisana tinạḱ bebuj Jel kanae nit hõ bae oprom daṛeadińa. Jel bạń jo̠mledea menkhan joha toń jalket́taea. Nonkae hudiskeda.

Nit́ hõ Tạruṕ sanamko ṭhene lại daṛeaḱa, Jel ńamkate hõ: enhõ bạń jo̠m akadea. Jelaḱ johań jal akada khạli! Ado̠e bujhạukeda, ńeloḱte huḍińre hõ Jel iń tioḱ daṛeaegea.

Ạḍi sedae reaḱ katha. Mit́ bir gajaṛre mit́ṭen budgạriạ Toyo basoḱ kan tahẽkana. Jo̠maḱ tumạl lạgit́ mit́din do̠e oḍokena. Dãṛã dãṛãte ackage tạńkhiket́a, e̠kkal ạḍi maraṅ hạtie go̠ć akana. Reṅgeć tirpido̠ḱ aste hạti ṭhene he̠ć sorena. Ado̠ ḍaṭate hạtiaḱ harta ge̠r chạḍao lạgit́ bogetey kurumuṭukeda, enrehõ baṅgeye daṛeada. Onate hạti je̠l bae jo̠m daṛeada. Ado̠e loraoen khan go̠ć hạti aṛeregeye duruṕ hapeyena.

Thoṛa ghạri tayo̠m ackage dhạcri kule raraḱkane ańjo̠m ńamkeda. Uni dhạcri Kul do̠ Toyo se̠ne hijuḱ kana. Ado̠ bo̠to̠r salaḱ Toyo do̠e menkeda, Ma hijuḱme Maharaj. Am lạgit́ge nui hạti enan kho̠niń ho̠rho̠ akadea. Ma jo̠me talaṅme. Kul do̠ e̠kkal kajaḱteye aḍraoena. Uni do̠e menkeda, ińaḱ jo̠maḱ integeń tumạla. Jãhãeaḱ emaḱ do̠ o̠ho̠ń jo̠mkea.

Ado̠ Kul do̠ onḍe kho̠ne se̠n maṛaṅena. Inạ mit́ ghạṛi tayo̠m khange seṭerena mit́ṭen Tạruṕ. Toyo do̠ muluć mạchi landawante Tạruṕe ataṅ daramkedea. Menkedae, ma hijuḱme! Hạti je̠l thoṛa cakha ạikạume. Nui do̠ Kule tumạl akadea.

Tạruṕ do̠e menkeda, Kule tumạl akat́ jo̠maḱ do̠ cekań jo̠makea? Toyo do̠e menkeda, am do̠ e̠kkal cet́ge alo̠m bhạbiḱa. Kule hećlen khangeń baḍae ocomea nahãḱ. Un okte dạṛ go̠lme nahãḱ.   Tạruṕ do̠e guni-bhạbiyena, ado̠e menkeda sạri kathage co̠ṅe metạńkana. Ado̠ jo̠jo̠me dhurạuena. Tạruṕ do̠ aćaḱ laser ḍaṭate ạḍi usạra hạti harta ge̠r chaḍao kate je̠le oḍoḱkeda.

Un ghạrić Toyo do̠ e̠kkale hape akan tahẽkana. Tin oktey ńelkeda Tạruṕ do̠ hạtiaḱ sanam je̠l do̠e ge̠r oḍoḱkeda, ado̠ ackagey aḍraoena, E boeha ma se̠njoṅ talaṅme, Ente̠ Kule he̠ć seṭerena. Toyo aḱ katha ańjo̠mte Tạruṕ do̠ onḍe kho̠ne dạṛ pharakena. Ado̠ ma ńelme uni budgạriạ Toyo ma ạḍi ãṭe rạskạyena. E̠nte hạtiaḱ je̠l jo̠mre jãhãn eṭkeṭõṛẽ baṅ hoeletaea ạḍi algateye jo̠mkeda.

Jãhã mit́ atore mit́ṭen re̠ṅge̠ć casa hoṛe girobasoḱ kan tahẽkana. Pe̠a gidạr-pidạr ar bạhuante ạḍi muskil ar haro̠n salaḱ dine khemaoet́ kan tahẽkana. Mit́ din oṛaḱ racare duṛuṕ kateće ganḍo̠no̠ḱ kana, mit́ṭen gunidar se̠ guni Geḍeye kirińea mente. Uni Geḍe tin oktey bele ehoṕa, un okte casa do̠ ona bele hạtiạrey ạkhrińa ar kạudi sõćjoṅa.

Inạ tayo̠m dosar hiloḱ mit́ṭen kạṭić macha ho̠po̠n Geḍe hạtiạ kho̠ne kiriń ạgukedea ar oṛaḱ ạgukateć ạḍi ãṭe jogao jo̠to̠nkedea. Nonka ńel ńeltege Geḍe do̠e harayena. Ackage mit́ din casa do̠e ńelkeda Geḍe do̠ mit́ṭene bele akada. Ona bele ńelte casa hoṛ do̠ aćren bạhutaeye ho̠ho̠wadea. Unkin Bana ho̠ṛge Bele kin saṕ legaket́ ma sona reaḱ bele kan! Noa ńelte bana ho̠ṛ kusite rạskate e̠kkal e̠ne̠joḱkin lagaoena.

Arkin menet́ kana niạ dhao do̠laṅ kisãro̠ḱa nahãḱ. Nonkage jao hiloḱ uni Geḍe do̠ mit́ṭen kateće belea. Ar ona bele uni reṅgeć casa ho̠ṛ do̠ hạtiạre ạkhriń kateć gharońj reaḱ jo̠to̠ lekan okolạnaḱ ko̠e kulạu anṭaoet́ kan tahẽkana. Me̠nkhan mit́ okte uni casa ar ać bạhuaḱ lob-laloć do̠ ḍher idiyentạkina. Jao hiloḱ nonka mit́ṭen kateć bele baṅ ạkhriń kateć uni Geḍeaḱ laćre tinạḱ bele menaḱ onako jo̠to̠ get́ oḍok kateć mit́ dhaore ạkhriń lekhan aema kạuḍiren mạlik kin hoyoḱa mente nonkakin hudiskeda.

Ado̠ nonka me̠nkate dosar din do̠ casa ar ać bạhu uni Geḍa aḱ laćkin get́ paṛaḱket́taea. Ar ma ńelme Geḍe aḱ laćre ma cet́ belege bạnuḱ. Ona ńelte casa do̠ ạḍi ãṭe bhabnayena ar duṛuṕ hape kateć raraḱe dhurạuena.

Mit́din ackage Gopal do̠ ruạ ńamkedete raj sabhate bae se̠n daṛeada. Maharaj sabha ren eṭaḱ hoṛkoante nana parkan gapalmarao jo̠khe̠n ackagey me̠n go̠t́ket́a, ińaḱ noa sabha re jãhãe onkanić bạnuikadea je̠, Gopal aḱ oṛaḱ khon jãhãnaḱe kombṛo ạgu daṛeaḱa? Ape modre jãhãe noae kạmi daṛeaḱ khan, e̠nḍekhan thoṛagan re hõ uni do̠ ona kạmi ńutumte kuṛại iń emaea. Ape modre jãhãepe re̠be̠n kana se̠ cet́ ma lại tabonpe.

Maharajaḱ kuṛai (puruskar) reaḱ lalcate Gopal aḱ oṛaḱ kombṛo calaḱ me̠nte bako re̠be̠nlena. E̠nte uni do̠ ạḍi husiạr ar calak-cạtur hoṛ kanae. Uniaḱ mẽt́ kho̠n eṛaṅoḱ  alga katha do̠ baṅ kana. Saṕ ńamlen khan do̠ rukhiạ bạnuḱa me̠nteko baḍae kan tahẽkana. Uni do̠ mit́ din baṅ mit́ din badla do̠e hataogea honaṅ ar un hiloḱ uni then kho̠n bańcaoḱ reaḱ jãhãn ho̠r baṅ tahẽna.

Me̠nkhan thoṛa din tayo̠m Bhupal ńutuman mit́ hoṛ do̠ kurại reaḱ katha ańjo̠mte e̠kkalteye re̠be̠n baṛago̠lena. Inạ tayo̠m mit́ din nijhum tala ńindạ Gopal aḱ oṛaḱ kombṛoe lạgit́e bo̠lo̠yena. Me̠nkhan Gopal do̠ laha khonaḱge Raj sabha reaḱ kathae baḍae ńam akat́ tahẽkana. Onate Gopal do̠ uni lubhiạ hoṛ ghuṛmucạue lạgit́e sapṛao akan tahẽkana.

Gopal do̠ laha kho̠naḱ sapṛao akan leka mit́ṭen kanḍare hoṛkoaḱ mạilạte (pạikhana) pereć kate ona cetanre  thoṛa kạuḍi do̠ho kate ać hõ ona aṛeregeye oko akan tahẽkana. Uni hoṛ do̠ tin okte Gopalaḱ oṛaḱe bo̠lo̠yena, ńel kedea kanḍa pereć kạuḍi ko do̠ho akada. Ar bilo̠m baṅkate ạḍi usạra ona pereć kanḍa dipilkate mohnḍayen torage Gopal do̠ ḍhikate oney dipil akat́ kanḍae capat́ rạput́keda. Ar ona kanḍare tahẽkan sanam mạilạ do̠ uni ho̠ṛaḱ hoṛmore pasnao cabayena. Un okte do̠ aṅga marsal akan tahẽkana. Ado̠ Gopal do̠ oṛaḱ kho̠n oḍok kateć uni hoṛe kuliede kana, Henda ho, kombṛo do̠ hoyentama se̠ baṅa!

Maharaj do̠ Gopalaḱ katha ańjo̠mte ạḍitet́e rạskạyena. Ente ar mit́ dhao Gopalaḱ bud-ạkil reaḱ oprom do̠e ńamkeda. Metaḱme rạskạte Maharaj do̠ uni hõ mit́ sãe (100) mo̠ho̠r sandese emadea.