1. Jaoge girjạ re seledoḱ reaḱ mon tahẽn jạruṛa.
2. Girjạre apnar jãwãe ar gidrạko hõ riạuko jạruṛa.
3. Maejiuko din hiloḱ gharońjren ko sãote gitijoḱ lahare koejoṅ ar Baebel paṛhao jaruṛa.
4. Manḍer girjạre eṭaḱ maejiu, baba ar gidrạko hõ riạuko jạruṛa.
5. Manḍer re juạn koṛa kuṛiko hõ girjạ ar koejoṅkore seledoḱ lạgit́ uskurko jạruṛa, ona chaḍa daṛeaḱ bhor oloḱ paṛhaoḱ ar joto lekan boge kạmi lạgit́ solha emoḱ jạruṛa.
6. Manḍer re maejiuko jaoge maejiu bạisi ar bises koejoṅkore seledoḱ jạruṛa.
7. Girjạ oṛaḱ ko sapha sạphi dohoe lạgit́ manḍer ren maejiuko dạyik bujhạu jạruṛa.
8. Mander ren maejiuko do okte okte Pasṭor porcar se porcariko manḍer kạmiạ se hiri ko hijuḱ okte ńel sãohã ar goṛoako jaruṛtakoa.
9. Gharońjre jãhãe ko ruạ hasoḱre hiri koejoṅ solha jaruṛtakoa.
10. Church reaḱ sabha ar emanteaḱ jạruṛaḱkore eṭaḱko riạuko jaruṛtakoa.
11. Aḍepase ar manḍerko sãote mońj sompok tahẽn jạruṛtakoa, bhageaḱ jạruṛaḱkore jhũk mon tahẽn jạruṛtakoa.

Probhu arhõ Abraham ṭhen sodorenteye goḱadea, aćren bõsko do sermaren ipilko lekako saṅgeḱa. Abraham do haṛam, uniren oṛaḱ hoṛ Sara hõ buḍhige, ar gidrạ pidrạ bạnuḱkotakinre hõ Abraham do Isor reaḱ goḱ kathareye pạtiạuena ar ona pạtiạu do dhorom lạgit́ lekhayentaea.

Mit́din Abraham aćaḱ tạmbu duạrreye duṛuṕ akan tahẽkana setoṅ ber jokheć. Beṅget́kate ać samaṅre 3 hoṛ teṅgo akane ńelket́koa. Abraham ńir senkate ombaḱenteye metat́koa, E Baba, Iń amren guti alom cinḍạl oṭokạńa; noa dare buṭare baṛe jirạuanpe, ar iń do jaṅga ạbuktape lạgit́ daḱ ar ṭanḍhape lạgit́ jomaḱ iń ạgulege; enkhantepe sen idiḱa. Adoko metadea, Bogege, amem menket́ lekaeme.

Khange Abraham palte ńir senente mit́ṭaṅ bhage mĩhũ goć ocokateye isin aroat́koa ar Sara do guhum holoṅ reaḱe piṭhạwat́koa ar Abraham do chale ar toae hartawat́koa; ar onkoko jojom kan jokheć onko ṭhen dare latarreye teṅgo akan tahẽkana. Khange onko modren mit́ hoṛ Abrahame metadea, Amren oṛaḱ hoṛ Sara do okare menaea; Abrahame roṛ ruạṛadea, tạmburege menaea. Adoe menket́a, Bochor dinre am ṭheniń heć ruạṛoḱa, unre Sararen mit́ṭaṅ koṛa gidrại tahẽntaea. Sara do tạmbure onae ańjomket́ khane landagot́ket́a; enteye menwana, gidrạjoṅ reaḱ din do parom akantaea mente. Menkhan Probhu Isor do Abrahame metadea, Isor lạgit́ baṅ do jãhãnaḱ beleṭejoḱ menaḱa? (Gen. 15, 5, 6; 18, 1-14).

Terah do Sem bõsrenko modren mit́ hoṛe tahẽkana. Uniren do pea hoponko tahẽkantaea, Abraham, Nahor a Haran. Ado Isor Abrahame metadea, am do amaḱ disom khon ar amren peṛa pạrbhạ khon oḍok calaḱme ińiń uduḱam disomte. Maraṅ okoć mit́ṭaṅ jạt iń hoe ocomea, ar amre do pirthimiren sanam gusṭiko bhoranko hoyoḱa. Khange Abraham do aćren bạhu Sara ar aćren goṅgot koṛa Lot idi tora kate aćaḱ joto acelante kanan disomteye calaoena. Ar Probhu do Abraham ṭhene sodorenteye metadea, Amren bõsko noa disom iń emakoa. Ar Abraham do ać ṭhene sodorlen Probhu ńutumte mit́ṭaṅ pinḍe benaoket́a.

Abraham do mĩhũ merom ar sona rupạte ạḍiye kisạ̃ṛena. Ar uni sãote Lot hõ ạḍi mĩhũ meromko tahẽkantaea. Khange Abrahamren gupiko ar Lotren gupiko kạphạriạu janamentakoa ạḱtiń jaega khạtirte. Khange Abraham Lote metadea, E bạbu, alaṅ talare ar alaṅren gupiko talare kạphạriạu alo baṛe hoyoḱma ente alaṅ do boeha hoṛ. Am samaṅre goṭa disom coṅ menaḱ. Am końe sećem calaḱ khan iń do etom sećiń calaḱa, ar am etom sećem calaḱ khan, iń do końe sećiń calaḱa.

Khange Lote ńelket́a, Jordan gaḍa aṛe do ạḍi olhangea, Misor disom ar Eden bagwan leka; onate uni do ona ṭoṭha bachaonte, Sodom sećre aćaḱ tạmbukoe beret́ket́a. Menkhan Sodomren hoṛ do ạḍiko bạṛića, ar Probhu reaḱ ạḍiko kạiet́ tahẽkana. (Gen.12-13.)

Jisu do hahaṅkar ar naṅgrahakore daṛabaṛae kan tahẽkanae are cet́ako kan tahẽkana. Okoe do bhul hor teko mohonḍa akan onko lạgit́ asa ar ikạ tahẽnkana.

Patrase menkeda, “Kại khon mon ạcurtape, ar Jisu Mạsi ńutumte bạptisoḱpe. (Aposkạmi 2:38). Nonḍe do nonkae men ocoyeda je, “kại aṅgoćpe, ar bạptisoḱpe, ar Jisure pạtiạuḱpe ar ape do bańcaope ńama.

Jisu  okako jaegakore  cet́ako kan tahẽkan onḍe do aema mạsul uṭhạuko ar kạiankoko sen jarwalena. Ar onko do ạḍi jhũkte Jisuaḱ kathako ańjomet́ kan tahẽkana. Ar Jisu okare calaḱ kan tahẽn onḍege gadel gadel hoṛko calaḱ kan tahẽkana arko ańjomet́ kan tahẽkana. Jisu do sanam hoṛ soṅge misạḱ kan tahẽkana, baṅdo mońj hoṛkan ar baṅ doe bạrić hoṛkan. Uniaḱ motlob do tahẽkana jate kại khon monko pherao. “Tayomte Jisu do lewi oṛaḱre jojome duṛuṕena. Unre aema mạsul uṭhạuko ar bạṛić hoṛko hõ Jisu ar uniren celako sãote jom lạgit́ ko duṛuṕena. (Mark 2:15).

Phạrisi ar dhorom cecet́ko do Jisu cetanre ạṛis ko sodorkeda. Ente uni do kạian ko soṅge jom ńũet́ kan tahẽkana. Ar noa karontege Jisu do pea phen kathae lạiat́ ko tahẽkana. Jemon at́len bhiḍi, at́len ṭaka ar at́ hopon.

Noa phen katha at́len bhiḍi khon Jisu do cecet́aḱe emat́ ko tahẽkana. Okoe ko pạtiạuen ar okoe do bhul horteko mohonḍawakan ar okoe do baṅ ko pạtiạu kana ar nit dhạbić hor bako ńam akat́ onko lạgit́ noa cecet́aḱ do em akana.

Aboren Isor do aboren dulạṛia Baba kanae. Okoeko at́ akan onkoe sendra baṛaet́ ko kana. Ona iạte, Isor do aćren Hopon Jisu Mạsi noa dhạrtite kol akadea abo sendra ńam lạgit́. “Ente at́ akan ńam ko lạgit́ ar bańcaoko lạgit́ge, Manwa hopon doe heć akana.” (Luk 19:10).

Jisu do bhage gupiyić kanae. Ar uni do mit́ṭen at́ akan bhiḍi ńame lạgit́ aćaḱ jiwi em akada. “Boge gupiyić do aćren bhidiko lagit́ aćaḱ jiwie alaetaea.” (Johon 10:11). Ona iạte mit́ṭen kạian hoṛ aćaḱ kạie aṅgoć lekhan ar mone ạcur lekhan sermare arhõ bạṛti rạskạ hoyoḱa.

Mit́din Jisu ar uniren celako kapharnạhum atoteko calaoena. Oṛaḱre bolokate celakoe kuliket́koa, “Horre do cet́pe reṭepeṭeḱkan tahẽkana?”

Celako do hapegeko tahẽyena, ente okoye maraṅa, noa reaṅge horreko reṭepeṭeḱkan tahẽkana. Ado Jisu onko gelbarko ać ṭhen hohoat́koteye metat́koa, “Judi jãhãe maraṅoḱ sanayede khan, uni do joto khon tayomiće hoyoḱma, ar sanam koren saṕdaṕiće hoyoḱma.

Inạ tayom mit́ṭen kạtić gidrạ celako samaṅreye teṅgokedea. Uni hoborkateye menkeda; “Jãhãege iń ńutumte nonkan kạṭić gidrại ataṅe, uni do ińgeye ataṅińa. Ar jãhãege ińe ataṅiń, uni do eken iń do baṅ, menkhan Isorgeye ataṅea.”

Mit́ṭen juạn koṛa Jisu ṭhen hećkateye metadea, “E bhage guru, jaejug jion ńam lạgit́ cet́ Kạmi hoyoḱtińa? Jisu do uniye metadea, “Cedaḱ bhage dom metạń kana? Eken mit́ hoṛ doe bhagegea, Isorge. Judi jaejug jionem ńam khan, tobe Isoraḱ hukumko bataome”.

Uni juạn koṛae menkeda, “Okako hukum?

Jisui menkeda, “Alom khuna, alom laṭghaṭa, alom kombṛoea, eṛe goha alom ema, go-baba manaokinme. Ar am pheḍren hor am nij leka dulạṛem.” Uni koṛa Jisui metadea, “Gidrạ khonge onako jotoń batao ạguyet́a. Nitoḱ do cet́ cekae hoyoḱtińa?” Jisui metadea, “Judi purạ puri mońj hoyoḱ sanayet́me khan, tobe amaḱ joto dhon-dạulạt ạkrińkate reṅgeć orećko emakom. Ado sermare dhon hoyoḱtama, ar iń pańjańme.” “Noa katha ańjomte uni koṛa do ạḍiye bhabnayente oṛaḱteye ruạṛ calaoena. Ente aema dhon tahẽkantaea.

Jisu do hoṛko cet́ako lạgit́ noa golpoe lạiat́koa-“mit́ṭen maejiuaḱ gel goṭen rupạ ṭaka menaḱtaea. Onako mod khon mit́ṭene at́le khan, diuhe jeret́kate oṛaḱ joḱ joḱte ạuriye ńam hạbić goṭa oṛaḱ bae sendraea? Are ńamlere, aćren gateko ar sorrenko hohokateye metakoa-“Iń soṅge rạskạḱpe. Ente at́len ṭaka doń ńamkeda.”

Golpo mucạt́reye menkeda,-“Onka leka, mit́ṭen kại hoṛ aćaḱ kại khon mone ạcurle khan, Isorren dutko hõko rạskạḱa.”

Sạdukiko barpe hoṛ Jisu ṭhen ko hećena arko meneda, goć hoṛ do bako jiwet́ beredoḱa. Jisue ńelkeda sạduki koaḱ baraea maraṅ bhul hudis menaḱtakoa. Pạhilaḱ do hoyoḱ kana, manwa goć tayom dosarte arhõe jiwet́ beredoḱa, noa babotte Sạdukiko oshikạreda. Jiwet́ beredoḱ hoṛmo Isoraḱ ektiạri pormaneda.

Dosaraḱ do hoyoḱ kana, Sạdukiko do sostor bako baḍaea. Serma raj redo bapla reaḱ jạruṛ do bạnuḱa. Noa dhạrtirege bapla reaḱ jạruṛ do menaḱa ar boṅsoko bạḍoḱa. Jemon dhạrtire manwa aloko cabaḱ. Menkhan sermare manwakoaḱ gujuḱ do bạnuḱa. “Ar Isor aćge onko tuluće tahẽna, ar mẽt́ khon sanam mẽt́ daḱe jodtakoa, ar moron ardo baṅ tahẽna, ar hirdạni hõ baṅ, ar raḱjoṅ hõ baṅ, ar haso hõ ardo baṅ tahẽna, ente pạhilaḱ ko do parom calaoena.” Johan Sodor 21: 4.  

Serma rajre manwako do serma dut lekako tahẽna, onḍe do onko jaejug jion ko tahẽna. “Menkhan hana jug reaḱ ar goćko khon jiwet́ beredoḱ reaḱ bakhra ńam lạgit́ lek bujhạuḱko do bạhu hõ bako bạhujoṅa, ar jãwãe hõ bako jãwãeoḱa; ente goć hõ bako gujuḱa ar do, ente dut barabạriko tahẽna ar jiwet́ beredoḱren hoponko hoyente Isorren hopon kanako.” Luke20: 35-36. Okoe Mạsireko pạtiạuḱ kana ar onkoaḱ moron hoelen khan rehõ  ko jiwet́ beredoḱa. “Ente sanam koge Isorren hopon kanape, Mạsi Jisure pạtiạute .” Galatiko 3: 26.

Sạdukiko do mare niạm reaḱ́ mõṛẽ goṭen puthi ko pạtiạu kana. “Ar Isore menkeda, Iń do ạpumren Isor kạnạń, Abrahamren Isor, Isahakren Isor ar Jakobren Isorge.” Exodus 3:6. Abraham do Jihudikoren baba kanae, ar Isahak do uniren hopon kanae, ar Jakob do uniren goṛom. Onko sanamko goć akana, ar goć khon ko jiwet́ beret́ akana. Isore meneda, Iń do jaejugren Isor kạnạń. Uni do arhõe meneda, Iń do onkoren Isor kạnạń, Ar hõe meneda, onko sanamko goć khon ko jiwet́ beret́ akana, ente Isor do jiwet́koren Isor kanae, goć akankoren doe baṅ kana.

Jisu do sermateye rakaṕ ocoḱ jokheć, onko apostolkoe metat́koa, Johan ma daḱteye bạptislet́ko; menkhan ape do thoṛa dinre Sonot Jiutepe bạptis ocoḱa. Ona ạuri hoyoḱ dhạbić Jirusalem khon alope sahaṛoḱa. Onako mit́ dinre Judạ Iskariot bodolte apostol hoyoḱ lạgit́ Mạthiạ ńutuman mit́ celako bachao bhurtikedea. Jisu sermateye rakaṕen tayom 10 mãhã hiloḱ Penṭekosṭ din reaḱ setaḱ jokheć apostolkoko jarwa akan tahẽkana. Khange ackage mit́ṭeć saḍe hoe got́ena hud hud tạpis hoe reaḱ leka, ar goṭa oṛaḱe perećket́a, ar onko ṭhen ńel ńamena hạṭiń begaroḱ kan alaṅko seṅgelko reaḱ lekage, ar onko modre mit́ ke mit́ hoṛ cetanre ãṛgoyena. Khange eṭaḱ bulikote roroṛko ehoṕket́a, Jiuge uḱcrạne danat́ko leka.

Sanam jạtko tala khon heć akan Jihudi hoṛ unre Jirusalemreko tahẽkana. Ona saḍe ańjomket́te ạḍi hoṛ onḍe heć jarwayenteko menket́a, Noa do cet́ kana? Noko hoṛ do Gạlilren doko baṅ kana? Enḍekhan cekate Isor reaḱ maraṅ kạmiko reaṅ abo aboaḱ nije pạrsite roroṛ kanbon ańjomet́koa? Peter do teṅgoyenteye galmaraoat́koa, Ape kurusrepe khil jalat́lede Jisuge nitoḱ do Isor reaḱ etomreye duṛuṕ akana, ar unige Sonot Jiue dul oḍok akat́a. Ado peter ạḍi ãṭe porcarat́koteko kulikedea, Cet́le cekaea, E boehako? Petere roṛ ruạṛat́koa, Mon ạcurpe, Jisu Mạsi ńutumte bạptis ocoḱpe kại ikạ lạgit́; khan Sonot Jiu danpe ńama. En hiloḱ 3,000 gan hoṛko bạptis ocoyena.

Pạtiạuko do din hiloḱko jarwaḱa koejoṅ ar Probhu reaḱ kedoḱ jom lạgit́. Jãhãnaḱ tahẽkantako ạkrińkate reṅgeć orećkoko hạṭińatkoa. Ar dinạmge Probhu do bańcao ocoḱkoe juṭuć idiket́koa. (Ap.kạmi.2.)

Mit́ṭaṅ ạn purkhạ Jisu ṭhen hećkate biḍạue lạgit́e metadea, Henda guru cet́ iń cekalere jaejug jivet́ iń ạidạrijoṅa? Jisui metadea, Ạnre do cet́ ol akana? Ạn purkhại roṛ ruạṛadea, Probhu amren Isor amaḱ goṭa ontorte, ar amaḱ goṭa jivite, amaḱ goṭa monte ar amaḱ goṭa ontorte dulạṛem, ar am pheḍren hoṛ do apnar leka dulạṛem. Menkhan uni ạn purkhạ do dhorom dekhaoḱ sanaye kante Jisui metadea, Ar iń pheḍren hoṛ doe okoe kana? Jisui metadea, Mit́ṭaṅ hoṛ Jirusalem khon Jirikhoteye ãṛgo calaḱ kan tahẽkana, ar ḍạkuko talareye paṛaoena. Onko do uni dalkedeteko calaoena, uni admạruạ oṭokate. Khange mit́ṭaṅ naeke hoṛ ona horteye ãṛgo calaḱ kan tahẽkanre, uni ńelkateye sa parom calaoena. Onka leka mit́ṭaṅ Levi hoṛ hõ ona jaega ṭhen senente ar uni ńelkedeteye sa parom calaoena.

Menkhan mit́ṭaṅ Samariạren hoṛ daṛanreye sen ńamkedea, ar ńelkedete mãyã hećadea, ar sen sorkate uniaḱ ghạlko bạdhiket́te sunum ar darkha rasae dulat́a, ar aćren janwarre dećkedete mit́ṭan ḍera oṛaḱte idikateye jotonkedea. Dosar hiloḱ calaḱ jokheć barea siki oḍokkate ḍera kisạ̃ṛ emadeteye metadea, Nui do bhage leka jotonem, ar jãhãnaḱ bạṛtim khoroćle khan, ruạṛoḱreń emkatama. Am bujre do onko pe hoṛ modre ḍạkuko talare paṛaolenićren pheḍ hoṛ do okoye hoyena? Uni ạn purkhại roṛ ruạṛadea, Dayawadeićge. Khange Jisui metadea, Am hõ senkate onka lekaeme.