Goṭa Disomre Arhõ Rabaṅ Ḍheroḱa

Goṭa disomre arhõ rabaṅ ḍheroḱa mente abohaoa odhidaptar ko baḍae ocoyet́ kana. Teheń goṭa din bhor rabaṅ hoe do aṭkaroḱ kana.

Onka leka abohaoa odhidaptar-e menet́ kana, Foridpur, Madaripur, Kishargonj, Dinajpur, Nilphamari, Phoncogor, Kustia, Satkhira, ar Borisal, jilạ selet́ Rajshahi jilạ cetante ạḍi hisit hisit reaṛge hoet́ kana. Ona iạte teheń tala ńindạ khon setaḱ aṅga marsaloḱte kuṛhạ do heć daṛeaḱte adom adom ṭoṭhare do noa kuṛhạ ńut tikin tarasiń dhạbić hõ tahẽ botećkoḱa.

Goṭa Disomre Rabaṅ Ḍher Akana

Calaoen bar din laha khonaḱ goṭa disomre ạḍi kajak rabaṅ do aṭkaroḱ kana. Ar kuṛhạ khạtirte setaḱ tora sin cando hõ bae ńel ńamoḱ kana. Ente ona dạriạ kuṛhạ ńutte siń cando do danaṅge tahẽn kana. Khan siń cando ạḍi bilom ńoḱte rakaboḱ kana. Adom adom ṭoṭhako ren hoṛ do siń cando aḱ marsalge bako ńel ńameda.

Onate ḍahar aṛe ato gharońjkore reaṛ-rabaṅ khonaḱ bańcaoḱ se thoṛagan urgumoḱ lạgit́te seṅgel jol kateć hoṛko jorogoḱ kana. Nonkan dosare hoe-daḱ bichnạu officer ko (Abohaobid) menet́ kana Sạnicar (07 January) khon thoṛagan rehõ noa abohaoa do bodoloḱa menteko baḍae ocoyet́ kana. Enrehõ bodol utạroḱa ona do baṅa mit́ bar din tayom arhõ nonkage reaṛ rabaṅ se kuṛhạ hoe daṛeaḱa. Niạko dinre sanam hoṛko ạḍi muskil dosare menaḱkoa. Bạṛtikate reṅgeć nacar hoṛko, okoe do horoḱ lạgit́ lolo kićrić bạnuḱtako nonkan hoṛko ạḍi haron kosṭo talate akoaḱ jion jingi ko khemaoet́ kana. Inạkate hõ kạmi kạsni hoṛko, okoe do mit́ jaega khon ar mit́ jaega calaḱ hoyoḱkantako onkan ko hoṛ hõ niạko rabaṅ dinre ạḍi haron sahao hoyoḱ kantakoa.

Bạṛtikaete haṛam-buḍhi hoṛko okoe do umerteko laha akan ar kạṭić gidrạko lạgit́ hõ noa rabaṅ din do ạḍi muskilanaḱ kangea. Cedaḱje haṛam-buḍhi hoṛ ar gidrạko setaḱ re rabaṅ khạtir bahre baṅko oḍoḱ daṛeak kana. Niạko rabaṅ dinre sanam gogo babawaḱ jạruṛ kana aboren gidrạko napaete tạṅkhiko. Eken gidrạ moto do baṅ joto umer ren ko lạgit́ge noa rabaṅ do botoranaḱ kana. Ente noa rabaṅ mit́ dhao hoṛmore bololen re muskil dosare paṛaoḱ hoyoḱtabona. Metaḱme aema lekan ruạ hasorebon jạbun daṛeaḱa. Ar ona khon baṅcaoḱ reaḱ jahan horge babon ńama honaṅ. Onate delabon noa reaṛ rabaṅ dinre sanam ko ạḍi sontor rebon tahena. Jemon noa reaṛ-rabaṅ aloe kạbu bon ma. Ar nonkate noa rabaṅ dinre sanamko mońj bon tahen bon kurumuṭui ma. Sanamkoaḱ jạruṛ kana aboaḱ apnaraḱ hoṛmo apnaraḱ gharońjren hoṛko rạkhi jogaoko do aboaḱge dạyik kana.

Nawa Puthi Em Hạṭiń 2023

Koyoḱ hor koyoḱ horte 2022 serma do parom calao akana. Onka leka Aṭhwar hiloḱ khonaḱ 2023 serma hõ paṛao akana. 2023 serma reaḱ pạhilaḱ din metaḱme (01.01.2023) re Tabitha Kinder Garten School re gidrạ ko nawa puthi ko ńamkeda.

Mahasoe ko do pạṭhuạ gidrạko talare puthi ko em hạṭińat́koa. Pạṭhuạ Gidrạko ạḍi rạska monante nawa puthi ko ataṅkeda. Cedaḱ je gidrạko mit́ kelas khon ar mit́ kelas metaḱme cetan kelas ko rakaṕena. Noa do sạrige gidrạko selet́ sanam ko ṭhen rạskạwanaḱ sombat kana. Nonkate gidrạko bại bạite hara rakaṕ são sãote oloḱ paṛhao sećte hõko hara buruḱ kana. Nawa puthi ńamkate gidrạko rạskạteko heseć sekrećena. Ar onko talare oloḱ paṛhaoḱ lạgit́ udgạu mon do sirjạuentakoa.

Mahasoe ko menet́ kana, As menaḱa cet́leka calao paromen goṭa serma mońj oloḱ paṛhaoen khạtir cetan kelas ko rakaṕena onkage niạ goṭa serma hõ sanam pạṭhuạ gidrạko napaeko tahẽnte mońj ar jhũk monte oloḱ paṛhaoko cet́joṅa.

Goṭa Disomre Ko̠ro̠na Reaḱ Ponaḱ Doge Emoḱ Ehoṕena

Baḍaeabon je ko̠ro̠na rog do mit́ okte bogete noa goṭa disomre chạplạulena.Menkhan nindara do noa rog do ḍher khon ạḍige kom akana. Enrehõ noa rog birudre teṅgo daram se rukhiạ ńam lạgit́ ko̠ro̠na ṭikạ do benao akana. Onka leka sanamko apan ạpin noa ṭikạ bon hataojoṅ kana. Jemon noa rog khon rukhiạbon ńam daṛeaḱ.

Onkage teheń khonaḱ goṭa disomre ko̠ro̠na rog reaḱ ponaḱ doge emoḱ ehoṕ akana. Setaḱ (20 Ḍecember) 9:00 baja okte Sastho odhidaptor ren maraṅ ạḱyurić professor Ahmedul Kabir do Kurmitola General Hospital re noa ponaḱ doge emoḱ doe uḍhạukeda. Ar ona uḍhạu talate goṭa disomre ṭikạ emoḱ ko ehoṕ akana. Menkhan joto umer ren hoṛko noa ṭikạ do bako ńama. Bạṛtikaete okoe koaḱ umer do turui gel (60) khon cetan umer nonkan ko hoṛge noa ṭikạ ko hatao daṛeaḱa se ko ńama.

Santal Musicians Association Of Bangladesh (SMAB) Ren Nawa Komiṭi Ko Bandhaoena

Santal Musicians Association Of Bangladesh (SMAB) do Santal Musicians lekate goṭa disomre mit́ṭen legcar songothon kana.Noa do mit́ṭen nirạite bin rajari (orajnitik) songothon kana. Bạṛtikatete Baṅgladisom reaḱ aema ṭoṭhare menaḱko santal gaenaho ko do akoaḱ legcar rạkhi jogao ar sarsadle lạgit́teko kạmi kana.

Onkage noa SMAB reaḱ asol motlod do kana nokan santal santal gaenaha dolko maraṅ hor se ạt benaoako. Niạko dinre SMAB do Pạhil jạtiạri Santali sereń durạṅ akhṛa talate SAMB reaḱ motlod se jostet́ lekae kạmi idikana. Noa horage maraṅte hoṛko samaṅre ṭikạu dohoe lạgit́ ar noa reaḱ kạmiko napaete hoe ocoe lạgit́ John Hembrom do SAMB ren sabha mukhiạ ar Nishir Kajol Soren do sadharon sompadok dohokate moṭre gel eyae (17) goṭen komiṭi ko bandhao ocoyena.

Noa babotre São goṛo ić Mamun Hembrom-e lại sodorkeda, SAMB oka kukmu ar as kateć benao akan, nindara ṭhik onkage kạmi idiạ mente asoḱ kana. Menkhan Jạtiạri Santali sereń durạń akhṛa do mit́ṭen jhãp se challenge lekale moneaḱ kana. Arhõ as iń dohoet́ kana noa Santali sereńre SMAB maraṅ dạyike dohoea. Nawate bachao akan Jugmo sadharon sompadok Agostin Murmu doe menet́ kana, Nawate bachao oco akan ar tinạḱ menaḱko sanamko bandhao ńutumte manotan Upodesta sodoss ko johariń emako kana. Nit noko menaḱ ko nawa ko bin baḍae aema cecet́ak ko baḍaea arko cet́joṅa. Niạ lahare cabinet re porcar sompadok hudạre dạyikiń tahẽkana ar nit do jugmo sadharon sompadok hudạre bachao ocoyente ạḍigeń rạskạḱ kana. Jaogeń kurumuṭua noa SMAB talate santal sereń durạṅ ko ante kạmi idi. Nawate bachaoen komiṭikoaḱ mead do pe (3) serma lạgit́.

NAGR Hotete Ạyuroḱkan Sanam School Re Jit Mãhã Ko Manotkeda

Sokolbar (16 Ḍecember) National Agency For Green Revolution (NAGR) hotete ạḱyuroḱkan sanam school re Baṅgladisom reaḱ 51 serma Jit se Phurgạl mãhãko manotkeda. NAGR tabere menaḱ School ko do hoyoḱ kana, Tabitha Kindergarten School, Amnura Mission Primary School, Badhair Mission Primary School, Jhinafulbari Primary School, Borgachi Pre-Primary School, Colknaka Mission Primary School, Bilboltha Adivasi Primary School, Simla Pre- Primary School.

Jit mãhã ńutumte School maṭhre pạhilte Baṅgladisom reaḱ jạtiạri sereń durạṅ talate manot selet́ jaḥnḍiko tul rakaṕkeda. Inạkate jit mãhã reaḱ asol kạhni babotre Galmarao, eneć-khiloḍ haparao, rạskạjoṅ lạgit́ sereń eneć se onorhẽko lại saḍe reaḱ bondoboslena. Noa jit mãhã manot akhṛare manotan peṛa lekate seṭere tahẽkana Amnura Jhilim union reaḱ 1,2,3 ward ren maejiu member Mrs:Zohra Begum. Mahasoe ko do Pạṭhuạ gidrạko talare jit akan din reaḱ katha ko lại haṭińat́koa. Noa disom cet́lekate sanam jạtiko mit́te lạṛhạikate ko sạdhinkeda noa babotreko lạiạt́koa.

1971 sermare Baṅgladisomren kạrigol Boṅgo Bondhu aḱ hohote tinạḱgan hoṛ lạṛhạireko ńir khadlelena. Ar mucạt́ dhạbićte jiwi alaekatet́ rehõ noa disom ko sạdhinkeda. Noa lại hạṭiń reaḱ karontet́ do kana jemon noa babotre gidrạko baḍae daṛeaḱ ar onka leka disom ko dulạṛte disom lahantireko kạmi daṛeaḱ. Ạḍi kusi rạskạ salaḱ jit akan din se mãhã ko manotkeda. Akhṛa mucạtre eneć khiloḍre jitạu akan gidrạko kuṛạiko emat́koa. Napaete Jit Mãhã ko manot keda.

Primary School Re Mahasoe Hataoko Reaḱ Jo Sodorena

Baḍaeabon je, calaoen 2020 sermare Sarkari Primary School re Mahasoe hatao ko reaḱ ḍhạrwạḱ sodorlena. Ar onka leka mahasoe hatao reaḱ joto lekan biḍạu ar kạmihora do hoe purạu akan tahẽkana.Menkhan unạḱ din tayom Teheń Budhbar (14 Ḍecember) Disom reaḱ Sarkari Primary School re Mahasoe hataoko reaḱ jo sodorena. Niạ dhao do pe gel eae (37) hajar mõṛẽ sae eae gel pon (574) goṭen hoṛko mahasoe hudạko ńamkeda.Mahasoe hudạre bachao oco akan ko do mobile re sms talatege akoaḱ biḍạu reaḱ jo ko ńam daṛeaḱa. Inạ chaḍa hõ Prathomik ar Gonosikha Montronaloy reaḱ website (www.mopme.gov.bd) ar Prathomik Sikha Odhidaptor reaḱ website (www.dpe.gov.bd) re jo do sodorakana.

Bachao oco akan ko do 31 Ḍecember bhitrite akoaḱ joto sikhnạt certificate reaḱ asolaḱ kopi , NID card reaḱ phoṭo kopi pe goṭen, police verification form, sivil surgeon aḱ medical fitness certificate ko soṅge kateć jila Prathomik Sikha Office te senoḱ hoyoḱtakoa.

Teheń Do Budan Ko Dipisạ Mãha

Teheń Budhbar (14 Ḍecember) Baṅgladisomren Budan ko dipisạ mãhã kana. Maraṅ lạṛhại re harjit dhorage menaḱa baḍaekate Pạkistani bahini do baṅgali jạtiko modre bujhantar hoṛko maraoko lạgit́te ạḍi bạṛić ko hudis ganḍonena. Onko do noa disomren gateko soṅge kateć, mahasoe, biggani, onoliạ, khoboriạ, kạrigol, ḍaktar, ukil ar sarkari kạmiạ/ạpiser selet́ ạḍi aema hoṛko goćket́koa.Bạṛtikaete teheńaḱ din metaḱme 14 Ḍecember do arhõ jạstige hoṛko santao arko goćlet́koa.

Disom phurgạl tayom Rajdhạni reaḱ Rayerbazar Iṭkhola ar Mirpur reaḱ hasare ona sãote adom adom jaegare budan koaḱ mẽt́, ti-jạṅga tol bedhao akan goć mạ̃rị chirchạtur akan ko ńamakada. Teheń aḱ din disạ ruạṛ ar manot ńutumte jatiyạ lekate aema lekan kạmihora hatao akana. Ar onka leka noa dinko manoteda. Manotan Rasṭropạti Md:Abdul Hamid ar Maraṅ montri Sheikh Hasina do onko manot salaḱ setaḱ 7:05 baja re budan koaḱ pinḍre baha kin emkeda. Ona sãote onkoaḱ atma sulukre tahẽn lạgit́ hõkin koe keda. Ar ạkinaḱ kathatekin roṛ sodorkeda, tinre noa disom suluk nirại sona reaḱ disom benao rakaboḱa, unrege onkoaḱ jiwi alae do jitkạroḱa. Onate sanamko apan ạpin jaega khonaḱge Baṅgladisomren kạrigol jạtikoren babawaḱ sona reaḱ disom benao rakaṕ lạgit́kin nehõrat́koa.

Primary Reaḱ Briti Biḍạu Reaḱ Tạrik Bodolena

Primary Sikhnạt ṭhaõnaren mõṛẽ kelas ren gidrạkoaḱ Briti biḍạu reaḱ tạrik bodolena. Nawate niṭ akan khobor lekate, Darakan 30 Ḍecember noa biḍạu do hoyogoḱa. Cedaḱ je, Prathomik Sikha Odhidapter ren são goṛoić (General Administration) Mohammad Nazrul Islam Sombar (12 Ḍecember) noa khobor babotre sapha sạphi lại sodor akada. Arhõe baḍae ocokeda je, Darakan 29 Ḍecember noa briti biḍạu hoyoḱ reaḱ katha tahẽkana. Menkhan enhiloḱ adom adom jilạre do sthanio sarkar bachao reaḱ bhoṭ menaḱa. Ona iạtege biḍạu reaḱ tạriḱ do bodol hoyena.

Lahatenaḱ khobor lekate mimit́ sikhnạt ṭhãonaren 10% pạṭhuạ gidrạ noa biḍạureko selet́ dareaḱa. Menkhan nawanaḱ goṭawaḱ lekate mimit́ sikhnạt ṭhãona khonaḱ 20% pạṭhuạ gidrạ noa biḍạu emoḱ reko selet́ daṛeaḱa. Biḍạure seledoḱ lạgit́te fee hisạbte mõṛẽ gel (50) kateć kạuḍi emoḱ hoyoḱa. Enhiloḱ setaḱ 10:00 baja jokhen biḍạu ehoboḱa ar 12:00 baja do mucạdoḱa.Eken bar ghonṭa bhitrite biḍạu do hoe purạuḱa.

SSC Biḍạu Reaḱ Form Purun Ehoboḱ Kana 18 Ḍecember

Darakan bochor 2023 reaḱ Secondary School Certificate (SSC) biḍạu reaḱ form purun do ehoboḱ kana. Ar ona do niạ mạhnạ reaḱ 18 Ḍecember khonaḱ ehoṕkate 04 January dhạbić calao idiḱa. Onka leka Online hotete fee emoḱ reaḱ okto do 5 January hạbić. Menkhan thoṛa bilom ńõḱlen rehõ bilom reaḱ são Online hotete 10 January hạbić SSC biḍạu emoḱ pạṭhuạ ko do form ko purun daṛeaḱa. Aṭhwar hiloḱ (11 Ḍecember) Dhaka sikhnạt board ren biḍạu tạṅkhi ar ńel jujut́ić Professor Abul Basar aḱ suhiat́ ḍhạrwạḱ talate lại lahayena.

Registration Fee-

Biggan bibhạg ren pạṭhuạ kodo form purun lạgit́te bar hajar mit́ sae pongel (2140) ṭaka emoḱ hoyoḱtakoa. Onka leka Manobik ar Business/Commerce bibhạgre paṛhaoḱ kan pạṭhuạko hõ (2020) bar hajar bargel ṭaka kateć emoḱ hoyoḱtakoa.