Rajshahi reaḱ Poba re santal hoṛko dal ket́koa. Ona ghoṭna re mõṛẽ hoṛ ạḍi kajak ko hạn akana.  Maloti Mardi, Mạńjhi haṛam Shymol Hembrom ren erweltet́ koṛa Ripon Hembrom, Ripon eṅgat Sumita Kisku ar uniren miserat Rongila Hembrom. Calaoen Budhbar (30 July) setaḱ 10 baja okte Poba thana reaḱ Baghsara Pul atore noa ghoṭna ghoṭao akana.

Ato hoṛko baḍae ocokeda Bablu, Khaja, Bablu ren oṛaḱ hoṛ, noko pon hoṛ mit́kate santal maejiu ạḍi bạṛićko dal kedea. Ado ato hoṛko uni udhạr kate Darusha haspatal reko bhurti kadea. Ato hoṛko lạikeda, amdaj tikin 2:00 baja okte Bablu ar Khaja sãote mit́ dol hoṛko hećente uni maejiu ko dal kedea. Ona ghoṭnare Mạńjhi haṛam Shymol Hembrom, Ripon eṅgat ar miserat Rongila ko dal ket́koa ar oṛaḱ duạṛ hõko rạput́ket́ takoa.

Khobor ńam tayom pulis onḍe senkate sanamaḱko ńel jutkeda. Pulis ko ruạṛen khan arhõ onko hamla kan hoṛko do aema lekan hạtiạr kote ato hoṛ botor ko uduḱat́koa. Arko metat́koa, jạruṛ hoelen khan arhõ oṛaḱ duạrle rạput́ cabaea, ar sanam hoṛle laga giḍipea. Ona ghoṭna hoe akan khon atoren sanam hoṛ ạḍi botor salaḱ dinko khemaoeda. Nonka bemanot ar bạṛić beohar khạtirte santal ko disom ạyurić ṭhen bicạr ko khojkeda

Mit́ṭen kisạ̃ṛ hoṛaḱ oṛaḱre ạḍi utạr cuṭiạko tahẽkana. Onko do kisạ̃ṛaḱ oṛaḱ ṭhenko bhugạḱ keda, ar hoṛo caole hõ bebạṛićko berbad keda. Uni kisạ̃ṛ hoṛ do onkae ńelket́ khan, mit́ṭen ạḍi maraṅ bhonḍa pusiye ạsul kedea. Uni pusi do jaoge mit́ bar cuṭiại saṕ jom koa. Ḍher din tayom Cuṭiạ doko marao ńoḱena. Menkhan onko do pusi botorte bhugạḱ khon bako oḍok daṛeaḱ kan tahẽkana, ar reṅgećte ạḍi ãṭ harkhetoḱko ehoṕena.

Bhạg leka mit́din pusi do oka sen coṅe sen akan tahẽkana. Ṭhik inạ takre bebaḱ Cuṭiạ oḍok jarwayente bạisiko duṛuṕena. Unre noako solha keda baṅma nui pusi do aboren ạḍi maraṅ bạiri kanae. Nui pusi menaete aboaḱ oka sukge bạnuḱa. Ona iạte nonkanaḱbon upạia jemon mit́ṭeć hõ aloe jom daṛeabon.

Mit́ṭen cuṭiạ doe mengot́keda nui pusi do cet́ jom hõ bae ńamet́te aboe jomet́bona. Onate jom lạgit́ dinạm hiloḱ toa dahe bon emae khan beskoḱa.

Dosariće mengot́ket́a noa do oho hoe daṛelena, ente pusi ma coṅ toa celaṅ pheḍregeye duṛuṕkoḱ.

Tesariće menkeda abo sanamko te mit́ dhao gan unibon otale khane botorkoḱa ar tis hõ ohoe heć baṛalena.  

Poniće menket́a, noa ma ṭhik ma ṭhikge menkhan jãhãe bon ger ocole khan se abo cetanreye bindạṛlen khan coṅe goć utạr bon ente lać hõ lać ḍhobo ḍhobo. Inạkate mit́ṭen kạṭić cuṭiại menket́a ona do baṅ mit́ṭeć jhunkạ hoṭoḱ rebon akawae khan beskoḱa. Ado jãhãtinrege uniye hijuḱ bon baḍae daṛeaḱa, ar bańcaoḱ reaḱbon ạt daṛeaḱa. Noa ańjomkate mit́ṭen cuṭiạ haṛam doe menket́a hẽ menkhan okoe jhunkạ doe tolaea? Nonkako galmarao kan ona takrege miuṅ miuṅ ate pusi hijuḱ kanko ańjomkedea. Khan am iń phać phoć hante nhateko ńir paskaoena ar hako pako apan ạpin bhugạḱre ko ńir boloyena. Ar jãhãnaḱ ạuriko goṭae rege bạisi bhaṅgaoentakoa.

Cạt bạisạk lolo setoṅ

Ạḍi gorom ạikạuḱ,

Hoe begorte kuńḍi miru

Raḱet́ ńum halaṅ.

Pus mag mas poyoṛ hoe te

Oṭaṅ hijuḱ kuṛhạ,

Ona reaṛte reṅgeć oreć

Joroḱ ako seṅgel kote.

Probhu arhõ Abraham ṭhen sodorenteye goḱadea, aćren bõsko do sermaren ipilko lekako saṅgeḱa. Abraham do haṛam, uniren oṛaḱ hoṛ Sara hõ buḍhige, ar gidrạ pidrạ bạnuḱkotakinre hõ Abraham do Isor reaḱ goḱ kathareye pạtiạuena ar ona pạtiạu do dhorom lạgit́ lekhayentaea.

Mit́din Abraham aćaḱ tạmbu duạrreye duṛuṕ akan tahẽkana setoṅ ber jokheć. Beṅget́kate ać samaṅre 3 hoṛ teṅgo akane ńelket́koa. Abraham ńir senkate ombaḱenteye metat́koa, E Baba, Iń amren guti alom cinḍạl oṭokạńa; noa dare buṭare baṛe jirạuanpe, ar iń do jaṅga ạbuktape lạgit́ daḱ ar ṭanḍhape lạgit́ jomaḱ iń ạgulege; enkhantepe sen idiḱa. Adoko metadea, Bogege, amem menket́ lekaeme.

Khange Abraham palte ńir senente mit́ṭaṅ bhage mĩhũ goć ocokateye isin aroat́koa ar Sara do guhum holoṅ reaḱe piṭhạwat́koa ar Abraham do chale ar toae hartawat́koa; ar onkoko jojom kan jokheć onko ṭhen dare latarreye teṅgo akan tahẽkana. Khange onko modren mit́ hoṛ Abrahame metadea, Amren oṛaḱ hoṛ Sara do okare menaea; Abrahame roṛ ruạṛadea, tạmburege menaea. Adoe menket́a, Bochor dinre am ṭheniń heć ruạṛoḱa, unre Sararen mit́ṭaṅ koṛa gidrại tahẽntaea. Sara do tạmbure onae ańjomket́ khane landagot́ket́a; enteye menwana, gidrạjoṅ reaḱ din do parom akantaea mente. Menkhan Probhu Isor do Abrahame metadea, Isor lạgit́ baṅ do jãhãnaḱ beleṭejoḱ menaḱa? (Gen. 15, 5, 6; 18, 1-14).

Lukhibar (31 July) Chapainawabgonj sodor upạjilạ, Jhilim union reaḱ Bilboltha Adivasi Adorsho Primary School re Community Library ar Research Center uḍhạu hoe purạuena. Wycliffe Foundation ar Bangladesh Santal Friends aḱ goṛote noa uḍhạu kạmi purạukeda National Agency for Green Revolution (NAGR).

NAGR ren Director Mn.Stephen Soren aḱ ạyurte uḍhạu akhṛare manotan peṛa lekate seṭere  tahẽkana Australia khon heć akan Mn.Elizabeth Baker ar Daniel Baker ona sãote seṭere tahẽkana, Redio Mahananda ren station Manager Rezaul Karim. Uḍhạu akhṛa ạyur re tahẽkana, NAGR ren Program Manager Prodip Hembrom.

Inạ chaḍa hõ akhṛare seṭere tahẽkana, 3no Jhilim union porisod reaḱ 7, 8 ar 9 nombor ward ren maejiu member Shawktara Begum (Suity), Bilboltha Adivasi Adorsho School ren sabha mukhiạ Rajib Kol selet́ arhõ eṭaḱko. Uḍhạu akhṛare NAGR ren Director doe menkeda, Kolhe ko lạgit́ge Community Library ar Research Center do uḍhạu hoyena. NAGR do jaoge kolhe jạt se somaj babote hudiseda. Darakan dinre jemon kolhe ko bhage sikhnạt ko hameṭ daṛeaḱ, teṅgo keṭejoḱ ko, akoaḱ ạidạri reaḱ kathako roṛ daṛeaḱ ar akoaḱ kathako lại sodor daṛeaḱ. Noa kangea aleaḱ kukmu. Darakan dinre arhõ aema kạmi ko reaḱ hudis-cintạ menaḱa. Uni do arhõe lại sodorkeda, noa Library re do puthiko tahẽna. Aleaḱ kukmu do unre purạuḱa tinre ape kolhe ko Library reaḱ puthi ko pe paṛhaoḱa, ar aema lekan cecet́aḱ pe hameṭ daṛeaḱa. Library re eken puthi sajaokaḱ do baṅ ganoḱa. Ona bidiạko tinre bohoḱ re rebet́ dohoḱa unrege kukmu do sạriagoḱa.   

Onka leka manotan peṛa Elizabeth ar Daniel Baker hõ kin roṛ sodorkeda, ạliń lạgit́ hõ ạḍi rạskạwan din kana. Kolhe ko lạgit́ mit́ṭen ṭhạ̃i se jaega benaoen ńutumte. One oka khon onko jạtko arhõ bạṛti sikhnạtko hameṭ daṛeaḱa. Akoaḱ ạri-cali ko saṕ doho daṛeaḱa ar noage tayom daram dinre laha seće ạyur idikoa. Radio Mahananda ren Station Manager Rezaul Karim hõe menkeda, nonka tayom akan kolhe jạt ko lạgit́ge Library ar Research Center. Noa center hotete onko do akel bidiạ ko hameṭ daṛeaḱa ar laha seć ko calao idiḱa. School ren sabha mukhiạ hõe lại sodorkeda, nonḍen ko tinạḱ juạn kuṛi-koṛa School-College reko paṛhaoḱ kan ar puthi paṛhaoḱko kusiaḱ onko lạgit́ mit́ṭen mońj ṭhạ̃i ar hor do benaoena. Ona ńutumte aema sarhao ar johar kathako hõe roṛ sodorkeda.

Goḍo ar biji do ạḍi gatekin tahẽkana. Goḍo doe tahẽna bugạḱre ar biji doe tahẽna bir gajaṛre. Din hilạḱ goḍo do setaḱ ạyuṕ biji ṭhen senkate suk duk reaḱkin gapal maraoa. Mit́din biji do goḍ̣oe metae kana, E ya gate din hilạḱ am do iń ṭhenem hijuḱ kana. Iń são suk duk reaḱ katha ko gapal marao lạgit́ menkhan iń do mit́din hõ amaḱ oṛaḱ daṛan bạń calaḱ kana. Onate gate iń do ạḍi kosṭoń bujhạueda. Goḍo doe menkeda, E ya gate kosṭo alom bujhạua. Bhabna reaḱ katha cet́ iń mena, ińaḱ oṛaḱ pase rege menaea mit́ṭen jom raj biń. Namliń khange jomeńa. Onate din hilạḱ am seć reń tahẽn kana. Biji menkeda, E ya gate cet́ reaḱ botor mase? Iń menạń rehõ bhorsa bam ạikạueda? Unạḱ din khon iń ṭhenem hijuḱ calaḱ kana bacom lạiạń kan.

Goḍo doe menkeda, E ya gate am lạiam sạhũs bạń ńamet́ tahẽna. Nit amaḱ katha ańjom kate monre ạḍi daṛeń bujhạueda. Biji menkeda, bejae gate mase beret́ me ar dela idiyiń me uni jom raj bińaḱ oṛaḱ. Adokin calaoena menkhan biń do ḍerare bae tahẽkana. Biń do jomaḱ sendrae calaoakan tahẽna. Adi biji ar goḍo duṛuṕ akan oktege biń do sikạr jom kate ḍerate boloḱ oktege biń ar biji do lạṛhại kin lagaoena. Ḍher okto lạṛhai tayom bińe laṅgayen khan biji do bińe ger goć kedea.

Janam disạm Baṅgla disạm

Sanam disạm khon soros disạm,

Sona barag janam hasa

Baṅgla goren hoponaḱ asa.

Utạr rema hemalpuri

Dạkhin rema jalapuri,

Lạṭu kạṭić gaḍa soḍoḱ

Legem legem ạtu pheḍoḱ.

Darakan 9 August goṭa dhạrti ạdivạsi mãhã ńutumte nawa sereńko uchạneḱ kana “Seṅgel” band. 2011 serma khon ạri cạliko reaḱ aema lekan sereńko uchạn akada. One oka do hoṛko kusi akat́. Onka leka niạ dhao hõ ạdivạsi mãhã ńutumte nawa sereńko uchạneḱ kana.

Sereń babot ko kulikede re Seṅgel band ren Vocal Rinku Mardi doe menkeda, ạdivạsi hoṛko do sedae khonge aema lekako koclon ocoḱ kana. Bagda Farm, chiṛakuṭa sãote disomre eṭaḱ eṭaḱ jaegare girobasoḱkan hoṛkoaḱ oṛaḱ duạṛko lo rapaḱ akada. Shymol, Moṅgol, Obidio Mardi, Alfred Soren leka arhõ aema hoṛko goć oco akana. Menkhan noa reaḱ jãhãn bicạr nit hạbić baṅ hoe akana. Bạṛtikaete noako bisoe ge sereń talate sodor reaḱ kurumuṭu akana.

Inạ chaḍa hõ ạdivạsikoaḱ jion reaḱ sạriaḱtet́ sereń talate sodor akana. Band ren ạyurić John Hembrom doe meneda, ehoṕ khonge Seṅgel band do jhumur sereńko sereń akat́ rehõ noa sereń do thoṛa rock lekanaḱ kana. Baḍae abon je, santal koaḱ sereń reaḱ rạṛ amdaj mõṛẽ gel (50) khon hõ ḍher menaḱa. Bạṛtikaete ạri cạli lekate dasãe sereń do jãhãn birud re teṅgo daram reaḱ khạndrińtet́e bujhạu ocoyeda. Noa sereń do dasãe sereń reaḱ rạṛ mesal kate saṕṛao akana, santali ar baṅgla pạrsi hõ beohar akana. As menaḱa nawa sereń hoṛko kusiaḱa. Nijaḱ composition te sereńe mixing are mastering akada S.B Ratul . 

Hola tikin khon Bạblu eṅgat Miru Kisku do dhãoṛa dhạ̃oṛi goṭa ṭola daṛa daṛate sanam hoṛko ṭhen goṛo lạgit́e nehõroḱ kana ar jao ghuṛigey homor halaṅeda. Miru Kisku tako oṛaḱ do parwa bir cetan ṭola re, sanamko lekage uni hõ mit́ṭen mońj sajao akan baha bagwan lekan mit́ gharońj ge tahẽkantaea. Bạblu apat Sona Murmu do eṭaḱ hoṛaḱ khet re kạmi kate aćaḱ huḍiń gharońje sajaoleda. Ar ona iạte uni do ạkin juri pạriaḱ dulạṛ ren jo Bạblu Murmu lạgit́ aćaḱ rojgar reaḱ thoṛa thoṛate doko jarwa kate mit́ bighạ jumi hõe kirińkeda. Ar dulạṛiạ hopontae oloḱ paṛhaoḱ cet́ ocoye reaḱ sanam lekan bebostha lạgit́ hõ saṕṛaogeye tahẽkana. Onatege uni do sur School re paṛhaoḱe ehoṕket́te bhage result salat́ jao serma ge cetan class te rakaṕ calaḱe ehoṕena. Ar nonkatege mit́din do high school pas kate thoṛa sạṅgiń reaḱ bajar college reye bhurtikedea.

Monre ạḍi as tahẽkantaea beṭa tae do mit́din ạḍi maraṅ lek manan hoṛe hoyoḱte ona ṭoṭharen sanam hoṛko do uniko Manot arko sarhaoea, netar khonge ato ṭola ar aḍe paseren hoṛ kodo hạṭiạ kore ńapam kateko metaea, am doya Sona ạḍi bhage moloṅ tam, amren koṛa do nãhãḱ ạḍi maraṅ daman hoṛgeye hoyoḱa. Onako katha ańjomte Sonawaḱ koṛam do rạskạte cehel cepeloḱ kantaea. Ṭhik onkage Bạblu hõ sohor college re aćaḱ oloḱ hõe calao idiyet́ kan tahẽkana, college reaḱ hostel re tahẽn khạtir te netar do Bạblu khoroc kohõ bạṛtigeye khojogoḱ kana, ona iạte ać baba do nalha kạmite gharońj ar Bạbluwaḱ oloḱ khoroc ar bae kulạu daṛeaḱ kana, onate Sona do nit do aḍe ṭolare mit́ṭen kisạ̃ṛ ṭhen gutiye boloyena.

Menkhan uni do umer sećte ḍhere lahaḱ kan tahẽnte laha leka do ar bae kạmi daṛeaḱ kana. Jaoge hana nawa ruạko ńam gode kana, enrehõ Bạbluwaḱ darakan jion napaete benao rakaṕ lạgit́ do ãṭ kurumuṭu do bae thiroḱ kana. Onka onkate din, mạhnạ, cando parom calaḱte bochor mucạt́ hõ heć seṭeren khan Maraṅ din reaḱ chuṭi hõ hećena, ar Bạblu hõ chuṭi bikạua mente thoṛa din lạgit́ oṛaḱteye hećena. Bạblu ać go-baba do hopon tạkin jemon oṛaḱre tahẽn bhor jãhãlekan eṭkeṭõṛẽ alo hoyoḱtae ona reaḱge jao gekin bhạbitoḱ kana. Thoṛa din paromen tayom mit́din setaḱre Bạblu eṅgat do Bạbluwaḱ aṭet́ samṭao jokheć aṭet́re mit́ṭen araḱge khạli botole ńamkeda. Benet́ jhićkateye ji laga keda bogete jhãj ar ran-ran machage so kana. Ado baskeaḱ ko jom oktere Bạbluye kulikedea, henda bạbu aṭet́re cet́ botol coń ńam akat́a ekal ran range so kana. Bạbluye roṛ ruạṛkeda, “hẽ go rankangea. Hola mander khan ceka coṅ bohoḱ hasu hasuń ạikạuet́kan tahẽkana to, onateń kiriń leda”. Nonḍe lại tora ganoḱa je netar do Bạblu college hostel re tahẽte mit́bar bạṛić gateko são ona botol reaḱ do ạḍi ãṭe sẽṛãwakada. Jao ńindạge ona baṅ khan jạpit́ge baṅ hoyoḱtaea. Eken ona moto do baṅ aćren gateko são sanam lekan bạṛić kạmikore hõe seledoḱ kana.

Bạblu chuṭi cabakate college te ruạṛoḱ okte re ać go-baba takine men oṭowaḱkina, niạ bar do hãḱ ḍhir ńoḱge ṭaka lagawạńa ba, usạraben jogaṛạńa. Bạblu college te calaoen tayom khonge Bạblu apat Sonawaḱ hoṛmo reaḱ ruạ do bại bạite ḍher idiyentaea, mit́din do setaḱre pukhri khon ruạṛ oktere chaṭka tiog tora ackage bohoḱ gul male ạikạuket́ te bhindạṛ got́ena, Bạblu ać gogo Miru do raca regeye jojoḱkan tahẽkana, jãhãnaḱ ńurhạḱ lekae ańjomket́ khan hare phare bahre teye ńir oḍokena. Oḍok torae ńelkede haere Bạblu apatmae bhindạṛ akan, ene ado kạumạu onte note hoṛko hohoakoteye jarwaket́ koa, one ado sanamko mit́ kate oṛaḱ sećko tul idi kedea ar bohoḱ re daḱ ko duladea, mit́ ghạṛi tayom disạ ạcurentaea menkhan mit́ jaṅga ar ti do bae laṛao daṛeaḱ kana. Note Bạblu hõ noa khobor ńamkate ńuhum oktege oṛaḱteye seṭerena, uni ńelte ać baba do arhõ kạumạue raḱateye daram kedea are metadea beṭa gapa ge bajar reaḱ haspatal te idiyińme boge godoḱạń nãhãḱ.

Dosar hiloḱ Bạblu ar ać gogo do setaḱre ać baba bajarte haspatal tekin idi kedea, onḍe ḍaktor hana nawa biḍạu kateye menkeda nui do usạrate inḍia reaḱ bhelor haspatalte idiye hoyoḱa. Bạblu do Ḍaktore kuli kedea ado ḍaktor saheb onḍe do tinạḱ paesa lagaoḱa, ḍaktore lại keda hoe daṛeaḱa amdaj bar lakh lagao daṛeaḱa. Ańjom kate Bạbluwaḱ bohoḱre paseć serma ńurhạ wade lekae bujhạu keda, ente unạḱ ṭaka do okareye ńama. Bạblu apat Sona do noa katha ańjomkate ạḍi ãṭe andesale cabayena, cedaḱ ente bae bhabnaḱa aćaḱ judi jãhãnaḱ hoelen khan tahle Bạbluwaḱ oloḱ do onḍege teṅgo hapeḱ taea, ona iạte sanam bhabna togoć ḍaṭate sahao kate hopon taye metadea, E beṭa do oṛaḱte sen kate ona aboaḱ mit́ bighạ jumi ạkhriń kate paesa ạguime ar inḍiate ran ocoḱ lạgit́ idiyińme. Ṭhik ona katha lekage Bạblu do oṛaḱte senente ako aḍe paseren ṭhen jumi ạkhriń reaḱe lại ket́ khan ṭhik oktere jumi do bar lakh ṭakateye ạkhriń keda. Ar dosar hiloḱ ge ona bar lakh ṭakawante uni do bajar reaḱ haspatalteye monḍayena, calaḱ okterege gạḍi isṭisonreye seṭeren khan aćren mit́ bar gate kodoye ńamket́koa, onko são mit́ bar boge judạ galmarao tege thanaren mit́ bhen pulis hećkate gateko sãote Bạblu Murmu hõko tol idi kedea. Ar onḍe khon do hajot reko bhorao ket́koa.

Becara Bạblu eṅgat apat do haspatal re hopontạkin lạgit́ koyoḱ koyoḱtekin laṅga cabayen rehõ Bạblu do bae seṭerlena. Ar unkin do Bạbluwaḱ jãhãn khoj khobor hõ bạkin ńamleda. Note din dinte Sonawaḱ ruạ hõ ḍher idiyentaea. Khange mit́din do tarasiń okte Bạblu apat Sona Murmu ren khańca miru do hana puritey pharkaoena. Bạblu eṅgat Miru Kisku do haspatalre koṛam oṛejoḱ leka raḱ homorate goṭa haspatal oṛaḱe anduṛ cabakeda. Eskar maejiu nit do cet́e cekaea? Bae bujhạu daṛeaḱ kana. Dhạrtire okoe hõ bạnuḱ kotaea. Jãhã sećgeye koyoḱet́kan sanam sećge ńutge ńelet́a. Note haspatalren calaoić hõ Miru Kiskui metadea, “ E mạ̃i ma nit do mạ̃ṛi idiytam” dukhạli Miru nit cekate aćren dulạṛiạ juriaḱ mạ̃ṛi nonḍe khone iditaya onage maraṅ bhabnatae nit do. Hudis kedae nit do oṛaḱte senkate atoren hoṛko ać goṛowae lạgit́e nehõr akoa. Ṭhik ona lekage mone goṭa kate oṛaḱ seć doe monḍayena, hijuḱ hijuḱte siń cadso do bohoḱ cetan seće gargarao rakaṕ calaoena.

(Ol toṅgeḱa)   

Binod ar Binoe do mit́ atoren cetan ṭola ar latar ṭola ren kanakin. Unkin mit́ atoren kan re hõkin eṭaḱ ko leka dulạṛ epemoḱ reaḱ jãhãn somoe ar ạt ko do baṅ milạu akawat́kina. Tobe unkinaḱ jãhã tinre ge ńapamoḱ tege khạndri dulạṛ reaḱ kin kurumuṭuyet́ tahẽkana. Lukkibar khon mit́din laharege Binod do oṛaḱteye seṭerena. Enhiloḱ ge uni do Baha tuluć ńapamoḱ reaḱe kurumuṭu keda. Menkhan hara juạn akan kuṛi Baha mạ̃i do jãhãtin rege sana leka oṛaḱ khon bae oḍoḱ daṛeaḱa. Binod do Baha takoaḱ oṛaḱ seć calao calao kate cet́ko hudis baṛa kate coṅ ar hõ tala kulhi khon geye ruạṛena. Gapa ạyuṕ seć sunum sasaṅ ojoḱ okte Baha tuluć ńapamoḱ reaḱe goṭa keda.

Lukhibar ạyuṕ bela khange ona rạsi atoren kuṛi koṛa ar bahre atoren aema peṛa kote bapla oṛaḱ do bhan bhanaoḱ ehoṕena. Bela tahẽnrege Binod do mit́ dhao bapla oṛaḱ seć khone ạcur hećente aema gate ko sãoteye ńapam hećena. Binod hõ bạriạtoḱe calaḱa ańjom kate gateko do ạḍi rạskạ ko sodor keda. Menkhan Binodaḱ monge ạḍi ṭhik do bạnuḱtaea. Ente uniaḱ mẽt́ do jaoge Baha geye sendra baṛayede tahẽkana. Ńuhum tora khonge tundaḱ ṭamaḱ aḱ litur aṛaṅ ar kuṛi koṛawaḱ ńohor sereń te atoren kuṛi koṛa ko do hoe bharḍo leka joto ko ghurlạu hećena bapla oṛaḱ seć Binod hõ usạrage Baha sãote ńapamoḱ as te bapla oṛaḱ seć gate Binoe soṅge kateće mohnḍayena. Sunum sasaṅ ojoḱ enege ehoṕ akana, hoṛ ko do nit hõ hijuḱtege menaḱkoa. Oṛaḱ pereć hoṛ bako sahaboḱ kana. Binod ar Binoe do hana pinḍạ noa pinḍạ elecṭạri marsalte ḍig ḍig ńel ńamoḱ rehõ ona koreć kona ar koca sećte kin sendra ạcur keda. Menkhan Bahawaḱ jãhãn tiwan ge bạkin ńam daṛeada.

Inạ mit́ ghạṛi tayom khange Baha do ać gogo sãote bapla oṛaḱ teye boloyena. Binod do ńel kateye ạṛis ńoḱengea. Ente nit hõ Baha do kạṭić gidrạ leka ać gogowaḱ ti saṕ kateye ạcur baṛae kana! Sunum sasaṅ ojoḱ okte re Binod do Binoe bạhuwaḱ goṛote eken mit́ ghạṛi bahre seć oḍok kate khạli boge judạ glamarao chaḍa cet́ge baṅ hoelentạkina. Ente mit́ ghạṛi tayom khange Baha ać gogo do khoḱ kharaḱ ate bahre seće oḍokente Baha arhõ bhitriteye ader kedea. Binod doe bujhạu keda nonka te nui tuluć nonḍe do jãhãn gal marao baṅ hoyoḱa. Uni do Binoe bạhuye saṕ kedea jateć jãhã lekatege Baha gapa ḍuli bibiḱe idiye.

Dosar hiloḱ jog mạńjhi do maraṅ sim raḱ khon goṭa kulhi bạriạt daka jojome hoho purạu keda. Bad gạḍi hõ laha hioḱ rege heć tahẽkana. Binod do laharege bas re sen kate ḍabol siṭ eset́ kateye duṛuṕ akana bạibạite bas do bạriạt kote perejoḱ ehoṕena. Menkhan Binoe tạkin ar Bahawaḱ jãhãn cet́ge baṅ bujhạuḱ kana. Joto ko heć cabaḱ kan rehõ onkoaḱ hijuḱ reaḱ jãhãn katha ge bạnuḱa. Tobe cet́! Baha bae calaḱa? Aema lekan hudis cintạ te Binod doe thar basao cabayena. Un hạbić hõ ona joṛa siṭ re okoe ge bae duṛuṕ oco akat́koa. Ekkalte mucạt́ okte re Binoe tạkin ar Baha do ạḍi hare phare bas reko dećena. Jãhã lekate Binoe barea gidrạ beret́ oco kate onḍe Baha tạkine duṛuṕket́ kinạ. Ar Binoe do Binod ṭhen sen kateye duṛuṕena. Binodaḱ ạḍi as tahẽkanataea Baha ać sãote duṛuṕ kate mit́te galmarao galmarao tekin calaḱa. Menkhan Binoe luṛu Baha bad kate ać geye duṛuṕena. Mit́ sećte do ṭhik geye bujhạu keda Binod, ente aema murubbi ko do bas reko tahẽkana.

11 baja okte seć bạriạt ko do kuṛi oṛaḱ ko seṭerena. Daram ar ca ńu baṛa katege ạḍi usạra bapla lạgit́ ko sapṛaoena. Bapla tayom bapla bhoj jom baṛa kate bạhu jãwãe tạkin do giḍi cimạuṛa lạgit́ ko duṛuṕket́ kinạ. Note kuṛi koṛa ko hõ mucạt́re ạḍi ãṭ rạskạ reko cape akana. Ona oktege Binod do Baha ar Binoe bạhu bahre seće hohoat́ kinte ato reaḱ kulhi mucạt́ seć jhạṛpạ jojo buṭạ ṭhen ko calaoena. Binod ar Baha mit́ ṭhen pantete duṛuṕ oṭo kate Binoe bạhu do thoṛa pharaḱ ńoḱ reye duṛuṕena. Note Binod tạkin duṛuṕ gekin duṛuṕ thir akana, menkhan okoe ṭaḱge katha bạkin ehoṕ daṛeaḱ́ kana. Baha doye hudiseda Binod ge jạnić kathaye roṛ lahaea note Binod hõye hudiseda Bahawaḱ aema katha menaḱtae rehõ cekate cet́ge nit hõ bae roṛeda! Nukin bana hoṛaḱ mocage khora din gạḍiạ rohoṛoḱ leka sanam ulidaḱ ko rohoṛ caba akan tạkina. Mucạt́ re Binod ge kathae ehoṕ ket́te ạḍi okoć gekin galmarao keda. Baha Binode badae oco kedea je, peṛa ạḍi ãṭ ko oḍokoḱ kana. Ać gogo baba tạkin hõkin rạjigea. Menkhan Baha do Binod chaḍa eṭaḱ re bae baplaḱa menteye baḍae oco kedea. Binod do jãhã lekate thoṛa din tạṅgi hataṛe metadea. Jãhã lekate mit́ṭen cạkri ńam lekhan gekin baplaḱa mentekin goṭa keda.

Thoṛa din tayom ge akoaḱ church reaḱ mit́ṭen project re hoṛ hatao lạgit́ ko dhạrwạḱ keda. Baha do ạḍi usạra Binode baḍae ocokedea. Ente Binod do aema din khon bahre reye tahẽnte Mission ko reaḱ jãhãn khoj khobor do bae baḍae daṛeaḱ kan se bae dohoyet́ kan tahẽkana. Binod do ona posṭre jojaoḱ lạgit́ joto lekanaḱ ge tahẽkantaea. Ar ona iạte uni do ạḍi usạra ardase joma keda. Ato oṛaḱ koren aema hoṛ ko Mission ren mit́ bar liḍar ko hõ  Binoe ge kạmie ńama menteko roṛ baṛaet́ tahẽkana, Inṭar bhiu karḍ ńamkate ạḍi aema moṭa moṭa gayiḍ puthi ko paṛhaoḱe dhurạuena. Inṭar bhiu oka leka hoyoḱ reaḱe hudiset́ tahẽkan ṭhik onka leka purạ do baṅ hoe lente Binod do aema roṛ ruạṛ ge bae em daṛeda. Ente uni do Mission reaḱ ar dhorom se baibel ar girjạ reaḱ aema aema bisoe ko thoṛa gan hõ bae baḍae kan tahẽkana. Baha noa ko baḍae kate ạḍi ãṭe mon dukena. Enhõ Binod do arhõ tạṅgi lạgit́e nehõr adea.

Thoṛa din tayom khange Binodaḱ masṭar ḍigri reaḱ resalṭ oḍokentaea. Unkin do bana hoṛ gekin hudiskeda niạ dhao do jãhã lekatege mit́ṭen cạkrie ńamet́ kangea.

Ol toṅgeyena;