Rangpur Badarganj upojilạre̠ Ạdibạsi Iskul pạṭhuạ 8 Irạl kilạs paṛhao̠ḱ kan kuṛiwaḱ jormoṭte̠ hoṛmo bạṛijtae̠ lạgit́ kurumuṭu re̠aḱ lạlisre̠ lailatul borat (19) ńutuman mit́ muslạ koṛae̠ giriptar oco akana. No̠a ghoṭona do̠ hola budhiloḱ ạyuṕ be̠la upojilạ Lohanipaṛa Union re̠aḱ Ạdibạsi Ato Simuljhuṛire̠ (diṅgạpaṛa) hoe̠ akana,.

No̠a ghoṭonare̠ pạṭhuạ gidrạre̠n Eṅgatte̠t́ bạdi hoe kate̠y mamla akada. Teheń Lukhibar uni muslạ koṛa Rangpur hajot teko kol kedea. Mamla re̠aḱ Ijạharre̠ baḍae̠o̠ḱ kana Dinạm hiloḱ Iskul horre̠ calaḱ hijuḱ lailatul Borat́ do̠ uni kuṛi gidrạ horre̠ eset́kate̠ dulạṛ re̠aḱ arojae kan tahẽna, o̠nate̠ Uniaḱ ona aroj nẽhorre̠ bae rạjilente̠ raṅgao̠ kate̠ uni boskoye̠ ehoṕ keda. Korona oktere̠ Iskul bondge tahẽkante̠ oṛaḱre̠ hećkate̠ uni uni kuṛi gidrạ ạṛisede kan tahẽkana.

Ae̠ma dhao mana kate̠ re̠hõ Lailatul ńutuman uni muslạ koṛa do̠ katha bae ańjom leda. Tayomte̠ ać gharońjre̠nko ona katha lại kate̠ re̠hõ jahan boge kạmi do̠ baṅ hoelena. Hola tayo̠m be̠la lailatul Borat do̠ tho̠ṛa kạmiạ são dare maḱ lạgit́ uni kuṛi tako seće hećlena,o̠na oktere̠ uni kuṛi tako oṛaḱre̠ bolokate̠ ńui lạgit́ daḱe̠ koekeda unre̠ uni do̠ tubewell khon daḱ ạgu kate̠ unie̠ emade khan uniaḱ hoṛmore̠ daḱe̠ chiṭạu adea, ona oktere̠ oṛaḱre̠ kuṛire̠n Gogo baba bạkin tahẽkan ạtre̠ bạṛić kạmi re̠aḱe̠ nẽhorade teye jhapṭao kedea ar lajao̠ jaega kore̠ ti emkate̠ bạṛijiye kurumuṭu keda uni lailatul Borat.Unre̠ uni kuṛiaḱ kạumạu ańjomte̠ eṭaḱ gharońjre̠n hoṛko ńir hećente̠ lailatulko saṕ kedea. Ona re̠aḱ khobor ńam ket́ khan pulis do̠ he̠ć kare ona ńindạge uni lalociạ Boratko saṕ kedea. No̠a ghoṭonare̠ kuṛire̠n acu gogo bạdi kate̠ lalociạ lompoṭ Borat ńutumte̠y mamla keda. Teheń Lukhibar Rangpur Adalot hũyạte̠ jehel hajotre̠ko kol kedea.

 Teheń October 15, 2020 tạrik do̠ go̠ṭa din Dinajpur Jilạ r̠eaḱ Kaharol Upojilạ Sukạndighi Maṭre̠ hoe̠ purạuena. No̠a football haprao re 8 go̠ṭe̠n team se̠le̠t́ko tahe kana. Jo̠to̠ team rege ạḍi dilgạriạ santal khilạḍ koko tahẽ kana. Football khilạḍ re̠aḱ asol jo̠s se̠ mo̠tlo̠b do̠ tahẽ kana; nãhãḱ jugre̠n juạn koṛako je̠mo̠n bạṛić kạmiko khon sahaṛakae̠ ko tahẽn ar o̠lo̠ḱ paṛhao̠ se̠ć te̠ko laha idiḱ. No̠a khilạḍ calao̠ banao̠re̠ Ạyurre̠ko tahẽ kana Isore Gram Ạdibạsi Jubo Soṅgoṭhon Khilạḍ re̠ se̠le̠t́ ko tahẽ kana Erạl 8 go̠ṭe̠n team se̠ do̠l; Do̠rga paṛa Mohe̠spur Ạdibạsi Jubo Soṅgho, Laṭer haṭ (Raten) Khansama, Muṭni haṭ SAFA Soṅgoṭhon, Pargao, Belsari, Baromail, Kạsipur, Rampur Santal atokore̠n dilgaṛiạ gạkhuṛ kilạḍiạko. Laṅga re̠ṅgeć go̠ṭa din khilạḍ kate̠t́ Final re̠ko rakaṕ e̠na; Muṭni haṭ SAFA Soṅgoṭhon ar Dorga paṛa Mohe̠spur Ạdibạsi Jubo Soṅgho. Ạḍi tạpis khilạḍ kate̠t́ okoe̠ hõ gol bako ńam le̠da. Mucạt́ re̠ traibekar phanda te̠ khilạḍ re̠aḱ jo̠ do̠ ńame̠na. Jo̠ do̠ no̠nka le̠ka tahẽkana; traibe̠kar phanda kate̠t́ mit́ 1 go̠l te̠ Muṭni haṭ SAFA soṅgoṭho̠n pạhilaḱ siropa (prize) lạgit́ko jitkạr e̠na. Pạhil siropa (prize) hisạbte̠ Muṭni haṭ SAFA soṅgoṭhon do̠ Ge̠l mõṛe̠ (15,000) hajar ṭaka ar Do̠sar siropa (prize) do̠ Dorga paṛa Ge̠l hajar (10,000) ṭakako ńam ke̠da.No̠a khilạḍ re̠aḱ Siropa cal-capat́ Akhṛare̠ seṭerko tahẽkana manotan Gonesh Murmu Bablu Member ar Maejiu Member Nurnahar.

Te̠heń do̠ October 15 Tạrik “Dhạrti jakat Ti ạruṕ din”. Jao̠ serma  goṭa dhạrtire̠ teheńaḱ no̠a din do̠ manao̠ḱ kana. Ne hoṛko sạbunte̠ ti ạruṕ  ocoko  talate̠ ae̠ma tejoko marao̠ giḍi se onko tejoko khon sapha sạphi tahe̠noḱ  ar ao̠dhan be̠nao̠ rakaṕ lạgit́ge no̠a din do̠ manao̠ hijuḱ kana. No̠a din do̠ dhạrti jakat manwa aodhako ar udgạu em idiako re̠aḱ mit́ṭen ḍhạrwạḱ kangea.

Sạbunte̠ ti ạruṕ re̠aḱ dhạrti ạri ar ṭhạ̃i jaega re̠aḱ hudisko jạhir lạgit́ dhạrti jakat Ti ạruṕ din gopoṛoić (GHP) noa din do̠ 2008 sermare̠ ehoṕe̠na

Dhạrti jakat Ti ạruṕ din re̠aḱ asol motlob do̠ kana- sãotare̠n sanamko sạbunte̠ Ti ạruṕ re̠aḱ mit́ṭen hewa be̠nao̠ rakab ar hẽḱaḱ. Inạ chaḍa hõ sạbunte̠ ti ạruṕ re̠aḱ bogeaḱ bisạite̠ bạṛti udgạu hoe ocoe.

Dhạrti jakat daḱ haptare̠ Sweden re̠aḱ Stockholmre̠̠ 2008 serma 15 October  Dhạrti jakat Ti ạruṕ Din gopoṛoić (GHP)do̠ e̠hoṕlena. Dhạrtire̠ aḍepase ar ṭhãi jaega kore̠ sạbun te̠ Ti ạruṕ bisạite̠ hoṛko ao̠dhan emako lạgit́ge pạhilte̠  no̠a din do̠ manao̠ hoelena, tayo̠mte̠ Jạtiạri Gãota re̠ak Sadharon Porisod  dupuṛuṕre̠ no̠a din ar tạrik do̠  jao serma manao lạgit́ goṭa hoena.

2008 Serma do̠ Hoṛmo hạṭiń rukhiạ serma hõ tahẽkana. 2008 serma no̠a din manao̠ lạgit́ e̠tohoṕ gãotako modre̠ko tahẽkana-( Amerikare̠n mit́t̠en goḱṛo gãota,Hoṛmo Rog takrhao̠ ar te̠ṅgo daram gãota, Procter and Gambol, UNICEF, UNILEVER,  World bank daḱ ar hoṛmo rog dobnao̠ ar Dhạrti jakat lahanti Amerika re̠aḱ gãota.

Rajshahi Kho̠n Po̠ncho̠go̠ṛ Sirajul Islam istiso̠n daharre daraekan so̠ko̠lbar kho̠n ‘Baṅglabandha Express’ ńutuman mit́ nãwã railgạḍi jao̠ge calao̠ hijuḱa. Teheń 15 o̠cto̠ber Rail mo̠ntri Nurul Islam Sujo̠n niạ railgạḍi reaḱe  uḍhaua.

Calao̠en mo̠ngo̠lbar Baṅgladesh Railway pạchim ṭoṭharen chief o̠perating superinṭenḍent kạmiṭhại kho̠n Baṅglabandha Express gạḍi calao̠ḱ reaḱ katha do̠ lại so̠do̠rlena.  Niạ gạḍi re duṛuṕ lạgit́ so̠bho̠n chair ar sho̠bho̠n 764/752 go̠ṭen duṛuṕaḱ reaḱ bebo̠stha menaḱa.  

Niạ gạḍi do̠ Rajshahi kho̠n so̠ko̠lbar ar Po̠nco̠gaṛ kho̠n do̠ sạnicar hilo̠ḱ bo̠ndh tahena.

Nãwã niạ relgạḍi Rajshahi-Po̠nco̠gaṛ calaḱ dahar re teṅgo̠ḱa Nato̠re, Abdulpur, Madhnagar, Ahasanganj, Santahar jo̠ṅso̠n, Akkelpur, Jo̠ypur haṭ, Pacnbibi, Birampur, Fulbaṛi, Parbartipur janso̠n, Cirirbandar, DInajpur, Setabganj, Pirganj, Sibganj, Ṭhakurgao̠n ro̠ad, Ruhiya ar kismet isṭison re.

Nator Lalpur re̠ jumi rereć ḍạku (bhumi dossu) Samad gãota re̠n koaḱ lilkạrre̠y paṛao̠ akana Basonti Rani Sardar. Katha rakaṕ akana Nator Lalpur Duaria Union re̠n Jumi rereć ḍạku ( Bhumu dossu) Abdus Samad gãota re̠n koaḱ lilkạrre bundi dosare̠ jione khe̠mao̠eda Ạdibạsi Basonti Rani Sardar. Ạdibạsi Basonti Rani Sardar  ać babawaḱ record sanam Sompotti do̠ daṛe̠ uduḱ kate̠ko dokhol akada jumi rereć ḍạku(Bhumi dossu) Samad gãota.

Sorejumin se̠nkate ńel akana Ạdibạsi Basonti Rani Sardaraḱ joto jumi do̠ jumi rereć ḍạku (Bhumi dossu) Samad ar unire̠n gãotako jor kate onakoko dokhol akada.

No̠a bisại re̠ ona Ṭoṭhare̠n ko ṭhen baḍae̠joṅ khoj kate̠ ńutum baṅ sodor kate̠ thoṛa murubbi hoṛko lại keda Basonti Rani Sardar ać Babawa ḱ record me̠naḱ jumi Samad ar uni gãotare̠n hoṛko mit́te̠ jor kate̠ dokhol kate̠ko jomeda.

No̠a bisạire̠ Basonti Rani Sarda ṭhe̠n baḍae̠ joṅ khoj kate̠  unie̠ lại keda, “Iń Babawaḱ Rekorḍiạ Sanam sompod kodo̠ jumi rereć ḍạku (Bhumi dossu) Samad ar uni gãotare̠nko jor jobosti dokhol kate̠ko jomeda. Ińaḱ be̠nao̠ oṛaḱ Samad ar uni gãotare̠nko tinre̠ rạput́ lạgit́ko hećlena unre̠ iń ar ińre̠n 4 boe̠ha kuṛiko mit́te̠ onkole̠ te̠ṅgo daram let́kogea,menkhan onko do̠ aleko joto hoṛ ṭhe̠lao̠ giḍikate̠ ińaḱ oṛaḱko rạput́keda. No̠a bisạite̠ iń do̠ são sãote̠ pulisiń phoneat́ koa unre̠ thana khon pulisko heće̠na ar ińaḱ rạput́ akan oṛaḱ re̠aḱ ṭin, mãt́ khunṭi são sanamaḱ ge pulisko idikeda. Tayo̠mte̠ thanare̠ mit́ṭe̠n ardasiń e̠mkeda Samad ar uni gãotare̠n 7 hoṛ ńutumte̠.”

No̠a bisạire̠ Lalpur Thanare̠n dạyikan kṣmiạyić OC Selim Reja kuli ledere̠ye menkeda, No̠a bisạite̠ mit́ṭe̠n ardas ńam akana tojbij le̠kate̠ ạn dharate̠ no̠a re̠aḱ kạmikodo̠ hoe purạuḱa.

Source:Dainik protibadi kontho

Teheń do̠ Dhạrti Durlo̠e sahaṛ mãhã kana. Dhạrtiren manwako abo̠aḱ jio̠n jiṅge khemao̠re aema lekan muhimko̠re bo̠ paṛao̠ḱa. Aema muhim ko̠ do̠ sirjo̠n reaḱ saraṕ kana manwako̠ lạgit́. Abo̠ do̠ daḱ jạput́ dinre dubạ daḱte o̠ṛaḱ duạr o̠t baṛge ko̠ nasao̠ḱ tabo̠na. Ar ho̠ ho̠e lo̠lo̠ dinre ho̠e phạrdo̠ te niạ sirjo̠n abo̠e nasao̠et́bo̠na. No̠nkạge ar ho̠ dhạrti laṛao̠ te ho̠ aema lekan lo̠ksan samaṅre bo̠ paṛao̠ḱ kana ar ho̠ bin o̠po̠ro̠m ro̠g ko̠tebo̠ jạbunkate mo̠ho̠r meṭao̠ḱ kanabo̠ manwako̠. Ar niạ ko̠ kangea manwa ko̠aḱ Uphạd se Durlo̠e do̠. Sirjo̠n reaḱ no̠ako̠ do̠ baṅ teṅgo daramo̠ḱa. Menkhan tho̠ṛagan so̠nto̠rbo̠n tahelen khan aema lo̠ksan kho̠n abo̠ hõ ar sirjo̠npuri ho̠ bańcao̠ko̠ḱa.

Teheń do̠ go̠ṭa dhạrite ren ko̠ Uphạd se Durlo̠e kho̠n sahaṛ akan mãhã ko̠ mano̠teda. O̠nko̠ saõ mit́ kate Baṅgladiso̠m ho̠ niạ mãhã do̠e manao̠ keda. Teheń Ṭhạkurgao̠n jilạ pro̠saso̠n ar Durjo̠g (Durlo̠e) bebo̠sthapo̠na bibhag, Raniso̠ṅko̠il Upo̠jilạ re niạ mãhãko̠ mano̠tkedako̠. O̠na lạgit́ mit́ gapalmarao̠ dupuṛuṕ ho ho̠ylena. No̠a gapalmaro̠ dupuṛuṕre maraṅ peṛa hisạbte selet́e tahẽkana Upo̠jilạ chairman Md. Shariar Ajo̠m Munna, Bises peṛa hisạte Maejiu vice-chairman Mst. Selina Begam, Upo̠jilạ Durlo̠e (Durjo̠g) bebo̠sthapo̠na ren Pro̠gram Implementatio̠n O̠fficer mano̠tan Samuel Mardi ar hõ o̠nḍenko̠ lekman ho̠ṛko̠ seṭerko̠ tahẽkana. Niạ gapalmarao dupuṛuṕ mukhia̠ hisạbtey tahekana Raniso̠ṅko̠il  Upo̠jilạ Nirbahi O̠fficer (UNO) Mo̠usumi Afrida. Diso̠m ren maraṅ mukhiạ do̠ jo̠to̠ko selet́  vedio̠ co̠nfarence te mit́lena.

Calaoen 06 Ocṭober Raṅpur Karmaikel kolege ren laser budhan pạṭhuạ Rukhiya Raut ko̠nac (rape) ar go̠je reaḱ bicạr dạbite teheń Dinạjpur press club re Baṅgladiso̠mren aema Ạdibạsi ko̠aḱ Pạṭhuạ gão̠tako̠ mit́te Manwato̠no̠l (Mano̠bbo̠ndho̠n) ko̠ ho̠yo̠co̠keda. No̠a manwato̠no̠l (Mano̠bbo̠ndho̠n) re ạdibạsi pạṭhuạ gão̠ta ạyur ko Rukhía ko̠nac ar go̠ć re do̠siaḱ maraṅ sạjại ko̠ kho̠j akada.

Rukhia ren apattet́ aćren ho̠po̠nerataḱ ko̠nac ar uni go̠go̠ć ko̠aḱ bicạre kho̠jkeda. Uni do̠ arho̠ menkeda ińren kuṛi gidrạ niạ ale gharo̠ńj reaḱ aema kũkmu tahekana. Mekhan aema lo̠blalo̠c udo̠ḱ kate uni Anisul ar aćren do̠lbo̠lante ińren gidrạ bulạute ko̠ ko̠nackedea ar bebạṛić kạmikate ko̠ go̠ć kedea. O̠nate diso̠mren ạyurić ṭhen ińaḱ kho̠jo̠aḱ ạḍi usạra niạ gho̠ṭo̠na reaṅ bicạr iń neho̠ro̠ḱkana.

Niạ chaḍa ho̠ Dinạjpur mo̠hilalig ren maejiu ạyurić Labo̠ni das menkeda- ạdibạsi Muso̠ho̠r jạt mo̠dre nui kuṛi gidrạ do̠ laser budaniće tahekana. Menkhan nui gidrạ ạḍi bạṛićkate ko̠ go̠ćkedea ale do̠ niạ gho̠ṭo̠na reaṅ bebạrić hirkhạ arle nisṛạo̠eda ar niạ gho̠ṭo̠na reaṅ bicạrre  do̠siaḱ maraṅ sạjạe le dạbiyeda.  O̠na chaḍa ạdibạsi pạṭhuạ gao̠taren sanam ạyurko ne betar ho̠yo̠ḱ kan  jo̠to̠lekanaḱ ko̠nac (rape) gho̠ṭo̠na ko̠ reaḱ ko̠ ro̠ṛdaram ar bicạrko̠ dạbikeda. Niạ o̠kte Rukhiya Raut at́ ko̠nac ar go̠je reaḱ maraṅ sạjại kho̠j kate ako̠aḱ mit́ mo̠n ko̠ jạhirre seṭerko̠ tahekana-  O̠rao̠ pạṭhuạ gão̠ta (BOSA), Santal Students Unio̠n (SASU) dinạjpur dạr gão̠ta, Adibasi Jatiya Naribadi Po̠risad, No̠rthan Adibasi Uikkajoaṭ,  Adibasi Chatra saṅgaṭho̠n, Hajee Mo̠hammad Danesh Science & Technolo̠gy University, mity são̠ ale, dinạjpur, Baṅgladesh Chrisṭian Juba Asso̠ciatio̠n ar hõ aema pạthuạ gão̠tako tahekana.

Rajshahi jilạ Tanorre̠ bạṛić kạmi lạgit́ bae rạjilente̠ mit́ ektiạranićaḱ demạriạ dalte jokhom kate haspatal re̠aḱ aṭe̠t́ re̠ye̠ aḍrao̠ baṛae kana mit́ ạdibạsi maejiu (21) No̠a ghoṭonate̠ o̠na ṭotha bạṛić obostare̠ me̠naḱa. O̠na aḍepasere̠n hoṛko uni maejiu ona bạṛić obosta khon usạra tanor upojila health complex re̠ko bhurti kedea.

Ato hoṛ ar haspatal pahṭa seć khon baḍae̠oḱ kana tanor upojilạ re̠aḱ kolma union  ṭothare̠n  ạdibạsi atore̠n mit́ maejiu ae̠ma din khon bạṛić kạmire̠ hẽḱae lạgit́ chalknaka simultola nicpara atore̠n saiphuddinre̠n kor̠a Sohidul Islam (30) do̠ jaogeye̠ men ạguae̠ tahẽkana, Menkhan uni maejiu do̠ Sohidulaḱ o̠na bạṛić kạmire̠ baṅ hẽḱ kate nachoul upojilạ re̠aḱ Rajbari ạdibạsi atore̠n Roton Murmu (34) são dulạṛ dupulạṛ hoen taea.

Calaoe̠n Robibar ńindạ uni rạnḍi maejiu do̠ aćre̠n dulạṛiạ sãote̠ or̠aḱ khon oḍok calaḱ o̠kte̠re̠ Simultola ṭhe̠n Sohidul do̠ unkine̠ ńe̠l ńamke̠t́ kinte̠ onḍege uni maejiu aṭkao dohokate Roton doe̠ dal ńir kedea, ona o̠kte̠ Sohidul do̠ uni maejiu arhõ aćaḱ bạṛić sanare̠ jormoṭ kedea, menkhan enre̠hõ bae rạjilente̠ Sohidul do̠ ạdibạsi maejiu demạriạ ṭheṅgateye̠ dal kedea,o̠nate̠ uni maejiu do̠ ạḍite̠t́ ạḍigeye̠ ghạl akana.

No̠a khạtir Sohidul são ropoṛre̠ Sohidul doe̠ menkeda ńindạ uni maejiu do̠ kombṛo̠ sondhte saṕ hoe̠lena ar thoṛa thuri dalkate̠ se̠taḱ do̠ aṛaḱ hoe̠ akana,no̠a mekate khoboriạkoe̠ eṛan akat́koa.

No̠a khạtir Tanor thanare̠n dạyik ńam akat́ kạmiạić (OC) Rakibul Hasan doe̠ menkeda nonkan jahan khobor se ijạhar do baṅ ńam akana. Uni doe̠ menkeda ijạhar se ardas ńamlen khan o̠na re̠aḱ ạn le̠kate̠ dạyikaḱle kạmia,

source: padmatimes.com

Rajshahi jilạ Godagaṛi upojilạre̠ are̠(9) kilạs paṛhao̠ḱ mit́ ạdibạsi kuṛiaḱ hoṛmo jormoṭ bạṛić ocoḱ re̠ye̠(dhorson) paṛao̠ akana. Sunicar 10 October tayo̠m be̠la amdaj 3 baja o̠kte̠ upojilạ re̠aḱ Gogram union Baliạḍaṅga atore̠ no̠a ghoṭna do̠ hoe̠ akana.

Henostarey paṛao̠e̠n kuṛi gidrạwaḱ o̠ṛaḱ do̠ o̠na Borgitola atorege mente̠ baḍae̠ akana. Hola ńindạ  9 baja o̠kte̠ uni kuṛi do̠ ar ać Baba- Go são̠ aḍe̠pase̠re̠n tahẽkate̠ Godagaṛi thanare̠ye ijạhar akada.

Ijạhar dạkhil se̠ćte̠ baḍae̠o̠ḱ kana, uni ạdibạsi kuṛi (14) hola tayom be̠la amdaj 3 baja oakte̠ o̠ṛaḱ khon praebheṭ(privet) paṛhao̠ḱ lạgit́ bạliạḍaṅ atote̠ mahasoe̠ o̠ṛaḱe̠ calaḱ kan tahẽkana, o̠na horre hoṛo khet pinḍhạre̠ Baliaḍaṅ atore̠n Alom Hossain re̠n koṛa Al- Amin do uni kuṛi  eskar ńamkedete̠ jormoṭte̠ bạṛić kạmie̠ (Dhorson) lạgit́e̠ kurumuṭuet́ tahẽkana, menkhan uni kuṛiaḱ kạumạu hohore̠ aḍepaserenko ńir heće̠n khan Al-Amin doe daṛ keda.

Godagari thanare̠n daroga(OC) Khairul Alom doe meneda mamla ol caṛhao̠ re̠aḱ kạmi calaḱ kana(report ol hạbić) uni dusiić sabe re̠aḱ hõ kurumuṭu do ̠e̠hoṕ akana.

Mamla e̠m tayom uni ạdibạsi kuṛi ar gharońj re̠n sulukre̠ko tahẽ daṛe̠aḱ ar uni dusi hoṛ usạra giriptare lạgit́ mit́ hokum e̠m hoe akana mente̠y lạikeda Rajshahi Otirikto pulis super Ifte Khayer Alom

Source: Jonojatir Kontho-11.10.2020

Iń kumạṅ Mo̠ṅgla Hasdaḱ tho̠ṛae̠ ńũ lase̠rle̠n tayo̠m guhuṛ guhuṛ se̠reń iń ańjo̠m kedere̠ń kuliledea, ce̠t́e̠m sereńe̠da! Niạbar do̠ tho̠ṛa muruk te̠ye̠ sereń ke̠da are̠ lại ạdińa-

‘Hạnḍi tạṛi ńũ te̠

Baro̠ bighạ so̠mpotim bho̠rnake̠da.

Bulmam ce̠tao̠e̠n, hudis ạcure̠n

Po̠ṭo̠r ṭo̠ya le̠kam uḍạu baṛae̠.’

No̠a sereń re̠aḱ bhe̠d se̠ khandrite̠t se̠ndrań e̠ho̠ṕe̠na. Baṅgladiso̠m re̠aḱ bạrin ar utạr nakha jilạko̠re̠ santal ho̠po̠n ko̠aḱ ae̠ma ae̠ma so̠mpoti eṛe o̠co̠ḱ re̠aḱ maraṅ e̠ṭke̠ṭõ̠ṛe̠ kana hạnḍi do̠. Jạnum jhạnti deko̠ pe̠ṛa do̠ e̠kal se̠taḱ ạyuṕ ko̠ hiri lebo̠nre mo̠ne̠ jiwi do̠ lạbit́ go̠do̠ḱ tabo̠na. Pe̠ṛaḱ abo̠n, o̠nko̠ tuluć jo̠m-ńũ e̠dabo̠n to̠be̠ e̠ke̠n abo̠ko̠aḱ ghạro̠ńj ko̠rege. Jo̠m-ńũ do̠ bạṛti kaete̠ tạṛi-hạnḍi, pạurạge. Gharo̠ńj re̠aḱ muskilre̠ rin dhar lạgit́ hõ̠ kạudi e̠mo̠ḱ e̠kal geko̠ khaṛa go̠do̠ḱa.  Mo̠ne̠r katha ma mo̠n regeye̠ re̠be̠t́ akat́, rin re̠aḱ jhạlire bo̠lo̠kate̠ algatege aosan e̠mo̠ḱ hõko lại sadego̠da. Me̠ne̠k unạḱ do̠ ce̠daḱe̠m guni bhạbiḱ kana, amaḱ khe̠t-baṛge tho̠ṛam e̠mạń khange rin do̠ń me̠tao̠ gidikaḱa. Ganḍra le̠ka rubuḱ rubuḱ ghạrõńj, so̠maj re̠aḱ bisi jaṅko̠ rạput́ akada, sanam so̠mpoti ho̠e̠ le̠ka o̠ṭaṅ caba akan tabo̠na. Santal ho̠po̠nko̠ me̠ne̠da, no̠a kando̠r re̠ ale̠aḱ jumi tahẽkana! No̠a baṛge do̠ So̠ko̠l go̠ṛo̠mba tako̠aḱ kana. Mit́ piṛhi hõ̠ ạuri paro̠mo̠ḱ rege ako̠aḱ khe̠t baṛge re̠ nito̠ḱ do̠ kamlako̠ khaṭao̠ḱ kana. Haere santal ho̠po̠n, haere santal so̠maj!

Abo̠ko̠ren juạn ko̠ṛa-kuṛi ko̠hõ ne̠be̠tar ma hạnḍi, tạri pạurạ bo̠ge teko̠ kusiaḱ kan. So̠ho̠rae ar e̠man po̠ro̠bko̠re naṅgraha ko̠re kho̠nko̠ so̠ho̠r se̠ṭe̠r le̠nre̠ o̠raḱ ko̠ca geko̠ o̠yo̠ṅ baṛaya. Kubrạj ar Sunil do̠ mit́ ato̠re̠n kanakin. Mit́ dhao̠ Kubrạj ar Sunil do̠ so̠ho̠rae re̠ o̠ṛaḱkin he̠ćle̠nre̠ Kubrạjre̠n mamo̠te̠t́ tako̠ ṭhe̠n pe̠ṛaḱkin ãṛgo̠e̠na. Naṅgraha re̠kin tahẽna ar po̠̠ro̠̠b kana bạṛti rạskạjo̠ṅ lạgit́ge hạnḍiko̠ do̠ho̠akada. Juạn ko̠ṛa mo̠ṭo̠r cycle re̠kin co̠ghaye̠nte̠ giṛ giṛạu calao e̠nakin. Bo̠gete̠ko̠ jo̠m ke̠da, ńũ ke̠da arko̠ rạskạe̠na. Ńuhum ńuhumko̠ bidake̠t́ kina, bidaḱ lahare̠ bar bạṭi kate̠ se̠be̠l hạnḍi ko̠ calat́kinre̠ po̠yo̠ṛ po̠yo̠ṛkin ńũ go̠t́kada. Kubrạj do̠ mo̠ṭo̠r cycle start go̠t́ke̠da ar de̠će̠nte̠ ṭipạ ṭape̠kin mo̠hnḍae̠na. Hudiń ḍahar kho̠n district ro̠ad re̠kin rakaṕ go̠t́e̠na. Bul akankin tahẽkante̠ so̠jhe do̠ bạkin calao̠ daṛeaḱ kana. District ro̠ad te̠do̠ o̠na district kho̠n raj naṅgraha calaḱ night co̠ach e̠ne̠geko̠ aṛaḱgo̠t́ akada. Ńuhum ńoḱ tahẽkante̠ ar Kubrạj do̠ ḍhe̠rge bulakane̠ tahẽkante̠ ro̠adrege samna sạmni tạpińena. Night co̠ach do̠ calao̠ paṛo̠me̠n re̠hõ mo̠ṭo̠r cycle ro̠ad kho̠n o̠ṭaṅe̠nte̠ Kubrạj ar Sunil do̠ accident te̠ ạḍikin ghạle̠na, e̠nte̠ bana ho̠ṛaḱge mit́go̠ṭaṅ kate̠ jaṅga do̠ ge̠je̠re̠n tạkina. Ho̠spiṭal te̠ko̠ idike̠t́ kina, tho̠ṛa din tayo̠m do̠kin ro̠phae̠na me̠nkhan le̠ḍha ge taṛam do̠kin eho̠̠ṕke̠da. Gate ar pe̠ṛako̠ ṭhe̠n kho̠n ańjo̠me̠na ḍherge bulkin tạhẽkante̠ no̠nkan accident do̠ ho̠eakana. Pase̠ćre̠ pase̠ć baṅkin bulko̠ḱ khan o̠ho̠ge muskil re̠kin
paṛao̠ko̠ḱa.

Ińaḱ ńe̠lre̠ ae̠ma Santal ho̠po̠nko̠ ńu bulkate̠ accidentte̠ ako̠aḱ mo̠ńj ho̠ṛmo̠ko̠ ko̠mjuri akan tako̠a. Juri pạri ko̠aḱ bhinạ-bhini ho̠e akana, go̠ć-go̠po̠ć ho̠e akana. Haere Santal bo̠eha, haere Santal ho̠po̠n delabo̠n hạnḍi-tạṛi, pạurạ kho̠nbo̠n ńir pharako̠ḱa.