Khoḱ ar manda do etaḱ karonko lekage sadharon karon kana. Menkhan noa reaḱ do ḍher hoṛge jạsti bako moneaḱa. Noa do ḍher idilen khan se noa khon bańcaoḱ lạgit́ ḍhili sililen khan tayom te muskil hõ hoe daṛeaḱa.

KHOḰ DO TINẠḰ LEKANA?

1. Rohoṛ khoḱ, sigareṭ ḍherko ńu lekhan noa khoḱ hoyoḱa.
2. Lohot́ khoḱ. Manda okte khoḱ khoḱte kharaḱ oḍokoḱa.
3. TB khoḱ. Ạḍi din khon ko khoga ar mucạt́re khoḱ khoḱte kharaḱ sãote mãyãmgeko ulạya.

MANDA KHOḰ CINHẠKO

-Nạnḍri hasoa.

-Bohoḱ hasoa.

-Hoṛmo hasoa.

-Kạṭić gidrạ do patla se sunuć ṭạnḍite hõ ńam daṛeakoa.

BESOḰ REAḰ UPẠIKO

-Aema halka jomaḱko do jom ńu hoyoḱa, metaḱme daḱ, toa, ca emanteaḱ ko. Asolkaete loloaḱ do khoḱ lạgit́ ạḍi besa ente noate bhitri reaḱ kharaḱ do dagoḱa.

-Tulsi sakam gel goṭen turui ṭhoṕ libu rasa mit́ gelạs heḍeć daḱre daṛeaḱ bhor lolo lolo ńui hoyoḱa.

-Oṛaḱ duạr sapha sạphi dohoe hoyoḱa. Oṛaḱre jemon sanam okte hoe bolo daṛeaḱ.

-Kharaḱ do jemon otre aloko thoe, bickom culhạre se bises jaegare. Kharaḱte rogren tejo do ko pasnaoḱa.

-Udgạr ạikạuḱ khan ḍạbrạḱ hoyoḱa. Ruạḱ somoe do lohot́ kicrićte goṭa hoṛmo saphae hoyoḱa.

Ran Ocoḱ ar Ḍaktar ṭhen tinre rugi idiye hoyoḱa:

-Bar hapta khon ḍher khoḱ tahẽlen khan.

-Hoṛmo lolo baṅ komaolen khan.

-Judi khoḱ ḍherlen khan ar kharaḱ reaḱ roṅ araḱ, hạriạṛ se sasaṅdaḱ leka ńellen khan.

-Nạnḍri ḍherge hasolen khan.

-Nạnḍri haso sãote hoṭoḱ hasolen khan.

Gaibandha reaḱ Gobindogonj re ạdivạsi hoṛko talare bhiḍiko em haṭińat́koa. Aṭhwar hiloḱ (04 Ḍisember)  ạyuṕ bela jokhen reṅgeć nacar bar sae irạl gel (280) hoṛko bhiḍiko emat́koa.

Upạjila Pranisompot ạpis reaḱ bondoboste bhiḍi em hạṭiń akhṛare seṭere tahẽkana upạjilạ nirbahi ạpiser Arif Hossen, upạjilạ porisod Chairman ar upạjilạ Awami league ren sabha mukhiạ Abdul Lotif, Upạjilạ Pranisompot kormokorta/ạpiser Dr.Belal Hossen, Veterinary surgeon Dr.Tanveer Jahan, ona sãote seṭere tahẽkana ạdivạsi koren mit́ ạḱyurić Lazarus Tudu selet́ arhõ eṭaḱko.

Chapainawabgonj reaḱ ḍahar re bhuṭbhuṭi sãote honḍar gạḍi tạkić ńapamenet mit́ hoṛe gurena. Ar mit́ hoṛ do kajake akham akante haspatal re bhurti menaea. Aṭhwar hiloḱ (04 Disember) bhạṭibela 4:00 baja okte sodor upạjilạ reaḱ Jhilim union reaḱ Tongpaṛa moṛ re nonkan botoran ãoṛe gãoṛẽ do ghoṭaoena.

Noa ghoṭnare guren ar akham se jạbun akan bana hoṛge grameenphone kompany ren salesman hisạbtekin kạmikan tahẽna. Guren koṛawaḱ ńutum do Masum Ali (25). Uni do Nachole upạjila reaḱ Pukuria atoren gur akan Habibur ren hopontet́ kanae. Onka leka akham akan koṛa do sodor upạjilạ reaḱ Baroghoria union, Lukhipur atoren Motaleb Hossen ren koṛa Md.Alamin. Bhuṭbuṭi ar honḍar gạḍi tạkić ńapamen khan onḍege Masum Ali doe gurena. Khobor ńam torage Fire service ko hećen khan ạḍi laṅga dosare Md.Alamin Ali ko udhạrkedete Chapainawabgonj jilạ haspatal reko bhurtikedea. Menkhan uniaḱ ạḍi laṅga ar bạṛić dosa ńelte onḍen ko daktar do Rajshahi Medical College haspatal teko ucạrkedea.

Gur akan koṛaren peṛa pạruạ, aḍepase hoṛko ṭhen, daktar ar khoboriạ ko khon baḍae ńamena je,nukin bana hoṛge Nachole khon mimit́ Flexiload dokanre recharge kateć jilạ sohor-bajartekin ruạṛoḱkan tahẽkana. Ar un okte ruạṛoḱ jokhenge Tongpaṛa ṭhen nonkan ghoṭna ghoṭaoena.    

Chapainawabgonj jilạ, Amnura Mission reaḱ Tabitha Kindergarten School re teheń Robibar (04 Disember) setaḱ 9:30 baja khonaḱ bochor mucạt́ reaḱ (Annual Examination-2022) biḍạu do ehoṕena. Play khon Mõṛẽ kelas re paṛhaoḱkan sanam gidrạge biḍạureko selet́ akana. Bochor mucạt́ reaḱ noa bidạure mimit́ pạṭhuạ gidrạko ạḍi rạskạ salaḱ bidạuko emeda. Cedaḱ je, ar thoṛa din tayom khange ńel nelte noa 2022 serma do caba heć akana. Ar noa mucạt́ bidạu talatege pạṭhuạ gidrạko arhõ nawa metaḱme cetan kelas ko rakaṕ calaḱa.

Sạrige ạḍi rạskạ reaḱ katha kangea. Ona iạte gidrạko ạḍi jhũk ar kurumuṭu monte biḍạuko emet́ kana. As menaḱa sanam gidrạge biḍạu mucạt́re mońj jo̠ ko ńama mente. Mahasoe ko hõ sanam gidrạko mońjteko ńel arko tạṅkhiyet́kote napaete biḍạu hoyoḱ kana. As menaḱa teheń khon mucạt́ din dhạbić  napaete biḍạu hoe purạuḱa.

Teheń Lukhibar Ḍisember mahna reaḱ pạhilaḱ din. Ona sãote mit́ṭen bises mãhã hõ kana, metaḱme AIDS Mãhã. Jao bo̠cho̠r lekage nes hõ Baṅgladisomre noa mãhãko manaoeda.

1988 serma khon AIDS birudre lạpạrhại ar hoṛko aodhanko lạgit́te noa mãhã manaoḱ kana. HIV (Human Defeciency Virus) ro̠g khon sirjạuḱ kana noa jiwi ṭonṭa gujuḱ lekan ro̠g AIDS. Worldometers aḱ khobor lekate, Goṭa dhạrtire HIV rogte jạbun akan hoṛkoaḱ soṅkha pon (4) karoṛ pongel mit́ (41) lakh pe gel turui (36) hajar mit́ sae pon (134). Nit́ dhạbić noa mãhãmạri ro̠gte 15 lakh 40 hajar 69 hoṛko gur akana. Baṅgladisomre pạhil 1989 sermare AIDS ro̠gi saṕ ńamakana. Ar onka leka disomre gel pon (14) goṭen hoṛko noa rogreko jạbun akana. Bạṛtikaete aḍepase disom Bharot ar Miyanmar ren hoṛko noa ro̠gre paṛaoḱ kana. Menkhan ona disom sãote noa disomren bạnij-bepar ar sạdại hoṛkoaḱ aema lekan jopoṛao menaḱanaṅ. Enḍekhan sanam hoṛko sontor tahen jạruṛ kana. Ente hoṛko bako sontorlen khan noa rog khonaḱ ohogebon danaṅ daṛelea.

Bangladesh Porisonkhan Bureau (BBS) lekate, disomre 28.5% maejiuge noa AIDS babotre bako jagwara.  Enrehõ  AIDS reaḱ mit́ṭen kuli (bahok) babotre 71.5% maejiu ko aodhan akana. Ar 36% maejiu do̠ jo̠to̠ kuli babotreko pusṭạu akana. Mõṛẽ bochor lahare 2016 sermare noa reaḱ har tahẽkana 29%. Khan 7% maejiu noa AIDS ro̠g reko aodhan akana. Sarkari songstha BBS doe hudiset́ kana je, ḍher maejiuge AIDS  babotre bako bujhạueda, ona iạte khạṭige bạite bạite pasnao idiḱ kana.

Ko̠ro̠na ro̠g rokao ar aṭkao lạgit́te ponaḱ doge emo̠ḱ reaḱe suparis akada jatiyo tika karigori songkranto adviser committee. Budhbar (30 November) sastho odhidaptor ren ṭikạ kạmi ạḱyurić Dr.Shamsul Hoqe noa sombate lại jạhirkeda. Noa ponaḱ doge do̠ pạhilte  turui gel (60) umer cetanren ar bhạrti hoṛmo maejiuko talare emo̠go̠ḱ reaḱ suparis akana. Ado̠ sarkar noa bisoe cetanre hudis-ganḍonkate usạrage noa kạmi eho̠bo̠ḱa

Arhõe baḍae ocokeda je, darakan Ḍisember cando goṭa disomre mit́ hapta metaḱme 1-7 tarik do̠ ko̠ro̠na reaḱ dosar ar boster doge emo̠ḱ reaḱ goṭa akana. Inạ mit́ haptate are gel (90) lakh doge emoḱ reaḱ niṭ akana.

Dinạjpur jilạ reaḱ Hạkimpur thana Arjipaṛa atoren Shikha Jeklin Soren. Apat́tet́aḱ ńutum do̠ Swapon Soren. Aćren kuṛi gidrạ ne̠s serma reaḱ SSC biḍạure Boguṛa YMCA Pablik iskul eṇḍ kolej kho̠n jo̠to̠ biso̠yre A+ nombore ńamakada.

Hahaṛa lekan katha do̠ arhõ̠ menaḱa, jo̠to̠ biso̠yre goṭaṛte 1300 no̠mbo̠r tahẽ̠kana. 1300 no̠mbo̠r modhre 1245 nombore arjaoakada. Nowa rạskạ reaḱ kho̠bo̠r do̠ sạrige ạḍi go̠ro̠b reaḱ katha kana. O̠lo̠ḱ-paṛhaore uniaḱ nowa tạpis rejalṭ abo santal gidrạko lạgit́̕ udgạuanaḱkangea. Daraekan dinko re noṅkage o̠lo̠ḱ-paṛhao sãote eṭaḱ eṭaḱ kạmi-kạsnikore hõ̠ aboren ho̠ṛko rejalṭ lekhan, aboaḱ uthnạu ạḍi kajak lahaḱa.

Secondary School Certificate (SSC) biḍạu reaḱ jo̠ so̠do̠rena. Teheń Sombar (28 November) tikin ber 12:00 baja Maraṅ Montri do biḍạu jo̠ so̠do̠roḱ kạmi uḍhạukeda .

Niạ dhao are (9) goṭen sadharon sikhnạt board, Madrasa ar Karigori sikhnạt board milạukate jotokore moṭre bargel (20) lakh khon hõ ḍher gidrạ SSC bidạu ko emleda. Baḍaeabon je, calaoen 15 September SSC ar ona man reaḱ biḍạu do̠ ehoṕlena. Korona mahamạri, banbạsi- ḍubạdaḱ ar jahan karonaḱte ạḍi bilomte SSC biḍạu hoe purạuena. Ar bilomte hoeakante biḍạu hatao tayom turui gel (60) din badre biḍạu reaḱ jo̠ do̠ so̠do̠rena.

Delabon baḍaelege nes bochor oka board re tinạḱgan gidrạko pass akada-

Sikhnạt Board- Pass reaḱ har

Dhaka-                         90.03%

Rajshahi-                     85.87%

Comilla-                      91.28%

Jessore-                        95.03%

Chottogram-                87.53%

Borisal –                        89.61%

Sylhet-                         78.82%

Dinajpur-                     81.14%

Mymensingh-              86.07%

Sạnicar hiloḱ (26 November) Gaibandha Gobindogonj re Santal maejiu ko talare aḱ-ạ̃pạ̃ṛĩ tuń haparao eneć khilạḍ hoe hoyena. Gaibandha Nagorik Songothon Jonoudjog aḱ bondobos lekate Gobondogonj upạjilạ reaḱ Sapmara union re noa khilạḍ haparao do hoyena. Noa haparaore amdaj sae cetan maejiuko selet́lena. Inạkate gapalmarao akhṛa ar rạskạjoṅ lạgit́ eneć akhṛa hõ hoe purạuena.

Noa akhṛae ạḱyurkeda Adivasi-Bangali Songhoti ren convener Adv.Sirajul Islam Babu. Manotan peṛa lekate selet́ko tahẽkana, Bisisto Krira Songothok Wajiur Rahman Raffle, Sahebgonj Bagdafarm Bhumi uddhar committee ren sabha mukhiạ Philimon Baskey, Jonoudjog ren kendrio sodosso socib Tariq Hossen, Gaibandha jonoudjog ren sodosso socib Probir Chokroborti ar ạdibạsi ko ren mit́ ạḱyurić Pricila Murmu.

Akhṛare Sawaliạ (bokta) se manotako roṛ sodorkeda, soman otre basoḱkan ạdibạsi ko adogoḱ sećko mohnḍa akana. Eken ạdibạsiko adogoḱ kana ona do baṅa, adogoḱ kana onkoaḱ legcar, ạn-ạri, ko hõ. Noko do Baṅgladisomre reńgeć nacar hoṛ menteko lekha akana. Ḍher hoṛaḱge jumi-jaega bạnuḱtakoa. Onka leka ạdibạsikoaḱ pạrsi ar legcar ko rạkhi jogao ar saṕ dohoe babotre ạdibạsi montronaloy benao rakaṕ reaḱ dạbikeda arko menkeda, je pạrsi jiạṛ dohoe lạgit́te usạra ar harepharege ạdibạsikoaḱ puthi, onkoaḱ pạrsi ar legcar jogaore sarkari udjog se bebostha hatao reaḱ ạḍige jaruṛ menaḱa.

Teheń Sombar (28 November) Brazil do̠lko arhõ dosar dhao maṭhreko pheḍo̠ḱ kana. Noko sãote arhõ eṭaḱ do̠lkoaḱ haparao hõ menaḱa. Teheń Bissokap phuṭboll eneć ńapam do̠lkoaḱ ńutum latarre emena-

Cameroon-Serbia

Ạyuṕ bela 4:00 baja jokhen ehoboḱa

South Korea-Ghana

Ạyuṕ 7:00 baja.

Brazil-Swizerland

Ạyuṕ 10:00 baja jokhen ehoboḱa.