Iran Tuluć lạṛhại Thir Hape Renaḱ Okteko Ḍherkeda

Markin President Donald Trump do̠ Iran tuluć lạṛhại thir hape reaḱe gho̠so̠nakeda. Menkhan uni do̠e menkeda, ghera se oborodh do̠ calao idiḱa.

Budbar (22 April) social meḍia re̠ mit́ bibo̠ro̠nte Trump do̠e menkeda, Iran sorkar do̠ ạḍi kajake laṅgayena, one oka do̠ ać bae aso̠ḱkan tahẽkan.

Arhõe baḍae ocokeda, Pakistan ren Field Marshal Asim Munir ar Prodhan Montri Shahbaz Sharif aḱ nehõ̠rte Iran cetanre hamla thir hape reaḱ ardas hoe akana, jemon ona diso̠mren neta ar ạyurićko miljulte mit́ṭen prostabko ạgu daṛeaḱ.

Noa babotre Trump do̠e me̠nkeda, Amerika ren sipạhiko do̠ Iran reaḱ bondor kore oborodh ar sãote sapṛao tahẽn lạgit́ nehõ̠r ar hukumko emkeda. Iran se̠ć khon prostab jo̠ma ar ạuri galmarao goṭae dhạbić lạṛhại thir hape reaḱ okteko ḍher idḱa mente Markin president Donald Trump do̠e baḍae ocokeda.

Dinajpur Reaḱ Birganj re Topa Ṭạnḍi ar Mundil Oṛak Raput́ ar Lo Rapaḱ ko Gereptar Reaḱ Dạbi Uttarbango Adivasi Forum Aḱ

Dinajpur reaḱ Birganj re ạdivạsikoaḱ topa ṭạnḍi dokhol ar oṛaḱ lo rapaḱket́ ghoṭona babotre Utarbongo Adivasi Forum do ạḍi bhabnae sodorkeda. Ńamakan khobor lekate baḍaeyoḱ kana, calaoen 19 April 2026, Aṭhwar hiloḱ bela 11:00 baja okte Palṭapur union reaḱ Sonka kristan atoren ạdivạsiko cetanre noa ghoṭona ghoṭaoena.

Noa ghoṭonare Pius Murmu ar Biswanath Soren ńutuman bar hoṛkin ghạl akana. Obhijog lekate, Ghoṛaband atoren Kader hopon Rezaul Karim ar Ajgor Shahaji ren hopon Azad ạḱ ạyurte 150/200 bhaṛaṭiạ sontrasi jumi dokhol ko hećena. Pạhilre dare maḱ reaḱko kurumuṭukeda, inạkate topa ṭạnḍi aṛere mundil oṛaḱko rạput́keda ar Murti kodo jonḍra khet reko giḍiket́koa.

Utarbongo Adivasi Forum ren Kendrio Komiṭi ren sabha mukhiạ Hingu Murmu ar sadharon sompadok Ad.Probhat Tudu mit́ bibo̠ro̠n rekin menkeda, jum hunḍạr koaḱ asol motlob do ạdivạsikoaḱ jumi ar sompot dokhol. Ạḍi din khonge ona jumi dokhol reaḱ kurumuṭu calaḱ kana. Menkhan ackage bhaṛaṭiạ sontrasiko hotete ạdivạsiko cetanreko hamlakeda.

Ona chaḍa arhõkin menkeda, “Adibạsi ko noa birudh ko teṅgoyenre sontrasikoaḱ hamlate bar hoṛ kajakkin ghạlena. Nit onḍenko ạdibạsi ạḍi muskil dosare menaḱkoa.” Utarbongo Adivasi Forum aḱ dạbi, noa ghoṭonaren asol asami Rezaul Karim ar Azad selet́ jopoṛao menaḱko sanamko usạra gereptar ar sạjại emako reaḱ.

Ghạl akanko cikit́sa ar khoti akanko khoti purun emako hoyoḱa. Ạdivạsikoaḱ topa ṭạnḍi ar dhorom ṭhạ̃i ṭhik dohoe hoyoḱa. Ạdivạsikoaḱ jion jingi sạbit dohoe hoyoḱa. Noa ghoṭona babotre tojbij ar bebostha hatao lạgit́ ar tayom daram dinre jemon nonkan ghoṭona ar baṅ hoyoḱ ona lạgit́te Utarbongo Adivasi Forum do prosason ṭhen nehõre dohokeda.

Ehoṕena SSC Biḍạu

Teheń Moṅgolbar (21 April) goṭa disomre mit́ dhaote setaḱ 10:00 baja khon Secondary School Certificate (SSC) bidạu ehoṕ akana. Biḍạu do baṅgla pạhil sakamte ehoṕena.

Nes bochor 11 goṭen sikhnạt board re moṭre 18 lakh 57 hajar 344 goṭen pạṭhuạ bidạureko selet́ akana. Onko modre 9 lakh 30 hajar 305 goṭen koṛa ar 9 lakh 27 hajar 39 goṭen kuṛi pạṭhuạko selet́ akana.

Biḍạu do teheń 21 April khon ehoṕkate darakan cando 20 May hạbić calao idiḱa. Ar onka leka Practical biḍạu hõ 7 jun khon ehoṕkate 14 jun hạbić calao idiḱa

Baṅgla Nãwã Serma 1433

Teheń do Baṅgla serma reaḱ pạhil din kana. Nãwã serma reaḱ mane do nãwã as, nãwã kukmu ar nãwã jion reaḱ taṛam ḍahar. Calaoen serma reaḱ joto lekan laṅga haron, duk-kosṭo bạgikate Baṅgali do teheń nãwã serma nãwã dinko ataṅ daramkeda.

Baṅgla nãwã serma do Baṅgali hoṛ ko lạgit́ maraṅ din kana. Baṅgladisom ren joto hoṛ hoponko lạgit́ge miduḱ reaḱ maraṅ din kana. Darakan din reaḱ aema lekan bhageaḱ kodo noa talare jopoṛao menaḱa.

Candoe rakaṕen são sãote aḍepase ṭoṭha ar disomre porob reaḱ roṅ pasnaoena. Araḱ-ponḍ roṅan kicrić horoḱ bande kate joto hoṛaḱ mẽt́ muṭhạnre baṅgla nãwã serma reaḱ rạskạ sodoroḱ kana. Hor ḍahar, park, ạri-cạli reaḱ jaegakore aema lekan mela hoyoḱ kana. Okare do ańjomoḱa ‘Eso he boisak’ sereń reaḱ rạṛ, arhõ okare do ḍhol, ḍhak reaḱ saḍe. Rajdhạni reaḱ Romna Boṭomul khon ehoṕ kate disom reaḱ goṭa ṭạnḍirege baṅgla nãwã serma reaḱ rạskạ bamberoḱ kana.

Baṅgla nãwã serma do eken mit́ṭen din do baṅ kana, noa do baṅgali koaḱ leg-acar, ạri-cạli reaḱ maraṅ cinhạ kana. Jạt, dhorom bạgikate joto hoṛ miduḱte nãwã serma reaḱ rạskạko hạṭiń joṅa. Aema jaegare aema lekate noa dinko manaoeda. Bạṛtikaete Baṅgaliko do nana hunạr mela, sobhajatra, eneć khilạḍ ar rạskạjoṅ akhṛako talate baṅgla nãwã sermako ataṅ darameda.

Sahe̱bgạnj Bagdafarm Jumi Ruạṛ Dạbi Michil re Santalku Dal Ucuakana

Gaibandha reaḱ Gobindạganj re Santal koaḱ laha kho̠n nenḍa akan kạmihõ̠ra re bepạṭi diku do̱ ackageku hamlakeda.

Noa ghoṭna re santalko talare ạḍi raṅgao ar bhabna ńel ńamok̕kana. Noa ghoṭna do̠ 12 april aṭwar siṅgi din setak̕ Dinajpur-Gobindạganj ḍạr reaḱ Bagda ṭoṭha re hoe akana. Sahebganj-Bagdafarm jumi bańcao komiti ren ạyurić Philemon Baskeye lại keda je, Casi jumi rukhiạ ạn lekate Bagdafarm ren Santal koaḱ jumi ruạṛ reaḱ dạbi babo̱d michil kạmihọra laha kho̠n nenḍa akan tahekana. Noa kạmiho̱ra do̠ siṅgi din oktere dinạjpur-gobindaganj ḍạr reaḱ Bagda ṭoṭha re calao idiḱ kan tahẽkana.

O̱na O̠kte̠ re̠ hasa ạkhrińko ḍạku mente̠ku baḍaeok̕kan Swapan Sheikh, Ataur Rahman Sabu ar Abdur Rouf do̠ michil kạmihọra re selet̕ akanko cetanre tayom kho̱n ko hamla keda. Noa re Shiuli Mardi, Shyamoli Hasda, Lucas Murmu sãote 7 hoṛ ko ghạl akana. Ạḍi gạhir te ghạl akan hoṛko do̠ haspatal re ko bhorti akat̕kua.

OC Muhammad Mozammel Haque do̠e meneda, noa kho̠bo̠r ńam tayo̱m o̱na jaega re̠ calao kate̠t́ po̱ristiti niyontro̱n huiakana. Nit do̠ sabhabik gea. Arho̱ bạṛti police ho̱rho̱ lagit̕le do̱ho̱akat̕kua. Noa ghoṭona reaḱ o̠laḱ ńam akana ar ona reaḱ kho̠bo̠r ńam tayom ạn lekate kạmi hoyoḱa. Ona chaḍa Philemon Baskey doe me̠nke̠da, Santal ko se̠ć khon jumi ạidạri komiti do̠ diku birudh re̠ case ko sapṛao akada.

Tanore re Ạdivạsiko Talare Merom Em Hạṭiń Akhṛa

Rajshahi reaḱ Tanore re basoḱkan ạdivạsi hoṛkoaḱ jion jingi lahanti lạgit́ Pranisompod Unnoyon Prokolpo do mit́ sae mõṛẽgel (150) goṭen maejiu ar baba hoṛ talare bin kạuḍite barea kate merome hạṭińat́koa. Calaoen Sokolbar (10 April) setaḱ 11:00 baja okte Upạjilạ Pranisompod Daptor ar Bheṭerinary Haspatal reaḱ bondoboste upạjilạ Parisompod samaṅre meromko em hạṭińat́koa.

Tanore Upạjilạ Pranisompod kormokorta Dr.Wazed Ali aḱ ạḱyurte sabhare maraṅ peṛa lekate seṭere tahẽkana MP ren Protinidhi Rajshahi jila Jamayat Amir Abdul Khalek. Bises peṛa lekate seṭere tahẽkana BMDA ren Assistant Engineer Naemul Islam, Tanore upạjilạ Porisod ren sạbik Vice Chairman Jamayat Abdur Rahim, Tanore upạjilạ Nayebe Amir Anisul Rahman, upạjilạ Vice Chairman Abdur Kadir.

Seṭere tahẽkana Tanore upạjilạ jamayat ren secretary DM Akkas Ali, Pranisompod kormokorta Dr.Sumon Mia, Mamunur Rashid. Inạ chaḍa hõ upạjilạ prosason reaḱ eṭaḱ eṭaḱ daptor ren kạmiạko ar protinidhiko seṭerko tahẽkana. Upạjilạ Pranisompod kormokorta Dr.Wazed Ali doe baḍae ocokeda, Noa upạjilạ reaḱ barea pourosobha ar 7 goṭen union khon bachao ńamkate 150 goṭen ạdivạsiko talare merom em hạṭiń hoyena.

SSC Biḍạu Ehoboḱa 21 April

Nes bochor 2026 reaḱ SSC biḍạu do darakan 21 April ehoboḱa mente sikhnạt board doe lại sodorkeda. Sodorakan SSC routine lekate biḍạu do 21 April khon ehoṕkate 20 May hạbić calao idiḱa. Ar onka leka Practical biḍạu hõ 7 jun khon ehoṕkate 14 jun hạbić calao idiḱa mente baḍae ńamakana. SSC biḍạu do Baṅgla pạhil paper khon ehoboḱa.

Arhõ baḍae ńamakana, SSC biḍạu do setaḱ 10:00 baja khonge ehoboḱa. Onate 30 miniṭ lahare biḍạu emoḱ kodo biḍạu cenṭer te seṭeroḱ hoyoḱa. Sanam pạṭhuạko ṭhen nehõr tahẽn kana nit khonge SSC biḍạure seledoḱ lạgit́ sapṛaoḱ tabonpe.

Disomre Juluḱ Sunum Reaḱ Ṭonṭa Bạṛtik Kana

Iran ar Amerika reaḱ lạṛhại karonaḱte Baṅgladisom sãote goṭa dhạrtire juluḱ sunum (gạḍi reaḱ sunum) peṭrol dịgel reaḱ ṭonṭa ńeloḱ kana. Lạṛhại tinạḱ jeleńoḱa sunum ṭonṭa hõ ḍher idiḱa. Disomre nit dhạbićte sunum babotte bar hoṛkin goć akana mente baḍae ńamakana. Sarkaraḱ aema lekan kạmihora ar aste hõ jạruṛ tenaḱ sunum baṅ ńamoḱ kana. Line re ạḍi ghạṛić teṅgo katet́ rehõ pamp khonaḱ sunum bako ńamet́ kante hoṛko raṅgao arko ạṛis cabaḱ kana.

Noa ṭonṭa dinre aema sunum beparige sunumko oko dohokaḱ kana ar kombṛo kate sunumko bạnijeda. Onate disomre sunum reaḱ ṭonṭa do bạṛtikaete ńel ńamoḱ kana.

Kisạ̃ṛ ar lahanti disom kodo noa ṭonṭako teṅgo daram daṛeaḱ kana. Menkhan reṅgeć ar nacar disom kodo ạḍi muskilre menaḱkoa. Ona iạte Baṅgladisom sarkar disom hoṛkoe nehõrako kana jemon bạṛti sunum babon beohar.

Amnura Mission Re Rạskạ Salaḱ Manaoena Paska Porob

Chapainawabgonj jilạ reaḱ Amnura Mission re rạskạ salaḱ manaoena paska porob. Paska porob do isại dhorom hoṛkoaḱ dosar maraṅ porob kana. Robibar hiloḱ (05 April) setaḱ 7:00 baja okte paska porob se jisu Mạsi aḱ jiwet́ beredoḱ ńutumte girjạ do hoe purạuena. Noa girjạ doko bondobosleda Bangladesh Northern Evangelical Lutheran Church (BNELC) ar Amnura Lutheren Mission.

Paska porob girjạe ạḱyurkeda BNELC Rajshahi circle pasṭor Rev.Rajen Soren, Manḍer pasṭor Sonaton Soren ar sãote goṛo gopoṛore tahẽkana Amnura Lutheren Mission manḍer ạyurić Dhavid Dhonae Hembrom.

Rạskạ paska porob girjạre Amnura Manḍer ar ona aḍepase ṭoṭha (Mirjapur, Jolahar, Sakoṭola, Phạgupaṛa, Jhinakhor) khon heć seṭerakan amdaj 400 cetan isại boeha miserako selet́lena. Girjạ mucạt́re joto hoṛ rạskạ paska porob ńutumteko eneć sereńkeda. Amnura Lutheren Mission girjạ komiṭi ren sodosso ar Utarbongo Adivasi Forum ren totho ar procar sompadok Prodip Hembrom doe baḍae ocokeda, Amnura Lutheren Mission do noa jilạ reaḱ ạḍi sedae reaḱ isại ạri-cạli koaḱ dhorom ṭhaõna kana.

Nonḍe do jao Robibar ar eṭaḱ eṭaḱ din hõ girjạ seko dewa sewaeda. Teheńaḱ dinre goṭa dhạrtire suluk nirại ar bańcao ńam lạgit́ koejoṅ hoyena. Amnura Mission jubo songho ren sabha mukhiạ Jeheskel Murmu hõe lại sodorkeda, rạskạ paska porob manaoen ńutumte ạḍi rạskạń ạikạueda. Amnura Mission jubo songho ren sompadok John Hembrom hõe lại sodorkeda, teheńaḱ bises din do calao paromen dinko lekage manaoena.

Probhu Jisu Mạsi do pe din tayom gujuḱ khone jiwet́ beret́ena ar sermateye rakaṕena. Ona ńutumte paska porob se Jisu Mạsi aḱ jiwet́ beredoḱ din manaoena. Bhage sombat Mathaeye ol akat leka 28:6 hạṭińre ol akana – “Nonḍe do bạnugićan, ente aće menlet́ lekae jiwet́ beret́ena; dela uniye gitićlen ṭhạ̃i ńelben.”

Bhage Sukulbar

Teheń do dhạrtiren sanam kristan boeha miserako lạgit́ mit́ṭen ạḍi manotanaḱ din se mãhã Bhage sukulbar kana. Teheń do noa dhạrtiren Babańcaoić jisu mạsiaḱ gujuḱ din kana uni do sanam manwa koaḱ kạiko ńutumte kalbheri kurus kaṭre aćaḱ jiwiye alae keda jemon ona sećte sanam manwako do akoaḱ kạiko khonak jemon bańcaoko ńam arko sadhinoḱ. Teheń goṭa dḥrtire apan ạpiun ṭhạ̃i jaega kore kristan hoṛ kodo Upạs koejoṅ selet́ uniaḱ noa gujuḱ se puruchun kạmiko disạyet́ taea, probhu mạsi do jemon goṭa dhạrtiren sanam jạtrenko apan ạpin suluke emako ma ar onkate sanam manwa kore aćaḱ noa harkhet ar gujuḱ hotete suluke danako ma.