16 march 2022 tekin ber 3 baja tala Chapainawabganj jilạ so̠do̠r upojilạ reaḱ Amnura Mission re 03no. Jhilim Union porisodren nawã chairmen ar member maejiu memberko Adivạsi hoṛko seć kho̠n mit́ nagorik soṅbordhona ko emaḱkoa.Niạ nagorik soṅbordho̠na akhṛa do̠ Uttar Baṅgo Adibạsi Forum, ona ṭoṭharen sanam hoṛko ar adibasi gãotako ạyurte hoepurạuena. Akṛare chapainawabganj so̠do̠r upojilạ reaṅ 03no. jhilim Up reaḱ erạl goṭen (08) adibạsi atoren (Santal, Rajoar, Lohra) hoṛ ko jarwalena. Niạ akhṛa hotete niạ ṭoṭha ren ạdibạsi hoṛko nawã chairman member ko ṭhen akoaḱ johar ar dạbi se kho̠joḱ ako lại so̠do̠rkeda. Bises kaete adibạsiko jemon aloko kocloṅko suluk teko tahe daṛeaḱ ar sarkari sanam lekan ạidạrihõ jemon ko ńamjon ona kathako jạhiraḱkoa.

Niạ Nagorik Soṅbodhona akhṛa re roṛkeda Uttor Boṅgo Adibasi Forum Jhaṛ komitee (Kendriyo)ren maraṅ mukhiạ Mn.Hingu Murmu, Secretary Mn. Advocate Probhat Ṭuḍu, Mn. Sham Ṭuḍu, Horidas Hembrom, Mn.Koruna Rajoar, Mn. Khajoni Murmu, Mn. Robindronath Hembrom, Mn. Nogen pawria, Mn. Rev. Soban Kisku gomkeko. Niạ nagorik akhṛa do̠ ạyurkeda Prodip Hembrom.

Niạ 2022 bho̠ṭre 03no.Jhilim Union Poriso̠d re do Nãwa chairman hisạbte jitakana Golam Lutful Hassan (Lutfor) ar uni são sanam member ko hõ niạ dhaoge pahil dhao leka bho̠ṭre jitạuakana. Chairman aćaḱ roṛre menkeda ạḍi ra̠ska̠ń ạikạueda je pạhil dhao jitkate nia soṅbordho̠na hõ pạhil iń ńameda onate ape sanamko aema aema manoj johar ar sarhao iń emape kana. Iń ar ińren noko são kạmiako (memberko) ape ạdibạsikoaḱ duk sukre khạtige surle tahena mente teheń ekraṛoḱ kanale.

SAFF an-umạr -18 marjiv campion -2022 ṭurnameṇṭ reak̕ dosar khilạḍ teheń 17 march. Noa dosar khilạḍre̠ko tapamo̠k̕ako Baṅgladisạm maejiv phuṭbo̠l do̠l ar Nepal maejiv phuṭbo̠l do̠l . Ạyup̕ beṛa Baṅgladisạm o̠kte̠ 7:30 pm re khilạḍ eho̠bo̠k̕a.

Baṅgladisạm phuṭbo̠l iskoaḍre̠ Raṅgaṭuṅgi atoren barea santal kuṛi Sohagi kisku ar Kohati kisku menak̕kinạ. Seṛa ge̠lmit̕ (eleven) do̠lre̠ Sohagi kisku ar Kohati kisku bana ho̠ṛak̕ khilạḍo̠k̕ reak̕ katha menak̕a . Ṭurnameṇṭ reak̕ pạhil khilạḍre̠ mandher 15 march hilạk̕ko tapamle̠na Bharo̠t ar Nepal . Ona tapamre̠ Nepal birudhre̠ 0-7 gol teko jitạuena Bharo̠t maejiv phuṭbo̠l do̠l.

Niạ dhao reak̕ ṭurnameṇṭre̠ e̠ke̠n pea disạmre̠n phuṭbo̠l do̠lko khilạḍok̕ kana. Bharo̠t, Nepal ar Baṅgladesh .Ṭurnameṇṭ reak̕ jo̠to̠ khilạḍ Bharo̠t disạm jhaṛkho̠ṇḍ raj reak̕ JRD ṭaṭa isporṭ jamsedhpur maedanre̠ hoyogo̠k̕a.

Teheń 17 March. Baṅgladiso̠m jạtiyạri ko̠ren baba Bo̠ṅgo̠bondhu Shekh Mo̠jibur Rahmanaḱ mit́ sae bar serma (102) Janam Mãhã. 1920 serma reaḱ 17 March teheńaḱ dinre Gopalgonj jilạ, Ṭuṅgipaṛa atorey jamamlena.

Bo̠ṅgo̠bondhu do̠ Shekh Lutfar Rahman ar Sayera Khatun ren tesar ho̠po̠ne tahẽkana. Jạtiyạri ko̠ren ạḱyurić, maraṅ birbanṭa do̠ juạn umer khonaḱge disom phurgạl ar Manwakoaḱ duk-dạndi, ko̠clon ocoḱanaḱ khon rukhiạko lạgit́ge apnaraḱ jiwi alae akada.

Ar sạrige teheńaḱ dinre ạḍi man-manot selet́ goṭa diso̠mre uniaḱ janam mãhã rạskạ-duḱ salaḱko manaoet́ kana.  

Jionre tuli tulphi harnare paṛaoḱ khạtir, jaoge abon mo̠n khonaḱbo dhaṅgladhaseḱ kana. Ente nonkabo hudis kana baṅma, jãhãtinạḱbo kurumuṭui ona kạmi o̠ho̠gebo daṛelena. Enḍete ekal nijhum duṛuṕ hape akanbo tahẽnkana.

Menkhan aboaḱ jionre kam-kajre jaoge boge jo̠ hạrjoṅ lạgit́ jaoge kurumuṭure tahẽn hoyoḱa. Ente nonkan dosare duṛuṕ hapekoḱ baṅ bogea. Ente arhõ kurumuṭuime, pase̠ć nonkan hal-halotre bam tahẽkan, Menkhan nit ona hal-halot são lạpạṛhại se̠ ona birud teṅgo keṭejoḱre sapaṛao akae menam.

Onate lahateaḱ harnaha saṕakae alo̠m tahẽna, Dela teheń khonaḱge ehoṕme.

Sanamko lạgit́ ạḍi jo̠bo̠r ar rạskạ khobor. Ente Baṅgladisom ren kuṛiko mucạt́ dhạbićte Pạkistanko bhagaokate 9 go̠lteko  jitena. Mit́din reaṅ noa ńir haparaore pạhilte nagam reaṅko jitena.

Ńir haparaore bạṛtikaete Pạkistanko jit reaṅ go̠rho̠ tahẽkana. Menkhan Baṅgladisom kuṛikoaḱ ti reaḱ jạdute teheń sạrige goṭa dhạrtire  jitan khobor ḍamḍaheyena.

1971 serma re tinạḱ santal disom phurgạlreko selet́len onko modre ar mit́ hoṛ do̠ Amin Hembrom. Uniaḱ oṛaḱ do̠ Chapainawabgonj Nachol upạjilạ reaḱ Nezampur union reaḱ Rudrakunḍạ ato. 77 serma umeran nui hoṛaḱ disạ-paesare jahan ṭonṭage bạnuḱtaea. Endẹteroṅ nitoṅ hõ sińke siń khaṭaoḱtege menaea.

Maraṅ phurgạl okte Amin Hembrom do̠ 26 umeran juạn koṛae tahẽkana. Ato-paṛare apat́ são nalhae tumạl kan tahẽkana. Gharońjre ạḍige saṅgeko tahẽkana. Aćren eṅgat-apat́ chaḍa mõṛẽ goṭen koṛa ar pe kuṛi boeha ar ać buḍigoe tahẽkana.  

Maraṅ phurgạl ehoṕen khan pạkistạni bạhni ar disom caḱlaoko Amnura selet́ aḍepase mimit́ ṭoṭhare luṭpaṭ, hoṛ go̠go̠ć, oṛaḱ-duạr lo̠ rapaḱ nonkan bạṛić beoharko ehoṕket́a. Un okte Amin Hembrom aḍepase hoṛko são bharot disomko sa-calaoena.

Santal phurgạliạ do̠e menet́ket́a, Pạhilre Gomostapur upạjilạ reaḱ Rohonpur re̠l sṭeson aṛe pạchimbongo Maldah jilạ singapur ṭoṭhale sen maṛaṅena. Onḍege mit́ ḍera-thạnitre bo̠ho̠ḱ aṭhṛẽḱ lekale ṭhạ̃iana. Dosar hiloḱ onḍe khonaḱ Bangitola skulteko kol ocoyena. Amdaj mit́ cando leka tahẽkate, inạkate Kutub nagrahateko kolket́koa.  Ar onḍege Amin Hembrom são Rajshahi Godagari upạjilạ ạdibạsi santalkoren ạḱyurić Sagram Manjhi aḱ ńepel-oprom hoeyentạkina. Ado̠ un jo̠khenge Sagram Manjhi do̠ disom sạdhina mentey udgạuket́koa. Ente tinạḱdin nonka eṭaḱ disomre asraebo tahẽna. Mit́́te lạpạṛhại talate disombo sạdhina.

Amin Hembrom aḱ katha sạrige monre gaḍaoat́koa. Ar uniaḱ noa kathako hetaowaḱtaea ar lạpạṛhại lạgit́ko saṕṛaoena. Thoṛa koṛakoante Maldah jilạ Gourobagan ṭoṭha reaḱ youth camp ko calaoena. Mit́ okte jiwi ṭonṭa bo̠to̠rte bhiṭạko bạgikate bharotrele ṭhạ̃ian tahẽkana. Menkhan nit nonkan jo̠to̠ bo̠to̠r deakate lạpạṛhạire ńutum lekhayena. Bar hapta teńjao (training) kate Dinajpur jilạ ko kolket́koa. Onḍge sanamko hatiạrko calat́koa. Amin Hembrom hõe calaoena. Noa do̠ pạhil dhap tahẽkana.

Hạtiạr capalao teńjao lạgit́ Amin Hembrom selet́ arhõ eṭaḱko Siliguri reaḱ mit́ṭen ḍera teko kolket́koa. Onḍe hõ bar hapta teńjao hoyena. Teńjao tayom bharot reaḱ Dinajpur ( utạr-dạkhin)  jilạ. Amin Hembrom do̠e menket́a, Hạtiạr sapaṕ tayom 7 no sector reaḱ tabere birbanṭa hisạbtey jopoṛaoena. Noa sector ren birbanṭako Rajshahi, Pabna, Bogura ar Dinajpur ṭoṭhakoreko lạṛhạiena.

Onkoren ạkyuriće tahẽkana Abdus Samad commander. Uniaḱ ạḱyurte Sonamosjid Kolabagan aṛe paṛomkate Chapainawabgonj reaḱ Sibgonj le bo̠lo̠yena. Pạhilte Aṛgaṛa hạṭiạ lạpạṛhại talatele sạdinket́a. Inạkate birbanṭako bharot camp ko ruạrena. Mit́-bar din tahẽkate arhõ disomteko he̠ćena. Aema okte Gomostapur, Bholahat reaḱ Rohonpur re thoṛa okoć lạihạireko selet́ena. Amin Hembrom do̠e lại so̠do̠rket́a, Disom sạdhinen rạskạ khobor bharot camp khonaḱle baḍae ńamkeda. Khange rạskạste gharońjren ar aḍepase hoṛko são ńepel ńapam khạtir janam disomle ruạr he̠ćena. Sạdhin tayom ekal rạska cehel-cepel monante disomle he̠ćena.

Amin Hembrom aḱ gharońjren oṛaḱ hoṛtae Jumri Murmu, ar mit́ koṛa pea kuṛi gidrạ menaḱkintaea. Bar kuṛikinaḱ bapla hoyakantakina. Huḍiń kuṛi Subita Hembrom Rajshahi Tanor Upạjilạ Mohila College rey paṛhaoḱ kana.  Amin Hembrom do̠ Aćaḱ turui bighạ bhiṭa menaḱ rehõ khas hasarey basoḱ kana. Ona atore 28 goṭen Santalkoaḱ gharońj menaḱ akada.

Amin Hembrom doe baḍae ocokeda, pạhil khonaḱge phurgạliạ hisạbte go̠ṛo̠ye ńam ạgukana. Asoḱ kanae, Disom nae-napaete calaḱa. Sạdhin disomre sanamko supulukte mit́tebo tahẽna.

Subita Hembrom  ać baba khạtir asambheṛe go̠ro̠boḱkana. Menket́ae, disom sạdhinre iń babawaḱ hõ maraṅ dạyike do̠hoakada. Iń baba do̠ jaoge Birbanṭa hisạbte ạḍiko man-manot́e kana. Onate ạḍigele go̠ro̠bo̠ḱ kana.

Utạrboṅgo Adibasi Forum ren sabha mukhiạ Hingu Murmu hõe so̠do̠rket́a, ‘Amin Hembrom do̠ santal jạt-gosṭhiren go̠ro̠b kane. Santalren maraṅ cikhnạ kanae.

Onkaleka, Nachol upạjilạ phurgạliạ ren songsod sabha mukhiạ Mushior Rahman hõe menket́a, Amin Hembrom do̠ sạrige maraṅ birbanṭa kanae. Ạḍi alga sõṛa monan hoṛ kanae.

Darakan 15 March (Moṅgolbar) kho̠n disom reaḱ jo̠to̠ sikhnạt ṭhãonakore nirdae kelas ehoṕa mente Sikhnạt Montri Dipu do̠e baḍae ocokeda. Teheń Sanicar (12 March) Rajdhạni reaḱ Sher-e bangla balika mohabiddaloy reaḱ uḍhạure kho̠bo̠riạko noa kathae lạiwat́koa.

Montri do̠e menkeda, ‘ Ko̠ro̠na hal-halot khạtir nunạḱ din kelas baṅ ehoṕ akana. Menkhan nitoṅ ko̠ro̠na hal-halot rawal nõḱakana. Ar ḍher gidrạge ṭikạ tabereko he̠ćakana. Ona iạte 15 March kho̠naḱ ekal nirdae se̠ jo̠to̠ subject kelas hoyoḱa.

Arhõe baḍae ocokeda,  Madhomik re khaṭo silạbas lekate kelas hoyoḱa ar noa cetanrege bo̠cho̠r mucạt́ biḍạu hõ hoyogo̠ḱa.

Sarkari Primary Sikhnạt Ṭhãonare Assistant mahasoe hatao reaḱ goṭa akana. Ona khạtir biḍạu do̠ darakan April cando bhitrire hoyoḱa.

Ar biḍạu re bac-bachao ocoḱko do̠ July cando kho̠nge kạmireko bahaloḱa mente Prathomik ar Gonosikha Montronaloy do̠e baḍae ocokeda.

Prathomik sikha odhidaptor calaoen 2021 serma 20 October noa reaḱ ḍharwạḱe so̠do̠rleda. Menkhan ko̠ro̠na mahamạ̃ri khạtir nit hõ biḍạu ạuri hataoḱa. Menkhan April cando biḍạu hoyoḱa mente niṭ akana.

26 February tinạḱ do̠ pạhil doge ṭikạko hatao akat́ onko do̠ 28 March kho̠n ko̠ro̠na dosar doge ṭikạko ńama. Dosar dhapre mit́dinte mit́ karoṛ doge emogo̠ḱa me̠nte baḍae ńam akana. 28 March kho̠naḱ Rajdhạni selet́ goṭa disomre dosar doge emoḱ metaḱme gonoṭikạ do ehoṕa.

Calaoen 8 March Sastho Odhidaptor reaḱ Covid-19 ṭikạ sasaṕṛao Taskforce committee ren sodosso socib Dr. Md. Shamsul Hoqe aḱ suhiat́ mit́ ciṭhite noa kho̠bo̠r lại lahawakana.

Teheń  goṭa dhạrti Kidney mãhã din. International Society Of Nephrology and International Fedaration Of  Kidney Foundation 2006 serma  March cando reaḱ dosar Lukhibar (10 March) Kidney mãhã mentey ghosona akada. Noa mãhã reaḱ aso̠l jo̠stet́ do̠ Kidney babotre sanam hoṛko so̠ntor se̠ aodhanko.

Onka leka Amnura Lutheren Mission Haspatal hõ teheń noa mãhãko manaokeda. Teheńaḱ Kidney mãhã akhṛare Manotan Dr. Suvas C. Sarkar do̠ akhṛare jarwalen sanam hoṛko ạḍi daman kathateye udgạuket́koa. Uni do̠e menkeda, Kidney do̠ Niropon hoṛmo reaḱ maraṅ utạr miṭ́en hạṭiń kana. Kidney do̠ hoṛmo kho̠n mulạhạn koe oḍok giḍikaḱa ar hoṛmore mãyãme sarsaoa, ona sãote hoṛmo reaḱ mimit́ jaṅkoe keṭeća. Onate niropon hoṛmo tahẽnre sạrige Kidney napae do̠hoe hoyoḱa. Arhõe lại so̠do̠rket́a, ńu bubulạḱ lekan bạṛićaḱ metaḱme tạṛi, hạnḍi, biṛi-cuṭi, sikareṭ emanteaḱ kho̠n pharaḱre tahẽn babotre selet́ akan hoṛkoe uskurket́koa.

Noa akhṛa talate sanamkoe udgạuket́koa je̠, Kidney mońj do̠ho̠e lạgit́ ḍher ḍher daḱ ńũi hoyoḱa. Ar aṛaḱ-sakam bạṛti jo̠m hoyoḱa. Ona sãote bhage bhage jo̠ jinis se̠ pho̠lmul jo̠m reaḱ ạḍige jạruṛ menaḱa. Enḍekhan Kidney niropon se̠ mońj tahẽ daṛeaḱa.

Ona chaḍa hõ Kidney babotre mit́ bar udgạu kathakin roṛkeda, Dr. Simion Kisku, ar Program Oficer Prodip Hembrom (NAGR). Ạḍi napaete noa akhṛa hoe purạuena.