Lukhibar (24 November) ạḍi gạhir ar nijhum ńindạ 1:00 baja do Brazil-Cameroon nukin bar dolkin eneć nápama. Inạkate hõ eṭaḱ disom se dolkoaḱ hõ eneć haparao menaḱa. One onako latarre emena:
Switzerland- Cameroon
Ạyuṕ bela 4:00 baja.
Uruguay-South Korea
Ạyuṕ 7:00 baja khonaḱ.
Portugal-Ghana
Ạyuṕ 10:00 baja jokhen ehoboḱa
Brazil-Serbia
Ńindạ 1:00 baja khonaḱ.
Ạḍi jobor rạskạ khobor. Cedaḱje Teheń Moṅgolbar (22 November) Bissokap reaḱ enećreko pheḍoḱ kana Lionel Messi ar aćren celako. Niạ dhao Bissokap enećre Argentina do Saudi Arabia birudhreko eneć ńapamoḱa. Ar eken mit́ ghạṛi tayom khonaḱge teheńaḱ khilạḍ haparao do ehoṕ lạgidoḱ kana. Dhinạn ber 4:00 baja khonaḱge noa khilạḍ haparao bon ńel ńama. Ona lạgit́te eneć néńelko ma tạṅgi tãṛãḱre tahẽntabonpe.
Teheń oka ko disomren dolko eneć ńapama, ona reaḱ tạlikạ:
Argentina-Saudi Arabia
Dhinạn ber 4:00 baja khonaḱ.
Denmark-Tunisia
Ńindạ 7:00 baja khonaḱ ehoboḱa.
Mexico-Poland
Ńindạ 10:00 baja khon.
Hijabbirudhi laṛanaote seṅgelakana iran disạm. Niạdhao disạmren laṛanaoko sec̕ so̠mo̠rtho̠n emkatet̕ bisso̠kapre khilạḍ pheḍtora ge protibadko baḍae ocokeda iran ren phuṭbo̠larko. Som hilạk̕ (21 nobhembo̠r) Kholipha antorjatik isṭeḍiam maydanre iṅgleṇḍ birudhre khilạḍ pheḍkatet̕ jạtiyạ sereńre luṭi bako laṛaoleda Ali Reja – Jahanbo̠khs tako. Bisso̠kap lekan haparaore khilạḍok̕ do̠ ạḍi maraṅ go̠ro̠b reak̕ kathakana. Jạtiyạ sereń calak̕ okte rạṛ milạu, abegre paṛaok̕ reak̕ beparko do̠ ńel baṛak̕ gea. To̠be phuṭbo̠lpuri niạ dhaoko ńelkeda judạ lekanak̕ bepar. Bisso̠kap khilạḍ phe̠ḍ katet̕ iran phuṭbo̠larko jạtiyạ sereń ma bako sereńlet̕ , bo̠ro̠ṅ sereń calak̕ okte thir hapegeko teṅgo thir tahẽ̠yena. Noa drissho̠ do̠ samajik miḍiare ho̠ydak̕ leka pasnao go̠t̕ena. Tobe khilạḍ eho̠bo̠k̕ lahare ge iran ren do̠lnetae lạileda, disạmre sorkarbirudhi laṛanaore somorthon lạgit̕te oṅko jạtiyạ sereń bako sereńa, ona do̠ purạ do̠lgeko goṭa do̠ho̠akada. Bar cando lahare pulisak̕ hajo̠tre Mahsa Amini ńutuman mit̕ maejiuak̕ gujuk̕ tayo̠m kho̠n ge ṭalmaṭal cabaoakana iran disạm. Islam ripalik reak̕ kicric̕ niyo̠m-niti baṅ manao reak̕ nạliste tehran kho̠n giripdar reak̕ pe maha tayo̠m gei go̠c̕ena 22 serma umạran Mahsa Amini. Ona tayo̠m khon ge hijabbirudhi protibadte ṭalmaṭal utạrakana Iran. Ona laṛanaore so̠mo̠rtho̠n katet̕ soṅgoko baḍae ocokeda phuṭbo̠larko. Ona bego̠rre hõ̠ isṭeḍiam gelariren aema do̠rsho̠kkoak̕ protibad ńel tiạk̕ena
Oka khilạḍ se eneć metaḱme FIFA Bissokup-2022 lạgit́ mimit́ko koyoḱ ar tạṅgi horreko tahẽkan, ona do Aṭhawar hiloḱ (20 November) ńindạ uḍhạu hoyena. Ar ona uḍhạu akhṛa talatege Bissokap Phuṭboll eneć haparao do ehoṕena. Noa uḍhạu akhṛare pạhilte maṭhrekin eneć tapamen dol do Qatar-Ecuador.
Menkhan noa pạhil khilạḍ haparaorege Qatar do Ecuador ṭhen 2-0 pharak golteko harao ocoyena. Ar onka leka Ecuador doko jitạuena. Baḍaebon je, eṭaḱ khilạḍko modre phuṭboll khilạḍ mit́ṭen kana. Abo santal boeha-misera são sãote joto lekan jạtiko noa khilạḍ haparaoko kusiaḱa. Ente khilạḍ se eneć hõ aboaḱ hoṛmo hạṭiń niropon dohoe reaḱ mit́ṭen bhag se oṅso kana. Noa Bissokap eneć ńel lạgit́ nit hõ aema hoṛge tạṅgi horre menaḱkoa. Cedaḱ je, mucạd dhạbićte oka disomren ar okoe dolko ṭikạu tahẽnte siropa ko hameṭjoṅa mente.
Onka leka Tv re Teheńaḱ metaḱme (21 November) reaḱ Bissokap eneć se khilạḍko ńel lạgit́ tạṅgi horre tahẽn tabonpe:
Teheń ńindạ ńel ńamoḱ se porcaroḱ eneć khilạḍko:
England-Iran
Nińdạ 7:00 baja khon.
Senegal-Netherland
Nińdạ 10:00 baja khonaḱ ehoboḱa.
Bangladesh maejiu Phutbol dol pạhil dhao SAFF Championship 2022 talate nagamre ńutum ol akantakoa. Baḍaeabon je, Bangladesh ren kuṛiko do 19 September Nepal ren phutbol dolko 3-1 golte bhagaokate siropa ko jitạ̣̣̣̣̣̣̣̣̣uena.
Ar noa rạskạte Budhbar (09 November 2022) Maraṅ montri Sheikh Hasina hõ aćaḱ kạmi ṭhaõna/Office re SAFF jitkạr kuṛiko man manot selet́ mimit́ko kạuḍi em hạṭińat́koa. Onka leka noa phutbol dolre tahẽkana barea kheloḍiạ Raṅgatuṅgi United Footbal dolren santal kuṛi Sohagi Kisku ar Sowpna Rani. Maraṅ montri seć khonaḱ nokin hõ man manot selet́ Maraṅ montri aḱ tite siropa hisạbte mõṛẽ lakh (5) kateć kạudi reaḱ check kin ataṅkeda.
Man manot akhṛare Maraṅ montri do eneć khiloḍ são sãote oloḱ paṛhao sećte hõ laha calaḱ lạgit́e udgạuket́koa. Akhṛare selet́ko tahẽkana Krira Protimontri Zahid Ahsan Russel Ar BFF (Bangladesh Football Fedaration) ren sabha mukhiạ Kazi Salahuddin.
Calaoen October cando reaḱ 2 tạrik 2022 aṭhowar din do̠ Thakurgaon Jilạ reaḱ Ranisongkel Degree College maṭh re hoe puraoena ataṅ daram kạmi horako. Ạḍi rạskạ ar man manot selet́ko ataṅ daramket́kina dulạṛiạ rạni Sohagi Kisku ar Sowpna. Noa maraṅ akhṛa ataṅ daramre penḍel cetanrekin tahẽkana Baṅgladisomren dilgạṛia khiloḍiạ Sohagi Kisku ar aćren Baba Guljar Kisku.
Nonkan maraṅ raj rạni ataṅ daram do̠ santal kuṛi lạgit́ ạḍi bhạgạn ar hahaṛage tahẽkana. Ińaḱ baḍaere Baṅgladisom sạdhin tayom nonkan khiloḍiạ ar bhage hameṭ akat́ kuṛiko bako tahẽkana. Onate Santal jạtiạriko lạgit́ ạḍi maraṅ man manot, sarhao ar dulạṛ johar do̠ tahẽnkana. Santal jạtiạriko do̠ ạḍi cetan do̠e tul rakaṕ akat bona dulạriạ Rạni Sohagi Kisku beti. Beti Sohagi Kiskuren Apat Guljar do̠ Santali pạrsite ạḍi rạskạ selet́ aćak rạskạ johar katha do̠e so̠do̠r akada.
25 September 1974 serma re 29 mãhã reaḱ General Assembly re, Baṅgladisomren Jạtiạri Apat Baṅgobondhu Shekh Mojibur Rahman hõ United Nation re Bangla teye roṛleda ar nit́ habić ona lekcar do̠ calao ediḱ kana. Onkage manotan dilgạṛiạ khiloḍiạ Sohagi Kiskuren apat Guljar Kisku hõ ạḍi maraṅ Itihãs do̠e tear do̠hoakada Baṅgladisomren sanam santal jạtiạriko lạgit́.
Samiel Mardi Ranisongkel Upozila ren Program Implement Officer soṅge ạḍi jeliń ggalmarao do̠ hoyena. Santal hisabte uni hõ ạḍi rạskạ ar go̠ro̠b do̠e aṭkareda. Uni hõ Sohagi Kiskuaḱ manot ataṅ daram bo̠ndo̠bo̠sreye tahẽkana.
Noa maraṅ ataṅ daramren sobha mukhiạ do̠e tahẽkana UNO Sohel Sultana Julkar Nain Kobir Stive aćaḱ lekcarreye so̠do̠rkeda je, sanam lekan go̠ṛo̠ do̠ tahena Sohagi Kisku lạgit́. Dilgạṛiạ Khiloḍiạ Sohagi Kisku do̠ Ranisongkel Upozila Baṅgladisom ar disom barhe hõ cetanteye tul rakaṕakada.
Sohagi Kisku do̠ ạḍi rạskạye aṭkarkeda; ar Upozila re nonkan ataṅ daram do̠ ać lạgit́ hahaṛage tahẽkana. Nonkan dulạṛ do̠ tis hõ bạṅ hudis akat́ tahẽkana. Onate Thakurgaon jilạren sanam hoṛko ar Ranisongkel renko lạgit́ tahen kana ạḍi manot johar.
Mucạt́ re ạḍi rạskạ eneć sereńteko daramket́kina. Noa ataṅ daram akhṛare selet́ tahẽkan sanamko ạḍiko rạskạyena. Ataṅ daram akhṛa do̠ rạskạ salaḱ napaete hoe purạuena.
Baṅgladisom Hockey Federation do̠ Baṅgladisom Hockey khiloḍ reaḱ songstha kana. 1971 serma re noa do̠ etohoṕ hoelena. 1973 serma Baṅgladisom do̠ goṭa dhạrti reaḱ Hockey Federation ar 1975 serma do̠ Asia Hockey Federation reaḱ member hudạ do̠e hameṭ akada. Sutherland 20th dosok re “Hockey ren Baba” hisạbte ạḍi oprom do̠e tahẽkana ar uniaḱ ạḍi gạkhuṛ kạmite khiloḍ ar porcar do̠e hoe ocoleda. Kingston, Ontario do̠ko janamlena 1870 serma, one oka do̠ Canada disom janam reaḱ pe serma tayom.
Uni do̠ Hockey ńutume do̠holeda jemon do̠ khiloḍ re ạḍi oporom do̠ hoe akana, ar noa do̠ French/Forashi word (Gupi icaḱ theṅga). Ar rink do khiloḍ reaḱ aḍepase se area hatao hoe akana. Noa do̠ 18th dosok Scotland redo̠ curling khiloḍ hisạbte ńutumko laṛcaṛet́ tahẽkana. Noa hockey khiloḍ reaḱ total somoe do̠ turui gel minutes, ona okte se somoe re khiloḍ re jo̠ baṅ ńamlen khan ar bạṛti somoe emkatet́ khiloḍ reaḱ jo̠ ńam lạgit́ko kurumuṭuea. Hockey khiloḍ re hõ gel mit́ (11) goṭen khilạḍiạko tahẽna.
Delabon baḍaelege santal koṛa PORIMOL MARDY aḱ khaṭo jibon cạrit;
Purạu ńutumtae do̠ PORIMOL MARDY, ar noa dhuṛi dhạrtiteye hećlena ạḍi reaṛ rabaṅ din January cando reaḱ 29 tarik 2001 serma Dinajpur jilạ reaḱ Mutnihat, Kaharol atore. Hoṛmo sećte Jeling do 5’8” ar hamal/ujon do̠ 59. Oloḱ paṛhao do̠ SSC ar HSC Kira Sikhha Prothistan (BKSP) savar Dhaka. Ar nitok do̠ Stamford University Bangladesh. Ać lạgit́ darakan dinre kukmuye ńeńel kana; ạḍi bhage Hockey khiloḍ ren dilgạriạ.
Nitok do̠ Azad Sporting Club ren dilgạriạ khilạḍe kanae, khilạḍ re jersey do̠e horoḱeda (11) gel mit nombor ar khilạḍ do̠ tala ṭạnḍire.
Mucạt re sanam Santal Koṛako ṭhen nehõr ar udgạuet́pe kana; jemon darakan din re sanam khiloḍkore abo Santalko bon seṭeroḱte oloḱ paṛhaḱ talate Khiloḍ lạgit́ hõ kurumuṭue tabonpe. Onkate mit́din sanam khiloḍ thạ̃ikore abo santalko bon tahẽnte Somaj, disom ar goṭa dhạrtire santalko bon tul rakaṕkoa ạḍi man ar manot selet́.
2007 Serma Raṅgaṭungi atote calaḱ reaḱ ạt hoelentińa Bangladesh Northern Evangelical Lutheran Church (BNELC) survey kạmi lạgit́. Biṭi Sohagi Kisku ren baba Guljar Kisku do uprom hoṛe tahẽkante ińaḱ survey kạmi do ạḍi usarage hoe purạuentińa ar aema goṛo doń ńamleda. Onkage 2017 Serma seć ar hõ calaḱ reaḱ ạt hoelentińa Manḍer hiri ar paka Girjạ oṛak benao khạtirte. Iń soṅgereye tahẽkana Baliadanga Upozila ren Program Implement Officer (PIO) Samiel Mardi okoe do nitoḱ Ranisongkel Upozila ren PIO kane. Samiel Mardi sorkar seć khon aema goṛo doye em cal akada Raṅgaṭungi United Football Academy lạgit́. Ar 2009 sal do Sohagi Kisku ren lạṭu didi Ipina Kisku do Tabitha Foundation hotete calaḱkan tahẽn Coaching & Training Program SSC ar HSC doe coaching lena final bidạu emoḱ lahare. Un khongeń baḍae akada je Raṅgaṭungi ren kuṛiko do football gatić re ạḍi gạkhuṛako mente.
Mucạt́ dhao ar hõ calao hoelena 2017 Serma Lutheran Girjạ oṛaḱ uḍhạu ar football eneć re laha akan kuṛiko soṅge ńapam babot. Noa hirireye tahẽkana Norway Disormren Mari Missionary Torbjorn Lied ar aćren oṛaḱ hoṛ Karen MariyaLied ar Bangladesh Northern Evangelical Lutheran Church ren un okteren Manotan General Superintendent Rev. Soban Kisku selet́ arhõ aema doko tahẽkana.
2016 Serma November cando Nepalte calaḱ reaḱ ạt hoelentińa. Pane buru talare uḍạuḱ gạḍi pheḍogoḱ kana ar rakaboḱ kana ạḍi hahaṛage. Ona hahaṛa buru disom Nepal re niạ serma do hoe purạuena Kuṛikoaḱ SAFF Khilod. Sanamko bhagao katet́, niạ serma do Bangladisom ren kuṛiko SAFF jitkạrko hameṭkeda.
Nonkan maraṅ khiloḍ re selet́e tahẽkana Santali Kuṛi Sohagi Kisku, Apat Guljar Kisku doe hoyoḱ kana nalha tumạl hoṛ. Sohagitako do pea kuṛi ar bar koṛa. Pạhil kuṛi boeha Ipina Kiskuaḱ do bapla hoe akantaea. Sareć menaḱko pon (4) boehage football ko khiloḍeda. Hudiń kuṛi Kohati Kisku do Onurdho-19 national team reye khiloḍoḱ kana.
Disomre kuṛi koaḱ khiloḍren Sohagi Kiskuaḱ hara rakaboḱ reaḱ maraṅ gapalmarao do menaḱa, Sohagi ren apat Guljar Kisku doe roṛ sodorkeda je, hudiń khonge football cetanre Sohagiaḱ do ạḍi bạrti mon tahẽkantaya. Primary school oloḱ paṛhaḱ kan okte khonge Bongomata Tournament Khiloḍ sećteye etohoṕ akada. Inạ tayom Ranisongkel Degree college ren mare principal Tajul Islam Raṅgaṭungi United Football Academy etohoṕ katet́ kuṛiko sikhnạt emoḱ lạgit́e kurumuṭukeda, Sohagi hõ ona thạ̃i re jopoṛao katet́ football reaḱ sikhnạt doye hameṭ keda. Kuṛiko half panṭe horoḱ katet́ khiloḍ do ạḍi lajaopaṛa ar aema katha doko roṛkeda aḍepase ato-ṭola koren sanam hoṛko. Nonkan kuṛiaḱ do tishõ bapla baṅ hoyoḱa, ona ko katha ańjomkatet́ Sohagi ren apat Guljar do aćren kuṛi oṛaḱ bhitrireye siń poṭom kaekan tahẽkana, jemon do khiloḍ thạ̃ite ohogey sen daṛeaḱ. Menkhan thoṛagan ạte ńam lekhange Sohagi do khiloḍ thạ̃iteye seṭeroka ar bhage sikhnạt hameṭ lạgit́ ạḍi kurumuṭu do tahẽkantaya.(Prothom Alo 20 September 2022)
Din hilok reaḱ soros khiloḍheya ̣re gel pon dol re Thakurgaon jilareye thạ̃ijoṅlena. 2017 serma Thakurgaon jila football haparao re bibhag champion. Ona oktere Sohagi Kisku ạḍi soros doye khiloḍlena. Un okterege Bangladisom Football Federation (BFF) ren mit́ maraṅ officer aḱ mẽt́ re doye ḍhaṅglente teheń nonkan maraṅ haprao re khiloḍ lạgit́ thạ̃i doye tear akada. Inạ tayom 15 dol, 17 dolar 18 dol re khiloḍ katet́ teheń do Bangladisom reaḱ maraṅ thạ̃irey seter akana.
Sohagi ren Baba soṅge phone te gapalmarao hoyena, aćren kuṛi Sohagi aḱ khiloḍ hoelen khan gharońj ren sanamko mit́te TV re enećko ńela. Nonkan jitkạr re ạḍi rạskạ ar aćren kuṛiaḱ hijuk koyoḱ horre menaḱkoa. Teheń nonkankhiloḍ re jitkạr katet́ Raṅgaṭungi Santalato, Ranisongkel Upozila, Thakurgaon jilạ sećte Bangladisomren sanam hoṛko ar goṭa dhạrtiren Santalko lạgit́ teheń do ạḍi rạskạ ar samne seć lahaḱ lạgit́ Sohagi do aboren taṛam laha marsal kanae. Ape sanamko ṭhen nehõr tahẽn kana; jemon ińren banar kuṛi gidrạge koejoṅ re disạkinte tayom daram dinre arhõ bhage khiloḍ kin em edi daṛeaḱ.(Guljar Kisku)
Teheń do ạḍi aema sikhnạt bon hameṭ daṛeaḱ kana noko kuṛikoaḱ khiloḍ jitkạr sećte. Menkhan baḍae abon je ạḍi haron kosṭo ar saset́ko sahao katet́ re BFF re tahẽkatet́ko practisok kana; tolop hõ ạḍi thoṛa eken 8 khon 10 hajar bangladisom kạuḍite. Ar criket ren khiloḍiạko lạgit́ do lak lak bangladisom kạuḍi. One oka do ạḍi maraṅ begar do ńeloḱ kana. Onate teheń disomren sanam hoṛkoge kukliko doho akada; cedaḱ nonkan begar se pharak do tolop bisoete. Bangladisom reaḱ sanam thạ̃i khonge sanam hoṛ facebook, social media, printing news, TV ko re ạḍi aema gapalmarao do hoyoḱ kana. As tahẽnkana darakan dinre disomren Maraṅ Montri Shekh Hasina do nonkan bisoe kodoe ńel juta. Ar baṅkhan do ạḍi lajaopaṛao hoyoḱa disom lạgit́, jạtiạriko lạgit́ ar ạdibasiko lạgit́ hõ.
Mucạt́ re sanam santal kuṛiko teheń doń uskuret́pe kana; eken ato oṛaḱ re khiloḍ se okte nạpit́ re eneć do baṅa, bickom professional khiloḍiạ hoyoḱ lạgit́ aboren Santali kuṛi Sohagi Kisku seć koyoḱ katet́ taṛam ḍahar laha edi lạgit́ ape sanamko ṭhen nehõr tahẽn kana.
Baṅgladisom maejiu phuṭboll do̠l aema aema rạskạ johar. Ente Bangladesh maejiu Phuṭboll dol pạhil dhao SAFF Championsip talate nagam re ńutum olentakoa. O̠sad se be̠sạdi lekan kạmire ko jitkạrena. Bangladisom ren maejiu phuṭboll do̠l jitạuen rạskạ khobor goṭa baṅgladisom re ḍamḍheyena.
Jo̠to̠ khonaḱ rạskạ khobor do noage onko modre mit́ṭen Santal kuṛi Sohagi Kisku hõ noa phuṭboll do̠l ren mit́ kheloḍi kanae. Noa SAFF Champion khilạḍre nui hõe selet́lena. Noa jitkạr rạskạ khorbor Baṅgladisom ren hoṛko lạgit́ mit́ṭen go̠ro̠banaḱ bisoe kana.