Teheń do Toroć budbar noa toroć budbar do goṭa dhạrtiren sanam khristan dhoromren hoṛko lạgit́ mit́ṭen bises din kangea, teheń khonge khristan dhoromre patiạ́u akan sanam boeha miserako do  upạs ko saṕ se lekhayeda, babańcaoić jisu mạsi do aćaḱ kạmi etohoṕ lahare atma jion sećte noa upạs talategeye sapṛaolena, uni do dhạrti re tahen oktere harkhet saset sahao hoelen taea ar onkatedhạrti ren sanam khristan ko lạgit́ apnar baṅoḱ, apnar hoṛmo reaḱ sanam rij roṅ, baṛić hãs rạskạ goj ar harkhet saset sahao talate ISOR soṅge mońj sombond doho kate sanam ko apnar leka dulạṛko  te jion kemao reaḱ sikhnạte cet́ abon kana, Jisu do aćaḱ joto lekan duk kosṭo ar gujuḱ hoelen taea. Ar noako sanamaḱ bhagaoket́te Paska se senparom porobre gujuḱ suṅgạ rạput́ket́te jitane jiwet́ beret́ena, ado delabon sanamko noa upạs sandore aboaḱ dhạrti duk bon bhagaoa ar atma jion rebon diṛho aroḱa.

Jakobren 12 hoponko tahẽkantaea; Ruben do maraṅić ar Rahelren hopon Joseph ar Benjamin do joto khon huḍińkin tahẽkana, Joseph do dadatteko tuluće gupia ar onkoaḱ bạṛić colon apat ṭhene sodortako iạte ạḍiko edreaea. Jakob do aćren joto hopon khon Joseph bạṛtiye dulạṛea, ar mit́ṭeć tilpaṅ aṅgroṕe benao ocoadea. Josephren dadatteko onako ńelkateko hiskạ arko kurudaea, ar sulukte uni tuluć bako galmaraoa.

Joseph mit́ dine kukmũket́te ona do dadattekoe lạiat́koa, baṅma, Kukmũte goḍarebon biḱnḍạ kana, ar apeaḱ binḍạko ińaḱ binḍạko ḍoboḱat́a. Arhõ mit́ dine kukmũket́te ona hõe lạiat́koa, baṅma, kukmũte siń cando ar ńindạ cando ar 11 goṭeć ipilko ḍoboḱadińa. Khange uniren dadattekoko metadea, Ale cetanrem rajoḱgea, se hukumem calaoa ale cetanre base? Artet́geko kurudadea. Ar uniren apat doe metadea, Noa do cet́ lekan kukmũ kantama? Baṅ dole hijuḱ iń eṅgam ar dadamteko am ṭhen ombagoḱ lạgit́? Menkhan Joseph do ona kukmũ monereye dohokat́a.

Mit́din Josephren dadatteko do ạḍi sạṅgińreko gupi kan tahẽkana, ar Jakob do Josephe metadea, Do calaḱme, dadamteko reaḱ ar bhiḍi meromko reaḱ boge judạ ạguime, ar katha ạgu ruạṛạńme. Ado Josephe calaoena. Uniren dadatteko sạṅgiń khonko ńel daramkede khanko mepenena, Hạni ya, kukmũ guruge darae kana, delabon gojea, khangebon ńela, uniaḱ kukmũ reaḱ cet́ hoyoḱa! Menkhan Ruben do bańcaoe reaḱ sana tahẽkanteye menket́a, Noa kũirege khańjo giḍikaepe. Josephe seṭeren khan, aṅgroṕko poṭorkedete rohoṛ kũireko khańjokedea. Onakate duṛuṕenteko jojom kanre, ona takre bepar hoṛ Misor disomteko sen paromoḱ kana. Jihudại menket́a, Delabon, noko bepariko ṭhenbon ạkrińkaea, jivi alobon ạguitae ma; ente boeha kantabon doe, khange 20 ṭakateko ạkriń giḍikadea. Ạkrińe jokheć bae tahẽkan Ruben do kũi ṭhen hećkateye hohoket́a. Koṛa do bạnugićan! Khange mit́ṭen bheḍako goćkedea, ar mãyãmre Joseph reaḱ aṅgroṕko topoket́a, ar apat ṭhen kolket́teko roṛ got́kat́a, Noale ńam akat́a, ńel oromme baṛe, hoponme reaḱ aṅgroṕ kana se baṅa. Jakob ona ńel oromket́teye menket́a, Hoponiń reaḱ aṅgroṕ kangea, cele kaṭaha janwar coe jomkede! Ar ạḍi din aćren hopon ńutumteye homoroḱkan tahẽkana. (Gen.37.)

Jakob Kanan disome sorenre Esao ṭhen hoṛe kol lahaket́koa jãhã lekate uni ṭhen dayae ńam. Onko hoṛ heć ruạṛkateko metadea, Dadam do 400 hoṛante am upạrteye hijuḱ kana. Onate Jakob do ạḍitet́ botorente nońjor mente mĩhũ merom Esao ṭhen kolket́kote ạḍi nehõrkate Isor ṭhene koeket́a

Khange Probhu hoṛ chinte uni ṭhen upelente uni tuluće tapamena; menkhan Jakob do bae aṛaḱledea ạuriye bhorae dhạbić. Khange Isor bhoradete Isrạyel metaḱme Isor tuluć lạṛhạiyiće ńumkedea. Jakob Esao tuluć dapramenre 7 dhao otre ombaḱkateye ḍoboḱadea; menkhan Esao do uni ṭhen ńir senente uni hạṛuṕkateye coḱadea, ar banar boehakin raḱket́a. Isạhak do 180 serma umerreye goćena. Ar aćren hapṛamko tuluće gateyena, ar Esao ar Jakobtekinkin topakedea. (Gen. 32, 33, 35.)

Jakob do oṛaḱ khone oḍok calaoena, ar siń candoe hạsurenre mit́ṭaṅ ṭhạ̃ireye sen paṛaoena, okare tahẽ aṅgaḱ niṭwan; ado mit́ṭaṅ dhiri halaṅkate bohog lạgit́ onae dohoana, are jạpit́ket́a. Khange kukmũteye ńelket́a, baṅma, ot khon serma ṭuṅgạu dhạbić mit́ṭeć siṛhi doṛom akana, ar Isorren serma goḍetko onateko ãṛgo rakaṕ kana, ińge Probhu do ona coṭreye teṅgo akana, are metadea, ińge Probhu amren ạpum Abrahamren ar Isạhakren Isor kạnạń; one oka rem gitić akan disom do am ar amren bõskogeń emapea, ar am bõsrenko do ot reaḱ dhuṛi lekageko saṅgeḱa; ar am bõsre do dhạrtiren sanam gusṭiko bhoranko hoyoḱa. Ar iń do am tuluć iń tahẽna, ar noa disomteń ạgu ruạṛmea. Jakobe ebhenen khane menket́a, Sạrige Probhu noa ṭhạ̃ire do menaea, nonḍe do Isor reaḱ oṛaḱ ar nonḍe do serma reaḱ duạrge. Ar ona ṭhạ̃i reaḱ ńutum do Bethele dohoket́a.

Jakob do puruạ seć calaḱ calaḱte Laban mamot ṭhene tioḱket́a ar unit ̣hen mit́ cando gane tahẽyena. Khange Labane metadea E bạbu, tinạḱ dạhnạm hataoa? Labanren do barea hoponerakin tahẽkantaea mit́ do Lea, arm it́ do Rahel; ar Rahel do ạḍiye mońja, onate Jakob Labane metadea, Iń do 7 serma am ṭhen gutiń khaṭaoḱa Rahel ńutumte ar ona 7 serma do eken thoṛa din lekae bujhạuket́a, Rahele dulạṛede tahẽkante. Din purạuen khan, Laban do Rahel bodolte Leage phorphundikate Jakobe aderadea, ar tayomteye metadea. Ale do onkan sorwa bạnuḱtalea maraṅić tahẽnte huḍińićle goṅako. Rahel ńame lạgit́ Jakob do Laban ṭhen arhõ 7 serma gutiye khaṭaoena. Onakate 6 serma do dạhnạteye kạmiadea ar Isor ạḍiye bhoradete ḍhere kisạ̃ṛena, khangeye bujhạuket́a, ona khạtirte Laban reaḱ mẽt́ jolentaea ona teṛoṅ aćren era hopon ar tahẽkantae jotoanteye dạṛket́a. (Gen. 28-31.)

Isạhake haṛamen ar mẽt́ ạndhuạentae khan, mit́din Esaoe metadea, Am do aḱ sarante birte calaḱme, ar bir jel goć ạgukate isin aroạńme, jemon ona jomkateń bhoram ạuriń gujuḱre. Rebeka onae ańjomket́te Jakobe phuslạkedea, jemon Esao bodolte apat ṭhen bolokate bhortet́e aṅgejoṅ. Jakobe roṛ ruạṛadea, dadań do goṭa hoṛmoe hodo hodogea, ar iń doń cikạ̃ṛgea; paseć ạpuńe tunum aṭkarkidińge, ado iń cetanre sarapiń paṛao ocoket́ge ar bhor do baṅ. Menkhan eṅgattet́e phuslạukedea, ar barea merom hopon goćkate bir-jel leka ạḍi soṛome isin aroket́a, ar merom harta Jakobaḱ tikin ar hoṭoḱre bedhaoadete, Jakob do ona jomaḱante apat ṭhen boloente bhortet́e koeana.

Isạhake kulikedea, Henda beṭa, cekate nunạḱ hako pakom ńam ạguket́a? Jakobe roṛ ruạṛadea, E baba Probhu amren Isore kol daram got́adińte. Isạhak do aṛaṅtet́ ańjom orom leka ạikạuket́teye metadea. Mase beṭa, sorlenme; ado tunum aṭkarkedeteye menket́a, Aṛaṅtet́ do Jakobaḱ, menkhan tikin do Esaoaḱ. Khange Jakobe ạguade isin aroaḱ jomkatey bhoradea, ar dadat cetanreye dohokedea, pạhil janamić menkate. Metadeae, Am sarapamić doe sarapoḱ ma, ar am bhoramić do bhorane hoyoḱ ma.

Jakob oḍok tora Esaoe seṭerena, ar isin arokate apat idiadeteye metadea, Ne baba, bir jeleń ạgu akawat́meaḱ jomme, jãhãlekatem bhorań. Isạhake metadea, Am do okoe kanam? Esaoe roṛ ruạṛadea, Iń do amren pạhil janamić Esaoge. Khange Isạhak do ạḍi bạṛić botorenteye metadea, Enḍekhan enaṅre bir jel sendra goć ạguadiń doe okoe kana? Iń do jomkateń bhoradea, ar bhoranić hõe tahena. Esaoe roṛ ruạṛadea, E baba, mit́ṭeć bhor iń lạgit́ do bam sareć doho akat́a? Khange Isạhake metadea. Am do tarwaṛetem ạsuloḱa, ar amren bokom ṭhen gutim khaṭaoḱa.

Esao do enhiloḱ khon Jakobe kurudadea ona bhor khạtirte, ar gojeye dhirạukedea apate goćlen khan. Khange Rebeka Jakobe metadea, am do beṭa Laban mamom ṭhen senkate, onḍe baṛe tahẽ hataṛoḱme, amren dadam reaḱ raṅgao ạuri nemrotoḱ dhạbić. (Gen.27.)

Isạhak ar Rebeka baplakate 20 serma calaoena, enre hõ gidrạ bako hoelentakina, Khange Probhu Rebekae metadea, Am do koṛa hoponem janamkina, maraṅić do huḍińićren gutiye hoyoḱa. Duṛuṕ din seṭerentae khan jawateye janamket́kina. Pạhil uyuḱić do goṭa hoṛmo hodo hodoe uṕana, uni do Esaoko ńutumkedea; ar tayom uyuḱić do Jakobko ńutumkedea. Unkin koṛa gidrạkin harayen khan, Esao do sikạriại hoyena, ar bir pakaṛe sendrawa cunḍul bhuṭul; menkhan Jakob do ugur sunduć tạmbukoreye tahena.

Isạhak do Esaoe dulạṛea, ar Rebeka do Jakobe dulạṛea. Mit́din Jakob mit́ṭene isin aro akawan tahẽkanre, Esao do bir khon laṅga hećenteye metadea, De ya, losaḱ jom ocoańme to ona araḱaḱ, enteń laṅga cabagea, (onate uniaḱ ńutum do Edom, metaḱme araḱić hoyentaea.) Jakobe roṛ ruạṛadea, Ma nitge amaḱ pạhil-janam hok ạkrińańme. Esaoe metadea, Hẽ, reṅgećteń gujuḱ kan do baṅa, pạhil janam hok doń cekae baṅ? Khange kiriạkate ona isin aroḱte aćaḱ pạhil janam hok Jakobe ạkrińadea, ado jomkene ńũkene hạ̃i torae beret́ calaoena, aćaḱ pạhil janam hoke nihạ̃tket́a. (Gen, 19-34.)

Sarae goćen khan, Abraham do ać oṛaḱre sordare tahẽkan Eliesere metadea, Ma kiriạkate goḱạńme jemon ińren hopon lạgit́ Kanan kuṛiko mod khon mit́ṭen bạhu alom ạguye; menkhan am do ińaḱ disomte ar iń gusṭiko ṭhen senkate onḍe khon ińren hopon lạgit́ mit́ṭaṅ bạhu ạguyem. Khange Elieser ać kisạ̃ṛren 10 goṭaṅ ũṭ ar emanteaḱ bhage bhage jinis idi torakate Mesopotamia disomte Nahor naṅgrahateye calaoena. Naṅgraha bahrere daḱ lo ber jokheć uni do mit́ṭeć kũi ṭhen ũṭko burumkat́koteye koeket́. E Probhu ińren kisạ̃ṛ Abrahamren Isor! Teheń do ińren kisạ̃ṛ dayawaeme, onko modren mit́ kuṛiń metaea. De mạ̃i daḱ emạńme. Uni roṛ ruạṛkateye men khan, Ne baba, ńũime ar amren ũṭ hõń ạńuakoa. Unige amren guti Isạhak lạgit́em ńel bachao akade bạhu bạreye hoyoḱma. Ạuriye koe mucạdtege mit́ṭaṅ ạḍi mõńj kuṛiye hećena; uni do tarenre kanḍa goḱkate kũi ṭhen senente kanḍae bhurạḱket́a. Khange uni guti uni ṭhen sorenteye metadea, De mạ̃i daḱ emạńme. Uniye roṛ ruạṛadea, Ne baba, ńũime ar amren ũṭko hõń ạńuakoa, ado joto ũṭko ḍakaḍaḱreye loat́koa. Ona beṅget́aḱte uni hoṛ do ạḍi bạṛiće hahaṛayena.

Onko joto ũṭko ńũ biyen khan, uni hoṛ do mit́ṭen sona not ar sona reaḱ barea sakom uni kuṛi emadeteye kulikedea, Henda mạ̃i, am do okoe hoponera kanam? Ạpum oṛaḱre jaegaḱ ṭhạ̃i menaḱa? Kuṛiye roṛ ruạṛadea, Nahorren hopon Bethuelren hoponera kạnạń. Janwarko jom lạgit́ aema busuṕ, ar gitić lạgit́ ṭhạ̃i hõ menaḱtalea. Khange uni hoṛ do ombaḱente Probhui sewawadea, are menket́a, Iń kisạ̃ṛren peṛako reaḱ oṛaḱteye ạyur ạgu akadiń Isor reaḱ sarhao baṛe hoyoḱ ma. Uni kuṛi Rebeka do oṛaḱte ńir calaokate onako jotoe lạiat́koa.

Khange Rebekaren dadat Laban uni hoṛ ṭhen oḍoṅ senkate oṛaḱteye ạgukedea, ũṭko busuṕe emat́koa ar uni hoṛ do jomaḱe hartawadea. Menkhan uni do cet́ jojom hõ bae rebenlena, bhar akawadeaḱ ạuriye lại dhạbić. Uni hoṛ do aćaḱ joto kathae lạiket́ khan, Laban ar Bethuelkin menket́a, Probhu ṭhen khon oḍok heć akana noa katha do. Khange Rebeka hoho ạgukedetekin metadea, Cele mạ̃i, nui hoṛ tuluć dom calaḱa? Adoe menket́a, Calaḱgeạń. Khange Rebeka sotoḱkate Kanan disomteye ruạṛ calaoena. Onḍe seṭerkate Isạhak do eṅgat Sara reaḱ tạmbute Rebekae aderkedea, ado aćren bạhui hoyena ar ạḍiye dulạṛea.

Abraham do hijuḱ Babańcaoić reaḱ pạtiạute rạskạte din calaḱkan tahẽkantaea. Uni do 175 serma umerre goćente aćren hapṛamko tuluće gateyena. Apat reaḱ joto ạidạri do Isạhak reaḱge hoyentaea, ar ać hoṛren ạḱyuriće hoyena, ar Probhu do bhoradeteye metadea, Am ar amren bõs do Kanan disom iń emapea, ar am bõsre do dhạrtiren joto jạtko bhoranko hoyoḱa.

Maraṅ DIN baṅ maraṅa ghonṭa saḍe rãwaḱ

Baṅ kana din do maraṅ porob reaḱ hewaḱ.

Manwa rupe hatawana abon Isor Baba

Maraṅ hoyen din do noa soetan daṛe caba.

Noa din ge dhạrti tala maraṅ mạhimate

Seṭerenae jisu mạsi manwa jonom kate.

Abo khonaḱ hiskạ bạḍại hiṛiń cabae hoyoḱ

Tobe aneć sanam kore rạskạ seṅgel joloḱ.

Babon tahen sanam koge dos ar bhinạ bhini

Ente nitoḱ seṭerenae babańcaoić uni.

Sanam koaḱ mone ontor saphae abon teheń

Maraṅ DIN re rạskạ jion jemon hoyoḱ jeleń.

Ontor mundil sajao abon jisu mạsi lạgit́

Boeha dulạṛ urgum dohoe tahenabon mit́

Huḍiń maraṅ sanam koge ISOR ṭhen do soman

Pạtiạr jion khemao lekhan ńamoḱ serma dolan.

Reṅgeć kisạṛ ṭuạr amar rạnḍi ṭhunṭạ dukhi

Sohot́ kobon goṛokote sanambon tahen  sukhi.

Sanam koaḱ oṛaḱ hoyoḱ nãwã Jerusalem

Dulạṛ jisu MARAṄ DIN re rạskạ seteńalem.

Jisu Herod Raj okte Bethlehemreye janamen khan, gonok hoṛ puruạ khon Jirusalemte hećkateko menket́a, Jihudikoren janamen raj do okare menaea? Ente ale do uniren ipil puruạrele ńelledea, ar uni sewawae lạgit́le hećena. Herod raj onae ańjomket́ khane torasena, ar maraṅ naekeko ar sostor baḍaeko jarwaket́kote onko ṭhene khuṛiạuana, Mạsi okareye janamoḱa mente. Onko doko metadea; Jihudạ Bethlehemrege, nạbi reaḱ katha leka. Khange Herod onko gonok ko oko okote hoho ạgu ocokate onko ṭhene sutrạuana ipile ńellen jokheć reaṅ. Ar Bethlehente kolket́koteye metat́koa, Do senkate gidrạ reaṅ soḱ sutruć surạgpe, ar unipe ńamlere jạhir torawạńpe, jemon iń hõ senkateń sewawae.

Onko gonok doko calaoena. Khange puruạreko ńellede ipil do onko laha lahateye calaḱkan tahẽkana, gidrạ menae oṛaḱ coṭre ạuri seṭerkateye teṅgoḱ dhạbić. Onko do ipiltet́ko ńelkedete ạḍi bạṛićko rạskạena; ar oṛaḱte bolokate gidrạko ńelkedea aćren eṅgat Mạriạ tuluć; ar ombaḱkateko sewawadea; ar akoaḱ dhon babaeaḱko oṭaḱkate sona, kunduru ar gondhorosko samaṅadea. Ar Herod ṭhen aloko ruạṛa mente kukmũte cehaoente eṭaḱ horte akoaḱ disomteko sa calaoena.

Onkoko calaoen khan, Probhuren mit́ṭen serma goḍet kukmũte Joseph ṭhen upelkateye metadea, De beret́kate gidrạ ar eṅgattet́ sotoḱkinte Misor disomte dạṛme;ar onḍe tahenme iń ạuriń metam dhạbić; ente Herod do gidrại sendraye lạgidoḱ kana gojea mente. Khange uni do beret́ente ńindạre gidrạ ar eṅgattet́ sotoḱkate Misor disomteye calaoena.Herod do gonokko ṭhen gidrạ benaoene ńelket́ khan, bạṛiće raṅgaoena, ar Bethlehemren joto koṛa 2 serma umerrenko khon nirosko dhạbiće goć ocoket́koa.

Herode goćen khan, Probhuren mit́ṭen serma foḍet Misor disomre kukmũte Joseph ṭhen upelkateye metadea, Ma beret́kate gidrạ ar eṅgattet́ sotoḱkinte Israyel disomte ruạṛme’ ente gidrạ reaḱ jivi sesendrako doko goćena. Khange Joseph do gidrạ ar eṅgattet́ sotoḱkate Gạlil disomte sesente Nasaretreye thamgạḍiyena. Ar gidrạ foe hara idiyena, are keṭeć idiyena, akelte perejoḱ kan tuluć, ar Isor reaḱ bạsut unire tahẽkana. (Math. 2. Luk 2, 40.)

Peter mit́din Jisui kulikedea, E Probhu, ińren boeha iń reaḱe kạilere tin dhaoiń ikạkataea? 7 dhao dhạbić 7 Jisui roṛ ruạṛadea, 7 dhao do baṅ, menkhan 7 dhao 70. Ado mit́ṭeć phen kathae lạiat́koa, Mit́ṭaṅ raj aćren gutiko tuluć lekha jokhae jokheć mit́ṭaṅ 10,000 mon ṭaka dharaoić uni ṭhene hạjir ocoyena. Menkhan haḱla teaḱ bạnuḱtaete kisạ̃ṛ do uni ar era hoponko ar tahẽkantae jotoaḱko ạkrińoḱ ar rin halaḱe hukumket́a.

Khange uni guti do kisạ̃ṛ reaḱ ti jaṅgare giḍiyenteye metadea, Iń reaḱ baṛe sombhurime, jotogeń halakatama. Ado kisạ̃ṛ mãyãyenteye aṛaḱadea, ar dadone khalas kadea. Menkhan uni guti do oḍok senkate mit́ sae sikại dharao akat́tae aćren mit́ṭen são guti ńamkedete uni saṕkatey limbot́ kiro korokedea, metadeae, Dharaoaḱ halakạtińme! Uni são guti do uniaḱ ti jaṅgare giḍiyenteye metadea, E bhại, iń reaḱ baṛe sombhurime jotogeń halakatama.

Menkhan uni do bae uput́let́te senkate kạd oṛaḱreye bhoraokadea, dharaoaḱ ạuriye halatae dhạbić. Uniren são gutiko ona ńelkate ạḍiko mon dukena, ar akoren kisạ̃ṛ ṭhen senkate jotoko khulạuadea. Khange uniren kisạ̃ṛ hoho ạgu ocokateye metadea, Ea bạṛić guti! Onako joto dharaoḱ iń khalaskat́mea, amem nehõradiń teṛoṅ; ar hõ amren são guti mãyãwae baṅ hoekoḱtama, iń amiń mãyãwat́me leka? Khange uniren kisạ̃ṛ raṅgaoente saḱsetko ṭhene soprotkadea, joto dharaoaḱ ạuriye halatae dhạbić. Ińren sermaren Ạpuń hõ apeye nonka lekapea, mit́ ke mit́ hoṛ apan ạpin boeha apeaḱ monte bape ikạletako khan. (Math.18, 21-35)