Dạvid Goliat khone jitạu hećenre, maejiuko doko õṛhẽ daramkedea; Sạul do aćren hajarkoe ńet́ket́koa, ar Dạvid do aćren ojutkoge. Ona iạte Sạul reaḱ mẽt́ do Dạvid upạrte jolentaea, ar jivet́ janam uniren bạiriye hoyena. Bar dhaote aćaḱ borlome sohoradea bhitre soboḱ jaladea mente, Dạvid teṅgokate binạ banam banamaekan tahẽkan jokheć. Ona teṛoṅ Dạvid do dạṛ ar hanḍe nahnḍe ńir baṛae hoyentaea.

Mit́din David mit́ṭen danderre hećkateye boloyena, ar Sạul hõ inạreye boloyena jirạuḱ lạgit́. Dạvid do Probhuren ojoḱićre ti calao sana baṅ tahẽkantaea, eken sen sorkate uniaḱ oyon aṅgrop reaḱ ańcare get́ kuṭrạket́taea. Sạul dander khone oḍok calaoen khan, Dạvid hõ oḍokkate hohoadete ona kuṭrại uduḱadea; Khange Sạul raḱateye menket́a, Aben do siń do ạlin khonben bogegea; ente aben do bạṛićaḱ bogeaḱteben halayet́a. Ado Sạul aćaḱ oṛaḱteye calaoena. Enre hõ arhõe oḍok calaoena Dạvid sendraye lạgit́. Sạul ar uniren hoṛko jạpit́ akat́re, Dạvid do uniaḱ gitić ṭhạ̃i ṭhen senkate uniaḱ borlom ar daḱ cukạḱe ạtkirket́taea. Sạule ńelket́ khan Dạvid ar mit́ dhao jiviye ikạket́taea, hohoateye metadea, Ma ruạṛben, jãwãe beṭa ado bạliń bạṛićbena. Menkhan Dạvid do Philisṭiko reaḱ disomte senkate onḍeye tahẽyena Sạul ạuriye gujuḱ dhạbić.

Onakate Philisṭiko tuluć Isrạyel hoponko reaḱ maraṅ lạṛhại hoyentakoa. Sạul do ona lạṛhạireye ghạl ocoyena, ar Jonathon doe gurena. Khange Sạul aćren khanḍa gogoḱiće metadea, Ma tarwaṛete soboḱ gojeńme menkhan uni do Probhuren ojoḱićre ti lagao bae dillet́te, Sạul aćtege tarwaṛere bindạṛ bhosayenteye goćena. Dạvid do Sạul ar Jonathan ńutumte mit́ṭaṅ ạḍi jut homor sereńe joṛaoket́a (1 Sạmuel 18-31; 2 Sạmuel 1).

Arhõ Philisṭiko tuluć Isrạyel hoponko reaḱ lạṛhại hoyena. Philisṭiko modre Goliat ńutuman mit́ṭaṅ maraṅ okoć birbão hoṛ do 40 siń palṭon ḍera khon sen lahakate Isrạyel hopone henostayet́ko tahẽkana, onko modre okoe hõ uni tuluć lạṛhại dil baṅ tahẽkantakote. Khange Dạvid palṭon ḍerate hećkate onae baḍae ńamket́te uni tuluć lạṛhạiye khaṛayena. Menkhan Sạul do tạkićkedeteye metadea, Am do bạbu, eken chonḍro hoṛ, ar uni do koṛa khon lạṛhại hitạu hoṛ. Dạvide roṛ ruạṛadea, Mit́din ạpuńren bhiḍi meromkoń gupire, mit́ṭaṅ dhạcrikul ar mit́ṭaṅ bana hećkate mit́ṭeć bhiḍi hoponkin ạtkiredekan tahẽkana; menkhan iń do ńir senkate goćket́kinte bhiḍi hopon iń bańcaokedea. Dhạcri kul ar bana khone bańcaokidiń Probhu, uni do nui Philisṭi hoṛ khon hõe bańcaoińa. Sạule metadea, Ma bạbu, calaḱme, ar Probhuge am tuluće tahena.

Khange Dạvid aćaḱ ṭheṅga ar ginḍuạr ar soḍoḱ khon 5 goṭeć dhiriante Goliat ṭhene sen sorena. Uni doe hoho daramae kana, Baṅ doń seta kante ya, onate ṭheṅgawantem hijuḱ kana? Dạvide roṛ ruạṛadea, Am do tarwaṛe ar borlomante iń upạrtem hijuḱ kana; menkhan iń do phạdkoren Probhu ńutumte am upạrteń calaḱ kana. Khange ginḍuạrre dhiri sajaokate uni birbão hoṛ cạndiregeye capat́ bit́ got́kadea, ar ńir senkate uni Philisṭi hoṛ reaḱ tarwaṛe boćkate bohoḱe bhuṅgrạuket́taea. Onkate Dạvid do goṭa disom palṭon ren maraṅ sordare hoyena, ar tayomte Sạul do hoponerate goṅadea. Ar Sạulren hopon Jonathon do aćaḱ jivi leka Dạvide dulạṛede tahẽkana.(1 Sạmuel 17.)

Sạul do ạḍiye dhidrika, ar bạiriko bạṛiće bhagaokoa; menkhan aćaḱ monsubạ leka calaḱ sana hoyentaete Probhu reaḱ ạne nẽhõtet́ tahẽkantaea. Ona iạte Sạmuele metadea, Amaḱ raj do baṅ tahena; ente Probhu do aćaḱ mon kusi leka mit́ṭaṅ hoṛe bachao akawan aćren hoṛko cetanre raj hoyoḱ lạgit́. Probhu do Sạmuele metadea, Am do amaḱ dereń ṭhoṅga sunumte perećkate Bethlehemte senoḱte Jisạiren cundạḱ utạrić hopon Dạvid ojogeme Sạul tayom raj hoyoḱ lạgit́.

Ado Sạmuel senkate Dạvide ojoḱ rajkedea, ar en hiloḱ khon Probhuren Jiu do Dạvide dećadea. Menkhan Probhuren Jiu do Sạul khone sahaṛena, ar Probhu khon mit́ṭaṅ bạṛić jiu ạḍiy torasede  tahẽkana. Uniren gutiko do Dạvidko ạgukedea; ente uni do binạ baḱnam ạḍi gạkhuṛe tahẽkana. Uni bạṛić jiu Sạule dećae jokheć, Dạvid do binạ baname banamte Sạule sulsulṭagoḱa, ar uni bạṛić jiu doe bạgiaea.(1 Sạmuel 11-16)                                                                             

Isrạyel hoponko do Arabiạ disom reaḱ hãhãkarteko boloyena. Jom nũiaḱ cabayentakoteko awaṭapayena, ar Mose upạrte karać kurućkate Misor disom reaḱ jel celaṅko hirohiat́a. Mose do dhiri cạṭạni ṭhen gate dalket́te daḱ bhulkạu tot́ena; ar jomaḱ lạgit́ do Probhu coṭ khon mannae ńũrat́koa; ona do din hiloḱ setaḱre rataṅ leka goṭa ṭạnḍi otre menaḱa, ar siń candoe rakaṕ jokheć galaoḱa.

Misor disom khon oḍoḱkate tesar cando Isrạyel hoponko do Sinại buru pheḍreko ḍerayena, Onkate 3 mãhã khonge doloṕ doloṕ rimilte goṭa buru ḍabaoket́te, ar sakwa reaḱ saḍe leka ańjomena. Khange Probhu burureye ãṛgoyente, burutet́ daldalaoena, ar hoṛko do bạṛićgeko thartharaoena. Khange Probhu onko joto hoṛ galmaraoat́koteye metat́koa:-

Ińge Probhu amren Isor, Misor disom khon golam oṛaḱ khon oneń oḍok ạguket́me:-

1. Iń samaṅre eṭaḱ Isorko aloko tahẽntam ma.
2. Goṛhon muṭhạn se jãhãn ḍhob alom benaojoṅa; baṅ do coṭ sermarenko reaḱ, baṅ do latar ot renko reaḱ, baṅ do o t latar daḱrenko reaḱ. Onako do alom ḍoboḱaḱa ar alom sewawaḱa; ente in Probhu amren Isor do ạḍi ãṭ Isorge, apatko reaḱ ghạṭ hoponko ṭhen pe pon piṛhi dhạbić oneń pańja halayet́teko, onko kurudạńko do; menkhan dulạṛińko ar ińaḱ hukumko dohoeko do hajar piṛhi dhạbić iń dayawako kan.
3. Probhu amren Isor reaḱ ńutum ạuṛi pạthạuṛi do alom ńumtaea; ente Probhu aćaḱ ńutum ạuṛi pạthạuṛiye ńumtae hoṛ do bae bindosea.
4. Jirạuḱ mãhã disạime, jemon onam sonot; turui mãhãm khaṭaoḱa ar amaḱko jotom kạmia; menkhan eae mãhã hiloḱ do Probhu amren Isor ńutumte mit́ṭeć jirạuḱ din; unre okaṭaḱ hõ alom kạmia, baṅ do gutitam, baṅ do kạmṛĩtam, baṅ do mĩhũ meromtam, baṅ do amaḱ phaṭok duạr bhitri seć tahen am ṭhen bidisiạić. Ente turui mãhãre Probhu do ot serma jalapuri ar onakore joto menaḱe benaolaḱa, ar eae mãhã hiloḱre doe jirạuena; ona iạte Probhu jirạuḱ mãhãe bhorat́ are sonotkat́a.
5. Eṅgam ạpum ganaokinme, jemon Probhu amre Isore emam disomre amaḱ ḍinkoge ḍher hoyoḱtam.
6. Alom khũna.
7. Alom laṭghaṭa.
8. Alom kombṛoea.
9. Am pheḍren hoṛ reaṅ eṛe goha alom ema.
10. Am pheḍren hoṛ reaḱ oṛaḱ duạr alom laloca; am pheḍren hoṛren maejiu, se kạmṛĩ, se ḍaṅgra, se am pheḍren hoṛ reaḱ jãhãnaḱge alom laloca. (Exod.16-20)

Onakate Mose do Isor reaḱ hukumte sewa dewa reaḱe ạn ạriket́a. Aron doe maraṅ naekekedea, ar uni tayom uniren maraṅ hopon maraṅ naeke giriye ńama, ar onka leka piṛhi cetan piṛhi uni bõsren maraṅ hoponko ńam idia. Aronren dosra hoponko doko naekeyena, ar Leviren dosra bõsko do naekekoren saṕdaṕkoko hoyena. Maraṅ okoć mit́ṭeć tạmbuko beret́ket́a, ona reaḱ bar hạṭiń tahẽkana, metaḱme sonotaḱ ar sonot utạraḱ. Sonot utạraḱre do leg-sundukko metaḱ sonate ạńuaḱ mit́ṭeć sunduk tahẽkana, ar mit́ṭeć manna ṭukuć. Ona sonot utạraḱre do eken maraṅ naekeye bolo daṛeaḱa, ar uni hõ serma serma eken mit́ dhao. Sonotaḱ do naekeko lạgit́ tahẽkana. Tạmbu beṛhaete do mit́ṭeć bakher raca tahẽkana. Ona do mõṛẽ hoṛko lạgit́, Hapta reaḱ eae mãhã hiloḱtet́ do jirạuḱ lạgit́.

Chapainawabgonj jilạ reaḱ Amnura Mission re rạskạ salaḱ manaoena paska porob. Paska porob do isại dhorom hoṛkoaḱ dosar maraṅ porob kana. Robibar hiloḱ (05 April) setaḱ 7:00 baja okte paska porob se jisu Mạsi aḱ jiwet́ beredoḱ ńutumte girjạ do hoe purạuena. Noa girjạ doko bondobosleda Bangladesh Northern Evangelical Lutheran Church (BNELC) ar Amnura Lutheren Mission.

Paska porob girjạe ạḱyurkeda BNELC Rajshahi circle pasṭor Rev.Rajen Soren, Manḍer pasṭor Sonaton Soren ar sãote goṛo gopoṛore tahẽkana Amnura Lutheren Mission manḍer ạyurić Dhavid Dhonae Hembrom.

Rạskạ paska porob girjạre Amnura Manḍer ar ona aḍepase ṭoṭha (Mirjapur, Jolahar, Sakoṭola, Phạgupaṛa, Jhinakhor) khon heć seṭerakan amdaj 400 cetan isại boeha miserako selet́lena. Girjạ mucạt́re joto hoṛ rạskạ paska porob ńutumteko eneć sereńkeda. Amnura Lutheren Mission girjạ komiṭi ren sodosso ar Utarbongo Adivasi Forum ren totho ar procar sompadok Prodip Hembrom doe baḍae ocokeda, Amnura Lutheren Mission do noa jilạ reaḱ ạḍi sedae reaḱ isại ạri-cạli koaḱ dhorom ṭhaõna kana.

Nonḍe do jao Robibar ar eṭaḱ eṭaḱ din hõ girjạ seko dewa sewaeda. Teheńaḱ dinre goṭa dhạrtire suluk nirại ar bańcao ńam lạgit́ koejoṅ hoyena. Amnura Mission jubo songho ren sabha mukhiạ Jeheskel Murmu hõe lại sodorkeda, rạskạ paska porob manaoen ńutumte ạḍi rạskạń ạikạueda. Amnura Mission jubo songho ren sompadok John Hembrom hõe lại sodorkeda, teheńaḱ bises din do calao paromen dinko lekage manaoena.

Probhu Jisu Mạsi do pe din tayom gujuḱ khone jiwet́ beret́ena ar sermateye rakaṕena. Ona ńutumte paska porob se Jisu Mạsi aḱ jiwet́ beredoḱ din manaoena. Bhage sombat Mathaeye ol akat leka 28:6 hạṭińre ol akana – “Nonḍe do bạnugićan, ente aće menlet́ lekae jiwet́ beret́ena; dela uniye gitićlen ṭhạ̃i ńelben.”

Teheń do dhạrtiren sanam kristan boeha miserako lạgit́ mit́ṭen ạḍi manotanaḱ din se mãhã Bhage sukulbar kana. Teheń do noa dhạrtiren Babańcaoić jisu mạsiaḱ gujuḱ din kana uni do  sanam manwa koaḱ kạiko ńutumte kalbheri kurus kaṭre aćaḱ jiwiye alae keda jemon ona sećte sanam manwako do akoaḱ kạiko khonak jemon bańcaoko ńam arko sadhinoḱ. Teheń goṭa dḥrtire apan ạpiun ṭhạ̃i jaega kore kristan hoṛ kodo Upạs koejoṅ selet́ uniaḱ noa gujuḱ se puruchun kạmiko disạyet́ taea, probhu mạsi do jemon goṭa dhạrtiren sanam jạtrenko apan ạpin suluke emako ma ar onkate sanam manwa kore aćaḱ noa harkhet ar gujuḱ hotete suluke danako ma.

Mose ar Aron Pharao ṭhen senkatekin metadea, Nonkage Jehowa, Isrạyelkoren Isorgeye menet́a, Ińren porjako sen ocoakom. Pharaoe roṛ ruạṛat́kina Jehowa doe cele kante uniaḱ aṛaṅ doń ańjomtaea; Jehowa do bạń baḍaea, ar Isrạyelko hõ bạń sen ocoakoa. Khange Mose Pharao samaṅre Isore cet́adeye nisṭạnket́a; menkhan Pharao do aćaḱ mone keṭećket́taete Isrạyel hoṛ bae aṛaḱlet́koa.Khange Isor Moseye metadea. Am do amaḱ ṭheṅga Nil gaḍa seć tultam. Moseye onkaket́ khan, Nil gaḍa reaḱ daḱ do mãyãmena. Pharao ona hõ bae bataolet́te, Isor do 9 goṭeć duk Misor disom cetanreye kolket́a.Irạlaḱ duk do pohokoge goṭa Misor disomre upi leka ãṛgoyente phosolko urạn cabaket́a; ar areaḱ duk do 3 mãhã kaṛaṅ kaṛaṅe ńutket́a; menkhan Gosen disomre do poho hõ bako ãṛgolena, ar marsalge tahẽyena.

Khange Probhu Moseye hukumadea, am do Isrạyelren gidrạ metakom, Teheń ńindạ do oṛaḱ oṛaḱ mimit́ goṭeć bhiḍi hopon goćkate mãyãmtet́ do duạr reaḱ cạukaṭre jot́kaḱpe; bhiḍi hopon do rapaḱkate bin tạṛianaḱ piṭhạ ar haṛhat́ aṛaḱ tuluć jomepe, paṭhe keṭeć, kharpa horok, ar ṭheṅga saṕkate. Onkage Probhu do Sen parom porobe sorwaket́a.

Tala ńindạ jokheć Probhu do Misor disomren joto pạhil janamkoe ńet́ket́koa, Pharaoren pạhil janamić khon kạd oṛaḱre tahẽkan kạidi hoṛren pạhil janamić dhạbić, ar janwarkoren joto pạhlạuṭakoge; menkhan Isrạyel hoṛko reaḱ oṛaḱre mãyãm ńelket́teye sen paromena. Khange goṭa Misor disomre maraṅ okoć raḱjoṅge hoyena, ar Pharao do Isrạyel hoponko sen hodoḱ lạgit́e udgạuket́koa. Ado Isrạyel hoponko Misor disom khonko oḍok calaoena, lạṛhại lek 600,000 hoṛ ar Mose do Joseph reaḱ mạ̃ṛĩye idi toraket́a. Probhu do onko laha lahateye calaḱ kana, ńindạ do seṅgel khunṭi leka, ar siń do lahra khunṭi leka, ar Araḱ doreão seće ạyur idiket́koa. Menkhan Pharaoe kastaoena, Isrạyel hoponkoe sen ocowat́kote; ar aćaḱ joto lạṛhại gạḍiante khudạuket́kote Araḱ doreão ṭhene tioḱket́koa.

Isrạyel hoponko do Mose upạrte karać kurućkateko metadea, Misor disomre baṅ do topa ṭhạ̃i baṅ tahẽkante, noa hãhãkartem ạnḍić ạgu akat́le? Moseye roṛ ruạṛat́koa, Alope botoroḱa, Probhu reaḱ babańcaope ńela. Khange tiye tiạrket́a, ar daḱ do onte note teṅgoyente, Isrạyel hoponko do kuṭhạ̃ṛgeko paromena ar daḱ do onko etom ar końe seć mit́ṭeć pạcri tahẽkantakoa. Pharao do dhawa dhạwiye khudạuket́koa, menkhan tala doreãoreye bolo akan, ar Isrạyel hoponko hana sa ghuṭuteko parom rakaṕ akan jokheć, Mose do tiye tiạrket́te daḱ do jạput́ mit́ena ar Pharao ar uniren joto phạd daḱteye topaket́koa. (Exod. 5-14).

Mose do 40 serma umer hoyentae khan mit́din oḍoṅ senkate aćren boehako reaḱ harkhete ńelket́takoa. Mit́ṭen Misorren hoṛ mit́ṭaṅ Ibri hoṛ dale kane ńelkedea. Mose onte note beṅget́ baṛakate, cele hõ bae ńel ńamlet́kote, uni Misorren hoṛe dal goćkedea, ar gitilreye topakedea. Pharao raj ona ańjom ńamkate Moseye goje lạgidoḱkan tahẽkana; menkhan Mose do ona  bujhạuket́te Midiạnteye dạṛket́a ar onḍe Jethro ńutuman mit́ṭeć naeke tuluće peṛayena, ar uni ṭhen 40 sermae tahẽyena.

Mit́din Horeb buru pheḍreye gupikan tahẽkanre mit́ṭeć jạnum jhạuạ joloḱ kane ńelket́a, menkhan baṅ loḱ kana. Moseye soroḱ lạgidoḱkan tahẽkanre jạnum jhạuạ khon Probhui metadea, Kharpa bojtam, entem teṅgo akan ṭhạ̃i do sonot otge. Iń do Abrahamren, Isạhak ar Jakobren Isorge; ińren porja hoṛko reaḱ harkhet saset iń ńel akat́a ar onkoaḱ raḱ do iń ṭhen seṭer akana. Nitoḱ do Pharao ṭhen iń kolmea, ar am do ińren porja Misor khon oḍok ạgukom. Moseye roṛ ruạṛadea, Ińren boehako do ohoko pạtiạlińa, amem kol akadińa mente. Khange Probhui metadea, amaḱ ṭheṅga otre giḍime. Moseye onkaket́ khan, ona do biń got́ente Mose uni botorteye dạṛket́a. Probhu reaḱ hukumte Mose do biń canḍbolreye saṕ kedete ṭheṅga ruạṛena.

Probhu do hahaṛawaḱ kạmi lạgit́ daṛeye emadea; menkhan Mose do ạnḍuṅkateye menket́a, Iń do thotṛageạń. Probhui metadea, Amren boeha Aron iń kolama; am do unim bujhạuaea, ar uni do am lạgit́e roṛa. Khange Mose Misor disomteye calaoena, ar horre Aron tuluć dapramkate bana hoṛ Isrạyel hoṛko ṭhen senente Probhu reaḱ kathakin jạhirat́koa. Onko do pạtiạuente Probhuko sewawadea. (Exod, 2-4.)  

Isrạyel hoponko do Gosen disomre 430 sermako tahẽkana, ar ạḍiko saṅgeyena. Khange Misor disomre Joseph bae baḍaelede mit́ṭaṅ nawa raje teṅgoyena. Uniye menwana,Noko Isrạyelrenko do ale khon ạḍiko saṅgegea;mit́din aleren bạiriko hoe botećkoḱa. Ona iạte ạḍi ãṭ goḱ bhạriạ kạmikoteye santaoet́ko tahẽkana; menkhan tinạḱko santaokoa,unạḱ artet́geko bạḍ idiḱa. Khange pharaoe hukumket́a,tinạḱko janamoḱ koṛa gidrạ do Nil gaḍareko khadle giḍikoa eken kuṛi gidrạge jiwet́ko tahena.

Ona jokheć Livi khũṭren mit́ṭaṅ maejiu do mit́ṭen koṛa gidrại janamkedea, ar uni do ạḍi mońje ńelkedete 3 cando dhạbiće okoledea;ado ar bae oko daṛeadete pạṭiol reaḱ mit́ṭeć piṭạri benaokate onare uni koṛa gidrại gitićkedea, ar Nil gaḍa aṛe reaḱ pạṭiol gajaṛre onae dohokat́a.

Gidrạren ạjij do pharakreye teṅgo akana jemone baḍae ńam uni cet́ hoyoḱtae. Mit́din khange Pharaoren hoponera do umoḱ lạgit́ gaḍateye ãṛgo hećena, ar piṭạri ńelket́te oar rakaṕ ocoket́a. Uni raraḱkan koṛa gidrại ńelkedete uni lạgit́ ạḍi mãyã sanakedea. Ado gidrạren ạjijtet́ do sen sorente Pharaoren hoponerate kulikedea,Henda go,uni gidrạ lạgit́ nuḱnuić iń ńam ạguyea? Pharaoren hoponerate roṛ ruạṛadea, Do ńam ạguạńme. Khange gidrạren eṅgattet́geye hoho ạgukedea. Gidrại harayen khan eṅgattet́ do Pharaoren hoponerat ṭhene idikedea ado uniren hopone hoyena, ar uni do Moseye ńutumkedea, enteye menket́a, Daḱ khon iń oarkedea. (Exod. 2, 1-10)

Onko bepari hoṛ do Joseph Misor disom raj Pharaoren palṭon sordar Potiphar ṭhenko ạkrińkedea. Isor Joseph tuluće tahẽkante, Joseph do aćaḱ joto kạmire bhạgane tahẽkana, ar Potiphar do aćaḱ goṭa oṛaḱ cetanre sordare dohokedea. Potiphar rinić reaḱ mẽt́ do Josephre lagaoentaete Josephe ạnḍić legakedea; menkhan Joseph do bae rebenlena, metadeae, Cekate onkan dusṭạmi kạmite Isor reaḱ iń kạia? Ona edrete Potiphar rinić do aćren herel ṭhen Josephe daraoadea, menket́ae, Nui Ibri golam doe ạnḍić legaledińa. Potiphar do ać rinić reaḱ kathae pạtiạuat́taete Joseph kạd oṛaḱreye bhoraokedea.

Menkhan Isor do Joseph tuluće tahẽkante jehel doroga ṭhen dayae ńamket́te, uni do sanam kạidiko cetanreye sordarkadea. (Gen.39.)