Do̠sar Doge Ṭikạ (gonotika) 28 March Eho̠ṕ Lạgido̠ḱ Kana

26 February tinạḱ do̠ pạhil doge ṭikạko hatao akat́ onko do̠ 28 March kho̠n ko̠ro̠na dosar doge ṭikạko ńama. Dosar dhapre mit́dinte mit́ karoṛ doge emogo̠ḱa me̠nte baḍae ńam akana. 28 March kho̠naḱ Rajdhạni selet́ goṭa disomre dosar doge emoḱ metaḱme gonoṭikạ do ehoṕa.

Calaoen 8 March Sastho Odhidaptor reaḱ Covid-19 ṭikạ sasaṕṛao Taskforce committee ren sodosso socib Dr. Md. Shamsul Hoqe aḱ suhiat́ mit́ ciṭhite noa kho̠bo̠r lại lahawakana.

Goṭa Dhạrti Maejiu Mãhã Manao

Teheń Moṅgolbar (8 March) Goṭa dhạrti Maejiu Mãhã ko manaokeda National Agency For Green Revolution (NAGR). Goṭa Dhạrti Maejiu Mãhã ńutumte mit́ akhṛa do̠ hoe purạuena. Goṭa dhạrti maejiu mãhã akhṛare aema lekan bhage bhage kathako se solha kathako so̠do̠rena. Cet́lekate maejiuko lahanti hoyoḱa mente. Sạrige noa akhṛare aema cecet́aḱ kathako tahẽkana.

Teheńaḱ akhṛare Manotan peṛa hisạbte selet́e tahẽkana National Agency For Green Revolution (NAGR) ren ạḱyurić Stephen Soren, 1,2,3 ward Jhilim Union Porisod ren Maejiu member Johra Begum ar ona sãote selet́e tahẽkana Uttor Boṅgo Forum ren sabha mukhiạ manotan Hingu Murmu. Manotan peṛako do̠ bhage bhage kathate akhṛare selet́ akan maejiuko mit́ bar daman kathateko uskurket́koa.

Arhõ selet́ko tahẽkana Program Officer Prodip Hembrom NAGR, Secretary Promila Hasda NAGR, Mahasoe Nirola Murmu Tabitha Kindergarten School, Mahasoe Nilufa Parvin Tabitha Kindergarten School, The Santalstimes.com ren goṛoić Sumitra Murmu, Ar Mit́ pạthuạ kuṛi Santa Khatun. Goṭa dhạrti maejiu mãhã ńutumte saṕṛaolen akhṛa ạḍi napaete hoe purạuena.

Sher-e Bangla Sona Reaḱ Siro̠pae Ńamkeda Rajshahi Ren Merina Hasda

Sãota reaṅ mimit́ kạmihorakore maraṅ utạr cikhnạ se̠ bhage bhage kạmi ńutumte Sher-e bangla so̠na siro̠pa-2022 rey man manot ocoyena Ạdibạsi ạḱyurić Merina Hasda. Uni do̠ Rajshahi Damkura hạṭ reaṅ besorkari unnoyon songstha Masaus ren nirbahi ạḱyurić kanae. So̠ko̠lbar (4 march) ńuhum okte Dhaka reaḱ Bijoynogor Hotel-71 threister hollroom re mit́ akhṛa talateko man manotkedea.

Noa akhṛare manotan peṛakoaḱ tite crest, uttorio ar certificate hõe ataṅket́a. Sher-e Bangla A.K Fazlul Hoqe gobesona porisod, South Asia Social Aducation Foundation ar 71 media vision noa akhṛae bo̠ndo̠bo̠sleda. Man manot ńutumte Masaus ren sanam kạmiạko Merina Hasda joharko em caladea. Ado̠ thoṛako kuklikedere nonkae menkeda Merina Hasda, Uni do̠ aema din khonaḱge ạdibạsi jạt-gosthi koaḱ mạnmi ạidạri, pạrsi ar legcar paltur rạkhi jogao jo̠to̠n ar ona sãote aema lekan kạmi hudạ benao rakaṕre ạḍi muruḱe kạmi idikana.

Eṭaḱ eṭaḱ ạdibạsi jạtiko akoaḱ ạidạri hamet́ lạgit́ hõ miljule kạmi kana. Nonkae man manoten iạte sạrige uniaḱ kạmire arhõ jhũḱ mon he̠ćadea me̠ntey baḍae ocokeda. Ona ṭhaõnaren sanam kạmiạko gạhir mo̠n kho̠ne sarhaoket́koa.

Pạhil Doge Hatao Reaṅ Ạt Nitoṅ Hõ Menaḱa: Sastho Odhidaptor

Calak kan ko̠ro̠na mahamạri re ạḍi aema lekan eṭkeṭõrẽ disom ar dhạrtire heć paṛao akana. Noa mahamạri são lạihại se̠ rukhiạḱ lạgit́ sanamko ṭikạ hatao ạḍige jạruṛabon kana.

Tinạḱ hoṛ pạhil doge baṅbo hatao akat́ nit́ hõ Sarkari-besarkari nịt akan ṭikạ ṭhạ̃re ńutum ol caṛhao se̠ jạruraḱ kago̠jko soṅge idi lekhange tikạ bon hataojoṅ daṛeaḱa.

Ente teheń Budhbar (2 March) Sastho Odhidaptor virtual Sastho bulletin, zoom conference re Sastho Odhidaptor re̠n ṭikạ kạmihora ạḱyurić Dr. Md. Shamsul Hoqe noa kathae roṛ so̠do̠r akada.

Pre-Primary 20 March Kho̠n Jhijo̠ḱa

Prathomik sikha odhidaptor do̠e baḍae ocokeda, Ko̠ro̠na ajar kakhante amdaj mit́ cando tala tayom teheń kho̠n pạhil ar mõṛe kelas ren pạthuạ gidrạkoaḱ kelas ehoṕena.

Me̠nkhan amdaj bar serma tayom Pre-primary re̠n gidrạkoaḱ kelas hõ darakan 20 March khonaḱ ehobo̠ḱa.

Budhbar kho̠n Primary Pạṭhuạ Gidrạkoaḱ Kelas Eho̠bo̠ḱa

Gapa Budhbar (2 March) kho̠naḱ pạhil dhap metaḱme Primary pạhil kho̠n mõṛe kelas ren pạṭhuạ gidrakoaḱ kelas ehoṕ lạgido̠ḱ kana. So̠mbar (28 February) Prathomik ar Gonosikha Montronaloy ren officer Mahbubur Rahman Tuhin noa kho̠bo̠re baḍae ocokeda.

Ar 20 Romjan (Ramadan) dhạbić Primary reaṅ kelas calao idiḱa. Inạkate 21 Romjan kho̠n Eid-ul fitr reaṅ chuṭi tahẽnoḱa. Eid chuṭi tayom arhõ okte nạpitre kelas ehoṕa.

Mit́ Dinte Mit́ Karoṛ Bar Ge̠l Lakh Hoṛ Ṭikạko Ńamkeda

Mit́ dinte goṭa disomre mit́ karoṛ bar ge̠l lakh hoṛko ṭikạko ńamkeda me̠nte Sastho Montri Jahid Malek do̠e baḍae ocokeda. Nit dhạbićte 11 lakh hoṛko pạhil doge ṭikako hatao akada.

Robibar (27 February) Boṅgobondhu Antorjatik Sommelon centre 42 aḱ BCS sastho kidder re bahali ńamakan po̠n hajar ḍaktorkoaḱ orientation akhṛare noa kho̠bo̠re lại so̠do̠r akat́a.

Gonotika (jo̠to̠ hoṛko lạgit́ ṭikạ) E̠moḱ Reaḱ Okto Arhõ Bar Dinko Ḍherkeda

Teheń Sạnicar (26 February) setaḱ 8:00 baja kho̠n mimit́ ṭikạ thạ̃re ko̠ro̠na reaḱ pạhil doge kạmihora ehoṕ akana. Ko̠ro̠na virus birudre teṅgo daram lạgit́ taheńaḱ dinre Sarkar mit́ karoṛ ṭikạ e̠moḱ reaḱe goṭa akada. Onate disomren tinạḱ do̠ pạhil doge baṅko hatao akat́ ạḍi harephare ṭikạko hataoet́ kana. Teheń dhạbićge pạhil doge e̠moḱ reaḱ katha tahẽkana.

Me̠nkhan sanamko lạgit́ hamesa pạhil doge e̠moḱ reaḱ okto arhõ bar dinko ḍherkeda. Ona iạte tinạḱ Santal boeha-miserako nit hõ pạhil doge ṭikạ baṅbon hatao akat́, ar bilo̠m baṅkate dela harephare bar din bhitrire aḍepase ṭika thạ̃ire se̠n kateć ṭikạbon hataojoṅa. Ente noa tayo̠m kho̠naḱ pạhil doge ṭikạ ar baṅ ńamo̠go̠ḱa.

Santal Gidrạko Lạgit́ Pạhil Sikhnạt Puthi Chapa So̠do̠r Reaḱ Dạbite Manwatonol

Santal gidrạko lạgit́ pạhil sikhnạt puthi chapa so̠do̠r selet́ santalkoaḱ pạrsi, legcar ar paltuṛ rukhiại dạbite manwantonol hoe purạuena. Hola Sokolbar (25 February) Rajdhạni reaḱ Shahbag re noa manwantonol ko bo̠ndo̠nbo̠skeda, Utạr Boṅgo Adibasi Forum; Adibasi Santal Fellowship Somiti, Dhaka; Santal Ranajat Somiti, Dhaka; Santal Writers Forum- Baṅgladesh; Santal Sommonoi Porisod; The Santalstimes.com ar SantaliNews24.com.

Manwatonol re sawaliạko menkeda, ‘ Sarkar ṭhen nehõr tahẽnkana 2022 serma bhitrite Santal pạrsi reaḱ niphuṭ ar so̠ṛo̠mtet́ jogao jo̠to̠n lạgit́ Santali (Roman) ho̠ro̠pte gidrạko lạgit́ pạhil puthi chapa so̠do̠ro̠ḱma.

Ona khạtir sarkar ṭhen thoṛa dạbi e̠makana. Nõḱoe noako-

2022 serma bhitrire Santal gidrạko lạgit́ apnaraḱ pạrsi ar ạri-cạliko rạkhi jogaore santal pạhil puthi chapa so̠do̠r reaḱ kạmiko mucạt́ reaṅ.
Diso̠m reaḱ jo̠to̠ jilạre Adibasi Cultural Academy bandhao hoyoḱa ar Ạdibạsi Santalko kho̠nge kạmiạko hõ do̠ho̠ko hoyoḱa.
Ạdibạsi Santalkoaḱ pạrsi, legcar-ạri cạli ar paltuṛ rukhiạre Sarkari butel ataṅ são sãote eṭaḱ eṭaḱ bo̠radko saṕṛao hoyoḱa.
Tv, radio ar eṭaḱ mediare Santalkoaḱ pạrsi, legcar ar paltuṛko reaḱ sạri ar niphuṭ kho̠bo̠rko tulạu ar santalko seledoḱ reaḱ ạt benao hoyoḱa.
Sarkari lekate Santalko talare eṭaḱ sikhạuna, legcar, ạri-cạli ar khilạḍ haparaoko bo̠ndo̠bo̠s hoyoḱa.
Ạdibạsi boskotiạ ṭothare pukhir se̠ daḱko ńam reaḱ ijạra emako reaḱ bebostha hoyoḱa.
Ạdibạsi Santalkoaḱ jumi-bhiṭa, topa thạ̃i ar pujạ-parbo̠n ko ṭhạ̃i re̠ć ocoḱ bo̠nd jạruṛa.

Noa Manwatonole ạḱyurkeda, Santal onoliạ Forum-Bangladesh ren sabha mukhiạ Mithusilak Murmu. Arhõe roṛkeda, Utarboṅgo Adibasi Forum ren sadharon sompadol Adv. Probhat Tudu, Milky Sedeq Hasda, Profullo Tudu, Enos Hasda, Simon Baske. Arhõ selet́kin tahẽkana pạṭhuạ kuṛi Roselin Tithi Marandi ar Onupoma Hembrom.

Daraekan March Cando Kho̠n Udạuḱ Gạḍi Reaḱ Jo̠to̠ Lekan Ạnko Digital Hoyoḱa

Maraṅ Montri Sheikh Hasina menwana, ‘2022 serma reaḱ March cando khonaḱge Bangladesh udạuḱ gạḍi reaḱ chaṛ (Earlicense) ạnko do̠ digital hoyoḱa. Online tikeṭ, Reservations, checking jo̠to̠waḱ Online hotete hoe purạuḱa. Niạ do̠ abo aḍepase, disom ho̠ṛko lạgit́ rạskạwanaḱ katha kana.

Teheń Budhbar (23 February) mit́ conference hotete Biman Baṅgladesh Earlicense Limited reaḱ subornojoyonti ńutumte hoe purạuen akhṛare Maraṅ Montri noa kathae lại lahakea.