NAGR ren Director aḱ Graduation

21 May 2022 sạnicar Dhaka reaḱ Sa hall room re Asian Access Leadership 2 serma course reaḱ graduation hoypurạuena. Noa Asian Access Leadership course reaḱ bar serma paṛhao pahṭao do̠ ho̠la mucạt́ena. NAGR (National Agency for Green Revolution) ren ạyurić Mn. Stephen Soren do̠ 2020 serma kho̠n no̠a course paṛhaoe ehoṕleda ar napaete niạ sermae paṛhao purạu keda. Sãota lahanti lagit́ niạ ạyuran paṛhao do̠ manmi jion re ạḍi lạgti gea. Mn. Stephen Soren do̠ Sãota lanti ar reṅgeć-nacar hoṛko napae te akoaḱ jion jiṅge khemao lạgit́ uskur ar cehaona ko̠ lạgit́ Tabitha Foundation ńutuman mit́ hudiń gaõtae (none government organization) e bandhao rakaṕ keda 2008 serma re ar noate Rajshahi,Chapainawabganj jilạren santal,kolhe ar eṭaḱ jaṭ ko talare lahanti kạmye ehoṕkeda. ar noa do̠ ạd̠i thoṛa din ren ona ṭoṭha ren hoṛko lagit́ bhạlạeanaḱ sãota hoy rakaṕena. Menkhan Mn. Stephen Soren do̠ ar ḍher hoṛko tala ar goṭa diso̠m re kạmi hora pasnao idiy lạ̣git́ arhõ mit́ṭen maraṅ sãotae bandhao keda NAGR (National Agency for Green Revolution) ńutuman ar nit onaren ạyurić (director) hisạbte kạmikana. Noa hotete nit Bangladiso̠m re Santal, kolhe, Mahale ar eṭaḱ jạt ko talare ho manwa jion jiṅgi lahanti ar napae jion khemao babot aeama leknaḱe kạmi kana. Noa kạmi ko do̠ diso̠m reak Rajshahi, Chapainawabgnaj, Naogaon, Dinajpur, Thakurgaon, Gaibandha jilạ reaḱ niṭ akan upojilạ kore hoyoḱ kana. Uniaḱ niạ lahanti kạmire aćaḱ niạ Asian Access Leadership gradution maraṅ goro ar porho anaḱ ge hoyoḱa. Mn. Soren aḱ niạ ạidạri khatir aćren kạmiạ ar gate peṛa ko ạḍi ko rạskạḱ kana.

Re̠l Gạḍitey Ten Goćena Kol Citto Mardi

Chapainawabgońjre Dhaka te mohnḍa akan Bonolota Express re̠l gạḍite Citto Mardi (33) ńutuman mit́ṭen kol hoṛe goćena. Sodor upạjilạ reaḱ Jhilim union Boropukuria-Sonatola ṭoṭhare hola Sombar (16 May) setaḱ noa ghoṭna ghoṭao akana.

Citto Mardi ren oṛaḱ hoṛ metaḱme bạhu Onjoli Murmu do ạḍi duk-ạndirey paṛaoena. Ente oṛaḱ hoṛtae ackage gujuḱ lekan dosarey paṛaoena. Onjoli Murmu ar Citto ren babar goṭen gidrạ menaḱkina arhõ turui cando leka bhạrti hoṛmo menaea. Nonkan dosare at́ kedea oṛaḱ hoṛtae.

Re̠l gạḍitey ten goćen khobore baḍae ocokeda Chapainawabgońj sṭeson polis phạṛi ren SI Faruq Ahmed. Uni arhõe baḍae ocokeda je, mạ̃ṛi do polis ar porsasonko Jhilim union reaḱ Bilboltha atoren Mamat́tet́ Deben Tudu aḱ tireko soprotkedea. Ar som hioḱge bar baha tala doko hasawadea.

Ạyuṕ ber amdaj 3 baja okte Baḍae ńamena, tahẽn lạgit́ jahan ṭhạ̃i bạnuḱtaea Citto Mardi aḱ. Apat́tet́ Mohadeb Mardi são eṅgatet́ ar kakat́tet́tako tahẽn jaega oṛaḱ bhiṭạko ạkhrińkate Bharot disomko parom calaoakana. Ar Citto Mardi doe tahẽkana Rajshahi reaḱ Godagari upạjilạ hońhartet́takoa ato Bosotpur re. Menkhan pe cando lahare ać mamatako ṭhene hećena jibikạ ńańam mente.

Dhiren Tudu ren oṛaḱ hoṛ Rekha Kormakar doe menket́a, Cekate kạṭić gidrạ ante bạhukuṛi Onjoli Murmu do dine khemaoa? Okoe dekbhalkoa, ar okoe baṅ gharońje ạyurtakoa. Bhạgnạń ren eṅga-apa ma Bharot disomreko tahẽn. Nit ale oṛaḱrege menaḱkoa. Menkhan aleaḱ gharońj rehõ ạḍi obhab. Cekatele calaokoa?

Rekha Kormokar arhõe menkeda, Citto Mardi aḱ gujuḱ khobor ańjomte upạjilạ nirbahi ạpiser (UNO) selet́ aema hoṛge onko são ńapamoḱko hećlena. Upajila prosason ṭhen khonaḱ gel (10) hajar kạuḍi goṛoko emawat́koa. Menkhan enrehõ Citto Mardi ren bạhu bhạrti hoṛmo menaekade nui jemon cikit́sạ lạgit́ kạuḍi sećte goṛo ńam ar reṅgeć oreć bejaega hoṛ sarkar seć khonaḱ oka oṛaḱko ńamet́ noa jemon Onjoli ńam noa hõe dạbiket́a.

Cittio Mardi ren lạṭu mama Deben Tudu baḍae ocokeda, Ramjan cando hõ mit́ dhao re̠l gạḍitey akhamlena ina tayom oṛaḱrege tahẽkana. Menkhan arhõ inạ mit́ jaegarege arhõ nonkan ãoṛa gãoṛẽ ghoṭaoena. Bhạgnạt́tet́ bohoḱre thoṛa muskil tahẽkantaea mente baḍae ocokeda.

N U R S E

Calaoen 12 tạrik do tahẽkana International NURSE Day. Delabon baḍaelegi NURSE reak jos katha; N-Nurture; pusti, U-Universal; sanamko lạgit́, R-Responsible; Dạyik, S-Smart; budan, Jhũk monan, E-Educated; bhage sikhnạt hameṭ.

International Council Nurses (ICN) 2022 sal reaḱ asol jos do tahẽkana; Nurse aḱ ạidạri manot babot. Sạrige Nurse aḱ tinạḱ manot ar dạyikan kanako, ona reaḱ jo do sanamko mẽt́ tebon ńelkeda; COVID-19 lekan maraṅ rogre. Apnaraḱ jiwi alaikatet sanamkoaḱ jiwi rukhiại lạgit́ko kạmi akada.

Jao sermage ICN hotete Adhunik hoṛmo hạṭiń re jopoṛao tahẽkan Florance Naitangel aḱ janam mãhã 12 May re Goṭa Dhạrti Nurse mãhãko manao ganaoeda. ICN ren maraṅ peṛa manotan Dr. Pamela Cipriano doe men akada; Goṭa corona okte re nurse ko do ạḍi ãṭ haron arko kosṭo akana; Babon aṭkarakat rog coronate aema nurse doko goćakana, se corona te lạṛhạikatetko bańcao akana apnar ar sanamko. Nonkan haron kạmi re aema bhageaḱ doko kạmi akada; ar thoṛa tolopteko kạmi kana se kạmi thạ̃ire bako lekha ocoḱ kana. Sanam disomren sorkar jemon noa babotre ạḍi khạndri doe hudis ar baṅkhan hoṛmo joton kạmire menakko lạgit́ ạḍi maraṅ laksan do hoyoḱa. Hoṛmo joton kạmi kanko begor hoṛmo do banuka.

International Council Nurses (ICN) 2022 sal re barea nurse aḱ khaṭo katha ol rakapkeda. Pakistan period khon nit habicte Bangladesh reaḱ utạr nakha Rajshahi bibhạg; Rajshahi jilạ, Chapai jilạ ar Naogaon jilạ ren sanam hoṛko ạḍi joto selet́ boge treatment doe em ạguieda – Amnura Lutheran Mission Hospital. Olak ́sećte baḍaeaoḱ kana je; noa hospital do ehoṕakana 1966 sal khon dispensary hisạbte, inạ tayom Clinic ar nitok do 10 beds Hospital. Noa Hospital re 22 goṭen total staffs menaḱkoa, Ona modre 6 goṭen nurse doko kạmi kana. Onko modre bar hoṛaḱ ol kathań sodoreda; Songita Murmu do Rajshahi Christian Mission Hospital – Nursing Training Center khon Diploma in nursing doe purạu akada. Training mucạt́ tora khonge uni do Amnura Lutheran Mission Hospital re kạmi ehoṕ akada; Onka leka Mery Hembrom do Sahamokhdum Nursing Institute khone paṛhao akana ar nitok do Amnura Lutheran Mission Hospital reye kami kana. Ạḍi rạskạ selet́ dokin kạmi kana. Ar bana hoṛge ạḍi bhage ar jhũk montekin kạmi kana. Hospital ren sanam nurse ge hoṛ kanteko ar bạṛti hoṛ rogiko joton kạmi khạtir ạḍi bes doko aṭkaret kana. Nonkan kami re hejuklagitbartiuskurdokonamakadaGogoar Baba khon.

Kerina Soren ho Rajshahi Christian Mission Hospital khon Diploma in Nursing doe purạuakada. Kerina do gogo hoṛmo re tahen okterege ać baba doe goćlena. Ạḍi haron talate ać gogo doe joton harakedia ar Nurse doye paṛhao ocoakadea. Kerinaren baba do aćkageye goćena; dactor khanako ho ạḍi sạṅgin re tahekante bako edi daṛeadia. Onate ać gogoaḱ maraṅ sana ar as do hoyoḱ kana; jemon mit din iń ren gidrạ hoṛkoe ran ako ar onkate bogeko tahen. Kerina hõ ạḍi rạskạ doe aṭkaret kana; hopon tolopte kami katet ho. Entet uniaḱ maraṅ jos ar motlob do rogiko joton talate bhage bhage kami.

Noa Nurse mãhã sećte goṭa dhạrtiren sanam nurse ko lạgit tahen kana aema manot ar dulạṛ johar. Hoṛmo do maraṅ mit́ sompot kana sanam manwakoaḱ. Entet hoṛmo ṭhik baṅ tahelen khan sanamakge bes baṅ bujhạuḱa. Onate delabon sanamko; aboren nurse ko bạṛti bon manotkoa ardhuṛi dharti re tahen bhor jemon bhage upkạr bon ńam se sebako emabonte nurse hõ akoaḱ ekraṛ, josar motlob do purạuk. Darakan din re lạgit nonkan as sanamko dohoeda.

SSC-2022 Form Purun Okto Ḍherena

Secondary School Certificate (SSC) form purun okto do ḍherena. Nawa ḍhạrwạḱ lekate, Sombar (09 May) khonaḱ 16 May dhạbić pạṭhuạ gidrạ form ko purun daṛeaḱa mente baḍae ńamena.

Aṭhwar hiloḱ (08 May) ńindạ Dhaka sikhnạt board khonaḱ mit́ ḍhạrwạk talate lại sodorena. Ar noa ḍhạrwạḱ rey suhi akat́a board ren bidạu ńel jut metaḱme ḍanṭaoić Professor S M Amirul Islam.

Ḍhạrwạḱre arhõ menena, form purun do teheń (09 May) khonaḱ 16 May dhạbić calao idiḱa. Ar onka leka Online hotete 17 May bhitrite fee emoḱ hoyoḱa.

19 June Khonaḱ SSC Biḍạu Eho̠bo̠ḱ Kana

Daraekan 19 June, 2022 kho̠n e̠ho̠bok̕a ne̠s reak̕ Secondary School Certificate (SSC) biḍạu ar mucạdok̕a 6 July, 2022. Ona iạte biḍạu reaṅ somoysuci so̠do̠rkeda Anto:Sikha board. Hola Budhbar Dhaka sikhnạt board ren bidạu ńel jujutić Professor S M Amirul Islam aḱ suhiat́ somoysuci so̠do̠rena.

Jao hiloḱge 10 baja khon biḍạu ehoṕa ar 12 baja do̠ mucạdoḱa.

Ranishankoilre Be̠jaega Ar Oṛaḱ Bạnuḱan Hoṛko Talare Oṛaḱ Em Hạṭiń Uḍhạu Akhṛa

Thakurgaon reaḱ Ranishankail upạjilạ re hola (26 April) Moṅgolbar, Maraṅ Montri hotete reṅgeć nacar hoṛ metaḱme be̠jaega ar oṛaḱ bạnuḱan nonkan gharońjren ko lạgit́ jumi ar oṛaḱ em hạṭińako khạtir uḍhau akhṛa hoe purạuena. Maraṅ Montri Sheikh Hasina enhiloḱ video conference hotete goṭa disomre tesar dhap lekate 32 hajar 904 goṭen oṛaḱe uḍhaukeda.

Enhiloḱ Setaḱ 9:30 baja khonaḱge upạjilạ reaḱ Hallroom re UNO Sohel Sultan Zulkar Nine Kobir aḱ ạḱyurte noa akhṛa hoe purạuena. Akhṛare Manotan peṛa hisạbte selet́e tahẽkana upạjilạ Chairman Shahriar Azom Munna. Bises peṛa hisạbte selet́e tahẽkana ạdhik jilạ Magistrate Ramkrisno Bormon, Awami League sabha mukhiạ Saidul Haque, Vice Chairman Shefali Begum, Assistant Commissioner Indrajith Saha, Pouro mayor Mostafizur Rahman, ar OC S M Zahid Iqbal. Inạ chaḍa hõ akhṛare aema lekan rajnitik ar samajik ạḱyurko, sạdại hoṛko ar ona saõ khoboriạko hõ selet́ko tahẽkana.

Manotan peṛako são arhõ noa uḍhạu akhṛare mit́ bar kathako roṛkeda, Prokolpo bastobayon ạpiser Samiel Mardy, Pressclub bạisạuakat́ sabha mukhiạ professor Anwarul Islam, Sạbik odokkho Sports Organizer Tajul Islam, Pouro Awami League sabha mukhiạ Jahangir Alom, Upạjilạ Porisod Chairman Abul Kalam, Pressclub convener Kusmat Ali ar sabha mukhiạ Faruq Hossain hõ seṭere tahẽkana. Inạ tayom upạjilạ reaḱ borat́ akat́ leka be̠jaega ar oṛaḱ bạnuḱan hoṛko talare oṛaḱ ar jumi reaṅ dạlilko em hạṭińat́koa.

Bharot Disomre Ko̠ro̠na Rog Ḍheroḱ Kana, Baṅgladisomre Arhõ Ḍher Daṛeaḱa: Sasthomontri

Aḍepase Bharot disomre arhõ ko̠ro̠na rog chạplạuḱ kana, nonkan dosare Baṅgladisomre arhõ ko̠ro̠na rog chạplạu daṛeaḱa mente Sastho ar Poribar kollanmontri Zahid Malek do̠e baḍae ocokeda.

Teheń Robibar (24 April) tarasiń ber jokhen Mahakhali Jatiyo Nipsam Auditorial Jatiyo pusti hapta-2022 ńutumte bo̠ndo̠bo̠s akan akhṛare noa kathae lại so̠do̠rket́a.

Ona iạte mit́ bar cehaona kathakoe menkeda. Sanamko sontor akae tahẽn jaruṛkantabona. Je̠mon ko̠ro̠na rog khonaḱ pharakbo tahẽ daṛeaḱ. Enḍekhan nonkage niropon hoṛmoante dhạrti jingibo khemao daṛeaḱa.

Ạdibạsi Hoṛaḱ Oṛaḱko Jeret́keda Lạṭkuṭạ Banḍhej Hoṛko

Naogaon Reaḱ Porsha re nijhum guṛum ńindạ mit́ ạdibạsi hoṛaḱ oṛaḱko jeret́keda lạṭkuṭạ bandhej hoṛko. Un jokhen oṛaḱren hoṛko diḱsạket́ khan jiwi ṭonṭa botorte harephareko ńir oḍoḱena. Oṛaḱre tahẽkan lakh ṭaka reaṅ jinispạti ekal rapaḱ roṅgo cabayena. Calaoen Sokolbar (15 April) noa ghoṭna ghoṭao akana. Upạjilạ reaḱ Tetulia union porisod Murulia ạdibạsi ṭola ren Shree: Monil hopon Modon aḱ oṛaḱre noa ghoṭao akana.

Oṛaḱ mukhiạ Modon baḍae ocokeda, Jao hiloḱ lekage kedoṕ jom tayome jạpit́ maṛaṅkeda. Aćaḱ gharońjre bạhu, bar gidrạ ar mit́ boehatae menaḱkoa. Jotoge galasaṅko jạpit́ akat́ tahẽkana. Ackage nijhum guṛum ńindạ aḍepase hoṛkoaḱ kạumạute ebhengo̠tena. Ado̠e tạṅkhiket́ma seṅgel joloḱkan, khange sanamko oṛaḱ khonaḱko dạṛ oḍokena. Enhiloḱ amdaj mit́ karoṛ bar gel hajar kạuḍi laksan akantea.

Modon do̠e dạbi kana, baṅma Lahateaḱ benebạiri khạtirtege ṭola paṛaren hoṛko seṅgelko dhurạu akada. Ghoṭna babotre mit́ṭen olaḱ ijhạr re jomaḱ akada. Porsha thanaren ạpisar In Charge Jahural Islam hõe menet́kana, lahateaḱ benebạiri karonaḱte paseć nonkan ghoṭna ghoṭaoena. Enterehõ nitoṅ hõ ghoṭna tojbij calao idiḱkana.

Bangladesh Northern Evangelical Lutheran Church-re Paska Girjạ;

Isại hoṛkoaḱ maraṅ dhorom po̠ro̠b Easter Sunday se paska porob ńutumte Chapainawabgonj jilạ reaḱ sodor upạjilạ Amnura Mission iskul maṭhre BNELC reaḱ maraṅ Simraḱ Paska (Sunrise) Girjạ do̠ hoe purạuena. 17 April Aṭhwar hiloḱ aṅga simraḱ 5:00 am baja okte khonaḱ niạ girjạ do ehoṕlena. Jisu Mạsiaḱ jiwet́ beredoḱ diḱsạ ruạṛ ńutumte noa bises girjạre Niạ diso̠m ar goṭa dhạrti reaḱ suluk ar jạt jạtko talare dupulạṛ tahẽn babot hõ koejoṅ hoyena. Simraḱ Paska girjạre Amnura Mission manḍer ar ona aḍepase ṭoṭharen (Mirjapur, Jolahar, Sakoṭola, Jhinạkhor, Phạgupaṛa, Sanjra) 300 cetan isại boeha miserako selet́lena.

Isại hoṛkoaḱ biswạs lekate, Jisu Mạsi gujuḱ tayom tesaraḱ din do̠e jiwet́ beret́ akana. Ado̠ Jisu Mạsiye jiwet́ beret́ hotete dhạrtiren manwa kại khon bańcaoko ńamkeda ar nonkate Jisu Mạsi Jiwet́ beredoḱ Aṭhwar do̠ Paska se Easter Sunday hisạbte manao hijuḱ kana. Jisu Mạsiaḱ jiwet́ beret́ metaḱme jitan din mimit́ diso̠mren isại hoṛko aema lekan ạn-ạri talate noa dinko manao ganaoeda.

Niạ Maraṅ Simraḱ Paska po̠ro̠b girjạe ạḱyurkeda BNELC ren mare GS Rev. Suban Kisku. Girjạre arhõ selet́kate johar katha ko lạe pasnaokeda BNELC-Rajshahi circle Chairman Mn Rabindronath Hembrom, National Christian Fellowship of Bangladesh(NCFB) ren Program Coordinator ar onoliạ Mn. Mithusilak Murmu, BNELC-Trust Board secretary Mn. Hingu Murmu, TF/NAGR ren Director Mn. Stephen Soren. Ạḍi rạskạ salaḱ napaete noa Simraḱ Paska (Sunrise) girjạ hoe purạuena ar darakan bochor hõ sanamko niạ ar hõ noa Simraḱ se Sunrise girjạ hoyoḱa menteko sodorkeda ạyur komitte ko. Ona selet́ Manotan ko arhõ ko menkeda, nonkage jemon tayom daram dinre BNELC reaḱ mimit́ manḍerre simraḱ paska girjạ metaḱme cando ạuri rakaboḱrege (Sunrise) girjạ hoyoḱma.

Dinajpur Reaḱ Nawabgonjre Carenṭ Tarte Jhạli Kateće Gurena Mit́ Ạdibạsi

Aṭhwar hiloḱ (17 April) Dinajpur reaḱ Nawabgonjre amdaj setaḱ 7 baja jokhen Bhaduria hindu ṭolare Robi Toppo (52) ńutuman hoṛ carenṭ tar re jhạli kateće gurena. Thana reaḱ kho̠bo̠r lekate baḍae ńam akana je, oṛaḱ khonaḱ amdaj 100 gọj sạṅgiń pạchim dạkhin nakha mat́ gajaṛ seć ṭạnditey senlena, ado̠ daḱ beohar lạgit́ hoṛo khete senen khan hoṛo khet khon goḍo danṭaoko lạgit́te jonoṛao akan carenṭ tar tege jhạli kateće gurena.

Inạ tayom amdaj 10 baja ona ṭolaren Amirul Islam (36) ńutuman mit́ hoṛ uni gurakan Robi Toppo ńelte ekale tharbasaoena are kikiạukeda. Khan ṭolaren hoṛko jarwaen khan Robi Toppo ren bhạgnạtet́ Sanchu Khanko selet́ thoṛa hoṛkoaḱ goṛo gopoṛote oṛaḱko ạgukedea.