Mit́din mit́ṭen goḍo mit́ṭen hirạ kecaḱe ut́keda. Hirạ ren mạlik hirạ bae ńam daṛeaḱte ńindạ bae jạpit́ daṛeaḱ kana. Uni mạlik do sanam goḍo goć cabako lạgit́ mit́ṭen sikạriại ạgukedea ar hirạ ńam oḍok lạgit́ ṭhikại emadea. Uni sikạri goḍo goćko lạgit́ goḍowaḱ tahen ḍinḍạtei seṭeren khane ńelkeda hajar  hajar aema goḍo mit́ṭen cetanre ar mit́ṭeć goḍo sogobogo ko gitić akana. Ar mit́ṭeć goḍo do pharaḱre ać eskarge galasaṅe jạpit́ akada.

Sikạri do eskar menae uni goḍogei tak kedea. Ar saṕ kateć laće cirạ ket́taea ar hirạ onḍoḱ kate mạlike jimạwadea. Ar sikạri do mạlik ṭhen khon kạuḍi ńam kate oṛaḱ seć mohonḍaḱe dhurạuena.

Un okterege mạlik do uni sikạriye kulikedea cekate hajar hajar goḍo tala khon uni hirạ ut́ić goḍo dom ńam kedea?

Sikạri do roṛ ruạṛe em keda, je noa do ạḍi alga kạmi kana.  Lelha hoṛ jokhon aćkageko kisạṛoḱa ,un oktere onko do akoren jạt tuluć bako mesaoḱa ar bako gateḱa.

Niạko dinre Dengue ruạ do goṭa sohor-bajar ar ato ṭoṭhakoreko chạplau akana. Menkhan noa ruạte ạḍi usạrạ tharbasao baṅkate, jotokote mit́te kurumuṭu kate dengue ruạ birud teṅgo daram lekhange rukhiạ ńamoḱa. ‘Cikit́sa khon teṅgo daramge niropon ar bogea’.- Rotary reaḱ noa slogan samaṅre dohokate Rotary club of Dhaka Kawran Bazar, Besarkari songtha NAGR (Nationl Agency for Green Revolution), Amnura Lutheren Mission Haspatal ar RCC –Amnura reaḱ goṭate Lukhibar (03.08.2023) setaḱ 10:30 baja jokhen Chapainawabgonj sodor upajila reaḱ 3 no Jhilim union reaḱ Amnura Adarsho Girls High School ren pạṭhuạko talare dengue ruạ cetanre aodhanoḱ lạgit́te mit́ṭen sabha do hoyena.  Noa sabha ạyurre tahẽkana Amnura Adarsho Girls High School ren maran Mahasoe Md.Kudrat-e-Khuda. Un jokhen selet́e tahẽkana NAGR (National Agency for Green Revolution) ren program officer Prodip Hembrom, Amnura Lutheren Mission Haspatal seć khon Subash Baskey, Ona School ren Assi: mahasoe Md:Saikul Islam, Md: Abdul Aziz. Dengue babotre galmarao mucạt́re pạṭhuạ gidrạko talare dengue birud aodhanoḱ lạgit́te Leaftlet em hạṭińena.

Pạṭhuạ ko talare Dengue ruạ cet́ lekate chạplạuḱ kan noa babotre kathae roṛkeda Prodip Hembrom. Arhõe roṛ sodorkeda je, oṛaḱ beṛhaete, baha ṭob re, ḍab cokaḱ, ṭin reaḱ kuiṭạ, plasṭic emanteaḱ jiniskore sĩkṛĩc ko belea, onate onako jaegare daḱ baṅ jawa ocoe hoyoḱa ar oṛaḱ beṛhae aḍepasekore sapha sạphi dohoe hoyoḱa. Inạ chaḍa hõ gitić okte mosari beohar lạgit́ sanamkoe udgạuket́koa. Aḍepase kore jahae dengue ruạte jạbun lenkhan Amnura Lutheren Mission Haspatal re dengue ruạ ko biḍạu daṛeaḱ mente baḍae ocokeda Subash Baskey. Inạ chaḍa katet́rehõ  seṭer akan eṭaḱko hõ dengue ruạ birud teṅgo daram lạgit́te oṛaḱ aḍepase ar apan ạpin sapha sạphi tahen jạruṛa mente ko lại sodorkeda. Dengue ruạ teṅgo daram ar kabjao lạgit́ hoṛko aodhan ko nonkan kạmihora khạtirte Rotary club of Dhaka Kawran Bazar, Besarkari songstha sãota se somaj lahantire kạmikan NAGR (National Agency for Green Revolution), Amnura Lutheren Mission Haspatal ar RCC-Amnura aema aema  johare emat́koa. Jemon noa kạmihora nonkage calao idiḱ ona nehõre dohokeda.

NAGR (National Agency for Green Revolution) re Program officer ar RCC-Amnura ren sabha mukhiạ Prodip Hembrom-e lại sodorkeda, noa kạmihora do Chapainawabgonj sodor reaḱ aema ṭoṭha ar Bazar kore ạyuroḱa ar reṅgeć nacar hoṛko talare Rotary seć khonaḱ Mosari ar aodhanoḱ lạgit́te Leaflet em hạṭińoḱa.

Huḍiń khonge santal hul program ko reń selet́ akana. Oloḱ paṛhao oktere hõ ạḍi jopoṛa ar Rajshahi Radio Center re kothika,Natok, Madol program ạyur lekan dạyik kạmiko purạu hoe akana. Ińaḱ ạyurte pạhil Santal Hul cetanre pegel minutes reaḱ Natok do benao hoelena ar jao serma 30 June do ona natok Rajshahi Radio Center khon ko ańjom ocoḱa.

Calaoen 2014 serma do ińaḱ kạmi organization khon pạhil Santal Hul mãhã manao ganao hoelena Bangladisom reaḱ utạr nakha mucạt zila chapainawabgonj Masudul hoque institute re. Maraṅ peṛa hisạbte seṭere tahẽkana Manotan Upozila Nirbahi Officer ar zila ren sanam Ạdivạsi ạyurko. Un oktere acka ge bohoḱ re hudis bololena; Bhognadihi do ńel ạgu jạruṛa.

India te do 7 dhom judạ judạ ṭhạ̃i doń hiri akada, office meeting, training, seminar, conference kore. Menkhan Bhognadihi hiri do ạt bạń ńam akat́ tahẽkana. Aema din tayom re hõ calao hoelena; 2022 serma reaḱ 23 Octobor cando do hiri reaḱ ạt hoelena Santal koaḱ hul ṭhạ̃i Bhognadihi. Noa hiri reaḱ pạhil hudis do tahẽkana Bangladisom ren pạhil santal onoliạ Mithusilak Murmu ar iń huḍiń onoliạ. Menkhan ạlińaḱ noa plan doe baḍae ńamkeda; Santali phạrsi te roroṛic Manotan Torbjorn Lied, one uni do 7 sagor 13 somudro ko parom katet́ Bangladesh ar India teye heć akan. Norwegian disom ren hoṛ kan rehõe Santali phạrsiye baḍae te ać hõ santal doe ńumugoḱ kana. Uniaḱ hõ ạḍi rạskạ nonkan maraṅ santalkoaḱ ithihãs ṭhạ̃i ńeńel reaḱ. Ạḍi rạskạ selet́ pene hoṛ ar aleren hiri soṅge koṛa iń mitạ Pastor Stephen Soren ren kora Alfred Soren. Ạḍi aema lekan hudis ko bohoḱ reye kạmiet́ tahẽkana Santal hul ṭhạ̃i Bhognadihi hiri babot re. Jit ato khon oḍoḱ katet́ thoṛa sạńgiń calao katet́ gele ńamkeda Sidhu Kanhu parkey. Gạḍi cetan khon gele koyoḱada ar aleren hiri soṅge koṛa bạbu Alfred soren doe lại ale kana; mimit́ jaega ko reaḱ khaṭo ithihãs. Nãhãḱ jugre ti re menak smart phone te mon pereć vedio ar photo koń hataoeda; apnar lạgit́ document hisạb te dohoe. Gạḍi calaḱ kana bin ńel jaegate, mon do khadbadak kana ar tinạḱ sạńgin, aema lekan kukli monre heḍejoḱ kana. Khange Alfred bạbu doe ehoṕ keda nitoḱ dobon seṭer akana. Aleaḱ noa hiri ren Alfred Soren do juạn ko ren ạyurić kanae; aema lekan social, lahanti ar political kạ̣mi kore jopoṛao menaea. Jit ato khon onḍogoḱ okterege aćren gate peṛako doe baḍae oco akat́ ko tahena. Onate ạḍi koyoḱ hor reko tahẽkana. Pạhil do parkey le hirikeda, one okare do jao serma manotan santal ạyurko doko seṭeroḱa. Mit́ bar naksa le hatao keda sidhu kanhu tạkinaḱ sonate tol akat́ leka jhak jhak mural re. Manotan Bangladisom ren onoliạ Mithusilak Murmu do Sidhu kanhu aḱ bohoḱ ti hoṛmo ko doe joṭet́ ket́takina, adoń hudiseda paseće kuliket́kina cekate non maraṅ santal hul doben hoe purạu oco leda?

Gate oḍok tora gele ńapam kedea Santal Youtuber; ạḍi rạskạ selet́ khaṭo interview doe hatao keda. Nitok do unkinaḱ oṛaḱ hiri. Sạrige aema lekan hudis do tahẽkana mon ontore menkhan hiri katet́ ekal bạń milạu daṛeaḱ kana. Santlak ạricạli lekage parkom ko bilat́ lea arle duṛuṕena, ḍoboḱ johar, boge judạ ko baḍae katet́ aema suk-duk reaḱ gapalmarao do hoyena. Ńapam hoelena Sidhu Kanhu ren erạl piṛhi renko soṅge. Sidhu Kanhu tạkinaḱ oṛaḱ duạrko ńel katet́ ạḍi bạṛti khạndri khon doń hudis keda; nonkan ṭhạ̃ire tahẽkatet́ nunạḱ maraṅ hul hoe purạu do ạḍi maraṅ dhat monan kạmi ge tahẽkana unkin lạgit́. Menkhan nit hạbićte Bhognadihi re maraṅ hul hoelen rehõ maraṅ pherao se lahanti do baṅ hoe akana. Ạḍi bạṛti gapalmarao hoyen noako bisoeko selet́ Alfred Soren soṅge.     

Khạṭige sanam ko gebon baḍaea je cedaḱ non maraṅ santal hul do hoelena. Enterehõ ạḍi khaṭote Internet khon iń tumạl akada ape sanamko disạ oco bon lạgit́.

Santal hul reaḱ khaṭo talika:

January, 17, 1784

Bhagolpur ar Rajmahal ren Collector Cleveland aḱ gujuḱ. Tilka Murma aḱ ạyurte pạhil santal hul.

1985 serma

Tilka Murmu aḱ phạsi.

June 30, 1855

Bhognadihi atore mit́ jarwaḱre Sidhu Kanhu aḱ porcar ar nirại somaj metaḱme okare do jãhãn besuluk bạnuḱanaṅ onkan somaj benao rakaṕre gel hajar hoṛkoaḱ ekraṛe hataokeda. Ar Kolkata samaṅre pạhilko michilkeda.

July 7, 1855

Santal hoṛkoaḱ tire namḍak mahajon Kenaram ar Bhogot ar Dighi thana ren koclon ocoḱkan daroga Moheslal Dotto ńutuman hoṛkin goć ocoyena. Khan Santal hul reaḱ Seṅgel do ḍigdịgạuena.

July 11, 1855

Hul bond lạgit́te ạn rukhiạ bạhiniko sãote meroj baroj ren kolga hećena.

July 12, 1855

Sidhu Kanhu chand Bhaero aḱ ạyurte huhul ko pakuṛteko boloyena  ar Rajbari cetanre akham ko ehoṕena.

July 13, 1855

Kadamshai re Seventh Regiment bạhiniko ko hạjirena. Ar Maraṅ utạr lạṛhại do janamena.

July 15, 1855

Pạkuṛ pheḍre Torai gaḍa aṛe re santal ko sãote seventh Regiment ko lạṛhại tapamena.Unre santalko bhagao ocoyena.

July 16, 1855

Peyalapur reaḱ lạṛhạire hõ Iṅrạjko bhagao ocoyena.

July 20, 1855

Birbhum reaḱ dạkhin-pạchim reaḱ Taldanga Saithia hạbić ar utạr-pạchim reaḱ Bhagolpur ar Rajmohol khon Bhagolpur zila reaḱ utạr-purub bhag se nakha dhạbić do huhul ko se bidrohi koaḱ thamgạḍi ṭhạ̃i kana.

July 21, 1855

Katna atore iṅrạj bạhini har ko manaokeda.

July 23, 1855

Birbhum reaḱ namḍak bạnij-bepar ṭhạ̃i dhandhaserena.

July 24, 1855

Barharara-Barhait ḍahar re Raghunathpur re Murshibad ren Magistrate Mr.Tupud hotete ạyuroḱkan Iṅrạj bạhinikoaḱ tire Chãnd ar Kạnhu kin bhagao ocoyena.

July 29, 1855

Captain Sheruil Gordon hotete Munhan ar Munkatro do dhandhaserena.

July 30, 1855

Leftenent hotete arhõ eyae goṭen santal ato dhandhaserena.

August 17, 1855

Iṅrạj sarkar hotete soprotoḱ lạgit́te ghosonapotro porcar ar santal koaḱ ghosonapotro doko bemuńjurkeda.

September 16, 1855

Mochia, Kasjola, Ramporgona, Sundra Majhi aḱ ạyurte Oporbadh thana hõko luṭ keda.

October reaḱ dosar hapta 1855

Iṅrạj sarkar hotete Osamorik ạn jạriyena.

November 10, 1855

Iṅrạj sarkar hotete samorik ạn jạriyena.

January 3, 1856

Samorik ạn protahar.

January 23, 1856

Sujarampur re Grant saheb aḱ kuṭhi luṭena.

January 27, 1856:

Leftenent phegan saheb hotete ạyuroḱkan Bhagolpur hill Rengers bạhini ko são lạṛhại tapamre santalko bhagao ocoyena.

February dosar ar tesar hapta 1856

 Iṅrạj koaḱ gulite Sidhu goćena.

February 23, 1856

 Kanhu Murmu doe phạsi goć ocoyena.

Mucạt re noa geń mena je, delabon santal hopon babon tahen duṛuṕ thir, oloḱ mabon paṛhaḱ mabon lahaḱ mabon apnar, gharońj, somaj ar santalko bon rakaboḱ ma dhạrti ren manowako ṭhen.   

“Sakṛa duạrte boloḱpe, ente okaṭaḱ hor bạṛić seće idipe ona reaḱ duạr do osargea ar hor do phaelaogea. Ar ḍher hoṛge onateko boloḱ kana. Menkhan okaṭaḱ hor jion seće ạyur idi ona reaḱ hor do sakṛagea ar duạr do suṛućgea. Ar thora hoṛge noa doko sendra ńamet́kana” (Mathae 7: 13- 14.).

1. Osar duạr do baṛić gea;

Jisue meneda, duạr do osargea ar hor do phaelaogea ona hor do bạrić seće idikoa, ar aema hoṛge ona horteko boloḱ kana. Aema hoṛko moneaḱ kana hor do onko lagit́ ṭhikgea. Menkhan Jisue meneda ona hor do barić seće idikoa. Aema hoṛko pạtiạuḱ kana joto dhorom hoṛ do mit́ jaegarege ko sen akana. Jisue meneda aema hoṛge bhul hor re menaḱkoa. Ente osar hor okaṭaḱ do bạṛti hoṛ ko pạtiạuḱ kan ona hor do bạṛić seće idikoa  mane norok seće idikoa .  

2. Saḳra duạr do Serma jion seće idia;

Menkhan Jisue menakada, ar mit́ṭen eṭaḱ hor menaḱa. Ona reaḱ hor do kạṭić gea ar duạr do sakṛagea.  Ar ona hor do jion seće idia ar ạḍi kom hoṛ ona doko ńam baṛaeda. Ona jion do hoyoḱ kana jaejug serma jion. Ona serma jion ńam hoyoḱ tabona menkhan aema hoṛge ona jion ńam lagit́ baṅko kurumuṭueda. Niạ oktere aema hoṛge serma paradeshre boloḱ lagit́ sana menaḱtakoa, menkhan Jisue meneda, Joto hoṛ do bako bolo dareaḱa. Ạḍi kom hor ̣serma jion ko  sendra  ńama, ente onḍe calaḱ hor do sũṛũćgea.

“Duạr do Ińge. Ente jahaege Iń  sećte bhitriteye boloḱ uni do bańcaoe ńama.” (Johan 10:9) Jisue meneda, Ińge duạr do, Ińge ona sakṛa duạr do, okaṭaḱ hor do serma jion seće idi.    

Jisue meneda, “ Ińge hortet́, sạriạḱtet́ ar jion , Iń hotete baṅkhan okoe hõ Baba then ohoko calao daṛelena.” Johan 14:6.

Jisue meneda, Jodi serma rajte boloḱe menjoṅ khan onḍe calaḱ lạgit́ mit́ṭenge hor menaḱa ar ona do hoyoḱ kana Probhu Jisu Mạsi Pańjaye. Onate Masi aboe cet́ abon kana aema hoṛge jion hor te baṅko calao daṛeaḱa, eken okoe do mạ̃hĩr salaḱ , kastao tuluć,  ar apnarge baṅoḱkankoge unige Jisu songei calao dareaḱa.

Sedae reaḱ katha, mit́ṭen birre Jel gharońj tahẽkana. Ona gharońjre mit́ṭen haṛam hoṛ, aćren koṛa ar goṛom gidrại tahẽkana. Uni haṛam jel do umerte ạḍi laha akane tahẽkana. Onate jãhãnaḱ kam-kaj kohõ bae daṛeaḱkan tahẽkana. Ado uni haṛam do aćren hopontet́ cetanrege ṭehãḍoḱkan tahẽkana.

Mitdin haṛam ren hopontet́ do hạṭiạte senente ńeloḱte maraṅ utạr khạclạḱe kiriń ạgukeda. Inạkate ona khạclạḱre apat́tet́e bhorao kedete bir talare giḍi oṭokedea. Khange uni jel hopon do eneć khilạḍ baṛakate oṛaḱe hećenre ać haṛam bawaḱ katha apat́tet́e kulikedea. Apat́tet́ doe menkeda, “am haṛamba do ạḍige haṛam cabayena, cet́ge bae kạmi dareaḱ kana. Eken bạṛti jalao are jańjalet́ kana. Onate bir talareń doho oṭokedea. Onḍe tạruṕ menaea, unige nahaḱe jomea. Enḍekhan aboaḱ jańjal cabaḱa. Apat́tet́ aḱ katha ańjomte uni jel hopon doe menkeda, menkhan baba mit́ṭenem bhul akada. Disạ kate ona khạclaḱem ạgu lekhan, amem haṛam lenre ṭaka paesa khoroć kate khạclạḱ baṅ kiriń lagaoạńa. Aćren gidrạwaḱ katha ańjomte apat́tet́e tharbasaoena ar aćaḱ bhule aṅgoćkeda. Ado ene harephare bire senente jel haṛam oṛaḱe ạgukedea.

Sikhạuna: Aboren gogo-baba são cet́ lekabon beohar, aboren gidrạ ko hõ abo são onkageko beohara.

Sokolbar (28.07.23) tạrik do SSC biḍạu reaḱ jo sodorena. Goṭa disomre SSC bidạu ko emlet́ gidrạko modre adom doko pass akada arhõ adom do bako pass daṛeada. Pass ket́ gidrạko ạḍi rạskạre menaḱkoa, menkhan bako pass daṛeaḱ gidrạko do ạḍi bhabna ar cintạre menaḱkoa.

Onka leka Dinajpur, Birampur upajila reaḱ Chondipur atoren pea santal jawa boeha SSC biḍạure GPA-5 ko hameṭ keda. Noko pea boeha kuṛi koṛa mit́ sãote GPA-5 ko hameṭket́ rạskạ khobor aḍepasere pasnaoena. Bạṛtikaete ako ghrońjren joto hoṛ ạḍiko rạskạḱ kana. Onko pe boehawaḱ ńutum do Lasar Sourov Murmu, kuṛi boeha Mery Moumita Murmu ar Jenivia Murmu. Onko pea boeha do Birampur Pilot High School khon SSC biḍạureko selet́lena. Onko gidrạ ren apat́ ńutum do Johannes Murmu, one uni mit́ṭen Be-sarkari songstha re kạmi kana, ar eṅgat́tet́ do Sohagini Hasda. Pea boeha modre Lasar Sourov Murmu do Engineer, ar kuṛi boeha do daktar hoyoḱ reaḱ monsubạ menaḱtakoa. Ạkinren gidrạ koaḱ biḍạu jo ańjomkate ạḍi kusi rạskạre eṅgat́ apat́ hõ menaḱkina. Ente unkinaḱ kukmu do onko gidrạ liạge. Gidrạ koaḱ tayom daram kukmu purạuge nit ạkinaḱ jion reaḱ maraṅ kukmu do. Onate sarkaraḱ goṛo ar joto hoṛaḱ daya ạsirbad kin khojkeda.

Sạrige noa khobor do eken ako gharońj ren lạgit́ rạskạ khobor do baṅ kana,  goṭa disomren santalko lạgit́ ạḍi gorob ar rạskạ reaḱ khobor kana. Nonkage jemon santal ko laha calaḱ ma. 

Nia ko din ạḍi bạṛtikaete dengue ruạ chạplao akana goṭa disomre. Noa ruạte jạbukate aema hoṛ doko gujuḱ kana. Onate niạ ko dinre Haspatal kore hõ dengue rogi te pereć akana. Enrehõ hoṛko talare jãhãn sontor se cetonge bạnuḱa. 

Dengue ruạ cet́ lekate chạplạuḱa?

Dengue ruạ ḍher do sikṛĩć ko hotete mit́ hoṛ khon eṭaḱ hoṛ ṭhen ucạṛoḱa. Cedaḱ je, sikṛĩć tinre dengue ruạte jạbun akan hoṛe gere unre uniaḱ hoṛmore mit́ lekan virus do boloḱa. Inạkate uni sikrĩć hotetege eṭaḱ hoṛaḱ hoṛmore noa ruạ ucạṛoḱa. Onate dengue ruạte jạbunoḱ hoṛko mosari bhitrire dohoko hoyoḱa. Jemon uni khon eṭaḱ hoṛaḱ hoṛmore ruạ baṅ ucạṛoḱ. Bạṛtikaete okoe koaḱ hoṛmore Immunity se ruạ birud teṅgo daram reaḱ daṛe sạkti komge onkan hoṛge ạḍi usạra noa ruạteko jạbunoḱ kana. 

Dengue ruạ reaḱ cinhạ ko:

1. Lac hasoa.
2. Ạḍi bạṛti daḱ tetaṅa.
3. Ghane ghane beć se beć baṅ bondoḱa.
4. Beć sãote mãyãm hõ onḍoṅoḱa.
5. Jambe khon mãyãm joroḱa.
6. Turui ghonṭa khon hõ ḍher ghạṛić racate baṅ hoyoḱa.
7. Sahẽt́ re muskil hoyoḱa.
8. Hoṛmore laṅga aṭkaroḱa.
9. Hoṛmo reaḱ tapmatra komoḱa.

Dengue ruạ khon rukhiạ reaḱ upại:

1. Oṛaḱ aḍepase sapha sạphi dohoe hoyoḱa ar okare hõ daḱko baṅ jawa ocoe hoyoḱa.
2. Oṛaḱ aḍepase kore giḍikaḱ bạlṭin, ṭob , plasṭik kore daḱ jarwaḱa, onate bin jạruṛoḱ jinis ḍasbinre giḍikaḱ hoyoḱa.
3. Jạpit́ okte mosari ṭaṅgao hoyoḱa.
4. Ti dhạbić aṅgroṕ-kićrić ko horok hoyoḱa.
5. Sikṛĩć khon rukhiạ ńam lạgit́ sikṛĩć ran cream beohar hoyoḱa hoṛmore ar oṛaḱre do jaoge Aerosol spray hoyoḱa.

Dengue khon rukhiạḱ lạgit́te cetanre emen niạmko leka calaḱ ar manao ganao hoyoḱa. Enḍekhan sanam hoṛko khạṭige dengue ruạ khon rukhiạ bon ńamte napae bon tahena, Ar nonkate niropon hoṛmo hõbon hameṭ daṛeaḱa.

Bochor ạcuroḱkan são sãote arhõ̠ he̠ć seṭerena Santal jạtkoaḱ heṛan dinisạ mãhã 30 Jun. Noa din do̠e disạ ocoet́ bon kana Santal, Ạdibạsiko cetanre hoelen sanam lekan santhao, sibạṛ, bhinạ bhini, be̠bạsut, ar disom, korṭ kacahạrikore deko, Iṅrạjkoaḱ chinạpuri beohar, oka karonte do̠ janamlen Santal hul 30 Jun, 1855 Khr. Noa hulre ạḱyurkoko tahẽkana Sidhu, Kạnhu, Cãnd, Bhaero bhạyạdiko. Bud ạkil udgạu suhũḱ ar goṛo gopoṛoko ńamleda pargana, desmạńjhi, mạpạńjhiko ar ona elakakoren bạ̃ṛtikae Santal ar eṭaḱ eṭaḱ Ạdibạsiko kho̠n. Ado̠ noa Santal hul reaḱ motlob ar jo̠sté do̠ ce̠t́ tahẽkana? Lạilek do̠ dho̠rage tahẽkana- a) Sanam lekan sibạṛ, koclon ar bạḍạriạ deko koaḱ chinạpuri beohar bond. b) Siḱbạṛiạ deko jumidar, sudkhor mahajon, jotdar, ṭho̠kbaj, phạsiạra bepariko elaka khon laga ńirko. ar c) Iṅrạj ar onkoaḱ sason bebostha humcạḱ giḍiete akoaḱ raj sason ṭarhao. Un o̠kte̠ Santal Ạdibạsiko jeleka sibạṛ arko santhao ocoḱkan tahẽa, enḍekhan onkoaḱ buj lekate akoaḱ hul reaḱ motlob/jo̠s do̠ ṭhikge tahẽkana. Ghạṭti do̠ tahẽkana sanam se̠nte apnaraḱ daṛe jothat leka baṅ ajmao daṛeaḱ, lạṛhại calao ar ṭarhao reaḱ daṛe apnarre baṅ tahẽkan, apnaraḱ monsubạ se̠ motlob Iṅrạjko batao ocoko reaḱ targhar baṅ baḍae, noakoge ghạṭti se̠ obhab do.Tobe jạt hisạbte jaoge gorob reaḱ katha do̠ noage, bir banṭa leka jiwiko alae akada, apnar bako soprotlena. Khan arhõ kukli- Santal hul reaḱ jo̠s do̠ tinạḱgan arjao akana?  Hẽ, ro̠ṛ ruạṛ do̠ muskilgea !

Nit do̠ arhõ nia jugren juạnko ṭhen kukli- amaḱ jo̠s do̠ ce̠ť? Ińaḱ jo̠s do̠ ce̠t́ kana ? Ạdibạsi hisạbte  aboaḱ lahanti reaḱ dorson do̠ ce̠t́ ?  Noa maraṅ salmesal somajre ekal mesal milạu utạroḱ ? Se̠ sirjạn reaḱ nanahunạr muṭhạn ṭikạu do̠ho̠ete jạt bhinạ bhini hudis bạgi giḍikate jo̠ṭo̠ jạt, dho̠ro̠m, pạrsi, legcarren ho̠ṛko são nirạite girobasoḱ ? Rajạri reaḱ ilin/cap begor, man manot liạ apnar somaj reaḱ lahanti ar disom lahantire jo̠to̠koaḱ se̠pe̠le̠t́ ?Nindara Ạdibạsi sikhnạt juạnko disom, jạt ar apnar somaj, legcar, pạrsi, apnar man manot, kạmi ńam reaḱ ạt ar noa karonte apnar gharońj khon ạḍi jhạlre tahẽn hoyoḱkan emanko liạ gạhir hudisoḱko ce̠t́et́ kana. Hẽ, noako babot do̠ aboko hudistege lekkan tabona. O̠kte̠ parom calaḱkan buhire apnar buhạl paromoḱ do̠ ekal baṅ ṭhik kana. Noṅkaete do̠ khạṭige bại bạite mohor meṭaoḱ do̠bre bon paṛaoḱa; ar baṅ khan jaejugge eṭaḱkoren gulạm leka kaṭa latarre bon tahẽna, oka do̠ sirjạn reaḱ bemanot. Galmaraore jopoṛao menaḱ khạtirte arhõ̠ menkoḱa- mit́ bar Ạdibạsi ho̠ṛko apnar jo̠m ńũ reaḱ aotanko (নিরাপত্তা) tear daṛeakat́a ṭhikge. Menkhan, adomko do̠ ać aćtege somaj ar apto gusṭiko khon pharak akanko tahẽn kana. Onko do̠ somajre ce̠t́ kạmirege bako lagaoḱ kana ar noa lạgit́ ce̠t́ dạnd hõ bạnuḱtakoa. Arhõ mit́ bar cetan sikhnạt juạnko do̠ napae napaeko cintạ bhabnaea, mońj kạmikoko ti jaṅgawaḱa; menek oka do̠ ako bhitrire mot reaḱ bemil, apayurre bekusi, bintirić, dho̠ro̠m liạ re̠ṭe̠pe̠te̠ eman karonkote maraṅ ranajoṭ do̠ baṅ tear rakaṕ kana. Lạṭu ho̠ṛko bhitrire hõ̠ niạko karonge. Thoṛa sikhnạt koṛa kuṛiko aemage pharak disomre kạmi khạtirte menaḱkoa. Onḍe nanaparkan muskilaḱkote tenakan, adomko do̠ arhõ be̠sapha, belek jiṅgire se̠le̠t́ akan, okoe do̠ ruạ hasore jạbun akan menaḱkoa.Nõḱõe noṅka abo Ạdibạsi ho̠ṛ hopon koaḱ jingi hal do̠.

Khan, mucạt́re arhõ juạn koṛa kuṛiko ṭhen kukli- Santal hul reaḱ motlob/ jo̠s tahẽkana. Nahãḱ noa dhạrti ińaṅ cintạ bhabna jugre amaḱ jo̠s do̠ ce̠t́ ? Amaḱ ar somaj lahantie reaḱ dorson do̠ ce̠t́? Jo̠steť do̠ ńel ṭhik hoyoḱa, miť sãote ar baṅ khan eskar hõ̠ lahaḱtege hoyoḱa, hante nhote hoṇḍealen khan do̠ baṅ hoyoḱa.Tin din aboaḱ mon ontorre jothat jo̠stet́ baṅ gaḍaoḱa, bin-hiskạ jotokote kajakte babon lahaḱa undin abo somaj reaḱ as akan jo̠stet́ joaoḱ do̠ baṅ ńeloḱa.

Jisu do Thomae metadea, “ Ińge hortet́, sariaḱtet́, ar jion. Iń hotete baṅkhan okoe hõ Baba ṭhen ohoko sen daṛelena.” (Johon 14:6).

Teheń okoeṭaḱ hoṛ hõ Jisu ńele lạgit́ ar Uniaḱ katha ańjom lạgit́ hahaṅkarte bako calaḱ kana. Ar naṅgraha kore uniaḱ hoho hõ baṅ ańjom ńamoḱ kana. “Nasaretren Jisu onkatey taṛam idiyeda”. (Luke 18:37) menkate okoe hõ bako hohoyeda .

Enrehõ, teheń noa katha do sạriaḱgea je Jisu bae ńel ńamoḱkan rehõ abo sãore menaea, hore uduḱ abon kana are ạyuret́ bona. Dulạṛ katha abo ṭhene jạhiret́kana. Ar okoeko do eṭaḱ ṭuạrko se reṅgećko se ruạre jạbun rugi lạgit́ ko kạmiyet́ Jisu do onkoe goṛo are bhorako kana. Onate abo mońj tahen lạgit́ ar Jisuaḱ daya ar ạsirbad ńam lạgit́ uni ṭhen  nehõr  hoyoḱ tabona ar Jisu do abo soṅgete tahena ar aboaḱ nehõr katha ko ańjomtabona.

Calaoen 30 April Secondary School Certificate (SSC) ar ona man reaḱ biḍạu ehoṕlena. Ona biḍạure are (9) goṭen sikhnạt board reaḱ tabere bargel (20) lakh khon hõ ḍher pạṭhuạ gidrạ biḍạu ko em akada. Ado ona SSC bidạu reaḱ jo do darakan Sokolbar (28.07.23) July sodoroḱa. Biḍạu reaḱ jo sodoroḱte eken mit́ din bạki menaḱa. Sokolbar setaḱ 10:30  baja tala do nij nij sikhnạt ṭhãona khon ar Online re mit́ sãote sodoroḱa.

SSC Pạṭhuạ ko do cet́ lekate biḍau jo ko baḍae daṛeaḱa, ona hõ Dhaka Madhomik ar Ucho Madhomik sikhnạt board pusṭaute baḍae ocokeda. Dhaka sikhnạt board reaḱ mit́ ḍhạrwạḱre menakana, SSC pạṭhuạ ko do sikhnạt board reaḱ website educationboardresults.gov.bd re bolokate Roll no, Registration no, biḍạu reaḱ ńutum, bochor metaḱme biḍạu emakat́ serma se sal ar sikhnạt board select kateć submit baṭon re click lekhange jo baḍae ńamoḱa. Inạ chaḍa hõ mobile re hõ jo baḍae ńamoḱa. Ona lạgit́ Message option re bolo kateć SSC ol hoyoḱa ar space emkate board reaḱ ńutum pạhil pea akhor ol kateć arhõ space emkate roll no ol hoyoḱa arhõ space emkate bidạu reaḱ bochor se sal ol kateć 16222 nombor re kol hoyoḱa. (Udharon lekate-SSC DHA ROLL YEAR) nonka ol hoyoḱ. Noa ko ol kate ṭhikte kol lekhange biḍạu reaḱ jo do message hotete baḍae ńamoḱa.