Darakan 7August khon jo̠to̠ unionre ko̠ro̠na ṭikạ e̠m kạmihora do̠ e̠hoboḱ kana. Ṭikạ hatao lạgit́ union reaḱ ṭikạ centre re Jatiyo Poricoipotro (NID) card idilekhange 18 serma umer khon cetan sanamko ko̠ro̠na ṭikạko emakoa mente Sorastromontri Asaduzzaman Khan Kamal do̠e baḍae ocokeda. Hola (27 August) Moṅgolbar Socibaloire Montriporisod dupuṛuṕ re ko̠ro̠na rog chạplạuḱ kan nitoḱa  dosa reaḱ katha ko hudiskate Sarkarren cetan hudạren Officerko são dupuṛuṕ mucạtkate noa kathae lại so̠do̠rkeda. Noa dupuṛuṕre Sasthomontri Jahid Malek, Montriporisod Socib Khondokar Anawarul Islam hõ seṭere tahẽkana.

Source: bd-pratidin

Natorre Soṅkorbhag reaḱ Ạdibạsi ṭola khon mit́ kuṛi gidrạko ạtkirkede me̠nte baḍae ńam akana. Noa ghoṭna khạtir calaoen Sonibar Nator Sodor thanare uni kuṛiren apat́tet́ do̠e nạliskeda. Aḍepaseren hoṛko lạikeda, aema din khonge uni badmas koṛa do̠ uni kuṛi gidrạye jalaode kan tahẽkana. Calaoen Sokolbar ńindạ oṛaḱ khon bahre ṭanḍitey oḍoken khan pea são gọṛoko soṅge kate uni kuṛi gidrạ do̠ko ạtkirkeda. Nator Hindu mohajotren sadharon sompadok  Debashis Kumar Sorkar do̠e me̠nkeda, thoṛa din laha khonge Hindu kuṛiko jalao, Dulạṛ nạ̃ṛite jhạlikate dhorom bodol ocoko, ar ona kạmi baṅ purạulen khan ạtkir se̠ kombṛo lekan bạṛić ghoṭna do̠ ghoṭaḱ kana. Jor kateć e̠ṭaḱ ṭhạ̃i idikate bapla daṛeae khane ar onkan kuṛi gidrạ do̠ ako Hidu sãotare ar bako rakaṕet́koa. Thoṛa din tayom uni kuṛi hõ koṛawaḱ gharońj khonko laga giḍikae kana.  Noate sãotare ńe̠lo̠go̠ḱ kana aema lekan be̠colaḱ ko . Nonkan dosa je̠mon baṅ hoyoḱ ona lạgit́ jo̠to̠ hoṛ jagwar tahẽno̠ḱ lạgit́ uni do̠e me̠nkeda. Ona se̠le̠t́ ạḍi usạra ạn reaḱ goṛo hataokate  uni kuṛi gidrạ sendra ńame reaḱ nẽhõre do̠ho̠ akada. Nator ren Polis Super Liton Kumar Saha do̠e me̠nkeda, khobor ńam torage ale do̠ usạra jo̠to̠aḱle bo̠ndo̠bo̠ akada. Usạra ạn reaḱ kạmi ho̠ra lekate ale do̠ nui kuṛi gidrạle sendra ńamea me̠nteń aso̠ḱ kana.  

Source – Alokitobangladesh                                    

Naogaon Niamatpurre mit́ ạdibạsi kuṛi gidrạ (12) konackede khạtir bhen caḱlaoić Anarul Islam (45) ńutuman mit́ hoṛko gerepterkedea Polis.  Uni do̠ Paṛoil Union ren Bandoil atoren goćakan – Tajuddin ren hopon kanae.  Arhõ  ona atoren bar koṛa do̠kin dạṛ akada, mit́ do̠ Batul re̠n koṛa Arif (35) ar mit́ do̠ Rohim Uddin ren koṛa Yunus.

Sonibar 24 July ńindạ 8 baja okte Upạjilạ Paṛoil Union reaḱ Madhoil Mohapaṛa pạchim re̠ khạṛi aṛere 40 bighạ ul bagan ṭoṭhare noa ghoṭna do̠ hoyakana. Noa ghoṭna report ol dhạbịć mamla re̠aḱ sapṛaoḱ calaḱkan tahẽna ar Senior Assistant Polis super ( Manda Circle) Motiar Rahman ar Niamatpur thana ren officer incharge Humayun Kobir do̠ ghoṭna hoyakan thạ̃ikin ńe̠l ạgukeda. Ona ṭoṭharen hoṛko ṭhen khon baḍae ńam akana, uni ạdibạsi kuṛi gidrạ do̠ Rosulpur Union reaḱ Nimdighi ạdibạsi atoren kanae. Uni do̠ un hiloḱ tikin 1 baja okte Gangor  bajarre Anarulaḱ bhen re̠ dećkate ako sor ato Ghughudanga  aćren kuṛi boehawaḱ oṛaḱ calaḱ lạgit́e oḍoḱlena. Me̠nkhan uni bhen caḱlaoić Anarul do̠ lockdown re̠ Polis koaḱ katha me̠nkate aema ḍahar sećte ạcur ạcurte ńaham ńuhum 7 baja okte Madhoil Mohapaṛa gaḍa cetan bridge ṭhene ạgukedea. Uni bhen caḱlaoić do̠ uni kuṛiye metadea, je̠ khạṛi taṛam parom kate taṛamte am boeha takoaḱ oṛaḱ calaḱ hoyoḱa me̠nte 40 bighạ ul bagan bhitriteye idikedea.  Onḍe do̠ ona ul bagan horhokin ( Caretaker) Bandoil atoren Arif (35) ar Yunus kin tahẽkana. Ńindạ 8 baja okte  bhen caḱlaoić ar Arif pạripạritekin konackede khan bo̠to̠rte uni do̠ bae kikiạu daṛeaḱte ńindạ amdaj 11 khon 11 baja okte onḍe khon jãhãlekate Bandoil ato seć uluṅge tahẽkateće dạrkeda. Un okte ḍaharrey ạcur baṛaekan tahẽkan Bandoil atoren Imran uni kuṛi do̠e ńe̠l ńamkede khan  ona atorenge Jobed Ali ren koṛa Jonab Aliwaḱ oṛaḱteye idikedea. Onḍege uni kuṛi gidrạ do̠ kićrićko̠ ho̠ro̠ḱ ocokate onḍegeko do̠hokedea. Atoren 10/12 goṭen hoṛko soṅge soṅge onḍeko senen khan Anarul ko saṕkede rehõ Arif ar Yunus do̠kin dạrkeda. Ńindạ 1 baja okte thanare polisko̠ baḍae ocoket́ko khan Polis hećkate uni kuṛi gidrạ ar bhen caḱlaoić Anarul bańcaokate thanako idiket́kina. Noa babotre thana officer Incharge Humayun Kobir do̠e me̠nkeda,  So̠mbad ńam sãote victim ko bańcaokedea ar asami do̠ko gerepter akadea. Noa ghoṭna são jopoṛao me̠naḱkin arhõ bar hoṛ do̠kin dạr akada. Aḍi usara unkin hõ ko giripterkina ar ạn lekate unkinaḱ bebosthako̠ hataoa.

Source: punakhabar

Dinajpur Upạjilạ re̠n Sorkar Tudu (55) ńutuman mit́ Ạḍibạsi Santal hoṛaḱ mạ̃ṛi pukhri daḱre̠ campel akan o̠kte thana Polis ko̠ owar rakaṕkeda. Hola (18 July) Robibar ạyuṕ bela upạjilạ Saghaighaṭa Keṭra- Birampur Ḍahar aṛe mit́ṭen pukhri kho̠n mạ̃ṛiko̠ owar akada. Sorkar Tudu do̠ ona ṭoṭha re̠n Thakur Tudu re̠n hopone tahẽkana. Birampur upạjilạ re̠n bharapon Officer Sumon Kumar Mohonto noa babotrei lạikeda. Goć akan hoṛre̠n bhạcạt koṛa Onil Tudu do̠e me̠nkeda, nui do̠ dinạmge ńũ buloḱ kan tahẽkanae. Sonibar ạyuṕ bela kho̠nge uni do̠ at́gey tahẽkana. Tayomte Saghaighata ṭoṭha re̠aḱ mit́ṭen pukhri kho̠n campel akan okte uniaḱ mạ̃ṛiko̠ owar rakaṕ akada. Birampur thana re̠n bharapon Officer (OC) Sumon Mohonto do̠e me̠nkeda, ‘ Jotbani Union Keṭra- Birampur Ḍahar aṛe mit́ṭen pukhrire mit́ hoṛaḱ mạ̃ṛi campel akan do̠ onḍenićge mit́ haṛam hoṛ do̠e ńe̠l ńamket́ khan polis ko̠ baḍae ocoket́koa. Polis do̠ ghoṭna hõe akan ṭhạ̃i kho̠n mạ̃ṛi mạ̃ṛiko̠ owar rakaṕkeda.

Source: Korotoa

Eid tayom 14 din lạgit́ kajaḱ Lockdown tahẽna me̠nte Jonoprosason ProtiMontri Farhad Hossain do̠e me̠nkeda. Disạm re̠aḱ kạuḍiniti ko̠ re̠aḱ katha hudiskate Eid khạtir calaḱ kan lockdown do̠ thoṛa ḍhel ńõḱ akana. Me̠nkhan Eid tayom hijuḱ kana kajaḱ kho̠n arhõ kajaḱ lockdown. No̠a okte o̠koe hõ bako aṛaḱkoa. Uni do̠ arhõe me̠nkeda, 23 July kho̠n 14 July dhạbić lockdown e̠m hoyoḱa. No̠a okte Sarkari, Besarkari Office selet́ Garments ar Silpạkạrkhanako̠ bond tahẽna. Me̠nkhan hoṛmo hạṭiń ạn se̠ sasthobidhiko̠ manao ganao hoyoḱa. Tinạḱ din Vaccine se̠ ṭikạ e̠m baṅ hoyoḱ unạḱ din mask beohar hoyoḱa.

Source: Sonali Sangbad

Jo̠to̠ hoṛko ko̠ro̠na ṭikạ e̠m re̠aḱ̃e goṭa akada me̠nte Maraṅ Montri Sekh Hasina do̠e lại so̠do̠rkeda. Teheń (18 July) Video Conference Montronaloi re̠ bạrsik kormo sompadona cukti suhi ar sonotoḱ re̠aḱ kuṛại e̠m akhṛare noa kathae lại so̠do̠rkeda. Maraṅ Montri do̠e me̠nkeda, Ale do̠ ṭikạ e̠moḱle e̠hoṕ akada. Vaccine se̠ ṭikạ hijuḱ kana. Abo̠ disạmre̠n jo̠to̠ hoṛko̠ je̠mo̠n ṭikạ ko̠ hatao daṛeaḱ, Ona lạgit́ tinạḱ jạruṛa vaccine kiriń kate vaccinele̠ e̠makoa.  O̠koe hoṛ hõ je̠mo̠n ṭikạ bahre re̠ aloko̠ tahẽn. Jo̠to̠ hoṛko̠ hoṛmo hạṭiń re̠aḱ ạn ko̠ manao ganao kate calaḱ lạgit́ Sarkar do̠e me̠nkeda. Ko̠ro̠na o̠kte jo̠to̠ hoṛ je̠mo̠n hoṛmo hạṭiń ạn ko̠ manao ganao, onte hõ tạṅkhi do̠ho̠e hoyoḱa.

Source: Pothmatimes

Mãhãmạri ko̠ro̠na khạtir Rangpur Jilạ Miṭhapukur upạjilạ re Lockdown karonte o̠ṛaḱre duruṕ me̠nḱko̠ ạḍibạsi ar reṅgeć nacar kạmi hoṛko̠ ạḍi mũskilre̠ ko̠ paṛaoena. Ar onate ạḍi haron din ko̠ khemaoet́ tahẽna. Ko̠ro̠na noa okte Switzerland Dutabus re̠aḱ goṛote jatio Manobadhikar Commission  ar UNDP- Human Rights And Justic Programaḱ goṛote reṅgeć nacar hoṛko jo̠maḱ ko̠ emat́koa. Upạjilạ Prossason aḱ ạḱyurte  Sokolbar (16 July) setaḱ 11 baja o̠kte Miṭhapukur Sarkari Model Highschool Maṭh re̠ noa  goṛo ko̠ e̠mkeda Volunteer soṅgoṭhon ar Dops. Mithapukur upạjilạre Mit́ hajar mit́ sãe (1100)  ạdibạsi ar reṅgeć nacar gharońjren hoṛko goṛo hisạbte ko̠ emat́koa Caole- 12 kg, Holoṅ- 6 kg, Mạsri dạl- 3 kg, Chini- 1kg, Sunum- 2 leter, Buluṅ- 1 kg, Lifeboy sạbun – 6 goṭen, Suzy- 1 kg ar dinạm din jạruṛaḱ jinisko̠ mit́ṭen kate packet. Sasthobidhi ko̠ manao ganao kate no̠a e̠m hạṭiń o̠kte seṭer ko̠ tahẽkana Miṭhapukur upạjila Vice Chairman  Nironjon Chandro Mohonto, Ạḍibạsi- Bangali Sonhoti Porisod re̠n  Adv. Sirajul Islam Babu, Obolombon re̠n Nirbahi ạḱyurić Probir Chokroborti, Dops re̠n Nirbahi ạḱyurić Ujjol Chokroborti, Manobadhikar kurmi Sohidul Islam. Ạdibạsi Santalko̠ re̠n ạḱyurić Babulal Mardi ar Utpol Minoj.

Source: Ipnews

Darakan 15 July kho̠n 22 July dhạbić goṭa Disạmre hoṛ dejoḱ re̠l gạdi do̠ calaoḱa. Adha  seat phaka do̠ho̠ kate re̠l do̠ ạḱyuroḱa. Commuter re̠l chaḍa jo̠to̠ lekan tikiṭ do̠ Online hotete ạkhrińoḱa. Hola Somber (12 July) Re̠l Montri Nurul Islam do̠e me̠nkeda, Ale do̠ eyae (7) din lạgit́ re̠l calaoḱ re̠aḱle goṭa akada. Lockdown lahare o̠ka ko̠ re̠l calaḱkan tahẽn, ona hõ calaoḱ re̠aḱle kurumuṭuia. Teheń moṅgolbar (13 July) setaḱ kho̠nge re̠l ṭikiṭ ạkhriń do̠ e̠hoṕ akana. Jo̠to̠ ṭikiṭ Online re̠ ạkhrińoḱa. Me̠nkhan Commuter re̠l gạḍi re̠aḱ ṭikiṭ do̠ counter  re̠ ńamoḱa.

Source: Dailyinqilab

Mãhãmạri ko̠ro̠na virus baṅ chạplạuaḱ lạgit́ darakan 23 July kho̠n  5 August dhạbić arhõ lockdown re̠aḱ jạri hoy akana.

23 July kho̠n 5 August hạbić manao ganao re̠aḱ niạm ko̠:

1. Jo̠to̠ Sarkari, Adhasarkari, Besarkari Office bond tahẽna.
2. Dahar, re̠l ar Daḱ hoṛte calaḱ gạḍi ko̠ (Disạm bhittri re̠aḱ Biman) são jo̠to̠ gạḍiko̠ do̠ bond tahẽna.
3. Market ar Dokan ko̠ hõ bond tahẽna.
4. Jo̠to̠ Tourist center, Resort, Community center ar rạskạjo̠n center ko̠ bond tahẽna.
5. Jo̠to̠ lekan silpạ kạrkhanako̠ bond tahẽna.
6. Ḍher hoṛko̠ jarwaḱ nonkanaḱ samajik se̠ gãota re̠aḱ akhṛa, Janam mãhã, Picnic, Party, Political ar Dhorom akhṛa ko̠ bond tahẽna.
7. Baṅgladisạm re̠aḱ Supreme court adalo̠t babotre jạruṛ hukum do̠e jạria.
8. Bank/Bima/ kạuḍi gãotako̠ reaḱ seba lạgit Baṅgladisạm bank do̠ / kạuḍi gãotako̠ bibhag hukumko̠e jạria.
9. Sarkari officer ko̠ apan-ạpin kạmi thạ̃ire tahẽn kate ar office re̠aḱ kạmi ko̠ do̠ virtual (E-mail, E-nothi, sms, Whatsapp) são eṭaḱ madhom hotete ko̠ kạmia.
10. Ạn rukhiạ ar jạruṛaḱ seba, je̠mon- cas bas re̠aḱ jạruṛ jinis ko̠ ( sahar,itạ, tiju gujuḱ ran, cas bas machine emateaḱ), hoṛmo lạgit́ jo̠maḱ pho̠so̠l ar jo̠maḱ kiriń ạkhriń, hoṛmo seba, covid-19 ṭikạ e̠m, jạtio poricoipotro (NID) e̠moḱ kạihorako̠, Sarkari Tax ạdại kamihora, Current, Daḱ, Gas, Fire survice,Telephone, ar Internet (Sarkari- Besarkari,  Print Electronic media, Bank, City Corporation, samajik nirapotta kạmi ko̠, Fharmacy ( Ran dokan) selet́ jạruṛaḱ seba kạmi são jo̠po̠ṛao me̠naḱ ko̠ office re̠n kạmiạko̠ ar gạḍiko̠ sarkari poricoipotro uduḱ kate se̠n heć daṛeaḱa ko̠.

Ko̠ro̠na Mãhãmạri birudre̠ teṅgo daram lạgit́ calaḱkan kajak lockdown do̠ darakan Lukhibar (15 July) kho̠n 23 July hạbić ḍhil ńoḱ re̠aḱe goṭakeda Sarkar. No̠a o̠kte sasthobidhi ko̠ manao ganao kate gạḍiko̠ calaḱa.  Montriporisod bibhag, Sombar no̠a kho̠bo̠r do̠e lại so̠do̠r keda . Kurbạni Eid re̠ hoṛkoaḱ daṛan ar Daṅgra Haṭre̠ kiriń ạkhriń re̠aḱ katha ko̠ hudis kate no̠a do̠e goṭakeda. Arhõ niạ o̠kte virtual lekate Sarkari Office do̠ jhić tahẽna ar Besarkari gãotako̠ do̠ bond tahẽna. Sanam market ar Dokan ko̠ hõ jhić tahẽna.

Source: Bd-pratidin