Mit́ okte Mit́ṭen Raje tahẽkana. Uni Raj do birre kaṭ mamaḱ lạgit́ thoṛa hoṛe hataoket́koa. Onko modre mit́ hoṛ do eṭaḱko mod khon mit́ ghạṛite ḍher kaṭe maḱkeda. Ona ńelte Raj do bogete rạskạyente uni kaṭ mamaḱić hoṛ maraṅić mente bachaokedete kuṛạie emadea. Khan uni hoṛ do arhõ rạskạte ạḍi jhũk monte kạmi ehoṕena. Pạhil candoge gel irạl (18) goṭen kaṭe maḱkeda, arhõ Raj do ạḍige kusi rạskạyena. Onkage dosar cando hõ gelmõṛẽ (15) goṭen ar tesar cando do gelbar (12( goṭen kaṭ-e maḱkeda.

Raj do pe cando tayom ńeńele hećenre uniaḱ kạmi ńelte hahaṛayena. Ente noa lahare uniaḱ kạmi ar kurumuṭu do judạge tahẽkana. Onate uni hoṛ ṭhen nonkan kạmi reaḱ karontet́e kulikedea. Kaṭ mamaḱić uni hoṛ doe roṛ ruạṛadea, E maharaj, jaoge jhũk ar kurumuṭuteń kạmikana, enrehõ cedaḱ je, kạmire thoṛań ḍhilạu akana ohogeń bujhạu daṛeaḱ kana. Pasećre umerte lahakante nonka kạmi hoyoḱ kana. Unre Raj uni hoṛe metadea, ṭhikgea, ṭeńgoć ạguitam se ńellege. Khan ona ńelket́ tayom uni hoṛe kulikedea, mase enḍekhan lạime noa candore mucạt́ dhao tis noa ṭeṅgoćem laser leda? Kaṭ mamaḱić oka roṛ ruạṛe emket́ ona ańjomte Raj arhõ ạḍi ãṭe hahaṛayena. Uni hoṛe menkeda, E maharaj jao hiloḱge thoṛa ḍher kaṭ maḱ iạte pe cando khon ṭeṅgoć laser reaḱ ạt se opsorge bạń ńam akada. Ado nit Raj ar uni hoṛ bana hoṛge kaṭ kom maḱ reaḱ karontet́kin bujhạu daṛeada.

Sikhạuna: Dhạrti jionre kamkaj são são jirạuḱ reaḱ hõ jạruṛ menaḱa. Enḍekhan kạmire kurumuṭu ar jhũk mon hijuḱa.

Mit́ṭen bir gajaṛre Siṅgho̠e tahẽkana. Ado mit́ okte uni Siṅgho do̠ bir gajaṛrege jạpit́ akat́ tahẽkana, unre mit́ṭen Goḍo do̠ uniaḱ ho̠ṛmo̠re dećkateć rạskạte khencer baṛae kana. Khange Siṅgho̠ do̠e ebhen got́ena are raṅgaoen Khan saṕkedete jome reaḱe kurumuṭukeda. Unre Toyo do̠ nehõrate Siṅgho̠e metaekana aṛaḱkạńme baṛe. Enḍekhan kathań emamkana mit́din nahaḱiń goṛo rehõń goṛowama.

Sạrige mit́din sikạriạ ko ona birteko hećente Siṅgho̠ ko saṕ idikedea. Ado̠ darere tol kate kajaḱko dalkedea. Uni Siṅgho̠ do̠ onḍe khon bańcaoḱ reaḱ jahan horge bae ńamet́ tahẽkante ãṭ aṛaṅte kikiạuate raraḱkan tahẽkana. Menkhan Goḍo do̠ uniaḱ aḍrao se raḱ aṅjomte harephare hećena ar tolakade ona babere ger kuṭrạkeda. Nonkate Siṅghoe bańcao kedea ar usạra ona bir gajaṛ khonkin dạṛ pharaḱkeda.

Mit́ṭen bir gajaṛ aṛere bar boeha koṛakin basoḱkan tahẽkana. Ado̠ maraṅić koṛa do̠ aćren huḍiń boeha ạḍi ãṭe nisrạuede tahẽkana ar uniaḱ jo̠to̠ jomaḱe jomet́ tahẽkana ar uniaḱ jo̠to̠ mońj ho̠ro̠ḱ bandenaḱe hataojoṅoḱ kan tahẽkana. Mit́din uni maraṅ koṛa do̠ hạṭiạre ạkhriń bakhra birte kaṭ mamaḱe senlena. Uni do̠ aema lekan dare dạrko mat́mat́te dãṛã dãṛãte, mit́ṭen gunidar dare ṭhene hećena. Khange ona dare ro̠ṛ go̠t́keda E boeha, dayakate alom mageńa. Aṛaḱkạń khanem, sona reaḱ apple jo̠ń emama.

Ado̠ uni koṛae rạjiyen torage darere apple jo̠ go̠t́ena. Menkhan uni koṛa do̠ monre lob-laloć hećadea. Ado̠ ona dare metaḱkana arhõ thoṛa apple den baṅkhan re̠he̠t́ sudhạń maḱ bhindạra. Uniaḱ onkan beohar ńelte jo̠ bo̠do̠lte uni koṛa cetanre sae ke sae sui-e ńurhoket́a. Tinre cando hạsuroḱ ehoṕena, uni koṛa do̠ haso jalate bhindạrena. Oṛaḱ bae ruạroḱkante huḍiń boeha do̠ bhabnate dadat́tet́ sendra senena.

Ackage tạńkhikeda dadat́tet́ aḱ hoṛmo do̠ suite pereć akana, ar duk-jala sahaokatet́ rehõ uniaḱ hoṛmo khonaḱ mit́ mit́te sanam sui-e chaḍao cabakeda. Uniaḱ ona daya mãyã ńelte maraṅ koṛa aćaḱ dos gunạḱte huḍiń boeha ṭhen ikại khojkeda. Are bo̠do̠lo̠ḱa mente ekṛaṛkeda. Ona dare do̠ maraṅ koṛawaḱ bo̠do̠lo̠ḱ ńelte kusiyena ar jạruṛ bhor sona reaḱ apple jo-e emat́kina.

Sikhạuna:

Daya Mãyãwan hoyoḱ do̠ jạruṛgea ente noa lạgit́te jaoge kuṛaiyem ńama.

Lo̠lo̠ setoṅ din. Aḍepase ekal nisunge muć hõ muć bako ńeloḱ kana. Lo̠lo̠ setoṅ din setoṅ reaḱ ãć se elaṅ hoṛmore bạṛtige aṭkaroḱa. Ado setoṅte mit́ṭen Tạruṕ do̠ daḱ tetaṅte kạluṅ dạbuṅe daṛa baṛaekan tahẽkana. Nunạḱ maraṅ bir gajaṛ okare daḱge banuḱa, jo̠to̠ pukhri ar nala ko ro̠ho̠ṛ caba akana. Khange disạ got́keda noa bir gajaṛre mit́ṭen pukhri menaḱa mente. Nonkan lo̠lo̠ setoṅ jokhen ona pukhri senlenre paseć daḱe ńama honaṅ.

Ado pukhri ṭhene senenre maraṅ utạr bir Sukri daḱ ńũi lạgit́ pukhri pheḍoḱe ńel ńamkedea. Tạruṕ do̠ pukhri seće koyoḱket́re cehel cepel ạḍigan daḱe ńel ńamkeda. Khange Tạruṕ ạḍi gaṛte aḍraoena. Uniạḱ aḍrao ańjomte bir Sukri do̠e hape got́ena, menkhan bae bo̠to̠rlena. Tạruṕ do̠ riạuḱ riạuḱ pukhri ṭhene dạr idiket́te memenkana, noa birren Raj kạnạṅ. Enḍekhan noa daḱ do̠ pạhilte ińgeń ńam lek kana. Bir Sukri hõe mengot́keda, am khonaḱ lahageń pheḍ akana. Nonkate rapṭha rạpṭhikin ḍhurạuena. Thoṛa ghạṛitege lạṛhại kin sạrdiyena. Lạṛhại lạṛhạite mit́ okte Sukri aḱ sunḍạ ḍaṭa do̠ Tạruṕ aḱ hoṛmore bo̠lo̠yena. Ar Tạruṕ aḱ gerte bir sukri hõ sahẽt́ bondentaea. Khan thoṛa ghạṛi tayom bana hoṛaḱ hoṛmo khon mãyãm jo̠ro̠ḱ ehoṕena arkin goć hapeyena. Noa ghoṭna mit́ ghạṛi badre daḱ sendra sendrate mit́ṭen Toyo nonḍe heć seṭerena. Inạkate Tạruṕ ar bir Sukri goć akane ńel ńamket́kina. Unkin ńelte bogete kusiyena ente nonkan maraṅ maraṅ jib janwar aḱ jel tisre hõ bae jom akada. Ado uni Toyo do̠ heseć sekreć lać pereć jomkate daḱe ńũkeda are mohnḍayena.

Sikhạuna: Ạuṛiaḱ kạphạriạu baṅkate apnarte muskilaḱ ko mimaṅsae hoyoḱa. Ente Tạruṕ ar Sukri mit́ sãote daḱkin ńũ lekhan nonka gujuḱ dosare o̠ho̠kin paṛaokoḱa ar Toyo hõ o̠ho̠ge jom daṛeakinkea. Onate huḍiń hapṛaḱ muskilaḱ ko apnarte mimaṅsa se phanḍ̣ao jạruṛ kana.

Aḍi din laha reaḱ katha. Mit́ṭen Toyo ar Ũṭ ạḍikin gatelena. Jao ghuṛige mit́ sãorekin tahẽnkan tahẽkana. Ar Jom ńu daṛa baṛae, gitić sanamaḱ mit́re. Bochor ke bochor nonkage parom calaḱkan tahẽkana. Onkage mit́ din hiloḱ jomaḱ sendrakin oḍokena. Ado ackage mit́ṭen tormuj bagwan re nońjor paṛaoentạkina. Onḍe mit́ṭen casa pahra se hohorhoić tahẽkan iạte bakin sen daṛeada.  Ado̠ unkin do̠ ona tormuj bagwan aṛere gajaṛrekin oko tahẽyena ar ńindạ koyoḱ horrekin tahẽkana. Ńuhum hijuḱkan re uni casa do̠ oṛaḱ sene mohnḍayena. Uni casa hoṛaḱ oṛaḱ do̠ khet́ pheḍrege tahẽkana. Ado̠kin hudisena jãhãnaḱge ạḍi nirạitekin cekaea mente. Enka menkateć banar gate mit́te ona tormuj bagwankin bo̠lo̠yena. Bo̠lo̠ torage ạḍi heseć sekreć rạskạte tormuj jojomkin dhurạuena. Bakin jom bhagaoḱ kana, arhõ jojom sanayet́kina. Menkhan lać do̠ perećentakina ar mit́ aṛe hõ phaka bạnuḱanaṅ.

Noa oktere Toyo aḱ bo̠ho̠ḱre mit́ṭen cintạ hećena, are kikiạuate huka hũa-huka-hũa raraḱe ehoṕena. Toyo aḱ ona raḱ ańjomte Ũṭ-e menkeda, E gate cedaḱem raraḱ kana. Amaḱ raḱ ańjomte Casa do̠e ebhenoḱa, are ebhenlen re alaṅaḱ ạḍi bạṛić dosa hoyoḱa honaṅ. Toyo do̠ landawate mengot́keda-alom bo̠to̠ro̠ḱa uni casa do̠ kạmite laṅga akana unạḱ algate ohoge ebhenlena. Baḍaeam ińaḱ mit́ṭen rog hoe akana-jom tayom huka-hũa-huka-hũa baṅ sereń lekhan jom baṅ hajamoḱtińa. Ona men torage arhõ kikiạue dhurạuena. Note Toyo aḱ onkan kikiạu ańjomte casa do̠e ebhen got́ena. Ar maraṅ utạr ṭheṅga saṕ kateć unkin sećge dạṛ hećena. Toyo ma mon monte noage khojoḱ kan tahẽkana. Khange uni casa ńelte Toyo do̠ jhạnṭi phãkte riạḱ riạḱe dạṛkeda. Menkhan becariạ Ũṭ do̠ unạḱ maraṅ hamal ho̠ṛmo̠ ante bae dạṛ daṛeada. Casa do̠ uni Ũṭge saṕkedete ạḍi ãṭe dalkedea. Ado̠ dal akhamakade dosare enkatege aćaḱ tahẽn ṭhạ̃ite calaoena. Khange Toyo do Ũṭ ńelte mengot́keda haere gate iń karonaḱte nonka dalem jomkeda. Ar emanteaḱko—

Ado Ũṭ hõ Toyo aḱ calaḱ cạtur bude aṭkar daṛeada. Onate onkan ạt ńańam horare tahẽyena. Mit́din ạḍi lolo din tahẽkana. Aḍepase ekal nisun jãhãn hoege banuḱa.Ado Ũṭ do Toyo metadea E gate dela hana jalapuri ritić reaṛ daḱre hoṛmolaṅ reaṛ ńõḱlege. Enḍekhan hoṛmo ko thoṛa Mońjge reaṛoḱa. Khange Toyo do ạḍi usạrae hẽḱ got́keda. Are menkeda, E gate paeraḱ man bạń baḍae cekateń paeraḱa? Ũṭe mengot́keda, alom bhabnaḱa iń nahaḱiń goṛowama. Inạkate banar gate tala daḱrekin pheḍena. Ũṭ aḱ katha leka Toyo hõ uniaḱ dea re deć hapeyena. Ar note Ũṭ do̠ khạndriń sećge mohnḍa calaoena. Ona ńelte Toyo do̠e memenkana, E gate cedaḱ nunạḱ bhitri sećem sen idiḱ kana nonka macoń unum gujuḱ.

Ado Ũṭ do̠ nonkae roṛ ruạṛadea, ińaḱ rog hoe akana, bhitri sećre bạń unumlen khan paeraḱ lekage bạń ạikạua. Inạkate tinre daḱ khonkin rakaṕena un jokhen Toyo aḱ do̠ ạḍi bạṛić dosa hoe akan tahẽkana. Enhiloḱ khonaḱ Toyo do̠ Ũṭ são ar bae khilḍuḱa. Ar nonkage Ũṭ do Toyo ṭhen badla hataoleda.  

Mit́ atore Nakula ar Sohan ńutuman barea gate koṛakin tahẽkana Nakula do ạḍi dhorom hoṛe tahẽkana ar sisirjạuić ạḍi ãṭe manaoede kan tahẽkana. Menkhan Sohan do kajake khaṭaoḱ hoṛe tahẽkana. Okare bana hoṛ khaṭao kateć cas-abad kateć oṛaḱ benaokin monelet́. Sohan do bilạn bạihạṛ re kajake khaṭaoḱ kan tahẽna menkhan Nakula do din hiloḱ sisirjạuiće dewa-sewa ae kan tahẽna jemon do phosol mońjte pholonoḱ. Onkage okto hõ calao cabayena. Thoṛa din badre khet reaḱ phosol do beleyena. Ado bana hoṛ ona phosol hạṭiạrekin ạkhrińket́te kạuḍikiń sõćjoṅana. 

Khan oṛaḱre sen kateć Sohan do Nakule metaekana, bạṛtiń khaṭao akana onate bạṛti ńoḱ kạuḍi ńam lek kantińa. Noa katha ańjomte Nakula do bae roṛ ruạṛadea je, sisirjạuić ṭhen ona phosol jimareń doholeda, jemon mońjte pholonoḱ. Ente sisirjạuić begor cet́ge baṅ hoyoḱa. Ado ona kạuḍi se sompot lạgit́ atoren mạńjhi ṭhen kin senena. Mạńjhi do onkin bana hoṛaḱ kathae ańjomkeda, ado bana hoṛ mit́ṭen kateć bosta caole emat́kina, oka do dhiri kuṭrạ mesal tahẽkan. Mạńjhi haṛam do nonkae metat́kina, gapa setaḱ bhitrite aben do noa caole khon dhiri kuṭrạ bachao tot́ hoyoḱtabona, enḍekhaniń goṭaea okoe noa kạuḍi reaḱ bạrṭi bhag ńam lek kanaben mente. Khange bana hoṛ bosta caole oṛaḱtekin idikeda.

Ado Sohan do goṭa ńindạ caole khonaḱ ona dhiri kuṭrạ halaṅ bachaokeda. Ar Nakula do mit́ bosta caole ńutumte sisirjạuić ṭhene kojoṅkeda. Inạ dosar din Sohan caole ar dhiri kuṭrạ sajaokate mạńjhi ṭhene senena. Mạńjhi noa ńelte ạḍi ãṭe khusiyena. Ado Nakula hõ ona bosta mạńjhi ṭhene idikeda. Mạńjhi do Nakulae kulikedea, tinạḱ caolem bachao akada? Nakula doe menkeda sisirjạuić cetanre keṭeć pạtiạu menaḱtińa, caole do sạrige sapha akana. Tinre bosta ko jhićkeda, caole ar dhiri do enkage tahẽkana. Inạkate jumidar Sohan do ona ṭaka reaḱ bạṛti bhage emadea. Inạkate jumidar Nakula doe metadea, tinre kajakem khaṭaoḱa unre sisirjạuić doe gorọwama. Ente bin khaṭaote sisirjạuić do ohoge goṛokema. Tayomte Nakula hõ Sohan lekage jumire khaṭaoḱe ehoṕena ar inạ dhao phosol do ạḍi mońj pholonentaea.

Mit́ṭen pukhrire pea hako ko tahẽkana. Nunạḱ gateko tahẽkana je, mit́ ghạṛi hõ bako apan ạpinoḱkan tahẽna. Mit́din mit́ṭen hako sasaṕ kẽoṭa do pukhri ṭhen hećkate hako ńelte ạḍitet́e kusiyena. Ado pukhrire jhạli capat́ket́te hako sasaṕe portonkeda. Menkhan onko budan hako do eṭaḱ pukhri seć ucạṛoḱ reaḱ ko hudis baṛaet́ tahẽkana. Khan onko modre mit́ṭen hako do usạrae rạji got́en são sãote, eṭaḱ mit́ṭen hako doe baṅket́te menkeda, noa pukhri do oṛaḱ kana, nonḍe khon do ohogeń senkoḱa. Onka leka tesarić hako hõe mengot́keda, nonḍe tahẽnre jãhãn muskilre ohoṅ paṛaoḱa. Onate nonḍe khon jãhã seć bạń senoḱa. Onkin barea hako do ạkinren eṭaḱ gate tạkin bạkiń bujhạu ocoledea. Ado onate ạkinaḱ apan ạpin mone leka senjoṅkin goṭakeda.

Inạ dosar din kẽoṭa do jhạli capat́ko hećen re onkin barea hako dokin dạṛket́te jhạli khon kin rukhiạyena, menkhan tesarić hako do jhạlire jhạliyena. Ente uni do ona muskil okte bebuj are ḍhilisililena. Onate ona muskilre paṛaoena.

Sikhạuna: Jãhãe jãhãn muskil se eṭkeṭõṛẽ re paṛaolen khan budan hoyoḱ lạgit́ eṭaḱ hoṛaḱ solha jạruṛaea. Disạe hoyoḱa, joto muskilge judạ judạgea, ar ona muskil cabae lạgit́ onkage judạ judạ hor se upại menaḱa.

Ạḍi din lahare mit́ṭen phukir hoṛe tahẽkana. Uniaḱ nútum do sahib. Juạn oktere uni do ạḍi mońjte dine khemaoet́ kan tahẽkana. Jãhãn haron kosṭo baṅ tahẽkantaea. Uni sahib do hara juạnen khan ko bapla kedea. Baraea kuri gidrạkin hoyentaea ar gharońj reaḱ khoroć hõ bạṛti idiyentaea. Juri-pạri jaogekin jhogṛaḱa ar pạurạkin ńũia. Ar nonkate  unkinaḱ khoroć bạṛti idiyen khan  ạḍi haron kosṭo rekin paṛaoen. Uni hoṛ do rin hatao kate gharońj calaoe ehoṕena , menkhan ḍher din do bae calao daṛeada.

Mit́din do ạḍi bhabna selet́ oṛaḱ khone onḍokena ar mit́ sṭeson re gitić aṅgayena.  Jom lạgit́ cet́ ṭaka hõ bạnuḱtaea. Sṭesonre ać leka etaḱ hoṛe ńelet́ koa ar thoṛa ṭakae koeket́koa. Onko modre mit́ hoṛ doe dayawadea ar thoṛa ṭakae emadea are metadea dela in soṅge atotelaṅ calaḱa ar adolaṅ koe baṛaea.  Ar onkate uni sahib do koe phukire hoyena ar dinạm dine koe baṛaea.

Mit́din uni phukir do aema caole koe jarwakeda ar mit́ṭen sim hõe koe ńam akadea. Ar un okte tikin tarasiń tahẽkana. Ado uni phukire menkeda ar caole do bạń koea, jãhãe ṭhen dakań koe joṅaḱa. Koe koete mit́ oṛaḱe senena are metako kana daka jom ocoińpe. Un okte ona oraḱre mit́ baba hoṛe tahẽkana. Uni do uni phukiraḱ caole ar sim ńelte men got́keda hẽ dela hijuḱme dakań jom ocomea.

Uni hoṛ do phukirak caole ar sim hatao kateće metadea, “ phukir baba, do pukhrite calaḱme ar ḍabrạ hijuḱme , ado nahaḱ lolo dakam joma.” Pukhri do thoṛa pharaḱ ńoḱre tahẽkana ar ona oktere uni hoṛ do phukir babaren sime goć kedea are isin basaṅkeda. Ado phukir baba daka utui emadea are metaekana , phukir baba jotoge amaḱkana, ińaḱ do eken hoe (batas). Unre phukire menkeda, am lekan bhage hoṛ do banuḱkoa. Ado biḍạ oktere caole ar sime koye kana. Uni hoṛe menkeda amaḱ caole ar sim amgem jomkeda. Unre phukir do ạḍi kajaḱe raṅgaoena are metadea am lekan barić hoṛ do tishõ ohogeń ńel akaw

Mit́ṭen birre Dhạcri Kule tahẽkana. Okoe do jom lạgit́ din hiloḱ 2-3 goṭen jib-janware goćet́ ko tahẽkan. Mit́din joto janwar ko mit́te uni ṭhen sen katećko metadea, Din hiloḱ mit́ṭen kateć amaḱ jomaḱ lekatele hijuḱa. Onkoaḱ kathate Dhạcri kul do bogete khusiyena are rạjiyena.

Nonkage din ke din calao idiyena. Ado Horo aḱ pạli heć paṛaoena. Calaḱkan jokhen Horo do mit́ṭen Kũi-e ńel ńamkeda. Ona ńelte bańcaoḱ reaḱ hore sendra baṛakana. Khan Kul ṭhen senente metadea, am lekan ar mit́ṭen Kul menaea, one okoe do am khon hõ bạṛti dil ar daṛeane lekha kan. Inạkate Horo do uni Kul ona kũi ṭhene ạgukedea. Ado kũi-e uduḱadete metae kana, nui do nonḍege tahẽna. Khange Kul do ona kũi seće beṅget́ket́ torage aćren gate daḱre ńel ńamkedea. Are hudiskeda sạrige tho menaegea. Ado uni Kul ńelte edrete kũi re don khadleyente goć hapeyena.

Mit́ṭen casa hoṛe tahẽkana. Uniaḱ sana tahẽkana aema lekan jạtren Sado̠m jogaṛko. Onka leka aema jạtren Sadome jogaṛket́koa, nit do̠ eken mit́ lekan Sado̠m jạruṛaea, oka do̠ ać aḍepaseren hoṛ ren menae. Menkhan aḍepaseren hoṛ do̠ uni aćren Sado̠m ạkhrińkae reaḱ jãhãn monsubạge bạnuḱtaea. Enrehõ uni Sado̠m ạkhrińkae lạgit́ din hiloḱe batlaodea. Mucạt́ dhạbićte jãhã lekate reben ocokedea. Menkhan ona rạskạ ạḍidin baṅ thamgạḍilentaea. Ente kiriń mit́ cando tayomge Sado̠m do̠e ruạ kạhilena.

Jib-janwar ren raranić Sado̠me ńelkedete menkeda, nuire do̠ maraṅ mit́ṭen virus ruạ heć paṛaoakana. Ado̠ thoṛa rane oladete metadea, pe din bhor noa ran jom ocoye hoyoḱa. Noa rante jãhãn porho baṅ ńamlen khan goć giḍikae hoyoḱa. Baṅkhan noa rog arhõ eṭaḱ Sado̠mkore ucạṛoḱa. Mit́ṭen Mero̠m do̠ Uni raranić (daktar) ar casawaḱ katha mon lagaokateće atenkeda. Thoṛaghaṛi tayom Casa do̠ Sado̠m rane jom ocokedete aćaḱ kạmi senjoṅna. Unre Mero̠m do̠ Sado̠m ṭhene hećente metaekana, Mon kaṭejtam, bogeḱ hoyoḱtama, baṅkhan ko goć giḍimea honaṅ.

Inạ dosar din hõ Casa do̠ Sado̠m rane jom ocokedea ar kạmi senena. Enhiloḱ hõ Mero̠m do̠ harephare Sado̠m ṭhene senente metadea, Ma gate beret́talaṅ me, kosṭo sahao katet́ rehõ taṛam hoyoḱtama. Delaṅ goṛawama.  Tesar hiloḱ Casa são uni raraniće arhõe hećena. Rane jom ocokedea are menkeda, ar bae bańcaoḱa nui do̠. Gapa khange goje hoyoḱa. Baṅkhan eṭaḱ Sadomkore ucạṛoḱa. Khan Casa do aḍige torasente hẽḱada. Unkin calao tayom Mero̠m do̠ Sado̠m ṭhene hećena are menkeda, teheńge mucạt́ ạt tam, ma beret́me. Daṛeḱtege lagaoama, dạṛ lagaoama, noḱõe daṛeaḱ kangeam, ar thoṛa kurumuṭuime, khanem daṛeaḱgea. Nonkate mit́ okte Sado̠m do̠ ekal riạḱ riạḱe dạṛkeda. Ackage uni Casa hoṛe tạṅkhikeda Sado̠me dạdạṛ kana. Ado̠ bogete kusiyena are memen kana, ạḍi hahaṛa, Sado̠me phạriạyentiń do̠. Okayena pe, usạra nui Mero̠m jabe kateć jom-ńũ reaḱ bo̠ndo̠bos pe. 

’