Sirjau reaḱ etohoṕ khon Isor do mit́ṭene niṭ se goṭaleda, ar noa goṭawaḱ do hoyoḱ kana, manwa ko jemon suluk ko aṭkar daṛeaḱ. Adam ar Hawa talare suluk tahẽkana. Isor ar manwa ko soṅge maraṅ mil tahẽkana. Ar goṭa dhạrtire tahẽkana suluk. Joto janwar talare hõ suluk tahẽkana. Nonkate ńeloḱ kana dhạrti redo hinsạ, lạṛhại tapam do baṅ tahẽkana.

Adam ar Hawa bebatao iạte Isor birud rekin kại keda. Ar nonkate maraṅ mil ar suluk do chinchạturena. Unkin ar Isor talare okaṭak suluk tahẽkan ona do at́ena. Botor caṛhaowat́kin adam ar Hawa Isor ṭhen khon okoḱkin kurumuṭukeda. Isor ar manwa ko talare mit́ṭen dewal ar bhaṅgon do sirjauena ar manwa ko talare begar ehoṕena. Ar kại karonte boloyena hinsạ, edre ar mẽt’ joloḱ raṅgao.

Isor do dhạrtire suluk bandhao lagit́e goṭakeda. Okataḱ bhaṅgon manwa ko tuluć begare hoe akan ona joṛao lạgit́, manwa koaḱ mon re suluk bandhao lạgit́ maraṅ goṭawaḱ do Isore hatao akada. “Uni do oka lekae khojlet́ ar Mạsi hotete oka leka laha khongeye ṭhik doho akat́ tahẽkana. Uni doe niṭ akat́ tahẽkana je, okte purạulen khan ona mon subạ purạu lạgit́ serma ar dhạrti reaḱ jotowaḱ mit́ kateć Mạsiaḱ ḍanṭao gobolreye ạguya.” Ephesiko 1: 9,10. Dhạrtire suluk bandhao lạgit́ Jesaea  nạbi hotetey roṛlet́ mit́ṭen babańcaoić kol lạgit́ Isor do kathae em akada.

Jisu Mạsi aḱ janam do aboaḱ janam leka do baṅ hoyakana. Uniaḱ janam reaḱ sae sae bochor lahare aema nạbiko hotete roṛ uḍoṅlena. Cet́ lekan ghoṭonawante niạ dhạrtireye janamena onań lạiapege.

Agosto kạisạr do un okte Rome sasonhet́ tahẽkana ar Herod Raj do Jihuda disom. Ṭhik ona okte mit́din Isor Gạlil naṅgraha ren Mạriạm ńutuman dhorom ar kũạri kuṛi ṭhen Gabriel dute kol kedea. Raja Dạvid bõs ren mit́ hoṛ okoe do Joseph ko metae uni tuluć uni Mạriạmaḱ bapla reaṅ horoḱ cikhnạ do hoyakan tahẽkana. Onako dinrege Mạriạm ṭhene sodorena ar nonka menkateye joharadea “Johar -e daya akawat́meić” Probhuge am tuluć”. Ar niạ katha ańjomkate Mạriạm do ạḍigeye botorena are hudisena, niạ do cet́ lekan johar kana? Unre uni dut doe metadea Mạriạm am dom bhạrti hoṛmoḱa ar mit́ṭen koṛa gidrạm janamea. Ar uniaḱ ńutum do Jisu dohoetaya. Uni do maraṅ-e hoyoḱa ar uni do Isor ren hoponko metaea. Isor do aćren ạgil hapṛam Dạvid rajaḱ sinhạsone emaea. Uni do Jakob ren bõs ko cetane rajoḱa, ar uniaḱ raj do jaejug tahẽna.

Mạriạmaḱ bapla do baṅ hoeakan tahẽkana, onte uni dute kulikedea “niạ do cekate hoe daṛeaḱa?” Ińaḱ ma baplage baṅ hoeakan.Dute metadea, ‘Sonot Jiu am cetanreye aṛgona ar Isoraḱ umul am cetan re paṛaoḱ ar onate okoe sonot gidrạe janamoḱ kan, uni do Immanuel ko metaea’. ‘Ado Mạriạme roṛ ruạṛkeda iń do Probhu ren kạmṛi uniaḱ katha lekage baṛe hoyoḱtae ma.’ Inạ tayom Gabriel dut do uni ṭhen khone calaoena. Inạ tayom dutaḱ katha leka Mạriạm doe bhạrti hoṛmoyena. Ar Mạriạmaḱ niạ obostha baḍaekate Joseph do uni hape hapete bạgiye goṭakeda. Joseph do mit́ṭen mońj hoṛe tahẽkana onate joto hoṛ samaṅre Mạriạm lajaore baṅe paṛao oco lạgit́ nonkanaḱe goṭakeda. Menkhan Isor ren dut Joseph ṭhen kukmũteye ńel ocoyena ar Mạriạm ataṅe metadea. Uni doe baḍae ocokedea je, uni hoṛmore menae gidrạ do Sonot jiu hoteteye hoeakana. Karon uni do Isor ren hopon kanae. Ar Joseph do dutaḱ katha leka Mạriạm-e ataṅkedea.

Tayomte Agosto kạisạr okte disomre ńutum ol reaḱ hukum hoyena ar ńutum ol lạgit́ joto hoṛ do ako aḱ nij nij atote calaḱko ehoṕena. Joseph do Jihuda bõs ren hoṛe tahẽkana. Raja Dạvid do Jihuda disom reaḱ Bethlehem atoren. Onate Joseph hõ ńutum ol lạgit́ gạlil reaḱ Nasarat naṅgraha khon Bethlehemteye calaoena ar soṅgete Mạriạm hõe iditorakedea. Menkhan onḍe do aema hoṛko jarwalente, Bethlehem reaḱ oka oṛaḱ re hõ ṭhạ̃i bakin ńamleda. Aema sendra sendra tayom mit́ṭen gại goṛa nandware ṭhạ̃ikin ńamkeda. Ar ona gại goṛa nandwa rege Jisui janamena. Ona ńindạge Bethlehem ato reaḱ sur ṭạnḍire gupiko do akoren bheḍiko horho kan tahẽkana. Un okte Isorren mit́ṭen dut do onko ṭhen sodor kate Jisui janamen rạskạ sombate-e jạhirkeda. Unkoe metaḱkoa teheń do Dạvidaḱ naṅgraha re mit́ṭen babańcaoiće janamakana ar unige Mạsi kana, unige Probhu.’ Dut do onko mit́ṭen cinhạe emawaḱkoa ar ona do hoyoḱ kana, ‘Uni gidrạ do gendrećte bedhaoakan ar nandware gitić akan pe ńel ńamea.’ Ona sombat ańjomkate gupiko do Jisu gidrạ ńeńelko calaoena.

Gupiko do usạrage Joseph Mạriạm ar nandware gitić akan gendrećte bedhao akan Jisu gidrạko sendra ńamkedea. Ar apnar mẽt́te gidrạ Jisu ńelkate Isor ko sarhaokedea. Ar hõ purub sermare rakaṕ akan ipil ńelńelte pạchim disomren ponḍit́ ko do Jisu ko sendra ńamkedea. Ar uni gidrạ akoaḱ sandes Sona, Kundoru, Gondoros ko samaṅ adea ar ekṛumate sewawadea. Jisu janamen tayom irạl din tayom Jihuda koaḱ ạri-cạli leka uni gidrạwaḱ ńutum do Jisu ko dohoket́taea.

Teheń lekan din gatetiń

Mulingeam cedaḱ, hae dhontiń?

Rạskạ din seṭeroḱ kan,

Haere monem andha akan.

Hoṛko ńelkom rạskạ pereć

Don kocoṛ ar heseć sekreć

Hanko tora geneć geneć,

Roṛ landa mit́ kheneć kheneć.

Baḍaegeam maraṅ din kan

Joto hoṛ doko rạskạḱ kan,

Jisu lạgit́ mońj sandes tam

Ma saṕṛaokate idi tam

Maraṅ dinre sajoḱ lạgit́

Ḍherkaete do Atma lạgit́

Atma motom sajoḱ re ho,

Bale Jisui kusik enhõ

Bale Jisu doe khojoḱa

Sapha monege asolaḱ

Dulạṛ Jisui hoboroḱa,

Onategeye rạskạḱa.

Ạḍi rạska selet́ Baṅgladisom khon le selet́lena Ecumenical Dhorom Sabha 2022, Jidato Mission Compound. Bangladisom Santalko ren maraṅ laser hataṅ bohoḱ, onoliạ, khondronić Mn. Mithusilak Murmu, NAGR ren Program Officer ar The Santals Times ren co-editor Prodip Hembrom, NAGR ren Naogaon Branch Manager Minoti Murmu ar NAGR ren Director ar The Santals Times ren ạḱyurić, Onoliạ Mn. Stephen Soren.  

Santalia Council of Churches hotete Ecumenical Dhorom Sabha do October cando 20-23, 2022 tạrik Jidato Mission Compound, Pakur, Santal Parganas, Jharkhand re hoe purạuena. Ecumenical Dhorom Sabha reaḱ Bohoḱ katha do tahẽkana; “Jisuge Sạri Darkha Nạ̃ri”- (Johan 15:01). Noa Dhorom Sabha re amdaj pe hajar (3000) biswạsi hoṛko selet́lena pea church khon; 1. Northern Evangelical Lutheran Church (NELC) 2. Methodist Church in India (MCI) ar Church of North India (CNI) Assam, Bihar, West Bengal, Jharkhand ar Bangladesh Northern Evangelical Lutheran Church (BNELC).      

Eṅgrạj ar America disom ren rajnitibid, darshonik ar biplobi Tomas Pain doe men akada “Dhạrti do ińaḱ disom, sanam jạtiạriko do ińren boeha, bhage kạmi ge ińaḱ Dhorom”.  

Dhorom Sabha reaḱ Program do etohoṕena 9 baja setaḱ okte pene church reaḱ Jhanḍa ko rakaṕ selet́ sanam manotan peṛako eneć sereń te ataṅ daram. Ar noa program re Maraṅ peṛa hisạbteye sohor seṭerlena Norway Disom ren Mn. Rev. Torbjorn Lied. Arhõ selet́ ko tahẽkana pene church ren Bishop ko, Pastorko, MLA, MP ar local ren aema leadersko.

Noa Ecumenical Dhorom Sabha re Bangladesh seć khon Johar kathae lại hạṭiń keda; Mn. Stephen Soren. NELC reaḱ hạṭiń kangea BNELC do. Ạḍi rạskạ le bujhạuet́ kana teheń India re pene santalia council of churches do santalko; dhoromre, social re, economies re, oloḱ paṛhao ar lahanti kạmi selet́ doe kurumuṭu kana. Onka ge Bangladisom rehõ ape seć koyoḱ katet́ ạḍi aema udgạu dole ńameda ar teheń hõ aema hudis bondisko le hameṭ idiet́ kana.   

Pe din reaḱ Dhorom Sabha re Bohoḱ katha cetenre sạṅgiń disomren peṛa Mn. Rev. Torbjorn Lied do bạṛtiye gapalmarao keda;  Galatiko; 5:19-22 khon, Menkhan Jiu reaḱ jo do # Dulạṛ, #Rạskạ, #Suluk, #Sobori, #Susṭob, #Bhạlại, #Pạtiạr, #Mạhir, #Sombhuri, Dinạmge ạrsire aboaḱ ruṕ dobon ńeloḱ kana; Menkhan sonot bible re ol akan bisoe ko ạrsirebon ńel akada, abore menaḱa se baṅ. Judi noako abore banuḱ khan Jisu soṅge hõ jopṛao do banuḱbona. Okoe Jisure jopoṛao menae uni re noako gun do menaḱa. Onage “Jisuge Sạri Darkha Nạ̃ri” Pene church khon dhorom kathako lại hạtiń lạgit́ seṭer ko tahẽkana; Rt. Rev. Gideon Murmu, NELC Bisoe-Romiko 8:28 Arbon baḍaea, Isor duḱlạṛkoaḱ bhage….. Rev. Dr. Esmael Murmu NELC Bisoe-Philipiko 2:2 Enḍekhan nonkage….. Rev. Roshan Hansdak MCI Bisoe-John4:1-26 Samariạ ren maejiu, Dr. Tonol Murmu, CNI Bisoe-Kạlisiạ ar Manḍer reaḱ Angibharko, Rev. Sarmila Soren, MCI Bisoe-Sereńko 78:72 Uni do acaḱ ontor reaḱ ……. Rev. Pradip Hansdak, CNI Bisoe-Josua 1:8-9 Noa ạn reaḱ puthi…….. mucạt́ re Maraṅ Probhu Kedoḱ Girjạ Moderator, Bishop ar Pastorko hotete.

Mucạt́re sanamko bidạ johare emat́koa Mr. Joy Raj Eric Tudu, Secretary, Santalia Council of Churches.

Calaoen 16/09/22 ar 17/09/22 Sokolbar-Sunibar bar din bhor Chapainawabgonj jilạ reaḱ Amnura Mission re Bangladesh Prayer Movement (BPM) Hotete Bar Din Reaḱ Course Hoe Purạuena. Noa course re Manotan peṛa hisạbte selet́e tahẽkana BPM ren mit́ dhorom porcarok Mn. Nohimio Biswas, ona sãote selet́e tahẽkana National Agency For Green Revolution (NAGR) re maraṅ mukhiạ Mn.Stephen Soren ar Kiron Bala Mardy.

Noa course re Rajshahi ar Barin circle reaḱ mimit́ manḍer ren pon gel mõṛẽ (45) goṭen hoṛko jarwalena. Course re dhorom bisoete aema bhage bhage cecet́aḱ do tahẽkana. Jemon, Masi jisure biswạs dohoe, Jisuaḱ bhage sombat, Bạptisma, Isoraḱ raj, Probhu kedoṕ, Koejoṅ ar upạs, Mon bodol, Isor sarhao ar johar emae arhõ nonkanaḱ aema bisoe ko cetanre noa course reaḱ galmarao bisoe tahẽkana.

Mn.Nohimio Biswas course re dulạṛ salaḱ Isoraḱ sonot kathakoe lại hạṭińkeda. Uniaḱ katha re aema bin baḍae dhorom bisoe ko lại sodorkeda. Dhorom babotre monre okaṭaḱ reṅgeć se tetaṅ tahẽkan ona do selet́len mimit́ko ńamjoṅana.

Ar sạrige noa course re selet́ akan sanamko Isor baḍaeye reaḱ mońj ạtko ńamket́ ńutumte ạḍi ko rạskayena. Ente noa course talate aema lekan dhorom cecet́aḱ ko ńamkeda.

Manotan ko do ạḍi pusṭạute noa ko bisoe cetanreko galmaraokeda. Onkoaḱ onkan uskur ar udgau kathate selet́len sanamko Isor são jopoṛao tahẽn ar uni pańjaye reaḱ monre mit́ṭen keteć as se pạtiạuko ńamkeda.

BPM hotete hoe purạuen course do sanamko lạgit́ Isor baḍaeye reaḱ mońj mit́ṭen horre uduḱ oṭoakada. As menaḱa noa course re okaṭaḱ dhorom cecet́aḱ tahẽkan ona do mimit́ koaḱ mon-ontor re Isor ńutumte mit́ṭen ṭhạ̃i do sirjạuḱa. Ạḍi rạskạ ar napaete noa bar din reaḱ course do hoe purạuena.

Sonot sostor re ol akana, Aboren Probhui meneda, Isor dulạṛem ar am aḍepaseren hoṛ dulạṛem. Moseak puthire Israel ren hoṛ ko lạgit́ aema niạm menaḱa. Galatiko 3: 16 -22, Noa kạli reak ́jos katha do hoyoḱ kana ,Israyel ko saṕṛao ar mạsiak hijuk lạgit́ lại doho akana. Onate aboaḱ jion rehõ pạhil re do Isor ar dosaraḱ do abo aḍepaseren hoṛ laha idi kom metaḱme ogradhikar emakom. Ar okaṭak ạn abo lạgit́ em akan ona do purạpuri babo manao daṛeaḱa. Eken Jisu mạsige ạn do batao are manao daṛeaḱa.

Tinre abo do hor kore nacar hoṛ bon ńel koa unrege dulạṛ uduḱ lekan mãyã aboaḱ ontor re baṅ tahẽna. Onate Jisu aćren celakoe metat́ko tahẽkana bhạgạngea ona mẽt́kin do okaṭaḱ te amem ńelet́ arem ańjomet́. Aema nạbi ar raj ko ńeńel sana tahẽlen tako rehõ bako ńel ńam daṛeada ar ańjom sana tahẽkan rehõ bako ańjom ńam daṛeada.

Abo dobon bhạgạngea , ente Masiak bhage sombat bo ańjomeda ar uniak kạmi hobon ńel ńameda. Teheń aboaḱ aema atore se manḍer re aema reṅgeć nacar hoṛ menaḱkoa. Onko do ạḍi haron kosṭo re menaḱkoa . Ente onkoaḱ do jãhãn dhon dạulot do bạnuḱtakoa kạmi hõ bako ńameda. Karon onko do bahre seć khon jãhãn support do bạnuḱtakoa.  Niạ ko oktere am ar ińaḱ dạyik do cet́ kana. Eṭak ko daya ar goṛo emako hoyoḱtabona.

Isor do khạṭige aboe daya are goṛowabon kana. Ar abo do eṭak nacar hoṛ babo goṛo daṛeako kana. Nonḍe bo ńela eṭak ko goṛo lạgit́ aboaḱ tire okto do bạnuḱanaṅ. Ar eṭak hoṛak muskilaḱ ko ańjom reaḱ okto hõ bạnuḱtabona. Ạn re ol bạnuḱa je eṭaḱ ko bam daya daṛeakoa. Ar mit hoṛem dayawae khan okoe hõ bako manamea. Onate niạ halot oktere abo do eṭak ko ṭhen Isorak dulạṛ uduḱ reaḱ ạt menaḱtabona. Noa chaḍa kate rehõ aboaḱ gharońj, abo aḍepaseren hoṛ, ar oporom ko ṭhen Isorak dulạṛ uduk reaḱ maraṅ ạt menaḱtabona. Onate noa ạt kạmirebon lagaoma ar ạḍepaseren hoṛko apnar lekabon dulạṛkoma.

“Menkhan ape talare onka do baṅ kana, bickom ape talare jãhãege maraṅ hoyoḱ sanaye khan, uni do aperen saṕdaṕiće hoyoḱ ma; ar jãhãege ape talare pạhilić hoyoḱ sanaye khan uni do sanam koren golame hoyoḱ ma.

Sạrige manḍer re church re se somaj bhạlạianaḱ kạmire daṛean ạyurić dorkar menaḱa. Sonot sostor re ‘Leader’ katha do thoṛagan ol menaḱa mentebon baḍae akada. Menkhan ‘golam’ katha do aema dhao ol menaḱa. Ar niạ oktere somajre golam katha redo ạḍi kom manot menaḱa. Ar okoeye golam kan uniaḱ do cet́ man manot hõ bạnuḱtaea ar okoe hõ baṅko manotea.

Isoraḱ raj do hoyoḱ kana golamaḱ somaj. Golam do joto hoṛe seba koa. Okoeṭaḱ ạyurić Isore bachao akade onko joto unige rukhiạkoa. Uni do onkoe manot koa, rukhiạ koa are tambhao koa. Onate ạyurić aḱ ucit baṅ kana je, aćaḱ subitạ se aćaḱ hudạ ńel tae. Ente sonot sostor re ol menaḱa ‘Menkhan uniaḱ raj ar dhoromge ńam maṛaṅanpe, ado noako saname em juṭuć apea.

Birbão hoe hećente jalapurire mit́ṭen jahaj do sokojoḱ ḍheote rạput́ena. Ona jahajre bańcaoe tahẽkan mit́ hoṛ buhel buhelte hahaṅkar jaegate seṭerena. Disạ ạcurentae re pạhilre Isore sarhaokedea aćaḱ jion rukhiạ ńutumte. Ado jao hiloḱge uni hoṛ do jalapuri ḍhipre duṛuṕkoḱ kan tahẽkana, jahaj hijuḱ aste. Menkhan jao hiloḱge ạḍi nirạs kateće ruạṛoḱ kan tahẽkana. Enka enkatege jalapuri aṛere oṛaḱe benao rakaṕkeda. Ar bir-gajaṛko khon jo̠ jinis, phol-mul ko tumạl kateće jomet́ kan tahẽkan.

Onkage mit́din jomaḱ sendrae lạgit́ bir-gajaṛte calaoena. Tinre oṛaḱe ruạṛena, ńelkadae je, culhạ khon seṅgel dhurạu akante sanam oṛ̣aḱ lo rapaḱ akantaea, ar ekal dhũd dhũd dhũạ coṭ rimilte oṭaṅ baṛae kana. Ado uni hoṛ do ạḍi ãṭe aḍraokeda are menkeda, E Isor ińaḱ bhạgre noa hõ tahẽkana?

Dosar hiloḱ aṅga marsalen khan jahaj saḍete jạpit́ khone ebhenena. Ona jahaj do uni uddhạr lạgit́e jalapuri ḍhip sećge hijuḱ kana. Ado ạḍitet́ bhaṛoyente mengot́keda, cekatepe baḍaekeda nonḍe menańa mente? Khange jahaj ren captain doe roṛ ruạṛkeda, amem jolket́ dhũạ ńeltegele bujhạukeda.

Cecet́aḱ: Isor do jãhãnaḱge cekae aboaḱ bhạlại lạgit́ge onkaea. Kukli daṛeaḱam tinre muskil heć paṛaoḱa unre manwa aḱ cet́ lekate bhạlại hoekoḱa? jãhã baṅ jãhã lekatege bhạlại hoyoḱgea, menkhan am ar iń ohogelaṅ aṭkar dạreaḱa. Ona iạte jaoge Isore hirlạ ar bhorsa akan tahẽnme, sạrige Isore goṛowama.

Raja Solomon do abo manwa ko lạgit́ noa kạhtuk puthire ạḍi ạkilan kathako roṛakada. Jaoge noa puthi bon paṛhaoa ar bhage bhage ạkilan kathako bon hameṭjoṅa. Onka leka teheń kạhtuk puthi reaḱ mit́ bar kathakoń disạ ocoyet́bon kana.

Bedhoromteaḱ dhonte do porho bạnuḱa. Menkhan dhorom do moron khone rurukhiạwa. (Kạhtuk:10:2)

(Kạhtuk:11:18) Bedhoromić do eṛeaḱe rojgarjoṅa, menkhan dho̠ro̠me eroḱkan hoṛ do sạri kuṛạiye ńamjoṅa.

(Kạhtuk:13:11 kạli) Alga upạite jarwaḱkan dhon do algatege oṭaṅoḱa, Menkhan dhamrokokateye jarwae hoṛ do onae baḍhaotaea.

(Kạhtuk:15:27) Behok lab lạgit́ lalocaḱ hoṛ do apnar oṛaḱgeye ạulạutaea, Menkhan ghus kurudaḱić do jiwet́e tahena.

Kạhtuk:21:6 kạli: Eḱṛe alaṅte dhon sõcjoṅ do Oṭaṅ baṛae bhap kana, ar moron reaḱ jhampage. Ciṭạ̃ṛ hoṛ do dhon lạgit́e hạṛmạṛạ, Ar bae baḍaejoṅkana ṭonṭaḱ paṛaoaea.(Kạhtuk:28:22 kạli)

Arhõ noa kạhtuk puthire napae napae cecet́aḱ dhorom kathako menaḱa. Jaoge bon paṛhao lekhan Isor abo manwako cet́e metawabon kana mente aṭkar daṛeaḱabon.

Isor aḱ mẽt́re sanam manwa bon somangea. Ente unige jo̠to̠waḱe sirjạu akat́a. Dhạrtire aema hoṛge ńeloḱte hende ar ado̠mko do e̠se̠l. Arhõ Aema hoṛge eṭaḱ eṭaḱ bahre diso̠mreko janam akana. Ńeloḱte judạ judạre hõ se bahre disomreko janam akan rehõ jo̠to̠ hoṛge aćaḱ tiren sijoniạ kanabon. Jo̠to̠ hoṛaḱge ti, jaṅga, mẽt́ muṭhạn menaḱtabona, jo̠to̠ hoṛaḱ hoṛmore inạ mit́ araḱ mãyãmge menaḱtabona. Jo̠to̠ hoṛaḱ hoṛmoṛe mon ar jiwi menaḱa. Manwa hisạbte aema jo̠khen hoṛko samaṅre maraṅo̠ḱbo kurumuṭuia, ar eṭaḱko huḍińbo monekoa. Jãhã tinre nonkabo hudisa paseć, eṭaḱ gharońjren hoṛko khonaḱ Isor do̠ ale gharońjrenge bạṛti dulạṛlea. Menkhan sạri katha noa do baṅ kana . Ente uni do jo̠to̠ hoṛge somane dulạṛet́bon kana.

Jao hiloḱgebo ńelet́ kana, setaḱ candoe rakaṕlenre jo̠to̠koaḱ oṛaḱrege ini candowaḱ rãt do̠ paṛaoḱa. Arhõ tinre oka ṭoṭharey daḱet́ kan unre ona ṭoṭharen jo̠to̠ hoṛaḱ oṛaḱrege daḱ ńũroḱa. Abo judi jãhãe hoṛko dulạṛ ar jãhãebo ạṛisako noa do Isor baṅgey kusiaḱa. Isor do cet́ lạṭu hoṛko bạṛti ar kạṭićko ko̠m ńõḱe dulạṛkoa? baṅ. Isor do lạṭu ar kạṭić jo̠to̠ hoṛge somane dulạṛkoa. Tinre jãhãe hoṛ eṭaḱ hoṛ birudre se Isor birudre bạṛićaḱe kạmi, unre Isor ạḍige duke ńamet́ kana, menkhan unre hõ uni hoṛe dulạṛea.

Menkhan Isor do̠e kho̠jo̠ḱ kana jemo̠n uni hoṛ ạḍi usạra mone pherao ar Isore uduḱ akat́ horte ruạṛ hijuḱ. Ar unre mone pheraolere Isor ạḍitet́e rạskạ are hulạso̠ḱa. Ente Isor do uniye sirjạu akadea. Jãhãe silpi se kạrigol aćaḱ tite benaoaḱ se sirjạuaḱ baṅgey bạṛić ocoea, onkage Isor abo tis hõ bae bạṛić ocobona ar bae ńel hiṛińbona. Je̠mon aćaḱ katha leka ar uduḱ akan ḍahartebo taṛam daṛeaḱ.