Mit́ṭaṅ casa kisạ̃ṛ reaḱ otre ạḍi upcạuente uni do monereye menket́a, Cet́ iń cekaea? Phosol lạgit́ ṭhạ̃i bạnuḱtińa. Khangeye menket́a, Nonkaeań, ińaḱ murạiko otoṛkate bạṛti maraṅaḱkoń benaoa, ar onḍege ińaḱ joto phosol ạgu jarwakate ińaḱ jivin metaea, E jivi, ḍher serma lạgit́ ạḍi acel menaḱtama, ma jirạujoṅme, jomkoḱ me, ńukoḱme, rạskạjoṅme. Menkhan Isore metadea, Ea bebuj! Niạ ńindạrege amaḱ jivi khojogoḱa, ado amem sõc akat́aḱko do okoeaḱ hoyoḱa? (Luk 12, 16-20).

Mit́ṭaṅ hoṛ reaḱ darkha bagwanre uniaḱ mit́ṭeć loa dare tahẽkantaea, onare joe ńam babṛa kan tahẽkana, menkhan bae ńamlaḱa. Khange darkha bagwanren mạliye metadea, Ńelme, nõḱõe pe serma khon hećkate noa loa darere joń ńam babṛakan, menkhan bań ńamet́a. Ma maḱ giḍikam! Cedaḱ ona do hasa hõe okaj ocoyet́a? Menkhan darkha bagwanren mạliye roṛ ruạṛadea, E baba! Niạ serma hõ ona baṛe ikạkam, ona beṛhaete laeteń gurićaḱa, paseć joenge baṅ khan tayomte onam maḱ giḍia. (Luk 13, 6-9.)       

Mit́din ạyuṕ ber jokheć Jisu do Genesaret́ doreão lạukạteye heć paromoḱ kan tahẽkanre, maraṅ okoć birbão hoyena. Lạukạ do ḍheokote jạput́ esedoḱ lekage. Menkhan Jisu doe jạpit́ akat́ tahẽkana. Khange uniren celako uni ṭhen sen sorkate beret́kedeteko metadea, E Probhu, rukhiạime, benḍaoḱ kanabon! Uni doe metat́koa, Cedaḱ ḍurukiạ kanape, E nase pạtiạuko! Khange beret́kate hoe ar daḱe dhomkaoket́a, ado thir utạrena. Ona ńelket́te onko do hahaṛayenteko menket́a, Nui doe cet́ lekan hoṛ kante hoe hõ ar doreão hõ doreãoe bataoet́taea! (Math 8, 23-27.) 

Jisu Genesaret doreão mit́ṭeć nicol jaegateye parom calaoena, ado hoṛko onako ańjomket́ khan, hako pako otteko pańjakedea. Ạyuṕ beren khan, uniren celako uni ṭhen sorkateko metadea, E Probhu, noa jaega do hãhãkar kana, ar ber hõ bạnugićan, hoṛ baṛe bidạkakom, jemon gãoalekote senkate jomaḱko kirińjoṅ, Jisui roṛ ruạṛat́koa, Ape baṛe emakope jom lạgit́. Onkoko roṛ ruạṛadea, 5 goṭeć piṭhạ ar 2 kạṭić hako chaḍa ado bạnuḱtabona; ona do unạḱ hoṛ lạgit́ cet́ hoyoḱa?

Menkhan Jisu do ghãsreye duṛuṕ ocoket́koa, ar onako 5 goṭeć piṭhạ ar unkin barea hako ataṅkate serma seć beṅget́ rakaṕkateye bhorat́a ar kecaḱkate celakoe calat́koa, ar celako do onko duṛuṕ hoṛkoko em idiat́koa. Jotoko jom bien khan, Jisu aćren celakoe metat́koa, Sareć akan kecaḱaḱko samṭaope, jemon cet́ hõ alo bharabhaṭoḱ. Khange 12 uḍli perećko halaṅ samṭaoket́a. Onkoko jomket́ hoṛ do, maejiu ar gidrạ chaḍa 5,000 ganko tahẽkana.

Adam ar Hawaren barea koṛa gidrạkin hoyentakina, Maraṅić do Kạyin ar uni sotoḱić do Habel. Hara kate Kạyin do casae hoyena ar Habel do gupi. Mit́ din banar boeha Isorkin samaṅadea. Kạyin do ot reaḱ phosol reaḱ ar Habel do palren lognoko modrenkoge. Ar Isor do Habel reaḱ samaṅaḱ seće beṅget́ket́a, menkhan Kạyin reaḱ samaṅaḱ seć do bae beṅget́laḱa. Khange Kạyin do raṅgaoente mẽt́hãhã kurkunḍućentaea. Isore metadea, Cedaḱem raṅgaoena ar mẽt́ãhã do cedaḱ kurkunḍućentama? Bogeket́am menkhan, baṅ do kharsala bam beṅget́? Menkhan bam bogele khan, kạige duạr ṭhene chapkao akana, am ṭhenge ona reaḱ gagoj, menkhan am do ona kạḱbu hoyoḱtama.

Ado boeha mit́ din ṭạnḍirekin tahẽkanre, Kạyin do aćren bokot upạrte lagaoenteye goćkedea. Khange Probhu kạyine kulikedea, Amren bokom Habel do okare menea? Kạyine menket́a; Bạń baḍaea; baṅ doń bokońren horhoić kan iń do? khange Probhui metadea, Cet́em ceka akat́a? Bokomaḱ mãyãm reaḱ aṛaṅge ot khon raḱạń kana. Am dom sarapgea ot khon one ona aćaḱ mocae cahaṕlet́ amaḱ ti khon amren bokom reaḱ mãyãm ataṅ lạgit́ ; dhạrtire uḍạcal ar ńir baṛaeyićem hoyoḱa. Khange Kạyin do Isor samaṅ khon calaḱ hoyentaea, Eden khon puruạ senaḱ nakhate senkate Nod disomreye berelena. Uniren bõs do ạḍi sean ar hatcuṭi hoṛko hoyena ; onko do banam tirio ar khanḍa bhanḍa emanteaḱ beḱnaoko ehoṕket́a.

Jisui menkeda, manwako do alope botorakoa, Soetan hõ alo. Eken Isor botoraepe. Manwa ar Soetan do manwawaḱ hoṛmoe nosṭo daṛeaḱa, menkhan atma do bae nosṭo daṛeaḱa. Isor do atma nosṭo reaḱ daṛe menaḱtaea. Ar hõ Isor do manwako jaejug jione em daṛeakoa. Ona iạte manwawaḱ atma nosṭoḱa tinre ona  norok sengelre khadle ocoḱa. Mạsire pạtiạu akan manwako Soetan botorae reaḱ jạruṛ do bạnuḱa. Aboaḱ do pạtiạu dohoe hoyoḱ tabona je mimit́ biswạsiko okoe hõ Isor ṭhen khon bako begar daṛeabona.

Isor atma nosṭo reaḱ khomota menaḱtaea. Eken ona moto do baṅ joto lekanaḱ ektiạri nosṭo reak daṛe menaḱtaea. Menkhan Isor aćaḱ sirjon cetanre daṛe do bae uduga. Uni do aboren dulạṛić baba kanae. Ghaṛwa cẽṛẽ tinạḱ kạtić ar ạḍi kom dam tako, enhõ Isor do unkoe jotonet́koa. Aboaḱ bohoḱ reaḱ uṕ Isor doe baḍaea. Aboaḱ kạṭić kạtić babot rehõ Isor do kheale dohoeda. Onatege Isor aćren gidrạ ko tinạḱe jotonet́koa.

Phạrisikikoko meneda, Jisu do Soetanaḱ daṛete kạmiyeda. Menkhan noa do sạriaḱ kana, Jisu do Isoraḱ Atma daṛete kạmiyeda. Ar uni Atma doe hoyoḱkana ‘Sonot Jiu’. Ar ona karontege Phạrisiko do Sonot Jiu do Soetan menteko ganaoedea. Noa iạtege Jisu do Sonot Jiu babotre henosta katha roroṛ ko doe sontoret́koa. “Ar jãhãe Manwa Hopon birud re kathae roṛ, ikạḱtaea, menkhan jãhãege Sonot Jiu birudreye roṛ, uniaḱ do baṅge ikạḱtaea, noa jug rehõ baṅ ar dara kanaḱ re hõ baṅ”. Mathae 12:32

“Ona iạteń metape kana, manwako do sanam kại ar henosta ikạ takoa. Menkhan Jiu reaḱ henosta do baṅ ikạḱtakoa.” Mathae 12:31

What is blasphemy against the Holy Spirit?

Sonot Jiu birudre henosta do hoyoḱ kana, Mạsi babot, Uniaḱ katha babot, kại reaḱ cehaona babot, ar Sonot Jiuaḱ goha kạmi reaḱ badha em ar baṅ manao ( Johon 16: 7-11). Onate jãhãege Sonot Jiu bako ataṅe ar uni birudreko teṅgo lenkhan, uni do Sonot Jiu khon aćtege pharakoḱ kana ar kại ikạ ńam lạgit́ ạte at eda.

Isor Sonot Jiu daraete hohoabon kana. Judi abo jãhãege Sonot Jiu  babo aṅgoce ar babo mẽt́ luturae, enḍekhan Isor hõ abo bae hohoabona. Tayomte Isor seć khon jãhãn daya, ar ikạ do babon ńama. Manwako Sonot Jiu daraete Isorko baḍaedea. Joto Manwako Sonot Jiuaḱ kạmi hotete kại aṅgoć ar kại ikạ ko ńameda. Onate Sonot Jiu do manwa ar Isor talare sako lekae kamiyeda. If we destroy the bridge, our hope of salvation, our hope of entering the kingdom of God will be lost.

Tinre abo bhage sombat bo procareda ar nawa celakobo tearet́koa abo soṅgete Sonot Jiu menaea. Ar jãhãege maraṅ muskilreko paṛaoḱ kana Sonot Jiuge onko rukhiạḱ lạgit́e goṛowako kana. “ Ente unre cet́ roroṛ hoyoḱa, ona do Sonot Jiugeye cet́apea.” Luk 12:12.

Isor do puruạ seć Edenre mit́ṭaṅe bagwanket́a. Ona bagwan do Paradesko ńutum akat́a. Isor onḍe do ot khon ạḍi lekanaḱ mońj ńeloḱ darekoe janam ocoket́a ar tala bagwanre do jion reaḱ dare ar boge bạṛić baḍae oḱrom darege. Ar Isor do Eden bagwanre manwae dohokedea ona joton ar horhoe lạgit́, are metadea, Bagwan reaḱ joto dare reaḱ do khạtirjomam jomgea; menkhan boge bạṛić baḍae oḱrom dare reaḱ jo do alogem joma; ente ona reaḱem jomle hiloḱ khạṭigem gujuḱa.

Isore menket́a, Manwa eskar tahen do baṅ bogea mit́ṭen goḱṛoić iń benaoea uni leka. Khange Isor do joto janwar manwa ṭhene ạguket́koa ńel lạgit́, cele celeye ńutumkoa mente, ar manwae ńutumket́ko leka mimit́ mimit́ janwar reaḱ ńutum hoyentakoa; menkhan manwa lạgit́ goḱṛoić do bae ńamlena uni leka do, Khange Isor do manwa acete jạpit́ ocokedea ar uniaḱ mit́ pańjar oḍokkate onaren mit́ṭạṅ maejiue benaokedea, ar manwa ṭhene ạgukedea. Khange manwae menket́a. Nuḱũi nit́ eneć iń jaṅ reaḱ jaṅ ar iń jel reaḱ jelge; uni do herel riniće ńumugoḱa; ente herel reaḱ khone hatao oḍokena. Ona iạte herel hoṛ do aćren eṅgat́ apat bạgiạkinte ać rinić ṭhene jamaṛ akan tahena, ar mit́ jelkin hoyoḱa.

Uni manwa reaḱ ńutum do Adam (metaḱme Pilcu haṛam) ar maejiu reaḱ ńutum do Hawa (metaḱme Pilcu buḍhi). Sonotkin tahẽkante ghạṭ gunạ. Duk dạndi, harkhet saset, ruạ haso, gujuḱ guroḱ, cet́ge bakin baḍae kan tahẽkana. 

En hiloḱ ạyuṕ ber jokheć barea cela Jirusalem khon Emaoko metaḱ mit́ṭeć atotekin calaḱ kan tahẽkana, ar hoe akanaḱko reaṅkin galmaraojoṅ kana. Ona takre Jisu heć sorente unkin tuluće calaḱ kana; menkhan unkin do bakin oromledea. Kuliket́kinae, Henda ho, cet́ reaṅben galmaraojoṅ kana, ar cedaḱ mulinben ńeloḱ kana? Unkinkin roṛ ruạṛadea, Am eskarge Jirusalemre upriạ menama, ar noako dinre onḍe hoe akanaḱko bam baḍae akat́a? Maraṅ naeke ar disom hoṛkoren mukhiạko Nasaretren Jisu, kathate ar kạmite miḱṭaṅ daṛean nạbi, bicạr ńurhạkedeteko kurus goćkedea. Ale dole asoḱ kan tahẽkana, Isrạyelren chaḱḍaoić do uni kanae mente. Menkhan onako hoyen khan nõḱõe pe mãhã hoyoḱ kana. Topa ṭhen ạḍireko senlen tin uḍi maejiuko hećkateko lạiket́a, kathae, Topa do ekenaḱgea, ar jivet́ko lạikede serma goḍetko hõ kathaeko ńel upellet́koa. Ar celako modren adom hoṛ topa ṭhen senkate maejiuko lạilet́ lekako ńamket́a, menkhan uni do bako ńamledea. Khange Jisui metat́kina, E bebuj ar gạnḍhiạ monankin. Mạsi do onako duk jom ar aćaḱ ṭhonokte boloḱ jạruṛ baṅ tahẽkantea? Ado Moseaḱ ar joto nạbikoaḱko khon ehoṕkate joto sostorkore ać reaṅaḱkoe bhedat́kina.

Emaoko tioḱket́ khan, uni do calao idiḱe monhḍayente kạ̃uạ̃rikatekin metadea, Baba, ạliń ṭhen baṛe tahenme, ente ạyuboḱ kana, ar ber hõ bạnugićan, Khange unkin ṭhene boloyena. Unkin tuluć jojome duṛuṕ akan tahẽkanre, piṭhạ halaṅkateye bhorat́a, ar kecaḱkateye emat́kina. Khange unkinaḱ mẽt́ do saṛentakina, arkin oromkedea; ar uni do unkin ṭhen khone chanena. Adokin mepenena, Alaṅ mon alaṅre baṅ loloḱ kan tahẽkana, one hor horteye galmaraoat́laṅ, ar sostorkoe bhedat́laṅre? Khange beret́ got́ente Jirusalemtekin ruạṛ calaoena, ar apostolko jarwa akankin ńamket́koa, ar horteaḱko reaṅ, ar piṭhạ kecagre unkin ṭhene oromen reaṅkin lạiat́koa.

Onkoko galmaraokan tahẽkanre, Jisu onko talare teṅgo got́enteye metat́koa, Sulukape ma! Onko do ạḍiko botorena, ente bako ńel oromledea. Menkhan uni do aćaḱ tikin ar jaṅgakin ar kokhae uduḱat́kote ạḍiko rạskạyena-Thoma do unre bae tahẽkana. Tayomte onko dosrakoko lạiadea, Probhule ńel akadea; menkhan uniye metat́koa, Begor uniaḱ tikinre jạlại cinhạń ńel, ar jạlại bhugạḱre ińaḱ kạṭuṕ iń gutui, ar ińaḱ ti uniaḱ kokhareń sog, baṅgeń patiạuḱa. Ado 8 mãhã tayom onko gel mit́koko jarwa akan. Ar silpiń siń akat́re, Jisu onko talare ackateye teṅgo got́ena, are metat́koa, Sulukape ma! Khange Thomae metadea, Ińaḱ tikin ńeltińme, ar ińaḱ kokhare sogme, ar bepạtiạuić do alom hoyoḱa, menkhan pạtiạuićge. Khange Thomae menket́a, E ińren Probhu ar E ińren Isor! Jisui metadea, Ńel akadiń teṛoṅem pạtiạu akana; bin ńelte pạtiạuḱkoge bhạgan.

Biń do Isore benao akat́ko joto janwarko modre seane tahẽkana. Uni do maejiue metadea, Sạrige Isore men akat́a, bagwan reaḱ joto dare reaḱ do aloben joma mente? Maejiue roṛ ruạṛadea, joto dareko reaḱ khạtirjomaliń jomgea, eken boge bạṛić baḍae oḱrom dare reaḱ Isore men akawat́lińa, Ona reaḱ do alogeben joma, jemon aloben gujuḱ. Bińe roṛ ruạṛadea, Oho toben gujuḱa; bickom Isore baḍaea ar ona reaḱ ben jomle hiloḱ mẽt́ do saṛoḱtabena ar Isor lekaben hoyoḱa boge bạṛić baḍaete. Maejiue ńelket́a, baṅma dare do bogegea ona reaḱ jo jom lạgit́, hạ̃sge ńeloḱ kana, ar akel ńam lạgit́ge sasnawaḱge ; ado ona reaḱ jo got́kateye jomket́a, ar aćren jãwãeye emadete uni hõe jomket́a.

Din reaḱ reaṛ belare Isor reaḱ sabadkin ańjomket́te bagwan reaḱ dare jhũnḍrekin okoyena. Khange Isor Adame hohoadea, Okare menama? Ado Adame goṅket́teye roṛ ruạṛadea. Amaḱ sabadiń ańjomket́a, ar botorteń okoyena; enteń uluṅge do, Isore metadea, Okoe metat́mea uluṅ kanam mente? Oneń manalet́me dare reaḱ pasećem jom akat́? Adame roṛ ruạṛadea, Nui maejiu, one unim emkede iń tuluć tahen lạgit́ unige ona dare reaḱe emadińa, adoń jomket́a. Kkhange Isor maejiue kulikedea. Noa do cet́em ceka akat́a? Unie roṛ ruạṛadea, Bińe bulạukidińa, adoń jomket́a.

Khange Isor bińe metadea, amem nonkaket́ teṛoṅ sanam janwarko modre am dom sarapgea ; laćtem leń calaḱa ar jivet́ janam dhuṛim joma. Iń do am ar maejiu talare ar amren bõs ar maejiuren bõs talare bạiriń dohoea, uni do bohoḱe jostama, ar am do iḍim jostaea. (Noa do Jisu Mạsiye janamoḱ reaḱ manwa ko ṭhen Isor reaḱ pạhil goḱ katha). Isor do maejiue metadea, Am do bedonte gidrạm janamkoa, ar amren herel do am cetanre hukume calaoa, Isor do Adame metadea, Ot do am gunạḱte sarapgea ; amaḱ moloṅ reaḱ balbalte mạnḍim joma, hasate ạurim ruạṛoḱ dhạbić ; ente hasa reaḱ khonem hatao akana ; dhuṛi kangea ar dhuṛitem ruạṛoḱa. Khange Probhu Isor do Adam ar Hawa Eden bagwan khone laga oḍokkat́kinạ ar Eden bagwan reaḱ puruạ sećre kirubkoe dohoket́koa ar ulṭạ ulṭiḱ kan seṅgel joloḱ tarwaṛege jion dare senaḱ hor horhoe lạgit́. Onkate dhạrtire kại boloyena ar kại tuluć duk, dạndi, ruạ haso ar Gujuḱ.

Jisu Samariạ disom talateye calaḱkan tahẽkanre, dãṛã laṅgayente Sukhạr naṅgraha bahrere menaḱ mit́ kũi ḍhipreye duṛuṕena. Ona takre mit́ṭaṅ maejiu naṅgraha khon daḱ loe hećena. Jisui metadea, Den, ńũi lạgit́ emańme. Uniye roṛ ruạṛadea, Am jihudi hoṛ cekate iń Samariạren mit́ṭen maejiu daḱem koyeń kana? Ente Jihudiko Samariạrenko tuluć bako duṛuṕ teṅgona. Jisui metadea, Amem baḍaele khan, Isor reaḱ dan ar okoe kanae am koeyet́menić, enḍekhan am unigem koekea ar uni do jivet́ daḱe emkema, Uni maejiue roṛ ruạṛadea, Loloteaḱ hõ bạnuḱtama, ar kũi do khạndrigea.

Jisui metadea, Do senkate amren jãwãe hoho ạguyem. Uniye roṛ ruạṛadea, jãwãe bạnugićtińa. Jisui metadea, Ṭhikgem menket́a! Ente 5 goṭen jãwãeko tahẽkantama, ar nit do okoe menaetam amren jãwãe doe baṅ kana. Uni maejiue roṛ ruạṛadea, E Baba, ńelet́ạń, am do mit́ṭaṅ nạbi kanam mente. Isor okare sewawae ṭhik hoyoḱa? Ale dole menet́a Gerisim bururege ṭhik, menkhan ape dope menet́a, Jirusalemrege ṭhik. Jisui roṛ ruạṛadea, Pạtiạuatińme go, okte hijuḱ kana one unre Baba do noa burure hõ baṅ ar Jirusalemre hõ bape sewawaea. Isor do Jiuge ar uni seḱwako do jiute ar sạriaḱte seḱwage cạhiye. Uni maejiu doe roṛ ruạṛadea, Mạsiye hećlenre jotowaḱkoe jạhirabona. Jisui metadea, Iń kangeạń uni do. Khange uni maejiu do kanḍa bạgi oṭoat́te naṅgrahateye calaoena, ar hoṛkoe metat́koa, Dela ńelepe mit́ṭen hoṛ, okoye lạiadiń joto okakoń ceka akat́, baṅ do unige Mạsi kanae? Ado naṅgraharen hoṛ Jisu ṭhenko oḍok calaoena, ar uni do onko ṭhen 2 sińe tahẽyena.