Mit́ṭen Raj ren pea Montri ko tahẽkana.Mit́din Raj do aćren pea Montri hohoat́kote metat́koa, noḱoe ape joto hoṛ mit́ṭen kateć khạli bostań emape kana, birte calaḱpe ar noa bosta do aema lekan jo kote halaṅ pereć ạguipe, okoe lahape pereć ạgu daṛeaḱ kana.Khange onko pe hoṛ do bir gajaṛteko mohnḍayena.

Pạhil Montri doe hudiskeda, Raje menakat́ leka mońj mońj jote bostań halaṅ pereja ar onka leka uni do bir gajaṛ reaḱ ńeloḱte joto khon mońj jote bostae halaṅ perećkeda are ruaṛ hećena.

Dosar Montri doe hudiskeda, Raj do unạḱ napaete bosta do bae ńela onate bạṛić jo kote bostae perećkeda ar cetanre thoṛa mońj joe sajaokeda are ruạṛ hećena.

Onka leka tesar Montri hõe hudiskeda, Raj aḱ do unạḱ opsor hõ bạnuḱa je noa bosta jhićkateć mit́ mit́te ńela. Onate Montri do aćaḱ bosta rohoṛ sakam, ghãs, kaṭh emanteaḱkote halaṅ perećkeda are ạgukeda.

Ado onko pea Montri Raj dorbarreko hạjirena, khan joto hoṛaḱ bosta pereć ńelte Raj do ạḍige khusiyena. Tesar Montri do aćaḱ bud reaḱ katha hudis ganḍonkate mone monete ạḍi budan hoṛe lekhaḱ kana. Raj do thoṛa ghạṛić tayome menkeda, noko Montri do akoaḱ bosta selet́ 7 din lạgit́ jehel oṛaḱte idikope ar joto hoṛ judạ judạ oṛaḱre dohokakope. Noa 7 din cet́ jomaḱ hõ alope emakoa. Raj aḱ hukum lekage pea Montri do jehel oṛaḱko idiket́koa. Pạhil Montri do 7 din aćaḱ bosta reaḱ jo jomte dine khemaokeda. Dosar Montri hõ aćaḱ tinạḱ mońj jo tahẽkan onage bar dine jomkeda, eṭaḱ din do bạṛić se sea jo jom kateć din khemaoe kurumuṭukeda menkhan ruạre jạbunena. Tesar Montri aḱ bostare jãhãn jo baṅ tahẽkante begor jomte jehel oṛaḱrege goćena.

Sikhạuna: Judi abo hõ jãhãn kạmire gạphlạt baṅkate ṭhikte oloḱ paṛhao bon hameṭ enḍekhan aboaḱ ḍahar hõ phaelaoḱa. Okoe hõ bako aṭkao daṛeabona. Enḍekhan ạḍi algate jãhãn kạmirege mońj jo bon ńam daṛeaḱa.

Mit́ṭen huḍiń atore mit́ṭen koṛae tahẽkana. Uni koṛawaḱ do jãhãn gharońj hõ baṅ tahẽkana ar nacarge tahẽkana. Onate eṭaḱ hoṛaḱ oṛaḱre kạmikate ạsuloḱkan tahẽkana. Mit́din uni koṛa do ạḍi maraṅ dhiri ńel ńamkeda. Ona dhiri do ạḍi hamal tahẽkana ar eskarte tul hõ bae tul daṛeaḱkan tahẽkana. Ado thoṛa hoṛaḱ goṛoe hataokeda, menkhan onko hõ ona dhiri do bako tul daṛeada. 

Khange uni koṛa doe asketena ar dhiri hõe aṛaḱ giḍikeda. Inạkate cet́e cekaea mente nawate hudis ganḍonena. Uni do mit́ṭen dhiri reaḱ hạtuṛ ar mit́ṭen gojale ạgukeda ar dhiri bhugạḱkeda. Inạ tayom uni do mit́ṭen baber dhiri bhugạḱre aderkeda are tol urićkeda. Ado aćren gateko soṅge kate ona baberko orkeda. Onko do ạḍi haron ar kosṭote mucạt́ dhạbićte hõ dhiri ko tul rakaṕkeda. Uni koṛa do ạḍi ãṭe kusiyena ar gateko sãote rạskạyena. Adoe bujhạukeda jãhã tinạḱ hamal se kạṭhin kạmige kurumuṭutem kạmi lekhan ona jo se kuṛại dom ńamgea

Mit́ṭen Pajhaṛ dare ḍar re duṛuṕkate jirạuḱkan tahẽkana. Ado mit́ṭen Kulại do Pajhaṛe ńelkedete kulikedea, Iń hõ am lekań jirạu daṛeaḱa? Pajhaṛe roṛ ruạṛadea, hẽ, cedaḱ bam daṛeaḱa. Inạkate uni Kulại do otrege mit́ jaegare jirạuḱa mente duṛuṕena. Ackage mit́ṭen Toyo onḍe hạjirena, ar don kate uni Kulại-e saṕkedete jomkedea.

Cecet́aḱ bisoe: Jãhãn kạmi begor duṛuṕkate suluk se nirạite  jirạu joṅem menet́ khan, enḍekhan am do ạḍi cetanre tahẽn hoyoḱtama

Dulạṛiạ gate,

Hola amem metadiń lekage ciṭhi reaḱ roṛ ruạṛiń emadea. Ạḍi ghạṛić ṭana ṭạnireń paṛaolena, Pạhil do olae ekal baṅ sanaledińa. Nitoḱ jaeba hok ol lạgit́ iń kurumuṭukeda. Nõḱõe iń kol selet́et́ kan do ona reaḱ joṭet́em ńela.

Bejãe muskil ciṭhi. Ar kokol nit hõń botoroḱ kana. Holanoḱ goṭa ńindạń huḱdiskan tahẽkana cet́ iń cekaea. Khange monre heć got́ạdińa je pạhil do am iń kol maṛaṅama jemonem ńel. Dayakate am bạhu hõ paṛhao ańjomaeme. Judi uniye menle khan je kokol hõ ṭhikoḱgea, tobeń kola. Solo-ana pạtiạr hoyoḱ ar alo haso oḱco ona do kuṭhingea. Nit khonge iń ma ona roṛ ruạṛte botoroḱ mań ehoṕen. Paseć ses reaḱ ponea sobdo badle khan boge hoekoḱa. Cet́ lekam menkea onako do kichu ãjhãṭ macha katha hoyena se?

 Noage

Amren pạtiạr,

Gate

Mit́dhao mit́ṭen guni hoṛ aćaḱ bagwanre Pipṛiạṅ aḱ bele ńel ńamkeda. Uni doe tạńkhikeda je Pipṛiạṅ do ona bele khon onḍokoḱe kurumuṭuieda menkhan baṅge daṛeaḱ kana. Enege janam akan nawa Pipṛiạṅ ạḍi kajak kurumuṭu katet́ rehõ oka belere tahẽkan ona khon goṭa hoṛmo bae oḍok daṛeaḱ kana. Mit́ okte uni Pipṛiạṅ doe laṅgayena are hapeyena. Noa ńelte uni hoṛ do mãyã hećadete sen sorena ar sareć hoṛmo kạpcite get́ket́te Pipṛiạṅ-e onḍoṅkedea.

Ado cet́pe hudiseda nui hoṛ do Pipṛiạṅ-e goṛowadea? Sạrige mẽt́te ńelre goṛo leka bujhạuḱ kanrehõ nui hoṛ karonte Pipṛiạṅ aḱ bạṛti khoti hoe akantaea. Cedaḱje, Pipṛiạṅ onḍoṅoḱ reaḱ okae kurumuṭiet́kan tahẽn, onage tayom daram dinre uniaḱ jionre maraṅ upkạr se bhạlại hoekoḱa. Menkhan uni hoṛ tinre Pipṛiạṅ aḱ sareć se bạki oṅso get́ giḍikeda unre uni Pipṛiạṅ aḱ phạ̃ḱrạ̃ḱ do ṭhikte baṅ janam akan tahẽkana. Onate uni Pipṛiạṅ do aćaḱ jionre ṭhikte bae uḍau daṛeada, ente udạuḱ lạgit́ uniaḱ phạ̃ḱṛạ̃ḱ do baṅ mạjuta.

Sikhạuna: Jionre jotowaḱ muskil, duk-dạndi do abo laha seć calaḱe goṛowabona. Duk se kosṭo begor okoe hõ tis hõ bae maraṅ daṛeaḱa. Onate aboaḱ jionre lahanti se laha seć calaḱ lạgit́, jãhãere bhorsa baṅkate abotege kurumuṭui jạruṛkantabona.

Dulạṛiạ gate,

Noa ciṭhi paṛhao tora do ekalteń obak utạrena. Sạrige bạń buj daṛeada je noa ciṭhite cet́ lekan tarko paṛaoańa. Ja do jage rukhạ sukhạ jobab emkate se ạuri goḱ kathate hõ sa dapoṛkae do baṅ sanaledińa se cigạriạea mente sowal-upạr-sowalae hõ baṅ sanaledińa je am hõ nonkan bapla umer kuṛi gidrạko ren apatem tahen khan nonkan ciṭhigem olkea se ceta. Baḍaegeạń je nui juạn koṛawaḱ edre kũhrạu danaṅre hajar hajarkoaḱ jivir hirdạn ar duk menaḱa. Onkan ciṭhire kathako unạḱ bhạri baṅ bujhạu jạruṛa arhõ sanam khon asol do apnar dogoḱ lạgit́ bań dhaklao laha ocoḱ jạruṛa aṛaṅtet́ reaḱ kạḍrạha ar labaṛ reaḱ behok khạtirte do. Pạhilge oka cekae reaḱ menaḱ do noage-noa raḱ aten. Onatege tho iń doń goṭawana je ińaḱ bujhạu soḱdor ar jobab emoḱ reaḱ sanam khon pạtiạr tạrika nit hạli doń hape hataṛkoḱa.

Etohoṕre bạhu-ṭaka do khub maneyanaḱ tahẽkana, onate do bapla bhuńjạuḱ kan tahẽkana. Lagaoḱaḱ jinis do mal jalko tahẽkana uni kuṛi khạtirte gharońj lạgit́ rojgar daṛe reaḱ loksan hoyen ona reaḱ khuṭi purun mente. Judi uniko bạgikae khan mal jal do ruạṛkako hoyoḱkan tahẽkana. Ona karontege kuṛi gharońjren do bapla tambhaoḱregeko hạ̃soḱkan tahẽkana. Poesa, oka teheń ńamen ar gapa do khoroćen, cạliten khon ona dustur reaḱ man motlob ḍhertet́geye bạtilkeda.

Teheń gapa kuṛi gidrạko reaḱ golam bebosa lekanaḱ do ḍher dhaoge bań ńamoḱ kana. Noa mare ar nawa dustur acka tapam kan akhṛa do asol do manwawaḱ mon kana. Jibonre eṭaḱ nonkan ṭhạ̃ige bạnuḱa okaṭaḱ bapla ar gharońj khon bạṛti tarkoḱ. Nahaḱ jug reaḱ disom reaḱ istok somaj, dhorom ar rajniti somossako do noarege ńapam kan leka ạikạuḱ kana, ar dikhitoḱ kana. Arhõ lahantiḱ joh do maejiukoaḱ lahaḱrege rehet́ akan ạikạuḱ kana. Herel do un hạbić bae sạdhina tin hạbić ać pantere sạdhin akan maejiu bạnuitae. Rajniti sạdhinota sạdhin ar dạyikiạ juri pạri begor baṅ hoe daṛeaḱa. Menkhan sạdhin juri pạri hõ un hạbić bakin hoe daṛeaḱa tin hạbić bapla reaḱ soḱhot́ rehet́ menkate dulạṛ baṅ tahentạkin. Asokaete bapla jibon reaḱ, do cet́ kana mente; enḍekhan noa selet́ dan samaṅa mente cet́ henaḱtabona? cet́ abo hõ baṅ nẽḱẽge babon ḍunḍhạu tot́joṅ kana je dulạṛ do bapla tambhao ocoe soḱhot́ gonḍa kana mente? Judire hõ abo talare bạhu-ṭaka dustur bạnuḱtabona, enhõ baṅ dulạṛ do judạ rokom reaḱ dhon-somttite lesenoḱ kana? Tinaḱge eṭaḱ hoṛ bon bujhạu orome, unạḱ apnargebon oromoḱa. Inạkate nonka do babon bujhạuḱa je gubman ńam lek dan emoḱ hoṛ lekabon teṅgo akana., enkathaebo lãhãtgeabon seyangea ar sa, ńamaḱgebon baḍaea, bickombon onko lekana okoe goṛo jạruṛakokange.

Noage 

Amren pạtiạr,

Gate

Dulạṛiạ Gate,

Amaḱ ciṭhi ńamkate pon hapta parom akana. Baṅa baba, gapalmarao lạgit́ jãhãn cet́ge alom sapṛaoa. Judiliń baplaḱge khan, enhõ aema bochor lagaoḱa. Onate iń do ạḍi bạṛićiń hulạsbhaṅgaḱ kana. Menkhan sanam khon lahare oṛe oṛpat́ ona reaḱ kissạgeń lại lahawama. Uni kuṛi do Ceceile (Sisili)-waea. Lorireliń ńapamlena. Bale gidrạye hobor akade tahẽkana. Tayomteń baḍaekeda uni do ać dạiren gidrạye tahẽkana. Ać dại doe ruạḱ kan tahẽkana. Pạhil do bapla kuṛigeń badledea. Barea suṭkes tahẽkantaea ar ać sorrege bale gidrạko ṭạnḍi-raca ocoko ṭoklaḱ jhomble akat́. Gạḍire duṛuṕ ṭhạ̃i do bana hoṛge balin paṛaolena. Soṛok anacur ṭhen teṅgo ṭarhaoḱa menteliń ṭenḍar ńapamenge. Dinạm din reaḱ emanteaḱ reaḱliń galmarao kan tahẽkana. Ińaḱ porthom aṭkar do noa: “Nũiṭaḱ kuṛi do ar ar kuṛiko khon doe begargea.” Ona lại pusṭạu do muskilgea. Eṭaḱ eṭaḱ kuṛiko khon do bạṛtigeye khulạ khulia ar enhõ ḍhere sapoa. Aćaḱ mokame tioḱket́ khane nehõradińa jemon suṭkes ar ona jhomble khiṛki khon iń pheḍ got́ae. Menkhan ạuriń calaetege ńelme se ḍraebhar ma gạḍim laṛaoket́. Nehra jehrawae mõṛẽ miniṭ paromena tobe jẽyẽ gạḍi arhõe teṅgokeda. Ene bapo gạḍi khoniń oḍoken menkhan tala ṭạnḍire, ạnạ̃ṛi hoṛaḱ moṭra jhoṭrawante. Cet́ iń cekaea? Ruạṛenạń cekayam. Bargel miniṭ tayom uni kuṛi ar gidrạń ńamket́kina, banarge raraḱ kan.

Enhiloḱ eṭaḱ gạḍiyiń ńam reaḱ jãhãn as baṅ tahẽkana. Onate soṛok khon bar pe mael tophatre ako atote ako ṭhen tahene nẽotakedińa. Bejãe ạjgut obostha. Seṭerenale, ać do gidrạ hobor akade ar bohoḱre ona ṭoklaḱ jhomble dipil akat́ ar iń do uniaḱ suṭkesiń teweń akada. Atore ma bebak teṅgo ṭhikkate alegeko koyoḱ urić akawat́le. Lahate do bejãe ṭanḍha ataṅ daram. Unige sanamaḱ reaḱe beyanat́koa. Inạkate do man mạrjạt.Hajar dhao apnariń kuliḱ kana amem kuliń kan lekage. Onako joto reaḱ jobab bujhạuḱ kana, “hẽ”.Isại kuṛi kanae, paṛhaoḱ kuṛi kanae, ar cecet́ dại hapene hoyoḱe sadoḱ kana. Ińren gidrạkoren eṅgate hoyoḱ lạgit́ nũi khon bhage eṭaḱko tho kolponage bạń kolpona daṛeako kana. Iń khon umerte thoṛaye kạṭićgea, ar bes niropon hoṛmo kanatea. Ona chaḍa, thoṛa gan doń aṭkar ńõḱlet́gea je uni ṭhen ekal kenapuche doń baṅ kana.Jãhãnaḱ bae roṛlet́re hõ,aćaḱ mẽt́ge aema okoće lạiạdińa. Uni inạ ńindạ iń ṭhen nẽotaye do ińaḱ bohoḱrege baṅ huṛet́lena. Pạhil leka khan ona do etohoṕ hudis hoekoḱa. Nitoḱ do apnar hirińen lekań ạikạueda.

Dosar hiloḱ setaḱ doń bidạ joharadea. Ać go baba hõ monge nemrotgekin beboharạdińa. Menkhan jãhãn cet́ge bakin roṛleda. Inạkate ciṭhi seṭerạdińa-thoṛa baṅ khan dinạmge onako modre noaṭaḱ doń mokosto cabakeda. Dayakate usạrage kol ruạṛ golkam. Noategem bujhạu daṛeaḱa je uni kuṛi do tinạḱ pakka monsubạwan kuṛi kanae mente. Rạskạtema thoń paera baṛae kan, nana hunạriń pontha baṛajoṅ kana……….

Menkhan tayomtege tho lilạm ḍak seṭerena. Baṅ, noa sodor lạgit́ eṭaḱ kathage bạń ńam daṛeaḱ kana. Ać baba do sanayedea ạkrińkaeae, lilạmge bujhạukam, jãhãege cetan utạre ḍak uni ṭhen. Lahare $400 (pon sae ḍollar) mae khoj kan, menedae kathae nui lạgit́ do laha khonko ḍak cukạu akada. Menkhaniń bhoyonoḱ kana noa do eken etohoṕ kana, em jarwae, pạhil kisti bole. Hudiset́ khaniń je ińren dut okoe iń dulạṛede, unigeye ạkrińoḱ lạgit́, ekaliń garjao uṭareda. Nitoḱ do cet́em mena? Noam aha ṭhaket́aḱ reaḱ do bam hudis lahaleda, se baṅ? Mon reaḱ dulạṛ jivi reaḱ dulạṛ samani mõńj mõńjaḱem lạṭić baṛakeda. Nitoḱ onakotegeń nehal utạroḱa, se baṅ?  Sạri kangea je ạlińliń dupulạṛ do okoe hõ bako akoṭ daṛeạlińa. Dạhṅgi reaḱ dustur lekate, dupulạṛ kanteliń baplakoḱ, hoege baṅ hoe daṛeaḱa ar ohotet́geko sahaoleda. Noa dustur lekate, kuṛi do ać jãwãe ren bạhu do bae hoyoḱ kana, menkhan jãhãege bạṛti poesae em uniren erae hoyoḱa. Pon sae ḍollar! Noa do ińaḱ kolpona bahregea, osombhog ṭaka. Am do ekenem kukmũ oco akadińa. Menkhan sạrinaḱ do kaṭjibạgea ar sanam kukmũye berbadeda. Asoḱ doń thirena. Se amren dhubi leka kạmi lạgit́em dhurạuińa ar ińiń saphae kicrićko ponḍ leka uṕko ạuri ponḍoḱ hạbić iń kạmiem ńam kana? Ńelme, iń do ạḍitet́ iń ãyãwa ariń nimukharamigea. Noań roṛoṛ kan aṛaṅ do am lạgit́ kan se do baṅ ente onkanaḱ bam cekawakada. Menkhan ińaḱ aschuṭạu eṭaḱ dharate sodor daṛeaḱ bạń baḍae kana. Bejivet́ eken tahen khon boroṅ gujuḱgeń bạsutkea.Onate ińaḱ motlobem bujhạueda, metaḱme, uni kuṛi begor do tahen kana. Ạḍi garte aḍrao sanań kana hajar hajar juạn koṛako ńutumte guhạrteń rag sanań kana one okoe do begor dulạṛ tahenko bicạr dusi akan ar kusbikoaḱ hoborreko laga giḍi akan. Onko hajar hajar kuṛiko lạgit́ kikiyạuate rag sanań kana okoe peṛae erawan kisạ̃ṛ haṛam hoṛre jãwãeoḱko joṛmoṭ ocoḱkan.

Menkhan ińaḱ raḱ do okoe ańjoma? Iń do onkoń dusiet́koa okoe abo disom reaḱ dạyikante menaḱko-onko okoe reṅgeć orećkoaḱ ṭaka poesako tahas nahaset́; kisạ̃ṛkoaḱ maejiukore ekmatro ạdhikar baṅ gucạukate noa kurmutạha ar janwariạ dustur bako bhoṭ giḍikaḱ kan. Iń do noa somaj oka somosto ektiạri hameṭ akawan dạhgi reaḱ noa ektiạri, one onate kuṛi gidrạ do gharońj reaḱ dhon obostha ṭhik dohoe ar go babawaḱ dhon durib reaḱ sana puḱrạureye laṛcaṛ ocoḱ kan upạrte dosiń ladeyeda. Iń do apsawarthi baba hoṛkoń dusiyet́koa okoe kạmirema asaṅpoḍaren ḍhạḍ ar akoren hoponerako ạkriń poesate do akoaḱ rinko sodet́, hạnḍi pạurạ, moṭor gạḍiko ar erakoko kirińjoṅ kan. Iń do onko kuṛikoń dusiet́koa okoe do sarapanaḱ bạhu-dam jokhako seṭerlenre hõ apotti  bodolte hapekoḱ; okoe do akoren go babakoaḱ sana lekako hoe ocoḱ kan, onko okoe ekenko lạliset́ se jạnum tarte gherao ạcuraḱ kạd khana barag hoyoḱ kantakoa. Iń do Manḍer iń dusieda, one oka sikhạu paṛhaoiń bodol nonkan raḍaha ạn gobolreye dohokadiń one okaṭaḱ iń do bạń bujhạu daṛeaḱ; ar tinre onań rạput́keda ar Isoraḱ daya ạḍitet́ ạḍi jạruṛadińa, ona daya doe soboṛkedińa. Iń do noa Manḍer iń dusieda ente goṛo  baṅkate ekene sạḱjại kana.

Cet́ iạte Isor do, one Uni sạri baplaren rurukhạyiće menogoḱ kan, Aćaḱ hore uduḱạń kana ar taṛam khan onare bae taṛam oco daṛeạń kana? Judi dulạṛteaḱ bapla do eken kisạ̃ṛ hoṛaḱ suk subita tahẽ idiḱ khan, enḍekhan Sisirjạuić do serma khon cedaḱ jạrurạń kan pon sae ḍollar bae kol got́ạń kana? Okor okaretae daṛe do? Cet́ uni do noako kạṭić kạṭić eṛe isorko-dhon dạulạt ar dạhṅgi khon do bae jorwangea? Bahre Isor! Am do nonkan menjoṅaḱgem buskuket́tińa oka do iń hõ baṅgeń biswạs daṛeaḱ kan je ińre onkanaḱ khemota henaḱa. Am do duḱlạṛem cet́ạdińa. Am do ińaḱ monre mit́ṭeć serma seṅgelem jol akada, one ona begor iń do apnar manwage bạń bikạuḱkan. Menkhan nitoḱ ona seṅgelre iń doe atarredińa. Ińiń sahao daṛeaḱ khon jạstiń harkhetoḱ kana, ar khạṭigeye gojeńa. Am khon jãhãn roṛ ruạṛ do bạń asoḱ kana cedaḱ je ona reaḱ roṛ ruạṛge bạnuḱa.

Noage

Amren pạtiạr,

Gate

Mit́ṭen kisạ̃ṛ karbạriại tahẽkana. Uni do ạḍi acel pacelane tahẽkana. Ar uniren aema kạmiạ hoṛ, guti, cakor, gạḍi emanteaḱko tahẽkantea. Uniren maraṅ utạr mit́ṭen seta hõe tahẽkana. Seta do ạḍitet́ mońje tahẽkana. Uni do jao ghuṛige mạlik ren hoṛkoe pahraet́ko kan tahẽkana. Jãhãe kạmire gaṛpać guṛpućlenre se jinisko rạput́lere se ko kombṛo lekhan bhoḱ kate aćren mạlike hohoaea ar jotowaḱ doe lạiaea. Ar setawaḱ maraṅ kạmi do tahẽkana aṅga simraḱ okte sim kokṛo são sãote joto hoṛ jagwarko. Onate hoṛko do ar ạḍi ghạrić bako jạpit́ daṛeaḱkan tahẽkana. Ạuri marsaloḱrege jạpit́ khon beret́doḱ hoyoḱtakoa. Beret́ torage kạmireko bhiṛạuḱkan tahẽkana. Nunạḱ setaḱre beret́kate jãhãn reaṛ bạnuḱa, jạput́ din bạnuḱa, eken kạmi ar kạmi.

Karbạriạ ren hoṛko do ar bako sahao daṛeada. Onko doko goṭakeda je jãhã lekatege setako jobdoea mente. Aḍigan hudis ganḍonkate mucạt́re setawaḱ jomaḱre mit́din bis ko mesalkeda. Khange ona jomaḱ jomte seta doe goć hapeyena. Ado ko hudiskeda, nit do bon bańcaoena, aṅga simraḱ khon ar baṅ beredoḱ hoyoḱtabona. Menkhan noa reaḱ jo do ultạuge hoyena. Mạlik do arhõe raṅgaoena. Uni do noa reaḱ karontet́e aṭkar ńamkeda. Inạkate mit́ṭen bebosthae hataokeda. Tala ńindạ khon uni do aćren kạmiạko beret́kate kạmire bhirạukako kan tahẽkana. Ar ạḍi mãhĩr salaḱ nonkae hohoako kan tahẽkana, ma beret́ tabonpe, setagoḱ kana. Aema kạmi bạki menaḱa, jotowaḱ do sạutạu hoyoḱa.

Sikhạuna: Jãhãe hoṛaḱ jarkhar tayomre hoṛge dae do.

Ạḍi din laha reaḱ katha. Mit́ disomre mit́ṭen Raj ar Rạni kin tahẽkana. Uni Raj do ạḍi dukre tahẽkana. Mit́ leka ma disomre suluk bạnuḱ ar note Raj ren gidrạ pidrạ hõ bạnuḱkotaea. Mit́din Raj aḱ dorbarre mit́ṭen sạdhu hoṛe hećena. Uni doe menkeda, “Maharaj, amaḱ duk iń baḍaea. Ona menkate mit́ṭen golap bahae emadea, inạkate arhõe menkeda, noa baha mõṛẽ din daḱre doho tayom rit́ gunḍạ kate amren Rạni dumur rasa são mesal katećem jom oco lekhan enḍekhan joto duk dạndi cabaḱtama. Niạ menkate ona baha Raje emadete dorbare senena.

Raj do uni sạdhu aḱ katha lekage ona baha mõṛẽ din daḱre dohokeda ar rit́ gunḍạkate dumur rasa são Rạni jom ocokedea. Inạkate Rạni ren jawa koṛa gidrạkin hoyentaea. Unkinaḱ ńutum mit́ṭen do Khelan ar mit́ṭen do Dolan ko dohokeda. Noa ńutum reaḱ karon menaḱa. Ente Khelan do jao ghuṛige eneć khilạḍre tahẽna ar Dolan do jao oktege jhilo jhiloi jạpida. Unikinaḱ kạmi chaḍa jotoge mit́getakina.Unkinaḱ mẽt́ãhã, hoṛmo reaḱ roṅ jotowaḱ do ekal mit́ge. Menkhan inạ phãḱre cet́ hoyena, ona Raj bakholre mit́ṭen Rakas aḱ nońjor paṛaolena. Raj bakhol ren joto Sadom ar Hạti Rakase jom cabaket́koa, inạkate joto sipạhi ar montriko hõ. Inạ tayom Raj ar Rạni hõe jomket́kina.

Unre Khelan ar Dolan do bhagekin hara buru akana. Unkin do cạuki latarre bolokate oko okokin gateḱkan tahẽkante Rakas do bae ńam daṛeaḱkina. Cạuki latar khon oḍok katekin meneda, haere cet́ cekayena! Aboaḱ Raj bakhol ren joto hoṛge Rakas aḱ laćreko boloyena! Jãhã lekatege ona reaḱ sạjạilaṅ emaea. Ado Khelan ar Dolan do tire baber meṛaokate cạukirekin gitićena ar Rakas tạṅgirekin tahẽyena. Khange Rakas do hoṛaḱ sõe bujhạu ńamkeda are hećena. Tinre enege Khelan jojome sengot́ akana Dolan do usạra ti reaḱ babere pasnaokeda, ar ona baberte Rakas doe tol eset́ena. Nonkate Rakas doe jhạliyena. Khelan do ạḍi bese gate daṛeaḱa, uni do Rakas lạṭum lekae ạcurkedea. Rakas do ạcur ạcurte bohoḱ ko sanam ạcur cabayenteae. Un jokhen Dolan do uni saṕkedea ar jhilo se jhilokedea. Khange Rakas doe beć got́keda ar uniaḱ lać khon Raj, Rạni, Montri, Sipạhi, Hạti, Sadom jotoko oḍokente lahate lekage tạṛam bạṛaeko dhurạuena.    

Mit́ṭen atore casa hoṛe tahẽkana. Uni do toa khon dahe ar makhon benaokateće ạkhrińet́ tahẽkana. Mit́din casa ren oṛaḱ hoṛ metaḱme ać bạhu do makhon benao kate ạkhriń lạgit́ casae emadea. Inạ tayom casa do ona ạkhriń lagit́ ato khon sohorte mohnḍayena. Makhon do ekal gol gol mońjge cake akan tahẽkana. Ona mimit́ goṭen reaḱ ojon do tahẽkana 1 kegi kate. Sohore seṭeren khan jao bar leka niạ dhao hõ niṭ akat́ dokanrege makhon bodolte ca, cini, sunum ar gharońj reaḱ jạruṛaḱ emanteaḱ jiniskoe hataokeda. Teheń do casa hoṛe senen tayom dokandar do onako makhon freez re dohoe jokhene hudiskeda noa reaḱ ojon do ṭhika se baṅ thoṛań biḍạu legaea. Tinre onae ojonkeda, sạrige makhon reaḱ ojon do 1 kegi  baṅkate 900 gram kate menaḱa.

Inạ dosar haptage casa hoṛ do makhon ạkhriń lạgit́ ona dokane calaoena. Tinre uni casa hoṛ dokane seṭerena soṅge soṅgete dokandar do kikiạuate menkeda, men oḍokoḱme ińaḱ dokan khon, niạ dhao khon onkan eṛe se ṭhok hoṛ sãote do bạń bạnij bepara. Ińaḱ dokanre ar tis hõ alogem hijuḱa, ente 900 gram reaḱ makhon 1 kegi menkate ạkhrińić hoṛaḱ mẽt́ãhã do ohogeń ńelkea. Ado uni casa hoṛ do ạḍi mạ̃hĩr salaḱ dokandare metadea, dada dayakate alogem raṅgaoḱa, khạṭige iń do ạḍi nacar hoṛ kạnạń, baṭkhara kiriń soman kạuḍi hõ bạnuḱtińa, onate tinạḱ dhao oka 1 kegi kate cini am ṭhen khon iń kiriń idiet́ tahẽn, onage baṭkhara mit́ aṛere dohokate eṭaḱ aṛe re do makhon dohokateć iń soṅet́ tahẽkana.

Sikhạuna:Am eṭaḱ hoṛ okam emae, onage tayomte arhõ am ṭhen ruạṛ hijuḱa. Ona do manot hoyoḱ se kurud.