“Menkhan ape talare onka do baṅ kana, bickom ape talare jãhãege maraṅ hoyoḱ sanaye khan, uni do aperen saṕdaṕiće hoyoḱ ma; ar jãhãege ape talare pạhilić hoyoḱ sanaye khan uni do sanam koren golame hoyoḱ ma.

Sạrige manḍer re church re se somaj bhạlạianaḱ kạmire daṛean ạyurić dorkar menaḱa. Sonot sostor re ‘Leader’ katha do thoṛagan ol menaḱa mentebon baḍae akada. Menkhan ‘golam’ katha do aema dhao ol menaḱa. Ar niạ oktere somajre golam katha redo ạḍi kom manot menaḱa. Ar okoeye golam kan uniaḱ do cet́ man manot hõ bạnuḱtaea ar okoe hõ baṅko manotea.

Isoraḱ raj do hoyoḱ kana golamaḱ somaj. Golam do joto hoṛe seba koa. Okoeṭaḱ ạyurić Isore bachao akade onko joto unige rukhiạkoa. Uni do onkoe manot koa, rukhiạ koa are tambhao koa. Onate ạyurić aḱ ucit baṅ kana je, aćaḱ subitạ se aćaḱ hudạ ńel tae. Ente sonot sostor re ol menaḱa ‘Menkhan uniaḱ raj ar dhoromge ńam maṛaṅanpe, ado noako saname em juṭuć apea.

Birbão hoe hećente jalapurire mit́ṭen jahaj do sokojoḱ ḍheote rạput́ena. Ona jahajre bańcaoe tahẽkan mit́ hoṛ buhel buhelte hahaṅkar jaegate seṭerena. Disạ ạcurentae re pạhilre Isore sarhaokedea aćaḱ jion rukhiạ ńutumte. Ado jao hiloḱge uni hoṛ do jalapuri ḍhipre duṛuṕkoḱ kan tahẽkana, jahaj hijuḱ aste. Menkhan jao hiloḱge ạḍi nirạs kateće ruạṛoḱ kan tahẽkana. Enka enkatege jalapuri aṛere oṛaḱe benao rakaṕkeda. Ar bir-gajaṛko khon jo̠ jinis, phol-mul ko tumạl kateće jomet́ kan tahẽkan.

Onkage mit́din jomaḱ sendrae lạgit́ bir-gajaṛte calaoena. Tinre oṛaḱe ruạṛena, ńelkadae je, culhạ khon seṅgel dhurạu akante sanam oṛ̣aḱ lo rapaḱ akantaea, ar ekal dhũd dhũd dhũạ coṭ rimilte oṭaṅ baṛae kana. Ado uni hoṛ do ạḍi ãṭe aḍraokeda are menkeda, E Isor ińaḱ bhạgre noa hõ tahẽkana?

Dosar hiloḱ aṅga marsalen khan jahaj saḍete jạpit́ khone ebhenena. Ona jahaj do uni uddhạr lạgit́e jalapuri ḍhip sećge hijuḱ kana. Ado ạḍitet́ bhaṛoyente mengot́keda, cekatepe baḍaekeda nonḍe menańa mente? Khange jahaj ren captain doe roṛ ruạṛkeda, amem jolket́ dhũạ ńeltegele bujhạukeda.

Cecet́aḱ: Isor do jãhãnaḱge cekae aboaḱ bhạlại lạgit́ge onkaea. Kukli daṛeaḱam tinre muskil heć paṛaoḱa unre manwa aḱ cet́ lekate bhạlại hoekoḱa? jãhã baṅ jãhã lekatege bhạlại hoyoḱgea, menkhan am ar iń ohogelaṅ aṭkar dạreaḱa. Ona iạte jaoge Isore hirlạ ar bhorsa akan tahẽnme, sạrige Isore goṛowama.

Raja Solomon do abo manwa ko lạgit́ noa kạhtuk puthire ạḍi ạkilan kathako roṛakada. Jaoge noa puthi bon paṛhaoa ar bhage bhage ạkilan kathako bon hameṭjoṅa. Onka leka teheń kạhtuk puthi reaḱ mit́ bar kathakoń disạ ocoyet́bon kana.

Bedhoromteaḱ dhonte do porho bạnuḱa. Menkhan dhorom do moron khone rurukhiạwa. (Kạhtuk:10:2)

(Kạhtuk:11:18) Bedhoromić do eṛeaḱe rojgarjoṅa, menkhan dho̠ro̠me eroḱkan hoṛ do sạri kuṛạiye ńamjoṅa.

(Kạhtuk:13:11 kạli) Alga upạite jarwaḱkan dhon do algatege oṭaṅoḱa, Menkhan dhamrokokateye jarwae hoṛ do onae baḍhaotaea.

(Kạhtuk:15:27) Behok lab lạgit́ lalocaḱ hoṛ do apnar oṛaḱgeye ạulạutaea, Menkhan ghus kurudaḱić do jiwet́e tahena.

Kạhtuk:21:6 kạli: Eḱṛe alaṅte dhon sõcjoṅ do Oṭaṅ baṛae bhap kana, ar moron reaḱ jhampage. Ciṭạ̃ṛ hoṛ do dhon lạgit́e hạṛmạṛạ, Ar bae baḍaejoṅkana ṭonṭaḱ paṛaoaea.(Kạhtuk:28:22 kạli)

Arhõ noa kạhtuk puthire napae napae cecet́aḱ dhorom kathako menaḱa. Jaoge bon paṛhao lekhan Isor abo manwako cet́e metawabon kana mente aṭkar daṛeaḱabon.

Isor aḱ mẽt́re sanam manwa bon somangea. Ente unige jo̠to̠waḱe sirjạu akat́a. Dhạrtire aema hoṛge ńeloḱte hende ar ado̠mko do e̠se̠l. Arhõ Aema hoṛge eṭaḱ eṭaḱ bahre diso̠mreko janam akana. Ńeloḱte judạ judạre hõ se bahre disomreko janam akan rehõ jo̠to̠ hoṛge aćaḱ tiren sijoniạ kanabon. Jo̠to̠ hoṛaḱge ti, jaṅga, mẽt́ muṭhạn menaḱtabona, jo̠to̠ hoṛaḱ hoṛmore inạ mit́ araḱ mãyãmge menaḱtabona. Jo̠to̠ hoṛaḱ hoṛmoṛe mon ar jiwi menaḱa. Manwa hisạbte aema jo̠khen hoṛko samaṅre maraṅo̠ḱbo kurumuṭuia, ar eṭaḱko huḍińbo monekoa. Jãhã tinre nonkabo hudisa paseć, eṭaḱ gharońjren hoṛko khonaḱ Isor do̠ ale gharońjrenge bạṛti dulạṛlea. Menkhan sạri katha noa do baṅ kana . Ente uni do jo̠to̠ hoṛge somane dulạṛet́bon kana.

Jao hiloḱgebo ńelet́ kana, setaḱ candoe rakaṕlenre jo̠to̠koaḱ oṛaḱrege ini candowaḱ rãt do̠ paṛaoḱa. Arhõ tinre oka ṭoṭharey daḱet́ kan unre ona ṭoṭharen jo̠to̠ hoṛaḱ oṛaḱrege daḱ ńũroḱa. Abo judi jãhãe hoṛko dulạṛ ar jãhãebo ạṛisako noa do Isor baṅgey kusiaḱa. Isor do cet́ lạṭu hoṛko bạṛti ar kạṭićko ko̠m ńõḱe dulạṛkoa? baṅ. Isor do lạṭu ar kạṭić jo̠to̠ hoṛge somane dulạṛkoa. Tinre jãhãe hoṛ eṭaḱ hoṛ birudre se Isor birudre bạṛićaḱe kạmi, unre Isor ạḍige duke ńamet́ kana, menkhan unre hõ uni hoṛe dulạṛea.

Menkhan Isor do̠e kho̠jo̠ḱ kana jemo̠n uni hoṛ ạḍi usạra mone pherao ar Isore uduḱ akat́ horte ruạṛ hijuḱ. Ar unre mone pheraolere Isor ạḍitet́e rạskạ are hulạso̠ḱa. Ente Isor do uniye sirjạu akadea. Jãhãe silpi se kạrigol aćaḱ tite benaoaḱ se sirjạuaḱ baṅgey bạṛić ocoea, onkage Isor abo tis hõ bae bạṛić ocobona ar bae ńel hiṛińbona. Je̠mon aćaḱ katha leka ar uduḱ akan ḍahartebo taṛam daṛeaḱ.

Calaoen (27 May 2022) Sokol hiloḱ Koikuṛi Durgapur manḍerre Kolhe talare “Sãota Cehaona” babo̠tre jarwaḱ hoe purạuena. Noa jarwaḱ́ do Tabitha Foundation aḱ goṛo-gopoṛote ạḍi jak jomoḱte hoe purạuena.

Ar niạ jarwaḱre Office seć khonaḱ selet́ko tahẽkana, KOP ren kạmiạko Mn.Subash Baskey- Facilitator, Circle pasṭor Rev.Rajen Soren, Maejiu porcarika Basonti Mardi ar Rumali Hasda.

Noa cehaona babot jarwaḱre gapalmarao bisoe ko tahẽkana-

1. Manḍer ren sanam biswạsiko mit́te tahẽnoḱ babo̠tre.
2. Gidrạkoaḱ sikhnạt ar solha kathako babo̠tre.
3. Sapha-sạphi ar niropon hoṛmo babo̠tre.
4. Kristan gharońj re koejoṅ reaḱ jạruṛ babo̠tre.

Khange Bethaniạ pheḍ hạbiće ạyur idiket́koa. Ar aćaḱ tikin tiạr kateye bhorat́koa. Are bhorako kan tulućge onko khone begarena ar sermateye rakab idi ocoyena” (Luk 24:50-51).

Jisu do aćren celako soṅgei tahẽkana. Ar Bethaniạ jaegareko seṭeren khan aćaḱ ti tiạr kate onkoe bhorat́koa. Ar Jisu Mạsi do onko celako bhor em tulućge onko khone begarena ar sermatey rakaṕena.

Abo Isor tuluć jopoṛao bon doholekhan ar uniaḱ hukumbon batao lekhan ar uniaḱ dewa seware bon tahẽlen khan khạṭige Isor doe jotonbona ar jahanaḱge jạruṛabon okte nạpitrey emabona. Ente abo lạgit́ Isoraḱ bhor do tis hõ baṅ cabaḱa, emoḱtege tahẽna. Menkhan Isor okaṭaḱe khjogo̠ḱkan onka babon kạmi lekhan saraṕ-e emabona.

Aboaḱ dạyiḱ kạmi do hoyoḱ kana Baibel re ol akan ạn-ạri baḍae hoyoḱ tabona. Hukum batao hoyoḱ tabona, ar Isor tuluć jopoṛao doho hoyoḱ tabona. Jemo̠n Isoraḱ bhor khon alobon eṛaṅoḱ ma.

Sonot jiu reaḱ daṛete mimit́ kristan boeha se misera edre ar mon reaḱ haṛhat́ khon bon sapha daṛeaḱa. Khạṭige abo do noa khon sạdhin bo ńama ar onkage abo do mimit́ goṭen Dayaić, Mãyãwanić ar ipikạ hoṛ bon hoe daṛeaḱa.

Sanam hewer haṛhat́ ar raṅgao, edre ar kạumạu ar henosta, sanam dusṭạmi sudhạ ape khon sahaṛakan tahenme; ar ape apere susṭoban, mãyãwan baṛe hoyoḱpe, ar ipikạḱpe, cet́ leka Mạsire Isor hõ apeaḱe ikạitape. Eph 4:31-32

“Menkhan uni sạriaḱren Jiu tin reye hijuḱa unre uni do hore uduḱapete sạriaḱreye ạyurpea”. (John 16:13)

Sonot Jiu noa dhạrtite hećlen khon cet́koe kạmia onako babot Jisu Mạsi pusṭạute aboe baḍae ocoyet́bon kana. Sonot Jiu noa dhạrtiren joto manwako lạgit́e heć akana. Sonot Jiuaḱ daṛe do eken bepạtiạuko se okoe Jisu babańcaoić mente baṅko ataṅ akade onko lạgit́ do baṅkana.

Menkhan Mạsire mil-akan joto biswạsiko ar manḍerren lạgit́-e em akana. Sonot Jiu reaḱ daṛete manḍerren hoṛ do sikhạunako em daṛeako, ar bạṛićaḱ kạmi bạgiaḱ, mońj kạmi lạgit́ cehaonako em daṛeaḱa ar mońj horte calaḱ lạgit́ ko ạyurkoa. (John: 3:19) Sonot Jiu mimit́ biswạsi tuluć kathae roṛa. Onko do jemon Mạsi lekako hoyoḱ ar dhoromte mon salaḱ ko calaḱ. (2 kor 3:18). Sonot Jiu do sanam biswạsiko joto lekanaḱ sạriaḱtei ạyurkoa, Ar manḍer ren koaḱ bhage kạmi hotete Masie goroboḱa.

Nonkage Sonot Jiu abo joto biswạsiko soṅge kạmia ar abo do jemon Mạsi lekabon hoyoḱ ar Sonot bo tahen.

Tis coṅ ackage bon gujuḱ aboge babon baḍaea. Noa do eken sisirjạić babae baḍaetabona. Sạrige teheń sereń puthi reaṅ mit́ṭen sereń disạ dohṛa ocoet́bon kana,

Manwa jion do

dare umul leka paromoḱ kan

Babon baḍaea oka hiloḱ

Ackatege coṅ calaḱ  hoyoḱ…

Sạrige manwa jion do nonkakangea. Enḍekhan bạṛtikaete abo sanamkoaḱ jạruṛkana, gujuḱ lạgit́ jao ghuṛi saṕṛao akae tahẽn. Ente sapṛaoko tahẽnkan mit́ke mit́ hoṛ ạḍi alagatege sisirjạuić babawaḱ hoborreko sen daṛeaḱa. Gujuḱ lạgit́ sapṛao akae tahẽn reaḱ manetet́ do nonka kana,

Pạhilaḱ: jao ghuṛige kại metaḱme bạṛićaḱ kạmiko khonaḱ sạṅgińre tahẽn, sonotte jion jingi khemao.

Dosaraḱ: Reṅgeć nacar hoṛko goṛowako.

Kại khonaḱ sạṅgińre tahẽn lạgit́ cet́ cet́ upại menaḱ akada?

Noa lạgit́ Jisu Mạsiaḱ hukum batao, jotowaḱre babawaḱ sana se khojogoḱa manao ganao jaruṛ kana. Menkhan eken kại khonaḱ sạṅgińre tahẽnte serma jionte o̠ho̠bo bo̠lo̠ daṛekea. Onka leka daya-mãyãwaḱ ko hõ kạmi hoyoḱa. Jisui menakada, Okoe do  reṅgeć nacar hoṛko jomaḱe emaeko, tetaṅre daḱe emae, rogikoe jogao jotonet́ko kan, ho̠ro̠ḱ bandenaḱ bạnuḱkan hoṛkoe danako kan, dukoḱ kan hoṛko jiwi rareće emako kan, nonkankoge serma jionko hameṭjoṅa. Menkhan tinạḱ do nonkanaḱ baṅko kạmikan onko sanamko norok seṅgelreko khadle ocoḱa.

Ona iạte dulạṛiạ kiristan boeha ar miserako delabon sisirjạuić babawaḱ hukum bataorebo tahẽna. Ar uniye uduḱ akat́bo horre jaejug bhorrbon taṛam idia. Jemon babawaḱ hoborre abo mit́ke mit́ hoṛbo seṭer daṛeaḱ.  

Isại hoṛkoaḱ maraṅ dhorom po̠ro̠b Easter Sunday se paska porob ńutumte Chapainawabgonj jilạ reaḱ sodor upạjilạ Amnura Mission iskul maṭhre BNELC reaḱ maraṅ Simraḱ Paska (Sunrise) Girjạ do̠ hoe purạuena. 17 April Aṭhwar hiloḱ aṅga simraḱ 5:00 am baja okte khonaḱ niạ girjạ do ehoṕlena. Jisu Mạsiaḱ jiwet́ beredoḱ diḱsạ ruạṛ ńutumte noa bises girjạre Niạ diso̠m ar goṭa dhạrti reaḱ suluk ar jạt jạtko talare dupulạṛ tahẽn babot hõ koejoṅ hoyena. Simraḱ Paska girjạre Amnura Mission manḍer ar ona aḍepase ṭoṭharen (Mirjapur, Jolahar, Sakoṭola, Jhinạkhor, Phạgupaṛa, Sanjra) 300 cetan isại boeha miserako selet́lena.

Isại hoṛkoaḱ biswạs lekate, Jisu Mạsi gujuḱ tayom tesaraḱ din do̠e jiwet́ beret́ akana. Ado̠ Jisu Mạsiye jiwet́ beret́ hotete dhạrtiren manwa kại khon bańcaoko ńamkeda ar nonkate Jisu Mạsi Jiwet́ beredoḱ Aṭhwar do̠ Paska se Easter Sunday hisạbte manao hijuḱ kana. Jisu Mạsiaḱ jiwet́ beret́ metaḱme jitan din mimit́ diso̠mren isại hoṛko aema lekan ạn-ạri talate noa dinko manao ganaoeda.

Niạ Maraṅ Simraḱ Paska po̠ro̠b girjạe ạḱyurkeda BNELC ren mare GS Rev. Suban Kisku. Girjạre arhõ selet́kate johar katha ko lạe pasnaokeda BNELC-Rajshahi circle Chairman Mn Rabindronath Hembrom, National Christian Fellowship of Bangladesh(NCFB) ren Program Coordinator ar onoliạ Mn. Mithusilak Murmu, BNELC-Trust Board secretary Mn. Hingu Murmu, TF/NAGR ren Director Mn. Stephen Soren. Ạḍi rạskạ salaḱ napaete noa Simraḱ Paska (Sunrise) girjạ hoe purạuena ar darakan bochor hõ sanamko niạ ar hõ noa Simraḱ se Sunrise girjạ hoyoḱa menteko sodorkeda ạyur komitte ko. Ona selet́ Manotan ko arhõ ko menkeda, nonkage jemon tayom daram dinre BNELC reaḱ mimit́ manḍerre simraḱ paska girjạ metaḱme cando ạuri rakaboḱrege (Sunrise) girjạ hoyoḱma.