Serma seć ti tul kate

Juri gunṭhi ikṛum kate

Isor sarhaoebon dela,

Sirjạu kedae bir buru

Sirjạu kedae jharna gaḍa

Isoraḱ dan tinạḱ rilạmala.

Jo baha joto dare pereć

Ḍạr re cẽṛẽkowaḱ sereń ar cereć

Joto ge noa Isoraḱ dan,

Gogo baba ar boeha joto

Tinạḱ menaḱ ko gate peṛa joto

Isor baba geye em akan.

Lili bici coṭ serma ipil

Jiṛiṕ jiṛiṕ ńeloḱ gaṅga gitil

Ńeloḱ hahaṛa Isoraḱ sirjon,

Siń re lạgit́ menae siń cando

Ńut re lạgit́ menae ńindạ cando

Marsal kin emet́ coṭ serma khon.

Coṭ sermare ńeloḱ uḍạuḱ gạḍi

Daḱ cetan latar daḱ gạḍi

Benao lạgit́ babae emen daṛe

Sukre teheń manwa cehel cepel

Dhạrti pereć teheń bud ar ạkil

Joto ge Isoraḱ dan ar daṛe.

Nijum ńindạ kãṛãṅ ńut

Arhõ reaṛ rabaṅ

Ḍigḍigạuen dhạrti puri

Ańjomoḱ sereń aṛaṅ

Sereń ate dutko lạiyet́

Seṭeren bańcaoḱ din

Bochor mucạt́ seṭerena

Rạskạ maraṅ din.

Laṅga hoṛmo manwa joto

Jạpit́ kan do ạḍi

Reaṛ rabaṅ guti koma

Meneḱ ko bathan ṭạnḍi,

Acka bathan marsalena

Gutiko botorena

Dutko lạiyet́ jisuaḱ janam

Maraṅ din seṭerena.

Purub disom gonok ponḍet

Ontor pereć ạkil

Ńel kedako acka teheń

Ḍigḍigạuḱ kan ipil,

Ponḍetko guni ńam keda

Nawa raje janamen

Dhạrti re hećen suluk

Manwako kusiyen

Joseph, mạriạm soṅge kate

Betlehem kin seṭeren

Bhạrti hoṛmo mạriạmaḱ hõ

Duṛuṕ dinge tiạḱen

Nandware jisui janamena

Meṭao lạgit́ kại rin

Rạskayenako dhạrti manwa

Seṭerena maraṅ din.

‘Manwawaḱ Bańcao’ – noa do khod reaḱ katha ar gạhirte ganḍoṅjoṅ reaḱ katha hõ kangea. Ente manwa do bon sạdhingere hõ ek do apnarte ar baṅkhan eṭaḱ hoṛ daraete abo do aema lekan tonolre tolakan se bạṛić halotre ńurakan menaḱ bona ar jaoge ona khon bańcaoḱ lạgit́ hõ bon kurumuṭuet́ kangea. Santal hoṛkoaḱ sirjạu kạhnire ńeloḱ kana – Sisijạuić (Ṭhạkur – jiu) do ạdre hasaren hoṛe benaolet́kina. Uni do tinre unkin hasaren hoṛ jiwi emakine monejoṅkan tahẽkana, unrege serma khon siń sadom ãṛgo kate unkin hoṛe lebet́ rạput́ket́kina.—- Abo do bon roṛ baṛaegea ar ńelaḱ hõ kangea, enkathae etohoṕrege bhul hoelen khan se jãhã akoṭ paṛaolen khan – mucạt́ dhạbić ona akoṭ se haron do tahẽngea. Abo Santal hoṛko jiṅgi bhor bańcaoḱ lạgit́ ḍher bon kurumuṭu ạguet́ kana. Menkhan paromen jugre se darakan jãhã hiloḱ manwa hisạbte haron kosṭo khon bańcaoakan se sạdhinakan do ceka bon hoe daṛeaḱ kana?

Noṅka gạhir hudisre paṛaolen khange arhõ disa hijuḱa etohoṕre oka bhul hoeakan—pạhil eṅga apa Pilcu haṛam ar Pilcu buḍhi tinre ạkin eskarkin tahẽkan—‘ Liṭa goṛom do unkin samaṅre upelentey solhawaḱkin tahẽkana jemon hạnḍikin dohoe ar ńũite rạskạkin sulạṅjoṅ. Liṭa goṛom do hạnḍi doho hõe cet́aḱkin tahẽkana.— Noḱõe noṅkate Santal somajre hạnḍi doho ar ńũi ạri do pạhil khonge colena ar jug cetan jug thamgạḍiena. Liṭạ goṛomaḱ noa bạṛić solha – hạnḍi pạurạ doho ar ńũi ạri do Santal somajre tinạḱ nasaoe ạguakada! Mase nit do manwa somajre jug reaḱ khaṛman (standard) lekate Santal somajre noa hạnḍi doho ar ńũi ari do aboaḱ somaj lahantire tinạḱgan goṛoanaḱ hoyoḱ kana, ona do jotoko hudisjoṅ jạruṛ kantabona. Manwawaḱ bańcao babot arhõ hudis ar dhorom sostorko ńellekhan ńeloḱa Sisirjạuić do Pilcu haṛam ar Pilcu buḍhi sirjạu kate ekal haleḍale do bae doholet́kinạ. Sirjạu reaḱ kạhnire ńelogoḱ kana Ṭhạkur jiu do manwako sãoe tahẽkana. Uni do dob ar muskil oktere hoṛe bańcaoakat́koa. Jomaḱ ar hoṛmo daĺpalaḱe kulạuakawat́koa. Ṭhạkur jiu do aćaḱ dhorom horre hoṛko ạyurko lạgit́ jaogeye kurumuṭuakat́a.

Arhõ bon ńelet́ kana. Santal somajre sapo, sạriạu, sạriaḱ, gopoṛo ar dupulạṛ pereć dohoe lạgit́ tinre dhạrtire eṭaḱ hoṛ baṅko tahẽkana un do Pilcu haṛam ar buḍhi ạkinren gidrạko boeha boeha bhitrirekin baplalet́koa. Menkhan tayomte mimit́ goṭenkin pạriskat́koa ar kajakkin baron kat́koa jemon tayom daram ar do mit́ pạrisre aloko baplaḱ. Unkin do noṅkae reaḱ motlob tahẽkan tạkina jemon Hoṛkoaḱ man manot, apnar ạidạri ar somajre dhorom pereć tahẽn. Noa ạri do Hoṛko nit hạbić kajakko manao ạguet́ kana. Tobe hẽ, adom adomko do noa ạri somajre baplaḱ lạgit́ mit́ akoṭ hisạbteko ńelet́ kana ar somoere kaṛgo hõko kaṛgo rạput́eḱ kana. Menek phaelao mon mẽt́te do bako ńelet́ kana – noa ạri Santal somajre koṛa kuṛiko sidhạ ar dhorom horre calaoko lạgit́ tinaḱ goṛoanaḱ hoyoḱ kana mente. Santal hoṛko tinre khoj – Kaman disomreko tahẽkana un do somajre sạriạu ar dhorom horte ruạṛ hijuḱ lạgit́e hohoat́ko tahẽkana. Menek hoṛko uniaḱ hoho baṅko ańjomlet́taea. Enḍeteroṅ Ṭhạkur – Jiu do eken mit́ dhoromić juri – pạri harata buru danderre oko bańcaoḱ reaḱ ạte emat́kinạ ar sanam hoṛko eae siń eae ńindạ seṅgel daḱ ar ḍubạteye goć cabaket́koa. Noṅkan kạhni do baibel puthire Nohawaḱ golpore hõ ńeloḱ kana. Ḍubạ tayomte hõ hoṛko besạdhin jiṅgi ar peṛta, bạṛić bańcao do bako ńamleda.

Sạdhin ar chuṭạ jiṇgi reaḱ aste hoṛko do mit́ disom khon ar mit́ disomteko Oṛaḱ duạrakadako, jumi jaega kate cas basko porton akada. Menkhan jaoge eṭaḱ jạtko daraeteko laga ńir ocoakana. Ar noṅkan kạhni do baibel puthire hõ Israelkoaḱ jiṅgire ńelakana. Menkhan onko do apnaraḱ dhorom ar ạkil gunạḱte dhạrtire do bańcaoko ńamet́ kana. Ar abo hoṛko do apnaraḱ lelha gunạḱte nit hõ bạṛić halotre thạli ṭarhaoakan menaḱ bona. Eden bagwanre Isor do Pilcu haṛam ar Pilcu buḍhi boge bạṛić bujhạu ńamoḱ dare reaḱ jo jome baronlet́kinạ. Menkhan unkin do Saetanaḱ ạnḍićre paṛao kate ona jokin jomket́a. Khan manwawaḱ do boge bạṛić bujhạu bud hećena, jiṅgire haron kosṭo ar gujuḱ lekan sạjại hõ bololena. Tobe Isor do manwa bae bạgi giḍilet́koa. Uni do aḍre aćge ar tayomte manwa jạtko modre Aćren nạbi ar dhorom hoṛkoaḱ mocate aćaḱ kathae lại jạhirakat́a. Aćaḱ dhorom horre manwako calaoko lạgit́ Pilcu haṛam buḍhi okote khon nit dhạiće kurumuṭu ạguet́ kana. Menkhanabo lelhako, aboaḱ ạlbudhạ, becol beonar, nisạ ńũre jạbunakan bạḍai, hiskạ,apnar ruhuṭuhu, bedhorom emanteaḱ bạṛićaḱko gobolre menaḱ bon iạte nạbikoaḱ dhorom sikhạuna ar goyon do sạbittr babon pańja daṛeaḱ kana. Aboaḱ atma bańcao lagit́ do ḍherkate thir doroḱkan menaḱbona.

Enhõ Sisirjạuić do aćaḱ ekraṛ lekate manwako kại khon, duk kosṭo khon bańcaoko ar sạri dhorom hor uduḱako lạgit́ aćren ekaput hopon Jisu Khrisṭ do noa dhạrti puriteye kolkedea. Jisu do dhạrti puriteye hećena, manwako kại khon bańcaoko lạgit́ kurusre asambheṛ kosṭo sahaokateye goć ocoyena. Abo do sạri dhorom hore uduaḱ bona, Uniaḱ goyon ar sikạuna pańjae reaḱe solhawaḱ bona jemon dhạrtire nirạite jiṅgi bon bitạu daṛeaḱ ar tayomte sermapurire sulukre bon tahẽ daṛeaḱ. Nit ado ńeloḱ kana eṭaḱ jạtrenko o apnaraḱ dhorom napaeko pańjaeda. Eden bagwanre baron dare reaḱ jo jom kate oko boge bạṛić bujhạu bud hećakan inạ ạkilge oloḱ paṛhao daraete arhõko baṛhaoeda ar ona beohar kate onko do lahanti horre mohnḍawakan menaḱkoa ar abo Santal hoṛ do cet́ bon cekaet́ kana? Ado noa Maraṅdin aboe disạ ocoet́ bona reṅgeć bạpuṛić halotre Jisu Khrisṭaḱ janam ar ạḍi duk saset sahaokate kurusre gujuḱ do dhạrtiren manwako bańcaoko lạgit́ge hoeakana. Khan Maraṅdinre eken jon ńũ do baṅ bickom bon hudisma aboaḱ bańcao do oka horre ńamoḱa? Aboko do dhạrtiteaḱ, atmateaḱ ar ar aema sentege aodhanoḱ hoyoḱ tabona. Isor do asokaete hoṛkoaḱ atma bańcao lạgit́e   dandoḱ kana. Uni doe khoj kana manwa do jemon sanam lekan bạṛićaḱ, kại ar duk kosṭo khon sahaṛakan bon tahẽn. Ar baṅkhan cet́ dhạrtiteaḱ se atmateaḱ oka bańcaoge abo lạgit́ do bạnuḱa.

Niạ dhạrti re sisirjạuić aḱ daṛe do ạḍi asambheṛgetaea. Isor do manwae sirjạuket́bona joto khon soros jiwian hisạbte. Ar uni do abo manwa ko talare thoṛa ektiạre emakat́bona. Niạ ektiạr ạḍige thoṛa ar kạṭić culuṅ gebon mendaṛekea. Niạ kạṭić culuṅ ektiạr reaḱ do bạń khondroṅjoṅa. Iń do Isorren soros sirjạu abo bebạṛić manwawaḱ kathań roṛa. Niạ jugre abo manwa koaḱ ontorre dulạṛ do baṅ ńelogoḱa bon mendaṛekea. Dulạṛ do ạḍi kạṭić katha kan re hõ niạ reaḱ ṭhại ar jostet́ do ạḍige soros ar ạḍitet́ge damangea. Dulạṛ reaḱ do jahan simạ bạnuḱa, dulạṛ do baṅ soṅoḱa. Niạ dulạṛ do cet́ kana ar niạ re cet́ menaḱa? Niạ do nit́ hạbić okoe hõ bako khondroṅ oḍoṅ daṛe akada. Dulạṛ re do Isor apnartet́ge menaea. Ar niạ dulạṛ hotete Isor aćtet́ge abo talare menaea. Isor do abo ạḍiye dulạṛet́bona aćren ekaput hopon khon hõ ḍherge. Ar ona dulạṛ reaḱ sodor bo ńel ńama jisu kurus kaṭre jiwie alaeket́re. Jisu do aboaḱ kại ko khạtir abo sanam ko bańcao ńam lạgit́e goćlena. Ar ona talate abo lạgit́ serma duạr jhićena. Ar niạ reaṅ mit́ṭen karon do jemon abo uni Jisu Mạsi bo orom daṛewae, baḍae daṛewae arbon dulạṛ daṛewae. Uniaḱ uduḱ ḍahar re taṛam kate jion bon ́am niạge uniaḱ khoj. Jisu Mạsi do aćtet́ge niạ dhạrtiren sisirjạuić hoekatet́ hõ tinạḱ bạṛić bhạg tae je niạ dhuṛi dhạrtire thoṛagan hõ ṭhại baṅ hoelen taea aćaḱ janam lạgit́ge. Nunạḱ mońj mońj oṛaḱ duạr tahẽn tuluć mit́ṭen kạṭić ṭhại baṅ milạu adea jirusalem nagraha re. Ona iạte ona mạila ar besapha gại – goṛa re ṭhại kin hatao leda Joseph ar Mạriạm do. Jisu Mạsi janamoḱ okte unit ̣hen do okoe hõ bako tahẽkana, eken jiwi raṛeć em leka eskare teṅgo akan tahẽkana Joseph do.

A ona oṛaḱ reaḱ ge mit́ seć re beṅget́ lekhan bo ńelńama je, onḍe ko tahẽkana gại – ḍaṅgra koge pạhil ko koyoḱ hor akat́ tahẽkana Jisu Mạsi dhạrti re hijuḱ reaḱ. Jisue janamen são sãote goṭa Jirusalem naṅgraha do sonotena. Jirusalem naṅgraha do sarhao ocoyena Jisu Raje janamen iạte. Ar noṅkate nạbi ko hotete roṛlen katha sạriaḱ ena baṅ ma “ Noako joto do hoeakana jemon nạbi mocate Probhui roṛlet́aḱ purạuḱ, oneye menlet́, ńelpe kũạ̃riyić doe bhạrti hoṛmoḱa, ar mit́ṭen koṛa gidrạe janamea, Ar uniaḱ ńutum do Immanuel ko dohoetaea” (Mathae 1: 23 kạli).

Jisu Mạsiaḱ niạ rạskạ janam sombat do ańjom kate aboaḱ ontor do uni lạgit́ jhić ae jạruṛ tabona, Uni do aboaḱ ontor re heć kateye bosotoḱa. Ona iạte aboaḱ ontor do tear jạruṛa Jisue tahẽ daṛeaḱ ṭhại leka sostore meneda “ Ote mit́ṭen hoḱhoić reaḱ aṛaṅ; Hãhãkarre Probhu reaḱ hor tear kataepe; khaṅkarre aboren Isor lạgit́ mit́ṭenḍahar mit́ saope” ( Jesaya 40: 3 kạli). Aboren Jisu do ạḍi reṅgeć dosare gại – goṛa nandawarey janamlena, ar hõ ạḍi haron selet́ kurus kaṭ re jiwiye alaeket́a. Uni doe baḍae kan tahẽkana nonkatege gujuḱ hoyoḱ taea. Jisuaḱ gujuḱ okte uni do thoṛae jirạuḱa onkan ṭhại hõ bạnuḱ taea cet́ leka aće janamen leka. Haire Israyel jạtko jihudi jạtko tinạḱ ko chaṭchaṭoḱ kan tahẽna Jisuaḱ jiwi hatao lạgit́. Uni do sanam haron kosṭo sahao kate gujuḱe sikạrena. Uni do abo kại khon bańcaobon lạgit́e goćena ente uni do dhạrtiren hoṛ koaḱ mon pherao lạgit́e hećlena. Uni do abo sanamkoe dulạṛet́ bona. Nit Jisu Mạsiaḱ niạ janam din re dela abo do apnaraḱ ontorre bo ṭhạiae ma; jemon kại khon bańcaobon ńamma.

Lạkạ cetan celakoma

Ạḍi ãṭ ko botoren

Thoṛa ghạṛi tayom khange

Jisu Mạsie seṭeren.

E guru bańcao bonme

Celako menlet́

Jisu tiye tulket́

Sokojoḱ ḍheoko bhagaoket́.

Jerusalem naṅgrahare

Soetan jisue biḍạudi

Ona biḍạure jisu do

Soetane bhagao kedi.

Kại manwako bańcao lạgit́

Jisu jiwie emket́

Pe din tayom Jisu Mạsi

Gujuḱe bhagaoket́.

Jisu Mạsiaḱ dosar hijuḱ

Joto manwa bon disạema,

Ona khạtir apan – ạpin

Kại kobon bhagao ma.

Iń Bebenaoić do jotoaḱge;

Ṭhosoḱ mõńj sirjontae sanam sećre.

Coṭ phaelaore ńelkom ma ipilko,

Ah! Dulạṛet́ko mẽt́kintabon.

Adomko huḍiń, adomko hapṛaḱ

Ar kạṭić kạṭićko cumkạḱ cumkaḱ.

Tinạḱ mõńj hõko liplipạuḱ kan,

Gidrại thiroḱ kan onko ńelte ma.

Jhalkaoḱ siń cando ma ńeleme se

Cet́ m̃ońj ho gol-sona cakta leka.

Ńindạ cando do ńindạ lạgit́ge,

Hẽ, hoṛko rạskại dulako kana.

Hisit́ hisit́ hoye hoe ocoyet́

Ar hoṛmotabone juḍasiyet́;

Ńũi daḱ hõ coṅ mõńjge rilạmala,

Sapha ar sebelgey imạń kana.

Jomaḱ ńũaḱ isin aroe lạgit́

Seṅgel benao hõe cet́abon kana.

Ar hoṛo eman casbas lạgit́

Bud ar akel doe emabon kana.

Em akawadińae soros mẽt́kin.

Ar mẽt́ pipnikin, bạń cubạgoḱa;

Em akawadińae mũ ar luturkin,

Alaṅ hõe emdińteń roṛet́a.

Tikin ar jaṅgakin, hoṛmo ińaḱ

E benaoket́te iń ạsul daṛeaḱ.

E gidrạko Isor joharaepe;

Uniaḱ mạhima sabasipe.

Teheń do goṭa dhạrtire Isại dhoromren boeha-miserako Penṭekosṭ mãhã menteko manao-ganaoeda. Dhorom reaḱ pạtiạu lekate teheń khon aema aema bochor lahare din reaḱ e̠tohoṕ hoelena. Jihudi ko do Senparom porob khon 50 mãhã tayom noa penṭekosṭ mãhã porob reko jarwa midoḱ kan tahẽkana. Tayomte ńel akana-

1. Hapta reaḱ pạhil dinge tahẽkana;
2. Khet baṛge khon phosol rakaṕ porob hõ ko manaoet́ tahẽkana;
3. Pạhil khet baṛge khon phosol rakaṕ dinge

Jisu mạsi sermate rakaṕen tayom 50 (mõṛe gel) din tayom ekraṛ akat́ lekage sonot jiu doe aṛgolena aćren cela ar pạtiạrko ṭhen. Isor Baba do teheń din re jihudiko sãote sinại burure goḱlet́ reaḱ jopoṛao jisu hotete nãwã aroleda. Sonot Baibel re nonka ol akan, “Unre aćkage serma khon tạpis hoe reaḱ hud hud saḍe lẹka mit́ṭaṅ saḍe hećena ar onko okareko tahẽkan ona oṛaḱ do̠ saḍete perećena. Ar celakoko ńelkeda seṅgel reaḱ alaṅ leka cet́ coṅ hạṭińoḱ kana ar onako do hoṛo hoṛo aṕat́koa. Onate onko jotoge sonot Jiuteko perećena ar uni Jiue danat́ko daṛe leka eṭaḱ eṭaḱ pạrsite roroṛko ehoṕena”. Isại dhorom renko baḍaya teheń dinge manḍer bandhao lena. Jisuren cela Patrasaḱ porcarte 3000 hoṛko pạtiạulena ar noa kangea pạhil manḍer hõ. 

1. Pạhilre̠ iń do̠ apeko tuṛi jaṅ reaḱ ce̠tʹ bhageaḱtet́ me̠naḱa ona re̠aḱ tho̠ṛań lại abona: A) Tuṛijaṅ khoć abo do̠ Sunum, proṭin, ̣ḍaṅgra koaḱ jo̠m lạgitʹ khoil, daka utu lạgit́ sahan arhõ ran te̠yar lạgit́ hõ niạ do̠ kạmi re̠ko lagaoa; He̠nde̠ se̠ araḱ tuṛi re̠aḱ sunum do̠ mãnda, haso aema rokom bat re̠aḱ ar je̠l haso re̠ko lagaoa. Niạ chaḍa hõ ar araḱ kore̠. Niạ chaḍa Bilạt diso̠m re̠naḱ sasaṅ tuṛi ko hõ aema kạmi re̠ko lagaoe̠da.

Arhõ Markin Jukto rasṭro̠, Europiyo̠ Unio̠n, Amerika ar Kanaḍa re̠do̠ no̠a tuṛi sunum jo̠m do̠ bond gea. Ce̠daḱ je̠ noa re̠do̠ Urik esiḍ karo̠nte̠. Me̠nkhan ho̠ṛmo̠ barhe̠re̠ o̠jo̠ḱ se̠ lagao do̠ baṅ bo̠nda.

Tuṛi dare̠ do̠ tinạḱ lạṭuḱa se̠ tinạḱ lạṭu haraḱa ? Abo do̠ aema hoṛ gebo̠n baḍaea ar hõ aema ho̠ṛge babon baḍaea ṭhik se̠ baṅ ? Niạ do̠ aema maraṅ haraḱa 6 feet khon 20 feet usuloḱa. Ar abo judibon ńe̠l Baṅgladiso̠m re̠do̠ 2 feet kho̠n 6 feet usuloḱa. Niạ do dhe̠r kaite̠ mo̠ddho̠-prajco̠, Afrika ar Amerika re̠naḱ tho̠ṛa jaegare̠ ho̠yo̠ḱa. To̠be̠ jo̠to̠ khon do̠ maraṅ usuloḱa Israe̠l diso̠mre̠ ar noa do̠ re̠aṛ okte̠ mońjge ho̠yo̠ḱa.

Baṅgladiso̠mre̠n Tuṛi jaṅ eroḱić mạlik

Ce̠daḱ Iso̠raḱ se̠rma jio̠n do̠ tuṛi jaṅ so̠ṅge̠ ko juri akada ? Karo̠n se̠rma jio̠n do̠ tuṛi jaṅ leka gea o̠ka do̠ mit́ṭe̠n ho̠ṛ khe̠t rey chiṭạu le̠da. No̠a do̠ sanam jaṅ khonaḱ kạṭić gea, ar taeno̠mte̠ noa do̠ aema maraṅ haraḱa. Ar No̠a do̠ mit́ṭe̠n maraṅ utạr gajaṛ te̠aroḱa ar se̠rma re̠n cẽṛẽko he̠ć kate̠ tuṛi ḍạr kore̠ tukạko be̠nao̠ jo̠ṅa.” Probhu Jisu Khrisṭo do̠ phe̠n katha talate̠ ho̠ṛko ṭhe̠n noako sanam kathae ro̠ṛle̠da.

Bible̠re̠ tuṛi jaṅ re̠aḱ jo̠ste̠t́ do̠ ce̠tʹ kana ? No̠a katha re̠aḱ jo̠ste̠t́ do̠ ho̠yo̠ḱ kana Jirạuḱ se̠ o̠ṛaḱ ar noa do̠ menaḱa Mathae 13: 31-32 Mark 4: 32 paṛhao lekhan bon ar hõ bon baḍae daṛeaḱa. Probhu Jisu dọ ãṭ ate̠ tuṛi dare re̠naḱ pe̠a Onoporom (boisisṭoi) saṕ rakaṕn akada:

1. Tuṛi jaṅ do̠ jo̠to̠ khon kạṭić gea.
2. Dare̠ soṅge̠ cẽṛẽ koaḱ gate̠ ar 3. Usạra hara rakaboḱa.

O̠ko̠e̠ kodo̠ pro̠bhuaḱ bagwanrez ro̠ho̠e me̠naḱkoa onko do̠ Iso̠raḱ racare̠ ko hara rakaṕa. Sereńko 92:13

Mo̠ńj dare̠ re̠do̠ bạṛ̣ić jo̠ ar bạṛić daṛe̠ re̠do̠ mońj jo̠ baṅ joḱa. Mathae 7:18

Aema ho̠ṛ ḍahar ce̠tan re̠ akoaḱ kicrićko ko aṭe̠t́ke̠t́ takoa. Ar E̠̣ṭaḱ ko do̠ daṛe re̠aḱ ḍạr ge̠t́ katet́ ḍahar ce̠tan re̠ko aṭe̠t́ ke̠da. Mathae 21:8

Tuṛi jaṅ do̠ tahẽkana jo̠to̠ jaṅ kho̠n huḍíń jaṅ, me̠nkhan noa do̠ harale̠n khan do̠ joto aṛaḱ sakamko khon napṛaḱ ge hoyoḱa. Noa do̠ Markaḱ te̠sar galmarao ar phe̠n kathare̠ menaḱa, Jisu do̠ aboe̠ ce̠t́ akat́ bo̠na je̠ Iso̠raḱ  se̠rma jio̠n do̠ kạṭić ge tahẽkana, Jisu ar Aćre̠n ce̠lako ṭhe̠n, ar no̠a do̠ Aćre̠n tho̠ṛagan ce̠lako ho̠te̠te̠ go̠ṭa Dhạrti pasnao̠e̠na. Mark 4:30-32

Tuṛi jaṅ re̠aḱ katha do̠ ce̠t́ kana ? Haoard Marsale̠ o̠l akada je̠ no̠a do̠ rupo̠k kạhni kana “kạṭić kạṭić khon e̠ho̠ṕkate̠ go̠ṭa dhạrtire̠ aema maraṅte̠ Iso̠raḱ se̠rma jio̠n pasnao̠ re̠aḱ so̠po̠lho̠e̠ e̠moḱ kana.” Ar no̠a kodo̠ Mathae, Mark, Luke re̠ bon ńam daṛe̠aḱa.

Tuṛi jaṅ re̠aḱ  phe̠nte̠t́ do̠ ce̠t́ kana ?

Tuṛi jaṅ re̠aḱ́  phe̠n do̠ ho̠yo̠ḱ kana Isoraḱ rajo̠sṭi re̠aḱ mit́ṭe̠n kạhni. Ho̠r do̠, Isor re̠n kolić (protinidhi) hisạbte̠ kạmiạ ar Tuṛi jaṅ do̠ Iso̠raḱ katha kana. O̠ka le̠ka mit́ ṭe̠n e̠r akat́  Tuṛi jaṅ hara rakaṕa, ona le̠kage Iso̠raḱ  katha kohõ  mit́ṭe̠n ho̠ṛaḱ  mon bhitrire̠ omonoḱa ar hara rakabo̠ḱa. Tho̠ṛa tuṛi jaṅ horre̠ ńurhạ le̠na ar cẽṛẽko ona do̠ko jo̠mle̠da. Ar cẽṛẽko do̠ soetanaḱ ko kạmia (protinidhia).

Bible do̠Tuṛi jaṅ re̠aḱ (somporke) ce̠t́e̠ me̠ne̠da ?

Ar o̠ko̠e do̠ mo̠ńj hasare̠y e̠r ocole̠na unige̠ uni ho̠ṛ do̠, o̠ko̠e do̠ katha ańjo̠m kate̠ onae̠ bujhạua. Uni do̠ pe-ge̠l, turui-ge̠l se̠ mit́-sae gun pho̠lo̠ne̠ hoe ocole̠da. Jisu do̠ o̠ka phe̠nte̠ abo do̠e ce̠t́at́ bon tahẽkana je̠ Iso̠raḱ se̠rma jio̠n do̠ e̠ṭ̣aḱ sanamaḱ khon damanaḱ kana ? Ar Jisu do̠ no̠a biso̠ete̠ me̠nle̠da o̠ko̠eaḱ lutur me̠naḱ uni do̠e ańjo̠mma. Mathae 13: 45-46

Ona iạte̠ abo do̠ pạtiạrre̠ Tuṛi jaṅ le̠ka ke̠ṭeć bon tahẽn ma e̠nte̠ soetan do̠ cẽṛẽko le̠ka heć kate aboaḱ mon kodo̠ e̠ṭaḱ seće idie tabona.

Abore̠n Probhu Jisu Mạsiaḱ daya ar Iso̠raḱ dulạṛ ar so̠no̠t Jiu re̠aḱ he̠lme̠l ape̠ jo̠to̠ko tuluć baṛe̠ tahẽnma. Amen.

Te̠he̠ń do̠ 2021 se̠rma re̠aḱ January cando muca̠t́ din ar Robibar kana. Ińaḱ khaṭo̠ hudis te̠ ho̠po̠n o̠laḱ iń sapṛao̠ akada. As iń do̠ho̠e̠da ape̠ jo̠to̠ko no̠a bhage so̠mbad paṛhao̠ kate̠t́ ae̠ma bhạlại ho̠yo̠ḱ tape̠a me̠nte̠ń asjo̠ṅ kana.

Jãhãe no̠nkan ho̠ṛ me̠naḱ ko̠a je̠, ińe̠ jo̠to̠nediń…? Am jo̠kho̠n aṭe̠t́ re̠m jaṛao̠ ko̠ḱ̠a, un o̠kte̠ ce̠t́ am no̠nkan kuklim do̠ho̠ e̠da? No̠nḍe̠ am lạgit́ bhage so̠mbad me̠naḱa. Iso̠r do̠ ame̠ sirjạu ke̠t́ me̠a, amaḱ bạṛti jạruṛ do̠ ce̠t́ o̠nam ganḍo̠no̠ḱ do̠m baḍae̠ gea. Isor re̠n mit́ guti do̠ Iso̠r ṭhe̠n aćaḱ kathakoe̠ so̠do̠r e̠da;

E̠ PROBHU, dunḍhạu akadińam, are̠m baḍae̠ akadińa. Am do̠ ińaḱ duṛuṕ ar ińaḱ te̠ṅgone̠m baḍae̠gea; Ińaḱ hudis do̠ sạṅgiń khon ge̠m bujhạue̠t́ kana. Ińaḱ hijuḱ se̠no̠ḱ ar ińaḱ gitić jo̠ṅe̠m biḍạue̠t́ tińa. Ar ińaḱ sanam ho̠rkom baḍae̠akat́ tińa. Ińaḱ alaṅre̠ mit́ katha hõ bạnuḱ anaṅ. Ar ńe̠lme̠, E̠ PROBHU, am ma co̠ṅ mit́ ke̠ mit́ e̠m baḍae̠ akat́! Laha ar tayo̠m se̠ć kho̠ne̠m e̠se̠t́ ạcurakadińa; At tiye̠m capo akawadińa. O̠na bujhạu o̠ro̠m iń le̠k do̠ ạḍi hahaṛagea; Usulgea, o̠ho̠ń tio̠ḱ daṛe̠le̠a. (Se̠re̠ńko 139:1-6)

Jisu Mạsi tinre̠ dha̠rti re̠ye̠ tahẹ̃kan unre̠ no̠a go̠lpo̠ doe̠ lạile̠da;

Ape̠ mo̠dre̠ jãhãe̠re̠n mit́ sae̠ bhiḍiko tahẽntae̠ ar o̠nko mo̠dre̠ mit́ go̠ṭe̠ne̠ at́ le̠re̠, o̠nko are̠ ge̠l are̠ do̠ hahaṅkarre̠ bạgi o̠ṭo̠kate̠, uni at́ić bae̠ pańjaye̠a ạuriye̠ ńame̠ hạbić? Are̠ ńamle̠re̠ aćaḱ tare̠nre̠ye̠ ladeye̠a rạskạkate̠ ar o̠ṛaḱ te̠ he̠ć kate̠ aćre̠n gate̠ pe̠ṛako ar aḍe̠pase̠re̠n ko ho̠ho̠ jarwakate̠ye̠ me̠takoa, Iń  tuluć rạskạḱpe̠, e̠nte̠ at́le̠n bhiḍi do̠ń ńam ke̠de̠ tińa. Me̠tape̠kanań onkage mo̠n ạcur jạruṛ bạnuḱ tako are̠ ge̠l are̠ dho̠ro̠m ho̠ṛko kho̠n do̠ mo̠ne̠ ạcur mit́ ṭe̠n kại ho̠ṛ iạte̠ se̠rmare̠ bạṛti rạskạ ho̠yo̠ḱa. (Luke 15-7)

No̠nḍe̠ khon abo lạgit́ sikhnạt do̠ ho̠yo̠ḱ kana je̠, abo jo̠to̠ko ge Isor ṭhe̠n do̠ ạḍi ge bon damana. Nonḍe do̠ abore̠n bhage gupiyić doe̠ ho̠yo̠ḱ kana Isor. Abo mo̠dre̠n jãhãe̠ mit́ ho̠ṛe̠ at́ le̠nre̠ Isor do̠ye̠ baḍae̠ daṛe̠aḱa.

Dulạṛiạ boe̠ha/mise̠rako; niạ katha mo̠nre̠ re̠be̠d do̠ho̠e̠ me̠, am do̠ e̠ke̠n haspatal re̠ gitić akan ruạḱ ho̠ṛ do̠m baṅ kana. Isor do̠ aćre̠n jo̠to̠ gidrạ koaḱ ńutume̠ baḍae̠a are̠ jo̠to̠n koa.

Isor abo jo̠to̠koe̠ go̠ṛo̠ are̠ bhor abon ma. AMEN!

Calao̠e̠n 2020 se̠rma re̠aḱ December cando re̠ sodore̠na Church of the Nazarene Int. reaḱ Santali ar eṭaḱ sereńko mit́kate Nazarene Saṅgit puthi. Rev. Soilence Marandi ar Mr. Milon Patowaryaḱ kurumuṭute pạhil dom le̠ka santali sereń chapa onḍoḱ hoe akana. Eṭaḱ eṭaḱ santali sereń puthi khon sereńko tumạl ar nãwã aema sereń hõ juṭuć menaḱa. Dhorom dewa-sewa re̠ noa puthi dobon laṛcaṛ daṛeaḱa. Rev. Soilence Marandiye menakada, Church of the Nazaren Int. re aema santal hopon ko menaḱbona, menkhan santal pạrsite sereń puthi baṅ tahẽkante Church mukhiạkoaḱ goṛo ar kurumuṭute̠ 335 goṭen Santal sereń, 33 goṭen Sadri pạrsite̠ sereń, 105 goten Baṅgla Pạrsi 8 goṭen Hindi pạrsi, 5 goṭen Garo ar 29 goṭen English mit́kate chapa onḍokena noa sereń puthi.