Kelas ehoṕ mit́ ghaṛi tayom khan ṭayiṭ jins penṭ reaḱ gubli bhitri re mobayil do bạt kaṭkom leka 15 dhom gan rugum rugumena. Pạhil seć 5 dhom gan do mis kol tahẽkana, ar inạ tayom do bujhạuḱ kana kol ge tahẽkana. Bulu jalat́ re nunạḱ ghạṛić mobayil reaḱ bhaibareson te bokṛo gey ạikạuet́ kan tahẽ rehõ binod bạbu kelas reaḱ pạhil beńce reye duṛuṕ akan tahẽnte penṭ gubli khon mobayil oḍok bae daṛeada.

Mahasoe aḱ lekcar mucạt́ sãote Binod do tiạr lạṭić ńoḱ ate gubli bhitri khon mobayil  oḍok ket́ teye lin keda. Are ńel keda ato oṛaḱ ren binoe kanae. Binod ren gate koṛa. Ạḍi gan kol ge bae kol baṛaea. Acka teheń noa tikin tarasiń cet́ jạruṛ te unạḱ doe kol keda. Bujhạuḱ kana Binoe teheń bhage ńoḱ tege jạniće bul akana. Ona iạtege uni do bhạṭi khonge jạniće kol akada. Kol ruạr lạgit́ Binod do Binoe aḱ mobayil re kole bhorao keda. Kol bhorao sãote mobayil do Binod lutur bhugạḱ reye lại adea je, kạuḍi do caba akana. Kạuḍi bhorao jạruṛa. Ạḍi ạṛis ar asket selet́ bharsiṭi reaḱ geṭ khon barhe seć oḍok ente mobayil re ṭakae bhorao keda. Menkhan noa maraṅ ṭaon reaḱ pãpõ ar hiḍạr hoḍor moṭor gạḍi reaḱ saḍe te niạ okte Binoe tuluć roroṛ ar baṅ sana ledea. Mes re sen kate nirạla te gal marao reaḱe goṭa keda.

Mańjan daka jom tayom Binod do logot́ aṭet́re pharnaoḱ tuluć Binoe aḱ mobayil re kole bhorao keda. Hante Binoe hõ Binod aḱ kol ńam são sãote usạrate risib tora uni do lutur khaka ruhạt́e dhurạuena. Uniaḱ ruhạt́ te Binod do cet́ hõ bae bujhạu daṛe aḱte Binoeye kuli kedea.

• Binoe ạḍi ãṭem raṅgaoḱ kan je, Binoe do roṛ ruạṛ baṅ emkate arhõ Binode kuli kedea.
• Enanoḱ koliń bhoraolet́ sasaṕ dom cekalena luṛu?
• Binoe tin okte amem kol leda ona okte iń do kelas reń tahẽkana. Ona iạte bạń risib daṛeada.
• O……….Ańjom me Binod, Baha aliń ṭhene hećelana. Uni ge kathaye roṛ kea. Ạḍi ghạṛić amaḱ kol asre tahẽkate mayaḱ moyoḱ oṛaḱ teye ruạṛ calaoena.
• Ańjom me Binoe, am do tahole bhạṭi bela uni tuluć roṛ ocoyińme. Mis kolem em lekhange hoyoḱa, Ṭhikgea matobeń dohoyeda.
• Acha ṭhikgea ma tobe.

Baha aḱ katha ańjomket́ tayom khange Binod do khańca bhitri ren cẽṛẽ leka an chane ạikạuet́ kana. Uniaḱ ontor re jala puri reaḱ ḍheo ge jạnić ehoṕ akana Baha tis hõ bae kol baṛaea. Apat́tet́ ma bir ren kul tạruṕ leka raṅgaoić kanae. Ona iạte uni do nit hạbić Baha kolej reye paṛhaoḱkan rehõ mit́ṭen mobayil hõ bae kiriń akawadea. Bahawaḱ aema lekan katha ko cintạ cintạtege goć goṅgha lekae jạpit́keda.

Tin reco bela ma ạḍitet́e pheḍ cabayen  Binod disạge bae disạleda. Ackae! Disạ ket́te aṭet́ cetanre beret́ kateye duṛuṕena. Mobayile lin ket́teye ńelkeda 2 dhao mis kol rakaṕ akana Binoe aḱ mobayil khon, tobe ạḍi ghạṛić do baṅ hoe akana. Binod do ạḍi usạra kol bek ruạṛket́te mobayil do lutur reye jalat́ keda. Hante mobayil risib akan rehõ jãhãn kathage bạnuḱa. Emne tege ạḍi gan bae roṛ baṛaea. Hello! Hello! te Binod doe laṅga cabayena. Menkhan hana aṛe khon jãhãn aṛaṅge bạnuḱa. Hante Baha hõ risib mae risib akat́ge menkhan ona sãote ulidaḱ kohõ sanam rohoṛ cabayentaea. Ạḍi aneć thartharaoḱ kan aṛaṅtege roroṛe ehoṕena.

• Baha kạnạń, cet́ leka menama?
• Bes geạń, am cet́ leka menama?
• Iń do ạḍi bes do bạnuńa, Darakan Lukkhibar Robiaḱ bapla, enhiloḱ jãhã lekatege hijuḱme, am tuluć ạḍi aema katha menaḱtińa
• Cet́ unạḱ jạruṛ katha do? Nitoḱ thoṛa gan lạiạń mese.
• Baṅ bạń lạia, ar baṅkhan bam hijuḱa hãḱ?
• Bam hećlen khan iń doń gujuḱa.

Bahawaḱ noa katha roṛ roṛ tege raḱge laha ehoṕente Baha do ar bae roṛ daṛeada. Binod do aćaḱ ontor mẽt́ te Bahaye ńel kedea. Juri mẽt́ khon hiḍir hiḍir mẽt́ daḱ joha sećte ạtu pheḍae kana. Bahawaḱ cet́ reaḱ unạḱ duk? Jãhãe jãhãnaḱ ko men akawadea se cet́! Binod do Robiaḱ bapla re calaḱ reaḱ goṭa menaḱtaegea. Tobe acka Bahawaḱ katha ko ańjom kate ạḍi mońj do bae aṭkaret́ kana. Binod Baha tuluć onkan jãhãnaḱ bạṛić colon ge bae colon akada one onate jãhãge jãhãnaḱ ko men daṛeke. Tobe cet́ reaḱ duk tae? Baha do Binod tinạḱe dulạṛia ona do Binod  bae baḍaea. Tobe ać do purạ teye baḍaea Baha do aćaḱ jionre poraeni Bahage. Serma ren joloḱ kan ipil lekage ḍig ḍig jol akan menaea Binodaḱ ontorre. Tobe teheń Bahawaḱ raḱ tegeye bujhạu keda Baha hõ onka ge Binod lạgit́ khạndri dulạṛ menaḱtaea.

Ol toṅgeḱa-

Adaṛrẹ Jaṭa ńutuman ạḍi kisạ̃ṛ ho̠ṛe̠ tahẽ̠kana. Unire̠n barea darmo̠ṭ darmo̠ṭ ḍaṅgra ar ḍaṅgra sagaṛ tahẽ̠kantaea. Mit́din uni do̠ hạṭiạte̠ hoṛo idi lạgit́ sagaṛ re̠ hoṛo bostae lade pe̠re̠ćkeda. Me̠nkhan ḍahar ạḍi lo̠so̠t́ tahẽ̠kante̠ do̠lhare̠ thạli ṭarhaoentaea. Unkin darmo̠ṭ ḍaṅgra do̠ ạḍi murukte̠ sagaṛ o̠r rahaṕkin kurumuṭu keda me̠nkhan bạkin daṛelena.

Ona ḍahar tege peḍel gạḍite̠ haṭo̠ḱ ho̠ṛko calaḱkan tahẽ̠na ar thạliakan sagaṛ ńe̠l teko teṅgoena. Ar jo̠to̠ ho̠ṛte̠ hẽiyo̠ hẽiyo̠ kate̠ko ṭhelao rakaṕkeda.Ona tayo̠m jo̠to̠ko ge hạṭiạte̠ ko mohnḍayena

Mit́ṭen pukhrire̠ aema hako ko tahẽ̠kana. Onko do̠ ạḍi bạḍạiankoko tahẽ̠kana ar o̠ko̠eaḱ kathage bako ańjo̠me̠t́kan tahẽ̠kana. Ona pukhrirege mit́ṭe̠n ạḍi maraṅ haṛam tayaṅe tahẽ̠kana. Uni do̠ ạḍi bhage ar dayawane tahẽ̠kana. Jaoge hakokoe metaoako kan tahẽ̠kana alope bạḍaia mũhinrepe paṛaoḱa. Uni do̠ ḍe̠ho̠ṛe̠ disạkoa.

Mit́din tayaṅ do pukhri aṛere̠ dhiri danaṅre̠ye̠ jirạuakan tahẽ̠kana. Ona okte̠ barea jạliạ pukhrire̠ daḱ ńũkin he̠će̠na. Daḱ ńũ jo̠khe̠ć ạḍi ãṭ hako laṛao ńe̠lte̠ mit́ ho̠ṛ do̠e me̠nkeda ma ńe̠lkom hako ce̠t́ le̠kako haḍbaḍaoeda. Gapage lạṭu ar ke̠ṭe̠ć jhạli ạgu katelaṅ jhạlikoa.

Tayaṅ do̠ ona kathae ańjo̠m keda ar ruạṛ se̠nkate̠ hakokoe lạiat́koa. Hakoko do̠ uniaḱ katha bako luturat́taea me̠nkhan unigeko siṛạgadea. Dosar hilạḱ unkin jạliạ do̠ ạḍi ke̠ṭe̠ć ar lạṭu jhạlikin ạgukeda ar jo̠to̠ hakokin jhạlike̠t́koa. Hakoko do̠ bańcaoḱ lạgit́ ạḍiko kurumuṭu keda me̠nkhan bako bańcao daṛeada. Ado̠ mo̠ne̠te̠ko me̠nkeda tayaṅaḱ kathakobon ańjo̠m le̠khan bańcao daṛe koḱabon.

Ato ńutum Birṭola. Noa Birṭola ato beṛhaete hạriạṛ dare nạṛĩte pereć akana. Usul jaega kore lạṭu lạṭu jo dare menaḱa. Ar latar ot jaegakore hoṛo, ar eṭaḱ eṭaḱ jo dare hõ rohoe menaḱa. Noa atorege Onu ńutuman mit́ṭen Kolhe kuṛi gidrạ menaea. Umer tae 12 bochor. Iskul re paṛhaoḱ kana.

Teheń Onu soṅge hor re ńapam hoyentińa kulikedeạń, Onu oakte caḱ kanam? Gại gupi caḱ kạnạń. Ạribạndhi kate Onu ńel kedea, uniaḱ monre haron kosṭo. Eṭaḱ gidrạ leka uni hõ iskule calaḱa, gidrạko soṅge eneć baṛaea, ar rạskate dine khemaoa. Menkhan Onuaḱ jion re joto lekanaḱ kukmu, rạskạ ar paṛhao ar eṭaḱ soṅge gate baṅ hoyoḱ kantaea. Reṅgeć hoṛ kanako.  Ayo baba bahre kạmikin calaḱa ar Onu hõ gại merom gupi calaḱa. Ać ayo kạmi bae calao lenkhan Onu unre iskule calaḱa.

Eṭaḱ gidrạ hõ teheń iskulte bako sen akante iskul mahasoe pạṭhuạko hoho heć akana. Ińe metạń kana pạṭhuạko iskul bako hijuḱ kana, ar mońj tehõ bako paṛhao daṛeaḱ kana, alele kurumuṭueda jate gidrạko jao hiloḱ iskulko hijuḱ ar mońjte paṛhao ko cet́ dareaḱ .

Onu lekan aema gidrạ iskul baṅ calaḱ karonte oloḱ paṛhao bako cet́ daṛeaḱ kana. Oloḱ paṛhao chaḍa tishõ mit́ṭen jạt bae lahanti daṛeaḱa. kol jạt akoaḱ obostha pherao lạgit́, lahanti ạgui lạgit́ jạpit́ khon ebhenoḱ jạruṛ menaḱa.

Bahare̠n mit́ṭe̠n Miru cẽ̠ṛẽ̠ tahẽ̠kana. Uni cẽ̠ṛẽ̠ do̠ ho̠ṛ lekageye ro̠ṛ daṛeaḱkan tahẽ̠kana. Mit́din atore̠n soetan gidrạko do̠ se̠ṅge̠l liạ busuṕ pala ṭhe̠nko gateḱkan tahẽ̠kana. Gate gatete̠ busuṕ palare̠ se̠ṅge̠lko lagao ocokeda ar bo̠to̠rte̠ko dạṛkeda.

Se̠ṅge̠l ńe̠lte̠ uni Miru cẽ̠ṛẽ̠ do̠ se̠ṅge̠l se̠ṅge̠l me̠nte̠ye̠ kạumạukeda. Ona ańjo̠mte Baha hõe dạṛ ạgukeda ar se̠ṅge̠l ńe̠lte̠ se̠ṅge̠l se̠ṅge̠le kạumạukeda. Unkinaḱ kạumạu ańjo̠mte atore̠n ho̠ṛ daḱ liạko dạṛ ạgukeda ar se̠ṅge̠lko dul ạṛićkeda. Atore̠n ho̠ṛ Baha ar Miru cẽ̠ṛẽ̠ aemako sarhaoke̠t́kina.

Sedaere mit́ serma do ạḍigey setoṅ keda ar daḱ hõ bae daḱleda. Mit́ṭen pukhrire barea roṭe ar unkinren pea gidrạko tahẽkana. Setoṅte pukhri ar gạḍiạko joto rohoṛ cabaoakana. Gaḍa kohõ paṛaḱ utạr akana. Gidrạ kodo daḱ begorte gatiḱ hõ bako sen daṛeaḱkan tahẽkana. Mon bạṛić kate oṛaḱrege ko duṛuṕ koḱkan tahẽkana.

Kạṭić gidrạ do ać gogoe kulikedea, E go tise daga? tis ado barhete gatiḱle senoḱa? Ado gogoe  menkeda, bạrsạ din seṭerena. Gapa meaṅ khongey daga.

Dosar hiloḱ setaḱ khon sermare ńũtge rimil rakaṕena ar jhomor jhomore daḱkeda. Roṭe hopon kodo barheteko don oḍokena ar nãwã daḱre rạskạte pẽ pÕ pẽ pÕ sereń ar dodonko dhurạuena.

Mitt́din ho̠e ar siń cando do̠ hapaṛaḱkin eho̠ṕena baṅma o̠ko̠eaḱ daṛe ḍhera mente. Ona o̠kte cado̠rte oyokate mit́ṭen ho̠ṛe calaḱkan tahẽkana. Uni ńel katekin menkeda o̠ko̠e uniaḱ ho̠ṛmo̠ kho̠n ona cado̠re o̠co̠ḱ daṛeaḱa unigey maraṅangea.

Ho̠e-e menkeda uni ho̠ṛre ińaḱ daṛe ńelme. Ado̠ ạḍi ãṭ ho̠e rakaṕena ar rad rade ho̠e keda ar oṛaḱ duạr, dareko ho̠ete rạput́ena. Ar uni ho̠ṛ hõe orlo porlo cabaena, aćaḱ kicrićko oṭaṅo̠ḱ kante hạṛuṕ samṭao ket́taea.

Ar ona setoṅ hõ aćaḱ daṛe uduḱe eho̠ṕena. Ar ạḍi ãṭ jharla jhạrli setoṅe eho̠ṕena. Setoṅte sanam gaḍa pukhriko ro̠ho̠ṛena. Ar uni ho̠ṛ hõe lorao cabaente dare umulre duṛuṕkate mit́ mit́te sanam kicriće bo̠ć cabakeda. Ar noṅkate siń cando do̠ ho̠e kho̠ne maraṅena.

Mit́ṭen ciṛiạkhana re  gidrạ Ũṭ do̠ ać go̠go̠e kulikedea, E go̠, aboaḱ deare usulge ona do̠ cet́ ko metaḱa? Uni do̠e ro̠ṛ ruạṛadea, noa do̠ ducut́ ko metaḱa. Hahaṅkar jaegare ạḍi sạṅgińte calaḱ hoyoḱa, ar jãhã tinre daḱ reaḱ jãhãn cinhạge baṅ ńelo̠ḱa. Menkhan daḱ reaḱ hõ jạruṛ menaḱa. Noa ducut́re abo daḱ bon do̠ho̠ daṛeaḱa, o̠ka do̠ aboaḱ jạruṛ o̠kte rebon beohar daṛeaḱa.

Ado̠ uni gidrạ Ũṭ do̠e mengo̠t́keda, Oh, ona do̠ ạḍi bhagegea! Ar aboaḱ jaṅga do̠ cedaḱ nunạḱ jeleńa? Ado̠ go̠go̠ Ũṭ do̠e menkeda, E baba, noa hahaṅkar jaegare ạḍi sạṅgińte calaḱ hoyoḱ tabona, onate jemo̠n babon haro̠no̠ḱ ar babon dukoḱ ona lạgit́ge nunạḱ jeleṅ jeleń jaṅga kantabona.

Arhõ uni gidrạ Ũṭ do̠e menkeda, E go̠, aboaḱ mẽt́, mũ re lạṭu lạṭu uṕ do̠ cedaḱ ? Noa kukli reaḱ hõ ać go̠go̠ do̠ landa landate ro̠ṛ ruạṛadea, E baba, hahaṅkar jaegare hoe daḱ hećlenre bogete gitilko hoete oṭaṅ baṛaea. Aboaḱ mẽt́ mũre gitil jemon alo bo̠lo̠ḱ, ona lạgit́ge sisirjạuić do̠ mẽt́, mũre nonka lạṭu lạṭu uṕe em akat́bona.

Niạ dhao uni gidrạ Ũṭ  do̠e menkeda, E go̠ iń do̠ noa bạń bujhạueda je, sisirjạuić daḱ do̠ho̠e lạgit́ nonkan ducut́e em akat́bona, hahaṅkar re daṛan lạgit́ jeleń jeleń jaṅgae em akat́bona, gitil kho̠n rukhiạḱ lạgit́ lạṭu lạṭu uṕe em akat́bona, enḍekhan cedaḱ, noa ciṛiakhana redo̠ cet́bon cekaedea?

Sikhnạt:  Jãhã tinạḱ gun ge menaḱtam, ṭhik jaegare bam tahẽn khan bhạgan ho̠ṛ do̠m baṅ kana. Bhạg do̠ cet́ kana? Ṭhik o̠ktere, ṭhik jaegare, ṭhik ho̠ṛko talare tahẽnge bhạg ko metaḱa.

Ḍe̠t́ḍe̠t́ mit́ṭe̠n ato. Ato ńutum do̠ Jo̠jo̠ṭola. Ona atore̠ Riạ ńutuman mit́ṭe̠n kạṭić kuṛi gidrại tahẽ̠kana. Uniaḱ ume̠r do̠ 14 serma. Uni do̠ 8 kilạsre̠ye̠ paṛhaoḱa. Uniaḱ Iskul ńutum do̠ Kuṛigram High Iskul. Uniaḱ gharo̠ńjre do̠ko tahẽ̠kana baba go̠go̠ ar dada. Riạwaḱ do̠ paṛhao sãote̠ gate se̠ć hõ̠ ạḍi mo̠n tahẽ̠kantaea. Aćre̠n gateko gateḱ jo̠kheć ạḍi kurumuṭuteye ńe̠ljo̠ṅkan tahẽ̠na. Ar mo̠ne̠jo̠ṅkan tahẽ̠nae ać hõ̠ lạṭu kate̠t́ bo̠le̠ gateḱa.

Mit́din aćaḱ mo̠n reaḱ katha go̠go̠ baba tạkine lạiat́kinạ. Babae metawadea “baba lạṭu kate̠t́ iń hõ̠ bo̠liń gateḱa. Ado̠ babae ro̠ṛ ruạṛadea ṭhikgea gạu am do̠ mońjte̠ paṛhaoḱme sãote gateḱme̠ onate iń do̠ asket́ bạnuḱtińa.” Baba go̠go̠ tạkin hõ̠ Riạkin udgạu kedea. Iskulre jahan gate regeye se̠le̠do̠ḱ kan tahẽ̠kana. Gateḱ lạgit́ arhõ̠ko udgạuedekan tahẽ̠na. Iskul kho̠n gateḱ lạgit́ko o̠pso̠raekan tahẽ̠na.

Mit́din Kuṛigram High Iskul ar Damkuṛa High Iskul bo̠l gatere̠ pạhilkate̠,Thana gatere̠ko selet́kedea. Onḍe̠ kho̠n Jilạ gatere̠ se̠le̠t́kate̠ gate sandese̠ ńamkeda. Riạ ona sandes ńamkate̠ ạḍie̠ rạskạyena. Ać go̠go̠ baba hõ̠ ạḍi kusi. Uni do̠ Kuṛigram High Iskul reaḱ mạhimae hataokeda. Mahasoe̠ko hõ̠ ạḍiko ńutumo̠ḱa uni lạgit́.

Sonaton do̠ MLE iskul re̠ye̠ paṛhaoḱa, iskulge bae kạmhạia. Iskulre̠n didimuni do̠ dinạmge ńutume̠ o̠ho̠etakoa ar pạhil kilạsrege apnar oprome̠ cet́ akawat́koa.

Sonaton do̠ ać baba sãote kạikuṛi mela ńe̠le̠ calaoena. Ona melare̠ do̠ ạḍi ãṭ ho̠ṛko hoyoḱa, onate̠ jatam bhiṛuḱa, riḍạt́ riḍạt́te̠ dãṛã baṛae hoyoḱa. Ona melare sarkas hõ̠ko ạguakat́ tahẽ̠kana. Sarkasren mit́ṭe̠n ạnḍiạ hạti do̠ cekate co̠e paglaena, ar baber topaḱ kate̠ ho̠ṛko se̠ne̠ dạṛ idikeda. Uni ńe̠lte̠ melaren jo̠to̠ ho̠ṛ bo̠to̠rte̠ am ińko dạṛkeda. Sonaton ać babatạkin hõ̠ dạṛ o̠kte̠kin apan ạpinena. Bo̠to̠rte ać babawaḱ ti aṛaḱkate picạm po̠ḍro̠će dạṛkeda, ackage tayom te̠ye̠ koyoḱ ruạṛke̠t́ ać baba ma bạnui. Bujhạu kedae jeye at́ akana. Sonaton ać baba do̠ gidrạ sendrate̠ bae ńamledea ar Sonaton hõ̠ ać baba bae ńame kante̠ raraḱe dhurạuena.

Raḱ ńe̠lte̠ko kulikedea cedaḱem raḱeda, arhõ̠ ko kulikedea amaḱ ńutum do̠ ce̠t́, babawaḱ ńutum do̠ cet́, okare̠n kanam. Sonaton do̠ jo̠to̠geye lại daṛeada. Cedaḱje MLE iskulre didimuni jo̠to̠ge̠ye̠ cet́ akawat́ko tahẽ̠na.

Onakoe lại daṛeakat́te uni do̠ ako oṛakteko idi se̠ṭe̠r oṭo kadea. Onate Sonaton do̠ bae at́ utạrlena.