Porsra re Ko Owar Rakaṕkeda Santal Haṛamaḱ Mạ̃ṛi

Naogan reaḱ Porsare Onodia Mardy (Sukṭa) (50) ńutuman mit́ṭen haṛam hoṛaḱ mạ̃ṛi ko owar rakaṕkeda. Uni hoṛ do Naogan jilạ reaḱ Potnitola Mahilipaṛa ạḍibạsi atoren Habil Mardy ren hopon kanae.

Baḍae ńam akana, Sombar (4 October) tikin okte Onodia Mardy do Porsa upạjilạ reaḱ Bhobanipur ṭola khonaḱ ńũ bulkate oṛaḱe ruạṛ kan tahẽkana. Ar un okte Bhobanipur ṭoṭha reaḱ kolapaṛa khạṛi reaḱ bandhal paromoḱ jo̠khe̠n khạṛi pereć cehel-cepel daḱre do̠e ńurena.

Tikin bela ạcur ạḍepase hoṛko khạṛi daḱre campel akan ko ńel ńamkede khan, Polis ko baḍae ocoket́koa. Inạ tayom polis hećkate goć akan o̠bo̠stare ko owar rakaṕkedea.

Tumạl- adivasinews

Pfizer Reaḱ 6 Lakh Kho̠n Bạṛti Ko̠ro̠na Ṭikạ Disomte Hećena

Pfizer reaḱ arhõ 6 lakh 25 hajar 950 doge ko̠ro̠na ṭikạ do̠ disomte hećena. America kho̠n Covax Fesilities hotete ńamakan niạko ṭikạ Sombar ńindạ Emirates Earlicense reaṅ mit́ṭen uḍauḱ gạḍite Hazrat Shahjalal Antorjatik bimanbondor re hećena. Ṭikạ hećen reaḱ babotre baḍae ocokeda Sastho ar Poribar kollan montronaloy ren mit́ officer. Uni do̠e me̠nkeda, Sombar ńindạ 11 baja 20 miniṭ okte niạko ṭikạ do dhakare hećena.

Source: Bangladesh pratidin

Cikit́sa Bigganre Nobel kin Ńamkeda

Calaḱkan sermare cikit́sa bigganre Nobel puruskar kin ńamkeda America ren David Julius ar Lebanon ren Ardem Patapoutian.

Lo̠lo̠-reaṛ soṅ ar jaḱte lo̠lo̠ reaṛ aṭkaroḱ jontro abiskar akat́ iạte unkin do̠ cikit́sa bigganre nobel puruskar 2021 ko emat́kina.

Source: Bigganchinta

Santal koaḱ Ạgil Hapṛam koaḱ Sompotti re EPZ Baṅ Hoyoḱ Reaḱ Dạbi te Tiṅgodaram Bạisi

Sahebgonj Bagdah Farm reaḱ jumi do̠ aleren ạgil hapṛamkoaḱ sompotti kana. Ale do aleaḱ sompotti ruạṛle hataoa. Aleaḱ sompottire jãhã lekanaḱ EPZ ge bale kho̠jo̠ḱ kana. Ar noa do̠ aleaḱ hok reaḱ dạbi kantalea. Ale do̠ ạn birud jãhãn kạmi hõ bale kạmi akat́a ar baṅle kạmia. Aleaḱ noa lạṛhại se daṅga do̠ ạgil- hapṛamkoaḱ sompotti ruạṛ hataojoṅ reaṅ lạiṛhại kana. Bańcao tahẽn lạgit́ hõ noa lạṛhại do̠. 2016 serma 6 November Shymol Hembrom, Mongol Mardy, Romesh Tudu noko pe hoṛko gur ocolena. Ale do̠ onkoko gur ocoakan reaḱ bicạrle khojkana. Ạḍi usạrage Sahebgonj Bagdah Farm reaḱ cas abadet́kan pea jumire EPZ benao lạgit́ hudis hoeakan ona do̠ bond hoyoḱa ar aleren ạgil- hapṛamkoaḱ sompotti sarkar do̠ aleye e̠m ruạṛalea. Noa do̠e me̠nket́a, Sahebgonj Bagdah farm ren Bhumi Uddhar Songram Committee ren sabha mukhiạ Philimon Baskey.

Sahebgonj- Bagdah farm bhumi uddhar Songram Committee Gobindogonj, Gaibandha bo̠ndo̠bo̠sre Sunibar (2 October) 2021 tikin 12 baja kho̠n Kaṭamoṛ toṭhare mit́ bạisiko hoe ocoket́a. Noa lahare Joypur- Madarpur- Dinajpur Dhaka maraṅ ḍahar se̠ćteko mit́teko hohokeda (michil).

Sahebgonj- Bagdah farm bhumi uddhar committee sabha mukhiạ Dr. Philimon Baskey aḱ ạḱyurte kathae ro̠ṛkeda jatio ạḍibạsi porisod ren central committee ren Presidium member Ad. Bablu Robidas, sadharon sompadok Sobin chondro munda, Treasurer Sudhir Tirkey, Doptor sompadok Subhas Chondro Hembrom, Rajsạhi bibhạg ren Sngothonik sompadok Noren chondro Pahan, ar totho ar gobesona sompadok Manik Soren, Rangpur sodor upạjia committee sadharon sompadok Bimol khalko, Nawabgonj sabha mukhiạ Bablu Tudu, Bodorgonj ren Dr. Shymol Tudu, Maraṅ somaj sebok Surjo Hembrom, Sadharon sompadok (bharapon) Rezzul Korim Master, Sangothonik sompadok Sowpon Sheik, são- sangothonik Sompadok Sufol Hembrom, Gaibandha jilạ bar Association ren sadharon sompadok Ad- Sirazul Islam Babu, Gaibandha Samajik songram porisod member socib Jahangir Kobir Tonu, Manobadhikar kormi Shah Momin Jinnah, Sondha Malo, Mathias Mardy, Cittoronjon Pahan, Mamlabạdi Thomas Hembrom Uttor Bongo Forum, Dinajpur Shymol Mardy, Sahebgonj- Bagdah farm bhumi uddhar songram committee sã goṛoić Treasurer. Noa sabha do̠e ạyurkeda Priscilla Murmu.

Sahebgonj- Bagdah- farm bhumi uddhar songram committee reaṅ benar ante bo̠do̠bo̠s akan bạisi se̠ sabhare Rajshahi, Naogan, Dinajpur ar Gaibandha ṭotharen ạdibạsi santal ạḱyurko selet́ mońj mońj sãotako ren aema hoṛge selet́ko tahẽkana.

Sawalia se̠ (bokta) do̠ko me̠nkeda, Sahebgonj Bagdah farm ṭoṭha kho̠n EPZ benao talate ạḍibạsi laga ńir ocoḱ reaḱ mit́ maraṅ hudis-cintạ hoeakana. Noa pea cas- abad jumire ạḍi utạr jo̠maḱ upjạ kana. Sahebgonj Bagdah farm reaḱ noa jumire EPZ baṅ hoyoḱma. Hoṛmore mit́ phoṭa mãyãm tahẽn dhạbić ale do̠ aleren ạgil-hapṛamkoaḱ sompotti ruạṛle hataoa. Saṭ marte Gobindogonj Sahebgonj Bagdah farm cas-abad hasa se jumire EPZ benao reaḱ prokolpo bạtilkate 2016 serma reaḱ 6 November reko gur ocoakan pe ạdibạsi santal gharońj selet́ gur ar hạn ocoakan jo̠to̠ gharońrenko lek lekate khoti purun reaḱ hõko dạbikeda sawaliako.

Tumạl- Ipnews

Tesar Ar Ponaḱ Kelas Ren Pạṭhuạ Gidrạkoaḱ Kelas Do̠ Haptare Bar Din

Darakan Sunibar (2 October) kho̠n primary reaḱ tesar ar ponaḱ kelas ren pạṭhuạ gidrạkoaḱ haptare mit́ din bo̠do̠lte bar din kate kelas hatao hoyoḱa. Nãwã somoysuci lekate, tesar kelas ren pạthu gidrạkoaḱ kelas do̠ Robibar ar Lukhibar, Ar ponaḱ kelas ren pạṭhuạ gidrạkoaḱ do̠ Sunibar ar Budhbar kate kelas hoyoḱa. Budhbar (29 September) Prathomik sikkha odhidoptor do̠ nãwã somoysuci do̠e so̠do̠r akada.

Inạ chaḍa hõ Moṅgolbar do̠ pạhil kelas ren ar Sombar do̠ dosar kelas ren pạthuạ gidrạkoaḱ kelas hoyoḱa. Mõṛẽaḱ kelas ren pạṭhuakoaḱ do̠ lahate lekage din hiloḱ kelas hoyoḱa. Mõṛẽaḱ kelas ren pạthuạkoaḱ do̠ ṭifin tayom hoyoḱa. Ar eṭaḱ kelas ren pạṭhuakoaḱ do̠ setaḱ bela kelas hoyoḱtakoa.

Tumạl- Sonali sangbad

Tin Ghạṛićem Taṛama

Taṛam do̠ jo̠to̠ kho̠n alga hoṛma bhańjao (biyam) kana. Jo̠to̠ umer ren hoṛko lạgit́ ạḍi jạruṛaḱ hõ kana. Me̠nkhan tin ghạṛić taṛam hoyoḱa se̠ taṛam reaḱ speed cet́ hoyoḱ jạruṛ, ona babotre ḍher hoṛge babon pusṭạua. Hoṛmo bhańjao hisạbte taṛam reaḱ po̠rho̠ do̠ cet́ kana ar tin ghạṛić taṛam lekhan po̠rho̠ ńamoḱa ona babotre baḍae ocoakada phaysiotherapy consultant Umme Sayla Rumki. Din hiloḱ taṛam lekhan koṛam reaḱ ruạ, Diabetes, jaṅ khoy (Osteoporosis) rog reaṅ jiwi ko̠ṭo̠ḱ ko̠m ńõ̠go̠ḱa. Din hiloḱ taṛam lekhan jel sir reaḱ daṛe ar sahao daṛe bạṛtiḱa. jaṅ reaṅ goṭhon hõ keṭećjo̠ḱa.

Tin okto taṛam jạruṛa:

Dinạm din komkate 30 miniṭ taṛam jạruṛa. Diabetes rogiko do̠ inạ oktete 40 kho̠n 45 miniṭ taṛam hoyoḱ jạruṛ kantakoa. Bhạrti ho̠ṛmo̠ tahẽn okte pạhil pe̠ cando 15 miniṭ kateć, dosar pe cando 20 miniṭ kateć ar mucạt́ pe cando do̠ 10 miniṭ taṛam jạruṛa. To̠be̠ okoekoaḱ umer 40 bo̠ho̠r kho̠n cetan ar aema din kho̠naḱ jãhãn hoṛmo bhańjao se̠ hoṛmo khaṭao são jo̠po̠ṛao bạnui, onkan hor̠ko do̠ taṛam lahare bissegoggo aḱ solha hatao hoyoḱtakoa. Arhõ e̠ṭaḱ se̠cbon ńe̠lle khan, Okoekoaḱ hor̠mo̠ reaḱ o̠jo̠n ḍherge, onkoko hõ taṛam e̠hob lahare stretching kate, jel reaḱ sir jirạu ńõ̠ḱ hoyoḱtakoa. Baṅkhan stretching babotre baḍae hataojo̠ṅ lạgit́ physiotherapy koaḱ solha hatao hoyoḱa.

Jãhãe hoṛkoge hoṛmo se̠ć kho̠n napae tahẽn lạgit́ haptare ko̠mkate 150 miniṭ taṛam hoyoḱtakoa. Haptare 30 miniṭ kate 5 din hõ bon taṛam daṛeaḱa. Okto baṅ tahẽlen khan dinre 10 miniṭ kate pe̠ dhao taṛam lekhan hõ hoyoḱa.

Jogging:

30 miniṭ taṛam tayom 10 miniṭ jogging daṛeakabon. Jogging reaḱ bhe̠d do̠ mit́ jaegare teṅgo kate pạhilre jo̠jo̠m jaṅga, inạ tayomte leṅga jaṅga tulkate do̠n hoyoḱa. Jogging lạgit́ ạḍi maraṅ jaega reaṅ jạruṛ do̠ bạnuḱa. Oṛaḱre jãhã ṭhen mit́ jaegare teṅgu kategebon jogging daṛeaḱa. Pạhilre do̠ bại bạite , inạ tayom do̠ usạra usạra. Okoe koaḱ do̠ bạṛti o̠jo̠n onko do̠ pạhilre adha miniṭ kate jogging ako. Inạkate hoṛmo reaḱ halot bujhạu kate bại bạite okto do̠ bạṛti idiy hoyoḱa.

Taṛam calaḱ lahare:

Taṛam okte sukrạj (aramdayok) cạṭki ho̠ro̠ḱ hoyoḱa. Ho̠ro̠ḱ bande̠ kicrić hõ thoṛa sukrạj ar ḍhilạṅ dholoṅ ńõ̠ḱ ho̠ro̠ḱ jạruṛa. Setoṅ kho̠n e̠raṅoḱ lạgit́ setaḱ paha- poho okte ar ạyupbela cando hạsur tayom taṛam lạgit́bon oḍok daṛeaḱa. Taṛam tayom thoṛa stretching jaruṛa; je̠mon jaṅga kạṭuṕ cetanre teṅgolen khan tayom reaḱ jel sir ko hasua. To̠be̠ o̠jo̠n ko̠m lạgit́ taṛam se̠ jogging do̠ aso̠laḱ baṅ kana. Balance thik do̠ho̠e jạruṛa. Niạm kate niṭ akat́ oktere hoṛmo reaḱ kelori hisạbte jo̠m hoyoḱa.

Source: Ajkerpatrika

Niạ Serma Pạthuạ Gidrạkoaḱ JSC Ar JDC Biḍạu Baṅ Hoyoḱ Kana

Niạ serma pạṭhuạ gidrạkoaḱ Junior School Certificate (JSC) ar Junior Dakhil Certificate biḍạu baṅ hoyoḱa menteye baḍae ocoakana Sikhnạt Muntri Dr. Dipu Moni. Uni do̠e aehõye me̠nkeda, pạthuạko do̠ akaoḱ kelas reaḱ tojbij talatege cetan kelasreko rakabo̠ḱa.

Hola Moṅgolbar (28 September) Rajdhạni reaḱ Gonobhobon High School re Maraṅ Muntri Sheik Hasinawaḱ 75 serma janam mãhã ńutumte sạibut akan dare ro̠ho̠e kạmihora akhṛa mucạt́re kho̠bo̠riạkoaḱ aema lekan kukli reaḱ ro̠ṛ ruạṛ okte noa kathae metawat́koa. Sikhnạt Muntri do̠e arhõe me̠nkeda, khạli khạli GPA- 5 tayo̠mre dạṛ lekhan baṅ hoyogo̠ḱa. Me̠nkhan, Pạthuạ kodo̠ aso̠l bud- ạkil hameṭjo̠ṅ lagaoakoa. Aso̠l sikhnạt hameṭjo̠ṅ talate je̠monko hara buru dareak.

Tumạl- Bss news

Teheń Do̠ Maraṅ Muntri Sheik Hasinawaḱ 75 Serma Janam Mãhã

Aema eṭkeṭõrẽć paro̠mkate 75 serma umer re lebetkeda disom ren Maraṅ Muntri Sheik Hasina. Uni do̠ 28 September Gopalgonj reaḱ Tungipaṛa atore teheńaḱ dinre do̠e janamlena. Sạdhin baṅgladisom ren maraṅ bandhaoe jạtiạko ren baba Boṅgobondhu Sheik Mojibur Rahman ar Boṅgomata Fazilatunecha ren maraṅ kuṛi kanae Sheik Hasina. Uniaḱ ạḱyurte 1996 sermare 21 bo̠cho̠r tayo̠m arhõ rastro do̠kho̠lreko he̠ćena Awami league. Sheik Hasina nit ponaḱ dhapte baṅgladisạm reaḱ dạyike manaoeda. Nit hạbicte 2009 serma kho̠n mit́ lagaote pe̠ dhao Maraṅ Muntri reaḱ dạyikre menaea uni. Disom reaḱ itihạs re nonkan record do̠ okoeaḱ hõ bạnuḱanaṅ.

Jatisoṅgho reaḱ sadharon porisodre 76 dhao reaḱ bạisire (odibeson) seledoḱ lạgit́ Maraṅ Muntri nit do̠ Juktorastrore menaea. Uni bạnuire hõ niạ din ạḍi rạska salaḱko manaoeda Awami league selet́ aema rajnoitik, sãota ar legcar gãotako.

Source: Prothom alo

14 November Kho̠n SSC Biḍạu Ar HSC Do̠ 2 Disember Kho̠n Eho̠bo̠ḱa

Niạ bo̠cho̠r reaḱ (2021) Secondary School Certificate (SSC) ar Higher Secondary School Certificate (HSC) bidạu reaḱ okto Sarkar do̠e so̠do̠rkeda. Darakan November cando reaḱ 14 tạrik kho̠n SSC ar Disember reaḱ 2 tạrik kho̠n do̠ HSC biḍạu eho̠bo̠ḱa. Ko̠ro̠na mãhãmạri kạtirte hoṛmo hạṭiń reaḱ jo̠to̠ lekan ạn ạriko manaokate biḍạu do̠ hoyoḱa.

Biḍạu eho̠bo̠ḱ (30 miniṭ) adha ghonṭa lahare biḍạu e̠moḱko do̠ bidạu oṛaḱre bo̠lo̠kate nij nij duṛupaḱre duṛup hoyoḱ takoa. Biḍạu reaḱ okto do̠ hoyoḱ kana mit́ ghonṭa tala. Ar biḍạu do̠ hoyoḱa 10 baja kho̠n 11 baja tala hạbić. MCQ ar CQ hạṭiń reaḱ bidạu talare jãhãn jirạu baṅ tahẽna.

Source: Korotoa

September reaḱ 28 Tạrik Kho̠n Disom Ren Jo̠to̠ Ho̠ṛ Ko̠ro̠na Ṭikạ Ko Ńama

Sasthomontri Jahid Malek do̠e me̠nkeda, Maraṅ Montri Sekh Hasinawaḱ janam mãhã ńutumte darakan 28 September kho̠n ko̠ro̠na mãhãmạri birudre teṅgo daram lạgit́ arhõ ṭikạ kạmihora do̠ ehbo̠bok kana. Mit́ hapta lạgit́ noa camp do̠ calaḱa.

E̠nte 28 September do̠ Maraṅ Montriwaḱ janam mãhã kana. Ona iạte uniaḱ janam mãhãrege niạ ṭikạ kạmihora hõ eho̠boḱa. Goṭa disomre amdaj 6 hajar ṭikạ centre kho̠n ko̠ro̠na ṭikạ do̠ e̠mo̠go̠ḱa. 28 September setaḱ kho̠naḱge ṭikạ e̠m do̠ e̠ho̠boḱa. Niạ dhao do̠ din hiloḱ 80 lakh doge ṭikạ e̠moḱ reaḱ bejha (target) do̠ me̠naḱa. Niạ bejha ạuri purạu dhạbić din hiloḱ reaḱ ṭikạ kạmihora do̠ calao idiḱa.

Source: Prothom alo