Darakan 15 June Khonaḱ 7 July Dhạbić Joto Coaching Centre Bond Tahẽna

SSC biḍạu ehoṕ lạgidoḱkante darakan 15 June khon pe hapta Bangladisom reaḱ joto coaching centre ko bond tahẽna mente Sikhnạt Montri Dr.Dipu Moni lại lahakeda.

Arhõe menkeda je, biḍạu ehoṕkate coaching centre dekbhal ar nońjor reko dohoea. Ente biḍạu okte adom adom coaching centre jhićge tahẽna. Onate bond dinre jaha coaching centre jhićko ńamlere, , ạn lekate onko birudre bebostha hataoḱa mente hõ lại lahayena. Ente noa do maraṅ utạr se jạṛuṛteaḱ ar baḍaeteaḱ bisoe kangea.

Darakan 19 June Khonaḱ SSC Biḍạu Ehoboḱ kana

Darakan 19 June Khonaḱ SSC Biḍạu Ehoṕa Nes bo̠chor reaḱ Secondary School Certificate (SSC) bidạu reaḱ somoysuci sodorena. Banladesh re nia do joto khon maran board bidạu kana. Niare

Secondary School sikhnạt board, Rajshahi, Comilla, Syhlet, Dinajpur, Jessor,Barisal, Mymensingh ar Chittagong board noa routine-e sodorkeda. SSC bidạu do darakan 19 June ehoṕa ar 6 July mucạdoḱa. Enhiloḱ setaḱ 10 baja khonaḱ ehoṕkate tikin 12 baja dhạbić hoyogoḱa. Baḍaeabon je̠, jao sermage February cando SSC biḍạu ar April cando do HSC bidạu hoe baṛaḱa. Menkhan ko̠ro̠na khạtir 2020 serma khonaḱ sikhạt dhap reaḱ sanamaḱge ạulạu caba akana. Ente okte nạpitre bidạuko baṅ hoyoḱ kana. Niạ dhaoaḱ bidạu hõ ạḍi bilomte ehoṕ lạgido̠ḱ kana. Enrehõ as menaḱa jo̠to̠waḱ biḍạu napaete hoe purạuḱa.

Pạhil Bar Gel (20) Modre Re Ṭhạ̃iana Bakuṛa Ren Suvasish Hasda

Hola calaoen Sokolbar (10 June) West Bengal Board re hoe akan High School reaḱ result sodorena. Kocbihar jilạren Anisa Dev Sharma 498 nombor ńamkate Pạchim Boṅgo pạṭhuạko modre pạhil thạ̃iye ạidạrijoṅana. Nes noa biḍạure pas se jitạuen gidrạkoaḱ soṅkha tahẽkana 88.44 percent. Arhõ baḍae ńamena Bakura jilạ reaḱ Bakura Christian Collegiate re paṛhaoḱkan Suvasish Hasda ńutuman pạṭhuạ koṛa moṭre 479 nombor ńamkate bar gelko modrey ṭhạ̃iana.

Jo̠to̠ bisoe re ńam akat́ nombor latarre emena:

Bangla 88, English 96, Computer Aplication re 98, Dorson 99 ar Bhugol re 95 nombor-e ńamakada.

Pạhil bar gel modre ṭhạ̃iante apat́ Lal Mohon Hasda ar eṅgatet́ Nilmuni Hasda asambheṛkin kusiyena. Suvasish ren eṅgat apat́ bana hoṛge BSNL ren kạmiạ hoṛkin tahẽkana. Menkhan nit́ do baṅkin kạmikana. Tinre eṅgat-apat ṭhen hoṛko ạkinren gidrạwaḱ result babotre baḍaejoṅko khojkeda, Unre sạrige ạḍi go̠ro̠b salaḱ kin menkeda, as tahẽkana gidrạ mońj jo̠e ńama mente. Sińke ńindạ mone gaḍaokate paṛhao akana. Jahan ạṛisge baṅ tahẽkantaea. Ar nit Ona reaḱ jo̠e ńamkeda.

Tayom daram dinre cele hoyoḱa mente kuklikedere, roṛ ruạṛkeda, Nit do College re bhorti lạgit́ paṛhaoḱe ehoṕkeda. Ente Bharot nagraha reaḱ bhage utạr Biswabiddaloy re se English te Graduation lạgit́ ạḍitet́ sana ar kukmu menaḱtaea. Inạkate bidạure rakaṕen pạṭhuạ gidrạko nonka menkate udgạuket́koa, je̠, gogo-baba ar gatekoaḱ katha leka do baṅ bickom apnar kusi metaḱme oka bisoe-em kusiḱ, onage paṛhaoḱme. Enḍekhan oloḱ paṛhaoḱ talate rạskạm aṭkara. Ar nonakate oloḱ paṛhaoḱ jingirem laha daṛeaḱa.

Tumạl: Sarsagunpatrika

Santalkoaḱ Jumire EPZ Alo Hoyoḱ Khạtir Santalkoaḱ Teṅgo Daram Bạisi

Gaibandha Gobindogonj re Sahebgonj bạnij-bepar khạtir EPZ bạisạu lạgit́te oka mon subạ tahẽkan ona bạtil lạgit́te mit́ṭen bạisi se jarwaḱ hoyena. Ạgil hapṛamkoaḱ noa jumi ńutumte Moṅgolbar setaḱ upạjilạ Kaṭamor ṭothare ạdibạsi ar santal hoṛko mit́te noa bạisireko selet́ena. Sahebgonj-Bagdah Farm bhumi udhar songram committee, Jatio Adibasi Porisod, Adibasi-Bangali Songhoti Porisod, Gaibandha Samajik Songram Porisod noa bạisi ko saṕṛaoleda.Santalkoaḱ jumire EPZ alo hoyoḱma roṛ uduḱket́a, jeno santalkoaḱ mãyãmte ạruṕ akan noa cas-abad jumi nosṭo kate EPZ alo benao rakaboḱma.

Sahebgonj-Bagdah Farm Bhumi Uddhar Songram Committee ren convener Philimon Baskey noa teṅgo daram bạisi ạyurkeda. Noa bạisire mit́ kathako roṛket́ manotanko modre Bangladesh Orthoniti Somiti ren sabha mukhiạ Professor Dr.Abul Barakat, Dhaka Biswabidaloy ren mahasoe Professor Rubaet Ferdous,Jatiyo Adibasi Porisod ren sabha mukhiạ Robindronath Soren, LLRD ren nirbahi Director Shamsul Huda, Jasad Cendrio Committee ren sangothonik Sompadok Golam Maruf Mona, Jela Association ren sạdại sompadok Sirajul Islam Babu, Basad Nogaon jilạ ren mit́ convener Joynal Abedin Mukul, Gaibandha Samajik Songram Porisod ren convener Jahangir Kobir Tonu, Adibasi-Bangali Songhoti Porisod ren ạyurić Golam Rabbani Musa, Probir Chokroborti, ar eṭaḱko modre Dipayan Khisa,Afzal Hosain, Mirinal Kanti hõ selet́e tahẽkana.

Manotan sawaliạko roṛ sodorkeda, noko pea santal hoṛko goć babotre nit hõ jahan bicạr baṅge hoy akana. Bicạr ńutumte sarkaraḱ aema adalot ar doptarkore nana parkan katha roṛ ạnḍuṅ baṛaet́ kana. Menkhan asami dusi hoṛko laha lahateko ạcur baṛaekana. Okoege baṅko giripteret́ko kana. Ona iạte noko dusikoaḱ bicạr ko khojkeda.Ona são oṛaḱ raput́, luṭpaṭ ghoṭna reaḱ khotipurunko khojkeda. Ar bises kaete je̠mon noa jumire EPZ alo benaoḱma, noa babotre Sarkar ṭhen nehõr ko dohoket́a.

Meskoć

Baṅgladisom ren kạhũkoaḱ soṅkha tinạḱ?

Kelas hatao jokhen, Mahasoe mit́ṭen gidrại kuklikedea-

Mahasoe: Mase bacha lạitabonme, noa Baṅladosmre tinạḱgan kạhũ menaḱkoa?

Gidra: Cedaḱ Mahasoe bam baḍaete, are hajar are sãe are gel are (9,999)!

Mahasoe: Sạri sạrigem menet́ kana tho̠?

Gidrạ: Hẽ̠ Mahasoe, sạri katha kangea! Menkhan lekhare thoṛako ko̠m ńõḱlen khan hudisme, Baṅgladisom khon thoṛa kạhũ aḍepase Bharot disomte peṛaḱko caḱlao akana. Ar thoṛako bạṛtilen khan hudisme, Bharot disom khon bạṛtiko do peṛaḱko he̠ć akana.

Nigeria Disom Reaḱ Girjạ Oṛaḱre Bạndukiạkoaḱ Gulite 50 Hoṛko Goćena

Ạḍi bhabna reaḱ khobor. Nigeria disomre mit́ṭen Catholic girjare bạndukiạko hamla akat́a. Khobor lekate baḍae ńamakana, niạ ghoṭnare maejiu ar gidrạko selet́ mõṛẽ gel hoṛko goćena.

Ona disom reaḱ Ondo nagraha ren Polis sabha mukhiạ Funmilayo Ibukun Ondunlami baḍae ocokeda, girjạ oṛaḱ bahre ar bhitrire bạndukiạ guli calaokateko goć akat́koa.

Ona nagraha reaḱ St. Francis Catholic girja oṛaḱre tinạk hoṛ akham seko goć akana ona bae lại so̠do̠r akat́a. Menkhan ghoṭna reaḱ karontet́ polis tojbijet́ kanako mente baḍae ńamena.

Ondo nagraha ren Govornor Ankunrin Oluwarotimi Akerodulo do ghoṭna ṭhạ̃i-e hiri ạgukeda. Ar Haspatal re bhotri akan akham hoṛko são ńapam baṛaena. Uni do Noạ ghoṭna do Genocide (gonohotta) mentey ńumet́ kana.

Nigeria Catholic girjạ ren sabha mukhiạ Rev.Augustine Ikwu menkeda, ạḍi hahaṛa ar duk reaḱ katha. Ente acin bạndukiạko St. Francis Catholic girjạre hõ hamlako caḱlao akat́a mente baḍae ocokeda.

Nes Bochor Hõ JSC Ar JDC Bidạu Baṅ Hoyoḱa

Nes bochor ar darakan bochor JSC ar JDC bidạu baṅ hoyoḱa mente Sikhnạt Monrti Dipu Moni doe lại lahakeda.

Teheń (05 June) Robibar Sikhnạt Montronaloy reaḱ mit́ dupuṛuṕre noa kathae menkeda.

Ona iạte kelasre okaṭaḱ bidạu hataoḱ Ona bidạu reaḱ jo̠ se result tege bac-bachaokate mimit́ pạṭhuạ gidrạ certificate ko emakoa.

Arhõe baḍae ocokeda, darakan bochor khon nawa curriculum ehoṕ lạgidoḱ kana. Inạkate ona dhara lekate jotowaḱ do manao gaonaoḱa. Ar onka lekage kelas hõ calao idiḱa.

Lebṛa Se Piṭuk

Skul re mit́din Mithun aćren gate ko tuluće ńapamena. Ado boge-judạe kuliket́koa. Khange onko modre Ratun ńutuman koṛae teṅgoyente mengo̠t́keda, Am begor cekate boge le tahẽ daṛekea! Ado Limon ńutuman koṛae mengo̠t́keda, hape thiroḱme. Amge cet́leka menama? Nisṛauate menkeda cet́ khobor? E gate Laćtam do cet́ dosa hoyena? Bogete co̠ṅ ro̠ho̠ṛ akantam. Khange Mithun raḱ mẽt́hãte roṛkeda, noa ko din bogeteń uihạrket́pea.

Iń gogo khạtir lać reaḱ nonkan dosa hoe akantińa. Baṅma din dinte lać moṭa calaḱkantińa, onate cet́ge bae jom ocońkana. Iń sãope tahẽlen khan tinạḱ mońj mońjiń jom ńamkea.

Un jo̠khen ackage Mitu mengo̠t́keda, onatege amaḱ lać do dhạrti lekage go̠lo̠ḱ kantama? Ma thir baṛakoḱpe. Delabon fuchka jo̠jo̠mbo senlenge. Khan jo̠to̠ gate mit́te jo̠jo̠-heṛem mesalate fuchkako jo̠mket́a. Ado̠ Mitu menkeda, E Mithun teheń khon fuchka jo̠m mucạt́ena bujhạu?

Enḍekhan Mithun raṅgaote menkeda ṭhikgea. Ado Mitu arhõe menkeda noa dhạrtire gogo lekan mońj gate mente celege bạnuḱkoa. Onate teheń khonge am gogoaḱ katha lekam calaḱa, enḍekhan lać hõ baṅ moṭaḱtama. Baṅkhan Hạti leka amaḱ lać hõ haraḱtama honaṅ. Nonkako sikhạu paṛhaokedea. Mithun hõ gatekoaḱ kathae hetaoaḱtakoa. Ar jo̠m baṛakate jo̠to̠ko mit́te oṛaḱko ruaṛ baṛaena.

Teheń Khonaḱ Booster Doge Emoḱ Reaḱ Kạmihora Ehoṕena

Goṭa dhạrtire teheń sạnicar (4 June) setaḱ 9 baja khonaḱ ko̠ro̠na ṭikạ booster doge reaḱ kạmihora ehoṕena. Darakan 10 June dhạbić noa calao idiḱa. Mit́ haptare mit́ karoṛ khon bạṛti hoṛ booster doge tabereko ạgikoa mente Sastho Odhidapter-e baḍae ocokeda.

Inạkate Sastho Odhidapter arhõe lại so̠do̠rkeda, jo̠to̠ ṭikạ center kore setaḱ 9 baja khonge ṭikạ emoḱko ehoṕa. Ona iạte booster doge hatao lạgit́ ṭikạ card sãote idi torae jạruṛ kana. Enḍekhan noa hataore jahan eṭkeṭõṛẽ baṅ hoyogo̠ḱa. Ar algate ṭikạ bon hataojoṅ daṛeaḱa.

Teheńaḱ Khilạḍko

Criket

England-New Zealand

Pạhil test, tesaraḱ din

Dhinạn 4 baja okte

Ten 1 channel re porcaroḱa.

Phuṭboll

UEFA Nations League

Italy-Zarmany

Ńindạ 12:45 miniṭ khon ehoṕa.

Ten 1 channel re.

La Lega

Dosar bibhag

La palmas-Tenerif

Ńindạ 1 baja khon

T sports channel re ńel ńamoḱa.

Teheń abo noa ko eneć-khilạḍ Tv rebo ńeljoṅ daṛeaḱa.