Ado̠ ona din hiloḱ do̠ uni Lelage lahare se̠nkate ona darereye de̠ć akana. Ado̠ tala ńindạyen khan uni babṛẽ̠ kuṛi hõ̠ mit́ jho̠ṭ sandesante ona dare ṭhengeye calaoena. Ado̠ be̠ṅge̠t́ baṛaket́ do̠ cele hõ̠ bae ńe̠l ńamlet́ko khan do̠e duṛuṕena; ado̠ ghạṛi ghạṛi ato se̠ngeye be̠ṅge̠t́et́ kana. Ado̠ ńe̠l ho̠rteye mo̠ko̠ńoḱ kan khaće khãs khũsiḱ kana. Ado̠e me̠ne̠t́a, Hape se̠, he̠ćlen khan do̠ nãhãḱ khub lekań e̠ge̠rea. Ado̠ onka me̠n baṛakateye thirena. Arhõ̠e me̠nket́a,Pase̠ lahate he̠ćkate oka se̠nreye oko akan; pase̠ ińgeye ńe̠l mõ̠ńjeń kan.

Ado̠ onka hudiskate bae ho̠ho̠ go̠t́ket́a? Ado̠ sạri uni Lelage dare co̠ṭ khon bae go̠ṅ go̠t́ket́te ado̠e me̠nket́a, No̠nḍe̠ye̠ de̠ć akana, ińe ńe̠l mõ̠ńjeń kana. Ma ãṛgo ho̠doḱme.Delaṅlaṅ calao ho̠doḱa. Marsalen khan do̠ nãhãḱ ạḍi lajao. Ado̠ sạri unikin neṇḍalet́ ko̠ṛa do̠ bae he̠ć ho̠t́lena. Ado̠ nui Lelage uni ko̠ṛa me̠nkatekin mohṇḍayena. Ado̠ calaḱ calaḱte tin sạṅgińre co̠ṅ, kathae,ado̠ aṅgayen khane ńe̠l oromkede do̠e Lela kan. Ado̠e metae kana, Hape, Lela, laṅ duṛuṕlenge. Ado̠kin duṛuṕena.Ado̠ unreye metae kana, E̠ Lela, ạḍi bhabna nitoḱ do̠ń ạikạuet́a. Cedaḱ nun sạṅgiń do̠m ạgukidińa? Pạhilre bạre̠ń ńe̠l oromlen khan do̠ o̠ho̠ń he̠ćlena. Cedaḱ nonka do̠m e̠ṛekidińa? Eṭaḱ ho̠ṛ so̠ṅge̠ galmarao tahẽ̠kana; uni do̠ bae he̠ćlena. Am do̠ o̠ko̠e lạiat́metem he̠ćena? Pạhilre hutkạm nonkań baḍaele khan oṛaḱ khonge o̠ho̠ń oḍoklena.

Ado̠ Lelae me̠nket́a, Nit do̠m ńe̠l oromkidińa. Cele,ado̠m se̠noḱa se̠ baṅ? Oṛaḱ khon hõ̠ tho̠ iń do̠ bań riạu ạgu akat́mea. Apan ạpintegelaṅ he̠ć ńapam akana. Ado̠ nit hõ̠ baṅ ceka akana;e̠nte ruạṛem me̠net́ khan do̠, ma ruạṛme. Ado̠ kuṛiye me̠nket́a, onage tho̠ń bujhạu baṛayet́a, baṅ do̠ń ruạṛ baṅ do̠ baṅ. Ado̠ ato ho̠ṛ hõ̠ko baḍaeket́a nitoḱ do̠, phalna ho̠po̠n kuṛi do̠ Lela tuluće ạṅgir calaoena me̠nte. Onkate goṭa ato pasnaoena nitoḱ do̠, ạuriń ruạṛlen khan ho̠ṛko landawańa. Ado̠ Lelae me̠nket́a, Ona katha ma sạrige; sanam ho̠ṛko ro̠ṛgea nitoḱ do̠. Arem ruạṛlen khan do̠, am karo̠nte amren ạpum barem hõ̠ko biṭiolkotama. Ado̠ khange sạri onka ro̠ṛ baṛakate khange uni kuṛi do̠ bhabnate tumbut́kate ạḍi bạṛiće raḱket́a. Ado̠ raḱ mo̠ko̠ńkateye me̠nket́a, Delaṅ nitoḱ do̠, jãhãtegem idiń , o̠nte̠geń calaḱa. Ado̠ eṅga apa khon hõ̠ń bạṛićena. Am satatege nitoḱ do̠ń ja lekaḱgea, cahe̠m go̠jeń, cahe̠m do̠ho̠ń. Me̠nkhan niạkore do̠ balaṅ tahe̠na; jãhã se̠nge, me̠nkhan sạṅgiń nõ̠ḱlaṅ calaḱa.

Ado̠ onka me̠nkate sạrikin beret́ena;ado̠kin calaḱ kana. Ado̠ calaḱ calaḱte, kathae, tin din badre co̠ṅ mit́ṭaṅ maraṅ utạr naṅgraha bajarkin tioḱket́a. Ado̠e Lelae me̠nket́a, Iń do̠ jo̠maḱ hõ̠ bań ạgulet́a, nõ̠ḱõ̠e ado̠ amaḱ jo̠m jo̠mtege nun sạṅgińlaṅ he̠ć akana. Alaṅ ṭhen jo̠maḱ menaḱre jãhãn cạkriń siṛialaṅa. Ado̠e me̠nket́a, Acha bogege, ma siṛime. Ado̠ sạri ona bajartekin bo̠lo̠yena, ado̠ mit́ṭaṅ rạput́ rạput́ oṛaḱrekin ḍerayena. Ado̠ o̠nḍe̠gekin tahẽ̠ aṅgayena. Ado̠ dosar hiloḱ setaḱ jo̠khe̠ć kacahạri se̠n kuli baṛako lạgit́e calaoena. Ado̠ khange muktiạr kạmireye bhurtiyena, ado̠ phạriạdi ho̠ṛ hõ̠ nuige ạḍiko khusiadea. Ar do̠rkhasto̠ko nuigeko o̠l ocokedea,ar o̠l  ńe̠lte e̠ṇḍe̠nić hạkim hõ̠ ạḍiko khusiadea. Ado̠e saj baṛayen khan do̠, ho̠ṛte̠t́ khub ḍho̠b koṛae ńe̠leńa; ado̠ ạkinaḱ basateye calaoen khan do̠, uni koṛa hõ̠ nui ńe̠lteye khusi go̠t́ena.

Mit́ṭe̠n atore̠ mit́ṭe̠n casae tahẽ̠kana ar uni casawaḱ mit́t̠ẹn kaera bagwan tahẽ̠kantaea. Ona kaera bagwan kho̠n kaera ạkhriń kate uni casa do̠e ạsuloḱkan tahẽ̠kana. Mit́din mit́ṭe̠n gạ̃ṛĩ do̠ uniaḱ kaera bagwanre̠ he̠ćkate̠ tinạḱgan bae jo̠ma, ona kho̠n ḍhe̠re̠ bạṛićet́ tahẽ̠na. Uni gạ̃ṛĩ do̠ kaera darekoe rạput́ giḍie̠t́ kante̠ casa do̠ gạ̃ṛĩe ne̠hõ̠radea, dareko alo̠m bạrijtińạ, dinạm 10 go̠ṭe̠ć kate̠ kaerań emama. Ona ańjo̠mte̠ gạ̃ṛĩ do̠e mo̠ne̠keda casa do̠ń le̠ṭe̠ćakadea, Niạ takrege thoṛa ḍhe̠r ńo̠kiń kho̠je̠a. Gạ̃ṛĩ do̠e metadea, 10 go̠ṭe̠ć do̠ baṅ 20 go̠ṭe̠ć emo̠go̠ḱ hoyoḱa. E̠nre̠hõ̠ casa do̠e ḍubuḱkeda.

Onkage dinke̠ din uni gạ̃ṛĩaḱ kho̠j do̠ ḍhe̠r idie̠ntaea. Nito̠ḱ do̠ 100 go̠ṭe̠ć kate̠te̠ kho̠jo̠ḱkante̠ casa do̠ ạḍi muskilre̠ye̠ paṛaoena ar ạḍi ãṭ duke̠nte̠ raraḱe̠ e̠ho̠ṕe̠na. Uniaḱ raḱ ńe̠lte̠ casa bo̠ko̠t́te̠t́ do̠e kulikedea cedaḱe̠m ho̠mo̠r jo̠ṅkana dada?

Ado̠e lạiade khane̠ me̠nke̠da, niạ lạgit́e̠m bhabnaḱkana? Ṭhikgea gapa do̠ iń kaerań e̠maea. Amaḱ ṭupri ar kićrićko bo̠ćạńme̠ ińaḱ kićrićko ho̠ro̠ḱkate̠ am do̠ cokoko̠ḱme̠. Dadat́te̠t́aḱ bhe̠s ho̠ro̠ḱkate̠ bo̠stare̠ kaera bo̠lo̠kate uni do̠ mit́ṭe̠n pạsiye oḍaokeda ar o̠nḍe̠ do̠ eṭaḱ kaerae do̠ho̠kada. Gãṛĩye he̠će̠n khan casa bae ńe̠l orom kedete̠ye̠ kho̠j go̠t́keda, o̠ko̠rtiń ińaḱ 100 go̠ṭe̠ć kaera bele. Ado̠ unie uduḱadea hane̠ bo̠stare̠ menaḱa, hamalge te̠ bạń tul daṛeaḱkana. Gạ̃ṛĩ do̠ rạskạte̠ kaera bo̠sta sasaṕe do̠n calaoena ar pạsire̠ye̠ pạsi ako̠ṭe̠na. Tayo̠mte̠ gạ̃ṛĩ do̠ raḱ raḱ ate̠ye̠ me̠nkeda, e̠ṛe̠kate̠pe̠ pạsikidińạ aṛaḱkạńpe̠ aṛaḱkạńpe̠. Ado̠kin metadea amaḱ ṭhạ̃i do̠ nito̠ḱ ciṛiạ khanare̠. O̠nḍe̠ge am do̠m jutuḱa.

Ado̠ uni gidrạ̣ do̠ o̠nḍe̠ge duṛuṕkateye raḱet́ kana.  Ado̠ ona atoren mit́ṭaṅ babṛẽ̠ kisạ̃ṛ setaḱrege uni hõ̠ kulhi mucạt́ se̠nge ṭạnḍiteye se̠nlena. Ado̠ uni gidrạ raraḱ kan ńelte uni ṭhene calaoena. Ado̠e metae kana, Henda bạbu, cedaḱem raḱet́a? O̠ko̠e saõte no̠nḍe̠ do̠m he̠ć akana? Ado̠ uni gidrạ do cet́ hõ̠ bae me̠nlet́a. Khange ado̠ uni babṛẽ̠ do̠ o̠nte̠ no̠te̠ye be̠ṅge̠t́ baṛayet́a, ado̠ o̠ko̠e hõ̠ bae ńe̠l ńamlet́ko khan do̠e hudis baṛaket́a, baṅma, Nui gidrạ do̠ oka kho̠n co̠e atu he̠ć akana. Ado̠e dayayente uni gidrạ do̠ ać oṛaḱteye idikedea. Ado̠ ać mo̠ne̠reye me̠nket́a, Nui gidrạren oaris bako oḍokoḱ khan do̠ iń ṭhenge me̠ro̠m gupi nui gidrạ do̠ń do̠ho̠yea. Ado̠ onka bujhạukate sạri uni gidrạ do̠ uni babṛẽ̠geye idikedea. Ado̠ uni ṭhen tahe̠n tahe̠nteye hara ńõ̠ḱen khan me̠ro̠m bhiḍi gupiko dhurạukedea, ado̠ onkogeye gupia.

Ar uni babṛẽ̠ ho̠po̠n gidrạko do̠, kuṛi koṛa jo̠to̠ gidrạge, iskulte o̠lo̠ḱko calaḱa. Ar uni me̠ro̠m gupi gidrạ do̠ Lela ko ńutumkedea. Ado̠ me̠ro̠m bhiḍi ạuri aṛaḱkore onko gidrạ do̠ko metaea, Iạ ya Lela, delabo iskulte, puthiko ar sileṭko idikatalem. Ado̠ sạri onako idi uni Lela hõ̠ ạḍiye chuṭạuḱa. Ado̠ din hiloḱ onako do̠ko idi ocoyea, ar onkoren eṅgat apatkin hõ̠ onakoe idite do̠ bạṛić do̠ bakin metaea, ar onko sãotege daka hõ̠ko emaea. Ado̠ o̠nḍe̠ khon ruạṛ he̠ćkate me̠ro̠m bhiḍiye aṛaḱkoa. Ado̠ din hiloḱ onka iskulte se̠n se̠ntege uni hõ̠ mit́ bar akho̠re ńe̠l cet́ket́a; ado̠ inạko akhor̠ge me̠ro̠m gupi ṭhen dhuṛikoreye o̠l baṛaea. Ado̠ enka ńe̠l ńe̠ltege jo̠to̠ akho̠re cet́ket́a. Ado̠ ńutumkoe o̠l baṛa ocokoa.Ado̠ enkakatege ńutum o̠lo̠ḱ hõ̠e cet́ket́a.

Ado̠ko metadea onko iskul gidrạge, De̠n ya, iń hõ̠ mit́ṭaṅ puthi emańpe. Ado̠e metat́koa, Am do̠m cekaea puthi do̠? Ado̠e me̠nket́a,Iń do̠ e̠ṛe̠ e̠ṛe̠ iń paṛhao baṛaea me̠ro̠m gup ṭhen. Iń do̠ eken hoṛiń mạluṅ baṛakoa, a baṅkhan iń cekae baṅ e̠nte̠ iń do̠? Ado̠ sạri mit́ṭan mare puthi o̠ṛe̠ć oṛećaḱko emade khan ạḍ̣iye rạskạ go̠t́ena. Ado̠ ona puthi ńe̠l ńe̠ltege khube o̠l hewayena. Ar onko iskul gidrạko samaṅre, se̠ onko eṅgat apat samaṅre do̠ bae paṛhao baṛaea.Onko paṛhao jo̠khe̠n do̠ e̠ke̠ne ańjo̠m hapekaḱgea, ar ṭạnḍire khan do̠ sereńateye paṛhaoa.

Ado̠e hara idiḱ kan khać do̠ bud hõ̠ oḍok kantaea, ado̠ tahe̠n tahe̠ntegeye hara juạnena. Ado̠ onko babṛẽ̠ ho̠po̠n gidrạko hõ̠ko hara juạnena. Khange ado̠ mit́ din do̠ sileṭ puthiko idi oṭoako jokhenge kuṛi koṛ apaṅgiroḱ reaḱ ciṭhiye ńamkeda. Ado̠ ona paṛhaokate jo̠to̠ katha bujạhuket́a, baṅma, niạ din hiloḱ naha phalna dare buṭạ ṭhenlaṅ se̠n ńapamoḱa; ona katha jo̠to̠e  baḍaeket́takina.

Meskoć

Mit́ṭen huḍiń gidrạ ać babae kuliede kana-

Baba: E beṭa, okoeṭaḱ bạṛtim dulạṛlinạ, iń se am gogo?

Gidrạ: Bana hoṛge.

Baba: Enḍekhan iń do America ar am gogo do France-te senlen khan okoe sãotem senkoḱa?

Gidrạ: Baba iń do France teń senoḱa.

Baba: Bujhạuḱ kana, iń khon am gogoge bạṛtim dulạṛea.

Gidrạ: Baṅa, France do ạḍi ãṭiń dulạṛa.

Baba: Ar iń do France te ar am gogo Amerika te senlen khan, okarem senkoḱa?

Gidrạ: Amerika te.

Baba: Cedaḱ?

Gidrạ: Ente noa laha iń gogo são France teń senlena.

Baba: Ado raṅgaote mengot́keda, am gogo ar iń mit́ sãoteliń senlenlen khan, am do okarem senoḱa?

Gidrạ: Nonḍegeń tahẽna.

Baba: Cet́ karonaḱte nonḍ̣em tahẽna?

Gidrạ: Ente iń doń laṅga cabayena, cedaḱje, thoṛa laha France ar Amerika khoniń ruạṛ heć akana.

Mit́din kathae, barea pusi mit́ṭen piṭhạkin ńamkeda. Mit́ṭen do̠e me̠nkeda, “Ińge co̠ pạhilmań ńe̠l ńamket́.” Dosarić do̠e me̠nkedam, “Iń do̠ń halaṅ maṛaṅke̠t́a, ona iạte̠ ińgeń ńama.” Ona piṭhạ lạgit́ ạḍi ãṭkin re̠ṭe̠pe̠ṭe̠ḱkan tahẽ̠kana. Ona takre̠ mit́ṭen hạ̃ṛũ do̠ o̠nḍe̠ye̠ se̠nena. Unkin pusi do̠ uni hạ̃ṛũkin metadea, je̠mo̠ne bicạrkatakin.

Ado̠ unkin pusi do̠ apan ạpinaḱ katha hạ̃ṛũkin lạiadea. Hạ̃ṛũ do̠e metat́kinạ, “Noa piṭhạ reaḱ do̠ soman ho̠k menaḱtabena. E̠nte̠ mit́ṭen do̠e ńe̠l ńamket́a, ar mit́ṭen do̠e halaṅkeda, ona iạte mit́ so̠manteń hạṭińabena. Do jãhã se̠n kho̠n tulạ ạguibe̠n.” Unkin pusi do̠ hare̠ phare̠kin ńir se̠nena ar mit́ṭe̠ć tulạkin ạguadea. Uni hạ̃ṛũ do̠ ona piṭhại bar kecaḱkeda ar mit́ kecaḱ do̠ mit́ se̠ć ar dosar kecaḱ do̠ dosar se̠će̠ do̠ho̠ke̠t́a. Tul aṭkarkate̠ye̠ ńe̠lke̠t́ do̠ mit́ se̠ćma kạṭić talaṅ hamalen. Uni hạ̃ṛũ do̠ so̠mankoḱ lạgit́ ona hamalo̠ḱ kecaḱ kạṭić talaṅe ge̠r kuṭrạke̠t́a. Ar ona kuṭrạ do̠e jo̠m go̠t́kat́a.

Nito̠ḱma dosaraḱ kecaḱ hamale̠n. Ado̠ ona kecaḱ reaḱ hõ̠ kạṭić talaṅe ge̠r kuṭrạke̠t́a; ar ona kuṭrạ hõ̠e jo̠m go̠t́kat́a. Nit́ pạhilaḱ arhõ̠ hamalena. Ona iạte̠ pạhilaḱ kho̠n arhõ̠ kạṭić talaṅe ge̠r kuṭrạke̠t́a; ar ona kuṭrạ do̠e jo̠mkeda. Piṭhạ do̠ ạḍite̠t́ ho̠po̠n ho̠po̠nena. Onate̠ unkin pusi do̠ hạ̃ṛũkin metadea, “Dayakate̠ ona sare̠ćaḱ kecaḱ do̠ e̠m ruạṛalińme. Ạlińtegeliń hạṭińjo̠ṅa.”

Hạ̃ṛũ do̠e me̠n go̠t́ke̠t́a, “Hẽ̠, e̠mmań e̠m ruạṛabe̠nge, me̠nkhan nun ghạṛićbe̠n khaṭaokidińa, ona reaḱ hõ̠ thoṛa do̠ń ńamgea.” Onkae me̠nke̠t́ torage ona sare̠ćaḱ hõ̠e lạkum go̠t́kat́a. Unkin pusi do̠ hạ̃ṛũaḱ mo̠ca merel-merelkin be̠ṅge̠t́akat́tae tahẽ̠kantaea. Ado̠ ạḍi bhabnakate̠ o̠nḍe̠ kho̠nkin se̠nena.

Onka katedo caḱem sahayena

Jiwire hoe bharḍo rakaṕ kate

Onaki ạḍi napae?

Nit hoń disại enhiloḱa citor

Bạń bujhạukea ińaḱ baher bhitạr

Duk eman roṛ bạṛić uihạriń ukur

Lại lapai baṅ bạgiạdạń ṭamar ṭumur

Enhõ asoḱ kạnạń dulạṛ ińaḱ jiạṛa

Bapag akan mone topol ruạṛa.

Disạ ocoń kan amaḱ roṛ rãhã

Cinhạ akan baha ontorre laha

Enhoń khojoḱ kana katha amaḱ mocate

Tahẽ kạnạń amren dulạṛiạ gate.

Onka kate do caḱem sahayena

Ińaḱ mone ulạṭ kacaṛ kate

Ona ki ạḍi napayena?

Am kusi ocome leka beohar roṛ

Bạń daṛe akada am são joṛ

Banam koṭaṕ são amaḱ tal

Be tal akadạń sereń reaḱ hal

Enhoń baḍaea mone do ojok

Ńapam lạgit́ banar ontor doe khojoḱ.

Onka kate do caḱem sahayena

Ińaḱ ontorre sar tuń oṭo kate

Onaki ạḍi napayena?

Ontor reaḱ buṭuń haso nit

Bạṛtiḱ kan rehõ bạń ńamet́ bhit

Gạhir okareco guṛgu dhiriteń rid

Hamal koṛamre sae sae sui bid

Enhõ okareco bujhạu edạń suk

Dulạṛ reaḱ gaegom nase nase duk.

Ado̠ unre chuṭkiye me̠nket́a, Uni pạhil gidrạm go̠je khan do̠ń ruạṛa, ar baṅkhan do̠ bạń ruạṛa. Ado̠ raje me̠nket́a bại bạite, Ma e̠nte ruạṛben, ado̠ unigeye bạṛić kan khan do̠ń go̠jea. E̠nḍe̠khan do̠, me̠n, se̠n ocoalińme; cet́em e̠se̠t́ akat́lińa? Ado̠ raje me̠nket́a, Acha, delabon, ruạṛben, e̠nḍe̠khan nitgeń go̠jea. Ado̠ khange onkae me̠nket́ khankin ruạṛena. Ado̠ ruạṛkate hõ̠e metae kana, Ma go̠ć ho̠deme. Ado̠ raje me̠nket́a, Ạkhir iń go̠jegea. Ma e̠nḍe̠khan dahe tuluć taben sipikate emaeme. Inại jo̠m torawange; me̠nkhan no̠ṇḍe̠ do̠ o̠ho̠ń go̠ćlea. Hana bir se̠n ạyur idikateń go̠jea. Khange sạri dahe tabene sipiket́a, ado̠e um napaekedea, sunumkoe o̠jo̠ḱadea, dhutikedeae, aṅgro̠pkadeae; ado̠ ti ạbuḱkate dahe tabene emadea. Ado̠ uni gidrại jo̠jo̠m kan jokhenge rajaḱ mẽ̠t́ daḱ do̠ mo̠ne̠ mo̠ne̠te hiḍir hiḍir jo̠ro̠yentaea. Ado̠ uni chuṭki do̠e me̠net́a, Cet́em raḱet́a? Iń bogeteye santao ediń kan do̠ baṅ? Ạḍi mãyã sanayet́mea.

Ado̠e jo̠m jo̠mkat́a, ado̠ bae cabalet́ khane itạt́kat́a. Ado̠ raje me̠nket́a, Nuiaḱ itạt́ do̠ ińgeń jo̠mkaḱa. Ado̠ hape̠n nuiaḱ itạt́ do̠ o̠ho̠ń ńamlea. Ado̠ raḱ raḱte uniaḱ itạt́e jo̠mket́taea. Ar tinạḱ gan co̠ṅ tabene ghẽ̠ṭket́a ar kạpiye oyo po̠ṭo̠mket́a. Ado̠e metae kana, Delaṅ bạbu, mamomtekolaṅ hiri ạgukoa, arhõ̠ gapa do̠laṅ hijuḱa. Ado̠ apat́te̠t́ onkae metade khan, uni gidrạ do ạḍiye rạskạ go̠t́ena; ado̠e me̠nket́a, Baba, panahitiń do̠ okare? Ado̠ panahi ar chatare ńawadea. Ado̠ panahiye ho̠ro̠ḱade khane me̠nket́a, Henda baba, teheń do̠laṅ tioga se̠ baṅ? Tin sạṅgińre mamateko do̠ menaḱkoa? Ado̠e metadea, Sorgea, ạyuṕkote do̠ nãhãḱlaṅ tioga. Khub taṛam taṛamtalaṅme.

Ado̠ calaḱ calaḱte, bhại, mit́ṭaṅ maraṅ utạr birkin tioḱket́a, ar okaren co̠ṅ mit́ṭaṅ seta unkin tayo̠m tayo̠mteye o̠to̠ṅ idiyet́kina. Ado̠ ona bir talate mit́ṭaṅ suṛuć ho̠rteye mohnḍayena. Ado̠ ona bir talate calaḱ tulućge ho̠r hõ̠kin at́ket́a. Ado̠ bin ho̠rkoteye ạyur baṛayede kana, ar ber hõ̠e hạsuroḱ kana. Ado̠ mit́ṭaṅ dare ṭhenkin teṅgoyena. Ado̠e metadea, Iạ, bạbu, ma no̠ṇḍe̠ duṛuṕ hataṛoḱtalaṅme, iń do̠ no̠te̠reń ićanrege. Ado̠ ona taben ghẽ̠ṭko do̠ uni ṭhengeye do̠ho̠ oṭokat́a, ar ać do̠ uni ṭhen khone pharakena, ar uni seta do̠ ać tayo̠mtegeye calaoena. Ado̠ o̠nte̠re uni setage saṕkedetegeye maḱkedea ar uni mãyãmte ona kạpi do̠e jo̠dbo̠daoket́a. Ado̠ uni gidrạ mage do̠e mãyãyente bae maḱledea. Ado̠e me̠nket́a, Noa birregeń bạgiaea, ado̠ bir janwar he̠ćkate nãhãḱ nui gidrạ do̠ko jo̠mea. Ado̠ onka me̠nkate ona birregeye bạgiadea, ado̠ ać do̠ oṛaḱteye ruạṛ he̠ćena.

Ado̠ khange uni gidrạ do̠ ńe̠l ho̠rteye mo̠ko̠ńen khan do̠e raḱket́a, ado̠ inạḱtege ńũt idiḱ kana. Khange eskaroḱ kante arte̠t́geye raḱet́ kana, ado̠ ńindạyenre hõ̠ ona dare buṭạ khon do̠ oka se̠n hõ̠ bae se̠nlena, o̠nḍe̠ge ạḍi bạṛić kikiạuateye raḱet́ kana. Khange ado̠, kathae, Ṭhạkure ańjo̠mket́ khane ãṛgoyena; ado̠ bo̠to̠rte dạṛ ocoyea me̠nte tạruṕ chinteye he̠ćena. Ado̠ bae dạṛlet́ khane ikạkadea; ado̠ bana chinteye he̠ćena, e̠nre̠ hõ̠ bae dạṛlet́a. Ado̠ biń chinte, hạti chinte, se̠ ạḍi lekateye bheona baṛa ocokedere hõ̠ bae bo̠to̠rlen khane ikạ dapoṛkadea.

Ado̠ kathae, se̠sre do̠ mit́ṭaṅ buḍhi ho̠ṛ chinte uni gidrạ ṭhene he̠ćena, ado̠e metae kana, E̠ bạbu, ma hape̠ḱme, alom raga. Ado̠ onka me̠nkateye ho̠bo̠rkedea, ado̠ ạḍi dulạṛ kathakoe galmarao baṛawade khane hape̠yena. Ado̠ ona moṭra ghẽ̠ṭe kulikedea ̣cet́ kana me̠nte, ado̠ ona taben ghẽ̠ṭ raṛakateye jo̠m ocokedea. Ado̠e kuliyede kana, Henda bạbu, oka se̠nre oṛaḱtape do̠, disạyet́a se̠m baṅ? Oka se̠ntem he̠ćlena? Ma lạime. Dela iń idi oṭokama. Ado̠ uni gidrạ do̠ cet́ hõ̠ bae me̠net́a. Ado̠ khange onka dulạṛ baṛakateye he̠okedea, ar ona moṭrakoe saṕket́taea. Ado̠ ina bire idi paro̠mkede khan ado̠ marsalena, ado̠ daḱkoe ńũ baṛawadea, ado̠ mit́́ṭaṅ atokin tioḱket́a. Ado̠ ona ato kulhi mucạt́ ṭhen idikateye do̠ho̠kedea, ado̠e metadea, Iạ bạbu, ne̠nḍe̠ge duṛuṕ hataroḱme, ado̠ ać do̠e okayen co̠ṅ, ghuriạ̃ do̠ bae he̠ć ruạṛlena.

Tumạl: Santal Folk Tales

Sedae re mit́ṭen Raje tahẽkana. Uni do mit́ din aćaḱ oṛaḱ khon dãṛã baṛaye oḍokena. Ḍher ghạṛić hoyen khan daḱ tetaṅ kedea. Adoe sen idiḱ kan tahẽkangea. Mit́ṭen kuṛi gidrạye ńel ńamkedea. Uni kuṛi gidrạ do kanḍate daḱe idiyet́ tahẽkana. Uni Raj do uni gidrạ ṭhene sen sorena, ar daḱe koe kedea. Uni kuṛi do usạra kanḍaye doho keda, ar daḱe emadea. Raj do daḱe ńuket́a ar ạḍiye kusiyena, ar uni kuṛiye kuli kedea, “Henda biṭi okaren kanam?” Kuṛiye menkeda, “Niạ atoren kangeạń” Arhõe kuli kedea, “Celeama” Kuṛiye menkeda, “Mạriạm”.

Raj do uni kuṛi gidrạ ńelte mãyã hećadea, are metadea, “Iń do noa Disomren Raj kạnạń. Iń ṭhenem senlen khan ạḍi suktem tahẽkoḱa. Jãhãnaḱkom kạmi baṛakelea.” Uni kuṛiye roṛ ruạṛkeda, E Raj Iń motoń tahẽlen khan doń senkoḱa. Menkhan ińren dulạṛiạ Gogo menaea uni doe ruạḱ kana, ar Baba do bạnuigićtińa. Iń gogo do cekateń bạgiwaea.” Raj do uni kuṛi gidrạwaḱ katha ańjom kateye bhabnayena, are metadea, “Okare am Gogo do menaea, dela onḍe idiyińme.” Ado ạḍi rạput́ rạput́ oṛaḱtey idikedea, Raj do oṛaḱ bhitriteye boloyena. Uni kuṛiren Gogo doe gitić akan tahẽkangea. Raj do uni ruạḱ maejiu ńel kate ạḍiye bhabnayena, are kuli kedea, “E Go, tis khon em ruạḱ kana?”

Uni maejiu doe menkeda, “Ḍher din khonge, nui gidrạgeye jotonedińa, nui chaḍa do cele hõ bạnuḱkoa, jãhã khone nalha ạguia, ar inạkoteliń ạsuloḱa.” Ado uni bạpuṛić maejiuaḱ mẽt́daḱ joroyentaea, Raj do uni maejiuaḱ duk ńelte ạḍi bhabnaye ạikạuket́a. Ar jemon alokin harkhetoḱ, Raj do ona reaḱe upại oṭoat́kina. Disạipe gidrạko! Ape hõ aperen Go Baba alope hiṛińkoa

Jisu do sermateye rakaṕ ocoḱ jokheć, onko apostolkoe metat́koa, Johan ma daḱteye bạptislet́ko; menkhan ape do thoṛa dinre Sonot Jiutepe bạptis ocoḱa. Ona ạuri hoyoḱ dhạbić Jirusalem khon alope sahaṛoḱa. Onako mit́ dinre Judạ Iskariot bodolte apostol hoyoḱ lạgit́ Mạthiạ ńutuman mit́ celako bachao bhurtikedea. Jisu sermateye rakaṕen tayom 10 mãhã hiloḱ Penṭekosṭ din reaḱ setaḱ jokheć apostolkoko jarwa akan tahẽkana. Khange ackage mit́ṭeć saḍe hoe got́ena hud hud tạpis hoe reaḱ leka, ar goṭa oṛaḱe perećket́a, ar onko ṭhen ńel ńamena hạṭiń begaroḱ kan alaṅko seṅgelko reaḱ lekage, ar onko modre mit́ ke mit́ hoṛ cetanre ãṛgoyena. Khange eṭaḱ bulikote roroṛko ehoṕket́a, Jiuge uḱcrạne danat́ko leka.

Sanam jạtko tala khon heć akan Jihudi hoṛ unre Jirusalemreko tahẽkana. Ona saḍe ańjomket́te ạḍi hoṛ onḍe heć jarwayenteko menket́a, Noa do cet́ kana? Noko hoṛ do Gạlilren doko baṅ kana? Enḍekhan cekate Isor reaḱ maraṅ kạmiko reaṅ abo aboaḱ nije pạrsite roroṛ kanbon ańjomet́koa? Peter do teṅgoyenteye galmaraoat́koa, Ape kurusrepe khil jalat́lede Jisuge nitoḱ do Isor reaḱ etomreye duṛuṕ akana, ar unige Sonot Jiue dul oḍok akat́a. Ado peter ạḍi ãṭe porcarat́koteko kulikedea, Cet́le cekaea, E boehako? Petere roṛ ruạṛat́koa, Mon ạcurpe, Jisu Mạsi ńutumte bạptis ocoḱpe kại ikạ lạgit́; khan Sonot Jiu danpe ńama. En hiloḱ 3,000 gan hoṛko bạptis ocoyena.

Pạtiạuko do din hiloḱko jarwaḱa koejoṅ ar Probhu reaḱ kedoḱ jom lạgit́. Jãhãnaḱ tahẽkantako ạkrińkate reṅgeć orećkoko hạṭińatkoa. Ar dinạmge Probhu do bańcao ocoḱkoe juṭuć idiket́koa. (Ap.kạmi.2.)

Ado̠ sạri atoren mit́ bar ho̠ṛe kuliket́koa, Henda ho, iń kuliyet́pea, bhala, phalna eṅgat do̠ sạrige pusi do̠e raboṛ akadea, se̠ ạuṛiaḱgeye lạiạń kana? Ado̠ko me̠nket́a, Sạri baṅdo̠ nase̠ ona do̠ o̠ho̠le me̠nlea; me̠nkhan siro̠ so̠ro̠ mãyãmoḱ do̠le ńe̠llet́gea. Ado̠ enka kuli baṛakatege uni raj do̠e ruạṛena. Ado̠ chuṭki bạhuye metae kana, Ma hapekoḱme, gidrạ leka do̠ alom raga. Uni albudạha gidrạ do̠ e̠nte cet́e baḍaea? Gidrạ reaḱ do̠ saḱhaotege hoyoḱa. Seṛa gidrạ khan do̠ń dhomkaokea; me̠nkhan nui albudạha do̠ń cekayea? Ado̠ uniye me̠nket́a, Ińaḱ katham do̠ho̠e khan iń tahe̠na, ar baṅkhan do̠ bạń tahe̠na.

Ado̠ raje me̠nket́a, Do̠ho̠ baṅkhan iń cekaetama? Nun diń iń do̠ho̠ ạguket́tama, nit bạń do̠ho̠ea? Ado̠ uni chuṭkiye me̠nket́a, baṅma, Ińiń metam kana, ma nui gidrạ do̠ go̠jeme. Nit khonge nonkae santaoediń kana, arhõ̠ tho̠ din menaḱgea. Nui gidrạ ki do̠ho̠ńae? O̠ho̠e do̠ho̠lińa. Am baṅ hiloḱ do̠ hape̠ne laga todeńa. Nõ̠ḱõ̠e ńe̠lme, gidrạrege nuiaḱ co̠lo̠n do̠ judạḱ kangea. Arhõ̠ hape̠ne haralen khan do̠ cet́ co̠ṅ. Onateń metam kana, baṅma, ińaḱ katham do̠ho̠e khan,  nenkare nui gidrạ do̠ go̠ć giḍikaeme. Ni lekan gidrạ do̠ko ḍhera; nenkhan gidrạ do̠ hape̠n ḍher iń janamama.

Ado̠ onkae me̠nket́ khan uni raj do̠e bhabnayena; ado̠  cet́ hõ̠ bae ro̠ṛlet́a, tiruṕ hapeyenae. Ado̠ chuṭikitaeye me̠nket́a, Okorem ro̠ṛet́a? Cet́ hõ̠ bam me̠net́a, Baḍaeket́meạń, am do̠ ińaḱ katha do̠ o̠ho̠m do̠ho̠lea. Ado̠ ma aben apa ho̠nge tahe̠nben, iń do̠ ni gidrạ he̠okate jãhãteń oḍoḱ calaḱa. Am do̠ hape̠n nui gidrạ ṭhenge mit́ din kalre do̠m dal go̠ć ocońa, ar baṅkhan hape̠n nui gidrại haralen khan, oka lekate co̠ṅ iń reaḱ kathae lạiama; ado̠ am hõ̠ hape̠n uniaḱ kathagem ańjo̠mte hape̠n iń do̠ń dal go̠jeńa; ado̠ baṅ ceka akana, ma nenkarelaṅ apan ạpinoḱa. Ado̠ unạḱe ro̠ṛ idiket́re hõ̠, raj do̠ cet́ hõ̠ bae ro̠ṛlet́a.

Khange uni chuṭki do̠e kạhĩs go̠t́ente aćaḱ jo̠to̠ sapaṕe ńamket́taea; ado̠ gidrạ he̠okate usạt́e oḍoḱ go̠t́ena, are e̠ge̠r oṭokat́a, Ma aben apa ho̠nge tahẽ̠koḱben; ạliń do̠liń calaḱ kana. Ado̠ unre raje me̠nket́a, Okateben calaḱ kana? Aloben calaḱa. Ado̠e se̠n ńõ̠ḱ ocoat́kingea. Ado̠ cet́ko co̠e bujhạu baṛaket́ khan do̠ ruḱạṛe calaoena. Ado̠ pańja tioḱkateye metae kana, Dela ruạṛme alom calaḱa. Nui gidrạ reaḱ do̠ cet́ jalayet́mea? Amren gidrạ mań bạgi oṭoadetam. Amren ma bạń ạguyede kan. Nui ma ińren kane. Ado̠ raje me̠net́a, Baṅa, dela ruạṛben. Nui gidrạ reaḱ mãyã hõ̠ bạń chaḍao daṛeaḱ kana. Ma ruạṛgeaben. Ado̠ onka me̠nkate laha se̠n khone e̠se̠t́kina. Ado̠ unre chuṭkiye me̠nket́a, Ma cet́em e̠se̠t́ baṛayet́lińa? Se̠n ocoalińme. Am do̠ unạḱ iń galmaraoat́mere hõ̠, ińaḱ katha do̠ bam ańjo̠ma; ado̠ cet́em e̠se̠t́kina. Ado̠ unre raje me̠nket́a, Acha, ma ruạṛme, ado̠ amaḱ kathageń anjo̠ma.