Manwa do dhạrtire bạḍen saṅgeyenako. Set bõsrenko do Kạyin bõsrenko tuluć ghar ghạrạiko joṛaoket́te dhạrtire do kại chabaoena, ar Isor doe kastaoena manwae benao akat́ko iạte. Menkhan Noah do Isor samaṅre dayae ńamket́a. Ona iạte Isor do Noahe metadea, Am do 300 moka jeleń, 50 moka osar ar 30 moka usul mit́ṭaṅ jahaj benaome, ar bhitri bahre alkatra hasate ona lasraome, ente iń do pirthimire ḍubạ daḱiń heć ocoea, sanam jạtrenko maraoko lạgit́, Noah do Isor reaḱ hukum leka ona jahaj benaokateye boloyena, ar uni tuluć aćren oṛaḱ hoṛ ar Sem, Ham ar Japhet metaḱme aćren pea hopon ar onkoren bạhuko, ar daḱre bako tahẽ daṛeaḱ joto jivianko joṛ joṛge. Khange Isor do 40 siń 40 ńindại daḱ ocoket́a, ar athantar reaḱ sanam jharna phoṛ oḍokena, ar usul utạr buruko khon 15 moka cetanre daḱge se rakaṕena. Ar rohoṛreko tahẽkan joto jiviankoko mohor meṭaoena; eken Noah ar uni tuluć jahajre tahẽkanko doko bańcao sarećena.

Khange Isor do Noahe disạkedea, ar dhạrti cetan cetanteye hoe idi ocoket́a, ar daḱ do ohraoena, ar jahaj do Ararat burure ḍhaṅ tahẽyena. Khange Noah do khiṛki duạr jhićkate mit́ṭaṅ bhonḍa kạhũi aṛaḱ got́kadea. Uni do onte noteye uḍạu baṛae kan tahẽkana dhạrti cetan khon daḱ ạuri ańjedoḱ dhạbić. Onakate Noah do mit́ṭaṅ potame aṛaḱkedea; menkhan uni do aboḱ reaḱ thol bae ńamlet́te jahajteye ruạṛena, ar Noah do ti tiạrkateye ataṅ aderkedea. Noah 7 mãhã jivi hataṛkate arhõ uni potame aṛaḱkadea. Uni do ạyuṕ ber ṭhonṭare mit́ṭeć ṭuṅgeć akat́ jạit dare reaḱ berel sakamanteye ruạṛena. Noah arhõ 7 mãhã jivi hataṛkate arhõ uni potame aṛaḱ dohṛakadea; ar bae ruạṛlente Noahe bujhạuket́a, baṅma, ot teṅgolen tahẽkana.

Khange Noah do jotokoante jahaj khone oḍokena, ar mit́ṭeć pinḍ benaokate jeredoḱ samaṅoḱko Isore samaṅadea gun manao joharae lạgit́. Ar Isor do ać monreye menket́a; Manwa gunạḱte ot ado bạń sarapaḱa; ente manwa reaḱ bundisjoṅ do gidrạ jokheć khonge bạṛićgetakoa. Pirthimi tahen bhor eroḱ ar iroḱ, reaṛ ar lolo, niron din ar rabaṅ din, ar siń ar ńindạ do baṅge cabaḱa. Khange Isor liṭạḱ-aḱ sermareye dohokat́a mit́ṭaṅ cinhạ lạgit́, ać goḱaḱe purạua mente. Noah do 950 serma umerreye goćena, ar maraṅ ḍubạ daḱ tayomren manwakoren janam datae hoyena.(Gen.6-9.)

Sonot Baebel re ol akana, Onare amaḱ mẽt́ paṛaolen torage ona do cabaḱa; Ente ackage dhon doe  phạ̃ḱrạ̃ḱjoṅa, Ar pajhaṛ leka serma seće uḍạuḱa (Kạhtukko: 23:5). Ạn ạri taberen cetan hudạren kạmiạko se hoṛko ńutumte jalapuri ko luṭpaṭ reaḱ kathako disom hoṛko samaṅre cet́ leka sodoroḱ kana; onkate ạḍi caṭo ar hahaṛage ạikạuḱ kana. Disạm lahantire dạyikan hoṛko do ti phulạukate kaera dareko hoelena menkhan nit onkoaḱ umul hõ baṅ ńeloḱ kana. Siń-ńindạ hudis ganḍonkate oka dhon jarwalen, ona sanamaḱ do chir chạtur cabayena. Dhon dạulạt rạkhi jogaoreko bertha akana.  Nit sanam lekan ṭahrao se anman dhon dạulat do rasṭro aḱ khajańci re menaḱa. Dhon do amaḱ Edre se raṅgaoḱ dinkore bae goṛowama. Enḍekhan nit́ dhạbić okoe do hoṛmo reaḱ balbalao daḱ jaṅgare jorokateko lahaḱkan, onkan dhon do jiạr ar tahṛao akan tahena. Baebel re ol menaḱa,Probhuge reṅgeć oḱcoyić ar kisạ̃ṛ oḱcoyić; Unige coḱpotić unige uḱsulić (Pạhil Samuel Puthi 2:7).

BCB reaḱ khobor sakamre ol akana, calaoen 15 sermare Baṅgladisạm khon 28 dharate durniti hotete 234 Bilion markin ḍolar binhok se bepar akana. Ar noa kạmiko kạmikeda rasṭro ren namḍak ar cetan hudạre duṛuṕ akana hoṛko. Sonot Baebel re dhon sõćjoṅ, beohar, dạyik ar ona ạuriạḱ beohar reaḱ horko do  bornon akana. Jingi bitạu ar din hiloḱ reaḱ kạmiko purạu; Baebel do aboaḱ gharońj ar peṛa pạrbhạko babotte hõe lạiabon kana. Cet́ leka Sikhnạt reaḱ kạmi dhon sõćjoṅ, onka leka bạnij bepar katet́ hõ ṭaka poesa do jogaṛoḱa. Onate Sonot Baebel re menaḱa, Menkhan kisạ̃ṛoḱ sanayet́ko hoṛ do biḍạu ar pạsire, ạḍi lekan bepuj hạhạn lalockoreko khańjoḱa, one onako do maraoḱ ar nosṭoḱre hoṛkoe unumet́ko (Pạhil Timothi 6:9). Abo manwa do kisạ̃ṛoḱ sanate aema lekan lalockorebon paṛaoḱ kana, samajiạ-be samajiạ, rastro birud se somaj birud kamkajre bon joṛaoḱ kana. Aboaḱ jaṅ jel re noa nisạ do tumul akana, onate menakana, Ṭaka poesa duḱlạṛić do ṭaka poesate bae biḱa, ar acel pacel dhone dulạṛet́ić hõ arjaoaḱte baṅ, noa hõ ạuṛiaḱgea. Probhu Jisu do aćren celako noa cecet́aḱ emat́ko tahẽkana, ente okare dhon menaḱtama, onḍege amaḱ mon hõ tahena.

Probhu botorae reaḱ kuṛại do dhon ar man ar jionge. Dhạrtiren manwakoaḱ khojoḱaḱge, jãhãtinre abo hõ noako ńam lạgit́bon ḍạṛ baṛae kana. Noa babotre hõ ol akana, Acel ar manot do am ṭhen khonge hijuḱa, ar am do sanamaḱ cetanrem rajoḱkana. Amaḱ tirege daṛe ar jor do; ar am hatrege menaḱa sanamaḱ maraṅ ocoe ar daṛe ocoe do (1 biboron 29:12). Sanam daṛean Isor baba tinre coṭ khone ńeńela, unre abo do ać seć do baṅ bickom dharti sećgebon beṅget́kaḱa, inạ ghuṛirege muskilaḱ do ghoṭaoḱa. Solomon hõe sikạrleda, Aćaḱ dhonregeye bhorsajoṅkan hoṛ doe tolmojoḱa, Menkhan dhorom hoṛ do hạriạṛ sakam lekae sahreḱa (Kạhtuk puthi 11:28), se Pạtiạr hoṛ do ḍher bhore ńama, menkhan kisạ̃ṛoḱre utpatoḱ hoṛ do bin sạjạite bae tahena (Kạhtuk puthi 28:20). Bharot disạmren mare maraṅ montri Haradanahalli Doddegowda Deve Gowda menleda, inaḱ niṭaḱ jomage emạńpe, ente tayomte bạṛtilen khan bạń aṅgoćmea, ariń mena okoe kanae Probhu do? Baṅkhan tayomteń nacarlenre kombṛo leka bạṛić horiń bachaoa, ar Isor ńutum ạuṛ̣i pạthạṛiń beohara. Noa do Kạhtuk puthire ol akana, Raja Solomon do aćaḱ jion reaḱ katha khone ol akada. Inạkate Raja Solomon do Isor aḱ hor khone pharaklena. Sadhu Pạul do Timothi cehaokate Epehisi manḍerren koe metat́ko tahẽkana, ‘Ente sanam bạṛićaḱ rehet́ do ṭaka poesa duḱlạṛge, one onako uihạret́te adom adomko do biswạs khonko bhaṅgṭaoakana ar ạḍi okoć dukte akotet́geko soboḱ taṕakana, ( Pạhil Timothi 6:10).

Sostor do ṭaka poesare lạṭkao akan babotre lahare sontor akat́bona.

1. PROBHUaḱ bhor doe kiḱsạ̃ṛa (Kạhtukko 10:22)
2. PROBHU manotaeme amaḱ sanam dhon duribkote, (Kạhtuk 3:9)
3. Alom khaṭao laṅgaoḱa kisạ̃ṛoḱ lạgit́ do (Kạhtuk 23:4).
4. Apeaḱ cạlcolon do ṭaka poesa bin duḱlạṛaḱ hoyokḱtapema; (IBRIKO 13:5).

Chin disạm do bahre ren bạirikoaḱ ti khon rukhiạ lạgit́ Great wall ko benaoleda one oka do Chin reaḱ pạcri lekate oprom menaḱ. Khobor lekate,  noa pạcrire do cando khon hõ bạṛti ńeloḱaḱ tahẽkana. Enrehõ Chin disạmre pạcri benao katet́rehõ bes dhao ko akham akana, noa reaḱ mul karon tahẽkana ṭaka poesa; okoe do pạcri duạrre dạyike tahẽkan, onko do ạḍi utạr ṭaka paesa ko hataoleda. Ṭaka poesa lob laloc do bạrịć horte ạyurbona. Ona karontege sonot Baebel re menakana,  Adoe metat́koa, Men cehaoḱpe ar sanam lekan lob laloc khon sontorakan tahenpe, ente hoṛaḱ jion do sareṛoḱ leka menaḱtae dhon duribte do baṅ hoyoḱa (Luk 12:15). Sisirjạuić Isor baba do manwa jion ạyur lạgit́ ae-rojgar são sãote sambaṛao reaḱ horko hõ sostorre ol caṛhao akada. Isor aḱ soros utạr sirjon do manwa, uni do aboe dulạṛet́bon kana.  Apostol kạmi puthire Pạul do sanamaḱ ńel jutkate Timothi noa solhae emadea, Noa puriren kisạ̃ṛko kạjiạ̃ukom, jemon aloko usul monoḱ; ar bin-khạṭi dhonre aloko bhorsa akan tahen, menkhan Isorrege, one uni sahtate jotoaḱe anṭao abonkan rạskạte beoharjoṅ lạgit́, (1 Timothi 6:17).

Ạd khon dhạrtire do eken mit́ pạrsige tahẽkana. Manwako do puruạ seć mohnḍakate Sinạr disomre maraṅ okoć mit́ṭeć ṭạnḍi ńamkate onḍeko berelena. Adoko mepenena, delabon, serma hạbić ṭuṅgạuḱ mit́ṭaṅ buruńjbon benaojoṅa, jemon goṭa dhạrtire alobon chir chạturoḱ.

Menkhan Probhu do serma khon ãṛgokate onkoaḱ pạrsiye gaḍbaḍaoket́takoa, jemon aloko bupujhạuḱ. Onkate Probhu do goṭa dhạrtireye chir chạturket́koa, ado buruńj beḱnaoko bạgiket́a. Ona iạte ona ṭhạ̃i reaḱ ńutum do Babelko dohoket́a, ente onḍe Probhu do goṭa pirthimirenko reaḱ pạrsiye gaḍbaḍaoket́takoa. Sem bõsrenko do Ạsiareko tahẽyena, Ham bõsrenko do dạkhin seć Ạphrikateko calaoena, ar Japhet bõsrenko do pạchiạ seć Bilạtteko senena.

Jisu mit́ din Jirusaleteye calaḱkan tahẽkanre, 10 goṭeć murhuć jom hoṛko daramkedea. Onko do sạńgińre teṅgokateko raḱadea, E Jisu purkhạ, dayawaleme! Uniye metat́koa, Do, senkate naekeko ṭhen udugoḱpe! Khange calaḱ calaḱtegeko saphayena. Onko modre mit́ hoṛe bogeyen ńelket́te ạḍi garte Isor sabasi sabasiateye ruạṛena, ar Jisuaḱ jaṅga ṭhen taberenteye gun manao joharadea, ar uni do mit́ṭeć Samariạ hoṛe tahẽkana.

Khange Jisui menket́a, Gel ke gel do bako saphalena? Onko are do okare? Nui eṭaḱ jạtren hoṛ chaḍa okoe hõ bako ńamlena Isor man emae lạgit́? Adoe metadea, Ma beret́kate calaḱme, amaḱ pạtiạuge bańcao akat́mea.

Jisu Tur ar Sidon ṭoṭhakoteye calaḱkan tahẽkanre mit́ṭaṅ Kananren maejiu hećkateye raḱadea, E Probhu Dạvidren Hopon, dayawạńme, ińren hoponera do bạṛićge bhut capaṛ akadea. Menkhan Jisu do mit́ katha hõ bae roṛ ruạṛadea. Ado uniren celako metadea, Bidạkaeme baṛe, ente abon tayom tayomteye hoho ạguet́a. Jisui roṛ ruạṛat́koa, Israyel budạren at́ bhiḍiko ṭhen begor okoe ṭhen hõ bạń kol akana. Uni maejiu do hećente sewawadeteye metadea, E Probhu, goṛoạńme, duṛuṕ ṭenḍar akan Johane isạrawadea, jemon Jisui kuliye. Jisui roṛ ruạṛket́a, Uni kanae okoe lạgit́ piṭhạ kecaḱ topokateń emae. Khange piṭhạ kecaḱ Judạ Iskariot emkateye metadea, cet́em cekae lạgit́ hako pakoge onka godme. Celako do bako bujlaḱa cet́ mente onae metadea; menkhan Judạ do oḍok sen got́ente naekeko ṭhene calaoena. Ar ńindạge tahẽkana.

Khange Jisu piṭhạ halaṅkate gun manao joharkateye kecaḱket́a, ar celakoe emat́koteye menket́a, Ne, ataṅkate jompe, noa do ape lạgit́ emogoḱkan ińaḱ hoṛmo,Nonkaepe iń disạń lạgit́. Onka leka kedoḱ tayom bạṭi hõ halaṅkate gun manao joharkateye emat́koa, metat́koae, Ne ataṅkate noa reaḱ ńũipe sanamko. Noa bạṭi do nãwã leg ińaḱ mãyãmte, one ape lạgit́ joroḱkan kại ikạ lạgit́. Nonkaepe tin dhao onape ńũi iń disạń lạgit́.

Onakate Jisui metat́koa, Arhõ ạḍi lạiape reaḱ menaḱtińa; menkhan nitoḱ do ona bape sahao daṛeaḱa. Menkhan Kaḱthaić, uni Sonot Jiu, one uni iń ńutumte Ạpuńe kole, uni do sanamaḱkoe cet́apea, ar okakoń lại akawat́peaḱ jotoe disạ ocopea.

Ona jokheć Ạugust Kạisạr ṭhen khon mit́ṭeć parwana oḍokena goṭa dhạrtirenko ol caṛhaoḱ lạgit́. Ona ol cacaṛhao do pạhilge hoelena Korinio Suriạren disom caḱlaoiće tahẽkan oktere. Khange joto hoṛ ol caṛhaoḱ lạgit́ko calaoena, mit́ ke mit́ hoṛ apan ạpin naṅgrahatege. Ar Joseph hõ Gạlil disom Nasaret naṅgraha khon Jihudạ Bethlehemko metaḱ Dạvid naṅgrahateye rakaṕ calaoena, ol caṛhaoḱ lạgit́ge aćre horoḱ cikhnạ akanić Mạriạ tuluć, one uni bhạrti hoṛmoe tahẽkan. Onḍekin tahẽkanre uniaḱ duṛuṕ din seṭerentaea; ar aćren pạhil janamić koṛa gidrạ janamkate gendṛaḱte bedhaokedete mit́ṭeć goṛa ḍakaḍaḱreye gitićkadea, ḍera oṛaḱre ṭhạ̃i baṅ tahẽkante. Ar ona ṭoṭhare gupi hoṛko tahena; onko do bathan ṭạnḍire ńindạ jokheć ako akoren bhiḍi palko horhoyet́ko kan tahẽkana. Khange Probhuren mit́ṭaṅ serma goḍet onko ṭhene teṅgoyena, ar Probhu reaḱ ṭhonok beṛhaete bamberat́koa, ar onko do bạṛić botorko botorena. Menkhan uni goḍete metat́koa, Alope botoroḱa; ente ńelpe, joto hoṛ lạgit́ maraṅ rạskạń jạhirape kana; ente teheń do Babańcaoić Probhu Mạsiye Janamentapea Dạvid naṅgrahare. Ar ape lạgit́ cinhạ do noḱõe; Gendṛaḱte bedhao akade ar goṛa ḍakaḍaḱre gitić akade mit́ṭaṅ bale gidrạpe ńamea. Khange saṭ mente sermaren phạdko duṅgut́ duṅgut́ uni serma goḍet tulućente Isor sarhaoateko menket́a, Coṭ utạrkore Isor reaḱ ṭhonok, pirthimire suluk, khusi akawat́ko manwakore!

Khange gupiko do Bethlehemte senkate Mạriạ ar Joseph ar goṛa ḍakaḍaḱre gitić akan gidrạko ńamket́koa. Ńelkate uni gidrạ reaṅ lạiat́ko kathako pasnaoket́a, ar ańjomket́ joto hoṛko hahaṛayena ar Mạriạ do onako joto kathae baeket́a aćaḱ monre khondrondjoṅ tuluć; ar gupiko do lạiat́ko leka sanamaḱkoko ańjom arko ńelket́te Isor sarhao sarhaoteko ruạṛena. Ar gidrạ khatnaye lạgit́ irạl mãhã purạuen khan, serma goḍet reaḱ katha leka uniaḱ ńutum do Jisu dohoyentaea. Jisu janamkate 40 mãhã tayomte Joseph ar Jisuren eṅgat do Jirusalemtekin idikedea, mundilre Probhu ṭhen hạjire lạgit́. Simon ńutuman Jirusalemre mit́ṭaṅ Isor bhokti hoṛe tahẽkana. Sonot Jiu hotete sodor akawade tahẽkana, Probhuren Ojoḱić ńelea ạuriye gujuḱre. En hiloḱ Jiu uskurte mundilteye hećena. Simon gidrại ńelkede khan hoborkedeteye menket́a, E Probhu, nitoḱ do amren guti suluktem bidạkạńa; ente joto hoṛ lạgit́em teṅgo akade Babańcaoić do mẽt́teń ńelkedea. (Luk 2,1-32.)                                         

Gabriel serma goḍet Sakhariạ ṭhen upelkate turuiaḱ candore uni do Isor ṭhen khon Nasaret ńutumanaḱ Gạlil-reaḱ mit́ṭeć naṅgrahateye kolena. Dạvid budạren Joseph ńutumanić mit́ hoṛre horoḱ cikhnạ akan mit́ṭaṅ kuạ̃ṛi kuṛi ṭhen; ar uni kuṛi reaḱ ńutum do Mạriạ. Uni serma goḍet do Mạriạ ṭhen bolokate metadea, Johar, E daya akawat́menić! Probhuge am tuluć. Mạriạ do ona kathateye torasena, are nạndi guḱndi kan tahẽkana, ona johar cet́ lekanaḱ coṅ. Ado serma goḍete metadea, Alom botoroḱa, Mạriạ ente Isor ṭhen dayam ńam akat́a. Ar ńelme, hoṛmorem ńamjoṅa ar mit́ṭaṅ koṛa hoponem janamea, ar uniaḱ ńutum do Jisum dohoetaea. Uni do maraṅe hoyoḱa, ar coṭ utạrićren Hopone bikạuḱa; ar Probhu Isor do uniren apat Dạvid reaḱ siṅghạsone emaea; ar Jakob budạrenko cetanre jaejug dhạbić raj akane tahena, ar uniaḱ raj do tis hõ baṅ mucạdoḱa.

Mạriạ do serma goḍete metadea, Noa do cet́ lekate hoyoḱa, herel reaḱ mẽt́ãhã ba ń ńel akat́ do! Serma goḍet do roṛ ruạṛkateye metadea, Sonot Jiuge am cetanreye hijuḱa, ar Coṭ utạrić reaḱ daṛegeye umulkama, ona iạtege uni janamoḱić do sonotgeye bikạuḱa, Isorren Hopon. Ar ńelme, am gusṭiren Elisabet, uni hõ ać buḍhi pạṛiạre mit́ṭen koṛa hopon hoṛmoreye ńam akawana, ar noa do bạńjhi ńum akadeić reaḱ turuiaḱ candotae; ente Isor ṭhen khon jãhãn kathage baṅ be-daṛeanagoḱa. Khange Mạriại menket́a, ńelme, iń do Probhuren kạmṛĩ, amaḱ katha leka baṛe hoyoḱtiń ma! Ado serma goḍet uni ṭhen khone calaoena. (Luk 1,26-39.)

Mathae 6: 5-8.

Aema Jihudi mukhiạ dobạṭiạre hoṛ samaṅre koejoṅako. Ar  hoṛ do onko ko ńelkoa ar dhorom hoṛ menteko lekhakoa. Nonkan hoṛ do hoṛaḱ sabasi ńam lạgit́ ko kusiaḱa. Menkhan nonkan hoṛ do Isor seć khon cet́ hõ bako ńam baṛaea, niạ jion lạgit́ hõ baṅ ar tayom daram okte lạgit́ hõ baṅ.

Jisui cet́abon kana, amem koejoṅre oṛaḱte boloḱme duạr sińme. Noa reaḱ jos katha do hoyoḱ kana koejoṅ oktere Isor seć amaḱ mon thamgạḍitam. Ar tinre Isor tuluć katha bon roṛa un jokheć khạṭige abo do aboaḱ dhạrtiaḱ cintạ, hudis bond hoyoḱ jạruṛa. Eken abo do abo nijaḱ lạgit́ bo koejoṅ ona do baṅ, menkhan eṭaḱ biswạsi soṅge joto hoṛaḱ bhạlạianaḱ ar jạruṛ babot bo koe daṛeaḱa. Onatege tinre eskar bo tahen se mit́ soṅgetebo tahen aboaḱ mon do Isor sećge tahen. Ar hoṛ nel oco lạgit́ do alobo koejoṅ ma.

Koejoṅ oktere hoṛ do aema lekateko bhula. Onko doko hudisa bises niạmteko koe lekhan Isor do onkoaḱ koejoṅ reaḱ roṛ ruạṛe emakoa. Onko do  koejoṅ oktere bises katha ko beohara  ar ạḍi ghạṛić ko koejoṅa. Ar baṅkhan bises jaega ko boehara. Menkhan koejoṅ oktere noako reaḱ cet́ jạruṛge bạnuḱa. Aboren Isor aboaḱ biswạs ńel kate koejoṅ reaḱ roṛ ruạṛe emoḱa. Aboaḱ bises katha lạgit́ do baṅ se cet́ lekabo koejoṅa ona cetanre hõ baṅ.

Abo do khạṭige disạ dohoe hoyoḱ tabona je Isor doe hoyoḱ kana sermaren mãyãwanić Baba. Uni do aboaḱ koejoṅ lahare jotoaḱ doe baḍaea. Uni doe khojoḱ kana, Uni ṭhen abo ṭehãḍ akan bo tahen. Ṭhik oka leka kạṭić kạṭić gidrạ akoren baba ṭhen ṭehãḍ ko tahen. Aboaḱ okaṭaḱ jạruṛ Isor ona emoḱ lạgit́ sapṛao akae menaea, ar asambheṛ emoḱ lạgit́ daṛe menaḱtaea. “ Aboaḱ ontorre Isoraḱ oka daṛeye kạmiet́kan ona daṛe lekate uni do aboaḱ koejoṅ ar hudis khon hõ ạḍi bạṛtiye kạmieda.” (Ephesiko 3: 20). Ar tinre koejoṅ lạgit́ oṛaḱtebo boloḱa abo do Isor tuluć ńapam hoyoḱ tabona .

(Luk 12: 13-21)

Aema hoṛge Jisu Mạsi do cecet́ić mahasoe ar Nạbi hisạbteko manaoedea. Noa iạtege onko mod khon mit́ hoṛ do Jisu Mạsi metadea, boeha talare menaḱ sompotti babot kạphạriạ do meṭao got́kam. Uni hoṛ do boeha ṭhen khon sompotti bhag-e khojoḱkana, menkhan boehatae do bae emaekana.

Jisu do uni hoṛaḱ khojoḱa bae hetaoada. Ente Jisu Mạsi do noako lạgit́ bicạrić doe baṅ kana, ar bicạr lạgit́ ho adalot re bae duruṕ akana. Ar noako kạphạriạ saphae lạgit́ ho noa dhạrtite bae heć akana. Jisu Mạsi do atma ren bicạrić kanae. Ona iạte jãhãe manwa dhạrtiaḱ lab karonte Jisu ṭhen hijuḱ reaḱ jạruṛ do banuḱa. Cedaḱje Mạsiaḱ raj do noa dhạrtire do banuḱtaea.

Ar bạṛtikaete Jisu do manwawaḱ ontore baḍaegea. Okoe sompotti reaḱ bhag-e khojoḱkan uni do lob menaḱtaea. Ente uni doe lobhigea. Ar lob karontege uni hoṛ do jãhãleka tege ona sompotti ńam lạgit́e  kurumuṭueda. Sostore meneda, “Dhạrti do alope dulạṛa ar dhạrtire menaḱaḱko ho alo.Jãhãe dḥartiye dulạṛ khan Baba reaḱ dulạṛ  unire  bạnuḱanaṅ.” 1 John 2:15.

Manwawaḱ jion asambheṛ dhon-sompotti cetanre do baṅ tehãḍoḱ kana.  Karon sompotti do jaejug jion bae em daṛeaḱa. Sompotti do rạskạ ar suluk bae em daṛeaḱa. Bickom sompotti manwawaḱ jionre dạndiye ạguia.  Sạrige, khạjuk aboaḱ jạruṛ lạgit́ dhon-sompotti bo jarwae khan, enḍekhan atma sećtebo tuạroḱa. Unre abo do Isor ṭhen tehãḍ baṅ kate dhon cetanrebo tehãḍoḱa. Abo do Isor cetanre biswạs bo bonda. Ar tinre aboaḱ jionre nonkanaḱ ghoṭna hoyoḱa unre aboaḱ atma do bon ada.

Jisu do lelha kisạ̃ṛ hoṛaḱ phen kathae lạikeda. Okoe do kisạ̃ṛoḱ lạgit́ gola oṛaḱre dhon jomae dhurạuena. Uni kisạ̃ṛ hoṛ doe menkeda, “E jiwi ḍher serma lạgit́ bae akan acel pacel dhon dorib menaḱtama jirạujoṅme, jomjoṅme, ńujoṅme, heseć sekrejoḱme”.  Isor uni ṭhene hećena are metadea, “E bebuj, niạ ńindạge amaḱ jiwi do am khon ko khoja.” Mane do hoyoḱkana, uni hoṛ do gujuḱ hoyoḱtaea. Inạ tayom amaḱ asambheṛ dhon menaḱtam ona reaḱ cet́ hoyoḱa! Sostore meneda, “ Ente Isor bebhukti hoṛ reaḱ do cet́ as.  Isor uniye get́ giḍikaere? Isor uniaḱ jiwiye iditaere?” Job 27:8.  Ar ho sostore meneda, Ente dhạrtite do cet́ ho babo agu dara akada, ar cet́ ho bacobo idi tora daṛeaḱ.     1 Timothy 6:7.

Okoe manwa serma raj lạgit́ dhon bae sõćjoṅa, sạrige uni doe lelhagea. Okaṭaḱ dhon jaejug lạgit́ do baṅ kan, ona dhon iạte cedaḱ aboaḱ jiwi botor rebo dohoyet́ kana?

Serma raj do aćaḱ darkha bagwan lạgit́ kạmiạko ạḱcu setaḱ torae oḍoken mit́ṭaṅ oṛaḱ kisạ̃ṛ leka. Ar din reaḱ mit́ sikạkate kạmiko tuluć rikitkate aćaḱ darkha bagwanteye kolkat́koa. Ar bạsiạm okte ganre oḍok senente bajarre eṭaḱko ạjạuṛi teṅgo akan ńelkateye metat́koa, Ape hõ darkha bagwante calaḱpe, ar hokaḱgeń emapea; adoko calaoena. Arhõ tikin ar tarasiń okte ganre oḍok senkateye onka lekaket́a.

Ado huḍiń daḱ lo ber ganre, oḍoṅ senkate eṭaḱko teṅgo akan ńamket́koteye metat́koa, Caḱ nonḍe sara dinge ạjạuṛipe teṅgo akana? Onkoko metadea, Ente okoe hõ, baba bako ạculet́le do. Metat́koae, Ape hõ darkha bagwante calaḱpe. Ado ạyuṕen khan, uni darkha bagwanren kisạ̃ṛ aćren sordare metadea, Do, kạmiạko hoho ạgukom, ar kuṛại emakom tayomko khon ehoṕkate lahako dhạbić. Ado huḍiń daḱ lo ber gan okteren hećente mimit́ sikạkateko ńamket́a. Menkhan onko lahako do hećkateko menwana, Ale nahaḱ bạṛtile ńama; menkhan onko hõ mimit́ sikạkateko ńamket́a. Khange ona ataṅkate oṛaḱ kisạ̃ṛ upạrte karać kurućenteko menket́a, Noko tayom hoṛ do eken mit́ ghạṛiko jabaṛ jubuṛlaḱa, ar ale sara din reaḱ ãṭ jharla jhạrli setoṅle sahao akat́ hoṛ tulućem bara bạriket́koa. Uni kisạ̃ṛ hoṛ do roṛ ruạṛkate onko modre mit́ hoṛe metadea, Henda peṛa, bacoń be dhoromet́me; mit́ sikạte iń tuluć bam rikitlaḱa? Am do amaḱ halaṅkate senjoṅme. Menkhan iń do am leka tayomko hõ emako sana menaḱtińa. Se ińaḱko reaṅ do sanań leka baṅ ganoḱtińa? Ińiń bhage teṛoṅ amaḱ mẽt́ joloḱ kantama? (Math. 20, 1-15.)