Maraṅ Montri Sheikh Hasina do sandes lekate Bharo̠t disạmren President Draupadi Murmu ar Maraṅ Montri Narendro Modi lạgit́ noa disạm reaḱ ul-e kolkeda. Inạ chaḍa hõ ona disạmren Rajạri (Rajniitk) dol bharotio jatio congress ren sạbik sabha mukhiạ Sonia Gandhi ar eṭaḱ namḍak hoṛko lạgit́ hõ noa sebel-so̠ṛo̠m ul bele kol akada.

Bangladesh High commission aḱ mit́ ḍharwạḱ re menakana, Johar emako selet́ Baṅgladisạm ren Maraṅ Montri do̠ noa laha hõ Bharo̠t disạm ren oporom namḍak hoṛko lạgit́ ul-e kol akada. Noa bochor do̠ sandes lekate Rajshahi ṭoṭha khon tumạl akat́ Himsagar ar Leńgṛa jạt reaḱ ul-e kolkeda. Nowa Delhi (New Delhi) re Bangladesh High Commission kutnitik channel talate onko daman hoṛaḱ office re noa sandes do̠ kol seṭerena.

Kurbạni Eid samaṅre menaḱte sarkar do utui sunum (soabin) reaḱ dam thoṛae kom keda. Liṭer re gel (10) ṭaka komente botol sunum reaḱ dam 189 ṭaka ar khola sunum do 167 ṭaka kateće goṭa keda Banijo montronaloy.

Robibar (11 June) Banijo montronaloy ren senior socib Topon Kanti Ghosh noa khobore baḍae ocokeda. Onka leka nạṛkoṛ sunum reaḱ dam hõ bar ṭaka komente 133 ṭaka kateć niṭena. Inạ chaḍa katet́ rehõ cini, peaj, adhe reaḱ dam do baṅ ḍher hataṛoḱa mente lại sodorkeda.

Teheň tikin ber tǎyom Baṅgaldiso̠m Sarkari Pạhil siknạt  official ̃website re mit́ sodoroḱ  chapa sodorena baṅma Lolo Setoṅ Karonte Primary School Bondena 5-8 June Lolo setoṅ karonte disom reaḱ joto Primary School 5-8 June bond reaḱe jạhirkeda Prathomik ar Gonosikha montronaloy. Gidrạ koaḱ niropon hoṛmo reaḱ katha hudis ganḍon kateć Prathomik ar Gonosikha Montronaloy do noa goṭakeda. Ona goṭa lekate darakan 5 June (Sombar) khon 8 June (Lukhibar) hạbić School bond tahẽna.

Baṅgladisom 30 lakh korona ṭikạ emadea Pfizer. Sastho ar Poribar kollan montri Zahid Malek-e baḍae ocokeda noa ṭikạ do buster doge hisạbte hoṛko talare emogoḱa. Niạ haptage buster doge emoḱ do ehoboḱa.

Sombar (29 May) sastho montronaloy reaḱ mit́ dupuṛuṕ re uni do noa khobore lại saḍekeda. Arhõe baḍae ocokeda je, turui  gel (60) cetan umer ren hoṛko ponaḱ doge ar gel irạl (18) khon cetan umer ren ko do tesar doge korona ṭikạ ko ńama mente lại sodor keda.

Rajshahi reaḱ Tanor re mit́ ạḍibạsi santal hoṛ birud re phaka check niye 52 hajar ṭaka sahar dam bạki menaḱa mente adalotre 6 lakh 92 hajar ṭaka reaḱ eṛe mambla em akada sahar bạnij-beparić. Uni Santal hoṛ do Rajshahi reaḱ Tanor upạjilạ reaḱ Talondo union Mohon ạḍibạsi santal atoren Sushil Hembrom ren hopon kanae. Ar noa mambla akat́ić doe hoyoḱ kana Tanor upạjilạ reaḱ Chanduria UP ren Chanduria atoren Ashraf Ali Khan ren hopon Milon Khan. Uniaḱ do Chanduria bajar re sahar dokan menaḱtaea. Calaoen bar serma khonaḱ noa mabla lạgit́te Roton Hembrom do jaoge adalot re hạjiroḱ hoyoḱkantea.

Din mạńjri reṇgeć hoṛ bạhu ar barea kuṛi, barea koṛa gidrạ salaḱ ạḍi haron talate jiṅgi ko khemaoet́ kana. Roton Hembrom doe baḍae ocokeda je, 2017-18 serma seć Chanduria bajar ren sahar bạnij beparić Milon ṭhen khon phaka check niye ạlu cas lạgit́te 92 hajar ṭaka sahar bis bạkiteń hataoleda. Menkhan inạ serma eṭaḱ hoṛko lekage ạḍigeń loksanlena. Enrehõ ạlu rakaṕ kate 40 hajar ṭakań emleda. Menkhan sahar bạnij beparić Milon ona phaka check niye 2018 serma iń ńutumte 6 lakh 90 hajar ṭaka reaḱ adalot re mambla keda. Arhõe baḍae ocokeda je, maraṅ koṛa Sobuj Hembrom do College re paṛhaoḱ kana, kuṛi Beauty Hembrom hõ College re paṛhaoḱ kana, ar mit́ koṛa Sojib Hembrom do darakan serma SSC biḍạu-e ema, ar huḍiń utạr kuṛi do dosar kelas re paṛhaoḱ kana. 52 hajar ṭaka bodolte 6 lakh 90 hajar ṭaka reaḱ mambla bohoḱre dipilkaḱ do ạḍige kosṭo bujhạuḱ kana. Note tahẽn lạgit́ jãhãn bhiṭạ hõ bạnuḱte khas hasare rạput́ rạput́ jhạnṭi oṛaḱre ạḍi haron talate menaḱlea. Gidrạ ko hõ Iskulte bạń kol daṛeako kana. Nunạḱgan ṭaka cekateń ema onate ạḍi cintạ bhabnare menaḱlea.

Noa babotre mobile hotete sahar bạnij beparić ko kulikedere uni doe menkeda, jãhãn bạkige bạnuḱa. Noa ṭaka do Roton iń ṭhen khon dhar se pańca lekate hataoleda, Unạḱ unạḱ din paromena, menkhan nit hõ bae em ruạrạń kanteń mambla akada. Phaka check kagojre ṭaka reaḱ poriman begor bisạute check hataoḱa se baṅ onae baḍae hataoket́re, baḍae ńamena check re ṭaka reaḱ poriman bạisạu kate suhi hatao akana.

Utu sunum (soabin) reaḱ dam arhõ ḍherena. Sunum upjạn se arjoniạ somiti reaḱ mit́ ḍhạrwạḱ re men akana je,  Bangladesh Vegetable Oil Refiners and Bonaspati Manufacturers Association Ministry of Commerce ar Bangladesh Tariff Commission são gapalmarao kate sunum dam ḍher reaḱ ko goṭakeda.

Nawa niṭaḱ se goṭa lekate, nit́ khon mit́ liṭer soabin sunum 199 ṭaka kateć ạkhrinoḱa. Noa lahare 187 ṭaka kateć ạkhrińoḱ kan tahẽkana. Inạ chaḍa hõ 5 liṭer botol sunum reaḱ dam 960 ṭaka  paṛaoena. Noa hõ inạ laha do 906 ṭaka kateć ạkhrińoḱ kan tahẽkana. Nawate 54 ṭaka ḍherena. Eṭaḱ sećbon ńel lekhan, khola soabin reaḱ dam hõ liṭer re 9 ṭaka ḍherena. Khan onkage khola sunum reaḱ dam liṭer re 176 ṭaka paṛaoena. Onka leka khola naṛkoṛ sunum hõ liṭer re 135 ṭaka kateć ạkhińoḱa. Nõkõe nonka nawate rakaṕ akan dam lekate nit́ khon hạṭiạ bajar re sunum kiriń ńamoḱa.

Lukhibar 27 april 2023 setak’ bela  11 baja Amnura Adorsho Balika Ucco bidhaloy reak’ hol rum re gidra umer re ban bapla ar gidra koclon bond cetan mit’ cehaona cepet’ sabha hoyena. Ona cehaona cepec’sabhare maran mukhia hisabte selet’e tahekana manotan Quadrat -E-Khuda, Head Mahasoy Amnura Adorsho Girls High School , 03 no Jhilim Up panel chairman Md. Masud Parvej, Jhilim UP family planing FPI officer Md. Barkatullah , NAGR (National Agency for Green Revolution ) ren Program Officer Prodip Hembrom, Chapainawabganj sadar Somaj seba re somaj kormi Md. Moktazzaman, Asraful Islam , ena chada ho nia totharen mukhia, iskul koren mahasoy, dhorom ak’yurko ar sadharon hor ko selet’ ko tahekana. Nia sabha khon sanam hor cehaona ko emak koa jemon katic’ gidra aloko koclon ko ar gidra umer re aloko bapla ko ente nia kami lekhan gidra ko do aema lekan muhim reko parok’a. Nia cehaona cepec’ sabha do saprao leda World vison Bangadesh reak Strengthening Social and Behavior Change Project (SBC). Nia project ren ayuric’ Manotan Uttam Mondol doe badae ocoket koa ban ma nia kami cetan darakan bar bochor do nia chapainawabganj sadar ar sibganj upojila re nia cehaona kamiye kamiea.

Gonosastho kendro ren kạrigo̠l se benaoić ar birbanṭa Dr. Zafrullah Chowdhury do̠ noa dhạrti bạgiada. Moṅgolbar (11/04/23) April ńindạ Rajdhạni reaḱ Dhanmondi gonosastho haspatal re raran oktege jiwi do̠ calaoentaea. 81 serma umeran Dr.Zafrullah Chowdhury do̠ ạḍi din khonaḱ kidney reaḱ muskilre jạbun akan tahẽkana. Thoṛa din khon arhõ bạṛti muskilre paṛaoena. Onate calaoen Budhbar haspatal reko bhurti kedea. Gonosastho Nogor haspatal ren Maraṅ raranić metaḱme kidney ren raranić Proffesor Mamun Mostafi teheń nindạ 11:35 baja jokhen Zafrullah aḱ gujuḱ khobore lại jạhirkeda.

Zafrullah Chowdhury do̠ mit́ṭen Vascular surgeon kanae. Bạṛtikaete hoṛ koaḱ hoṛmo babotre ḍhere guni bhạbiḱkan tahẽkana. 1982 sermare ehoṕ akan Osud niti ạn ren maraṅ kạrigo̠l do̠ kanae Zafrullah Chowdhury. Uni do̠ jao ghuṛige disom ar disomren hoṛko lạgit́e hudis ganḍonoḱkan tahẽkana. Onate kurumuṭure tahẽkana disomre bhageaḱ kạmi lạgit́. Menkhan sạrige aćaḱ kurumuṭu do̠ purạu akantaea.

Zafrullah Chowdhury do̠ 1941 serma reaḱ 27 December Chottogram jilạ reaḱ  Raujan upạjilạ reaḱ Koypara atore janamlena. Ać baba aḱ ńutum do̠ Morshed Chowdhury ar gogo Hachina Begum. Ać baba do̠ polis officer-e tahẽkana . Gogo-baba ren Gel goṭen gidrạko modre Zafrullah Chowdhury do̠ pạhil gidrạ metaḱme jo̠to̠ boeha khon maraṅ utạriće tahẽkana.

Maraṅ montri Sheikh Hasini aḱ kukmu reaḱ sako noasa-hanasate Gapa pạhil dhao re̠l gạḍi paromoḱ kana. Biḍau legae lạgit́ ona gạḍi do Bhanga khon padda sako sećte Mawa aṛe hijuḱa. Note, 42 kilomeṭer re̠l hor reaḱ 91% kạmi sạt akana. Ar padda sako re re̠l line se hor benao kạmihora hõ 75% mucạt́ akana. Padda gaḍare 6.5 kilomeṭer sako benao do̠ maraṅ ekraṛ tahẽkana. Menkhan ona ekṛaṛre jit́ente padda gaḍare gạḍi ko calao hijuḱ kana. Inạ mit́ dintege re̠l gạḍi ar eṭaḱ gạḍiko calaḱ reaḱ hudis bhabna tahẽkan rehõ kạrigol ko khạtirte ona do̠ baṅ purạu akana. Sakore calaoen serma gạḍi calaoen tora khonge re̠l line benao kạmi ehoṕ akana.Padda sakore dhiri begor 6.15 kilomeṭer reaḱ re̠l line benao kạmi do̠ mucạt́ akana.

Gapa Moṅgolbar (04 April) pạhil dhao sako latarte re̠l gạḍi calaḱa. Bhanga khon mawa dhạbić 42 kilomeṭer paromoḱa re̠l gạḍi. Ona mul sakore re̠l line benao do ạḍi haron se koṭhinge tahẽkana mente Project Manager-e lại sodor akada. Padda sako re̠l sonjog ren project manager Afjal Hossen doe menet́ kana, Padda sako cetanre re̠l line benao do maraṅ ekṛaṛ tahẽkana. Dhaka khon Mawa, noa aṛe reaḱ toṛ do amdaj 75%. Ar Mawa khon Bhanga aṛe reaḱ toṛ do 91%. Ar Bhanga khon Jossore do 68%. Joto mit́te metaḱme amdaj 75%.     

Onka leka Re̠l montri Nurul Islam Sujon hõe menet́ kana, Trial oka do alele muruk akat́ ona do̠ 4 tạrik paromoḱa. As menaḱa, September cando bhitritege Dhaka khon Bhanga dhạbić re̠l gạḍi calao hijuḱa. Faridpur seć khon hijuḱ mare re̠l line menaḱa, ona joṛaolen khan jao hiloḱ nonḍe khonaḱ re̠l gạḍi calao heć daṛeaka.

Niạ dhao Myanmar khon Naph gaḍa paera paromkate Cox’s Bazar, Teknaf reaḱ Hnilar Jadimora ṭoṭhate hećena mit́ṭen bir Hạti. Nui Hạti aḱ umer do̠ 30-40 serma hoe daṛeaḱa. Bonbibhag ko hudiset́ kana, dikbhul se jomaḱ ko ṭonṭaote nui Hạti do̠ Naph gaḍae paera parom akada. Inạkate adha ghonṭa tahẽ tayom arhõ Myanmar te ruạṛ calaoena. Sokol hiloḱ (31 March) setaḱ ber 10:00 baja seć Hạti do̠ Naph gaḍa paera parom kate Teknaf reaḱ Jadimora ṭoṭhate hećena.

Noa khobor babotre Cox’s Bazar dạkhin Bonbibhag ren Teknaf ren Range ạpiser Mizanur Rahman doe menkeda, Setaḱre Naph gaḍa parom kate Parabon seć hijuḱkan mit́ṭen Hạti aḍepase hoṛko ar BGB ren sodosso ko ńelkedea. Inạkate bonbibhag re khobor emenre ińaḱ ạyurte Bonbibhag ren Hạti udhạr dol ko Hạti sabea mente adha ghoṭa ko kuṛumuṭu keda. Menkhan uni Hạti do̠ Parabon khon paera paerate Lal Diya seće mohnḍayena.

Hnilar union reaḱ 9 no.ward ren UP sodosso Muhammad Ali doe menkeda, Myanmar khon Parabon seć paera hećlen Hạti do̠ adha ghonṭa tahẽkate arhõ Myanmar tege ruaṛ calaoena. Setaḱre aḍepase hoṛko mit́ṭen maraṅ hoṛmoan Hạti Naph gaḍare paera paerate Teknaf seć hijuḱko ńelkedea. Ado Parabon ṭhen tahẽkan uni Hạti ńel lạgit́ duṅgut́ duṅgut́ hoṛ ko jarwayena. Unạḱ duṅgut́ hoṛ ńelte Hạti do̠ hante nahte dạṛ baṛaeye dhurạuena. Khan Bonbibhag ren kạmiạko ar aḍepase hoṛkoaḱ kurumuṭute ona mit́ hortege Myanmar ko ruạṛkadea. Nonkage okte okte Myanmar khon paera paerate noa Teknaf te Hạti ko heć baṛaḱa.