Ko̠ro̠na Ṭikạ E̠m Ehoṕena:Teheń Kho̠n Goṭa Disạmre̠ Synoform Ar Gapa Kho̠n Do̠ Moderna Ko̠ro̠na Tikạ

Teheń kho̠n ehoṕena China disạm kho̠n heć akan Synoform ṭikạ e̠m re̠aḱ kạmihora ko̠. Ar gapa Moṅgolbar (13 July) kho̠n City Corporation Haspatalko̠ re̠ Covax Moderna re̠aḱ ṭikạ e̠m kạmihora do̠ e̠hoṕ lạgidoḱ kana. Jo̠to̠ jilạ re̠ Synoform re̠aḱ ṭikạ do̠ e̠m hoe akana. Hola Robibar (11 July) Sastho odhidaptor re̠n ạḱyurić Dr.Shamsul Hoqe do̠ ko̠ro̠na Bulletin re̠ no̠a kathae lại so̠do̠r akada. Teheń bhitrirege goṭa disạmre̠ ṭikạ e̠m center ko̠ re̠ Synoform ṭikạ do̠ e̠m hoyoḱa. Ar Sunibar ńindarege City corporation bhitri re̠aḱ ṭikạ do̠ center ko̠re̠ Moderna ṭikạ e̠m hoe akana. Baḍaeabon je̠, nitoḱ do̠ 35 se̠rma umer kho̠n cetan umer re̠n hoṛko no̠a ṭikạ do̠ ko̠ ńam daṛeaḱa. Nit do̠ ạḍi algate www.surokkha.gov.bd web portal se google re̠ bolo kate “Surokkha” App download talate hoṛko̠ tikạ hatao lạgit́ ńutum ko̠ ol caṛhao daṛeaḱa. Registration se̠ ńutum ol caṛhao tayom SMS ko̠ e̠moḱa ar ona ńelte niṭ akat́ dinre̠ tikạ center se̠n kate tikạ hatao hoyoḱa.

Source: Banglar Janapad

Bo̠so̠tbhiṭạ kho̠n Bedo̠kho̠l Reaṅ bo̠to̠rteko Bilbilạuḱ Kana Rongpur Re̠n Santalko

Rongpur re̠aḱ Pirgonj upạjilạ, Boṛo Alompur Union re̠aḱ Patgram atore̠ Santal hoṛko̠ aema din kho̠naḱ ko̠ girobas akan re̠ hõ Bo̠so̠tbhiṭa kho̠n bedo̠kho̠l reaṅ bo̠to̠rre̠ me̠naḱkoa. Sor din re̠aḱ ghoṭna Bonbibhag do Santalkoaḱ bo̠so̠tbhiṭare̠ Samajik Bon se̠ dare rohoe re̠aḱ ko̠ goṭaket khan unko̠ do̠ ạḍi maraṅ bo̠to̠rre ko̠ paṛaoena. Thoṛa din lahare̠ Santal koaḱ bo̠so̠tbhiṭare Bonbibhag ren hoṛko dare rohoe lạgit́ko̠ hećen khan Santalko̠ do̠ ona birudre ko̠ teṅgoena. Me̠nkhan Bonbibhag ren hoṛko̠ do̠ onkoaḱ katha ko̠ bataoket́tako re̠hõ aema dho̠mok̠ ko̠ uduat́koa. Santal ko do Akoaḱ ạidạri ko̠ ruạr ńam akat́re̠ hõ bako kiriń-ạkhriń daṛeaḱ kana. No̠a muskil re̠aḱ roṛ ruạr ko̠ khojket́ khan Jopoṛao akan montronaloi são galmarao kate jãhãn phanḍao aḱ do̠ bako ńam akada mente ko̠ lại so̠do̠r keda. Baḍae ńam akana, Ona atore amdaj 98 ekor jumi do santal koaḱ dokholre menaḱa. Onḍe do menaḱa bir gajaṛko̠, phosol ko̠ são oṛaḱ duạrko̠. 2017 se̠rmare̠ Bonbibhag ạn do̠ manao ganaoe e̠mat́koa baṅma dare baṅ maḱ lagaḱa ar iṭa oṛaḱ hõ baṅ benao hoyoḱa. Enre̠hõ dare maḱ ar oṛak duạr baenao khạtir aema mamla do̠ santalko̠ birudre̠ heć paṛao akana. No̠a ko̠ dinre̠ Bonbibhag são cukti lekate dare rohoe kate hõ ona re̠aḱ jãhãn lab do̠ bako ńam akada. Ńindạ okte kombṛko̠ dare mak kate idire̠ hõ onko̠ birudre mamla kate hõ polis jãhãn bako moneaḱ kana. Me̠nkhan Bonbibhag do̠ Santal koaḱ dokholre me̠naḱ jumire dare bae rohoe daṛeaḱte santal ko do ạḍi ãṭko dho̠mo̠ḱao ket́koa. Ona iạte Santalko̠ do̠ akoaḱ bo̠so̠tbhiṭạ ko̠ ńam ruạr kate onako̠ upạrte ako mạliki ko̠ calao daṛeaḱ ona bondobos lạgit́ ko̠ dạbi akada Santal mukhiạ ko̠.

Source: Bangla Bazaar

Copa America Reaḱ Siropa Ko̠ Jitạuena Argentina

No̠a mit́ṭen siropa lạgit́ bar gel irạl (28) se̠rma tạṅgire̠ ko̠ tahẽkana Argentina. Sạrige, 1993 se̠rmare Copa American siropa ńam tayom Argentina jãhãn International shiropa bako̠ ńam akada. Bissocup hijuḱkan tahẽna, ar copa hõ, calao paromoḱkan tahẽna. Me̠nkhan Argentina koaḱ tạṅgi do̠ baṅ cabaḱkan tahẽna. Mucat́re 28 serma tayom ona tạṅgi se̠ koyoḱ hor re ko̠ tahẽkan do̠ mucạ́tena. Argentinako̠ jitạuena jãhãn International turnamate re̠aḱ siropa. Lionel messi mucạt́re ti tey saṕ keda mit́ṭen International siropa. 2014 sermare Bissocup re̠ do̠l ko̠ Finalre̠ bae rakaṕ daṛeaḱ koa. Inạ tayom uniaḱ barea copa-siropa re̠aḱ kukmu do̠ losoponḍo akantaea. Me̠nkhan teheń America re̠aḱ mit́ṭen akhṛa re̠aḱ siropa jitạu kate ạḍi ãṭ do̠e landakeda. Argentina supporter ko̠ ạḍi rạskạ salaḱ no̠a khiloḍ ko̠ ńelkeda. Messi do̠ no̠a trophy saṕ kate manao kedae siropa jitạuen re̠aḱ gorob. Argentina re̠aḱ ona namḍaḱ Akhasi nil-ponḍ jạrsi horoḱ kate teheń ạḍiko̠ rạskạḱ kana Argentina do̠l ko̠.

Loboḱ kõḱ

Mit́ṭen ato ṭolare ạḍi maraṅ mit́ṭen hesaḱ dare tahẽkana. Ar ona darere ạḍi mońj mit́ṭen Loboḱ kõḱ doe tahẽnkan tahẽna. Onka lekage uni Loboḱ kõḱ do dinạm ạyuṕ jokheć jombi lạgit́ ṭola barhete ạtińe calaḱkan tahẽkana. Dinạm hiloḱge uni Loboḱ kõḱ do ạḍi ńindạ dhạbić ạtiń baṛakate arhõ acaḱ ona tahẽn ṭhạ̃itey ruạroḱkan tahẽkana. Ar onka lekage dinạm din jombi lạgit́ ạtińte doe calaḱ kan tahẽkana . Ar mit́din do ńelme one okare ạtiń ar jombi lạgit́e calaḱkan tahẽkan onḍe do mit́ṭen gate doe ńam kedea.

Ar uni acren gateaḱ ńutum do hoyoḱ kantaea Lạlu seta.

Menkhan Loboḱ kõḱ do okarey ạtiń ona jaegare do aema ghas gajaṛ ar daḱ tahẽlena ar ona soṅgete thoṛa puṭhi ar ruḍgu hako hõko tahẽkana. Ar ona iạte unkinaḱ gate do thoṛagan sạṅgiń sạṅgiń rege tahẽkan tạkina. Menkhan tin okte daḱ cabaena ona jaega reaḱ ado onḍege mit́ṭhećkin ńapamena ar ńapam tayom ạḍikin rạskạena ente aema din tayom dokin ńapamena.

Onka lekage uni Loboḱ kõḱ do acren eṭaḱ boeha ar miserako hõ ać soṅge ạtińtey idiket́koa ona jaegate. Ar inạ tayom Loboḱ kõḱ do acren gate Lạlu seta soṅge aćren boeha miserakoe ńapamket́koa. Menkhan Lạlu seta do Loboḱ kõḱ ren boeha ar meserako ńelte acaḱ monre ạḍi lobh ar laloj hećadea. Ar onka lekage mit́din do Loboḱ kõḱ gateren mit́ boehae galmaraoade tahẽkana ar galmarao galmaraotege uni Lạlu seta do ńelme Loboḱ kõḱ ren gate goć kedea are jom kedea. Noa ńelte Loboḱ kõḱ do ạḍiye bhabnaena are rangaoena. Inạ tayom jojom huḍạr Lạlu seta bạgikate acaḱ oṛaḱtey ruạṛena boeha ar miserako soṅge.

Cecet́aḱ do noage, Dulạṛiạ boeha ar miserako noa dhạrti jion khemaore kạmikore ar daṛankore mońj gatekobon gatekoa ar bạṛićte pereć akan gateko do bon bạgiakoa.

Father Bonifas Murmu Do̠ Probhureye Jirạuena

Father Bonifas Murmu do̠ ko̠ro̠na ajaṛ re̠ jạbunkate teheń 10/07/2021 tarik ạḍire̠ Isor hirlạre̠ do̠e jirạuena. Uni do̠ 1955 sermare Rajshạhi jilạ, Godagari upạjilạ re̠aḱ Borgachi (kạnhupaṛa) atoreye janamlena. Apat́ ńutum do̠ Andrias Taracad Murmu. Unko̠ do̠ turui (6) boeha ko̠ tahẽkana. Pe̠a (3) kuṛi ar 3 (pea) koṛa boeha. Boeha ko̠ modre Father Bonifas Murmu do̠ maraṅ utạriće tahẽkana. Uni do̠ ko̠ro̠na ajaṛrey jạbunen o̠kte pạhilre Sant Vincent Haspatal re̠ ko̠ro̠na cikit́sae hataoet́ tahẽna. Me̠nkhan ar hõ mońj cikit́sa ńam lạgit́ Dhaka re̠aḱ Sant Jho̠n Mery Viyanni Haspatal re̠ ko̠ idilidea. Ar o̠nḍege teheń ạḍire Probhuraḱ hoborreye jirạuena. Uni do̠ 66 se̠rma umerrene tahẽkana. Father Bonifas Murmu do̠ acaḱ gharoṅjren boeha ko̠ sãote aema pe̠ṛa ko̠ ar dulạṛiạ ko̠e bạgiat́koa. Isor uniaḱ atma sulukrey do̠ho̠ema.

DAḰGE JHO̠MO̠R JHO̠M

Daḱge jho̠mo̠r jho̠m,

Ghane kajak ghane ko̠m,

Ghane ṭipir-ṭipir,

Ghane jhipir-jhipir.

Daḱge jho̠mo̠r jho̠m,

Ghane kajak ghane ko̠m,

Ghane ho̠e huḍur,

Ghane reaṛ rabaṅ ṭukur.

Daḱge jho̠mo̠r jho̠m,

Ghane kajak ghane ko̠m,

Cạriạ kona daḱge daḱ,

Ceṛem- ceṛem ḍubạ daḱ.

Daḱge jho̠mo̠r jho̠m,

Ghane kajak ghane ko̠m,

Ghane ṭipạḱ ṭo̠ṛo̠ḱ,

Ghane ṭho̠p-ṭho̠p jo̠ro̠ḱ.

Daḱge jho̠mo̠r jho̠m,

Ghane kajak ghane ko̠m,

Ạndhi tuphante ho̠ṛmae ko̠clo̠n,

Ghane Yas ghane saeko̠lo̠n.

Mask kho̠n hõ hoe Daṛeaḱa Ko̠ro̠na

Ko̠ro̠na teṅgo daram lạgit́ mit́ṭenge alga upại menaḱa ar o̠na do̠ mask ho̠ro̠ḱ. Bajare̠ aema lekan mask ńamoḱ kana. Teheń gapama ho̠ro̠ḱ bandenaḱ são milạu kate mask ko̠ ho̠ro̠ḱeda. Me̠nkhan aema ho̠ṛge mask do̠ bako ho̠ro̠ḱeda. Ar o̠ko̠e ko̠ horo̠ḱeda onko̠ mo̠dre ado̠m ho̠ṛ do̠ o̠ktere̠ kewa ar o̠ktere do̠ lutur sãote ko̠ ṭińkạrkaḱ kana. Ado̠m ho̠ṛ do̠ mit́ṭen maskge begor saphate ghane ghane ko̠ ho̠ro̠ḱet́ kana. Baḍaekaḱabon Baṅma, Surgical mask mit́ dhaoge beboharoḱa. Ar kicrić re̠aḱ mask do̠ thoṛa din bebohar daṛeaḱbon. Me̠nkhan ho̠ro̠ḱ tayom saphae jạruṛa.

Kicrić re̠aḱ mask cet́leka saphakate ghane ghane ho̠ro̠ḱ hoyoḱa:

O̠ṛaḱte ruạṛ kate baber, fitạ se̠ rabbar band sap kate mask tut́ hoyoḱa, mask do̠ baṅ jo̠ṭet́ hoyoḱa. Inạ tayom sạbun daḱre ạruṕ saphae hoyoḱa. Daṛeaḱ khan setoṅre tase ro̠ho̠ṛ lagaḱa, enḍekhan mask do̠ saphaḱa. Lo̠lo̠ daḱ ar buluṅ daḱre mask lo̠lo̠ daṛeaḱabon. Inạkate setoṅre tase ro̠ho̠ṛ hoyoḱa.
Lo̠ho̠ḱ mask do̠ alobon ho̠ro̠ḱ ma. No̠ate rog ńam re̠aḱ bo̠to̠r menaḱa.
Ro̠ho̠ṛlen khan mask do̠ iron hoyoḱa
Sapha haron baṅ kate Surgical mask bebohar daṛeaḱbon. No̠a ko̠ ho̠ro̠ḱ se̠ bebohar tayom giḍikaḱ hoyoḱa.
Bahre seć calaḱ o̠kte bagre barea mask do̠hoe jạruṛa. Ho̠ro̠ḱ akat́ mask jãhã karonte bạṛićlen khan se̠ lo̠ho̠t́len khan soṅge torao akat́ o̠na mask bo̠n ho̠ro̠ḱ daṛeaḱa.
Mask sapha kate ho̠ro̠ḱ hoyoḱa. Baṅ khan mạilạ se̠ baṅ sapha akat́ mask bebohar talate ko̠ro̠na rog são aema lekan rogtebon jạbun daṛeaḱa.

Sanam Santalko̠ de̠labn no̠ako̠ manaote̠ ko̠ro̠na lekan maraṅ rog kho̠n rukhiạ bon ńama.

Source: Sonali songbad

Ko̠ro̠nate̠ Gujuḱ Soṅ̠kha 40 lakh 17 hajar do̠e parom keda

Mãhãmạri ko̠ro̠na viruste jạbun kate calaoen 24 ghonṭare̠ goṭa disạmre̠ arhõ 8 hajar bar sãe turui gel are (269) hoṛko̠ goćena. Niạ o̠kte ko̠ro̠na re jạbun akan hoṛkoaḱ sȯ̠nkha do̠ 4 kạruṛ 54 hajar 244. International (Antorjatik) porisȯ̠nkhan website worldmater kho̠n ńam akan Lukhibar setaḱ re̠aḱ kho̠bo̠r lekate , niạ okte ko̠ro̠na kho̠n ko̠ pharnao akana 3 lakh 67 hajar 347 hoṛko̠. Nãwãte jạbun akan ar gujuḱ sȯ̠nkha banar milạu kate 18 kạruṛ 58 lakh 22 hajar 579 manwako̠ hoy akana. Moṭre gujuḱ so̠ṅkha 40 lakh 17 hajar 208 manwako̠ do̠ ko̠ goć akana. Ko̠ro̠na kho̠n ko̠ pharnao akan moṭ sȯ̠nkha 17 kạruṛ 77 hajar 830. Ko̠ro̠na rog te bạṛti hoṛko̠ jạbun akan disạm do̠ Juktorasṭro. Me̠nkhan calaoen 24 ghonṭa re̠ bạṛti hoṛko̠ gujuḱ kan disạm do̠ Latin America re̠aḱ disạm Brazil. Niạ okte ona disạmre 1595 hoṛko̠ goćena. No̠a ko̠ Disạmre̠ moṭ gujuḱ sȯ̠nkha 5 lakh 28 hajar 611 hoṛko̠. Calaoen 24 ghonṭare Juktorastrore̠ 244 hoṛko̠ goćena. Moṭ gujuḱ sonkha hoy akana 6 lakh 21 hajar 843 hoṛko̠. Niạko̠ dinre̠ arhõ ko̠ro̠na rogte jạbunkate calaoen 24 ghonṭare goć akan hoṛkoaḱ sȯ̠nkha 817. Moṭ gujuḱ sȯ̠nkha 4 lakh 5 hajar 57 hoṛko. Ko̠ro̠na te̠ jạbun ar gujuḱ sonkha ạḍi usạra bạṛti kan disạm ko̠ modre hoyoḱ kana Argentina, Colombia ar Indonesia. Calaoen 24 ghonṭare no̠a pe disạmre 456, 559 ar 1 hajar 40 hoṛko̠ goć akana. Baṅgladisạ mre̠ hõ ko̠ro̠na rog ạḍi ãṭ bạrti pasnao akana. Worldmater re̠aḱ ona tạlika lekate Baṅgladesh do̠ nitoḱ 29 number re̠ menaḱa. Dinạm dinge ko̠ro̠na rogte gujuḱ re̠aḱ sȯ̠kha do̠ ḍher idiḱ kana. Disạmre̠ nit hạbićte gujuḱ kan hoṛkoaḱ sȯ̠nkha do̠ 15 hajar 593. Ar nãwãte ko̠ro̠na rogte jạbun akan 9 lakh 77 hajar 468 manwako̠ ńamakana.

Disạm re̠aḱ Aema ṭhạ̃iko̠re̠ Dhạrti Laṛao Aṭkar akana.

Teheń Budhbar (7 July) setaḱ 9:15 baja okte ackage Dhạrti do̠ laṛaoena. Rajdhạni Dhaka nagraha chaḍa hõ Rangpur, Mymensingh, sylet bibhag re̠ dhạrti laṛaoen ko̠ aṭkar akada, Dinajpur ar ona aḍe pase ṭoṭha ko̠ re̠ hõ no̠a do̠ hoy akana. Ona do̠ amdaj 6 second tahẽkana. Pạhilre bạibạite hoylenre̠ hõ tayomte 5.3 matra re̠aḱ ạḍi kajaḱ do̠ laṛaoena. O̠koe do̠ un okte atet́re ko̠ tahẽkan unko̠ do̠ beret́kate oṛaḱ kho̠n bahrete ko̠ odokena. Lockdown baṅ manao kate bo̠to̠rte hoṛko̠ ḍahar reko̠ pheḍena.. No̠a dhạrti laṛao do̠ Bharot re̠aḱ Meghalaya Rasṭro Lukkhipur kho̠n 7 kilometers dạkhin ar hasa latar 20 kilometer bhitrire̠ kho̠n ehoṕlena. Onka le̠ka Bangladesh (weather) abohaoa odhidaptor re̠n abohawabid Bojlur Rosid do̠e baḍae oco keda, Dhạrti laṛaoen ona re̠aḱ matra do̠ rikhṭer scale re̠ 5.3 tahẽkana. No̠a e̠hoṕ akan ṭhạ̃i do̠ Asam re̠aḱ Lukhipur kho̠n. Dhaka kho̠n 242 kilometer utạr nakha re̠ no̠a do̠ menaḱa. Arhõ Markin bhutatik Songstha (USGS) website re̠ me̠nakana, No̠a do̠ ehoṕ kana Asama r Meghalaya Rasṭro re̠aḱ so̠r ṭoṭha ko̠ kho̠n.

Final re̠ Ko̠ Rakaṕena Argentina.

Sahẽt́ bondoḱ le̠kan tiebreaker re̠ jitạu kate Copa America re̠aḱ final re̠ nischin kanako̠ Argentina. Niṭ́ akat 90 minit re̠aḱ khilạḍ re̠ 1-1 gol te̠ dro hoyena. Inạ tayom khilạḍ do̠ tiebreaker re̠ calaoena. O̠nḍe Argentina re̠n bo̠l sasaṕić (golkipar) Martinez Colombia re̠aḱ pe̠a phanda bo̠l do̠e tarhaokeda . O̠na sãote 3-2 golte Colombia hirạu kate Copa America Finalre̠ re̠ rakaṕena Lionel Messi re̠n do̠l Argentina. Final re̠ Brazil birudre̠ khilạḍoḱa ko̠ Argentina . Teheń Budhbar (7 July) Baṅgladisạm re̠aḱ okte do̠ setaḱ 7 baja kho̠n khilạḍ do̠ ehoṕ akana. Aema khilạḍ dulạṛ hoṛ ko̠ niạ final khilạḍ haparaore Messi ar Neimar aḱ do̠l re̠aḱ soros khiḷḍ ńel lạgit́ ko̠ tạṅgitaṛaḱre menaḱkoa.

Source: Pothmatimes