1971 serma re tinạḱ santal disom phurgạlreko selet́len onko modre ar mit́ hoṛ do̠ Amin Hembrom. Uniaḱ oṛaḱ do̠ Chapainawabgonj Nachol upạjilạ reaḱ Nezampur union reaḱ Rudrakunḍạ ato. 77 serma umeran nui hoṛaḱ disạ-paesare jahan ṭonṭage bạnuḱtaea. Endẹteroṅ nitoṅ hõ sińke siń khaṭaoḱtege menaea.

Maraṅ phurgạl okte Amin Hembrom do̠ 26 umeran juạn koṛae tahẽkana. Ato-paṛare apat́ são nalhae tumạl kan tahẽkana. Gharońjre ạḍige saṅgeko tahẽkana. Aćren eṅgat-apat́ chaḍa mõṛẽ goṭen koṛa ar pe kuṛi boeha ar ać buḍigoe tahẽkana.  

Maraṅ phurgạl ehoṕen khan pạkistạni bạhni ar disom caḱlaoko Amnura selet́ aḍepase mimit́ ṭoṭhare luṭpaṭ, hoṛ go̠go̠ć, oṛaḱ-duạr lo̠ rapaḱ nonkan bạṛić beoharko ehoṕket́a. Un okte Amin Hembrom aḍepase hoṛko são bharot disomko sa-calaoena.

Santal phurgạliạ do̠e menet́ket́a, Pạhilre Gomostapur upạjilạ reaḱ Rohonpur re̠l sṭeson aṛe pạchimbongo Maldah jilạ singapur ṭoṭhale sen maṛaṅena. Onḍege mit́ ḍera-thạnitre bo̠ho̠ḱ aṭhṛẽḱ lekale ṭhạ̃iana. Dosar hiloḱ onḍe khonaḱ Bangitola skulteko kol ocoyena. Amdaj mit́ cando leka tahẽkate, inạkate Kutub nagrahateko kolket́koa.  Ar onḍege Amin Hembrom são Rajshahi Godagari upạjilạ ạdibạsi santalkoren ạḱyurić Sagram Manjhi aḱ ńepel-oprom hoeyentạkina. Ado̠ un jo̠khenge Sagram Manjhi do̠ disom sạdhina mentey udgạuket́koa. Ente tinạḱdin nonka eṭaḱ disomre asraebo tahẽna. Mit́́te lạpạṛhại talate disombo sạdhina.

Amin Hembrom aḱ katha sạrige monre gaḍaoat́koa. Ar uniaḱ noa kathako hetaowaḱtaea ar lạpạṛhại lạgit́ko saṕṛaoena. Thoṛa koṛakoante Maldah jilạ Gourobagan ṭoṭha reaḱ youth camp ko calaoena. Mit́ okte jiwi ṭonṭa bo̠to̠rte bhiṭạko bạgikate bharotrele ṭhạ̃ian tahẽkana. Menkhan nit nonkan jo̠to̠ bo̠to̠r deakate lạpạṛhạire ńutum lekhayena. Bar hapta teńjao (training) kate Dinajpur jilạ ko kolket́koa. Onḍge sanamko hatiạrko calat́koa. Amin Hembrom hõe calaoena. Noa do̠ pạhil dhap tahẽkana.

Hạtiạr capalao teńjao lạgit́ Amin Hembrom selet́ arhõ eṭaḱko Siliguri reaḱ mit́ṭen ḍera teko kolket́koa. Onḍe hõ bar hapta teńjao hoyena. Teńjao tayom bharot reaḱ Dinajpur ( utạr-dạkhin)  jilạ. Amin Hembrom do̠e menket́a, Hạtiạr sapaṕ tayom 7 no sector reaḱ tabere birbanṭa hisạbtey jopoṛaoena. Noa sector ren birbanṭako Rajshahi, Pabna, Bogura ar Dinajpur ṭoṭhakoreko lạṛhạiena.

Onkoren ạkyuriće tahẽkana Abdus Samad commander. Uniaḱ ạḱyurte Sonamosjid Kolabagan aṛe paṛomkate Chapainawabgonj reaḱ Sibgonj le bo̠lo̠yena. Pạhilte Aṛgaṛa hạṭiạ lạpạṛhại talatele sạdinket́a. Inạkate birbanṭako bharot camp ko ruạrena. Mit́-bar din tahẽkate arhõ disomteko he̠ćena. Aema okte Gomostapur, Bholahat reaḱ Rohonpur re thoṛa okoć lạihạireko selet́ena. Amin Hembrom do̠e lại so̠do̠rket́a, Disom sạdhinen rạskạ khobor bharot camp khonaḱle baḍae ńamkeda. Khange rạskạste gharońjren ar aḍepase hoṛko são ńepel ńapam khạtir janam disomle ruạr he̠ćena. Sạdhin tayom ekal rạska cehel-cepel monante disomle he̠ćena.

Amin Hembrom aḱ gharońjren oṛaḱ hoṛtae Jumri Murmu, ar mit́ koṛa pea kuṛi gidrạ menaḱkintaea. Bar kuṛikinaḱ bapla hoyakantakina. Huḍiń kuṛi Subita Hembrom Rajshahi Tanor Upạjilạ Mohila College rey paṛhaoḱ kana.  Amin Hembrom do̠ Aćaḱ turui bighạ bhiṭa menaḱ rehõ khas hasarey basoḱ kana. Ona atore 28 goṭen Santalkoaḱ gharońj menaḱ akada.

Amin Hembrom doe baḍae ocokeda, pạhil khonaḱge phurgạliạ hisạbte go̠ṛo̠ye ńam ạgukana. Asoḱ kanae, Disom nae-napaete calaḱa. Sạdhin disomre sanamko supulukte mit́tebo tahẽna.

Subita Hembrom  ać baba khạtir asambheṛe go̠ro̠boḱkana. Menket́ae, disom sạdhinre iń babawaḱ hõ maraṅ dạyike do̠hoakada. Iń baba do̠ jaoge Birbanṭa hisạbte ạḍiko man-manot́e kana. Onate ạḍigele go̠ro̠bo̠ḱ kana.

Utạrboṅgo Adibasi Forum ren sabha mukhiạ Hingu Murmu hõe so̠do̠rket́a, ‘Amin Hembrom do̠ santal jạt-gosṭhiren go̠ro̠b kane. Santalren maraṅ cikhnạ kanae.

Onkaleka, Nachol upạjilạ phurgạliạ ren songsod sabha mukhiạ Mushior Rahman hõe menket́a, Amin Hembrom do̠ sạrige maraṅ birbanṭa kanae. Ạḍi alga sõṛa monan hoṛ kanae.

Darakan 15 March (Moṅgolbar) kho̠n disom reaḱ jo̠to̠ sikhnạt ṭhãonakore nirdae kelas ehoṕa mente Sikhnạt Montri Dipu do̠e baḍae ocokeda. Teheń Sanicar (12 March) Rajdhạni reaḱ Sher-e bangla balika mohabiddaloy reaḱ uḍhạure kho̠bo̠riạko noa kathae lạiwat́koa.

Montri do̠e menkeda, ‘ Ko̠ro̠na hal-halot khạtir nunạḱ din kelas baṅ ehoṕ akana. Menkhan nitoṅ ko̠ro̠na hal-halot rawal nõḱakana. Ar ḍher gidrạge ṭikạ tabereko he̠ćakana. Ona iạte 15 March kho̠naḱ ekal nirdae se̠ jo̠to̠ subject kelas hoyoḱa.

Arhõe baḍae ocokeda,  Madhomik re khaṭo silạbas lekate kelas hoyoḱa ar noa cetanrege bo̠cho̠r mucạt́ biḍạu hõ hoyogo̠ḱa.

Sarkari Primary Sikhnạt Ṭhãonare Assistant mahasoe hatao reaḱ goṭa akana. Ona khạtir biḍạu do̠ darakan April cando bhitrire hoyoḱa.

Ar biḍạu re bac-bachao ocoḱko do̠ July cando kho̠nge kạmireko bahaloḱa mente Prathomik ar Gonosikha Montronaloy do̠e baḍae ocokeda.

Prathomik sikha odhidaptor calaoen 2021 serma 20 October noa reaḱ ḍharwạḱe so̠do̠rleda. Menkhan ko̠ro̠na mahamạ̃ri khạtir nit hõ biḍạu ạuri hataoḱa. Menkhan April cando biḍạu hoyoḱa mente niṭ akana.

26 February tinạḱ do̠ pạhil doge ṭikạko hatao akat́ onko do̠ 28 March kho̠n ko̠ro̠na dosar doge ṭikạko ńama. Dosar dhapre mit́dinte mit́ karoṛ doge emogo̠ḱa me̠nte baḍae ńam akana. 28 March kho̠naḱ Rajdhạni selet́ goṭa disomre dosar doge emoḱ metaḱme gonoṭikạ do ehoṕa.

Calaoen 8 March Sastho Odhidaptor reaḱ Covid-19 ṭikạ sasaṕṛao Taskforce committee ren sodosso socib Dr. Md. Shamsul Hoqe aḱ suhiat́ mit́ ciṭhite noa kho̠bo̠r lại lahawakana.

Teheń  goṭa dhạrti Kidney mãhã din. International Society Of Nephrology and International Fedaration Of  Kidney Foundation 2006 serma  March cando reaḱ dosar Lukhibar (10 March) Kidney mãhã mentey ghosona akada. Noa mãhã reaḱ aso̠l jo̠stet́ do̠ Kidney babotre sanam hoṛko so̠ntor se̠ aodhanko.

Onka leka Amnura Lutheren Mission Haspatal hõ teheń noa mãhãko manaokeda. Teheńaḱ Kidney mãhã akhṛare Manotan Dr. Suvas C. Sarkar do̠ akhṛare jarwalen sanam hoṛko ạḍi daman kathateye udgạuket́koa. Uni do̠e menkeda, Kidney do̠ Niropon hoṛmo reaḱ maraṅ utạr miṭ́en hạṭiń kana. Kidney do̠ hoṛmo kho̠n mulạhạn koe oḍok giḍikaḱa ar hoṛmore mãyãme sarsaoa, ona sãote hoṛmo reaḱ mimit́ jaṅkoe keṭeća. Onate niropon hoṛmo tahẽnre sạrige Kidney napae do̠hoe hoyoḱa. Arhõe lại so̠do̠rket́a, ńu bubulạḱ lekan bạṛićaḱ metaḱme tạṛi, hạnḍi, biṛi-cuṭi, sikareṭ emanteaḱ kho̠n pharaḱre tahẽn babotre selet́ akan hoṛkoe uskurket́koa.

Noa akhṛa talate sanamkoe udgạuket́koa je̠, Kidney mońj do̠ho̠e lạgit́ ḍher ḍher daḱ ńũi hoyoḱa. Ar aṛaḱ-sakam bạṛti jo̠m hoyoḱa. Ona sãote bhage bhage jo̠ jinis se̠ pho̠lmul jo̠m reaḱ ạḍige jạruṛ menaḱa. Enḍekhan Kidney niropon se̠ mońj tahẽ daṛeaḱa.

Ona chaḍa hõ Kidney babotre mit́ bar udgạu kathakin roṛkeda, Dr. Simion Kisku, ar Program Oficer Prodip Hembrom (NAGR). Ạḍi napaete noa akhṛa hoe purạuena.

Fuṭboll

UEFA Champion League

Real Madrid-PSG

Ńindạ 2 baja okte

Sony Ten 2 channel re.

UEFA Europa League

Fc Porto-Olympic Lio

Ńindạ, 11:45 baja okte.

Sony Six channel re procaroḱa.

Teheń Moṅgolbar (8 March) Goṭa dhạrti Maejiu Mãhã ko manaokeda National Agency For Green Revolution (NAGR). Goṭa Dhạrti Maejiu Mãhã ńutumte mit́ akhṛa do̠ hoe purạuena. Goṭa dhạrti maejiu mãhã akhṛare aema lekan bhage bhage kathako se solha kathako so̠do̠rena. Cet́lekate maejiuko lahanti hoyoḱa mente. Sạrige noa akhṛare aema cecet́aḱ kathako tahẽkana.

Teheńaḱ akhṛare Manotan peṛa hisạbte selet́e tahẽkana National Agency For Green Revolution (NAGR) ren ạḱyurić Stephen Soren, 1,2,3 ward Jhilim Union Porisod ren Maejiu member Johra Begum ar ona sãote selet́e tahẽkana Uttor Boṅgo Forum ren sabha mukhiạ manotan Hingu Murmu. Manotan peṛako do̠ bhage bhage kathate akhṛare selet́ akan maejiuko mit́ bar daman kathateko uskurket́koa.

Arhõ selet́ko tahẽkana Program Officer Prodip Hembrom  NAGR, Secretary Promila Hasda  NAGR, Mahasoe Nirola Murmu Tabitha Kindergarten School, Mahasoe Nilufa Parvin Tabitha Kindergarten School, The Santalstimes.com ren goṛoić Sumitra Murmu, Ar Mit́ pạthuạ kuṛi Santa Khatun. Goṭa dhạrti maejiu mãhã ńutumte saṕṛaolen akhṛa ạḍi napaete hoe purạuena.

Nãhãḱ jug niạko dinre sanam somaj ar rajosṭie aṅgoca je, Maejiuaḱ lahanti chaḍa mit́ṭen disom re do lahanti baṅ hoe daṛeaḱa. Maejiuko do mit́mit́ gharońjren mukhiạko kanako. Maejiuko hotetege gharońjre marsal bambera se̠ supulukte gharońjko aḱyura. Onka lekabo men daṛekea Maejiuaḱ lahanti mane do cet́ kana mente? Noa bisoe rebon men daṛeaḱa, lahanti do hoyoḱ kana sanam kạmi re maejiu hõ ko kạmi daṛeaḱa noa são kạuḍi seć lekate keṭeć se goṛo ko ńam, niạ são são te akoaḱ sạdhin te maejiu kohõ akoaḱ ektiạri hatao reaḱ daṛe tahẽn tako.

Eṭaḱ seć lekate do maejiuaḱ nijaḱ ektiạri ńam reaḱ daṛe. Aboaḱ somajre thoṛa din lahare do maejiukoaḱ oloḱ paṛhaoḱ cet́ se apnarte teṅgo keṭejoḱ do algate do bako ńelet́ kan tahẽkana. Rojgar ar gharońj reaḱ sanam lekan ektiạri do eken koṛa hoponaḱ dạyik tahẽkana. Mit́ jokheć noa disomren maejiu ar herel hoṛ do judạ judạgeko hudiset́ko tahẽkana. Ar noa judạ hudis reaḱ karontet́ do hoyoḱ kana maejiu ar herelaḱ kạmi reaḱ daṛe reaḱ bhedtet́. Ona okte noako hudiset́ tahẽkana kuṛi hopon do eken oṛaḱ sambṛao ar gidrạ ńel lạgit́ge oṛaḱreko tahẽna. Ona jokhen nonkan katha hõ ańjom akana baṅma maejiu do herelaḱ kạmi bako daṛeaḱa. Sedae reaḱ din sećbon beṅget́ arbo taṅkhi lekhan nonkanaḱ hudis tayomre mit́ṭen karon tahẽkana, Ona okte kuṛi gidrạ do eken gharońj reaḱ kạm-kajtege jion do khemaoḱ ar herel hopon do oloḱ paṛhaoḱko metakokan tahẽkana.

Gel are shotok re dhạrti reaḱ aema disomre maejiu ebhen reaḱ mit́ṭen ḍheo do hećlena ar ḍheo khạtirte bar gel shotok seć do aema Dạkhin Asiạ disomren maejiu Kamini Roy, Begom Rokeya, Nobab Phoegunecha noko maejiu do akoaḱ kạmi hotete ko ńel ocoḱ akada je, maejiu kohõ jotoaḱ ko daṛeaḱa. Ar onkoaḱ uduḱ horteko he̠ćlena Suphiya Kamal. Jahanara Imam são ar hõ aema maejiu. Maejiuaḱ ebhenteaḱ pạhilaḱ do hoyoḱ kana sikhnạt. Begom Rokeyaḱ olaḱtege maejiuaḱ kukmu ko sạriaḱ hoeakana. Eṭaḱ hoṛaḱ latarre tahẽn ar oṛaḱre siń poṭom akan maejiuko Begom Rokeya aḱ olaḱte apnar khạtiran ar manotaḱ jion ko manakada. Abonaḱ disomre maejiu kạmi daṛe reaḱ horte aema tạkićaḱ do menaḱa. Aema din khon somajre calao heć akan Dhorom seć khon reṅgeć nacar, ar sikhnạt chaḍa aema tạkićaḱte maejiuaḱ daṛe do eset́ akana. Niạ babotte bon menlekhan pạhilre hijuḱa rạkhi jogao reaḱ katha. Ente noa rạkhi jogaotege ḍher maejiuko akoaḱ sạriaḱ ạidạri khon ko get́ begar ocoakana. Rạkhi jogaṛtege maejiuko pusṭihinota, oloḱ paṛhaoḱ baṅ cet́ ar bhãe reaḱ hende ńũtre ko tahẽkana.

Adom maejiu do ạḍi reṅgeć khạtir te baṅ do ńamet́ jomaḱ, baṅ do tahẽn lạgit́ ṭhạ̃i, baṅ akoaḱ jiṅgi reaḱ khojoḱaḱko. Aema lekan okulan ar ṭonṭate maejiuko ṭhikte bako paṛhao daṛeakada. Maejiuaḱ daṛere reṅgeć são ar mit́ṭen maraṅ tạkićaḱ do hoyoḱ kana kuṛi gidrạko oloḱ paṛhaoḱ te ạḍi ko taenomgea. Dhạrti reaḱ disom seć bon beṅget́aḱ khan bon ńel ńama onḍe maejiu ar herel hopon mit́ kate jãhã baṅ jãhãnaḱ kạmieda ar arjao kate akoaḱ jion ko khemaoeda. Menkhan sikhnạt obhab khạtirte abo disomre kuṛi gidrạ apnarte teṅgo keṭejoḱ lạgit́ oka jinis jạruṛ ona dokkhota, joggota do bako ńam akada. Niạ katha re bon men daṛeaḱa je, kuṛi gidrạ tayomre tahẽn reaḱ khạṭitet́ do somaj re sanamaḱ tayomre sikhnạt reaḱ obhab bon ńama. Mit́ seć lekate reṅgeć nacar te kuṛi gidrạ oloḱ paṛhaoḱ seć khonaḱko get́ begar akana ar eṭaḱ seć khon oloḱ paṛhaoḱ khạtirte sạriaḱ joggota bako ńam akada. Ar nonkate maejiu somaj re reṅgeć hõ tahẽ idiḱ kana aema lekanaḱ muskil ko hõ.

Cet́leka joutuk, kạṭić umer re bapla, ar mit́ herel aema bahujoṅ. Oloḱ paṛhaoḱ baṅ baḍae ar thoṛa oloḱ paṛhaoḱ baḍae kuṛi gidrạkoaḱ baplare jãwãe koṛa seć khon joutuk ko khojoḱ (diku somajre) ar nonkatege maejiu akoaḱ mońj goṭawaḱ bako ńam khạtirte akoren kuṛi gidrạ kạṭić umer re ko bapla kako kana.

Sãota reaṅ mimit́ kạmihorakore maraṅ utạr cikhnạ se̠ bhage bhage kạmi ńutumte Sher-e bangla so̠na siro̠pa-2022 rey man manot ocoyena Ạdibạsi ạḱyurić Merina Hasda. Uni do̠ Rajshahi Damkura hạṭ reaṅ besorkari unnoyon songstha Masaus ren nirbahi ạḱyurić kanae. So̠ko̠lbar (4 march) ńuhum okte Dhaka reaḱ Bijoynogor Hotel-71 threister hollroom re mit́ akhṛa talateko man manotkedea.   

Noa akhṛare manotan peṛakoaḱ tite crest, uttorio ar certificate hõe ataṅket́a. Sher-e Bangla A.K Fazlul Hoqe gobesona porisod, South Asia Social Aducation Foundation ar 71 media vision noa akhṛae bo̠ndo̠bo̠sleda. Man manot ńutumte Masaus ren sanam kạmiạko Merina Hasda joharko em caladea. Ado̠ thoṛako kuklikedere nonkae menkeda Merina Hasda, Uni do̠ aema din khonaḱge ạdibạsi jạt-gosthi koaḱ mạnmi ạidạri, pạrsi ar legcar paltur rạkhi jogao jo̠to̠n ar ona sãote aema lekan kạmi hudạ benao rakaṕre ạḍi muruḱe kạmi idikana.

Eṭaḱ eṭaḱ ạdibạsi jạtiko akoaḱ ạidạri hamet́ lạgit́ hõ miljule kạmi kana. Nonkae man manoten iạte sạrige uniaḱ kạmire arhõ jhũḱ mon he̠ćadea me̠ntey baḍae ocokeda. Ona ṭhaõnaren sanam kạmiạko gạhir mo̠n kho̠ne sarhaoket́koa.

Migraine mit́ lekan bo̠ho̠ḱ haso kana. Bo̠ho̠ḱ re jãhã mit́ aṛe kho̠naḱge noa haso ehoṕa. Migraine bo̠ho̠ḱ haso ạḍi ghạṛić do̠ tahẽna. Okoe aḱ nonkan eṭkeṭoṛẽ menaḱtako, Onko do bo̠ho̠ḱ haso são be̠ć be̠ćko aṭkara. Noa haso ạḍi algate baṅ maraoḱa, thoṛa din do̠ hasoa. Onate tinạḱ hoṛkoaḱ noa haso menaḱ, noa haso cet́ khạtirte ehoṕa ona babotre baḍaejoṅ jạruṛ menaḱa. Nonkate Migraine khonaḱ pharaḱbo tahẽ daṛekea.

1. Reṅgećte tahẽn:

Reṅgećte tahẽlen khan Migraine bo̠ho̠ḱ haso ehoṕa. Ente reṅgećte tahẽnre gastric reaḱ muskil ńelogo̠ḱa, oka do̠ bo̠ho̠ḱ haso ḍher daṛeaḱa.

2. Hoe-daḱ bichnạu (abohaoa):

Ạḍi bạṛti setoṅre nạcurle khanhõ bo̠ho̠ḱ haso ehoṕ daṛeaḱa. Inạkate lo̠lo̠ setoṅ khạtirte hoe daṛeaḱa.

3. Mo̠nre ucạṭ:

Okoe do̠ asambheṛ se̠ ạḍi bạṛti ucạṭteko kạmikan, ar jo̠m-ńu reaṅ jãhãn niṭ akan okto bạnuḱtako se̠ baṅko manaoet́ kan, onkanko hoṛge bạṛti noa bo̠ho̠ḱ haso ńamet́ko kana.

Enḍete nonkanaḱ mo̠naḱ ucạṭ dea giḍikaḱ reaḱ kurumuṭui hoyoḱa.

4. Jãhãnaḱ saḍe: kajaḱ riṛạṅ ṛaṛaṅte sereń aṅjo̠m emanteaḱ khạtirte Migraine bo̠ho̠ḱ haso ńańama. Ạḍi riṛạṅ ṛaṛaṅ khạtir amdaj bar din dhạbić haso tahẽ daṛeaḱa.
5. Ạḍi bạṛti jạpit́:

Okte nạpitre jạpit́ sanamko lạgit́ ạḍi jạruṛa. Ente oktere baṅ jạpit́le khan hoṛmore aema lekan eṭkeṭõṛẽ ńelogo̠ḱa. Okoe do̠ jao hiloḱ 5-6 ghonṭa ko jạpit́, Ackage mit́ okte onkanko hoṛ ḍherko jạpit́ lekhan bo̠ho̠ḱ haso ehoṕ daṛeakoa. Onate sanamko sontor ar aodhan tahẽn hoyoḱtabona.