Primary School Re Mahasoe Hataoko Reaḱ Jo 1-15 November Bhitrite Sodoroḱa

Darakan 1-15 November bhitrite Sarkari Primary School re Mahasoe hataoko reaḱ hudis-bhabna menaḱa mente Prathomik Sikha Odidaptor ren Maraṅ ạḱyuriće lại sodor akada. Cedaḱje nit dhạbićte Mahasoe haotaoko reaḱ joto lekan bidạuko hatao purạu akana mente Prathomik ar Gonosikha Montronaloy ren socib Aminul Islam-e baḍae ocokeda. Aṭhawar hiloḱ (30 October) tikin ber songsilisto montronaloy reaḱ mit́ dupuṛuṕre senior socib noa kathakoe lạikeda.

Un okte Prathomik ar Gonosikha Protimontri Md:Jakir Hossen selet́ Montronaloy ar Daptar ren kạmiạko/ạpiser seṭerko tahẽkana. November talate Mahasoeko hatao reaḱ jo/result sodoroḱa. Noa lahare jo sodoroḱ reaḱ kathako tahẽkanre hõ jahan karonaḱte baṅ sodor akana. Menkhan ar bilom baṅkate, darakan 1-15 November bhitritege jo do sodoroḱa.

Ar Pạri Pạrite Baṅkate Primary Skul Reaḱ Kelas Mit́ Shift-tege Hoyoḱa

Disom reaḱ joto Sarkari Primary sikhnạt ṭhãonakore mit́ shift-tege kelas hoyoḱa mente Prathomik ar gonosikha socib Md:Aminul Islam Khan-e lại sodorkeda. Ar noa niạm se ạri do darakan serma reaḱ January cando khonaḱge ehoṕa.

Teheń Robibar (30 October) mit́ dupuṛuṕ talate noae baḍae ocokeda. Goṭa disomre Skulkore kelas do inạ mit́ okterege ehoṕ ar mucạt́ reaḱ kurumuṭu calaḱ kana. Arhõe menkeda je, Menkhan kelas oṛaḱ, pạṭhuạ gidrạko ar mahasoekoaḱ soṅkha hudis ganḍon katećge noa mit́ shift-tege kelas do ehoboḱa.

Dhamoirhatre Adivasikoaḱ Ạidạri Ar dạbiko Babotre Gapalmarao Akhṛa

Naogaon jilạ reaḱ Dhamoirhat re adivasikoaḱ mạnmi ạidạri ar dạbiko babotte bhoṭre bachao ńamakan ạḱyuriạ são mit́ dupuruṕ hoyena. Sombar (25 October) tikin ber 11:00 baja okte Besarkari Unnoyon Songstha Dascoh Foundation goṭa lekate ar Heks/Eper Swizerland aḱ goṛo gopoṛote adivasikoaḱ ạidari hameṭ se ńam babotre 1 no Dhamoirhat union porisod re noa gapalmarao akhṛa hoe purạuena.

Gapalmarore adivasi ar tayom akan jạtigosthiren hoṛko akoaḱ hike-hok ạidạri ńam babot pusṭaute roṛ sodorkeda Dascoh Foundation ren upajila kormokorta Raunak Laila. Un jokhen akhṛare arhõ mit́ bar kathako roṛkeda Panel Chairman Abu Naser Al Azadi, Up sodosso Sazedul Rahman, Azizul Hoqe, Anowar Hossen, Jaibor Hossen, Maejiu member Sahara Banu, Rebeka Parvin, Up socib Bodiul Alom, Foundation ren CDO Rasel ar Rehana Aktar.

Ona sãote adivasiko modre akhṛare katha roṛ reaḱ ạtkin ńamkeda Asalota Baskey ar Gouri Rani Mali. Ado nukin hõ adivasi ko jemon akoaḱ ạidạriko hameṭ daṛeaḱ noako cetanre pusṭautekin roṛ saḍekeda.

Utarbongo Adivasi Forum Rajshahi Jilạre Nãwã Committee Bandhao

Calaoen Sokol hiloḱ (21 October) Tanor reaḱ Mundumala pourosova sonmelon oṛaḱre Utarbongo Adivasi Forum aḱ mit́ dupuṛuṕ hoe purạuena. Ona dupuṛuṕre committee ko bandaket́koa. Onka leka Rajen Hembrom do convener (ahobayok) ar Sonaton Tudu ar Ovilash Paharia do jugmo ahobayok hisạbte goṭa ocoyena. Inạ chaḍa hõ bar gel (20) sodosso koante Utarbongo Adivasi ren ahobayok committee ko bandhaoena. Noko committee koaḱ ńutume lại jạhirkeda Utarbongo Adivasi Forum ren central committee ren sabha mukhiạ Hingu Murmu. Noa dupuṛuṕre Tanor jila, Godagari, Poba, Durgapur, Puthia upajila khon amdaj sae cetan adivasi hoṛko selet́lena.

Ahobayok committee ren eṭaḱ sodosso menteko goṭayena Rumali Murmu, Bisal Soren, Sukumar Kisku, Pius Hembrom, Nirmol Tudu, Biswajit Robidas, Stephen Soren, Josen Murmu, Jamin Hasda, Martin Mardi, Dilip Murmu, Rajen Hasda, Silpi Soren ar Sontosh Soren.

Utarbongo Adivasi Forum ren sadharon sompadok Adv.Probhat Tudu baḍae ocokeda, Utarbongo Adivasi Forum do 2012 serma khon Baṅgladisom ren adivasi ko são eṭaḱ joto jạti-gosṭhiko lạgit́te rasṭro re ạidạri bạisạu ar bańcao lạgit́te ḍabiko, mạnmi ạidạri rukhiạ adivasi/sonkhaloghu unnoyon songstha ar songothon são miljul se goṛo gopoṛote kạmi kana. Nebetar adivasi ko cetanre calaḱ kan, neṅghao, konac, jumi eḱṛe nonkanaḱ babotre galmaraokeda. Jemon adivasiko akoaḱ hike-hok lekateko laha daṛeaḱ.

Noa dupuṛuṕ re mit́ bar katha ko roṛkeda, Mundumala ren adivasi ạyurić Ronjona Bormon, santal onoliạ Gabriel Hasda, Tanor thana pargana Jetha Tudu selet́ atoren mańjhiko hõ.

Moṅgol Hiloḱ Jalapuri Ḍhipreye Hạn Daṛeaḱa Birbão “Sitrang”

Birbão Sitrang do̠ sạkti ar daṛeante hijugoḱ kana. Andaman doreão re hoelen birbão reaḱ sạkti ḍherente lạṭkić/nimnocap re heć paṛao akana. Ar ona reaṅ lạṭkićtege jalapuri Boṅgoposagor re seṭerkate sạkti do̠ ḍheroḱ ehoṕ akana.

Ona iạte Sombar (24 October) ghurni se birbão Sitrang re pherao daṛeaḱa. Khan Moṅgol hiloḱ (25 October) arhõ ghurni hoe re pheraoḱa mente hoe –daḱ (abohaoa) ạpis ko lại so̠do̠r akada. Menkhan oka nakhae hạna, nit hõ baṅ baḍae akana.

Bạrtikaete Pạchimboṅgo reaḱ aḍepase kore “Sitrang” do̠e hạn daṛeaḱa. Baṅgladisomre hõe hạn daṛeaḱa. Onate Baṅgladisom hõ sontor akan menaea. Moṅgol hiloḱ bhitritege birbão hoe do pạchimboṅgo-Baṅgladisom ḍhipe tioga. Ado noa ghurni se birbão hoe reaḱ to̠ṛtet́ do̠ ghonṭa re 110 kilomeṭer tahẽ daṛeaḱa.

Goṭa Disomre Shekh Rasel Aḱ 59 Serma Janam Mãhã Ko Manoteda

Teheń Moṅgolbar (18 October) Baṅgladisomren kạrigol, jatiạrikoren baba Boṅgobondhu Shekh Mujibur Rahman ren shader hopon Shekh Rasel aḱ 59 serma janam mãhã. 1964 serma reaḱ teheńaḱ dinre Shekh Rasel do Dhanmondi reaḱ Boṅgobondhu Bhobon re janamlena.

Montriporisod aḱ goṭa lekate, calaoen serma khon Shekh Rasel aḱ janam mãhã do “Shekh Rasel Mãhã” mente manao hijuḱ kana. Onka leka uniaḱ janam mãhã disạ ńutumte aema lekan akhṛa talate teheńaḱ dinko manotet́ kana.

1975 serma reaḱ 15 August Shekh Rasel do ulbuliạ bạṛić hoṛko khon rukhiạ bae ńamleda. Enhiloḱge uni huḍiń gidrạ hõ onko miliṭạrikoaḱ gulite goć ocolena. 1975 serma reaḱ 15 August ńindạ becariạ uni huḍiń gidrạ ar ać ghrońjrenko ạḍi haron ar harkhet́ saset́ kateć ko goć ocolena. Ar teheń uni huḍiń gidrạ disại salaḱ goṭa disomren hoṛko uniaḱ janam mãhã ko manotet́ kana.

Dinajpur Reaḱ Ghoraghat re Ạdivạsi Kuṛi Konac (Dhorson) Khạtirte Mit́ Hoṛe Griptarena

Calaoen Budhbar (12) October reaḱ mit́ṭen ghoṭna. Ghoraghat reaḱ Andiarpar Guchogram ṭoṭharen mit́ṭen ạdivạsi kuṛi do Baṅgladisomren nagorik se voṭar hoyoḱ lạgit́te chobi tulạua mente Palsha union porisod teye senoḱkan tahẽkana.

Ado Ghoraghat upạjilạ belwa Choighati atoren Aizar Ali ren koṛa Nur Islam Uzzal Mia (26) onḍe ḍahar aṛere tahẽkana. Khange uni koṛa ar aćren são gate do uni kuṛi são bebạṛićkin beoharkeda. Metaḱme unkin do uni kuṛi jor jobosti katekin dhorsonkedea. Inạkate uni kuṛi do oṛaḱe ruạṛen khan joto ghoṭna eṅgatet́e baḍae ocokedea. Khan sthanio up sodosso police ko baḍae ocoket́koa.

Inạ tayom police hećkate aćaḱ oṛaḱ khonge uni koṛako giripter idikedea. Uzzal são tahẽkan koṛa hõ giripter lạgit́ kurumuṭu calaḱkana mente thana officer incharge (Oc) Abu Hasan Kobir-e lại sodor akada.

HSC Bidạu Reaḱ Nawa Routine So̠do̠rena

Nes bo̠cho̠r reaḱ HSC (Higher Secondary School Certificate) bidạu reaḱ nawate sudhrạu akan routine so̠do̠rena. Dhaka madhomik ar ucchomadhomik sikhnạt board khon so̠do̠ren Nawa routine lekate darakan cando November 6 tạriḱ dọ bidạu eho̠bo̠ḱa. Ar onka leka 13 December dhạbić calao idiḱa.

Niạ dhao jo̠to̠ bisoe cetanre bar ghonṭa talate bidạu hoe purạuḱa. Seteḱ 11 baja khon ehoṕ kate tikin 1:00 baja dhạbić, ar tikin ber 2:00 baja khon ehoṕkate 4:00 baja do̠ mucạdoḱa. Bidạu eho̠bo̠ḱ 30 miniṭ lahare bidạu oṛaḱte bo̠lo̠ḱ hoyoḱa.

5-11 Umer Ren Gidrạ Covid-19 Ṭikạ Ko Ńamkeda

Teheń khonaḱ goṭa disomre mõṛẽ (5) khon gel mit́ (11) umerren gidrạko talare covid-19 ṭikạ emoḱ kạmihora ehoṕ akana. Onka leka Teheń Moṅgolbar (11 October) Chapainawabgonj jilạ reaḱ Amnura Mission reaḱ Tabitha Kindergarten School re gidrạko covid-19 ṭikạko emat́koa.

Tabitha Kindergarten School ren do eyae gel (70) goṭen gidrạ noa covid-19 ṭikạko ńamkeda. Ar inạ chaḍakate hõ aḍepase School Amnura Mission Primary School, Brac School khon ạḍi utạr gidrạ covid-19 ṭikạ hataojoṅ lạgit́ko hećlena. Onka leka noa Pea school ren moṭre amdaj bar sae (200) gidrạko ṭikạko hataokeda.

Ar ạḍi rạskạ salaḱ huḍiń huḍiń gidrạko ṭikạko hataojoṅana. Ṭikạ emoḱko do napaete gidrạko talare ṭikạko em hạṭińat́koa. Covid-19 ṭikạ em hạṭiń kạmihora napaete hoyena.

Bangladisomren Kạrigol Boṅgobondhu Sheikh Mujibur Rahman Cetanre (Composition) Rochona O̠lo̠ḱ Haparaore Tesar Ṭhạ̃ie Hameṭkeda Santal Gidrạ Linkon Soren

Gidrạkoaḱ ạidạri babotre aodhanoḱ lạgit́te goṭa dhạrtire mimit́ din gidrạ mãhã menteko manaoeda. Baṅgladisomre 17 march jạtiạri baba Boṅgobondhu Sheikh Mujibur Rahmanaḱ janam din. Jatio lekate enhiloḱ ona dinrege gidrạkoaḱ mãhã menteko manaoeda. Menkhan goṭa dhạrtire gidrạkoaḱ mãhã mente do̠ October cando reaḱ pạhil somber ko manaoet́ kana. Onka leka Sombar (03 October) Baṅgladisom hõ gidrạkoaḱ mãhã menteko manotkeda.

Niạ dhao onkage Jila prosason ar Bangladesh Sishu Academy Rajshahi aḱ bo̠ndo̠boste Bisso sishu dibos ar sishu odhikar hapta -2022 ńutumte hoe purạuena “Rochona” o̠lo̠ḱ haparao. Noa haparaore selet́lena Godagari upajila, Rajshahi jila reaḱ Dogachi Manḍer ren mit́ huḍiń gidrạ Linkon Soren. Eṅgat ńutum do̠ Kiron Mardi ar baba Mn. Stephen Soren (NAGR, Director). Ado̠ ona o̠lo̠ḱ haparaore ạḍi utạr gidrạko selet́lena. Ar onko modre Linkon Soren do̠ aćaḱ bud akelte mońj o̠lo̠ḱte tesar aḱ ṭhạ̃i-e hameṭjoṅana. Unạḱ gidrạ tala khonaḱe bachao ocoyen do bhạg reaḱ katha kana. Ona ńutumte Bisso Sishu Dibos Ar Sishu Odhikar hapta-2022 khonaḱ siropa hisạbte certificate-e ńamkeda.

Nonkage aema lekan haparaoko do̠ menaḱa. Ado̠ santal boeha miserakoń cehaoet́bon kana, nonkan haparaore selet́do̠ḱ lạgit́ abokoren gidrạko jemon bon udgạuko. Ar monre keṭeć as pạtiạu do̠ho kate jemon gidrạko laha daṛeaḱ. Ente nãhãḱ jugren gidrạkoge darakan dinren hạtiạr kanako. Ado̠ noko hatiạr napaete benao rakaṕre jaoge jhũḱ ar kurumuṭure do̠hoko hoyoḱa. Enḍekhan o̠lo̠ḱ paṛhao sećte mońko hara rakaboḱa.