Sanamkogebon baḍaea je, calaoen Lukhibar (21 July) Draupadi Murmu nãwã president hisạbte bachao ocoyena.

Bharo̠t disạmren President hisạbte darakan 25 July setaḱ 10:14 miniṭre Draupadi Murmu do̠ dạyike hataoa. Ar ona lạgit́te ekraṛ-e hataoa. Rastropati socibaloy khonaḱ noa ekraṛ akhṛa reaḱ tạrik ar dinko lại so̠do̠rakana. Arhõ menakana, ekraṛ tayom 10:23 miniṭre nãwã president mit́ bar kathae roṛa.

BJP do̠l seć khon bachao ńamakana Draupadi Murmu do Bharot disom reaḱ nagamre ạdibạsi santalko modre pạhil utạr president. Ente niạ lahare ạdibạsi santalko modre okoege noa President aḱ duṛuṕaḱre baṅko duṛuṕ daṛeakada. Menkhan nuige pạhil President hisạbte bachao ocoyena.

Lạṛhại lạṛhại lạṛhại kate, lạṛhại kate bańcaoḱ abon.

Kulhi kulhite nonkan ãṭ aṛaṅ ho̠ho̠ aṅjo̠mte bạṅ moneada. Teheń Moṅgol Tudu aḱ mẽt́ muṭhạn ạḍige hados ar mirluṅge ńeloḱ kana. Ente Briṭis pạkistankoaḱ amo̠l kho̠n ạgil-hapṛamkoak jumi-jaega do jumi eḱṛe bạṛić hoṛkoaḱ tire paṛaoakana. Jal dolil bhul kago̠jpạtiko, no̠ko̠l sạhi-jạhiante sapṛao akana.

Umerte lahaḱ akan nui ạdibạsi ạḍige mãyã moyoḱ ar awaṭapa akanae. Sãe ke sãe jumi-jaega khone eṛaṅ ocoakana. Aćaḱ oṛaḱ bhiṭạre hõ baṅma daya mãyã khạtirteko tahẽ ocoakadea. Menkhan noa bo̠so̠t bhiṭa re mit́ okte gajaṛte pereć akan tahẽkana. Ar noa gajaṛko sapha sạphikate oṛaḱe benao rakaṕket́tey giro̠basena. Onate jumi lạgit́te kacahạrikoe dãṛã ạcurkeda, Biswạs tahẽkantaea mit́ hiloḱ noa jumi udhạrkate tayom piṛhi lạgit́e do̠ho ọtakaḱa.

Menkhan hae hae! Abhagiạ cet́ dosare paṛaoena?

Mõṛẽ ge̠l (50) serma paro̠mena. Nit hõ oṛeć pho̠ṅpho̠ṅ dolil moṭra kate kạluṅḍạbuṅ duạr duạrre ạcur baṛae kana. Mo̠n pereć gaḍao akan biswạswante dine khemaoet́ kana. Becariạ Moṅgol Tudu gamcha moṭra metaḱme puṭli koṛamre dohoakat́ jạpit́ jhũkre kukmu ńeńel kana, Noa dolil okoege baṅko go̠ro̠jaḱ kana, ar celege biswạs hõ baṅko biswạsoḱ kana. Tin ńindạ co̠ jagwar akane tahẽn? Kamkaj hõ bae calaḱ kana. Cedaḱje dolilko ho̠rho̠ ho̠rho̠te okto paro̠moḱ kantaea.

Oṛaḱ chạuni hõ bhugạḱgea, bhitko dasaoente mon hõ dasaoena. Paseć re paseć noa jạput dinre dolilko lo̠ho̠t cabaḱ. Se jo̠to̠nre do̠hokaḱa. Moṅgol Tudu okoege baṅko khoje kana. Aćtet́ge at́lenre hõ oṛeć pho̠ṅpho̠ṅ dolile rukhiạ do̠hoea.Tinạḱe ae-rojgaret́ tahẽkan inạtege mamla koe calaoet́ kana. Ńu bubulaḱ metaḱme (tạṛi, hạnḍi) nonkanaḱre bae mạluṅoḱa. Mit́ṭenge nisạtae ona do jumi udhạr. Mahajon ko Moṅgol Tudu ńelte bogete muluć mạchiko landaya. Ado̠ enkage ańjo̠mte bo̠ho̠ḱ kuḍbur kateće sa paro̠moḱa. Ar mone monete sisirjạuiće disạea.

Tinre lahanti akan disomre hana nhawa benao lạgit́ beṛhaeteaḱko bạṛićet́ kana. Unre Moṅgol Tudu tako aṭkareda noa jo̠to̠waḱge michạgea. Baḍaeabon je̠, janam datakoge beṛhaeteaḱ se prokiti sewako. Entet́ beṛhaeteaḱ cecet́aḱge khạṭitet́ kana, dare nạ̃ṛĩ bańcaolenre, manwako bańcaoḱa.

Onka leka jumie udhạr daṛeaḱa se baṅ menkhan mit́ din hiloḱ khạṭi bicạra ńamjoṅa. Onatege bhiṭa khon laga ocoakan Moṅgol Tudu binpusṭạu oṛeć pho̠ṅpho̠ṅ dolil re as ar bhorsa kate jiwet́ bhore jogao do̠hoea.

Teheń Moṅgolbar (19 July) goṭa disomre booster doge reaṅ mit́ṭen kạmihora ehoṕakana. Teheńaḱ dinre eyae ge̠l mõṛẽ (75) lak hoṛko booster doge emako reaṅ hudis bhabna menaḱa.

Hola Sombar Sastho montri Zahid Malek noa khobore lại so̠do̠r akada. Ar onka leka teheń setaḱ 9:00 baja khonge mimit́ ṭikạ centre kore booster doge ko emako kana.

Ente sanamko bon baḍaea je, noa goṭa disomre ko̠ro̠na ro̠g cet́leka hạhạnkana mente. Mit́ ghạṛite ko̠mo̠ḱ kana arhõ ḍheroḱ kana. Ar sạrige ạḍi alagate hoṛko jạbunoḱ kana. Menkhan noa ro̠g kho̠n rukhiạḱ lạgit́ ṭikạ do̠ ạḍige jạruṛ kana. Onate ko̠ro̠na ro̠g são lạpạṛhại lạgit́ noa tesaraḱ doge metaḱme booster doge emoḱko goṭa akada.

Tehen Sombar (18 July). Bharot́ disomre President vot hoyena. Noa President votre BJP do̠l seć khon bachaoic’ NDA presidential candidate Droupadi Murmu ar uniren vot rey tengo akana Trinomul khon mare Union Montri Yashwant Sinha. Baḍaeteaḱ do noage BJP ren bidhayok ko pạńci dạṛhi kate teheńaḱ president vot ko emkeda. Inạ chaḍa hõ BJP seć khon okoe ạḱyuriće tahẽkan metaḱme Bidhayok Sudip Mukhopadhay uni hõ pạńci dạṛhi kateć vot-e ạyurkeda.

Bharot disomren ạdibạsi koaḱ lae-legcar aḱ cinhạ kana noa pạńci. Cet́leka mone mena onkage noa pạńcim ho̠ro̠ḱ bande daṛeaḱa. Onkaleka noa pạńci bo̠ho̠ḱre horoḱlekhan pạńci dạṛhiko metaḱa. Arhõ noa pạńci dhuti leka ho̠ro̠ḱ lekhan ona do pạńci ḍeṅga ko metaḱa. BJP ren turui ge̠l gare (69) gọten bidhayok ko pạńci dạṛhi kate vot ko emkeda. Menkhan nonkan ho̠ro̠ḱ bande kateć vot em ńelte, Trinomul porisod do̠lren noa birudreko nạliskeda.

Ente baṅko ńel sahao daṛeada. Cedaḱje, menkeda ko, president oka jạti-gosthiren kane, uniaḱ cinhạ ńutumte noako ho̠ro̠ḱ akada mente. Menkhan BJP ren ạḱyurić Suvendo Adhikari do pusṭaute lạiat́koa. Nonkan monsubạte bacole ho̠ro̠ḱ akat́. Ale do ạdibạsikoaḱ (calture) se lae-legcar man manot lạgit́ pạńci dạṛhi kateć votle emkeda. Sạrige ạdibạsikoaḱ nonkan ho̠ro̠ḱ bande kateć vot ko emket́ do rạskạ ar hahaṛawaḱ kangea. Ḍher hoṛko menet́ kana noa vot re Dropaudi Murmu ge jitạuḱa. Menkhan noa vot reaḱ jo ńam lạgit́te tạṅgi hoyoḱa.

Tumạl: anandabazar.com

Teheń do Robibar (17 July). Sanamkobon baḍaea je, Summer chuṭi ar Eid-Ul Azha ńutumte calaoen 28 June khon 16 July hạbić disom reaḱ jo̠to̠ sikhnạt ṭhãonako bond tahẽkana. Ar ńel ńelte noa chuṭi do parom calaoena.

Onka leka teheń khonaḱ diso̠m reaḱ jo̠to̠ Skul-College ko jhićena. Calaoen dinko lekage mit́ mit́  Skul-College ko jhićente nindara leka kelas ko hõ ehoṕena.

Darakan 20 July khon goṭa disomre daḱ reaḱ cap se ucạṭ ḍheroḱa mente hoe -daḱ bichnạu ạpis (abohaoa adhidopotor) -e lại lahakeda. Teheń Sạnicar (16 July) abohaoa adidaptor ren meteorologist (abohaoabid) Md.Omar Faruq noa khobore baḍae ocokeda.

Uni doe menkeda, nit adom adom ṭhạ̃ikore ko̠m ńõḱe daḱet́ kana, menkhan bại bạite ḍher idiḱa. Ar daḱ ḍherlenkhan lo̠lo̠-setoṅ reaḱ ãc hõ ko̠mo̠ḱa. Ente calaoen dinkore ạḍige lo̠lo̠-setoṅ tahẽkana, teheń khon bại bạite thoṛa ko̠mo̠ḱa

Tangail, Sylhet, ar Chuadanga jilạ ko são Rangpur, Rajshahi bibhạgte thoṛa rawal machae lo̠lo̠- setoṅet́ kana. Nonkage ar thoṛa din calao idiḱa. Ar ńindạ hõ nonkage lo̠lo̠tet́ do bo̠no̠dol akange tahẽna.

Nẽs ren HSC pạṭhuạkoaḱ form purun reaḱ okto arhõ mit́ dhap ḍherakana. Nawate emakan somoysuci lekate 26 July dhạbić  form ko purun daṛeaḱa. Ar 27 July dhạbić fee/- ko em daṛeaḱa.

Calaoen Lukhibar (14 July) Dhaka sikhnạt board ren bidạu ńel jujutić S M Amirul Islam aḱ suhiạt ạpis reaḱ batlao lekate noa khobor baḍae ńam akana.

Nẽs ren HSC pạṭhuạkoaḱ biḍạu do 22 August ehoṕ daṛeaḱa mente sarkare niṭ akada. Menkhan SSC biḍạu ạuri hoyoḱte niṭ akan oktere biḍạu hoyoḱa se baṅ nit hõ pusṭạute baṅ menogoḱ kana. Ente niạkin bidạu talare ko̠m se ko̠m bar cando leka jirạu reaḱ okto dohoe jạruṛ kana.

Ponchogor Atwari upjilạ reaḱ mitṭen ghoṭna. Noa ghoṭna do ạḍi bhabna reaḱ kangea. Ente Somapti Hasda ńutuman Pe̠ cando ren mit́ṭen huḍiń gidrạ ać babawaḱ hoṛmo ten tey goćena. Aṭhwar hiloḱ (10 July) upjilạ reaḱ Bolorampur union reaḱ Dohsur 1 no ward re ạdivạsi santal atore noa ghoṭna ghoṭao akana. Uni gidrạren babawaḱ ńutum do Suniram Hasda.

Atwari thana ren Sub Inspector (SI) Sahin Al Mamun doe baḍae ocokeda je, Enhiloḱ ńindạ uni gidrạren eṅgat do pạṭiạ aṭet́ kate gidrạ são latare gitićena. Mit́ jokhen gidrạren baba Suniram hećkate gitićente jạpit́ akat́ okte ackage gidrạ cetanre ńurhạyena. Khange uni huḍiń gidrạ doe ten goćena. Baḍae ńamena baṅma, Suniram do ńu bul akane tahẽkana.

Atwari thana ren bharapon ạpiser (OC) doe baḍae ocokeda, uni gidrạwaḱ gujuḱ re gharońj seć khon jahan nạlis (ovijog) do bạnuḱanaṅ. Onate noa ghoṭna Babot thanare mit́ṭen opomritur (UD) mamla do em akana.

Source: banglanews24.com

Tehen do Sombar (11 July). Ar teheń mit́ṭen bises mãhã kana. Metaḱme Goṭa Dhạrti Mạnmi Soṅkha Mãhã kana. 1990 serma reaḱ teneh́aḱ din 11 July re are ge̠l (90) goṭen disomre pạhil mạnmi soṅkha Mãhãko manaoket́a. Ado un khonaḱge goṭa disomre Mạnmi soṅkha Mãhãko manao ạguiet́ kana.

Baṅgladisomre Gel sermare moṭre bar karoṛ hoṛ se mạnmiko ḍherakana. Jạtikoren baba Boṅgo bondhu Sheikh Mujibur Rahman aḱ jạhĩt se kurumuṭute 1974 sermare pạhil hoṛ lekha do hoelena. Un okte disomre hoṛkoaḱ soṅkha tahẽkana 7 karoṛ 15 lakh. Inạkate 1981 sermare tahẽkan hoṛkoaḱ soṅkha 8 karoṛ 99 lakh, ar 1991 sermare do 11 karoṛ 15 lakh, onka leka 2001 sermare hõ lekha lekate hoṛkoaḱ soṅkha tahẽkana 13 karoṛ 5 lakh. Ar 2011 sermare lekha lekate, noa dismre 14 karoṛ 98 lakh. Enrehõ hoṛkoaḱ soṅkha do lekha baher metaḱme noa khon hõ ḍherge menaḱ baṛakoa.

Ńelkeda bon je, sạrige disomre bại baite hoṛkoaḱ soṅkha tinạḱgan ḍher  akana mente. Menkhan enrehõ korona mahamạri khạtirte niṭ akan oktere bar serma tayom calaoen 15 June khonaḱ disomren hoṛ lekha ehoṕena. Ado digital niạmte hoyoḱkante niạ dhao do ạḍi algate nebetar jugren hoṛkoaḱ soṅkha baḍae ńamoḱa. Ar pusṭạuḱabon se sanamko bon baḍae ńama nit tinạḱgan hoṛ noa disomre menaḱbona mente.

Disomre ko̠ro̠na rog do arhõ bại bạite ḍher sećge mohnḍa akana. Ente ko̠ro̠na rogte jạbun akan hoṛkoaḱ gujuḱ soṅkha hõ din dinte ḍheroḱ kana. Menkhan noako dinre sikhnạt ṭhaõnako bond dohoe lạgit́ jahan hudis-cintạ bạnuḱanaṅ mente sikhnạt Montri Dipu Moni doe baḍae ocokeda. Arhõe menkeda je, Disomre korona ṭikạko calao idiḱkana. Nit dhạbićte aema hoṛge booster doge ko hatao akat́a. Menkhan korona rog do arhõ ḍher akana. Baḍaekaḱabon je, sanamko arhõ mask horoḱ lạgit́bo nehõr oco akana. Onkaleka sikhnạt ṭhãonakore hõ mask horoḱ se beohar lạgit́te lại saḍeakana.

Noa lahare Sastho Montri Zahed Malek-e baḍae ocoakada, 12 khon cetan umeran ḍher pạṭhuạ gidrạko ko̠ro̠na ṭikạko hatao akada. Enḍekhan  nit 12 khon latar umeren pạṭhuạ gidrạko hõ ṭikạ tabere ạguko lạgit́te hudis cintạ calaḱ kana. Noa umerren gidrạko ṭikạ tabereko hećlen khan sikhnạt ṭhãonako ardo baṅ bondoḱa. Enrehõ ko̠ro̠na rog ạḍige chạplạulen khan tayomte sikhnạt ṭhãonako reaḱ bebostha hataowaḱa.

Eken pạṭhuạ gidrạko do baṅ sanamko sontor tahẽn jạruṛkantabona. Onate dela sanamko maskbon beohara ar sanam lekan ạnkobon manao-ganaoma. Enḍekhan niropon hoṛmo tahãenre jahan muskil baṅ hoyoḱtabona honaṅ.