Mit́ṭen lubhiạ kisãṛ hoṛe tahẽkana. Ackag mit́din mit́ṭen pori (Fairy) ńamkedea. Enhiloḱ uni pori do muskilre paṛao akan tahẽna. Uni Pori aḱ  bo̠ho̠ḱ uṕ do dare rehet́re aṭakaolentaea. Ado uni lubhiạ hoṛ do pori goṛoae baṅkate uni ṭhen aćaḱ sana se kukmu purạutae lạgit́te khojkeda.

Ado pori ṭhene khojkeda jemo̠n, jãhãṭaḱgeń joteṭ́ onage sona hoekoḱma. Khange pori hõ uniaḱ kathae hẽḱ ada. Inạkate uni hoṛ noa bhage sombat aćren bạhu ar gidrạtae lại hạpạṭińakina mente oṛaḱe mohnḍayena. Cedaḱ je, nonkan ạsirbad pori emadea ar bae bilom daṛeada. Onate harephare mohnḍayena. Khange dạṛate ńir calaḱ kana ar horre tinạḱ dhirikoe ńamet́ sanamaḱe joṭet́ toraeda. Ar pori aḱ katha lekage sanamaḱ do sonaḱ kana.

Oṛaḱe seṭeren khan kuṛi gidrạtae ać baba ńelte dạr ạgukeda. Adoe hẽokede khan uni hõe sonayena. Ina tayom lubhiạ hoṛ aćaḱ bhule aṅgoćkeda. Ar nonkan kạmi khạtir bogete mon dukena are kastaoena.

Sikhạuna: Sạrige lob-laloć do baṅge bogea, ente noa lob-laloć doe jarkharmea.

Barea gate koṛa hãhãkar hortekin calaḱkana. Ado tala horre thoṛakin jhogṛ̣ayen khan, mit́ gate do eṭagaić gate thapa got́kedea. Khange thapae jomket́ gate do, gitilre olkeda: teheń ińren gate thapakedińa.

Inạkate sanamaḱ hiṛińkate arhõ taṛamkin dhurạuena. Khange hor aṛere mit́ṭen jharnakin ńamkeda. Ado bana paromoḱkin po̠rto̠keda. Menkhan uni thapa kedeić gate do paeraḱ bae baḍaekan tahẽkana, ado jaṅga leṅjet́entaete daḱre unumoḱkan tahẽkana.Ado eṭagić gate do uni bańcaokedete jharnakin paromkeda.

Ado onkage uni gate hõ dhiri danderre olkeda, gatetiń teheń gujuḱ khone bańcaokedeńa. Ado gatetae-e kuklikedea, pạhil ma gitilre, niạ ma dhirirem ol cikhnạket́a. Cedaḱ nonka dom olket́a?

Adoe roṛ ruạrket́a, khạṭige thapakedeńam noa do jahan maraṅ ghoṭa baṅ kana. Menkhanem bańcaokedeń noa kangea maraṅaḱ do. Noa kathage hoṛko samaṅre jaejug ṭikạu tahẽkoḱma. Bạṛićaḱ ko baṅ moneaḱ hoyoḱa. Ar noa porcar katećhõ cet́ bhạlạige bạnuḱanaṅ.

Bhage bhage katha ar ghoṭnako disạ dohoe hoyoḱa. Enḍekhan eṭaḱko hõ nonkage bhage kạmireko lahaḱa. Sạrige kạṭić kạṭić dukanaḱ kathako monere baṅbon rebet́ma. Rạskạwanaḱ kathako monere baha mala leka gathaokaḱ hoyoḱa. Jãhãe hoṛe upkạrlem khan onage disạekaḱ jạruṛ kana. Nonkate eṭaḱko hõ akoaḱ jionre bhage kạmire udgạuko ńamjoṅa.

Mit́ṭen Gadha ar Toyo bogete bir-gajaṛ bhitrirekin rapṭa rạpṭiḱ kana. Gadha doe menet́ kana ghãs do sasaṅgea. Ar Toyo doe menet́ kana baṅ ghãs do hạriạṛgea. Ado tinre rapṭa rạpṭitekin laṅgayena, Unre birren Raj Tạruṕ ṭhenkin sa-calaoena. Ado ạkin talare rapṭa rạpṭi reaḱ karontet́kin lại jạhiradea. Ado Tạruṕ do unkinaḱ sanamaḱ kathae aṅjomket́tạkina.

Khange unkinaḱ katha lekate goṭakeda. Metaḱme Toyo do mit́ cando lạgit́ kạd oṛaḱre dohokedea. Ar onkage uni Gadha doe khalas kadea. Khan Toyo do Tạruṕ-e kuklikedea, nõḱõe nonka hok bicạrtam? Ghãs do cet́ baṅ hạriạra? Tạruṕe roṛ ruạṛkeda, hẽ hạriạṛgea. Sanamkobon baḍaea ghãs do hạriạṛgea. Noa khạtirte kạd oṛaḱreń dohoket́mea, cedaḱje baḍaekate rehõ Gadha sãoem rạpṭa rạpṭi akana.

Sikhạuniạ: Ne̠be̠tar jugre nonkage adom adom hoṛko ạuṛiaḱteko rapṭa rạpṭi kana. Ente  onkan hoṛ menaḱkoa, okoeaḱ sạriạḱtet́em baḍae. Menkhan nonkan hoṛko sãoem rapṭa rạpṭilenkhan cetat́tege acaḱ bhul o̠ho̠gey aṅgoćkea. Menkhan thoṛa Gadha lekan hoṛ hõ menaḱ baṛakogea, baṅ ganoḱ kathako roṛa. Onkan hoṛkoaḱ kathako tisge alom hetaowaḱa. Enḍekhanem jitạuḱ arem bhagao ocoḱ. Noa do alom moneaḱa.

Mit́ṭen Bujhạntar hoṛe tahẽkana. Uni hoṛaḱ mit́ṭen kuń tahẽkantaea. Mit́din ona kuń do casa hoṛ ṭhene ạkhrińkeda. Khange inạ dosar din hiloḱ uni casa daḱ ạguia mente senena. Ado uni hoṛ casae metaekana, eken kuń motogecoń ạkhriń akat́ daḱ do baṅa.

Enḍekhan uni casa hoṛ ạḍi muskilrey paṛaoena. Cet́e cekaea mente baṅgey bujhạu daṛeaḱ kana. Unre uni do Akbar aḱ bạisitey calaoena. Ado Birbol noa mamla tojbij lạgit́e nẽhõr ocoyena.

Inạkate dosar hiloḱ kuń ạkhriń akat́ hoṛ ar casa bana hoṛge Raj sabhatekin hećena. Ado inạ mit́ kathage onḍe hõye roṛket́a. Kuń motogeń ạkhriń akat́a, daḱ do baṅa.

Noa katha ańjomte Birbol do menkeda, E gate, enḍekhan noa daḱ do ocogtam, baṅkhan noa lạgit́ mạsul emoḱ hoyoḱtama. Cedaḱje kuń amaḱ do baṅ kana, casawaḱ kana.

Un jokhen bud sećte ạḍige khaṭo baḍhoyena ar nacare aṭkarkeda. Unre aćaḱ bhule bujhạukeda ar sanamko ṭhen ikại khojkeda.

Mit́ṭen phorasi hoṛe tahẽkana. Uniren mit́ṭen seta ar Miru cẽṛẽkin tahẽkantaea. Ado̠ uni seta jaoge aema lekan cecet́aḱe emawade tahẽkana. Metaḱme khilạḍ ar kạmiko. Tinre cet́leka hukumae onka lekagey kạmiet́ tahẽkana.

Menkhan Miru cẽṛẽ do kạmige bae cet́akat́ tahẽkana. Uni cẽṛẽ jao ghuṛige bo̠ko̠t́ bo̠ko̠t́e roṛet́kan tahẽkana. Becariạ seta cetanre ạḍitet́e sordaroḱ kantahẽkana. Ać hõ uni hoṛ lekage setae hukumaea. Ekal raṅgao macha beṅget́kate ạcuede tahẽkana.

Uni kisạ̃ṛ hoṛ jaoge dokante jomaḱ ạgui kolekan tahẽkana. Enḍekhan seta do jotoko ṭhen ạḍi oprome tahẽkana. Ado tinre calaḱ unregeko emae kantahẽna ar kisạ̃ṛaḱ ńutumre hisạbko ol dohoyet́ tahẽkana.

Mit́din hisạbe duṛuṕen khan baṅge milạuḱkantaea. Ente tin dhaoe kolkade ona khonaḱ bạṛti ol akana. Bickom noa reaḱ karontet́ baṅgey bujleda. Inạkate mit́dine tạṅkhikeda, mit́ jokhen Miru cẽṛẽ ackage mengot́keda, ṭukri ạguime ar dokan calaḱme.

Becariạ seta baṅgey rebenkana, khan Miru cẽṛẽ do arhõ raṅgao ńõktey metadeam do calaḱme. Ado uniaḱ katha leka calaoente mit́ ghạṛite jomaḱ ạgukate cẽṛẽ samaṅadea. Ado uni seta onḍegey hapeyena, asoḱ kantahẽkane jomaḱe ńama. Menkhan uni cẽṛẽ bahre seće lagakedea. Ar enḍete eskargey jomkeda. Enhiloḱ khonaḱe bujạukeda, cekate hisạb nonka baṅ milạuḱ kana mente. Noḱoe ado nonka Miru cẽṛẽaḱ budtae.

Skul re mit́din Mithun aćren gate ko tuluće ńapamena. Ado boge-judạe kuliket́koa. Khange onko modre Ratun ńutuman koṛae teṅgoyente mengo̠t́keda, Am begor cekate boge le tahẽ daṛekea! Ado Limon ńutuman koṛae mengo̠t́keda, hape thiroḱme. Amge cet́leka menama? Nisṛauate menkeda cet́ khobor? E gate Laćtam do cet́ dosa hoyena? Bogete co̠ṅ ro̠ho̠ṛ akantam. Khange Mithun raḱ mẽt́hãte roṛkeda, noa ko din bogeteń uihạrket́pea.

Iń gogo khạtir lać reaḱ nonkan dosa hoe akantińa. Baṅma din dinte lać moṭa calaḱkantińa, onate cet́ge bae jom ocońkana. Iń sãope tahẽlen khan tinạḱ mońj mońjiń jom ńamkea.

Un jo̠khen ackage Mitu mengo̠t́keda, onatege amaḱ lać do dhạrti lekage go̠lo̠ḱ kantama? Ma thir baṛakoḱpe. Delabon fuchka jo̠jo̠mbo senlenge. Khan jo̠to̠ gate mit́te jo̠jo̠-heṛem mesalate fuchkako jo̠mket́a. Ado̠ Mitu menkeda, E Mithun teheń khon fuchka jo̠m mucạt́ena bujhạu?

Enḍekhan Mithun raṅgaote menkeda ṭhikgea. Ado Mitu arhõe menkeda noa dhạrtire gogo lekan mońj gate mente celege bạnuḱkoa. Onate teheń khonge am gogoaḱ katha lekam calaḱa, enḍekhan lać hõ baṅ moṭaḱtama. Baṅkhan Hạti leka amaḱ lać hõ haraḱtama honaṅ. Nonkako sikhạu paṛhaokedea. Mithun hõ gatekoaḱ kathae hetaoaḱtakoa. Ar jo̠m baṛakate jo̠to̠ko mit́te oṛaḱko ruaṛ baṛaena.

Mạhir Saichuri ar Bahadur Besra ạḍi gatekin tahẽkana. Unkin do din mujurikin kạmia. Ar nonkate gharońjkin calaoet́ tahẽkana. Ado mit́din duṛuṕ pante kate duk-suk reaḱ kin galmaraoeda. Arkin kukli kana cekatelaṅ kisạ̃ṛoḱa? Mạhir Saichuri doe menkeda mit́ṭen bisesi gại laṅ kirińea. Ar kin goṭakeda bana hoṛte gại kin kirińea mente. Mạhir Sạ̃icuri do oṛaḱ sen kate ać bạhui metadea, ar bạhu do noa katha ańjom kateće rạskạyena. Khan ać ṭhen thoṛa gohona tahẽkana ona do ać jãwãeye emadea. Ar nonkage Bahadur Besra hõ ać bạhu tuluće galmaraokeda. Ać bạhu doe menkeda judi gại-e goćlen khan cet́ hoyoḱa? Gại hõe goćena ṭaka hõ cabayena. Mạhir Sãicuri metaeme, hape nitoḱ do baṅ! Taenomte gạilaṅ kirińea..

Thoṛa din tayom unkin bar gate do ar hõkin ńapamena. Mạhir Sãicuri do Bahadur Besrae kulikedea, cet́ gate gạilaṅ kirińea? Bahadur Besrae menkeda, judi gại-e goć emanlen khan? Mạhir Sãicuri menkeda, ạuri kiriń khonge gại gujuḱ reaḱgem roṛkeda. Ar Bahadur Besra do mirũ cẽṛẽ roṛ leka inạ mit́ kathage roṛkeda “gại-e goćlen khan hape nitoḱ do baṅ thoṛaṅ cintạ ńõḱlenge.

Mạhir Saichuri do hạṭiạ calaokate mit́ṭen gại-e kiriń ạgukedea ar gại jotone dhurạuena. Ar laha khon ạḍi besto din khemaoe ehoṕena.Nitoḱ Mạhir Saichuri do lahate leka gateko sãote bae ńapam daṛeaḱ kana. Ar note Bahadur do din mujur kạmi kate ńuhum seć gateko sãoe ńapamoḱa. Are gại kirińkate Mạhir Sãicuri do ạḍi jhamelarey menaea ar bae dãṛã daṛeaḱ kana.

Ar note Mạhir do gại toae ạkhrińa, ar mihũ hopon hõ ńam kedea. Ar nonkate Mạhir Saichuri do bại bạite kisạ̃rena. Ente gại ko saṅgeyentaea.

Noa golpo khon cet́ bo cet́ daṛeaḱea.

1. Hape nitoḱ do baṅ! Noako menkate aṭkao baṅbon tahẽna.
2. Bạṛićaḱ ko (Negetive) cintạ bo̠ho̠ḱre baṅ ạgui hoyoḱa.
3. Bhageaḱ ko (Positive) em cintại ar ona lekam kạmi, enḍekhan mońj jo̠ ńam re hõm ńamgea.
4. Jhuki bam hatao lekhan bam jitạu daṛeaḱa. No risk no again,

Mit́ṭen kaṭkom gharońjrenko são jola aṛerey baso̠ḱkan tahẽkana. Uni eṅgat kaṭromren ạḍi utar sagal sagal ho̠po̠nko tahẽkana. Onko ho̠po̠n mit́te jola aṛere sińke sińko eneć- khilạḍ baṛaekan tahẽkana. Ar cando hạsur torage oṛaḱteko he̠ć samṭaoḱa.

Eṅgat kaṭkom jaoge aćren ho̠po̠nko aema lekatey sikhạukoa. Cekate mońjem hoyoḱa, cekatem maraṅoḱa, cet́ leka beohar hoyoḱa emanteaḱ ko. Jaogey cet́ako kan tahẽkana, ho̠po̠nko hõ onka lekako calaḱkan tahẽkana. Mit́din onkage eṅgat́tet́ do ho̠po̠ntet́e metaekana, E beṭa jãhãtinrege laha se̠ćem taṛama. Tis tayom seć alogem taṛama. Ar lo̠ho̠t́ dhirire alo̠gem gasaoḱa, bujhạu?

Noa katha ańjomte ho̠po̠n kaṭkome mengo̠t́keda, E go laha sećge calaḱmań kurumuṭu kan. Menkhan cekateń calaḱa baco̠ń bujhạu daṛeaḱ kan!

Inạkate uni eṅgat́ kaṭkom aćren ho̠po̠n laha sen taṛame uduḱaea mente kurumuṭukeda o̠ho̠gey daṛelena. Ho̠po̠ntet́ lekage ghạṛi ghạṛi jola sengey calaḱ kana. Inạkate apnar bhule aṭkar daṛeada, ar lelha bebuj hoṛ leka onḍegey duṛuṕ hapeyena.

Sikạuna: Okataḱ bam daṛeaḱ, onkanaḱ Kạmi lạgit́te o̠ko̠ege tis hõ alom cap se ucaṭea.

Mit́ṭen bir-gajaṛre siṅgho̠ Rajaḱ ạn kạnun ekal ḍher idiḱkan tahẽkana. Eṭaḱ janwarko beste sãhẽt́ hõ baṅko daṛeaḱa. Ona iạte mit́ṭen Gadha do̠ bir-gajaṛ khonaḱ calaḱa mentey hudis ganḍonena. Bir-gajaṛ deakate aḍepase jahan sarjạmin sene senjoṅa. Nonkan bo̠to̠rre tahẽ baṅkate hoṛkoaḱ kạmikaḱge bogea. Kạmi ńutumte jomaḱko emlen khange hoyoḱa. Enḍekhan reṅgeć tetaṅte haronoḱ baṅ hoekoḱa honaṅ. Cet́keka hudis-bhabna ṭhik kạm kaj hõ onka lekage. Mit́ gaḍa ḍhip ḍhipte taṛam taṛamte ạdepase sene senjoṅkan tahẽkana. Gadha do Taṛam taṛamte ene aḍepase sarjạmin sene seṭerena. Khan ackagey tạṅkhiket́ma siṅgho̠ aḱ harta ńurhạ akana. Paseć jahan sikạriạ tạnićko ńurhạ akada.

Noa ńelte Gadha ạḍitet́e kusiyena. Adoe hudiskeda nõḱõe sisirjạuic iń sene beṅget́ akat́a. Nit noa bir-gajaṛ khonaḱ ar celege baṅko laga daṛekeńa ar birren Raj lekań tahẽna. Ado̠ aḍepase sarjạmin re asrae hatao do̠e hiṛińket́a. Enḍekhan siṅgho̠ aḱ harta ho̠ṛmo̠rey hurạṛana ar janwarkoren Raj mente bhạbit́e ehoṕena. Uni ńelte birren eṭaḱ jib-janwarko ạḍitet́ bo̠to̠r caṛhaoat́koa. Ar uni Gadha ạḍitet́e kusiḱ kana. Sạrige birren Raj mentey ńumogo̠ḱ kan tahẽkana.

Tinre rạskạte khulạsate jahanaḱ memene goṭakeda, unre ekal Gadha lekagey raḱket́a. Ado̠ un jokhen ona aṛete mit́ṭen Toyo paromoḱ kan tahẽkana. Khan uni Toyo hõ dhomkaokedea. Menkhan Toyo bin bo̠to̠rte landawate metadea, E gate amaḱ aṛaṅtege oromket́mea. Baṅkhan sạrigeń dạṛ pharakkea.

Sikhạuna: Ho̠ro̠ḱ-bandenaḱ jãhãeaḱ khạṭi se aso̠l oprom do̠ baṅ kana.

Noa enećre mit́ṭen gidrạ do oṛaḱ kisạ̃ṛe hoyoḱa. Mit́ṭen gidrạ do pusiye benaoḱa. Sarećko do oṛaḱko benaoḱa. Kạṭić kạṭić koṛa ar kuṛi gidrạ joto kogeko eneć mit́ daṛeaḱa. Eneć oṛaḱ benaoḱko goṭawakan gidrạko do golte ko teṅgo ạcuroḱa. Tiko ṭapṭapaea ar mit́ṭenaḱ kạṭuṕ do eṭaḱićaḱ kạṭuṕreko haṛoṕ ocoya. Ti talka do coṭ seć tahena.

Oṛaḱ kisãṛ do ti talkare dhuṛikoye curuć idiakoa are roṛ idia, “Niạ pakharedo towa dakań doho katińa, niạ ṭaḱ redo jel dakań dohoya ar niạ redo dạl dakań dohoya.” Nonkage mimit́ phakre jom jinis reaḱ ńutum ńumteye dohoya. Adoe mena, “ Ma joe babuko, utu daka ńel hataṛtińpe. Iń do umuḱteń calaḱ kana.” Pharak ńok senkate umuḱ reaḱ kạmiye uduga, adoe ruạṛ hijuḱa. Uniaḱ umuḱ kan takre pusi do heć kate sanam pakha reaḱ utu dakae joma. Mimit́ pakha ṭhen sen kateye roṛa, “ Towa daka jom jom jom” emanteaḱ. Onko gidrạ do dhuṛi doko bujur idikaḱa.

Oṛaḱ kisãṛ do mimit́ pakha ṭhene calaḱa are kulikoa, “Nonḍe towa dakań doholeda celey jomkeda?” Emanteaḱ. Roṛ ruạṛayako, “ PUSI”. Khange oṛaḱ kisạ̃ṛ do mit́ṭen gamcha peṭerkateye saṕkaḱa ar pusiye hohowaya, “ Gunu pusi, gunu pusi”. Pusi doe hijuḱa, khange ona gamcha chiṭkiṛićteye dalea. Pusi doye dạṛa ar one tiko lap lapawakat́ ona latar latar teye guyuṅ paromoḱa. Khuḱdạuić hõ uni oka sećteye dạṛeda ontegeye guyuṅ paromoḱa. Sesre pusi doye admaruwaḱa are or giḍikaya. Eneć do nonkage calaḱa. Pạri pạrite oṛaḱ kisạ̃ṛ do pusiko benaoḱa, ạuriko ạṛisoḱ hạbić.