Ko̠ro̠na virus bại bạite ḍher idiḱ kante ạḍi usạra jo̠to̠ sikhnạt gãota ko pe gel (30) din bond do̠ho̠e lạgit́ Lawyer Yunus Ali Akondo do̠ High court rey ardas akat́a.
Uni do̠ arhõe menakada, Bicạr phanḍaoić (jo̠j) Farah Mahbub ar Jo̠j S M Moniruzaman aḱ dupuṛuṕte noa reaḱ sunạn hoe daṛeaḱa .
Ko̠ro̠na Mahamạ̃ri ḍherlen khan Sarkar do̠ arhõ sikhnạt gãotako bond reaḱe goṭaea. Sikhnạt Montronaloy do̠ nit́ hạbić Sikhnạt gãota bond reaḱ jãhãn goṭa katha ạuriye hataoa se̠ bae hudis baṛa akada, Sikhnạt Montri Dipu Moni nonkanaḱe baḍae oco akada. Hola Moṅgolbar (18 January) Osmani Sriti Milonayoton re DC sonmelon mit́ṭen dupuṛuṕ mucạt́re noa kathae baḍae oco akada.
Arhõe menkeda, Sikhnạt gãota bond lenkhan hõ je̠mo̠n virtual hotete kelas ko hatao daṛeaḱ noa khạtir saprao tahẽn lạgit́ DC ko solha kathae emat́koa. Ar okare virtual kelas hatao reaḱ ạt bạnuḱ, onḍe do̠ je̠mo̠n Assignment dharate cecet́joṅ kạmi ko calao idi nonkanaḱ katha hõe lại so̠do̠r akada.
12 khon latar umer ren pạṭhuạ gidrạko nit́ kho̠n ko̠ro̠na ṭikạ bako emakoa, Menkhan onkoaḱ cecet́joṅ kạmi hora do̠ calao idiḱa men̠te Sikhnạt Montri Dipu moni do̠e baḍae oco akada.
Ona sãote arhõe baḍae oco akada, Sarkari – Besarkari tinạḱ Skul – College menaḱ Ar onare tinaḱ oloḱ – paṛhaoḱ kan gidrạ menaḱko, onko do̠ akoaḱ porichoipotro (ID card) beohar kate ko̠ro̠na reaḱ ṭikạ ko hatao daṛeaḱa. Tịka centre kore pạthuạ gidrạko ṭikạ emako reaḱ kạmi do̠ calao idiḱa.
Rajshahi Muktijudho Sriti Stodium re hoe purạuen Boṅgomata jatiyạri maejiukoaḱ football championship khilạḍ. Noa final khilạḍ re ko jitạuena Rajshahi ren do̠l ar do̠sar akanako Maymensing jilạ ren do̠l. Hola Sunibar (15 January) final khilạḍ re Rajshahi re̠n do̠l ko ṭhen Mymensing jilạ ren do̠lko 2-0 pharak go̠lte ko bhagao ocoyena. Jitạu akan ko seć khon Afrin ar Hoimonti mit́ṭen katećkin go̠l keda. Rajsahahi ren Surodhuni Kisku do̠ noa khilạḍ re so̠ro̠s khelowaṛ hisạte do̠e bachao ocoyena.
Ar Fair play ko ńam akada Ancer VDP. Khilạd mucạt́re Football Association ren sabha mukhiạ Md: Wahedun Nobi Anu aḱ aḱyurte Champin se̠ pạhil akan do̠lko emat́koa mõṛe gel (50) hajar kạuḍi ar ona sãote Trophy. Ar onka leka jitạu akan dosar do̠l metaḱme Mymensing ren do̠lko hõ 25 hajar kạuḍi selet́ trophy ko emat́koa. Noa khilạḍ akhṛa re maraṅ peṛa hisạte selet́e tahẽkana jila prosasok ar Rajshahi jilạ ren eneć khilaḍ (sports) songstha ren sabha mukhiạ Abdul Jolil.
Niạ lahare hõ uni do̠e men akada, Eneć khilạḍ são sãote kuṛi kohõ aema lekan lạmikore ko laha akana, tayom daram dinkore onko do̠ arhõ ńutum ko hạrjoṅa.
Noa khilạḍ akhṛa re selet́ko tahẽkana Muktijodha Mohamod Ali Kamal, Rajshahi Mohanogor sadharon sompadok ar bibhag Sports songstha ren Sadharon sompadok Md: Dablu Sarkar, Max group ren Chairman Enginner Golam Md: Alomgir, Bangladesh Football Fedaration (BFF) ren nirbahi sodosso ar Maejiu committee ren Chairman Mahfuza Aktar Kiron, BFF ren nirbahi Elias Hosen, Nurul Islam Nur, BFF maejiu committee sodosso Gazi Sarowar Babu ar BFF ren maejiu committee ren sodosso Soiyad Riyajul Korim. Ona okte BFF ren bahal (Protinidhi) Md: Nazrul Islam ar Manus Ghosal Baburam, Rajshahi jila sports songstha ren eṭaḱ sadharon sompadok Md: Shamsuzaman Roton, Ar mit́ sompadok Md: Rasel Zaman, Dainik Sonali sangbad ren sompadok Md: Liaquat Ali selet́ eṭaḱ kạmia ko (officer) hõ seṭer ko tahẽkana.
Jo̠to̠ kạmi thạ̃ikore teheń Lukhibar (13 January) khon mask ho̠ro̠ḱ reaḱ ar mask baṅ horoḱ lekhan mobile court hotete ḍanḍom ṭaka se̠ jehel hõ hoe daṛeaḱa mente Sastho Montri Jahid Malek do̠ mit́ṭen cehaona kathae baḍae oco akada.
Hola Budhbar (12 January) ạyuṕbela okte Rajdhạni reaḱ Bangladesh College Of Physician Surgeon (BPCS) maṭh re Ambulance ar Computer ko em hạṭiń akhṛare noa katha do̠e lại so̠do̠r akada. Noa akhṛare arhõ selet́e tahẽkana Sastho seba bibhag ren Sinior Socib Lokman Hosen Mia, Sastho odhidaptor ren Maran ạyurić Professor Dr. ABM Khursid Alom.
11 january mo̠ngolbar bela 11 baja o̠kte Badhaiṛ Mission Primary school maṭre National Agency for Green Revolution (NAGR) reaḱ ạyurte Ko̠ro̠na cehaona ar Gidrạ umer re alo baplako̠, Ňu bubulaḱ kho̠n sahaṛ tahen ar pạthuạ gidrạko̠ lagit́ paṛhao lagit́ khata, kolom, rul, jemeti box ,mask sabun, saman ar reṅgeć nacar hoṛko talare rabaṅ niṛan kicrić em haṭic hoyena. Noa kạmi hora akhṛa re mahar mukhiạ hisạbte selet́e tahekana 02no. Badhaiṛ Union Porisod Chairman Md. Ataur Rahman ar Mundumala Pulis Tolas Kendro ren S.I. Chaiful Islam. Ona chaḍa hõ selet́ ko̠ tahekan 1no. Member Md. Selim ar 1,2,3 no. word ren maejiu member Aktara Begum.
Niạ akhṛa hotete 100 Pạthuạ gidrạ paṛhaoḱ goṛo jinis ar 100 nacar hoṛko kombol ko ńamkeda.
Disom re ko̠ro̠na rog bại bạite bạṛti chạplạu se̠ pasnao idiḱ kana. Noa khạtir sikhnạt gãotako bond do̠ho̠e reaḱ Sarkar do̠ arhõe hudis baṛayet́ kana. Noa babotre teheń Robibar ńindạ 10 baja okte Covid-19 jatiyo karigori so̠lha se̠ porames committee são virtual hotetey duruṕ ńapamoḱa Sikhnạt Montri Dr. Dipu Moni. Teheńaḱ dupuṛuṕre mit́ goṭa katha ko hataoa, ar noa goṭa katha do̠ gapa (Sombar) sombad Sonmelon re Sikhnạt Montri Dipu Moni do̠ noa babotrey baḍae ocoḱa.
Noa dupuṛuṕ se̠ gapalmarao talate arhõ mit́ dhao sikhnạt gãotako bond reaḱ goṭa katha ko hatao daṛeaḱa. Jatiyo porames se̠ so̠lha committee ko miljul kate goṭa katha ko hatao lekhan mit́ cando lạgit́ sikhnạt gãota bond tahẽ daṛeaḱa. Jo̠to̠ seć hudis – ganḍon kate committee ko noa ko goṭaea.
Disomre din dinte ko̠ro̠na ajar do̠ ḍher idiḱ kana. Ar noa ko̠ro̠na birudre teṅgo daram lạgit́ karigori committee koaḱ prostab se̠ roṛ saḍe akat́ lekate Mit́– Bar din bhitrirege kajak lockdown se̠ manao ganao do̠ hoyogoḱa.
Hola Sunibar (08.01.22) tikin okte Manikgonj Goṛpaṛa Shuvro centre re reṅgeć – nacar duk hạli hoṛko talare rabaṅ kicrić em hạṭińat́ ko okte Sastho Montri Jahid Malek noa katha do̠e lại so̠do̠r akada.
Ko̠ro̠na lekan botoranaḱ ruạ se rog khon apnarte niropon hoṛmo tahẽn ạḍige jạruṛ kanatabona. Ona iạte mask beohar ạḍige jạruṛ kana. Ko̠ro̠na ehoṕ tora khonge jo̠to̠ko mask horoḱ se beohar lạgit́ ạḍi lekate bisesoggo (jarnaha) ko uskur ạguiet́bon kana. Tinạḱ hoṛ do̠ ko̠ro̠na rog reaḱ ṭikạ ko hatao akat́ onko ko hõ mask beohar reaḱ solha kathae metako kana Bisso Sastho Songstha.
Niạ ko okte arhõ Omicron ńutuman ar mit́ṭen ruạ do̠ heć akana. Arhõ eṭaḱ eṭaḱ disom kore do̠ ko̠ro̠na ruạ hõ bạṛti idiḱ kana. Ona khạtir niạko din arhõ besesoggo ko do̠ abo sanamko mask beohar lạgit́ko nehõrabon kana. Menkhan aema hoṛge mask beohar bako moneaḱ kana. Ar aema hoṛge ṭhik mask beohar baṅkate hạṭia – bajar re ńamoḱ kan mask ko beoharet́ kana. Noa ko karonaḱte ạḍi algate ko̠ro̠na hõ ḍher pasnao idiḱ kana. 20 miniṭ tala se bhitrite hõ pasnaok kana. Nonkanaḱ khobor ko hõ baḍae ńamoḱ kana.
Bisesoggo ko baḍae ocoyet́ kana, Covid se ko̠ro̠na khon bańcaoḱ lạgit́ jo̠to̠ khon bhạlạianaḱ upại do ‘N95 mask’ beohar. Mit́ṭen ko̠ro̠na rogi Jodi mask bae horoḱ, enḍekhan uni lahare ‘N95 mask’ horoḱ akat́ mit́ṭen niropon hoṛmoan hoṛ amdaj 2 ghonṭa tala do̠e bańcao se̠ aḍ doho daṛeaea.
Ar ko̠ro̠na rogi ar niropon hoṛmoan hoṛ nukin bana hoṛge mask kin horoḱle khan, enḍekhan uni rogi khon mońj hoṛmoan hoṛ ṭhen noa ruạ ucạṛoḱte amdaj 25 ghonṭa okto jạruṛa. Menkhan N95 mask ạḍi ghạṛić horoḱ se beohar re muskil hoyoḱte kicric reaḱ mask hoṛko bạṛti ko beoharet́ kana. Gobesona se khon-rond kate ko menet́kana, Omicron birudre teṅgo daram lạgit́ kicrić reaḱ mask do baṅ jạruṛa metaḱme baṅ bhạlạia. Ente kicrić reaḱ mask horoḱ kate ko̠ro̠na rogi samaṅrem paṛaolen khan eken 20 miniṭ bhirite ko̠ro̠na ruạre jạbun reaḱ botor menaḱ akada.
Ona iạte jo̠to̠ ko niropon hoṛmo tahẽn lạgit́ kicrić reaḱ mask beohar baṅkate Surgical mask beohar hoyoḱa. Mit́ṭen surgical mask rog khon mit́ṭen mońj hoṛmo se sustho hoṛ adha ghonṭa do̠e aḍ ar rukhiạ daṛeaea.
Bisesoggo ko menet́ kana, Omicron do̠ eṭaḱ ko rog khon bạṛti bo̠to̠ranaḱ kangea. Ona iạte noa khon bańcaoḱ lạgit́ mask horok hoyoḱa. Hotoḱre mask aka, mũ khon jhić se ocog dohokaḱ, ghane ghane mask tunum se jotet́ noa ko karonaḱte hõ ạḍi alagate noa rog do̠ chạplạu se pasnao daṛeaḱa. Onate jo̠to̠ko ge maskbon beohar ma. Ar noa bo̠ro̠ranaḱ ruạ jo̠to̠ko tebon teṅgo daram ma.
Okoe pạṭhuạ gidrạ koaḱ umer do 12-18 hoe akan ar ko̠ro̠na ṭikạ bako hatao akat́ nonkan gidrạko do̠ Skul se cecet́ oṛaḱte bako sen daṛeaḱa mente Montri Porisod socib Khandokar Anwarul Islam doe baḍae ocokeda. Teheń Lukhibar Socibaloy re Montri sabha bạisire Socib Khandokar do̠ noa kathae lại so̠do̠r akat́a. Maraṅ Montri Sheikh Hasinawaḱ ạḱyurte virtual hotete noa meeting se bạisi do hoyena. Bạisi mucạt́re Montri porisod Socib do̠e baḍae ocokeda, kom se kom mit́ doge ṭikạ hatao kate pạṭhuạ gidrạko akoaḱ nij nij cecet́ oṛaḱte ko sen daṛeaḱa.
Inạ chaḍa hõ arhõe baḍae ocokeda Ko̠ro̠na virus birud teṅgo daram babotre ṭikạ reaḱ certificate begor hotel-resturent Market complex te senok ar uḍạuḱ gạḍi se rel gạḍi re dejok hõ baṅ hoyoḱa. Jãhã sen senoḱ okte mask do̠ horoḱ torae hoyoḱa. Mask begor bahre sen ạuṛi pạthạuṛi daṛan baṅ hoyoḱa.