“Gadha Jokhon Montri”

Mit́ṭen Raje tahẽkana. Uni Raj do mit́ din bir gajaṛ aṛe aṛete taṛam idiyet́ tahẽkana. Sãote aćren montri hõe tahẽkana. Ackage Raj do montri kulikedea, mase lạiańme, teheń aḱ abohaoa do cet́leka menaḱa? Raj do thoṛa sạṅgińe senena. Raj samaṅte mit́ṭen kićrić saphaeiće (Dhopa) calaḱkan tahẽkana. Ado uni hoṛ do Raje metadea, E Raja mahasoe, calaḱ kanam noa ma bhagege, menkhan kajak hoe-daḱ hijuḱa. Khange uni hoṛaḱ katha lekage, Raj do hoe-daḱe eset́kedea. Unre Raj do aćren montri bad kedete, kićrić saphaeićge aćren montri benaokedea.

Onkage mit́ din Raj do bagwanrey ạcur baṛae kan tahẽkana. Ackage monre kukli janamadea, montri do cekate baḍaekeda enhiloḱ reaḱ hoe-daḱ khobor do? Ado montri hohoadete metadea, am do cekatem baḍaekeda hoe-daḱ hijuḱa?

Montri:Tinre hoe-daḱ leka ạikạuḱa, unre ińren Gadhawaḱ lutur laṛaḱtaea. Onateń lạiat́me tahẽkana, teheń do hoe-daḱ menaḱa. Unre Raj do uni kićrić saphaeić montri hoṛ hõe bad kedete Gadha ge aćren montri benaokedea. Ado unre asol muskil do hoyena. Goṭa naṅgraharen Gadha ko heć jarwayena ar Raj ko metae kana, ale hõ amren montri benaoleme.

Mit́ṭen Kuṛi Iń Dulạṛkedea-Gel Are Aḱ Porbo

Dulạṛiạ Gate

Bejãe bhabnań ạikạueda iń lạgit́ do somoege jateć baṅ kulạuḱ kantama. Menkhan ińaḱ dulạṛ do am lạgit́ dinek din jạsti idiḱ kana. Am do ińaḱ monren mukuṭ kanam. Ạḍitet́em mõńja, ńindạ cando terdećem cekaea. Iń do iń boeha am baba ṭhen iń kolakadea. Uni hõe rạjigea. Pher inạkate do alaṅaḱ hạ̃s rạskạ aḱkoṭaḱ do cet́ge baṅ tahena.

Darae hapta do mit́ṭeć maraṅ bhoj hoyoḱa. Ona bhojre am nẽotameń menjoṅ kana. Am kaka hõ nahaḱe seṭeroḱgea. Alaṅaḱ baplatem kusi utạroḱa. Guti kạmṛiko tahentama, arem kusilen khan amte hõ ṭakam kamao daṛeaḱa. Ekalte mem-era lekam tahena. Alaṅaḱ somaj jion do eken lekha-poṛha hoṛ talare khemaoḱa. Menkhan alaṅ dulạṛ do joto khon comotkaroḱ talaṅa.

Noage Amren

Pạtiạr gate

Neṭ Duniạren Dundu

Manwa coṅ samajiạ tonol khonko saha calaḱ kana. Noṅkan sawal jãhãeaḱ monre hećaekan; uni babotre eken niạgebon men daṛeaḱa je uni do bastob duniạregey jiwidoḱ kana. Noa bastob dhạrti chaḍa hõ eṭaḱ mit́ṭen duniạ menaḱa; oka do mon duniạ mentebo men daṛeaḱa. Mon duniạren hoṛ do dhuṛi dhạrtiren khon hõ ạḍi samajiạ ar susạriạ menteko jạhiroḱa. Noko do ạḍi milạn sar hoṛ kanako. Neṭ duniạre onkoaḱ oḍoṅ bolon ńelte asokaete onkagem bujhạukea. Noko do nij peṛa pusṛiko são ńepel ńapam se hiri hipiri bạnuḱtako lekage. Mon duniạren ạnạṛi hoṛko sãoge nạṛjạṛ bạṛtigetakoa. Noko do dhạrtiren hoṛko khon chapaḍao idiḱte mõṛẽ inci reaḱ pardareko paera baṛae kana. Noa reaḱ orjo napaeoḱa se bạṛijoḱa ona tojbij reaḱ bhar do somaj bigiạni baṅkhan mon ḍakṭorko upạrbon jimạkaḱ khan paseć bogekoḱa. Menkhan onḍe hõ ạḍi din tạṅgi taṛaḱ tayomge orjo ńamoḱ reaḱ as menaḱa.

Social Media são laṭkao tahen reaḱ bạṛić orsoṅko jaoge dinạm hiloḱ reaḱ khobor kagojkorebobon ńelet́ kana. Onako khobor ńelte monere botor janamoḱa noa hudis kate enkathae darae dinre noa khon arhõ bạṛić halot hoyoḱa se cet́? Social Media beohar reaḱ neam dhara babotre jankạri ne-hoṛ ṭhen ạḍi do baṅ pusṭạua. Neṭ duniạren dundu metaḱme kom umerren gidrạ ar cahe do umeran hoṛko reaḱ kathagem men niạko din ạḍiko umjhạu akana. Bastob duniạren go-baba akoren gidrạ koaḱ bhạlạire tinạḱko danṭaoko; kukmu duniạre menkhan onka do baṅ ńeloḱa. Mobile phone saṕkate sanam ghạṛi laṛcaṛ baṛae do bạṛić heware bodol daṛeaḱa. Noa hewage tayomte nesare bodol daṛeaḱa. Jãhã baṅ karonte internet service bondlen khan bạṛićge aṭkaroḱa. Samajiạ helmelkore netar hoṛko, mobile phone korege jạsti bestom ńelea. Okte seṭerakana gidrạko mońjte mẽt́ luturako reaḱ, Online reaḱ nesa husit́ chaḍao lạgit́ digital detox camper cạlu akada. Noa camper mobile jimạ kate neṭ duniạ khon sạṅgińreko tahẽn kana. Noako ńelte monere mit́ṭen maraṅ sawal rakaṕ akana. Sawal do morality sãote freedom reaḱ. Gidrạ morality ḍaharte ạyurkore cet́ onko do sạri ḍaharre teṅgo tahẽn reaḱ salhabon emakoa se onko rukhiạkore freedom kobojtako lek kana.

Tumạl:Jugsirijol

Lelha Parwa

Mit́ṭen birre Kũṛit́e tahẽkana. Onḍe do ạḍi utạr Parwa hõko basoḱkan tahẽkana. Onko Parwa ar Kũṛit́ talare benebạiri tahẽkana. Uni Kũṛit́ botorte Parwa do oṛaḱ khonaḱ bahre sećge bako onḍoṅ daṛeaḱkan tahẽkana, onate Kũṛit́ hõ bae ceka daṛeaḱkoa.

Uni Kũṛit́ do mit́ din mon monte nonkae phãndkeda ar Parwae metadea, jãhãn botorge bạnuḱa, ińaḱ katha ańjompe. Cedaḱ ạuṛiaḱ dope botorạń kana? Iń do aperen raj benaoińpe. Enḍekhan doń ńel baṛapea. Ape do ińren porjape hoyoḱa. Ape cetanre okoe hõ jãhãn jor julum bako calaoma, onako ńel jutge ińaḱ kạmi. Lelha Parwako do uni calak cạtur Kũṛit́ aḱ sebel kathate bulạuente raj ko benaokedea. Ar Kũṛit́ do raj hoyen tayom din hiloḱ mit́ṭen kateć Parwa goćkate jojome dhurạuena. Ado Parwa do ako bhitrireko galmarao kana, abo do lelha leka aboren bạiri aḱ sebel kathatebon bulạulena, nit ona reaḱ sạjạibon ńameda.

Sikhạuna:Bạiri aḱ sebel kathate tis hõ oho bon bulạuḱ ma.

Sadom Ar Gadhawaḱ Golpo

Mit́ṭen hoṛe tahẽkana. Uniren do mit́ṭen Sadom ar mit́ṭen Gadhae tahẽkana. Mit́ din uni hoṛ do aćren Sadom ar Gadha ante ḍaharte calaḱkan tahẽkana. Gadhawaḱ deare do maraṅ okoć barea bojha lade tahẽkana. Hamalte Gadha do bae idi daṛeaḱ kana. Ạḍi ãṭe sasetoḱ kana. Ado uni do Sadome metadea, E boeha, bạń daṛeaḱ kana, ma noa bojha do amaḱ deare lade me. Sadom do uniaḱ kathate baṅge rebenlena.

Thoṛa ghạṛić tayom Gadha do hamal bojha bae sahaolet́te horrege bhindạṛena are goć hapeyena. Un jokhen uni hoṛ do ona bojha Sadomaḱ deare ladekeda, sãote Gadhawaḱ goć hoṛmo hõe ladekeda. Niạ dhao hamalte Sadom do kikiạuate mạ̃hĩr aṛaṅte bakhẽṛe dhurạuena teheń iń gunạḱtege nonkan dosareń paṛao akana. Ente unre Gadhawaḱ bojha ḍohaoreń goṛowae khan, nonkan dosa do ohogeń ńelkea, nit ona hamal bojha sãote uniaḱ goć hoṛmo hõ idi hoyoḱkantińa.

Sikhạuna: Apnarte nonkan jãhãn kạṭić kạmire dạyik hatao hoyoḱa, enḍekhan onkan hamal se maraṅ dạyik khon thoṛgan rehõ rukhiạ bon ńam daṛeaḱa.

Sikhạuna Golpo

Mit́ṭen Mahasoe hoṛe tahẽkana. Ar uniren mit́ṭen huḍiń kuṛi gidrại tahẽkantaea. Mit́din uni mahasoe hoṛ do biḍạu reaḱ khatae ńeńel kan tahẽkana. Khan ackage aćren gidrại hećena are metae kana, E baba, am são oko cokoń gateḱa. Ado ona jokhen mahasoe aḱ bohoḱre mit́ṭen cintạ hećadea. Onate mit́ṭen naksae oṛeć kuṭrạkeda are emadete metadea, do senoḱme ar noa naksa joṛaome. Judim daṛeaḱ enḍekhan am sãoiń gateḱa.Thoṛa ghaṛić tayom gidrạ do ona naksae joṛao ạgukeda ar ona ńelte ać baba metaḱme mahasoe do ạḍi ãṭe hahaṛayena. Ente nunạḱ maraṅ muskilaḱ kạmi do cekate nui huḍiń gidrại kạmikeda.Adoe kulikedea, E biṭi, noa naksa do okoeye joṛaokeda? Uni gidrại roṛ ruạṛkeda, ińge noa naksań joṛaokeda. Ado arhõe kulikedea, cekatem joṛaokeda? Adoe menkeda, naksa tayomre mit́ṭen cartoon doń ãkaoledea. Tinre nui cartoon iń joṛakedea, unre naksa hõ joṛaoena.

Cecet́aḱ:Jãhãn kạmire jitạuḱ lạgit́ aema hor do menaḱa. Eken kurumuṭure tahẽn hoyoḱa ar onka leka kạmie hoyoḱa.

Mit́ṭen Mạli Ar Ponḍ Kõḱ Aḱ Golpo

Mit́ atore mạli haṛame tahẽkana. Uni haṛam do aćaḱ jion reaḱ goṭa jingige dare rohoe ar jotonte khemao akada. Ako ato modre joto khon soros utạr bagwan do tahẽkantaea. Bagwan reaḱ mimit́ goṭen dare do aćren sadher gidrạ leka tahẽkana. Uniaḱ bagwanre mit́ṭen ponḍ kõḱ doe basoḱkan tahẽkana. Din hiloḱ kõḱ do onako darere aboḱa ar dare sakam koren aema lekan tejo koe jomkoa. Nonkate ona dare do mońjge tahẽnkan tahẽkana. Uni mạli haṛam do kõḱ ạḍi ãṭe dulạṛede kan tahẽkana ar jomaḱ hõe dohoae kan tahẽkana. Uni kõḱ do mạli haṛame ńel lekhange uni beṛhaete uḍạu baṛae kan tahẽkana. Unkin talare mońj sompok do tahẽkantạkina.

Mit́din setaḱ jokhen mạli do bagwanre kạmikan tahẽkana. Khange ńelkeda, aćaḱ mit́ṭen ul dare gonḍare okoe jạnićko la akada. Adoe hudiskeda, jạnić jãhãn biji se tejo ko nonka akada. Ado ạḍi ãṭe bhabnayena.

Ona oktere kõḱ do aćaḱ phạ̃ḱṛạ̃ḱ koṭa koṭate bhugạḱ ṭhene hećente duṛuṕena. Mạli tạṅkhikeda, kõḱ do arhõ ona bhugạḱ lạṭui reaḱe kurumuṭuieda. Ona ńelte mạli doe edreyena. Adoe hudiskeda, kõḱ paseć ona dare doe bạṛićeda. Edrete mạli do ṭheṅga saṕkateć kõḱ sećge ńir hećena.

Kõḱ do botorte uḍạuena ar dare ḍạrre duṛuṕena, menkhan thoṛa ghạṛić tayom arhõ pheḍena ar ona bhugạḱ sećrege duṛuṕena. Niạ dhao hõ mạli do bae sahao daṛeada. Uni do ṭheṅgate kõḱ aḱ phạ̃ḱṛạ̃ḱe dalkeda. Kõḱ do enrehõ udạu reaḱe kurumuṭuket́ rehõ bae daṛeat́te otre ńurhoyena.

Khange uni kõḱ ńelte mạli doe ṭhakena. Adoe hudiskeda, tinạḱ maraṅ bạṛiće kạmikeda. Kõḱ do inạḱtege mãyãmte jodbodaoena. Mạli do bhugạḱ sećge koyoḱ hapekeda, khange onḍe ona bhugạḱre mit́ṭen biń duṛuṕ akane ńel ńamkedea. One okoe khạtir ać hõ muskilre paṛao daṛeat́ke. Kõḱ do uni bińge lagaye kurumuṭuiet́ tahẽkana. Mạli do mit́ dalte bińe dal goćkedea ar kõḱ do inạtege goćena. Ado mạli do uni kõḱ saṕkatećge bhabnate duṛuṕ hapeyena are kastaoena.

Hako Sasaṕ Kẽoṭa

Mit́ atore mit́ṭen haṛam hako sasaṕ kẽoṭae tahẽkana. Jaoge uni haṛam do gaḍare hakoe saṕkoa are ạkhrińkoa. Nonkate uni do jion jingi khemaoet́ tahẽkana. Mit́din uni haṛam hoṛ do maraṅ okoć hakoe saṕkedea. Ńeloḱte hako do ạḍi mońj ar maraṅge tahẽkana.

Ado uni hako doe menkeda, “aṛaḱkạńme barẹ, amaḱ pea kukmuń purạutama.” Khange uni haṛam hoṛ do thoṛae guni bhạbiyena are menkeda, ińaḱ pạhil khojoḱaḱ do kana, noa atore arhõ ḍher hako ko hoyoḱma jemon ato hoṛko suluk ar nirạite jingi ko khemao daṛeaḱ. Dosaraḱ do kana, ale atore jomaḱ reaḱ jemon ṭonṭa se okulạn baṅ hoyoḱ. Tesaraḱ do noa kana joto hoṛ jemon sulukreko tahẽ darẹaḱ. Ado uni haṛam okae khojlet́ sanamaḱ do uni hakoe purạuket́taea. Khange onko ṭola paṛaren hoṛko sarhaokedea ar uni haṛam do aćaḱ ona kạmi ńutumte ạḍi ãṭe gorobena. Inạkate uni hako do daḱre pheḍ ruạṛena.

Sikhạuna: Noa khon cecet́aḱ bisoe do kana, apnaraḱ bhạlại baṅkate eṭaḱ hoṛ goṛowakoge bogea. Sạri suk do unre hijuḱa tinre abo eṭaḱ hoṛ lạgit́ bon hudis.

Ḍaktar Ar Ruạḱ Hoṛaḱ Golpo

Mit́din mit́ṭen namḍak ḍaktar mit́ atote ruạḱ hoṛ ńeńele senena. Ạḍi akal sakale ruạḱkan mit́ hoṛ do haspatal reaḱ aṭet́re gitić akana. Uni ńel baṛakate onḍoṅoḱ jokhen uni hoṛ do ḍaktaraḱ ti saṕkeda, are metae kana, E ḍaktar gujuḱ do ạḍi ãṭiń botoroḱa. Gujuḱ tayom cet́ menaḱa baḍaeam? Ado ḍaktare roṛ ruạṛadea, noa babot do bạń baḍaea, amem baḍaea?

Inạ menkate ḍaktar do aćaḱ duṛuṕ aḱ seće mohnḍayena.Tinre duạre jhićkeda unre duạrre teṅgo akan ḍaktar ren ạsul seta do bhitri sećge don boloyena. Boloyen khane rạskate aćaḱ canḍbol laṛaoe dhurạuena, ar alaṅ hõe tot́ akada. Niạ dhao ḍaktar do aćren uni ruạḱ hoṛ sene beṅget́ rakaṕkeda are metae kana, ńelkedeam ińren ạsul seta? Niạ laha tis hõ noa oṛaḱ bae ńel akada. Enrehõ bin botorte noa oṛaḱ bhitri boloyena. Eken inại baḍaea je, bhitrire aćren mạlik menaea. Onate duạr jhić torage bhitri sećge ńir boloyena. Gujuḱ tayom daram cet́ menaḱa noa do iń hõ bạń baḍaea, eken inạń baḍaea je onḍe do ińren mạlik menaea.

Ghus Jo̠mkateko Gohaḱ Ho̠ṛ Reaḱ

Deko ar ho̠ṛ reaḱ katha. Mit́ṭaṅ deko mahajo̠n do̠ ho̠ṛ khato̠k dena babo̠tteye lạlisadea, ar uni ho̠ṛ do thoṛae lelha machagea, ar dena tinạḱe dharaolet́a, onako do̠ jo̠toye hala caba akat́getaea. Ado̠ onae emae jo̠khe̠ć goha bae do̠ho̠ idilet́koa; inạgetae uniạḱ lelha do̠. Ado̠e e̠m cabaket́re hõ̠ bạkigeye metaea, baṅma, Nunạḱ unạḱ am ṭhen iń ńama, de̠n e̠mo̠ḱme, baṅkhan laṅ lạlisama. Ado̠ ona karo̠nte ḍherkin ro̠po̠ṛ baṛayena. Ado̠ mahajo̠ne me̠na, Acham e̠m akawadiń khan okorkotam goha do̠? O̠ko̠eko samaṅre tin titit́em e̠m ạgu akawadińa, de̠nko goha ạgukotam; am samaṅreń kulikoa. Ado̠ goha bạnuḱkotaete uni ho̠ṛ do̠e bhagao ocoḱ kangea, bae ṛo̠ṛ daṛeaḱ kana; e̠nte eskarregeye e̠m ạgu akawadea. Khange uni ho̠ṛ do̠ murukket́teye me̠nket́a, Acha besge, nunạḱ iń emadere hõ̠ bạkigeye metań kana;boge lạlisket́ khange, lạlis ocoae, inạ do̠ e̠kkalte caba dapoṛoḱa. Ar uni ho̠ṛ do̠ jumi jaega do̠ khubge menaḱtaea, ar mõ̠ṛẽ̠ nahel jotdar ho̠ṛ kanae; ado̠ onka ać mo̠nre uni ho̠ṛ do onkae niṭket́te mahajo̠n tuluć khub jhunạ jhunkin ro̠po̠ṛena.

Khange uni mahajo̠n do̠ uni ho̠ṛ upạrteye lạlisket́a; ado̠ parwanako jạriadete tạrik din hiloḱ do̠e hạjirena, ar goha eman do̠ bạnuḱkotaea. Ar uni deko do̠ ṭaka e̠mkate se̠ ghus e̠mkate pe̠ ho̠ṛe goha akat́koa, are lại ṭhik akawat́koa, baṅma, Ape do̠ nonka onka nãhãḱ lạipe me̠nte, baṅma, Ale salaḱrege nui hõ̠ nunạḱ unạḱe e̠m akawadea me̠nte, ape do̠ niạ kathage lạipe.Ar onko pe̠ ho̠ṛ mo̠to̠re mit́ ho̠ṛ do̠e lelha machagea; ado̠ ona iạte calaḱ jo̠khe̠n ho̠r ho̠rte onko goha do̠ mit́ talaoe sikhạu idiyet́koa, baṅma, Ape do̠ niạ khathage ro̠ṛtabonpe, niạ khon do̠ alope eṭagtabona.Ar nãhãḱ dahe taben khub iń jo̠m ocopea, ar hạnḍi ńũ lạgit́ hõ̠ń emapea. Nonka ho̠rreye kạbulako kana. Ar uni ho̠ṛ do̠ bạnuḱkotaete eskargeye calaoena, ar o̠nḍe̠ hõ̠ eskarge mayaḱ moyoḱe teṅgo baṛae kana.Ado̠ ona takrege mit́ ho̠ṛ ṭhene se̠n sorenteye kulikedea,Henda baba, cet́ mo̠ko̠rdo̠ma kantama me̠nte? Ado̠ uni ho̠ṛe me̠nket́a, Mahajo̠ne lạlis akawadińa dena karo̠nte, jo̠to̠ń e̠m cabakat́taea, e̠nre hõ̠ye lạlis akawadińa. Ado̠ uni ho̠ṛe me̠nket́a, Goha menaḱkotama? Ado̠e metadea, Goha do̠ bạnuḱkotińa.Ado̠ uni ho̠ṛe me̠nket́a, De̠n to̠be̠ khan barea ṭaka emańme, ar jo̠to̠ katha oṛe oṛpat́ lại cabawạńme, ar inạge gohańme, bebak nãhãḱ iń khalas ocokotama. Ado uni ho̠ṛe me̠nket́a, Achań emama, ạikạ khalaskańme. Ado̠ jo̠to̠ katha oṛ phe̠ḍe lạiadea, ar mõ̠ṛẽ̠ nahelko joṛaoa, ona hõ̠ye lạiadea.

Ado̠ onakoye ańjo̠m cabaket́tae khan barea ṭakaye ko̠ekedea, are metadea, O̠ko̠eṭaḱ kantamae mahajo̠n, ar uniren goha, onko am do̠ uduḱ ṭhikạńme. Ado̠ sạriye uduḱadea. Ado̠ khange uni ho̠ṛ do̠ goha akan ho̠ṛ ṭhene calao go̠t́enteye kuli baṛayet́koa, ar cet́ko co̠ye kuli mõ̠ńjet́koa, enkate onkoaḱ mo̠ne ńamet́takoa. Ado̠ uni lelha gohage ḍher do̠e kuli baṛayede kana; khange mahajo̠n do̠ uni ṭhen ạḍi ho̠ṛ soroḱ kane ńe̠lket́ko khan do̠e me̠nket́a, Nui goha do̠ nãhãḱ dhorageko bhaṅṭaoetińa. Ado̠ onkaye bujhạuket́ khan se̠n sorkateye metadea, Am do̠ń lạiam kana, ho̠ṛ do̠ jãhãnaḱgeko metam onkoaḱ do̠ ańjo̠mte̠t́ge alom ańjo̠mtakoa. Am do̠ sahib okaye metama, inạ reaḱ ro̠ṛ ruạṛaeme, ar am ṭhen ho̠ṛko hijuḱ khan onko tuluć do̠ alom galmaraoa, am do̠ saheb okaye metama, inạge ro̠ṛ ruạṛaeme, ado̠ onka uni lelha goha do̠e sikhạu baṛakadea. Ado̠ inạ mit́ ghuṛi tayo̠m khange phukạr hoe go̠t́entạkina; ado̠ hạkim do̠ mahajo̠n ar uni ho̠ṛe kuli baṛaket́kina; ado̠ ona tayo̠m uni ho̠ṛren gohako phukạrkedea. Ado̠ ho̠lo̠p baṛakateko kulikedea, Tum in donako keya hal janta hai, dho̠ro̠m dho̠ro̠m bo̠lo̠, keya hal janta hai? Ado̠ uni ho̠ṛe me̠nket́a, hạjur, ham to̠ hal nãhĩ jante hai, keya jan, sal ka hal banaya hai, ki aso̠n ka banaya hai, ki dhao ka banaya hai, lekin pãc ṭho̠ hal joṛta hai; so ham jante hai, kon kaṭ ka hal banaya hai, so ham nãhĩ jante hai.Ado̠ kathae, onkaye ro̠ṛket́ khan uni do̠ko ḍhaka oḍokkedea;ado̠ko kulikedea, Ar hõ̠ goha menaḱkotama se̠ baṅ? Ado̠e me̠nket́a, Bạnuḱkoa,ini eskargeae. Ado̠ khange uni mahajo̠nren gohako phukạrena, pạhilkin do̠ cet́ leka co̠ko kuli baṛaket́kintekin thirena.

Ado̠ uni lelha gohako phukạrkedea, ado̠ bo̠lo̠yente hạkim samaṅreye teṅgoyena; ado̠ capṛasiko ho̠lo̠pede kana, metae kanako, Dho̠ro̠m dho̠ro̠m bo̠lo̠. Khange uni ho̠ṛ do̠ kathae, cet́ hõ̠ bae ro̠ṛet́a, thir akangeae. Ado̠ onka bar pe dhaoko metae kana, Dho̠ro̠m dho̠ro̠m bo̠lo̠. Ado̠ bae ro̠ṛlet́ khan do̠ hạkime me̠n go̠t́ket́a, Keya, tum pagla hai?Ado̠ kathae, uni ho̠ṛ hõ̠ye ro̠ṛ go̠t́ket́a, Keya, tum pagla hai? Arhõ̠ hạkime me̠n go̠t́ket́a, Are ardali,isko nikal do. Ado̠ kathae, uni ho̠ṛ hõ̠ ti tulkate, se̠ uduḱateye me̠n go̠t́ket́a, Are ardali. Isko nikal do. Ado̠ khange inạḱe me̠nlet́ khange o̠nḍe̠n ho̠ṛ do̠ bogeteko landaket́a, ar hạkim sudhạge khaḱ khaḱe landaket́a; ado̠ e̠ne̠ko ḍhaka oḍokket́koa, ar mo̠ko̠rdoma do̠ ḍhismisena. Ado̠ uni ho̠ṛ oḍokkate gohataeye metae kana, Oka lekam ro̠ṛket́a? Bạń bujhạulet́a. Ado̠ uni gohalen ho̠ṛe me̠nket́a, Durre̠, eṭaḱre ro̠ṛ iń me̠nlet́a ho, ado̠ hạkim eṭaḱreye kuli go̠t́kidińa, nahelge lahareye kuli go̠t́kidińa, keya hal jante hai?Ado̠ am hõ̠ tho̠ nahel do̠ bam lạiạdińa, noa kaṭ se̠ ona jạt reaḱ nahelko do̠ń benao akat́a me̠nte.

Tumạl:Santal Folk Tales