Mit́ten Kạhũ dare dạrrey aṕ akana. Ar mocaretae mit́ kuṭrạ je̠l. Ado̠ Toyo do̠ ona aṛetege calao jo̠ṅkan tahẽkanae. Khange reṅgećkede khan ạt ńam baṛaeye kurumuṭuket́a. Hudis anae baṅma cekate noa je̠l kuṭrạń hataojoṅa mente. Enḍekhane hudis ńamana, ado̠ Kạhũ se̠ć ạḍi mạhĩr salaḱe beṅget́ rakaṕket́a. Khange memene po̠rto̠nket́a, E boeha ńeloḱte ạḍigem mońjgea. Amaḱ hoṛmo ar mẽt́ muṭhạn ekal sajao akantama. Cẽṛẽkoren Raj hoyoḱ jạruṛ kantama.

Me̠nkhan amaḱ aṛaṅ hõ muṭhạn leka hoelen khan, sebel-so̠ṛo̠m enḍekhan ạḍi boge hoekoḱa honaṅ. Menkahn hae! eṭaḱ cẽṛẽ-ciprut́ko leka o̠ho̠gem sereń daṛeaḱa!  Toyo aḱ nonkan kathate Kạhũ bae hape tahẽlena. Ekal hulạs sạhnạsate raraḱe ehoṕkeda, Ar ńelme Kạhũ aḱ moca kho̠n je̠l  ma ńurhạ go̠t́ena. Ńurhạ torage calaḱ-cạtur Toyo ma ekal je̠l kuṭrạ ge̠r kateć dạdạṛe dhurạuena.

Sikhạuna: Aema lelha hoṛkoge menaḱkoa, o̠ko̠e do̠ hoṛak nonkan kathate bulạukate, nijaḱ so̠mpo̠t khonko eṛaṅo̠ḱ kana.

Sạrdi lo̠lo̠ setoṅ din tahẽkana. Mit́ṭen Kạhũ ạḍige daḱ tetaṅkedete hante nahte uḍạu baṛae kan tahẽkanae. Mit́ okte Tetaṅte ekale lorao cabayena. Menkhan okarege ńũia mente daḱge bae ńamlaḱa. Enḍekhane as chuṭạuena.

Inạkate ackage pharaḱre rạput́ kanḍa hanḍhae ńel ńamket́a. Ekal harephare uḍạu senkate kanḍarey duṛuṕena. Kanḍa o̠yo̠ṅket́ma thoṛage daḱ. Ado̠e ńũia mentey kurumuṭukeda, o̠ho̠gey daṛelena. Un okte Khange kanḍa pheḍre dhiri kuṭrạ ńur akane ńelńamket́a. Dhiriko ńelte bud he̠ćadea.

Ado̠ sạrige mit́ mit́te ona dhiri kuṭrạ kanḍa bhitrireye ńurho̠ket́a. Enḍekhan daḱ do̠ bại bạite kanḍa cetan se̠ćge rakaṕ ehoṕena. Ado̠ mit́ okte Kạhũ aḱ moca ṭhenge daḱ he̠ć so̠rena. Inạkate kạhũ do̠ ńũket́e tetaṅe meṭaoket́taea, ar khulạsa montey uḍạu maṛaṅena.  

Mit́ṭen muć ạḍige tetaṅkedea. Khange daḱe ńuia mente gaḍa ḍhipteye he̠ćena. Ado̠ huḍiń macha Muć ekal daḱreye buhelena. Un jo̠khe̠n daṛe ḍạrre Potame tahẽkana. Ado̠e hudiskeda, bańcaoe jạruṛa. Onate khange Potam do̠ Muć samaṅre mit́ṭen sakame ńurho go̠t́kada. Uni Muć paera paerate sakamrey dećena. Ado̠ Potam ona sakam ge̠rkate coṭ ghuṭu se̠ne rakaṕkeda. Nonkate Muć do̠ muskil dosa khone bańcaoena. Enhiloḱ khonage ạḍikin gateyena.

Onka leka, aema din tayom mit́ gaḍa aṛe senge mit́ sikạri he̠ćena. Ti re tae aḱ-ạ̃pạ̃ṛĩ. Ado̠ daṛere aṕ akan Potamrege mẽt́ ma ḍhaṅentae. Sikạri ekal uni Potam se̠ćge tuńa mentey nońjorkeda. Ado̠ khange uni Muć hõ sikạriạwaḱ jaṅgae gerket́taea. Enḍete sikạriạwaḱ ti khonaḱ ạ̃pạ̃ṛĩ e̠ṭaḱ se̠ćge sa-calaoena. Ar un jokhen uni Potam hõ usạra harephare uḍạu maṛaṅena. Nonkatege uni Potam hõ muskil dosa khone bańcaoena.

Mit́ ṭhoṕ dumur rasa jo̠ro̠ akana! Ona aṛete mit́ṭen huḍiń macha muće paro̠m calaḱkan tahẽkana. Dumur rasa heṛan heṛem sõte ekale teṅgo go̠t́ena. Ado̠e menkeda, hapese! Thoṛań jo̠m legalege, ado̠ń monhḍaḱa nahak. Mit́ so̠rko̠t́e jo̠mkeda….ah, ạḍi napae ạikạuḱkan, ar mit́ so̠rko̠t́ iń jo̠mlege. Ado̠ sạrige ar mit́ so̠rko̠t́e jo̠m maṛaṅkeda.

Ado̠ khange taṛame dhurạuena. Taṛam kan okte luṭire laṭkaoakan dumur rasae me̠lo̠t́e kan tahẽkana. Ado̠e hudisket́a, nunạḱ sebel-so̠ṛo̠m dumur rasa ar thoṛań jo̠mlekhan cekakoḱa honaṅ??? Arhõe ruạṛ he̠ćena. Pạhil dhao latar utạr reaḱe jo̠mleda. Onatey hudisket́ pase̠ć cetan reaḱ arhõ sebel machagea. Ado̠ bại bạite jo̠ro̠ akan dumur rasa cetane de̠ćena. De̠ćkate ekal aṛe̠ć gaṛe̠će jo̠mjoṅ kana. Jo̠m jo̠mte mit́ okte lać phulạuentaya. Ar ńelme jaṅgataema hamalte bạibạite dumur rasa bhitrtege bo̠lo̠ḱkantae. Ado̠ ackage jaṅga se̠će tạńkhikeda. Menkhan un okte ạḍige bilomena. Ạḍi muruḱe kurumuṭukeda, ona kho̠naḱ rakaṕ lạgit́.

Menkhan baṅa, o̠ho̠gey daṛelena. Ente sanam hoṛmo rasate jodbodao akantaea. Bańcaoḱ reaḱe kurumuṭuket́ rehõ baṅgey bańcao daṛeada. Ekal mũ-moca dumur rasate e̠se̠t́entaea, ar sahe̠t́ hõ bondo̠ḱ kantaea. Mucạt́re ona dumur rasa bhirirege thạli kateće go̠ćena.

Sikhạuna: Abo̠aḱ noa dhuṛi dhạrti hõ mit́ ṭhoṕ dumur rasa lekana. Tinaḱ do̠ noa rasare thoṛatege tirpitoḱ onkan kogeko bańcao se̠ rukhiạko ńama. Menkhan okoe do̠ noare bulạu se̠ mạluṅko tahẽn ar bego̠r bac-bicạrtegeko jo̠m idi nonkan hoṛko do̠ mit́din uni muć lekage muskilre paṛaoḱ hoyoḱtakoa. Un okte ona kho̠n okoege o̠ho̠ko rukhiạ daṛeakema.

Ạḍi sedae reaḱ katha, mit́ birre ạḍi utạr simko tahẽn kan tahẽkana. Ado̠ ako ako bhitrire ekal dal-dapal lạpạhạṛhaiteko gujuḱ kan tahẽkana. Birren Raj do̠ simko jogao jo̠to̠n ar boge tahẽn khạtir  Toyo pahra hisạbtey do̠hoket́koa. Un kho̠naḱge mit́ bạhni benao rakaṕena. Sim rukhiạ bạhini me̠nteko cikhnạkeda. Enrehõ simkoaḱ gujuḱ soṅkha o̠ho̠ge hapelena.

Ado̠ birren raj bạhini ren maraṅ mukhiại ho̠ho̠adea, are kuklikedea, cekate nunạḱ simko goć maraoḱ kana mente? Ado̠e menkeda, simko ạḍiko bebạṛićgea. Mitṭeṅ saṕ katećiń kuklikedere, Cekate nunạḱ dope lạṛhại kana ar hạtiạr baṅ okarepe ńańam kan! Ado̠ kãṛãṅ ńũt tala ńindạ hạtiạr sesendrakin monhḍayen khan, laha kho̠n ańjo̠m akat́ thoṛa simko ale cetanreko jhapṭaoena. Ar onate ale hõle jhapṭao maṛaṅket́koa.

Ado̠ one onkatege thoṛako goćena. Nonkate uni budgạṛiạ Toyo do̠ birren raje eḱṛekae kana. Khange ona birren simko khon ańjo̠mena, baṅma Toyoge sanam sime jo̠m maraoet́koa mente. Birren raj do̠e menet́kana ohoge hoe daṛeaḱa honaṅ. Onka leka mit́din Toyo do̠ thoṛa simkoe saṕ idiket́koa. Ar enhiloḱge bir aṛe mit́ nalare simko goćakanko ńel ńamena. Enhiloḱ jo̠to̠ko pusṭạuena, sạrige Toyo aćtet́ge sime jo̠m maraoet́koa mente.  

Aema din laha reaḱ katha. Mit́ bir-gajaṛre ạḍi utạr cẽṛẽ-cipṛutko basoḱkan tahẽkana. Mit́te sulukreko tahẽkana. Ackage ona birre maraṅ utạr Hạti he̠ćena. Hạti aḱ ma ente maraṅ okoć hoṛmotae,,,,!! Jaṅgatae moṭa macha. Ekal sũṛtae ma sermae tiog leka,,,,! Nawa peṛa daram lạgit́ jo̠to̠ cẽṛẽ-cipṛut́ko he̠ć samṭaoena. Hạti acaḱ hoṛmo reaḱ dil daṛe go̠ro̠baḱ kana. Ạḍi kajake taraj garajena. Uniaḱ taraj garaj aṅjomte goṭa bir-gajaṛ dalkaoena.

Cẽṛẽ ciprut́ko do̠ bo̠to̠rteko tharbasaoena, ar goḍoko hõ bhugạḱte bo̠lo̠yena. Eṭaḱ eṭaḱ jib-janwarko hõko dạṛ rophayena . Nonkage dinko calao idiyena. Ackage mit́din Hạti aćaḱ sũṛte Je̠l ho̠po̠ne tul rakaṕkedea are capat́ giḍikadea. Onka leka kạṭić janwar muć jaṅgatey lebet́ gańjaokedea. Noa ńelte birren raj Tạruṕ hõ bo̠to̠r ehoṕadea. Ar Kul hõ hạti aḍepase calaḱ baṅe rebenoḱkan tahẽkana. Ạḍi muskil dosareko tahẽkana sanam janwar ko. Onate jo̠to̠ as bhorsa Toyo cetanre.

Ado nindara leka Toyo aćaḱ bud ạkile so̠do̠rket́a. Hạti ṭhene he̠ćena are joharae kana, E maharaj am co jo̠to̠ janwar kho̠nem sẽṛa ar daṛege. Sạrige am do̠m so̠ro̠sgea. Amaḱ do̠ rajaḱ duṛuṕaḱge lek kantama. Dela iń sãote. Gaḍa hanasare sanamko am taṅgire menaḱ hataṛkoa, joharamako mente. “Hạti noa aṅjomte mo̠nre rạska capeadea. Ado̠ hạti sãoe mohnḍayena. Inạ tayom hạti do̠ gaḍae paera paromkeda. Hạti mon montey khondroṅkeda, nui kạṭić Toyo gaḍae paromen khan enḍekhan cedaḱ in do̠ bạń daṛeaḱa? Jo̠to̠ khonge maco̠ń sẽṛa ar dilange. Tinre gaḍae pheḍena hamal hoṛmo karonaḱte unumoḱe dhurạuena. Ado̠e karajoḱ kana ma rukhiạińpe, menkhan celege bako rukhiạledea, bickom sanamko rạskạko bujhạukeda. Arko memenkana, nit do̠le sạdhinena ar heseć seḱrejo̠ḱko portonkeda.

Sikhạuna: Nijte go̠ro̠boḱ do̠ baṅ bogea.

Mit́ṭen Kul Toyo sabea mentey dho̠mkaokedea. Toyo do̠ ekal Kule nehõrae kana, E maharaj niạ dhaoteć ikạkạńme. Ińaḱ sareć jiṅgi am sebareń jamaṛkoḱa honaṅ. Jo̠to̠waḱgeń kạmitama. Jãhãn kamkajre bạń eḱṛe botećkema. Toyo aḱ nonkan se̠be̠l-so̠ṛo̠m kathatey khalas kadea.

Inạ tayom Kul do̠ Toyo batlaoadea, Calaḱte iń lạgit́ mit́ṭen janwar saṕ ạguạńme. Kulaḱ batlao leka bir sendrae mohnḍayena. Me̠nkhan celege bae ńamlet́koa. Ackage ać samaṅre mit́ṭen Gadhae he̠ćena. Ado̠ Toyo do̠ uni Gadhae metadea, ‘ E Gadha boeha un kho̠n amge co̠ń ńam baṛaet́me. Bir-gajaṛren maharaj am lạgit́ kuṛại ante tạṅgi tãṛãḱre menaea. Onate nẽotame lạgit́iń he̠ćakan do̠.

Enḍekhan Me dela iń saõ, amtet́ge kuṛại ataṅme. Ado̠ Toyo aḱ kathate mạluṅkate Gadha do̠ uni sãoe mohnḍa maṛaṅena. Kul ṭhen mohńjam torage ekal jhapṭaoate saṕe dilkeda. Me̠nkhan Gadha do̠ bo̠to̠rtey tharbasaoena are dạṛ pharakkeda. Niạ dhao Kul do̠ Toyo cetanre ạḍi ãṭe edreyena. Cet́ lekanićem ạgukedea. Baḍagiri! Ma mucạt́ dhao ạtiń emamkana. Do̠ calaojoṅme, Gadha ruạrem. Arhõm kại lekhan bạń ikạmea. Ado̠ sạrige Toyo arhõ Gadha ṭhene calaoena are metaekana. E boeha, Kul mama ma co̠ am hạṛube mo̠nelet́. Cedaḱ bacham ḍạrkeda. Gadhae me̠n go̠t́keda, Mase̠ sạrige ado̠! Iń mań hudislet́ pase̠ć jo̠meń lạgíte nonkaḱ kan tahẽkana.

Dela enḍekhan, inạ tayom arhõkin calaoena. Niạ dhao Kul aćaḱ kusi-sana leka Gadha sap kate raktaoate cusạu go̠ć kedea. Ado̠ Toyo metadea, tin dhạbić bạń hijuḱ ma pahra hataṛem nahak. Toyo menkeda, Ṭhikgea maharaj.

Mit́ dhao mit́ṭen horo dare umulrey jirạujoṅ kan tahẽkana ar ona darere mit́ṭen cẽṛẽ aḱ tukạ tahẽkana. Un jo̠khenge horo do̠ cẽṛẽ metaekana, ‘Cet́lekan tukạm benaojoṅ kana? Noare baṅdo menaḱ cal-chạuni baṅdo jãhãn cõ̠hõ̠ḱ! Amaḱ tearaḱ tukạ kho̠naḱ ińaḱ oṛaḱ oka do̠ deare menaḱtiń ńeloḱte hõ napaegea.

Ado̠ cẽṛẽ roṛ ruạṛadea, “ Sạrige ńeloḱte ạḍi bạṛićgea, Me̠nkhan ińiń tearakat́ oṛaḱ ạḍigeń dulạṛeda. Ado̠ Horo hõe menkeda, Oṛaḱtam metaḱme tukạ nonka bạṛić, pase̠ć ińaḱ biń kạńcur ṭhaṕraḱem lalocaḱ kana”.

Ado̠ onka leka cẽṛẽye menkeda, Oṛaḱtiń bạṛićgea, Menkhan noare ińren gharońj hoṛko são gateko hõko tahẽ daṛeaḱa. Ar amaḱ ṭhapṛaḱ ńeloḱte napaegea, Enrehõm eskargea. E̠nte am são okoe hõ baṅko tahẽ daṛeaḱa.

Mit́din Somraṭ Akbor ar Birbol kin gapalmaraoeda, mit́ okte ackage Birbole kuklikedea- Ma se̠ lạitalaṅme, Dhạrtire jo̠to̠ kho̠n maraṅ hạtiạr cet́ kana me̠nte? Birbole roṛ ruạṛadea, Jo̠to̠ kho̠n maraṅaḱ hạtiạr do̠ Biswạs metaḱme mo̠nre biswạs tahẽn jạruṛa.

Birbol aḱ nonkan roṛ ruạṛte Abbar ạḍigan bae uput́lena. Onate mo̠nrey gathao do̠ho̠kada. Are hudiskeda okte nạpitreń bidạu legaea nahaḱ.

Mit́din Akbor ren hạti pal kho̠n mit́ṭen hạti paglayena. Hạtitko pagla lekhan khańcareko do̠hokakoa, je̠no okoeaḱ hõ aloe laksan. Ado̠ Akbor hõ noa ạt se̠ opso̠rrege Birbol aḱ keṭeć biswạs bidạue kurumuṭukeda, Cet́lekate nui hạti kho̠n rukhiại ńama honaṅ. Onate Raj sabhate hạjiroḱe metawadea.

Ar note Maharaj Somraṭ aćren kạmiạkoe batlaoket́koa, Birbole he̠ćlen khan khańca jhićkaḱpe nahaḱ. Inạkate menwana, ńel maṛaṅlegeń cet́ leka biswạsge maraṅ hạtiạr kana me̠nte.

Birbol do̠ Raj sabhate seṭeren torage, uni hạtiaḱ khańcako jhićkeda. Uni pagla hạti ma Birbol ńelte e̠kal aḍrao aḍraote uni se̠ngey dạdạṛ kan. Me̠nkhan hạtiaḱ nonkan dạr hijuḱ ńelte Birbol do̠ mo̠netey hudiskeda, pase̠ć Somraṭaḱ batlao kangea. Ińaḱ biswạs bidạu lạgit́ege nonkae kạmikana. Birbol sạrige ạḍi calak-cạtur ar kajaḱ biswạs monan hoṛ kanae. Ado̠ oka sećge bae dạṛleda. Ente dạrkate jahan porho bạnuḱanaṅ.

Ar hạti ma birbol ṭhene he̠ć so̠rena. Ackage Birbol mit́ṭen seta hạti laha lahate dạdạr kane ńel ńamkedea. Ado̠ Birbol ạḍi harephare setawaḱ tayom jaṅga saṕkate hạti se̠ne capat́kedea. Pagla Hạti ma e̠kal uni setawaḱ bhuḱ ańjo̠mte tharbasaoena. Onate laha se̠n baṅkate tayo̠m se̠ngeye pạclạ ruạṛena. Note Akbor sanamaḱe ńeńel kan tahẽkana. Ar nõḱõe nonkate porman keda, Dhạrtire jo̠to̠ kho̠n maraṅ hạtiạr do̠ Biswạs kana. Ente jahan dhiri tạnićtey capat́lekhan sạrige hạti arhõ bạṛti raṅgaokoḱa. Me̠nkhan ạḍi bud salaḱ hạti bo̠to̠re uduḱadea. Ar hạti uni ṭhen senoḱe bo̠to̠rena. Birbol aḱ mo̠nre diṛho biswạs tahẽkantaete hạti kho̠n rukhiại ńamkeda. Enḍete bujhạuḱ kana, sạrige Dhạrtire jo̠to̠ kho̠n maraṅ hạtiạr do̠ Biswạs kana mente.

Mit́din mit́ gạ̃ṛĩ mo̠n asketkate gaḍa ḍhipteye taṛamet́ tahẽkana. Gaḍa ḍhipre mit́ṭen Horo do̠ setoṅrey duṛuṕ akan tahẽkana. Ado̠e kulikedea, Cedaḱ boeha mo̠nem asket́ akat́tama? Ona kathage alo̠m mena, casa ko sanam kaera dareko tot́ giḍiakada, jo̠maḱ cet́ge bạnuḱanaṅ, Onate gaḍa ḍhipteń taṛam kana, ar Gạ̃ṛĩ aḱ mẽtdaḱ ṭhoṕ ṭhoṕ jo̠ro̠ḱ kantaea.

Ado̠ gạ̃ṛi aḱ duk ńelte Horo mãyã he̠ćadea, “ are metaekana haere boeha cedaḱem raraḱkana. Dela alaṅ pạri kaeralaṅ cas-abadjoṅa. EnḍekhanThoṛadin tayom alaṅaḱ pho̠so̠l alaṅgelaṅ jo̠ma nahaḱ. Dela enḍekhan.

Ado̠ Gạ̃ṛĩ ar Horo mit́ sãote birkin monhḍayena, one dhaṅgladhas akat́ kaera dare samṭaokate ar mit́ ṭoṭhare ro̠ho̠ekin goṭakeda. Me̠nkhan Gạ̃ṛĩ do̠e bhạbit́ena, ać ma ente alagatege jahan daregey de̠ć daṛeaḱ, ar jãhãn usul dare muthnire kaera dare ro̠ho̠e lekhan Horo ar bae tioḱ daṛeaḱa. Ado̠ sạrige Gạ̃ṛĩ do̠ kaera dare nạrko̠ṛ dare co̠t́rey do̠ho̠ oṭokada.

Me̠nkhan Horo do̠ ạḍi jo̠to̠nte kaera dare bit́keda. Thoṛadin tayom unkin do̠ dare ńeńelkin he̠ćena. Ado̠ Gạ̃ṛĩ aḱ do̠ baṅ o̠mo̠n akantaea, dare cetanre tis hõ jahan dare hoyoḱa? Ar Horo aḱ dare mońjge hara akantae ar dare pe̠re̠ć kaera jo̠ beleakana. Ado̠ Gạ̃ṛĩ ma ekkal darere de̠ćkate kaera jo̠mem dhurạuen. Dayage bacha dare latarre duṛuṕ akan Horo do̠e menet́kana, “ De̠se̠ boeha thoṛa emạńme, nase̠tege hoyoḱtińa.

Me̠nkhan Gạ̃ṛĩ do̠ cet́ ar Horoaḱ kathae disạea? Uniaḱ kạmigema eṭaḱko e̠ḱṛeko. Ado̠ Gạ̃ṛĩ aḱ nonkan beohar ńelte Horo do̠ edre ńõḱena. Ado̠e hudiskeda, cekateń ucrạuea. Nonka men jo̠khenge disạ he̠ćdea.

Gạ̃ṛĩ tin okte jo̠m bhagaokate dare co̠ṭregey jạpit́ akat́ tahẽkana, un okte Horo do̠ ạḍi utạr ro̠ho̠ṛ maḱko dare gonḍarey bit́keda. Ar ackage kikiạuena, “ Tayaṅe hijuḱkana boeha. Horo aḱ kikiạu ańjo̠mte Gạ̃ṛĩ do̠e ebhenena, ar ekkal ona do̠ho̠ akat́ maḱregey ńurena. Ado̠ uni Horo do̠ Gạ̃ṛĩ kaṭra kuṭrạ kateć ako jạt ṭhene ạkhrińkedea. Ar hijuḱ okte memen hõ bae hiṛińleda, Ape jạtiaḱ je̠lpe jo̠jo̠m kana.

Horo aḱ nonkan dil ńelte Gạ̃ṛĩ Raj ekkale raṅgaoena, onko do̠ akoaḱ ṭheṅgakote dadalko ńir he̠ćena. Pạhilte Horo dadalko he̠ćen khan Horo do̠ landau dhurạuena are menkeda, Ińaḱ noa ṭhapra rạput́kate dadal okoege bape daṛeaḱa. Un okte budgạṛiạ Gạ̃ṛĩ do̠e metat́koa, delabon daḱrebo giḍikaea. Onkoaḱ katha anjo̠mte dayage bacha Horo do̠e raḱ mẽt́hakeda. Are memenkana alope giḍińa, baṅkhaniń gujuḱa honaṅ. Ado̠ okoe hõ uniaḱ katha bako hetaowada. Sạrige daḱreko giḍikedea. Inạ thoṛa ghạṛi khange maraṅ utạr lobster antey buhelena. Ado̠ uni lobster ńelte Gạ̃ṛĩkoaḱ uli daḱ sarsaoentakoa. Ado̠ko kuliede kana, cekam saṕkedea nun maraṅ lobster do̠? Ạḍi sibil so̠ṛo̠mko kulikedea. Cedaḱiń lạiapea? Ado̠ko mit́julteko kulikana, ma lạime, jao hiloḱge mit́ṭenkate lobster saṕkatećle jo̠m ocomea nahaḱ. Ar amaḱ jiṅgire jãhãnaḱge bam haronoḱa. Nunạḱpe nehõrạń kana,enḍkhaniń lạia, menkhan biswạs alope at́tińa. Baṅa, Baṅa, lạime boeha. Ma ańjo̠mtabonpe, pheḍoḱ okte ińaḱ jaṅgare dhiriko toljoṅ katećiń unumena, un oktege lobster iń jo̠jo̠me he̠ćena, ar saṕkateń rakaṕena.

Ar ona katha leka sạrige Gạ̃ṛĩko hõ akoaḱ jaṅgare dhiri tolkateć daḱreko donkeda. Menkhan dayage ar bako rakaṕ daṛeada. Nonkage ańjo̠moḱa, Gạ̃ṛĩ koaḱ nonkan hewa menaḱtakoa. Onko do̠ hoṛko birudre ghạṛi ghạṛi nonka kathako cala ar akote akoko bhagao ocoḱa.