Sombar (21 September) khon disạmre nawa damte sunum ạkhriń ehoṕena. Joto juluḱ sunum reaḱ dam liṭer re 20 ṭaka ḍherena. Disạmre ḍigel reaḱ dam 135 ṭaka, kerosine 155 ṭaka, peṭrol 160 ṭaka ar octane 165 ṭaka liṭer ạkhṛińoḱ kana.

Aṭhwar hiloḱ (20 September) Jalani ar Khonij Sompot bibhạg noa ḍhạrwạḱe jạhirkeda.

Noa laha ḍigel 115 ṭaka, kerosine 135 ṭaka, peṭrol 140 ar octane 145 ṭaka liṭer ạkhrińoḱkan tahẽkana. Menkhan mit́ dinte ponea juluḱ sunum reaḱ dam liṭer re arhõ 20 ṭaka kate ḍherena.

2026-27 sikhnạt serma reaḱ gel mit́ kilạsre bhurti teheń khon ehoṕena. Robibar (20 September) khon bachao akan pạṭhuạko do College senkate niṭ akan fee ar kagoj joma kate bhurtiḱ hoyoḱa. Bhurti kạmihora do darakan 22 September dhạbić calao idiḱa.

Sạnicar (19 September) ńindạ gel mit́ kilạsre bhurtiḱ  reaḱ website re sodorakan ḍhạrwạḱ hotete noa khoborko baḍae ocokeda. Inạ sãote Migration reaḱ jo hõ sodorena. Noa hotete okoe do oka College re bhurtiḱ reaḱ ạtko ńamkeda pusṭạute sodorakana.

Niạ dhao gel mit́ kilạsre bhurtiḱ okte pạṭhuạko do thoṛa jạruṛoḱ kagoj sãote dohoe hoyoḱtakoa. Onako do kana, SSC biḍạu reaḱ mark sheet, Certificate copy; SSC biḍạu reaḱ admit card; bar khon ponea copy passport chobi; Online ardas reaḱ nisṭan copy; pạṭhuạ ar gogo baba se guardian aḱ phone nombor.

Sedae reaḱ katha. Mit́ṭen koṛa gidrạ pusi ńamkedea. Ado pusi do uni koṛa gidrại metadea, mit́ṭen panahi kirińạńme. Enḍekhan amaḱ jion iń bodoltama.”

Khange uni koṛa gidrạ do pusi panahi kirińadea. Panahi horok kate din hiloḱ mit́ṭen kate janware sikạrkoa ar raj ṭhene idikoa are metaea, E raj, ińren mạlik am lạgit́ sandese kol akada.”

Panahi horok akat́ pusi ńelte raja ạḍi ãṭe rạskạyena. Ado bại bạite raj são pusiaḱ mońj sompok benao rakaṕena. Mit́din raj aćren kuṛi gidrạ sãote daṛane calaoena. Ạḍi ghạṛić daṛan tayom pusi raje metadea, “Raj nunạḱbon daṛakeda, pasećem laṅgayena. Lahare mit́ṭen pukhri menaḱa. Onḍege paerakate thoṛa ghạrić jirạujoṅme.

Raj doe menkeda, “ṭhik kathagem meneda.” Khange raj do paeraḱe pheḍena. Ona oktere pusi do rajaḱ horok bandenaḱe oko keda. Pusi uni koṛa gidrại metadea, “ tinre iń kikiạua, okoe co rajaḱ kicrićko kombṛo akat́taea’ un jokhenge rajaḱ kicrićem ạguia.

Pusiaḱ katha lekage uni koṛa gidrạ do rajaḱ kicriće ạgukeda. Ona kicrić rajae caladea ar pusi metadea, “E raj, ińren mạlik amaḱ kicriće ruạṛ ạgukeda.”

Khange raj ạḍi ãṭe kusiyena ar aćren hopoera sãote baplakedea. Khange uni koṛa gidrạ pusiaḱ akel ńelte ạḍi ãṭe hahaṛayena. Bapla tayom uni koṛa gidrạ do pusi hõ ać sãotege raj bakholte idikedea.

Eṭaḱ jilạko khon noa banar jilạre dengue ruạ ḍher pasnaoḱ kana. September cando pạhil 10 din reaḱ hisạb lekate, Chapainawabgonj jilạ haspatalre dengue ruạre jạbunakan hoṛaḱ soṅkha 1 hajar 16 goṭen paṛaoakana. August cando eken noa jilạre 643 goṭen dengue rugiko ńamakana, oka do Rajshahi bibhạg reaḱ 8 jilạko modre joto khon ḍher.

Aḍepase hoṛaḱ obhijog, jãhãtãhã mạilạ baṅ sapha karonte Aedes sikṛĩć ḍherko hoponoḱ kana.

Rajshahi nagrahare eken bar candote Aedes sikṛĩć arhõko ḍherena. Rajshahi Medical College Haspatalre rugikoaḱ ạḍi bhiṛ. Dinạm din dengue rugiko bhurtiḱ kana. September cando reaḱ talamala khon nit dhạbićte 82 goṭen rugi bhurti menaḱkoa.

Rajshahi City Corporation do sapha sạphi ar Aedes sikṛĩć maraoko lạgit́, ona sãote hoṛko sontor se aodhanko lạgit́ bises kạmihorae hataokeda.

Oṛaḱ aḍepase ṭayar, ḍab cokaḱ se daḱ baṅ jaroa ocoaḱ hoyoḱa. Siń ar ńindạ jạpit́ okte mosari beohar hoyoḱa. Hoṛmore ruạ ńeloḱ khan usạra daktaraḱ solha hatao hoyoḱa ar mãyãm biḍạu hoyoḱa.

Disom reaḱ kạrkhanare gas ar bijli usạra jogaṛ reaḱ ase emena Maraṅ montri. Calaoen Sombar socibaloe re 21 goṭen bepari songoṭhon protinidhiko sãote mit́ bạisire noa ase emakana.

Bạisi mucạt́re FBCCI Prosasok Md. Fazlul Hoqe doe baḍae ocokeda, noa as kathate kạrkhanaren mạlikko maraṅ asko ńamkeda. Calaḱkan hapta khon noa ṭonṭa cabakate gas-bijli laha leka jogaṛ reaḱ kạmihora hatao akana. Noa bạisire eken thoṛa din reaḱ ṭonṭa caba do baṅ, tayom daram dinre juluḱ sunum reaḱ ṭonṭa cabae reaḱ kathako sodorkeda.

Maraṅ montri ren ạyurić Mahdi Amin doe meneda, gas reaḱ ghạṭti cabae lạgit́ sarkaraḱ hudis lekate darakan 2028 serma ehoṕ lahare tesar haṭiń reaḱ kạmi FSRU cạlu reaḱ goṭa hoeakana.

Banijomontri ar Maraṅ montri ren Ortho upodestawaḱ seṭerte noa bạisire FBCCI, BGMEA, BKMEA ar BTMA selet́ 21 goṭen  bepari songoṭhonren protinidhi selet́ko tahẽkana.

Gel mit́ kilạsre bhurtiḱ lạgit́ bachnao akan pạṭhuạkoaḱ jo gapa 16 Sepetember (Budhbar)  setaḱ 8:00 baja okte sodoroḱa. Moṅgolbar (15 September) Dhaka Madhomik ar Uccho Madhomik sikhnạt board hotete lại sodorena.

2026-2027 sikhnạt serma reaḱ gel mit́ kilạsre bhurtiḱ ardas calaoen Robibar mucạt́ akana. Nitoḱ bachanao akan pạṭhuạko jo sodoroḱ tạṅgire menaḱkoa.

Board hotete baḍae ńamena, gel mit́ kilạsre bhurtiḱ online arda calaoen 13 September Robbibar ńindạ 8:00 okte cabayena. Niạ dhao gel mit́ kilạsre bhurtiḱ lạgit́ 9 lakh 95 hajar 234 goṭen pạthuạko ardas akada.

Gel mit́ kilạsre bhurtiḱ ardas calaoen 2 September ehoṕlena. Bhurtiḱ ạri pańja katet́ mit́ṭen pạṭhuạ kom se kom 5 goṭen ar ḍherte 10 goṭen college se ona man reaḱ sikhnạt ṭhãonare ardas reaḱ ạtko ńamakada.

Jo sodor tayom bachnao akan pạṭhuạko do bhurtiḱ nisṭan lạgit́ 18 September ńindạ 8:00 baja dhạbić okto ko ńama.

Niṭ akan oktore bhutriḱ bako nisṭan daṛeaḱ khan pạṭhuạkoaḱ bachnao ar ardas do bạtiloḱa. Pạthuạkoaḱ kusi sana lekate Migration reaḱ jo do 19 September setaḱ 8:00 baja okte sodoroḱa. Gel Mit́ kilạsre bhurtiḱ reaḱ kạmihora do 20 khon 22 September dhạbić calao idiḱa. Ar bhurtiḱ reaḱ jotowaḱ kạmihora purạukate 23 September khon kilạs ehoboḱa.

Nit dhạbićte disomre 1 karoṛ 97 lakh 71 hajar 720 goṭen gidrạ ham rubella reaḱ ṭikạko hataokeda, oka do jạruṛaḱ khon hõ amdaj 10% bạṛtige.

Sastho Montronaloe ren ạyurićko baḍae ocokeda, nes bochor March reaḱ mucạt́ seć ham ruạ ńelen khan Sarkar do ạḍi usạrate 5 April khon pạhil dhapte disom reaḱ 18 goṭen jilạ ar 30 goṭen upạjilạre ṭikạ emoḱ kạmihorae ehoṕkeda. Dosar dhapte 12 April khon 4 goṭen City Corporation (Dhaka dạkhin, Dhaka utạr, Barisal ar Mymensingh) ar mucạt́ dhapre do 20 April khon goṭa disomre mit́ dhaote ham-rubella ṭikạ emoḱ kạmihorae ehoṕkeda, oka do nit hõ calaḱkan. Menkhan disomre nit hõ ham ruạ menaḱ karonaḱte 26 September khon ham ruạ teṅgo daram birudre sarkar arhõ nawate ṭikạ emoḱ kạmihorae ehoṕ lạgidoḱ kana.

Sastho odhidaptor reaḱ khobor lekate baḍaeoḱ kana, Sarkar do 1 karoṛ 80 lakh 15 hajar 64 goṭen gidrạ ham-rubella ṭikạ emako reaḱe goṭaleda. Menkhan 13 September dhạbićte ńeloḱ kana, goṭa disomre 1 karoṛ 97 lakh 71 hajar 720 goṭen gidrạ ṭikạko ńamkeda.

Sastho odhidaptor reaḱ ham-rubella ṭikạ emoḱ center reaḱ khobor lekate baḍaeoḱ kana,, Barisal bibhạgre 11 lakh 10 hajar 689 goṭen, Chotogram bibhạgre 48 lakh 41 hajar 924 goṭen, Dhaka bibhgạre 49 lakh 19 hajar 913 goṭen, Khulna bibhạgre 16 lakh 95 hajar 779 goṭen, Mymensingh bibhạgre 15 lakh 30 hajar 915 goṭen, Rajshahi bibhạgre 22 lakh 13 hajar 197 goṭen, Rangpur bibhạgre 20 lakh 73 hajar 488 goṭen ar Sylhet bibhạgre 13 lakh 85 hajar 805 goṭen gidrạ ham-rubella ṭikạko ńamkeda.

Onka leka City Corporation ṭoṭha reaḱ Barisal City Corporation re 44 hajar 119 goṭen, Chotogram City Corporation re 3 lakh 36 hajar 870 goṭen, Comilla City Corporation re 48 hajar 643 goṭen, Dhaka Utạr City Corporation re 5 lakh 57 hajar 688 goṭen, Dhaka dạkhin City Corporation re 4 lakh 18 hajar 972 goṭen, Gazipur City Corporation re 2 lakh 6 hajar 927 goṭen, Narayanganj City Corporation re 83 hajar 697 goṭen, Khulna City Corporation re 96 hajar 792 goṭen, Mymensingh City Corporation re 62 hajar 305 goṭen, Rajshahi City Corporation re 63 hajar 59 goṭen, Rangpur City Corporation re 82 hajar 253 goṭen ar Sylhet City Corporation toṭhare 72 hajar 449 goṭen gidrạ ham-rubella reaḱ ṭikạko ńamkeda.

Noa babotre arhõ kukli rakaṕlenre Sastho odhidaptor ren maraṅ ạyurić Professor Dr. Md. Zahid Raihan doe baḍae ocokeda, gidrạko ṭikạ emoḱ kạmihora do calao idiḱa. Menkhan darakan 26 September khon goṭa disomre arhõ gidrạko ham ṭikạ emako reaḱ lại jạhirakana. Uni doe menkeda, noa kạmihora reaḱ asol motlob do kana, jemon okoe gidrạge ṭikạ hatao khon aloko bad paṛaoḱ.

Tumạl: Jugantor

Isor do Solomon ṭhen kukmũte sodorenteye metadea; Ma khojme cet́ iń emama. Solomon do akele khojket́a. Thoṛa din tayomre barea maejiu lapaliskin hećadea; unkin do mit́ ṭhenkin tahena, ar bana hoṛge mimit́ goṭećkin gidrạwana. Mit́ maejiu do mit́din ńindạre aćren gidrạ gitić loṭomkedeteye ten goćkedea, ar beret́kate dosarićren gidrạ gabṛeante bodolte aćren goć gidrại hạmbut́ oṭoadea. Bana hoṛ do tirit́ lekakin roṛ gujuḱ kana, jivet́ gidrạren eṅgat kạnạń mente. Solomon doe hukumket́a, Den tarwaṛe ạguạńpe. Tarwaṛeko ạguket́ khane hukumket́a, Ma nui jivet́ gidrạ bara bạrite paṛagepe jãhãlekate bana hoṛ ạkinaḱ bakhrakin ńam. Khange unkin modre mit́ maejiu ạḍi garteye menket́a, Uni baṛe emaepe gidrạ do, alo babape paṛagea!

Uni dosariće menket́a, Ma paṛagepe tho, jãhãlekate amren hõ baṅ ińren hõ baṅ. Khange Solomone bicạrket́a, Gidrạ jivet́ tahen ńam kanić do gidrạ emaepe; ente inige gidrạren eṅgat. Joto Isrạyel hopon ona bicạr ańjomket́te raj ạḍiko boroadea; enteko ńelket́a, Isor reaḱ akelteye ḍabao akana mente. Solomon do joto hoṛ khon akelane tahẽkana; uniaḱ akel do ạḍi sạṅgiń ḍamḍaheyentaea, ar Sebaren rạni do uniaḱ akel ańjom lạgit́e hećadea.

Solomon do ạḍi phen ar binti katha ar sereńe joṛao akat́a. Uni do bora bor sulukte din calaḱkan tahẽkantaea, ar Isrạyel hopon do ako akoaḱ darkha dare ar loa dare umulre khạtirjoma dinko ṭalaoet́ tahẽkana. Uni do sạṅgiń disomrenko tuluće bạnij beparet́ tahẽkana ar ạḍi bạṛić dhone upcạuana. Uni do Jirusalem reaḱ Moria burure bondobos tạmbu bodolte mit́ṭeć ạḍi ṭhosok mundil Probhui benaoadete ona reaḱ sonot utạraḱre bondobos-sunuduke dohoket́a, E Probhu, sermako reaḱ sermare bam sahoṕ kana, ińiń benao akawat́me ba cetataḱ. Enrehõ am do noa oṛaḱ khon rakaṕam mit́ ke mit́ nindhạn koejoṅ do amaḱ sermare baṛe ańjomme! Ar Isrạyelrene baṅ kan jãhãe bidisiạ hoṛ noa oṛaḱre koejoṅe hijuḱ khan, uniaḱ koejoṅ hõ baṛe ańjomtaeme.

Solomon do mucạt́ dhạbić nonka dhorom do bae tahẽlena. Uni do ạḍi utạr boṅga hoṛ kuṛiye baplaket́koa are haṛamen khan, onko do uniaḱ mon nunạḱko or laḍeket́taea, boṅga hoṛkoren boṅga muṭhạn lạgit́ pinḍe benaoket́a. (1 Raj.3-11)

Dengue ruạ teṅgo daram birud, ona khon bańcaoḱ ar sapha sạphi tahẽn lạgit́ pe cando reaḱ kạmie uḍhạukeda Maraṅ Montri Tareq Rahman. Sạnicar (12 September) setaḱ jatio songsod bhobhon reaḱ dạkhin plaza re noa pe cando reaḱ kạmihorae uḍhạukeda.

Maraṅ Montri doe menkeda, disomre bodol ạgui lạgit́ sanamko mit́te kạmi hoyoḱtabona. Sanamko mit́kate disom bandhao lekhan jãhãn tạkićaḱ bae hape daṛeabona.

Darakan pe candote dengue ruạ teṅgo daram ar ona khon bańcaoḱ reaḱ kurumuṭui hoyoḱa. Noate 100% baṅ sạbud lenkhan arhõ eṭaḱ kạmihora hatao hoyoḱa.  

Arhõe menkeda, nijạ niropon tahẽn hoyoḱa, somaj hõ niropon dohoe hoyoḱa. Haptare mit́ ghonṭa sạphi sạphi lạgit́ okto emoḱ hoyoḱa. Enḍekhan khạṭige bodol hijuḱa. Hanḍe nahnḍe mạilạ baṅbon giḍia, sạpha sạphi disom benaore joto hoṛaḱge maraṅ dạyik menaḱa.

Dengue ruạ teṅgo daram ar sapha sạphi kạmi do 12 September khon 12 December dhạbić calao idiḱa.

Namḍak gaenaha Shreya Ghosal aḱ aṛaṅ reaḱ jạdute goṭa dhạrti bundena. Kukmuren gaenaha são mit́ stage re sereń reaḱ ạte ńamkeda Baṅgladisomren santal kuṛi Athena Besra.

Calaoen 4 September juktorasṭro Bosṭon reaḱ Agganis Arena re Shreya Ghosal aḱ mit́ṭen sereń durạṅ akhṛa hoyena. Ona akhṛare Shreya Ghosal sãote sereń ạte ńamket́ Athena do kukmu lekae ạikạukeda.

Baṅgladisom reaḱ Rangpur jilạ Pirganj upạjilạre mit́ santal gharońjre Athenawaḱ janam. Uni do Central Connecticut State University reaḱ Social Work bibhạg ren pạṭhuạ kanae. Nit uni do ać gharońjrenko sãote Juktorasṭro reaḱ Menchester nagrahare menaḱkoa.

Gidrạ khonge Athena do ạri-cạli, eneć sereńre ạḍi mon-subạ tahẽkantaea. Dinạm din ạri-cạli beohar ar laṛcaṛ talate sapṛao akana. Ḍig ḍig marsalkote joloḱkan stage re sereńket́ reaḱ katha lại sodorre Athena doe menkeda, Shreya Ghosal lekan nunạḱ gunan gaenaha aṛere teṅgo katećiń sereń daṛeaḱte ạḍi gorobiń aṭkareda.

Onka leka ać gogo baba hõ rạskạte mẽt́daḱ bạkin sambṛao daṛeada. Ạkinren gidrạwaḱ nunạḱ maraṅ hameṭ ńelte ạḍi ãṭkin goroboḱkana. Athena lạgit́ ać gogo baba dhạrtiren hoṛko ṭhen ạsirbadkin koekeda, jemon tayom daram dinre arhõ maraṅaḱe hameṭ daṛeaḱ.

Baṅgladisomren santal kuṛiaḱ noa hameṭ do eken Athena eskaraḱ jit do baṅ kana, bickom Baṅgladisomre tayom akan hoṛko selet́ hajar hajar juạn ar rakaṕ hijuḱkan gaenahako udgạuko reaḱ maraṅ onoṛ kana. Noa doe pormaneda, bud ar kurumuṭu tahẽlenkhan dhạrti reaḱ jãhã jaega se kona khonge kukmu cuṛạrem rakaṕ daṛeaḱa.