Maraṅ DIN baṅ maraṅa ghonṭa saḍe rãwaḱ

Baṅ kana din do maraṅ porob reaḱ hewaḱ.

Manwa rupe hatawana abon Isor Baba

Maraṅ hoyen din do noa soetan daṛe caba.

Noa din ge dhạrti tala maraṅ mạhimate

Seṭerenae jisu mạsi manwa jonom kate.

Abo khonaḱ hiskạ bạḍại hiṛiń cabae hoyoḱ

Tobe aneć sanam kore rạskạ seṅgel joloḱ.

Babon tahen sanam koge dos ar bhinạ bhini

Ente nitoḱ seṭerenae babańcaoić uni.

Sanam koaḱ mone ontor saphae abon teheń

Maraṅ DIN re rạskạ jion jemon hoyoḱ jeleń.

Ontor mundil sajao abon jisu mạsi lạgit́

Boeha dulạṛ urgum dohoe tahenabon mit́

Huḍiń maraṅ sanam koge ISOR ṭhen do soman

Pạtiạr jion khemao lekhan ńamoḱ serma dolan.

Reṅgeć kisạṛ ṭuạr amar rạnḍi ṭhunṭạ dukhi

Sohot́ kobon goṛokote sanambon tahen  sukhi.

Sanam koaḱ oṛaḱ hoyoḱ nãwã Jerusalem

Dulạṛ jisu MARAṄ DIN re rạskạ seteńalem.

Jisu Herod Raj okte Bethlehemreye janamen khan, gonok hoṛ puruạ khon Jirusalemte hećkateko menket́a, Jihudikoren janamen raj do okare menaea? Ente ale do uniren ipil puruạrele ńelledea, ar uni sewawae lạgit́le hećena. Herod raj onae ańjomket́ khane torasena, ar maraṅ naekeko ar sostor baḍaeko jarwaket́kote onko ṭhene khuṛiạuana, Mạsi okareye janamoḱa mente. Onko doko metadea; Jihudạ Bethlehemrege, nạbi reaḱ katha leka. Khange Herod onko gonok ko oko okote hoho ạgu ocokate onko ṭhene sutrạuana ipile ńellen jokheć reaṅ. Ar Bethlehente kolket́koteye metat́koa, Do senkate gidrạ reaṅ soḱ sutruć surạgpe, ar unipe ńamlere jạhir torawạńpe, jemon iń hõ senkateń sewawae.

Onko gonok doko calaoena. Khange puruạreko ńellede ipil do onko laha lahateye calaḱkan tahẽkana, gidrạ menae oṛaḱ coṭre ạuri seṭerkateye teṅgoḱ dhạbić. Onko do ipiltet́ko ńelkedete ạḍi bạṛićko rạskạena; ar oṛaḱte bolokate gidrạko ńelkedea aćren eṅgat Mạriạ tuluć; ar ombaḱkateko sewawadea; ar akoaḱ dhon babaeaḱko oṭaḱkate sona, kunduru ar gondhorosko samaṅadea. Ar Herod ṭhen aloko ruạṛa mente kukmũte cehaoente eṭaḱ horte akoaḱ disomteko sa calaoena.

Onkoko calaoen khan, Probhuren mit́ṭen serma goḍet kukmũte Joseph ṭhen upelkateye metadea, De beret́kate gidrạ ar eṅgattet́ sotoḱkinte Misor disomte dạṛme;ar onḍe tahenme iń ạuriń metam dhạbić; ente Herod do gidrại sendraye lạgidoḱ kana gojea mente. Khange uni do beret́ente ńindạre gidrạ ar eṅgattet́ sotoḱkate Misor disomteye calaoena.Herod do gonokko ṭhen gidrạ benaoene ńelket́ khan, bạṛiće raṅgaoena, ar Bethlehemren joto koṛa 2 serma umerrenko khon nirosko dhạbiće goć ocoket́koa.

Herode goćen khan, Probhuren mit́ṭen serma foḍet Misor disomre kukmũte Joseph ṭhen upelkateye metadea, Ma beret́kate gidrạ ar eṅgattet́ sotoḱkinte Israyel disomte ruạṛme’ ente gidrạ reaḱ jivi sesendrako doko goćena. Khange Joseph do gidrạ ar eṅgattet́ sotoḱkate Gạlil disomte sesente Nasaretreye thamgạḍiyena. Ar gidrạ foe hara idiyena, are keṭeć idiyena, akelte perejoḱ kan tuluć, ar Isor reaḱ bạsut unire tahẽkana. (Math. 2. Luk 2, 40.)

Peter mit́din Jisui kulikedea, E Probhu, ińren boeha iń reaḱe kạilere tin dhaoiń ikạkataea? 7 dhao dhạbić 7 Jisui roṛ ruạṛadea, 7 dhao do baṅ, menkhan 7 dhao 70. Ado mit́ṭeć phen kathae lạiat́koa, Mit́ṭaṅ raj aćren gutiko tuluć lekha jokhae jokheć mit́ṭaṅ 10,000 mon ṭaka dharaoić uni ṭhene hạjir ocoyena. Menkhan haḱla teaḱ bạnuḱtaete kisạ̃ṛ do uni ar era hoponko ar tahẽkantae jotoaḱko ạkrińoḱ ar rin halaḱe hukumket́a.

Khange uni guti do kisạ̃ṛ reaḱ ti jaṅgare giḍiyenteye metadea, Iń reaḱ baṛe sombhurime, jotogeń halakatama. Ado kisạ̃ṛ mãyãyenteye aṛaḱadea, ar dadone khalas kadea. Menkhan uni guti do oḍok senkate mit́ sae sikại dharao akat́tae aćren mit́ṭen são guti ńamkedete uni saṕkatey limbot́ kiro korokedea, metadeae, Dharaoaḱ halakạtińme! Uni são guti do uniaḱ ti jaṅgare giḍiyenteye metadea, E bhại, iń reaḱ baṛe sombhurime jotogeń halakatama.

Menkhan uni do bae uput́let́te senkate kạd oṛaḱreye bhoraokadea, dharaoaḱ ạuriye halatae dhạbić. Uniren são gutiko ona ńelkate ạḍiko mon dukena, ar akoren kisạ̃ṛ ṭhen senkate jotoko khulạuadea. Khange uniren kisạ̃ṛ hoho ạgu ocokateye metadea, Ea bạṛić guti! Onako joto dharaoḱ iń khalaskat́mea, amem nehõradiń teṛoṅ; ar hõ amren são guti mãyãwae baṅ hoekoḱtama, iń amiń mãyãwat́me leka? Khange uniren kisạ̃ṛ raṅgaoente saḱsetko ṭhene soprotkadea, joto dharaoaḱ ạuriye halatae dhạbić. Ińren sermaren Ạpuń hõ apeye nonka lekapea, mit́ ke mit́ hoṛ apan ạpin boeha apeaḱ monte bape ikạletako khan. (Math.18, 21-35)

Akoreko bhorsa akan dhorom kanako mente, ar arko doko nihạ̃t cabayet́ko tahẽkan adom hoṛ do noa phen kathae metat́koa, Bar hoṛ koejoṅ lạgit́ mundil tekin calaoena; mit́ hoṛ do phạrisi ar dosarić do mạsul-ijạdar. Uni phạrisi do teṅgoyente nonkae koejoṅ kan tahẽkana, E Isor, gun manao joharam kạnạń, ar ar hoṛko leka, luluṭko, bedhoromko, laṭghaṭko, se bar choṭ iń upạset́a, ar jãhãnaḱkoge hoyoḱ kantiń ona sanamaḱkoge gel reaḱ mit́ hạṭińiń emet́a.

Menkhan uni mạsul-ijạdar do pharakre teṅgo akan serma seć beṅget́ rakab hõ bae dillaḱa, eken koṛamre ceṭaḱ ceṭaḱ ateye menket́a E Isor, dayawạńme iń kạiyić do. Metape kạnạń nui baṅkate unige dhorom oco akan aćaḱ oṛaḱte ãṛgo calaoena; ente aćte usuloḱ mit́ ke mit́ hoṛ doe copot́ ocoḱa; menkhan aćte copodoḱić doe usul ocoḱa. (Luk 18, 9-14.)

(Mark 1: 17-20.)

 Jisu ponea pạhil celae bachaoket́koa. Pahilre uni do Simon ar ać boeha Andreas tuluće ńapamena, ar onko do doreãore hakoko sapet́ko tahẽkana.

Jisue metat́koa, “dela hijuḱpe, pańjayińpe.” Un okterege onko do akoaḱ kạmiko bạgiada arko pańjakedea. Inạ okterege uni do Jakob ar Johone  hohoaḱkina. Unkin hõkin beret́ena ar ạkinaḱ gharońj, ạkinaḱ lạukạ, ạkinaḱ kạmi kin bạgiada ar kin pańjakedea.

Onkage Abraham hõ bae baḍae kan tahẽkana okatei calaḱkan tahẽkana. “Biswạstege Abraham do, hoho ocoyen khane bataokeda, ona thạ̃ite onḍoḱ calaḱ lạgit́ okaṭaḱ ạidạri menkateye ńam lạgidoḱ kan tahẽkana, are onḍoḱ calaoena, begor baḍaete okate coe calaḱkan.” (Ibriko 11:8.)

Menkhan cela doko baḍaea okoe songetei calaḱkana. Lahate Simon ar Andreas tạkin  do Jisu kin baḍae akade tahẽkana ar kin biswạsae kan tahẽkana. Nitoḱ Jisu do onko celae hohoako kana, aćren ạḍi sor cela hisạbteko tahẽna. Uni do onkoe metako kana jotoaḱ bạgiaḱpe ar pańjayińpe.

Inạ dharatege teheń Jisu aboe hohoabon kana jate uniren celabon hoyoḱ. Uni do noa menkateće metabon kana, “dela hijuḱpe, pańjayińpe.” Cet́ leka Simon, Andreas, Jakob ar Johone metat́ko tahẽkan. Boeha Miserako dela beret́pe ar begor ạnḍuṅ kate Jisu bo pańjayea.

Jisui menlaḱa, Jirusalem dhiri cetan dhiri baṅ tahena mente. Onage hoyena. Romrenko do Jihudạ disom cetanre kurmutạha disom caḱlakoko doho idiyet́ko tahẽkante, Jihudiko do ona ar bako sahao daṛeat́te menket́a, Mimit́ mimit́tebon khotraḱ kan khan bickom mit́ dhaote goćlen khange bogeḱtabona. Ona iạteko hulket́a, ar kul leka dhidrikkate bạirikoko teṅgo daramet́ko tahẽkana.

Tayomte Kạisạren Tito do Jirusalem upạrte hećkate naṅgraha beṛhaeteye gheraoket́a. Unre sen parom porob jokheć tahẽkante ạḍi okoć Jihudi hoṛ sanam disom khon Jirusalemre poroboḱ lạgit́ko heć jarwa akan tahẽkana. Naṅgrahare ạḍi bạṛić reṅgeć hoyena, ar mit́ṭaṅ maejiu do aćren gidrạ goćkateye jomkedea. Ona lạṛhạire do 10 lak khon bạṛti Jihudiko khotrayena, ar amdaj 1 lak hoṛ doko saṕena. Onko modre Tito do adomko kurusreye jalat́ ocoket́koa; ar dosrako do golam hoyoḱ lạgit́ko ạkrińena, ar adomko do Romren hoṛkoko ńel rạskạḱ lạgit́ kaṭaha janwarko tuluć lạṛhạire gujuḱ hoyentakoa. Tito doe hukumlaḱa mundil doko ikạkaḱa mente: Menkhan mit́ṭen sipạhi so ṭhuṭkut́ seṅgele capat́ aderket́te goṭa mundil do lo cabayena. Ona do Jisu Mạsi janamkate 70 salre hoyena.

Kristanko do Probhui roṛ lahalet́ kathako pạtiạuat́taete Tito naṅgraha ạuriye gheraoreko dạṛ hataṛ akat́ tahẽkana.

Un khon Jihudiko do goṭa dhạrtirenko chir chạtur akana. Menkhan Probhui goḱ akat́a, Jihudiko hõ mit́din mon ạcurkate kurusreye khil jalat́ ocolen Babańcaoićreko pạtiạuḱa mente.

Serma raj do aćren hopon reaḱe bapla kheloḍket́ mit́ṭaṅ raj hoṛ lekayena. Ar bapla kheloḍre nẽotako hoho ạguko lạgit́ aćren gutikoe kolket́koa. Onko do hijuḱ bako rebenlena. Arhõ eṭaḱ gutiko kolkateye metat́koa, nẽotako metakope, ińaḱ toenat akat́a ińren ḍaṅgrako ar posaokoko gur akana, dela bapla kheloḍte.

Menkhan onko do ona bebạsutkateko calaoena mit́ do aćaḱ khette, ar mit́ do aćaḱ bạnij beparte. Ar arko do uniren gutiko saṕkate pojhotket́koteko goćket́koa. Khange raj doe raṅgaoena, ar aćren palṭon phạdko kolkate onko khũniạhiko marao ocoket́kote onkoaḱ naṅgrahakoe ḍahao ocoket́koa. Ado aćren gutikoe metat́koa, Bapla kheloḍ ma toenatge, menkhan nẽotako do lek bako tahẽkana. Onate ape do ḍaharko reaḱ dobạṭiạkore calaḱpe ar jãhã tinạḱgepe ńamko bapla kheloḍre nẽotakope.

Khange gutiko do ḍaharkote oḍoṅ senkate bogeko bạṛićko jotoko samṭao ạguket́koa, ar bapla oṛaḱ do perećena bhoj jom duṛuṕ akankote. Khange bhoj jom duṛuṕ akanko ńeńel raje boloyenre, onḍe bapla kheloḍ kicrić bae oyo akawan mit́ hoṛe ńelkedeteye metadea, Henda peṛa, cekate nonḍem boloyena bin bapla kheloḍ kicrićante? Uni doe kekleset́ena. Khange raj gutikoe metat́koa, Ti jaṅga toltaete bahre ńũtre oḍok giḍikaepe; onḍe do raḱjoṅ ar togoć ḍaṭa hoyoḱa. (Math 22, 1-13.)

Mit́ṭaṅ hoṛ eṭaḱ disomteye calaḱre aćren gutiko ać ṭhen hoho ạgukate aćaḱ dhon dạulạute jimạ oṭoat́koa. Mit́ hoṛ do 5 mon ṭakae emadea, mit́ hoṛ do 2 mon ar mit́ hoṛ do 1 monge, mimit́ hoṛ apnar daṛe leka. Adoe calaoena.

Ạḍi din tayomte heć ruạṛkate onko ṭhen hisạbe hataoket́a. 5 mon ṭakae ńamlet́ić do hećkate kisạ̃ṛe metadea, E baba 5 mon ṭakam jimạwadińa, nõḱõe arhõ 5 mon ṭakań lab akat́a. Khange uniren kisạ̃ṛe metadea, Besge, E bhage ar pạtiạr guti! Thoṛa waḱko cetanre pạtiạrem tahẽkana, ạḍi okoćaḱko cetanreń dohokama; amren kisạ̃ṛ reaḱ rạskạte ma boloḱme. Bar mon ṭakae ńamlet́ić ar onate 2 mone lab akat́ tahẽkan guti hõ onkae metadea. Menkhan 1 mon ṭakae ńamlet́ić do heć sorkateye menket́a, E baba, baḍaelet́meạń, kuṭhiạ hoṛ kanam, okare bam erlet́em iret́, ar okare bam chiṭạulet́em samṭaoet́a mente. Ado botorente senkate ona amaḱ 1 mon ṭaka otreń topa okolaḱa. Nõḱõetam.

Khange uniren kisạ̃ṛe metadea, Ea bạṛić ar asaṅpoḍa guti! Baḍaelaḱam, okare bạń erlet́iń iret́, ar okare bạń chiṭạulet́ iń samṭaoet́a mente? Enḍekhan sạuko ṭhen ińaḱ ṭaka bạisạukaḱ coṅ hoekoḱtam, ar iń do hećkate honaṅ sud sạmit inaḱiń ńamkitiń. Khange uni okạjuạ guti bahre ńũtre giḍi khadle kaeye hukumket́a, onḍe do raḱjoṅ ar togoć ḍaṭa hoyoḱa (Math 25, 14-30.)

(Mark 2: 6-7­)

Noa kạli reaḱ pạhil khon bon ńel daṛeaḱa, Jisu birud hoṛ do menaḱkoa. Cet́leka mit́ hoṛ bhage ar damanaḱ kạmie kạmi daṛeaḱ kana. Menkhan thoṛa hoṛ menaḱkoa okoe do hoṛaḱ dos ko sendra baṛaet́kan. Dhorom guruko baḍaekeda Jisu do mit́ kaṛ goć rog hoṛaḱ kạie ikạ ket́taea. Onkoaḱ mẽt́re Jisu do maraṅ bhule kạmikeda ar dhorom birude calaoena

Karon onko doko baḍaea eken Isor kạie ikạ daṛeaḱa. Uni ṭhenge kại ikạ reaḱ ektiạri menaḱa. Onkoaḱ monejonaḱ leka, Jisu do kại ikạ reaḱ khomotae hatao akada ar aćge Isore dạbiyeda. Ar nonkanaḱ Jisue kạmiyet́te, uni do Isore neṅghaoedea. Uni do Isore bemanotedea. Ar Jisu do gorob kateće meneda, “Isor okaṭaḱe kạmie onage iń doń kạmi daṛeaḱa.” Dhorom guru do noako dos Jisuaḱ ko ńameda.

Noa do khạṭigea je Isor manwakoaḱ kạie ikạ daṛeaḱa. Menkhan onko do bako bujhạu daṛeaḱ kana, je Jisu aćtetge Isor kana.

Jisu do manwa Hopone men ocoḱ kana. Ar aćge Jisu menteko metae kana. Noa reaḱ bhed do hoyoḱ kana Jisu aćge purạtei Isor kana (Kolosiko 2;9). Arhõ ńelogoḱ kana, Jisu do purạtei Manwa kana, Ente Uni do manwa khone janam akana. Ona iate Cedaḱ Jisu do manwa Hopone men ocoḱ kana.

Mit́din Jisu do Gạlil reaḱ kanan atoteye calaoena. One okare daḱe darkha rasalet́. Gạlil reaḱ Kaparnahum atore rajren mit́ṭen kạmiạ hoṛren koṛae ruạḱkan tahẽkana.  Jisu do Jihudạ khon Gạlilte hećakane ańjomket́te, rajren kạmiạ hoṛ do Jisu ṭhene calaoena. Are nehõrena, jemon Jisu do Kaparnahumte senoḱte aćren koṛaye bogeye. Ente koṛa do gujuḱ halreye tahẽkana.

Jisu do uni rajren kạmiạ hoṛe metadea, “cinhạ ar hahaṛa kạmi begor ńelte do baṅgepe pạtiạuḱa.” Rajren kạmiạ hoṛe menkeda, “Dayakate hoponiń ạuriye gujuḱre dela hijuḱme.” Jisu do uniye metadea, “Do calaḱme koṛa doe jiwet́gea.” Uni do Jisuaḱ kathare pạtiạukateye calaoena.

Ar calaḱkan jokheć horrege aćren gutikoko daramkedea, arko lạiadea, “koṛa doe boge akana.” Uni do gutikoe kuliket́koa, “Tinreye bogeyena?” Metadeako, “Hola tarasińre ruạ cabayentaea.” Uni kạmiạ hoṛ doe bujhạukeda, ṭhik ona okterege Jisui menleda, koṛa doe jiwet́gea. Unre raj kạmiạ hoṛ ać oṛaḱren sanamge Jisureko pạtiạuena.