Rajshahi jilạ re̠aḱ Tanore re̠ Ạdibạsi mit́ kuṛi gidrạ Girjạren Father hote̠te̠ konac (Rape) re̠aḱ khạtirte̠ko giriptar akadea Father Prodip Gregory. Uni kuṛi gidrạ do̠ pe̠ din o̠ṛaḱre̠ aṭo̠k do̠ho̠ kate̠ konac akade re̠aḱ nạlis ńam akana. Pạhilre̠ noa ghoṭna khạtir onḍe̠nko hoṛ são dupuṛuṕ kate̠ sapha re̠aḱ kurumuṭu hoele̠na. Me̠nkhan Police o̠na kho̠bo̠r ńamkate̠ uni kuṛi gidrạ do̠ Father aḱ ti (hephajot) khon ko oḍoṅ agu kedea.

Rajshahi jilạ Tanore thana Munḍumala Mahali ato re̠aḱ Sadhu Mery Viyanna Girjạ re̠n Father Prodip Gregory birudte̠ ạdibạsi mit́ kuṛi gidrạ aṭok kate̠ konac re̠aḱ nạlis hoyakana.

Niạ muhim re̠ paṛaoakan gharońj ren koaḱ khojoḱaḱ (dạbi) calao̠e̠n 26 tạrik se̠taḱ ber  uni kuṛi gidrạ do ghãs ge̠ge̠t́e̠ calao̠ le̠na ar onḍe khon bae ruạṛ akana. Uni gidrạ bae ńamo̠ḱ kante̠ kuṛi gidrạ ren ać boeha Thanare mit́ GD doe e̠m le̠t́a.

No̠a gho̠ṭo̠na re̠aḱ 2 din tayom 28 September se̠taḱ be̠la baḍaeyoḱ kana je, uni gidrạ do̠ Munḍumala re̠aḱ girjạ re̠n Father aḱ o̠ṛaḱ re̠y ńam akana. Tayomte̠ atoren ạyurko  ar Ḿunḍumala Govt. High School re̠n Head Master Kamiel niạ girjạ bhitrirege saphae̠ lạgit́ galmarao̠ko duṛuṕle̠na. O̠na tayo̠m Father do̠ Rajshahi ko kol pharak kedea.  Ar kuṛi gidrạ do̠ Sister ko  ṭhe̠nko do̠ho̠kadea. Niạ kho̠bo̠r baḍae kate̠ Tanore Upojilạ Nirbahi Officer Police idikate̠ uni gidrạe bańcao̠ kedea. Mo̠ṅgolbar ńindạge uni kuṛi gidrạre̠n boe̠ha bạdi hoekate Opohoron ar konac (Dhorson) re̠aḱ nạlis e̠m kate̠ Girjaren Father birudtey mamla akada.

Tumạl: Somoynews.tv

Sirjon, ho̠e-lo̠lo̠ (Jolobayu) ar manwa rukhiạko reaḱe ekrạṛena Diso̠m Mukhiạ Sheikh Hasina são gota dhạrtiren 64  manotan ạyuran hoṛko.

Niạ khạtir calaoen so̠mber “Leaders’ Pledge for Nature: United to Reverse Biodiversity Loss by 2030 for Sustainable Development” ńutuman mit́ kạmihora ko eho̠ṕakada.

Sirjon, ho̠e-lo̠lo̠ ar manwa rukhiạko lạgit́ kạmi ho̠ra hatao ar eṭaḱko udgạu emako  lạgit́ niạ ekraṛ so̠mbat ko kolkeda dhạrtiren ạyurko. Emmanuel Macron, Angela Merkel, Justin Trudeau, Jacinda Ardern, and Boris Johnson no̠ko dhạrtiren maraṅ ạyurko são manotan Sheik Hasina hõ ekaraṛ sakamrey suhikeda. Niạ o̠l sakam ho̠tete so̠do̠rena je, dhạrtire sirjon, ho̠e-lo̠lo̠ ar manwako rukhiạko lạgit́ sanam hoṛ mit́kate ko kạmia. Nit ar darakan din lạgit́ niạ sirjon mońj do̠ho̠e  ar o̠na cetanre paṛaolen ẽṭkeṭoreć ko khon bańcaoḱ lạgit́ sanamko mit́kate kạmi ge jo̠ tet́ do.

Niạ sakamre suhi em diso̠m ko do̠ Bhuṭan, Kanaḍa, England, Belgium, Denmark, EU, Finland, Germany, Grees, Hungary,  Ireland, Israel, Itali, Mexico, Norway, Portugal, Spain, ar Suiḍen.

Mution se̠ Khotiạnre̠ Ńutum O̠l caṛhao̠

Jumi-Jae̠ga re̠aḱ kho̠tiạnre̠ ńutum o̠l caṛhao̠ se̠ bo̠do̠l do̠ ạḍi jạruṛ biso̠e kana. Ar baṅ baḍae̠ khạtirte̠ o̠kte̠ o̠kte̠ no̠a kạmire̠ ae̠ma le̠kan haro̠nre̠bo paṛao̠ daṛeaḱa. O̠nate̠ no̠a so̠ṅkha re̠ no̠a o̠l re̠aḱ iń kurumuṭu ke̠t́a. English pạrsi (Mution) khon no̠a do̠ ãṛgo he̠ć akana; o̠kado̠ kho̠tiạnre̠ ńutum o̠l caṛhao̠ se̠ ńutum bo̠do̠lko me̠taḱ. 1956 se̠rma lahare̠ no̠a biso̠e ce̠tanre̠ o̠ko̠e̠ manwa koaḱ jahan hudisaḱ do̠ baṅ tahẽkana. Ce̠daḱje̠ un o̠kte̠re̠ do̠ jumi se̠ bhumi do̠ jumidar koaḱ go̠bo̠lre̠ tahẽkana. 1956 se̠rma re̠aḱ April cando re̠aḱ 14 tạrikre̠ joumidar ar mo̠ddho̠so̠to bhogi koaḱ ạidạriko cabakate̠ jumire̠n aso̠l mạlikko ar jumi re̠aḱ tinạḱgan (poriman) ko re̠aḱ biso̠eko o̠l caṛhao̠ akana. Hal Nagad se̠ record re̠aḱ sudhrạu (soṅso̠dhon) do̠ Mution re̠aḱ ạḍi jạruṛ bisoe kana. Mution se̠ ńutum o̠l caṛhao̠ me̠nte̠ do̠ jumi-jae̠gare̠n nãwã mạlik me̠taḱme pạhil mạlik bad kate̠ nãwã mạlikaḱ ńutum o̠l caṛhao̠ bujhạuḱa.

Mution se̠ ńutum o̠l caṛhao re̠aḱ jo̠ste̠t́: Nãwã reco̠rdre̠ khotiạnko hõ jạruṛ hoyoḱ khan bo̠do̠l kate̠ reco̠rd Halkoron se̠ Up-to-date lạgit́ State Acquisition and Tenancy Act 1950 se̠rma re̠aḱ 143 dharare̠ no̠a do̠ be̠bo̠sta akana. State Aquisition and Tenancy Act re̠aḱ 143 dhara le̠kate̠ Collector do̠ ạn re̠aḱ sakam re̠ o̠l caṛhao̠ akan ponaḱ o̠ṅso̠ re̠aḱ latarre̠ nãwãte̠ bo̠ndo̠bo̠s se̠ dudhrạu (so̠ṅsodho̠n) lạgit́ Revised (Record of Rights) re̠aḱ aso̠l bhul (Bo̠nafide mistake) ho̠ele̠n khan nãwãte̠ o̠l caṛhao̠ o̠coye lạgit́ nẽho̠rae̠ hoyoḱa. No̠a do̠ Collectoraḱ mit́ṭe̠n dạyik kạmi kantaya.

1. Ńutum o̠l caṛhao̠ khạtirte̠ nãwã kho̠tiạn o̠l oḍoko̠ḱa. Sarkaraḱ record re̠ nãwã hoṛaḱ ńutum o̠l caṛhao̠ḱ taya.
2. Jumi-Jae̠ga kiriń- ạkhriń kate̠ hõ nãwã ńutum o̠l caṛhao̠ se̠ nãwã record baṅ hoe̠ khạtirte̠ pạhil mạlikaḱ ńutum o̠l tahen khạtirte̠ pạhil mạlik do̠ e̠ṛe̠ kate̠ o̠na jumi-jae̠ga arhõ do̠hṛae̠ te̠ se̠ te̠sarte̠ e̠ṭaḱ ho̠ṛko ṭhe̠ne̠ ạkhriń daṛe̠aḱa. Ar o̠nate̠ ae̠ma le̠kan muskilaḱ do̠ hoe̠ daṛe̠aḱa. O̠nate̠ ńutum o̠l caṛhao̠ do̠ ạḍi jạruṛa.
3. Ńutum o̠l hạṭiń tãhen khan Khajna e̠m ạḍi algao̠a.
4. Baṅ khan rin, O̠ṛaḱ-Duạr te̠ar ar e̠mante̠aḱ re̠ ńutum ol caṛhao̠ do̠ ạḍi jạruṛa.
5. Nijaḱ Jumi-Jae̠ga nij ńutumte̠ o̠l baṅ tahen khan e̠ṭaḱ so̠ṅge o̠warisko se̠ jumi so̠rre̠n e̠ṭaḱ mạlikko akoaḱ ńutum dolilre̠ o̠l caṛhao̠ lạgit́ko kurumuṭu daṛe̠ḱa.

Ńutum O̠l caṛhao̠ do̠ bar le̠kate̠ hoe̠ purạuḱa. O̠na do̠ no̠nka le̠ka-

1. Aso̠l khotiạnre̠ o̠lakan ńutum bad kate̠ nãwã jumi se̠ e̠ṭ̣aḱ ńutum o̠l caṛhao̠ le̠kate̠.
2. Jumi-Jae̠gare̠n jãhãe̠ bhạgidar se̠ nãwã mạlik pạhil khotiạn khon aćaḱ ńutum bad kate̠ oḍoke̠ me̠njo̠ṅa me̠nte̠ ać moto e̠ṭaḱ khotiạn re̠ ńutum o̠l caṛhayae̠ le̠kate̠.

State Acquisition and Tenancy Act re̠aḱ 116 dhara le̠kate̠ jãhãe̠ mạlikaḱ mit́ṭe̠n moujare̠ me̠naḱ mimit́ go̠ṭe̠n khotiạn re̠aḱ mimit́ go̠ṭe̠n dag no̠mbo̠r ko Revenue Officer aḱ aṅgocte̠ o̠na apan ạ̣pin dag no̠mbo̠r ko do̠ mit́ṭe̠n khotiạnre̠ o̠l caṛhao̠ oco daṛe̠aḱa. Ar 117 (1) (C) dhara re̠aḱ niạm o̠l caṛhao̠akan le̠ka ae̠ma owariskoaḱ khotiạn do̠ hạṭiń kate̠ apan ạpin kho̠tiạn bo bo̠ndo̠bo̠s daṛeaḱa. Ar no̠a lạgit́ Revenue Officer ṭhe̠n o̠l caṛhao̠ akan e̠ṭaḱ owarisko se̠le̠t́ ardas se̠ nẽho̠r lagao̠ḱa. Nẽho̠r ciṭhi se̠ Ardas do̠ Baṅgladiso̠mre̠ do̠ bạṛti kae̠te̠  Baṅla pạrsite̠ko o̠le̠da. O̠nate̠ Baṅgla pạrsite̠ nẽho̠r ciṭhi re̠aḱ nạmuna do̠ń o̠le̠da.

Motions se Ńutum o̠l chaṛhao o̠kte jạruṛaḱ kago̠jko:

1. S.C, S.A, ar R.S khotiạn se̠ po̠rca re̠aḱ pho̠ṭo co̠py.
2. Registry akan do̠lil re̠aḱ asol co̠py se̠ attested co̠py.
3. O̠warisaḱ aso̠l certificate.
4. Judi lahare̠ jumi-jae̠ga hạṭiń akan khan jumi hạṭiń re̠aḱ po̠rca co̠py.
5. Khajna re̠aḱ rosid.
6. A ar R.S re o̠l caṛhao̠ akan kho̠tiạn selet́.
7. Town se̠ so̠ho̠r elakare̠ jumi tãhen khan Servear officer hote̠te̠ o̠doḱ akan/ o̠l caṛhao̠ akan report.
8. Jumi-Jae̠ga case/ Dewani mo̠kaddo̠ma hote̠te̠ declare akan rai re̠aḱ attested co̠py ar sudhrạu (soṅsodho̠n) akan kho̠tiạn co̠py.

Mution se Ńutum o̠l caṛhao̠ re̠ kho̠ro̠c do̠ no̠nka le̠ka:

1. Ardas (Abedon) se̠ nẽhor ciṭhi babot 5 (moṛẽ) Ṭaka.
2. Notice babo̠t 2 (bar) Ṭaka e̠ke̠n 4 ho̠ṛ lạgit́, o̠na kho̠n bạṛti hoṛko lạgit́ do̠ e̠ke̠n 0.50 paisa hisạb te̠ ạdiyako.
3. Reco̠rd Sudhrạu (so̠nso̠dho̠n) lạgit́ 200 (bar sae) Ṭaka fee e̠m ho̠yo̠ḱa.
4. Mimit́ go̠ṭe̠n mution kho̠tiạn babo̠t 43 ( pon gel pe) Ṭaka e̠m hoyoḱa.

Hisa̠b le̠kate̠ ńelo̠ḱ kana moṭre̠ 250 Ṭaka,+No̠ṭice babo̠t 4 Ṭaka, ar o̠na kho̠n jạsti mimit́ hoṛ ko lạgit́ 0.50 paisa kho̠ro̠co̠ḱa.

[NB: Ae̠ma o̠kte̠ so̠rkar do̠ mution fee ko bo̠do̠l daṛeaḱa; o̠nate̠ noa biso̠e te̠ kho̠bo̠r hatao̠ jạruṛa]

Go̠go̠ ce̠daḱ se̠taḱ bam ho̠ho̠ be̠re̠t́ le̠deńa

Iń tạṅgirez me̠naḱa amaḱ no̠a katha ańjo̠m lạgit́

Go̠go̠ ce̠daḱ am iń paṛhao̠ḱ bam metạń kana?

Ińaḱ paṛhao̠ḱ lạgit́ mo̠n chaṭpaṭao̠ḱ kantińa.

Go̠go̠ am do̠ ce̠daḱ iskul calaḱ baṅe̠m metań kana?

Iń je, iskul calaḱ sanayedeń.

Go̠go̠ am ce̠daḱ iń iskul re̠aḱ tiffin o̠kte̠ re̠aḱ jo̠maḱ baṅem te̠arạń kana?

Iń je ṭiffin somoy ạḍi ạ̃ṭ re̠ṅge̠ćjińa.

Go̠go̠ am ce̠daḱ́ ạri cạli bam cet́ạń kana?

Iń je amaḱ sikhạunaḱ tege lạṭuḱ  hoyoḱ sanayedeń!

Go̠go̠ am ce̠daḱ jahanaḱ ce̠ka lahare̠ bam baro̠ne̠dińa?

Iń amaḱ diḍạuić hoyoḱ sanayedeń.

Go̠go̠ am ce̠daḱ ạyuṕ o̠kte̠ o̠lo̠ḱ paṛhao̠ ar kudum lại bam cet́ ạń kana?

Te̠he̠ń do̠ am be̠gor iń do̠ ạḍi e̠skarge,

Iń le̠ka be̠batao̠ić ko̠ṛa gidrạ,

Amaḱ khub jạruṛ me̠naḱtama.

Ko̠ro̠na ajarte Baṅgladiso̠m reaḱ naṅgraha ṭoṭhakoren 66% hoṛ  ar ato ṭoṭharen 41% hoṛ akoaḱ kạmi ko at́ akada.World Bank report  ‘Losing Livingwoods: The Labor Market Impacts of Covid-19 in Bangladesh’ ńutuman mit́ sodor sakamre niạ do so̠do̠r akana. O̠na re so̠do̠r akan o̠l lekate ńelo̠ḱ kana Rajshahi Bibhag reaḱ naṅgraha ṭotharen 61% hoṛ ar ato ṭoṭharen 35% hoṛ kạmi ko at́akada.

ko̠ro̠na ajar khạtir kạmi ṭhạire cet́leka  menaḱkoa hoṛ ona cetan khoj to̠las hatao hoelena calaoen 10 June khon 10 July  phonere katha roṛ kate niạ do̠ so̠do̠r akana. To̠be niạ so̠do̠r sakam saṕṛaore Baṅgladesh Porisoṅkhan Bureau jo̠to̠khon mucạt́ Household Income and Expenditures jorip reaḱ ńamen jo cetan World Bank e kho̠ndroṅ akada.

O̠nare ńel akana naṅgraha bhitrere jo̠to̠ kho̠n ḍher kạmi ko at́ akada Dhakare. No̠nḍe do̠ 74% hoṛ kạmi ko at́akada. Dhaka bibhag reaṅ ato ṭo̠ṭhare  45% hoṛ kạmiko at́ akada.

Ato̠ ṭoṭha bhitrere jo̠to̠kho̠n bạṛti kamiko at́ akada Borishal Bibhagren hoṛ. No̠nḍe do kạmi bego̠r 47% hoṛ  ar naṅgraha re menaḱ hoṛko mo̠dre 54% kạmi ko at́ akada.

 So̠do̠r sakamre arhõ ńelo̠ḱ kana-Chittago̠ng bibhag reaḱ naṅgraha ṭo̠ṭhare 63% ar ato̠re 44% hoṛ, Khulna bibhagre naṅgraharen 54% ar ato̠ren 39%, Rajshahi bibhagre naṅgrahare 61% ar ato̠re 35% hoṛ, Rangpur bibhag naṅgrahare 58% ar ato̠re 37% hoṛ, Shylheṭ bibhag naṅgrahare  66% ar ato̠re 39% hoṛ kạmiko at́ akat́takoa.

Manotan Maraṅ montri Janam din re̠aḱ sarhao̠ ar johar Teheń do̠ Bo̠ṅgo Bondhu re̠n gạkhuṛ ho̠po̠ne̠ra hor̠kore̠n aḱyurić Manotan Maraṅ Montri Sheikh Hasinawaḱ 74 aḱ Janam din. No̠a dinre̠ Mano̠tan sheikh Hasina Diso̠mre̠n Sanam Mano̠tan hoṛko ar Bahre̠ diso̠mre̠n Diso̠m Aḱyurko Janam din re̠aḱ Johar ko e̠m akawadea, Sanam kogeko me̠n akada Baṅgkadiso̠mre̠ Maraṅ Montri do̠ aćaḱ gạkhuṛ ạḱyurte̠ Baṅgladiso̠m nit do̠ mit́ṭe̠n Man ananḱ ṭhạ̃i reye te̠ṅgo akada, uniaḱ no̠a kurumutu kạmite̠ ale̠ sanamko ạḍi goroble̠ bujha̠ue̠da, uniaḱ dhạrti ṭunḍạṅ din je̠mo̠n ḍhe̠r koḱ o̠na lạgit́ sisirjạuić ṭhe̠nle̠ koe̠da. Teheń onate̠ santalstimes.com hõ manotan sheikh Hasina no̠a janam dinre̠ santalstimes.com gharońj seć khon aema manot johare̠ e̠mae̠ kana.

Abo manwako do̠ hoe lo̠lo̠ ar bharḍo ar huḍur bijli dinre̠ lać re̠ṅge̠ć marao̠ ar jio̠n jiṅgi khe̠mao̠ lạgit́ nalhabon khaṭao̠ḱa. O̠ka do̠ bilạn bạihạṛ ar hõ o̠ka do̠ dare̠ umul, sanam ṭhạ̃ire̠ge bon kạmi joṅa. Me̠nkhan niạ nalha kạmi se̠ dhạrti ṭuṅḍạṅjoṅ jio̠n re̠ abo do̠ ae̠ma le̠kan mũhim kore̠ bo paṛao̠ḱa. O̠na ko mo̠dre̠ mit́ maraṅ mũhim kana ce̠ṭe̠r do̠. Ae̠ma hoṛge apanarḱ bhul karonte̠ ackage jiwiko at́e̠da niạ ce̠ṭe̠r ńurte̠. Teheň do̠ niạ khon ce̠kate̠ bańcao̠bon ńama o̠na re̠aṅ tho̠ṛa lại so̠do̠rabona.

Jo̠to̠ se̠rma ge ce̠ṭe̠rte̠ ae̠ma hoṛgeko go̠ć giḍiḱ kana. Dhạrtire̠ ae̠ma diso̠m le̠kage abo Baṅgladiso̠m re̠ ae̠ma  hoṛko gujuḱkana. Dạkhin America re̠aḱ Venejuwela diso̠m jo̠to̠ khon bạṛti ce̠ṭ̠er ńuro̠ḱ diso̠m kana; O̠na diso̠m re̠aḱ rajjo ketat̠amba gaḍare̠ se̠rmare̠ 365 mãha bhitri re̠ 300 mãhã ce̠ṭe̠r ńuro̠ḱ te̠hõ ńuro̠ḱgea. O̠nate̠ o̠na do̠ dhạrtire̠ ce̠ṭe̠r naṅgraha me̠nte̠ko oporoma. NASA do̠ o̠na naṅgraha ce̠ṭe̠r naṅgraha me̠nte̠i gho̠so̠na ke̠da.

• Ce̠ṭe̠r ńe̠l daram: Daḱ-jạput́ din kore̠ se̠ cạt-bạisạk cando me̠taḱme̠ (March khon September) do̠ hoe̠ bharḍo ar jạput́ hoyoḱa. Ar un o̠kte̠ huḍur se̠le̠t́ bijli são̠ ce̠ṭe̠r ńurgo̠ḱ re̠aḱ gho̠ṭo̠na gho̠ṭaḱ kana. O̠nate̠ niạ o̠kte̠ abo o̠ko̠e̠ko kạmi–kạsni kobo calaḱ kana bise̠s kaete̠ casbas kạmiko, jạliạko me̠taḱ me̠ hako go̠go̠ć ho̠ṛ ko, bilạn ṭanḍire̠ pạṭ kạmi ho̠ṛko tho̠ṛa niạm batao̠ lagao̠bona.

1. Huḍur-bijli o̠kte̠ baṅre̠ hõ kajaḱ asray hatao̠ lagao̠ abona.
2. Bijli do̠ poribahi jinis koe akorsona; o̠nate̠ bilạn bạihạṛre̠ huḍur bijli o̠kte̠ bo̠ho̠ḱ gugut́te e̠se̠t́ kate̠ duṛuṕboḱ hoyoḱa.
3. Lạṭu gaṅga,jo̠la, pukhri khon do̠ jhạl re̠ tahen lagaoabona. Ae̠ma ho̠ṛ me̠naḱ koa niạ huḍur bijli daḱ o̠ḱte̠ jo̠la-gaṅa, pukhri, gaḍa-so̠ḍo̠ḱ kore̠ hako goćko daṛana. Disạe lagaoabona je̠ hako ko khon do̠ apnar jiwi re̠aḱ dam do̠ ḍhe̠rgea.
4. Huḍur-bijli ho̠rte̠ calaḱ o̠kte̠ me̠ṛhẽt́ jinis ko me̠taḱ me̠ me̠ṛhẽt́ chatar ḍanḍo̠m tahen khan o̠na bon bạgiaḱa, ar hõ cycle ce̠tan kore̠bon tahen khan hako pako phe̠ḍkate̠ o̠na bon bạgiaḱa.
5. Gidrạko barhe̠ babon o̠doṅ ocoakoa daḱ se̠ huḍur–bijli o̠kte̠ .
6. Daḱ o̠kte̠ jahan dare latarre̠ asray se̠ baṅ bon umulkoḱma, e̠nte̠ lạṭu darere̠ bijli se̠ ce̠ṭe̠r ńurle̠nkhan o̠nate̠bon e̠laṅo̠ḱa. O̠nate̠ aḍe̠pase̠ paka o̠ṛaḱ kore̠ umulo̠ḱ lagao̠abona.
7. Jãhan mẽṛhẽt́ jinis je̠mon pipe, karenṭ khunṭi, jogajog (mobile) tower aṛere̠ alobon tahenma.
8. Ce̠ṭe̠r ńuro̠ḱ o̠kte̠ telephone plug , computer line do̠ tut́ kat́ lagao̠ḱa o̠na do̠ je̠mon alo bon bebohar.
9. O̠ṛaḱ duạr ce̠ṭe̠r khon bańcao̠ lạgit́ o̠ṛaḱ re̠aḱ chad kona re̠ 4/5 feeṭ jiliń karenṭ poribahi galvanizing meṛhẽt́ hasa latar re̠ topa kat́ lagaoḱa. Je̠mon ce̠ṭe̠r o̠kte̠ o̠nate̠ sorasori ce̠ṭer calao̠ taboḱ. Ce̠ṭe̠r o̠kte̠ gạḍi bbhitri re̠bon tahen khan duạr,janala kobon bond kaḱa baṅbon joṭe̠da.
10. 10.Ce̠ṭe̠r ńuro̠ḱ o̠kte̠ se̠ huḍur o̠kte̠ lutur banar tite̠bon e̠se̠t́kaḱa, je̠mon lutur po̠rda baṅ no̠sṭo̠ḱ.
11.  Huḍur-bijli o̠kte̠ mẽt́ bon e̠se̠t́ kat́a je̠mo̠n mẽt́ baṅ kãṛãḱ.
12. Ce̠ṭe̠r-bijli cabakate̠ hõ adha gho̠nṭa hạbić barhe̠te̠ babon o̠ḍoṅa.

Nia ko manaole khan ge sanamko ce̠ṭe̠r ńuroḱ khon do sarhaṛ akan bo tahena.

Attorney General Mahbubey Alam  hola robibar 27 september 2020 Dhaka re̠aḱ Sammilito Samorik Haspiṭal (CMH) re̠ cikitsa hatao̠ o̠kte̠re̠ye̠ jirạue̠na. Attorney General ko cikitsayedikan ḍocṭor ko hola ạyuṕ ńuhum 7 baja 25 minutes re̠ Attorney General doe̠ go̠će̠na me̠nte̠ko lạike̠da. 

Diso̠mre̠n Maraṅ Ạn ạyurić Mahbubey Alam do̠ ać e̠ratte̠t́, mit́ ko̠ṛa ar kuṛi se̠le̠t́ aćre̠n ae̠ma dulạṛiạko do̠ho̠̠ oṭo kate̠ niạ dhuṛi dhạrtiy bạgiyada. Gujuḱ o̠kte̠ uniaḱ ume̠r tahẽkantaea 71 se̠rma. Calao̠e̠n 03 september 2020 ńindạ Attorney General do̠ ruại aṭkarke̠da; o̠na tayo̠m din se̠taḱ uniaḱ ko̠ro̠na ajar ńam akana me̠nte̠ko baḍae̠ ńamke̠da ar unhiloḱ ge CMH hospitalre̠ko bhurti kedea. Uniaḱ ho̠ṛmo̠ re̠aḱ o̠bo̠stha ar hõ bạṛić calaḱ kante̠ 18 tạrik do ICU re̠ko ade̠rkedea jiwi bańcao̠tae̠ ̣lạgit́.

Maraṅ ạn bepari (Advocate) Mahbuby Alam do̠ 2009 se̠rma re̠aḱ 13 January diso̠m re̠n 13 no Attorney General me̠nte̠ko o̠jo̠ḱledea. Ar aćaḱ jion re̠aḱ mucạḱ din hạbić niạ dạyike̠ purạu le̠da.

Attorney General aḱ gujuḱ re̠ Diso̠m re̠n Maraṅ Mukhiạ Md. Abdul Hamid, Maraṅ Montri Sheikh Hasina, Maraṅ Biḱcạrić Saiyd Mahmud Hosain, Ạn Montri Anisul Haque ar hõ  diso̠m re̠aḱ ae̠ma sãotare̠nko  duk ko so̠do̠r akada. Diso̠m re̠n maraṅ Mukhiạ Sheikh Hasina aćaḱ  duk so̠do̠r so̠mbatre̠ me̠nke̠̠da nui do̠ mit́ ạḍi jo̠san Ạn baepari (advocate) ar biḱcạrić hisạbte̠ diso̠mre̠ dạyikan ae̠ma Ạn re̠aṅ bisạeko gạkhuṛ se̠le̠t́e̠ kạmi akada. Ar sạriaḱ re̠ te̠ṅgo ke̠ṭe̠ć tahẽkate̠ ạn re̠aḱ biḱcạrić kạmire̠ lạgiạ paṛao̠e̠ tahẽkana. Uniaḱ kạmiko jo̠to̠ ho̠ṛko disại tae̠a arko pańja ho̠rayea.

Teheń do̠ Dhạrti jakat Porjoton Mãhã kana. Covid-19 maraṅ muskil halo̠t re̠ ạḍi bạṛti lo̠ksan hisạb te̠ ńe̠lo̠ḱ kana niạ se̠rma manao̠ ganao̠e̠t́ kan Dhạrti jakat Porjoton Mãhã. Niạ se̠rma re̠aḱ ‘Ato o̠ṛaḱ Lahantire̠ Porjoton’ – bo̠ho̠ḱ katha samaṅ se̠ć do̠ho̠ kate̠ go̠ṭa diso̠mre̠ ‘Dhạrti jakat Porjoton Mãhã’ manao̠ ho̠yo̠ḱ kana. 1980 se̠rma khon United Nation (UN) re̠aḱ go̠ṛo̠ go̠po̠ṛo̠te̠ no̠a mãhã do̠ manao̠ hoyoḱ kana. Teheńaḱ Mãhã re̠aḱ maraṅ jo̠s do̠ hoyoḱ kana Porjoton babo̠t re̠ hoṛko ao̠dhan e̠mako, são̠ta, ạricạli, politics ar kạuḍi/orthonitik upkạrko go̠ṭa dhạrti re̠ pasnao̠. E̠ṭaḱ se̠rma kore̠ ạḍi jọmọk sẹlẹt́ nọa mãhã do̠ manao̠ hoe̠ akana, me̠nkhan ne̠s do̠ ko̠ro̠na bhairas karo̠naḱte̠ Online gapalmarao̠ tahẽ kana, no̠a chaḍa ar ce̠t́ bisoe̠ hõ baṅ tahẽ kana. Ko̠ro̠na re̠aḱ pạhil aghat/haso doe̠ ńam ke̠da Porjotonre̠. E̠to̠ho̠ṕ khon ge bo̠nd tahẽ kana diso̠m ar dhạrti re̠aḱ jo̠to̠ le̠kan Porjotonko. Tour Operators Association of Bangladesh (TOAB) me̠ne̠t́ kana je̠, ko̠ro̠na karo̠nte̠ ko̠mte̠ re̠hõ 5 hajar 700 kạruṛ kạuḍi lo̠ksan hoe̠ akana. Ae̠ma huḍiń se̠ kạṭićaḱ Porjotonko do̠ bo̠nd akana. Baṅgladiso̠m Tourist Board Porjoton so̠ṅge jo̠po̠ṛao̠ me̠naḱko so̠ṅge te̠ye̠ gapalmarao̠ ke̠t́te̠ mit́ mo̠ńj hudis se̠le̠t́ recovery plan do̠ko hatao̠ akada. Diso̠m Mukhiạ Sheikh Hasina aćaḱ ḍhạrwạḱ re̠ye̠ ro̠ṛ so̠do̠r akada je, Porjotonre̠ hoe̠ paṛao̠ḱ kanaḱko o̠na recovery budget re̠ puruno̠ḱa. Biman Poribohon ar Porjoton re̠n Montri Md. Mahabub Ali doe̠ me̠n akada je̠, Abo do̠bon laha idiḱa, o̠nate̠ jo̠to̠ ho̠ṛaḱ go̠ṛo̠ go̠po̠ṛo̠ jạruṛa. Niro̠po̠n ho̠ṛmo̠ tahẽ kate̠ Porjoton center ko calao̠ idi lạgit́ Standard Operating Procedure e̠ho̠ṕ hoe̠ akana. Baṅgladiso̠m re̠do̠ ae̠ma utạr bhage ṭhạ̃iko me̠naḱa, o̠ne̠ o̠ka do̠ o̠kore̠ me̠naḱ jo̠to̠ ato o̠ṛaḱ kore̠.

Tho̠ṛa din tayo̠m mạjńhi do̠ arhõ go̠ṭa atore̠n ho̠ṛe̠ ho̠ho̠yat́ koa. Teheń do̠ he̠ć to̠ra khonge mạjńhi haṛam ce̠t́e̠ me̠na, o̠na re̠aḱ ko aṭkar baṛae̠da. Mit́ ghạṛi tayo̠m mạjńhi haṛam doe̠ he̠ć e̠na ar me̠me̠ne̠ e̠ho̠ṕke̠da, niạ bhado̠r cando re̠aḱ calae̠n lukhibar hilo̠ḱ lukhiram do̠ piyạṅ payaṅ se̠taḱ re̠ iń ṭhe̠ne̠ he̠ć akana ran sendra. E̠nte̠ uniaḱ mit́ ti do̠ banae̠ rabuṛ khal akat́ te̠ mayam te̠ jo̠do̠ bo̠do̠ akana ar hasote̠ bogete̠ye̠ kaḍrao̠ḱ kana.  Ado̠ sạrige ce̠t́ bana geye̠ rabuṛ khal akadea! Bana bana do̠ bana, o̠ṛaḱ re̠n banage. Laha hilo̠ḱ ńu ńu te̠ye̠ ubạ̣l dumạl caba akana ar so̠mbo̠t́ to̠ro̠t́ lo̠yo̠ lo̠po̠ o̠ṛaḱ te̠ye̠ he̠će̠na. Lukhiram do̠ o̠ṛaḱ bo̠lo̠ to̠rage pãe̠ṛa ṭhe̠ṅga saṕ kate̠ ghirni e̠rae̠ me̠tae̠ kana nit ge de̠n daka e̠mạń me̠. Ti re̠aḱ kạmiko samṭao̠ kate̠ e̠mae̠ lạgit́e̠ me̠net́ re̠ ṭhe̠ṅga saṕ katege uni se̠će̠ dạṛ ạguke̠da. Bạhu tae̠ do̠ culhạre̠ jo̠nḍra dakae̠ isine̠t́ tahẽkana. E̠kalte̠ se̠ke̠ se̠ke̠ daka ko̠lsa ulṭa̠ua me̠nte̠ye̠ laha hijuḱ kan tahẽkante̠ jonḍra daka re̠aḱ ḍaḍu te̠ge jonḍra daka salaḱ jãwãe̠te̠t́ ti re̠ye̠ jo̠t́ ade̠a. Jonḍra daka laṭhe̠ ńo̠ḱ gete̠ tire̠ laṭkao̠ e̠na ar lo̠lo̠ te̠ harta do̠ ure̠n taya. Go̠ṭa ńindạe kaḍrao̠ aṅga akada. Cando rakabo̠ḱ laga lạgi khon gharo̠ńjre̠ do̠ ro̠po̠ṛ e̠ho̠ṕe̠na, ro̠po̠ṛ tayo̠m do̠ tho̠ṛa ṭhe̠la-ṭhe̠li ar o̠na tayo̠m do̠ iń ṭhe̠n lạlise̠ he̠ć akana. Go̠-babaaḱ no̠nkan halo̠t ńe̠lkate̠ gidrạ pidrạ kodo̠ bogete̠ko raḱ ho̠mo̠re̠t́ tahẽkana. No̠a re̠aḱ sạrite̠t́ do̠ o̠kare̠! Hạṇdi-tạṛi, pạurạ re̠aḱ do̠ ae̠ma ae̠ma gun me̠naḱa.

• Girdrạ koko ạkrińo̠ḱ tama;
• Bạhutam e̠ṭaḱ ho̠ṛ ṭhe̠ne̠m jimạea;
• Gidạr pidạrko ḍaṅgra me̠ro̠m le̠kako thạyạkoa, phuṭbo̠l le̠kako ko̠lsakoa

E boe̠ha mise̠rako ape̠ do̠ o̠ko̠e̠ kanape̠? O̠ko̠e̠ lạgit́ ape̠ do̠ jiwe̠t́ me̠naḱape̠a? Arhõ bhạlạite̠t́ me̠naḱa-

• Amre̠n bạhu doe̠ rạnḍiḱa;
• Amaḱ baṅ tahe̠nre̠ amre̠n bạhu do̠ chinạr me̠nte̠ko bahnayea;
• Ae̠ma le̠kan koclo̠nte̠ko go̠je̠a se̠ se̠ndrate̠ bae ńamo̠ḱa;
• Dulạṛiạ gidrạ koaḱ ạḍi bhabna ar muskilaḱ ho̠yo̠ḱtakoa

Biń mit́ dhom bhugạḱ re̠ye̠ bo̠lo̠le̠n khan tis re̠h̃o bam o̠r o̠nḍok daṛe̠aya. O̠r o̠rte̠m o̠r ṭungạć le̠dere̠hõ tis hõ bae o̠nḍoko̠ḱa. Hae̠re̠ hạnḍi-tạṛi, pạurạ ce̠kate̠ co̠e̠ se̠ndra ńam akat́bona? Aboko do̠ nito̠ḱ ghạḍluḱ re̠bon ńur akana. Ce̠t́le̠ka biń bhugạḱ khon bam o̠r onḍok daṛe̠aya o̠nkage jahae̠ ho̠ṛ ho̠po̠n bhage buj e̠mkate̠ do̠ bam ruạṛ daṛeya. Tin ane̠ć aćaḱ mo̠n khon ruạṛo̠ḱ baṅ sanaye̠, un ane̠ć do̠ o̠ho̠geye̠ bạgi daṛeaḱa. Sạriaḱte̠t́ do̠ o̠kare̠, o̠koe̠bon do̠sea? De̠labon jo̠to̠ko no̠a re̠aḱbon ganḍo̠no̠ḱ ma.