Rajshahi Godagari Upajila reaḱ mit́ santal ato Amtola.Ona atoren ḍher hoṛge pạṭ khaṭaoḱ metaḱme casbas kạmire jopoṛao menaḱkoa. Menkhan akoaḱ do onka khet baṛge do bạnuḱtakoa, eṭaḱ hoṛaḱ khet baṛgere kạmi kate akoaḱ jom ko jogaṛa. Nonkan mit́ṭen atoren koṛa Phuṭbol-e eneć noa do hahaṛagea. Menkhan Manik Tudu hõ Phuṭbol-e eneć kan tahẽkana, onkate aćren koṛa hõ Phuṭbol eneć re joṛ̣̣aoena. Tinre Rafael huḍińe tahẽkana unrege Manik Tudu do ruạre jạbunen khan noa dhạrti bạgiada. Menkhan uni do cet́e baḍaekan tahẽkana, aćren koṛa mit́din Dhaka re hećkate nonka ńutume hạrjoṅa?

Disom re Phuṭbol reaḱ dosar dhap Bangladesh Champion League (BCL) re siropa ko hameṭkeda Youngmen’s Fakirpool Club. Onkoaḱ siropa hameṭre tahẽkana Rafael Tudu. Enećre joto khon soros utạr scorer se gol akada Rafael Tudu. Are (9) match se enećre eskarte 12 goṭene gol akada. Onate soros khelwaṛ hisạbte siropa hameṭkeda. Pạhil dhao BCL enećre pheḍ torage Rafael do ạḍi napaete sodorena. Matijheel reaḱ Youngmen’s Club Pavilion re duṛuṕkate ać babotre ekal comkaoḱ lekan khobore lại sodorkeda.Aćaḱ atore Phuṭbol eneć enećte Rajshahi sohor reaḱ Kishar Football Academy re bhurti lena. Onḍenić coach Mamunul Islam do Rafael golkipar hisạbte kusiadea. Menkhan Rafael do golkipar hisạbte enejoḱ reaḱ jahan mon-subạ baṅ tahẽkantea. Pạhil dhao Mamunul Islam-ge Rafael do Dhaka te eneće kol ledea pạhil bibhag reaḱ (tesar dhap) Club Badda Jagoroni re golkipar hisạbte. 2020-21 sermare eken 15 umer re BCL Victoria Sporting Squad re tahẽkana golkipar hisạbte. Mit́ṭen rehõ eneć reaḱ ạt baṅ hoe akantaea. Onate mon asket́kate Rajshahi ruạṛ calaoen golkipar Rafael do hudạ bodol kate striker hudạre eneće  ehoṕena. Niạ dhao Club ren mit́ gate Shiblal Tudu hotete Youngmen’s Striker lekate ńutume ol ocokeda. 

Rafael do menet́kana, golkipar hisạbte eneć do bạń kusiaḱkan tahẽkana.Enrehõ golkipar lekatege pạhil bibhag Badda Jagoroni reń eneć akana, inạkate BCL Victoria Squad rehõ golkipar geń tahẽkana.Ona iạte edrete Rajshahi teń ruạṛena. Onḍe onkoaḱ Phuṭbol club re jorkate striker hudạre enećiń ehoṕkeda. Club ren lạṭu boeha Shiblal do ale atoren kanae, unige iń do Youngmen’s te ạgukedeńa. Menkhan coach Labu (Imtiaz Khan) ar Manager MH Peepul Saheb ạḍi ạtiń sarhaoet́kina.Ente unkin do iń cetanre purạ as do tahẽkantạkina.Youngmen’s Manager MH Peepul ạḍi din khonge noa club re menaea. 18 serma umerren Rafael do uni disạ ocoedea Youngmen’s Mohammedan, Brother, Muktijodha ar jatio dol ren sạbik striker Mizanur Rahman aḱ katha, Iń do Rafael talare Mizanur aḱ umuliń ńel akada. Ar hoṛmo reaḱ goṛhon muṭhan hõ onkage. Arhõ nonkage eneć idilen khan mit́din maraṅ scorer re hoyoḱa. Ente noa reaḱ porman do BCL re uduḱ akada. Ać gogo Maklu Hembrom tinre noa rạska khobor phone te lạiae kan tahẽkana, ać gogo do rạskạte raḱet́ tahẽkana. Ać gogo hõe khojoḱ kana jemon gidrạtae maraṅ khelwaṛe hoyoḱ. Rafael doe baḍaea, noa raḱ do rạskạ reaḱ raḱ kana.Ente ạḍi haron kosṭote harakedeńa. Siń ńindạ khaṭaoḱ kana. Ar Raḱate gidrạtaeye metaekana, am baba tahẽlen khan are ńelle khan ạḍige kusikoḱa. Menkhan Rafael do as are pạtiạuḱ kana, ać baba doe ńel ńame kana mente.  

Ạḍi lekan haron, eṭkeṭõrẽ –obhab onṭon talate hara buru akana Dinajpur reaḱ Nawabgonj upạjilạ reaḱ Hayatpur atoren santal phuṭbol kheloḍiạ Kakoli Soren. Enhõ noa obhab-onṭon talate hõe laha calao akana. 2022 serma re hoyen Boṅgomata Sheikh Fajilatunecha (Onurdho-17) phuṭbol kheloḍ re Rangpur bibhag ren so̠ro̠s kheloḍiạ lekate bachao ocoyena. Nit disom reaḱ adom adom jaegare phuṭbol kheloḍ re seledoḱte jitạuḱ kana. Aḍepase ṭoṭharen horko menet́ kana, onkan goṛo ńamlekhan mit́din maraṅ hudạren phuṭbol kheloḍiạ hoe daṛeaḱa.

Kakoli Soren hõ nonkae menkeda, Daudnagar Shedboard Primary School ren pạṭhuạ kanae. Ona School maṭhrege uniaḱ pạhil phuṭbol khilạḍ ehoṕ akantea. Kuṛi gidrạ karonaḱte koṛa gidrạko uni pạhilte khilạḍ haparaore baṅko selet́edekan tahẽkana. Uniaḱ khilạḍ haparao ńelte mit́ okte koṛako uniko  soṅge kedea. Inạkate atoren hoṛko nana parkan katha roṛoṛko ehoṕena. Kuṛi gidrạ do̠ cet́ reaḱ phuṭbol eneć. Obhab-onṭon ar sãota reaḱ akoṭaḱ ko dea giḍikate phuṭbol khilạḍ se eneć lạgit́ mone muruḱkeda. Ene un jokhenge Daudpur Phuṭbol Academy uni goṛoae la̠git́e sorena. Eneć lạgit́ko udgạukedea aema jaegakore enejoḱ reaḱ horko tearadea. Nit uniaḱ kukmu jatiyo do̠lre ạt́ ńam reaḱ.

Daudpur Phuṭbol Academy ren coach Kabir Hossen do̠e menkeda, ‘2022 sermare Upạjilạ porjaire Primary School seć khon Boṅgomata Phuṭbol haparaore noiponno reaḱe suhileda Kakoli Soren. Unre upạjilạ seć khon eneć lạgit́te jilạ porjaite senlena. Onḍe nunạḱ mońje enećena je, Jilạ phuṭbol do̠l aḱ nońjorre paṛaoena. Ene ado̠ mit́ ghạṛitege aḍepase ṭoṭhare uniạḱ ńutum ḍamḍaheyena. Inạkate aema jaegare uni eneć lạgit́ko bhaṛa idiyea. Nonka eneć enećte so̠ro̠s siropae hameṭet́ kana. Mucạt́ dhao 2022 sermare hoyen Boṅgomata Sheikh Fajilatunecha (Onurdho-17) phuṭbol haparaore jilạ, bibhag ar jatiyo porjaire so̠ro̠s kheloḍiạ mente bachaoena. Unre Maraṅ montri Sheikh Hasina aḱ tite so̠ro̠s siropae ataṅkeda.

Ona atoren mit́ NGO kạmiạić Patras Murmu hõe menkeda, Kakoli ren gogo-baba do̠ pạṭ khaṭaoḱ hoṛ kanakin. Ado̠ unkinaḱ ae-rojgarte jãhã lekate gharońj calaḱ kana. Mit́ṭen hasate benao akan oṛaḱre Kakoli do̠ gogo-baba sãoe tahẽn kana. Mit́ṭen kheloḍiạ hisạbte oka jo̠m ńu ar poribes tahẽn jạruṛ kan ona do̠ bạnuḱanaṅ. Enrehõ Kakoli do̠ duṛuṕ bạnuia. Obhab se reṅgeć talatege kukmu ńeńel kana Jatiyo do̠lren kheloḍiạ hisạbte disom ar disom bahrekore namḍak hameṭ lạgit́. Uni do̠ arhõe menet́ kana, uniaḱ tahẽn ṭhạ̃i ar solhako emalere sạrige so̠ro̠s kheloḍiạ mente benao rakaboḱa. Ona lạgit́ mit́ṭen mońj tahẽn ṭhạ̃i jạruṛae kana. Onka leka Upajila porisod ren Chairman Ataur Rahman hõe menkeda, ‘Kakoli do̠ ona ṭoṭharen go̠ro̠b kanae. Uni do̠ jatiyo porjaire ar so̠ro̠s kheloḍiạ hisạbte upạjilạ reaḱ ńutume hạrjoṅa. Onate Kakoli aćaḱ eneć khelạḍ laha idi lạgit́te upạjilạ porisod aćaḱ daṛeḱ bhore goṛowaea.

Esian phuṭbo̠l konpheḍareson (AFC) -ak̕ asraete ar Siṅgapur phuṭbo̠l pheḍareson-ak̕ sap̕ sapṛaote daraekan 26 kho̠n 30 epril 2023 tạrikh dhạbic̕ mit̕ phuṭbo̠l khilạḍ reak̕ haparao hoyok̕a.̠̠

Noa haparaore Baṅgladesh, Siṅgapur ar Turkeministan un-umạr-17 jạtiạri phuṭbo̠l do̠lko se̠le̠do̠k̕a . AFC un-umạr-17 maejiu esian kap indonesia 2024 reak̕ bachao hõ̠ noa khilạḍ hotete hoyogo̠k̕a. Siṅgapur disạm reak̕ Jalanbasi maedanre khilạḍ haparao do̠ hoyok̕a . Ona khilạḍ haparaore seledo̠k̕ lạgit̕ Baṅgladesh un-umạr-17 maejiu jạtiạri phuṭbo̠l do̠l holanok̕ (23-04-2023) tạrikh ńindạ 10:30 taṛaṅre US BAṄGLA eyarlains reak̕ phlaiṭte Siṅgapurko senena. Niạ̣ khelạḍ re Onnona Murmu Bithi ńutuman mit́ santal kuri hoe khelạḍoḱa mente baḍaeoḱ kana. 

Teheń Sombar (28 November) Brazil do̠lko arhõ dosar dhao maṭhreko pheḍo̠ḱ kana. Noko sãote arhõ eṭaḱ do̠lkoaḱ haparao hõ menaḱa. Teheń Bissokap phuṭboll eneć ńapam do̠lkoaḱ ńutum latarre emena-

Cameroon-Serbia

Ạyuṕ bela 4:00 baja jokhen ehoboḱa

South Korea-Ghana

Ạyuṕ 7:00 baja.

Brazil-Swizerland

Ạyuṕ 10:00 baja jokhen ehoboḱa.

Sạnicar (26 Novembar) re Bissokap haparaore seledoḱ dolkoaḱ tạlikạ latarre emena;

Tunisia-Australia

Dhinạn 4:00 baja khonaḱ ehoboḱa.

Poland-Saudi Arabia

Ạyuṕ 7:00 baja khon. Onka leka

France-Denmark

Ạyuṕ 10:00 baja jokhen ehoṕa. Ar

Argentina-Mexico

Noko hõ Ạyuṕ 1:00 baja jokhen maṭhreko pheḍoḱ kana.

Lukhibar (24 November) ạḍi gạhir ar nijhum ńindạ 1:00 baja do Brazil-Cameroon nukin bar dolkin eneć nápama. Inạkate hõ eṭaḱ disom se dolkoaḱ hõ eneć haparao menaḱa. One onako latarre emena: 

Switzerland- Cameroon

Ạyuṕ bela 4:00 baja.

Uruguay-South Korea

Ạyuṕ 7:00 baja khonaḱ.

Portugal-Ghana

Ạyuṕ 10:00 baja jokhen ehoboḱa

Brazil-Serbia

Ńindạ 1:00 baja khonaḱ.

Ạḍi jobor rạskạ khobor. Cedaḱje Teheń Moṅgolbar (22 November) Bissokap reaḱ enećreko pheḍoḱ kana Lionel Messi ar aćren celako. Niạ dhao Bissokap enećre Argentina do Saudi Arabia birudhreko eneć ńapamoḱa. Ar  eken mit́ ghạṛi tayom khonaḱge teheńaḱ khilạḍ haparao do ehoṕ lạgidoḱ kana. Dhinạn ber 4:00 baja khonaḱge noa khilạḍ haparao bon ńel ńama. Ona lạgit́te eneć néńelko ma tạṅgi tãṛãḱre tahẽntabonpe.

Teheń oka ko disomren dolko eneć ńapama, ona reaḱ tạlikạ:

Argentina-Saudi Arabia

Dhinạn ber 4:00 baja khonaḱ.

Denmark-Tunisia

Ńindạ 7:00 baja khonaḱ ehoboḱa.

Mexico-Poland

Ńindạ 10:00 baja khon.    

Hijabbirudhi laṛanaote seṅgelakana iran disạm. Niạdhao disạmren laṛanaoko sec̕ so̠mo̠rtho̠n emkatet̕ bisso̠kapre khilạḍ pheḍtora ge protibadko baḍae ocokeda iran ren phuṭbo̠larko. Som hilạk̕ (21 nobhembo̠r) Kholipha antorjatik isṭeḍiam maydanre iṅgleṇḍ birudhre khilạḍ pheḍkatet̕ jạtiyạ sereńre luṭi bako laṛaoleda Ali Reja – Jahanbo̠khs tako. Bisso̠kap lekan haparaore khilạḍok̕ do̠ ạḍi maraṅ go̠ro̠b reak̕ kathakana. Jạtiyạ sereń calak̕ okte rạṛ milạu, abegre paṛaok̕ reak̕ beparko do̠ ńel baṛak̕ gea. To̠be phuṭbo̠lpuri niạ dhaoko ńelkeda judạ lekanak̕ bepar. Bisso̠kap khilạḍ phe̠ḍ katet̕ iran phuṭbo̠larko jạtiyạ sereń ma bako sereńlet̕ , bo̠ro̠ṅ sereń calak̕ okte thir hapegeko teṅgo thir tahẽ̠yena. Noa drissho̠ do̠ samajik miḍiare ho̠ydak̕ leka pasnao go̠t̕ena. Tobe khilạḍ eho̠bo̠k̕ lahare ge iran ren do̠lnetae lạileda, disạmre sorkarbirudhi laṛanaore somorthon lạgit̕te oṅko jạtiyạ sereń bako sereńa, ona do̠ purạ do̠lgeko goṭa do̠ho̠akada. Bar cando lahare pulisak̕ hajo̠tre Mahsa Amini ńutuman mit̕ maejiuak̕ gujuk̕ tayo̠m kho̠n ge ṭalmaṭal cabaoakana iran disạm. Islam ripalik reak̕ kicric̕ niyo̠m-niti baṅ manao reak̕ nạliste tehran kho̠n giripdar reak̕ pe maha tayo̠m gei go̠c̕ena 22 serma umạran Mahsa Amini. Ona tayo̠m khon ge hijabbirudhi protibadte ṭalmaṭal utạrakana Iran. Ona laṛanaore so̠mo̠rtho̠n katet̕ soṅgoko baḍae ocokeda phuṭbo̠larko. Ona bego̠rre hõ̠ isṭeḍiam gelariren aema do̠rsho̠kkoak̕ protibad ńel tiạk̕ena

Oka khilạḍ se eneć metaḱme FIFA Bissokup-2022 lạgit́ mimit́ko koyoḱ ar tạṅgi horreko tahẽkan, ona do Aṭhawar hiloḱ (20 November) ńindạ uḍhạu hoyena. Ar ona uḍhạu akhṛa talatege Bissokap Phuṭboll eneć haparao do ehoṕena. Noa uḍhạu akhṛare pạhilte maṭhrekin eneć tapamen dol do Qatar-Ecuador.

Menkhan noa pạhil khilạḍ haparaorege Qatar do Ecuador ṭhen 2-0 pharak golteko harao ocoyena. Ar onka leka Ecuador doko jitạuena. Baḍaebon je, eṭaḱ khilạḍko modre phuṭboll khilạḍ mit́ṭen kana. Abo santal boeha-misera são sãote joto lekan jạtiko noa khilạḍ haparaoko kusiaḱa. Ente khilạḍ se eneć hõ aboaḱ hoṛmo hạṭiń niropon dohoe reaḱ mit́ṭen bhag se oṅso kana. Noa Bissokap eneć ńel lạgit́ nit hõ aema hoṛge tạṅgi horre menaḱkoa. Cedaḱ je, mucạd dhạbićte oka disomren ar okoe dolko ṭikạu tahẽnte siropa ko hameṭjoṅa mente.

Onka leka Tv re Teheńaḱ metaḱme (21 November) reaḱ Bissokap eneć se khilạḍko ńel lạgit́ tạṅgi horre tahẽn tabonpe:

Teheń ńindạ ńel ńamoḱ se porcaroḱ eneć khilạḍko:

England-Iran

Nińdạ 7:00 baja khon.

Senegal-Netherland

Nińdạ 10:00 baja khonaḱ ehoboḱa.