BOEHA

Ale dole pe boeha,

Pe hoṛ pe rokom,

Bhitrire do kicirmicir,

Bahrere ạḍi karon.

Mit́ boeha sereń ạḍi,

Mit́ boehae ruia,

Mit́ boeha dhorom korom

Onare bạnuia.

Aṅga tora beṅget́ ńapam,

Jhogṛa jhạṭi hoyoḱ

Goṭa dinge kam kajre,

Ạḍile nehõroḱ.

KUMÃYÃ SÃO GUTI

Peter mit́din Jisui kulikedea, E Probhu, ińren boeha iń reaḱe kạilere tin dhaoiń ikạkataea? 7 dhao dhạbić 7 Jisui roṛ ruạṛadea, 7 dhao do baṅ, menkhan 7 dhao 70. Ado mit́ṭeć phen kathae lạiat́koa, Mit́ṭaṅ raj aćren gutiko tuluć lekha jokhae jokheć mit́ṭaṅ 10,000 mon ṭaka dharaoić uni ṭhene hạjir ocoyena. Menkhan haḱla teaḱ bạnuḱtaete kisạ̃ṛ do uni ar era hoponko ar tahẽkantae jotoaḱko ạkrińoḱ ar rin halaḱe hukumket́a.

Khange uni guti do kisạ̃ṛ reaḱ ti jaṅgare giḍiyenteye metadea, Iń reaḱ baṛe sombhurime, jotogeń halakatama. Ado kisạ̃ṛ mãyãyenteye aṛaḱadea, ar dadone khalas kadea. Menkhan uni guti do oḍok senkate mit́ sae sikại dharao akat́tae aćren mit́ṭen são guti ńamkedete uni saṕkatey limbot́ kiro korokedea, metadeae, Dharaoaḱ halakạtińme! Uni são guti do uniaḱ ti jaṅgare giḍiyenteye metadea, E bhại, iń reaḱ baṛe sombhurime jotogeń halakatama.

Menkhan uni do bae uput́let́te senkate kạd oṛaḱreye bhoraokadea, dharaoaḱ ạuriye halatae dhạbić. Uniren são gutiko ona ńelkate ạḍiko mon dukena, ar akoren kisạ̃ṛ ṭhen senkate jotoko khulạuadea. Khange uniren kisạ̃ṛ hoho ạgu ocokateye metadea, Ea bạṛić guti! Onako joto dharaoḱ iń khalaskat́mea, amem nehõradiń teṛoṅ; ar hõ amren são guti mãyãwae baṅ hoekoḱtama, iń amiń mãyãwat́me leka? Khange uniren kisạ̃ṛ raṅgaoente saḱsetko ṭhene soprotkadea, joto dharaoaḱ ạuriye halatae dhạbić. Ińren sermaren Ạpuń hõ apeye nonka lekapea, mit́ ke mit́ hoṛ apan ạpin boeha apeaḱ monte bape ikạletako khan. (Math.18, 21-35)

Lagṛẽ Sereń

Mạńjhi koaḱ chaṭkare

Jogmạńjhi chaṭkare

Bejae jomok tumdaḱ saḍe kan

Alom calaḱ ńindạre

Bạbu menae pinḍạre

Mana katha ańjomme kiduṕ torare.

Bahawaḱ Go̠lpo̠

Ińaḱ ńutum do̠ Baha ar ale ato ńutum do̠ Nimghuṭu. Iń do̠ kuṛi gidrạ kạnạń, ińaḱ umer do̠ 5 bo̠cho̠r. Ińren mit́ṭen kạṭić boeha menaea ńutumtae do̠ Dhumạ. Thoṛa reṅgeć lekhange jo̠jo̠m lạgit́ murukteye raga.

Ale oṛaḱre mero̠m ho̠po̠n menaea. Iń do̠ ho̠bo̠rkateń dulạṛea. Uni do̠ jo̠to̠ jo̠khećge taeno̠m taeno̠mteye pańja baṛaińa. Iń do̠ hako utu tuluć daka jo̠miń kusiaḱa. Iń do̠ MLE Iskulreń paṛhaoḱa ar dinạm Iskulteń calaḱa. Iń do̠ ińaḱ Iskul ạḍi ãṭiń kusiaḱa. Iń do̠ chubi ãkao hõ ạḍi ãṭiń kusiaḱa. Oloḱ paṛhao do̠ ạḍi mo̠jiń ạikạua. Lạṭu kateć iń do̠ didi muniń hoyoḱa.

Tumạl: Ańjo̠m jo̠ṅ jạṛ

RABAṄ DIN SETAḰ

Kuṛhạ eset́ rabaṅ setaḱ cando ma bae ńeloḱ

Hoṛko sanam oyo kate seṅgel teko joroḱ,

Simraḱ okte cẽṛẽ koma ragako kicir micir

Ṭhạ̃iko sanam bạgi kate oḍokenako jigir,

Lạbni tạṛi khijur darere nit hõ aka menaḱ

Tiyogoḱa tinre ona lạgit́ sanam teṅgo tãṛãḱ.

Taṛi são caole ata ńui rema ekal ạḍi sebel

Culhạ berhae horho lạgit́ joto hoṛko berel

Aema hoṛ do gitić rege oyo kombol latar

Rabaṅ setaḱ beret́ hodoḱ ekal ạḍi mõhńjor.

Gogoe banae ḍomboḱ piṭhạ arhõ bạṭi dhupi

Hopon bạbu ghẽṭ katey calaḱ gại gupi.

Ḍoboḱ Johar

Ḍoboḱ ḍoboḱ ḍoboḱ,

Lạṭuko do ḍoboḱ,

Johar johar johar,

Kạṭić ko do johar,

Manot manot manot,

Lạṭuko do manot,

Dulạṛ dulạṛ dulạṛ,

Kạṭić ko do dulạṛ.

Doṅ sereń

Sebeć sebeć daḱre,

Mala potamkin ạtiń kana (2)

Jom jom ben potam,

Halaṅ halaṅ ben potam,

Jaega joṅben potam tilại dare.

BOEHA DULẠṚ

Lukhibar hilo̠ḱ Kando̠n ar Ro̠ma do̠ baba sãote̠ Kako̠nhaṭkin calaoena. Unre̠ kako̠nhaṭre̠ do̠ mela hoyoḱkan tahẽna. Kando̠n Ar Ro̠ma tako do̠ Taliṭola re̠ko tahẽ̠na. Kando̠n ar Ro̠ma do̠ melare̠ Jililạḍu ar Jilạpikin hataokeda. Ar gateḱ lạgit́ Ro̠ṭe̠ sagaṛkin hataokeda.

Jilạpi, Jililạḍu ar Ro̠ṭe̠ sagaṛ hatao kate̠ Kando̠n ar Ro̠ma do̠ baba são oṛaḱkin ruạṛena. Oṛaḱre̠ he̠ć kate̠ Kando̠n ar Ro̠ma do̠ go̠go̠kin ho̠ho̠adea ar ạguakat́ jo̠maḱkin emadea.

Go̠go̠ do̠ Ro̠ma ar Kando̠n Jililạḍu ar Jilạpie e̠m hạṭińat́kina. Ro̠ma ar Kando̠n Jililạḍu ar Jilạpi jo̠m kate̠ ạḍikin rạskạina. Ar gateko sãote̠ kulhire̠ Ro̠ṭe̠ sagaṛ o̠rbaṛaekin eho̠ṕena.

Kuṛcạ Beṅgaṛ

Kuṛcạ beṅgaṛ rasi utu,

Baṅ sebel kan,

Dela bạbu cẽṛẽ ṭuṭi,

Jotoko calaḱkan.

Bạń calaḱkan cẽṛẽ ṭuṭi,

Bạnuḱtińa iskul chuṭi,

Iskulteń calaḱa,

Ạkil ḍahar menaḱa.

Baṛe Dare Ar Ho̠rren Ho̠ṛ

Ona do̠ tahẽ̠kana setoṅ din, ạḍi ãṭ lo̠lo̠ paṛaoakana. Setoṅte̠ pukhri ar gạḍiạko jo̠to̠ ro̠ho̠ṛ cabao akana. Goḍa kohõ paṛaḱ utạrakana. Ho̠rten ho̠ṛko do̠ calaḱ teko laṅgaekhan baṛ̣e dare latarre̠ jirạḱ lạgit́ko duṛuṕena.

Duṛuṕ reaṛ kate̠ onko do̠ dare coṭ sećko ko̠yo̠ḱkeda ar mit́ ho̠ṛ do̠e me̠nkeda, “Niạ do̠ ce̠t́ lekan dare kana? Un maraṅ dare ar jo̠ ma kạṭić kạṭić, ar ho̠ṛaḱ jahan kạmirege baṅ lagaḱa.” Ona ańjo̠mte̠ dare do̠ ạḍi duke ạikạukeda. Mo̠n mo̠nte̠ye̠ me̠nkeda, “ińaḱ umulregeko jirạuena, ar ińaḱ geko oktaeda!”

Raṅgaote̠ uni do̠ mit́ṭe̠n jo̠ uni ho̠ṛaḱ bo̠ho̠ḱre̠ye̠ ńurkeda, ar uni ho̠ṛe metadea, ińaḱ jo̠ Tale baṅkhan Kanṭhaṛ jo̠ leka tahẽ̠lenkhan ce̠t́ hạl hoekoḱtama?