Disom reaḱ kạrkhanare gas ar bijli usạra jogaṛ reaḱ ase emena Maraṅ montri. Calaoen Sombar socibaloe re 21 goṭen bepari songoṭhon protinidhiko sãote mit́ bạisire noa ase emakana.

Bạisi mucạt́re FBCCI Prosasok Md. Fazlul Hoqe doe baḍae ocokeda, noa as kathate kạrkhanaren mạlikko maraṅ asko ńamkeda. Calaḱkan hapta khon noa ṭonṭa cabakate gas-bijli laha leka jogaṛ reaḱ kạmihora hatao akana. Noa bạisire eken thoṛa din reaḱ ṭonṭa caba do baṅ, tayom daram dinre juluḱ sunum reaḱ ṭonṭa cabae reaḱ kathako sodorkeda.

Maraṅ montri ren ạyurić Mahdi Amin doe meneda, gas reaḱ ghạṭti cabae lạgit́ sarkaraḱ hudis lekate darakan 2028 serma ehoṕ lahare tesar haṭiń reaḱ kạmi FSRU cạlu reaḱ goṭa hoeakana.

Banijomontri ar Maraṅ montri ren Ortho upodestawaḱ seṭerte noa bạisire FBCCI, BGMEA, BKMEA ar BTMA selet́ 21 goṭen  bepari songoṭhonren protinidhi selet́ko tahẽkana.

Dhaka Narayanganj jilạ Rupgonj upạjilạ reaḱ Murapaṛa union reaḱ Moṅgolkhalire Riya Soren (19) ńutuman mit́ santal kuṛiaḱ mạ̃ṛĩko udhạrkeda. 7 September setaḱ mit́ṭen bhaṛa oṛaḱ khonko udhạrkeda.

Riya Soren do Dinajpur reaḱ Nobabgonj jilạ Kushdoh union Baghdaboṛa atoren kanae. Reṅgeć gharońjren kuṛi Riya do andaj 8 cando khon Rupganj reaḱ ACI Salt Limited-re kạmikan tahẽkana.

Peṛako baḍae ocokeda, Uni do Moṅgolkhalire mit́ṭen ṭin reaḱ bhaṛa oṛaḱre aćren são kạmiạ muslạ sãoe tahẽnkan tahẽkana. Menkhan ghoṭna thoṛadin lahare aćren são kạmiạ do oṛaḱe calao akan tahẽkante ona oṛaḱre Riya eskare tahẽkana. 6 September ńindạ phonte uni sãoe galmarao akada mente Riya ać gogo Ribika Murmu doe baḍae ocokeda. Dosar hiloḱ setaḱre Riyawaḱ mạ̃ṛĩ udhạr tayom pạhilre oṛaḱren gharońjren doko menkeda uni do stroke teye goć akana. Tayomte aḍepase hoṛko uniaḱ hoṭoḱre hạn reaḱ cinhạko ńelkeda menteko baḍae ocokeda. Inạ tayom oṛaḱ mạlik gharońjrenko menkeda, Riya do aćtege goćakana ar pạsi akanko ńamakadea.

Menkhan ạdepase hoṛkoaḱ kukli, Pạsi akan Riyawaḱ mạ̃ṛĩ do okoege bako ńelakada, ghoṭna ṭhạ̃ire uniaḱ mạ̃ṛĩ aṭet́rege tahẽkana. Noa ghoṭna babot oṛaḱ mạlik ar uniaḱ gharońjren hoṛkoaḱ kathate aḍepaseko talare aema lekan kukli ar dighại sirjạu akada. Peṛakoaḱ nạlis, oṛaḱ mạlik Tania Begom do aćaḱ gharońjre Riya ạḍi ãṭe apnarledea ar dhorom bodolkate muslạ dhoromren koṛa são bapla reaḱ katha hõe sodorleda.

Menkhan noa nạlis reaḱ sạriaḱtet́ nit hõ baṅ nisṭan akana. Riyawaḱ phone nit dhạbić baṅ ńamakana mente peṛako baḍae ocokeda. Ghoṭna tayom Rupganj thana pulis mạ̃ṛĩ udhạrkate mạ̃ṛĩ biḍạu lạgit́ko kolkeda. Baḍaeoḱ kana ona gharońjrenko nit hõ bako mamla akada. Gharońj ar aḍepaserenko do mạ̃ṛĩ biḍạu hotete gujuḱ reaḱ sạri karontet́ baḍae lạgit́ ạn lekateko bebostha hatao reaḱko dạbikeda.

Note Riya ać gogo do aćren kuṛi at́ente ạḍi ãṭ dukre paṛaoakana; uniaḱ gujuḱte Dinajpur reaḱ Baghdaboṛa atoren hoṛko dukoḱ kana.

Tumạl: ipnewsbd

Gogowaḱ goć tayom pension ṭaka rakaṕ senkate ghane ghane ghusre paṛaoen khạtirte 17 serma umer ren mit́ṭen juạn koṛa ghus site ńutuman website e benaokeda.

Shahed ać gogo Amena Khatun do Sarkari Primary School Mahasoye tahẽkana. 2022 serma reaḱ December cando goć tayom uniaḱ gharońjrenko Provident fund ar pension ṭaka rakaṕre aema daptorre ghusreko paṛao akana. Aćaḱ passport benao jokhen hõ nonkan ghus ar muskilre paṛao akana. Ona edrete eken bar ghonṭa bhitrite noa website e benaokeda.

Noa website re jãhãe hoṛ apnar ńutum se oporom oko dohokate jãhãlekan sarkari daptor reaḱ ghus dạbi babotko nạlis daṛeaḱa. Ehoṕen thoṛa din bhitritege noare hajar hajar hoṛ akoaḱ nạlisko jomakeda ar goṭa disomre sarsadleyena. Noa reaḱ motlob do Prosasonik seba ńam lạgit́ sadharon hoṛaḱ haron ar durniti sodor.

Bangladesh soṛok poribohon compression (BRTC) gạḍi ghoṛare maejiuko jor julum koclon khon rukhiạḱ lạgit́ disạmre ‘Pink Bas’e Cạlukeda.

Rajdhạni reaḱ Tejgaonre 18 August Moṅgolbar poribohon ar setumontri Shaikh Rabiul Alam gulạpi roṅan bas gạḍi uḍhạukeda.

Pạhil dhapre disạm reaḱ pe goṭen horre 14 goṭen bas gạḍi cạluyena. Darakan pe cando bhitrite 50 goṭen bas cạlu reaḱ hudis calaḱ kana. Niṭ akan ṭhạ̃i khon maejiuko noa bas teko sen heć daṛeaḱa. Sarkaraḱ 180 din reaḱ bises kạmihora ar bachnao reaḱ oṅso lekate noa seba do cạluyena.

Noa bas reaḱ jotowaḱ dạyikre maejiu menaḱkoa. Bas ḍrivor se são goṛoić hõ maejiuge. Maejiuko rukhiạ lạgit́ bas re Closed Circuit (CC) camera ar Vehicle Tracking System (VTS) joṛao menaḱa. Gạḍi bhaṛa do E-ticketing se POS mesin hotete hataoḱa. Biḍạu lekate gạḍire ‘Starlink Wifi’ reaḱ hõ subita menaḱa.

Amerika ar Iran talare besuluk karonanaḱte dhạrti reaḱ bajarre ponaḱ din leka arhõ bin chakaoaḱ sunum dam ḍherena. Budhbar (19 August) dhạrti reaḱ bajarre bin chakaoaḱ sunum dam barrel re 26 sent se 0.29 % ḍherkate 91.28 ḍolare tioḱkeda.

Eṭaḱ sećte Markin West Texas Intermediate (WTI) bin chakaoaḱ sunum barrel re 37 sent ḍherkate 85.31 ḍolarte ạkhrińoḱ kana.

Amerika ar Iran talare suluk bạisạure sombhab baṅ ńeloḱkan khạtirte sunum damre hõ nawa bodol ńeloḱkana. Bạṛtikaete Hormuz Pronali horte jahaj calaḱ babot Washington ar Tehran talare ridkhid karonte bajarre arhõ digdhại sirjạukeda.

Nit khonaḱ NID card re janam din, apnar ar go-babawaḱ ńutum purạte bodol se sudhrạu do mit́ dhao khon bạṛti baṅ hoe daṛeaḱa.

13 August Lukhibar nirbacon komision (EC) jạtiạri oporom registration bibhạg ren maraṅ mukhiạ Saiful Islam suhiat́ mit́ ḍhạrwạḱ hotete noa doko sodorkeda.

Ḍharwạḱre menakana je, Online sạbit sikhnạt ạri se certificate birudre janam din sudhrạu reaḱ ardas do nit khon maṭh porjạiren kạmiạko hotete hoe purạuḱa.

Inạ chaḍa hõ Unmoktto Bissobidaloy reaḱ ạri lekate janam din sudhrạu, apnar ar go-babawaḱ ńutum purạte bodoloḱ reaḱ ardas do NID ren Maraṅ mukhiạ hotete ạyuroḱa.

Tumạl: Jamanu TV 

Maraṅ montri Tareq Rahman são disạmren ạdivạsi protinidhikoaḱ mit́ṭen gapalmarao sabha hoe purạuena. Calaoen Lukhibar (16 July) tikin okte Socibaloe reaḱ Montriporisod bibhạg reaḱ jonoprosason koaḱ sahba oṛaḱre noa do hoyena.

Ona okte ạdivạsi protinidhi do judạ judạ komision bandhao, jatio convention, ạdivạsi bodolte mimit́ jạt lekate oprom, Ạdivạsi lekate sangbidhanik ạidạri ar ạn lekate jumi mạlik, Kendrio Cultural Center bandhao, Kạṭić kạṭić bạnij bepariko lạgit́ rin subita ar aema lekan prokolpo ńutumte se reserve forest ńutumte ạdivạsiko oṛaḱ bhiṭa khon laga ocoḱko lekan ghoṭna bond babotko dạbikeda.

Noa okte Maraṅ montri doe menkeda, uni ar aćren sarkar nonkan disạm benaorekin kạmi kana okarejãhãn jạti-gosṭhiaḱ jãhãn begar se pharak baṅ tahẽna. Disạm lahanti ar benao rakaṕ  lạgit́ joto hoṛaḱ goṛoe khojkeda.

Arhõe ,menkeda, nitaḱ lạṛhại do arhõ lạṭugea. Nonḍe ṭikạu tahẽn lạgit́ joto hoṛ mit́te tahẽn hoyoḱa. Mit́ sãote kạmi hoyoḱa ar mit́te lahaḱ hoyoḱa. Nui sarkar cetanre hoṛkoaḱ as bhorsa do ạḍi utạra. Kurumuṭu calaḱkana onako dosa khon teṅgo keṭejoḱ reaḱ.

Sabhare Seṭere tahẽkana sthanio sarkar montronale ren montri Mirza Fakhlur Islam Alomgir, Songsod Sodosso Anna Minj, Khudro Nrigosthi bisoyok Maraṅ montri goṛoić Bijan kanti Sarkar, Bangladesh Adivasi forum ren sadharon sompadok Sanjeeb Drong, Utarbongo Adivasi Forum ren sabha mukhiạ Hingu Murmu, Jatio Adivasi Porisod Kendrio komiṭi ren sadharon sompadok Noren Chandro Pahan sãote 17 goṭen jilạren 18 goṭen ạdivạsi protinidhi seṭerko tahẽkana.

Disạmren gidrạko ḍher din hạbić ṭaiphoiḍ ruạ khon bańcaoko lạgit́ ṭikạ emoḱ kạmihora (EPI) 15 cando umerren gidrạko lạgit́ Ṭaiphoiḍ Conjugate Vaccine ṭikạ emoḱe goṭakeda. Darakan August cando reaḱ 1 tạrik khonge ṭikạ emoḱ kạmihora do  ehoboḱa.

Sombar (13 July) mit́ ḍhạrwạḱ hotete Sastho Odhidaptor reaḱ ṭikạ emoḱ kạmihora (EPI) noa khobore baḍae ocokeda. EPI reaḱ hukum lekate 15 cando umerren joto gidrạ noa ṭikạko ńama. Ṭikạ do disạm reaḱ joto centerkore emogoḱa. 

Bangladesh Bank disạm reaḱ digital bạnij bepar re nawa bodole ạgukeda. Calaoen Budhbar (1July) Bangladesh Bank bạnij bepar alga ar nirạite hoe purạuḱ lạgit́ “Bangla QR” Code-e cạlukeda. Nit khon bạnij bepar re “Bangla QR” Code beohar hoyoḱa. Noa reaḱ motlob do kana, bạnij bepar re kom khorocoḱa ar algate hoyoḱa. Nit khon eṭaḱ eṭaḱ Bank lạgit́ QR Code do baṅ jạruṛoḱa. Eken mit́ṭeć “Bangla QR” scan lekhange jãhãn Bank se MFS App khon kạuḍi kologoḱa.

Phuṭpat koren dokandar khon ehoṕkate lạṭu lạṭu dokan, markeṭ, shopping mall joto jaegare noa beoharoḱa. Noa kạmihora hotete aema lekan muskil ar jhońjhoṭ khon bańcaoḱa.

Bangladesh Bank doe baḍae ocokeda, nogot ṭaka bin beoharte disạm arhõ lahantiḱa. Sadharon hoṛko ar bạnij bepariko kom khorocte ḍigital subitako hatao daṛeaḱa. Digital khon Smart Baṅgladisạm benao rakaṕre noa do mit́ṭen nawa kạmihora kana.

Budhbar ạyuṕ 8 baja Sẽṅgẽl Band reaṅ youtube channel re ‘Art Express’ hotete Santali band Seṅgel renaḱ music video ‘Buru Cetan’ sodorena. Santalkoaḱ jạtiạri sereń “Baṅgladisom mońj disom” sereń oloḱ ar joṛaoić Rev.Jona Murmu aḱ sirjạuaḱ  “Buru cetan cetante hoete laṛaoḱkan, hoete laṛaoḱkan hipiṛ hipiṛ, aṅjompe ho tirio saḍekan, Hoete laṛaoḱkan hipiṛ hipiṛ”. Uni doe menkeda, pusṭạute bạṅ disạeda okte do 70 serma reaḱ. Mit́ dhao office kạmi khạtirte Bandorbon jilạ reaḱ Faruqpaṛa ṭoṭhateń calaolena. Gạḍi khon pheḍen torageń ńelkeda, ạdepase ạḍi utạr buru ar ona burure dare nãṛĩ hoete lewer kodoroḱ kana. Hoete tirio reaḱ lithur aṛaṅ monre disạ hijuḱa.Onako guni bhạbit katege noa sereń doń sapṛao keda. Bangladisom betar são sãote aema okte akhṛakore noa sereń porcar akan rehõ nawa piṛhirenko ṭhen sodor lạgit́ “Seṅgel band’ nãwãteko record keda. Iń do ạḍi manotiń bujhạueda je onko do ińaḱ sereń nawateko sodorkeda.

Band ren ko menet́ kana Baṅgladisom reaḱ utạr-pạchim nakhare andaj 33 goṭen khon ḍher jạtren hoṛko basoḱ kana. Onko modre menaḱkoa Santal, Orao, Munda, Kolhe ar Mahle jạtren hoṛko. Onkoaḱ do apnar lakcar, ạri cạli menaḱtakoa. Jãhã do Baṅgladisom rạskạ ạri cạlite eṭaḱ eṭaḱ ṭhạ̃ire idi seṭer akat́. Inạ chaḍa hõ Sylhet jilạre ca kạmiạko lekate jug jug khon noko jạtren hoṛko ńeloḱ kana. Itihãs ńel lekhan, 54 serma reaḱ sadharon bachnaore MLA lekate bachaoena Santal Jibon Murmu, ona do paseć ḍher hoṛge babon baḍaea. Noako sanamaḱ bisoe tojbij katet́ sereń vedio benao lạgit́ Sylhet ṭoṭhako bachaokeda.Sylhet ṭoṭhare basoḱkan ạdivạsi hoṛkoaḱ jion cạrit ar kam-kaj sodor reaḱle kurumuṭu akada. Sãote bir buru, gaḍa, soḍoḱ, ca bagan selet́ Baṅgladisom reaḱ nanan parkan citạr sãote hoṛkoaḱ sae serma reaḱ oka sompok menaḱtako onage noa vedio hotete sodorakana.

Noa sereń acting rekin tahẽkana Baṅgladisom santal koṛa Agustin Murmu ar Sikha Clara Tudu. Inạ chaḍa hõ enećreko tahẽkana Sylhet ṭoṭharen adivạsi gaenahako. Band official reaḱ Youtube channel re sereń upload akana. Agustin Murmu doe menkeda, Mit́ṭen mońj kạmire jopoṛao khạtirte pạhilre Seṅgel band aema aema sarhaoiń emae kana. Ạḍi rạskạń aṭkareda onko sãote eyae sermań kạmi daṛeat́te ạḍi rạskạń aṭkareda. Noa laha arhõ Seṅgel band re barea sereń reaḱ acting hoelenrehõ niạ dhao reaḱ do thoṛa judạ machagea. Noa vedio re disom dulạṛ reaḱ mit́ṭen golpo sodorakana. Ale gaenahako jotowaḱ emoḱ reaḱle kurumuṭu akada. Bạṛtikaete Sylhet ṭoṭha reaḱ poribes ar aḍepase ạdivạsi hoṛkoaḱ jion jingi,  ạri cạli,lakcar  sereń hotete sodorakana. Inạ chaḍa hõ noa ṭoṭharen hoṛkoaḱ beohar ńelteń mạluṅena. Ạdivạsi Santal Somaj Kollan Porisod, Moulvibajar ren sabha mukhiạ Dulal Hasda doe menkeda, Seṅgel band vedio benao lạgit́ ale ṭoṭhako bachaoket́te ạḍi rạskạle aṭkareda. Alekoren gidrạ vedio reko selet́akana ar aekoaḱ oṛaḱ duạrko reaḱ́ citạr hõ vedio re phuṭạu rakaṕ akana. Raskạle ạikạueda sereńre aleaḱ ṭoṭhako ńelte. Onate sanam sećte goṛo emako reaḱle kurumuṭukeda. Noa sereńreko enećakana Baṅgladisomren namḍak eneć dol “Rahla Rimil” ar vedio graphy re tahẽkana “Art Express”. Saj sapaṕ horoḱ bandere goṛoe emkeda “Sanam Heritage”.  Sereń reaḱ music video re kạmi akada, Gram Bikash Kendro, Trisul Somaj Kollan Songstha, MH Agro ar Santali Canvas. Sereń music prodaction re tahẽkana SHOFAR STUDIO. Inạ chaḍa hõ joto sećte goṛo gopoṛoko emkeda Sylhet ṭoṭharen ạdivạsi ạyuriạko.

Nit Seṅgel band reko kạmi kana, Rinku Emmanuel Mardy-Vocal, Kamel Mardy-Dotara ar tirio, Shimul Mardy-tumdaḱ ar Ḍhol (eṭaḱ eṭaḱ ruruaḱ), Elias Murmu-Dramps ar John Hembrom Giter. Inạ chaḍa hõ band são jopoṛao menaea-Shamol Hembrom-tirio re, Himson Kisku-Vocal ar Giter, Kanchon Soren-Keyboard ar Deliance Sukmol Hasda-Rahaṛ ar Ṭamak sãote eṭaḱ eṭaḱ ruruaḱko.

Tumdaḱ ṭamak ar ḍhol reaḱ aṛaṅ ańjomlen khange mit́ dol santal kuṛi ti pẽpṛe oroṅ ar ti thayo kateko enejoḱkan mẽt́re bhasaḱa.Nonkanaḱ poribes khonge janamakana Santali sereń band “Sengel”. Baṅgladisomren juạn juạni, umerte laha akan hoṛaḱ mone sirsirạua. Rahaṛ ar Ḍhol reaḱ saḍete nonkage onkoaḱ aṛaṅre Santali sereń sodoroḱma.