Baṅgladisom reaḱ adom adom ṭoṭhare Ḍaṅgra koaḱ mit́ lekan rog se ruạ do heć paṛao akana. One oka do Ḍaṅgra aḱ goṭa hoṛmo metaḱme hartare ḍambaḱ ḍomboḱ rakaboḱ kana. Ona rog do Lumpy skin (LSD) rog ko metaḱkana. Niạko dinre Ḍaṅgra merom ạsulet́ko hoṛko ạḍi botor ar cintare menaḱkoa. Bạṛtikaete Lumpy skin rog do virus kana. Noa virus rogte jạbun kate aema Mĩhũ Ḍaṅgra koko gujuḱ kana. Ḍaktar ko menet́ kana, noa rog do virus kana. Nit dhạbićte rog reaḱ jahan ran rehet́ge baṅ benao akana.

Noa rogte jạbunoḱkan Ḍaṅgra do pạhilte ruạ ńamkoa, jojom baṅ sanakoa. Bại bạite ruạ ḍher idilen khan mũ ar moca khon ulidaḱ onḍoṅoḱtakoa, jaṅga ar hoṭoḱ phulạuḱtakoa, jạbun akan Ḍaṅgra aḱ koṛam latar bar jaṅga reaḱ tala barabạrire daḱ jarwaḱa. Inạkate Ḍaṅgra aḱ goṭae hoṛmore ḍambaḱ ḍomboḱ rakaboḱa ar ona do seaḱa. Inạ chaḍa hõ hoṛmo reaḱ uṕ hõ ńuroḱtakoa, harta hõ poṭagoḱtakoa. Noa rog biseskaete lạṭu Ḍaṅgra do baṅ ńamet́koa, ente onkoaḱ do sahao daṛe ḍhergea. Huḍiń se kạṭić mĩhũ Ḍaṅgra ko ḍher ńamet́koa. Ạḍi algate noko doko jạbunoḱ kana. Cedaḱ je hoṛmore rog birud teṅgo daram reaḱ daṛe do komgetakoa. Mit́ Ḍaṅgra khon eṭaḱ Ḍaṅgra aḱ hoṛmore noa rog do sikrĩć-rõ hotete ucạṛoḱa. Onate noa rogte Ḍaṅgra ko bańcao ko lạgit́te mosari beohar ạḍi jạruṛ kana. Inạ chaḍa katet́ rehõ Ḍaṅgra ko sapha sạphi dohoko hoyoḱa. Jãhãe Ḍaṅgra aḱ hoṛmore noa rog reaḱ cinhạ ńeloḱre pạhilte jib janwar ren raranko são katha roṛ hoyoḱa se hapatal hõ idiko hoyoḱa. Enḍekhan okte nạpitre jạbun akan Ḍaṅgra cikit́sa ko ńamlekhan algategeko napae daṛeaḱte niropon hoṛmo ko ńam ruạṛ daṛeaḱa.

Mit́ atore ạḍi utạr gạ̃ṛĩ ko tahẽkana. Mit́ dhao mit́ṭen ho̠ṛe lại jạhirkeda je, uni do̠ Gạ̃rĩ kiriń koa ar mimit́ goṭen Gạ̃ṛĩ aḱ dam gel (10) ṭaka kateće emo̠ḱa. Ado̠ atoren ho̠ṛ hõko tạńkhikeda aḍepasere ạḍi utạr Gạ̃ṛĩ menaḱkoa, enḍekhan noa katha hõ ạḍi bạṛićaḱ do̠ baṅ kana. Khange atoren ho̠ṛko bir-gajaṛ ko senente Gạ̃ṛĩ sasaṕ kạmiko dhurạuena. Ado̠ ro̠ṛ saḍe akat́ katha lekage atoren ho̠ṛko ṭhen khonaḱ gel ṭaka kateć mit́ hajar (1,000) goṭen Gạ̃ṛĩ kirińket́koa. Inạkate arhõe jạhirkeda, nit khon do̠ mimit́ goṭen Gạ̃ṛĩ aḱ dam bargel (20) ṭaka kateć.

Atoren ho̠ṛko noa katha ańjomte arhõ ạḍi kurumuṭu salaḱ Gạ̃ṛĩ sasaṕko onḍoṅena. Onate ạḍi usạra aḍepasere Gạ̃ṛĩ koaḱ soṅkha hõ kom cabayena. Hoṛko hõ apan ạpin oṛaḱ ruạṛoḱ ko ehoṕena. Khange uni ho̠ṛ do̠ niạ dhao Gạ̃ṛĩ aḱ dam bargel mõṛẽ (25) ṭaka kateće goṭakeda. Note Gạ̃ṛĩ ko hõ nunạḱ ko komena je, Gạ̃ṛĩ sendra ńańamge ạḍi muskil.

Inạkate onkage arhõ mõṛẽgel (50) ṭakae ḍherkeda. Uni ho̠ṛ do̠ noa nawa dam jạhir katet́ aćaḱ bạnij bepar kạmi khạtirte so̠ho̠r bajarte senena. Ado̠ aćaḱ kạmi reaḱ dạyik do̠ aćren soṅge ho̠ṛe emadea. Niạ dhao uni ho̠ṛren são go̠ṛo̠ić do̠ khańca pereć Gạ̃ṛĩ oḍoḱket́kote ato ho̠ṛkoe ńel ocoket́koa. Are metat́koa, nit noko mimit́ goṭen Gạ̃ṛĩ iń ṭhen khon pegel mõṛẽ (35) ṭaka katećpe kiriń daṛeakoa. Ente nit́ ma ar bir-gajaṛre cele Gạ̃ṛĩge bạnuḱko. Enḍekhan mahasoe-e ruạṛ hećlen khan mõṛẽgel (50) ṭaka kateć uni ṭhenpe ạkhriń daṛeakkoa. Khange onko bebuj lelha ho̠ṛ do̠ ạḍi usạra uniaḱ kathateko mạluṅena ar jo̠to̠ Gạ̃ṛĩko kirińket́koa. Inạkate dosar hiloḱ khon uni ho̠ṛ hõe aṅgenena, inạ tayom nit dhạbićte unkin ho̠ṛ ona atore bạkin ńel ńam akana.

Ńel ńelte goṭa bạrsạ din parom calaoena. Enrehõ goṭa disomre serma dak reaḱ ạḍige ṭonṭa paṛao akana. Jao sermage bạrsạ din do ekal goṭa khet-baṛge ar hor-bir ko daḱte cehel cepel ar reaṛge hisit́ hisit́e hoe-et́ kan tahẽkana. Menkhan nes bochor do goṭa bạihạṛ khet-baṛge ko setaoṅte rohoṛ cabaḱ kana. Khan nes bochor aghãṛ hoṛo rohoe re cas-abadko ạḍi muskilreko paṛao akana. Onate niạ dhao do aghãṛ hoṛo rohoe lạgit́ casa se cas abadko kiriń daḱte hoṛo ko rohoe kana, ar kiriń daḱ areć bakhrate ạḍi aṭ ṭaka paesa hõ khoroć lagaoako kana, one okoe do daḱ ṭonṭate nit hõ hoṛo bako abad daṛeaḱ kan. Daḱ bạnuḱte hoṛo rohoe ar khet baṛge losot́ reaḱ jãhãn bhiṛge bạnuḱa. Bạihạṛ kore jãhãn nahel reaḱ saḍe hõ baṅ ańjomoḱ kana. Goṭa bạihạṛ ḍaṅgra merom ko ạtiń baṛaeda.

Entebon aṭkar daṛeaḱ kana, niako din re tinaḱ kajaḱ lolo setoṅ din calaḱ kana. Setaḱ tora cando rakaṕ khon ehoṕkate goṭa din bhor ạḍi kajake setoṅeda. Sanam casa hoṛko ghane ghane serma sećko beṅget́ rakaṕet́ kana. Noa as ar bhorsa katećge je, Tinre sisirjạuić serma daḱe jạṛia mente. Ar rohoe akat́ hoṛo khet́ko serma daḱe ńamte napaete hara buruḱ. Sanamko inạ mit́ as ar bhorsa ko dohoyet́ kana.  Cedaḱje niạko dinre daḱ reaḱ ạḍi jạṛuṛ menaḱa.  

2023 sermaren SSC pạṭhuạ koaḱ biḍạu jo do darakan 28 July sodoroḱa. Ente noa babotre Dhaka sikhnạt board ren Chairman professor Topon Kumar Sarkar-e baḍae ocokeda. Enhiloḱ setaḱ 9:00 baja jokhen biḍạu reaḱ jo do Maraṅ Montri aḱ tireko calaea. Inạkate uni hotete pạhilte jo sodor kạmihora do ehoboḱa. Ado goṭa disomre mit́ sãote biḍạu reaḱ jo do sodoroḱa.

Mit́din Jisu do Jerikho naṅgraha talateye parom calaḱkan tahẽkana. Ona naṅgrahare mit́ kisạ̃ṛ hoṛ Sakhae ńutuman mạsul uṭhạuiće tahẽkana. Sakhae do Jisu ńeńel sanayede kan tahẽkana. Uni do geḍrageye tahẽkante Jisu bae ńel ńam daṛeae kana.

Onate uni do dạṛ laha kateć mit́ṭen loa darereye dećena. Jisu do onḍe seṭerente coṭ seć koyoḱkate metadea, ‘ E Sakhae , ma pheḍoḱme. Teheń do amaḱ oṛaḱreń tahena.

Sakhae do ạḍi usạra loa dare khone pheḍena.  Ar rạskạte aćaḱ oṛaḱte Jisue idi kedea. Noa ńelte adom hoṛ kodo ạṛiskateko menkeda, ‘ Jisu do mit́ṭen bạṛić hoṛ ṭhen tahen lạgit́e calaoena.’

Unre joto hoṛ samaṅre teṅgo kateć Sakhae  Jisui metadea, “ Ńelme Probhu, ińaḱ dhon reaḱ adha do reṅgeć orećkoń emakoa. Judi jahãeaḱ ṭhok katiń hatao akat́ khan pon doboṛ iń emakoa.”

Khan Jisu do Sakhae seć beṅget́ ạcur kateye menkeda, “ Teheń do noa oṛaḱre bańcaoge hoe akana. Ente Iń do kại hor ńańam ar kại khon bańcaoko lạgit́ Iń heć akana.

Chapainawabganj jilạ reaḱ Amnura Mission re 30 june sokolbar din bhor Hul Mãhã manot akhaṛa hoe purạoena.  Goṭ̣a din daḱket́ re hõ hoṛko̠ sanam dea giḍikate Sidu-kạnu-Cad-Bhairo, Phulmoni-Jhono ar ona Hulre ko goć akat́ko sanam hoṛ koaḱ atma sulukre tahen at onkoaḱ ona birbanta kạmi diḱsạ ruạṛ lạgit́ ạḍi jhukate HUL mãhã manotena.

HUL Mãhã manoe akhṛa do saṕṛaoledako Uttarbango Adivạsi Forum chapainawabganj jilạ komiti.  Niạ akhṛare mạnjhi haṛam hisạbte seṭ̣eren tahekan Uttarbango Adivasi Forum chapainawabganj jilạ komiti mukhiạ Mn. Luis Tuḍu. Maraṅ peṛa hisạbte seteṛe tahẽkana 03no. Jhilim UnionParisad ren chairman Golam Lutful Hassan (Lutfor) , Manotan peṛa hisạbte selet́ko tahẽkana Ạdibasi onolia Mn. Mithusilak Murmu, NAGR (National Ageny for Green Revolution) ren maraṅ mukhiạ Stephen Soren, Uttarbango Adivạsi Forum kendrio  komiti chairman Mn Hingu Murmu.  03no. Jhilim Union Parisad ren Panel chairman ar 02 word member Md. Masud Parvej, Uttarbango Adivạsi Forum chapainawabganj jilạ komitiren secretary Kornelius Murmu, Treasure Modon Hasda, Amnura Mission Manḍer ren hapṛam Mn. Devid Dhonai Hembrom, Amnura Mission Primary  School ren mare mahasoe Mn. Horidas Hembrom, Niạ akhṛa calaoré tahẽkana Uttarbango Adivạsi Forum Kendro komitiren Totho ar Porcar secretary Prodip Hembrom.

Hul mahã manot lạgit́ pạhil re rally hoena ar rally mucạt́re Sidu-kạnu-cadbhairo-phulo-jahno diḱsạ lạgit́ tearakan pinḍ re Manot Baha ḍạlić ko emkeda Manotan peṛa ar sanam jarwa akanko. Niạ ko tayom sanam jarwa akanko Sidu-kanu tahkoaḱ kạmi diḱsạ ruạṛ lạgit́ gapalmarao hoena. Ona galamarao re Sedae Sidu-kanu-cad-bhairo-phulmoni-Jhano ar sanamko ko Hul let́ ona reaṅko nagam ko lại sodo̠rkeda. Galmarao rea nãwa piṛhi kho̠n Kusṭia Islamic University ren pạṭhuạ Nilmoni Kisku ar Babudang Alor Pathsala ren mahasoe Mn. Bimol Hasda kathakin roṛkeda. Niạ piṛhi renko sanam mońjte oloḱ paṛhaoḱ cet́ kate nãwate ar hõ Hul reaṅ ko hoho keda nitok hoyogot́kana nahacar ko cetan. Tobe ge unokte jorolen sidu -kanu aḱ joroyen mayam do̠ sạriaḱ got́a.

Mit́ṭen oṛaḱre barea Capṛa kin tahẽkana. Unkin do ona oṛaḱ reaḱ isin basaṅ metaḱme daka-utui oṛakregekin tahẽkana. Ado unkin do ona daka-utu oṛaḱ khonge jomaḱ jom katećkin tahẽnkan tahẽna. Mit́din unkin dokin tạṅkhikeda, oṛaḱ reaḱ fridge re ạḍigan mońj mońj jomaḱ doho menaḱa. Nonkate unkinaḱ monre laloc se lob hećena.

Khange unkin Capṛa kin guni bhạbiyena, ceckate onko hoṛaḱ mẽthã danȧnkate fridge re bolokate jomaḱkin kombṛoea mente. Nonka kurumuṭu kurumuṭute mit́din ạt́ ńamkate fridge rekin boloyena. Bolo tayom ona bhitrirekin eset́ tahẽyena. Ado Fridge bhitrire reaṛte ekalkin ruạ utạrena. Menkhan ńelme inạko dinrege oṛaḱren hoṛko thoṛa din lạgit́ peṛaḱko sen akan tahẽkana. Onate fridge hõ bondge tahẽyena. Okoe hõ bạnuḱko khạtir fridge bako jhićlet́te bhitrire Oxygen reaḱ ṭonṭa paṛaoena. Ar baḍaeabon cele jib janwar hõ Oxygen begor bańcao bako tahẽ daṛeaḱa. Inạkate ona Oxygen ṭonṭatege unkin Capṛa do bhitriregekin goć hapeyena.

Cecet́aḱ: Jãhãnaḱ jinis cetanre Lob se laloc lekhan kại hoyoḱa Ar kạilere gujuḱ lekan dosare paṛaoḱ hoyoḱa.

“Jisui menkeda, mit́ hoṛren barea hopon kin tahẽkana. Ar unkin modre huḍińić do apate metadea, E baba amak dhon durib reak ińre paṛaokoḱ bakhra den em kạtińme. Ado acaḱ tahẽkan taeaḱe hạṭińat́kina. Khange thoṛa din tayomte uni huḍińić hopon do sanamaḱ ko samṭao kate mit́ṭeć sạṅgiń disomteye oṅḍoḱ calaoena .” Luke 15: 11-13.

Jisu noa golpo hotete okaṭaḱ  sikhạuna emoḱe menet́kan ona do hoyoḱ kana, kạite pereć akan jion ar sarthoporota, Isorak’ dulạr , helmel ar Uniaḱ ektiạri khon pharaḱ sect́bo senoḱkana. Kạian hoṛ okoe do uni  juạn koṛa leka heseć sekreć ar rạskạ jion khemao  karonte, Isor okaṭaḱe emakade jotowake nosṭokeda. Ar mucạt́re uniaḱ jion do  ạḍi haron kosṭo ar dukre paṛaoena. Isor tuluć jopoṛao baṅ tahẽlen khan jion do baṛijoḱa.

 “Ado cetaoenteye menkeda…” Luke 15:17. Mit́ṭen kạian hoṛ Isor ṭhen hijuḱe menlekhan, khạṭige kại reaḱ golam khon ruạṛ hijuḱ hoyoḱtaea. Ar Isor khon begar tahẽlenkhan cet́ko muskil hoe daṛekoḱa, ona lạgit́ hõ hudis tahẽn jạruṛa. Mãhĩr monte Baba ṭhen ruạṛ hijuḱ, kại lạgit́ kastao ar ikạ khojoḱ ar Baba okaṭaḱe khojoḱ kan ona leka calaḱ monsubạ tahẽn jạruṛa.

“Khange beret́kate ać apat́ ṭhene hećena. Menkhan sạṅgińreye tahẽkanrege apat́ doe ńel ńamkedea ar mãyã hećadea…..Luke 15: 20, Joto kristan go-baba noa do bujhạu jạruṛa, akoren gidrạko at́ len khan cet́ leka ńam lạgit́ko dhaoṛa-dhạuṛi baṛaea, onkage Isor hõe sendra kana. Onate at́ akan gidrạ rukhiạko lạgit́ pạtiạu salaḱ koejoṅ jạruṛa, tin dhạbić uni gidrạ serma Baba then ạurie seṭeroḱ .

At́ hopone ruạṛ hijuḱ ar Babawaḱ ataṅ daram Jisu okalekae men ocoyet́, noa ghoṭna khon sikhạuna do hoyoḱ kana:

• At́ akan manwako lạgit́ Babawaḱ mãyã
• Isoraḱ dulạṛ onko lạgit́ ạḍi khạndrińa ar onko at́ akanko ruạṛ hijuḱ lạgit́ ghane ghuṛiće cintạyeda, are bhabnaḱ kana.
• Tinre onko kạian hoṛ Isor ṭhenko ruạṛ kana, Isor do onko ikạ kako kana , mãyãwako kana, dayawako kana ar aćren gidrạ hoyoḱ lạgit́ ạidạri emako kana. Ar sạrige okoe Isorko ńam baṛaeyede Mạsiaḱ gujuḱ hotete Sonot Jiuaḱ daya, Isoraḱ dulạṛ onkore tahẽna.
• Kạian hoṛko ruạṛ hećlen khan Isor do asambheṛ rạskạḱa.

“Ente nui ińren hopon do goćgeye tahẽkana are jiwet́ ruạṛ akana, at́ geye tahẽkana are ńamakana.” Luke 15 : 24. Isor ṭhen khon calaḱ mane bhiḍiko okalekako adoḱkan. Isoraḱ helmel khon okaṭaḱ jion pharaḱge, ona do goćgea. Ar Isor ṭhen ruạṛ hećlen khan jaejug jion ńamoḱa.

Meskoć

Barea guṅgṛạ hoṛkin ropoṛ kana:

Pạhilić: Hạṭiạ sećem calaḱ kana se cet́?

Dosarić: Baṅ, hạṭiạ sećiń calaḱkana.

Pạhilić: O, iń doń hudiset́ kana, paseć hạṭiạ sećem calaḱ kan.

Dosarić: Baṅ, enan khoniń metam kana tho hạṭiạteń calaḱ kana.

Sombar (26 June) setaḱ 9 baja khon goṭa din metaḱme 72 ghonṭa se pe din bhitrite hoe-daḱ ḍher daṛeaḱa mente Abohaoa Odhidaptor-e menet́ kana. Ente bar-pe din khonaḱ ńeloḱ kana sermare hende rimil hoete oṭaṅ baṛae kana. Daḱ rimil rakaboḱkan rehõ hoete kaṭaoḱ kana. Onate Abohaoa Odhodaptor-e meneda, pe din bhitrite hoe-daḱ bạṛti daṛeaḱa. Cedaḱ je,nit do bạrsạ din paṛao akana.

Onka leka teheń (Robibar 25 June) reaḱ Abohaoa re menakana, Khulna, Borisal, Chottogram ar Sylhet ṭoṭha reaḱ adom adom jaega ar note Rangpur, Rajshahi, Mymensingh, Dhaka bibhag reaḱ adom adom ṭoṭhare hoe-daḱ heć daṛeaḱa.