Goṭa disạmre nit dhạbićte bar karoṛ gidrạ ham-rubella ṭikạko ńamkeda mente Sastho Protimontri Dr.Mohammad Abdul Muhit doe baḍae ocokeda. Uni doe menkeda mit́ṭen gidrạ hõ jemon noa ṭikạ khon aloko bad paṛaoḱ, ona lạgit́te darakan mit́ candore arhõ 35 lakh gidrạ ṭikạ emako reaḱ goṭa hoyena.

Budhbar (7 October) ham-rubella ṭikạ emoḱ kạmihora babot hoyen bạisire noa kathae menkeda.

Sastho Protimontri doe menkeda, sanam gidrạ rukhiạko aboaḱ maraṅ dạyik ar pạhil kạmi kana. Bar karoṛ gidrạ ṭikạko ńam purạuket́ rehõ sarkar do bae thir hapelena. Arhõ ṭikạ emako reaḱ kạmihorae hataokeda jemon mit́ṭen gidrạ hõ ṭikạ khon aloko bad paṛaoḱ. Ona iạte  niạ dhao reaḱ kạmihora do ‘Mop-up Campaign’ lekate hatao hoyena.

Noa kạmihora talate sor sạṅgiń ṭoṭhare tahẽnkan gidrạ, leḍha, khoṛako okoe do laha reaḱ ṭikạ bako ńamakat́ onkanko sendra ńamko hoyoḱa ar oṛaḱ oṛaḱ noa seba kạmi seṭer reaḱ kurumuṭui hoyoḱa.

Ṭikạ emoḱ kạmihorare jopoṛao akan ar goṛo emoḱkanko sarhao emkate menkeda, jotokoaḱ goṛo gopoṛo baṅ tahẽlen khan noa kạmihora do ohoge purạukoḱa. Bạṛtikaete Juktorastro sarkar, Gavi ar UNICEF goṛoko emoḱ kana. Ona sãote hoṛmo jotonren kạmiạko, City Corporation ar jopoṛao akan jotoge ạḍi haron kate sendra ńamkate ṭikạ tabere gidrạko ạguiet́koa.

Tumạl: Jugantor

Rasṭropoti Mirza Fakhrul Islam Alamgir do disạmren sanam ạdibạsi hoṛkoaḱ lahanti, hok ạidạri nisṭạ lạgit́ mit́te kạmi reaḱe hohokeda.

Sombar (5 October) tikin bela okte Boṅgobhobon re ạdibạsi jatiotabadi dolren kendrio komiṭiren sabha mukhiạ Mrigen Hagidak aḱ ạyurte 52 goṭen protinidhiko sãote ńapamoḱre noa kathae roṛkeda.

Rasṭropoti doe menkeda, buru ṭoṭha ar bilạn ṭạnḍiren ạdibạsi hoṛaḱ muskilaḱko cabae lạgit́ sarkare kạmi kana. Menkhan apnaraḱ ạidạri ar lahanti lạgit́ ạdibạsi hoṛ arhõ uskur ar udjogi hoyoḱ jạruṛa ar sanamko miljulte tahẽn ar goṛo gopoṛo bạṛti hoyoḱa.

Ona sãote ạdibạsi hoṛkoaḱ muskilaḱ ar sambhabna baḍae kate prokolpo ar kạmihorako hatao reaḱ kathakoe roṛ sodorkeda. Arhõe menkeda ape mit́ jaṅgape laha lekhan iń hõ bar jaṅgań lahaḱa.

Ạdibạsi hoṛkoaḱ jumiko reaḱ muskil babote menkeda, apnaraḱ ạidạri rukhiạ lạgit́ sanamko sontor ar midoḱ jạruṛa. Sthanio Prosason sãote jopoṛao dohokate muskilaḱko cabae reaḱ kurumuṭui hoyoḱa.

Bạṛikaete Rasṭropoti do ạdibạsi gidrạ-juạnkoaḱ sikhnạt hameṭ reaḱ ạt opsor cetanre jore emkeda.

Tumạl: Jamuna TV

Bangladesh Porisonkhan Bureau (BBS) renaḱ bises sarkari lekha jokha kạmihora ehoṕena. Baṅgladisomren ạdibạsi hoṛkoaḱ jion jingi, sikhnạt, hoṛmo hạṭiń, kạuḍi dosa ar reṅgeć nacar citạr baḍaejoṅ bakhra pạhil October khon goṭa disạmre sarkari lekha jokha kạmihora ehoṕ akana.

Ạdibạsikoaḱ reṅgeć dosa lekha jokha 2025 prokolpo reaḱ tabere ato ṭolare totho jogaṛ kạmi do 25 October 2026 dhạbić calao idiḱa. BBS khon baḍae ńamakana je noa lekha jokha talate disạmren menaḱko 50 gel ạdibạsi hoṛkoaḱ jion jingi dosa reaḱ totho tumạl hoyoḱa. Niạ lahare August mãhãre ato ṭolakore purạ lekha jokha do khaṭo macha kukli talate noa kạmi do purạu akana. Noa kạmihora reaḱ rehet́tet́ do hoyoḱ kana Baṅgladisạmre tahẽnkan ạdibạsiko lạgit́ pạhil dhao leka mit́ṭen begar ar purạu digital database benao.

Porikolpona Montronaloe ar BBS ren maraṅ kạmiạkoaḱ khobor lekate noa lekha jokha talate nase lokho tumạl hoyoḱa.

1. Ạdibạsi hoṛkoaḱ reṅgeć nacar dosa, hoṛmo pusṭi, jom ńũ, sikhnạt ar kạmi ṭhãonako reaḱ sạriaḱ citạr saṕ rakaṕ
2. Lab ńam hoṛko bachao lạgit́ mit́ṭen Proxy Mins Taste (PMT) score benao rakaṕ.
3. Jurip khon ńamoḱ totho cetanre bhorkate sarkar jemon hoṛkoaḱ jion jingi lahanti lạgit́ aema kạmihora ar sewa kạmiko sạri reṅgeć hoṛko em daṛeako.

Nebetar aema ạkilan hoṛ ar gobesok koaḱ oṅsoṅre noako katha rakaṕ hećakana je, Baṅgladisạmre SDG hameṭjoṅ lạgit́ ạdibạsikoaḱ sạri ar niphuṭ totho reaḱ ṭonṭa tahẽkana.

2022 serma reaḱ lekha jokha lekate disạmre ạdibạsi hoṛkoaḱ soṅkha amdaj 16 lakh 50 hajarko menrehõ ạdibạsi sãotakoaḱ dạbi do noa soṅkha arhõ ḍheroḱa.

Niạ dhao reaḱ lekha jokha lekate noa digdhạ cabaḱa. Ar daraekan dinre sarkari ạn ạri benaore hoṛkoaḱ jopoṛao arhõ bạṛti idiḱa mente as ńamoḱ kana. Onate disạmren sanam ạdibạsi hoṛko ṭhen nehõr tahẽn kana niạ lekha jokha kạmihorare selet́kate sạriaḱ totho bon em, ar noa lekha jokha kạmihora jo baṛe hoyoḱma.

Meskoć

(1)

Nạrkol darere ghãs-

Mạlik: Nạrkol darere Bilṭu dećakan ńelte mạlik doe raṅgaoena are metadea, “cedaḱ ińaḱ nạrkol darem deć akana?”

Bilṭu: Mạlik “Ḍaṅgra lạgit́ ghãs geget́iń deć akana.

Mạlik:  “Amaḱ bohoḱ do bạṛić akantama se cet́? Nạrkol darere ghãs do okarem ńama?

Bilṭu: Mạlik, “ghãs bạń ńamlet́tege thoń pheḍoḱ kana.

(2)

Mit́ṭen gidrạ iskul hijuḱe bilomente Mahasoeye kulikedea-

Mahasoe: Cedaḱ nunạḱem bilomena?

Gidrạ: Mahasoe, kukmuń ńeńelkan tahẽkana.

Mahasoe: Kukmu ńelte mit́ ghonṭam bilomena?

Gidrạ: Hẽ Mahasoe, Kukmuteń ńelkeda iskuliń calaḱ kana. Menkhan nunạḱ jeleń hor tahẽkana  je hijuḱtege mit́ ghonṭa lagaoadińa.

Gel mit́ kilạsre bhurtik lạgit́ dosar dhao leka online ardas okto arhõ ḍherena. Nawa okto lekate, darakan 1 October ńindạ 8:00 baja dhạbić ardas kạmi calao idiḱa. Ona sãote jo sodoroḱ, nisṭan, Migration ar bhurtiḱ reaḱ oktoko nawa aro akana.

Sombar (28 September) Bangladesh Anto:sikha board somonoe komiṭi ren sabha mukhiạ ar Dhaka sikhnạt board Chairman Professor Dr. Syed Aktaruzzaman suhiat́ mit́ ḍhạrwạḱ hotete noa khoborko baḍae ocokeda. Ḍhạrwạḱre menakana, ạḍi ḍher pạṭhuạkoaḱ niṭ akan oktere nisṭan bạtil baṅ kate ar bhurtiḱ kạmi baṅ purạu khạtirte dosar dhao leka bhurtik okto arhõ ḍher hoyena.

Okoe do noa laha bako ardas akat́ se ardas katet́ hõ okaṭaḱ college rege bako bachao ńam akan, se bachao katet́ rehõ bako bhurti daṛeakat́ ar bhul koṭa khạtir bhurti kạmi bako purạu daṛeakat́ onko ko dosar dhapteko bhurti daṛeaḱa. Nawa niạm lekate, dosar dhap reaḱ jo do darakan 5 October sodoroḱa. Inạkate 8 October dhạbićko bachaokoa. Niṭ akan okto bhitrire bako nisṭan daṛeaḱ khan  ardas bạtiloḱa. Migration reaḱ jo darakan 9 October ńindạ 8:00 baja okte sodoroḱa. Ar bhurtik kạmi do 11 khon 13 October dhạbić calao idiḱa.

Mit́din mit́ṭen kuṛi gidrạ pukhrite hako sasaṕe calaoena. Mit́ṭen gupi koṛa ona pukhri ḍhipre jirạujoṅkan tahẽkana. Ado uni kuṛi gidrạ do gupi koṛae metadea, “E gupi dada, thoṛam goṛoạńa?

Gupi koṛa doe rạjiyena. Adoe metadea, “nonḍege duṛuṕ hataṛoḱme. Pepṛẽt́iń oroṅ lekhange ńelam joto hako pukhri aṛe aṛeteko hijuḱa. Ado usạram saṕkoa. Khange gupi koṛa pepṛẽt́ oroṅe lagaoena. Menkhan mit́ṭen hako hõ aṛete bako hećlena. Bickom joto hakoko oko cabayena.

Ado uni kuṛi gidrạ do gupi koṛae metadea, “E gupi dada, am do ạḍi napae pepṛẽt́em oroṅ daṛeaḱ kana. Menkhan pepṛẽt́ oroṅte hako do bako saboḱa. Hako saṕ lạgit́ khaṭaoḱ hoyoḱa.

Khange gupi koṛa aćaḱ bhule bujhạukeda. Onate pukhrire jhạli capat́keda ar baber do aćaḱ ḍanḍare tolkeda ar kajakte dạṛkeda. Ar sạrige jhạlire ạḍi utạr hakoko jạliyena. Hako ńelte uni kuṛi gidrạ do ạḍi ãṭe kusiyena ar gupi koṛa hõ thoṛae hạṭińadea. Ar sareć hako do oṛaḱe idiket́koa.

25 September (Sokolbar) ạyuṕ bela 4:30 baja okte Rajshahi Nagraha, Ranibajar Baṭar moṛ reaḱ Panḍulipi puthi bajar kendrore ạdibạsi pạrsi, sãohẽt́ ar ạri cạli rukhiại babotre mit́ṭen gapalmarao sabha hoyena.

NAGR ren mukhiạ Mn.Stephen Soren aḱ ạyurte ar Indigenous Heritage Studio ren ạyurić John Poul Soren aḱ ạyurte gapalmarao sabhare seṭerko tahẽkana, Rajshahi Bissobidaloy reaḱ Folklore bibhạg ren Professor Amirul Islam Kanak, Progoti ren sompadok columnist Shah Md.Ziauddin, Nari O Sishu Kollan gãota ren mukhiạ Sumi Murmu, MASAUS ren mukhiạ Merina Hasda, Onoliạ Subas Mardi, James Kisku, gaenaha Rumila Hembrom, Milon Mardi, Kakonhaṭ Manwa Aṛaṅ Natya ar Sangskritik Unnoyon gãota ren Michael Soren, Elias Soren, Ethiopia ren protinidhi Gemechu Fikadu, MCC Country protinidhi Greg Venderbilt, Juạn neta, onoliạ ar onoṛhiạ Monica Marandi.

Sabhare ạdibạsi pạrsi ar ạri cạli jogao dohoe reaḱ aema lekan kạmihorako babot gapalmarao hoyena.

Calaoen Sombar (22 September) Rajshahi Tanore upạjilạ reaḱ Dorgadanga bajar Shaheen Academy School maṭhre ‘Dhạrti Suluḱ Mãhã-2026’ ko manaokeda. Menonite Central Committee (MCC) aḱ kạuḍi goṛo ar NAGR (National Agency for Green Revolution) aḱ bondoboste suluḱ mãhãko manaokeda.

NAGR ren maraṅ mukhiạ Mn.Stephen Soren aḱ ạyurte manot peṛa lekate seṭere tahẽkana Tanore upạjilạ ren nirbahi officer Naima Khan. Mukhiạ gapalmaraoić lekate seṭere tahẽkana Rajshahi Bissobiddaloy ren Folkore and Social Studies ren Professor Dr. Amirul Islam, bises peṛa lekate seṭerko tahẽkana, MCC ren Country Representative Greg Venderbilt, Suluk ren Co-Ordinatior Bilong Ruga MCCB, PMER Co-Ordinator-Orun Sencuri MCCB, Sikhnạt Co-Ordinator Phoebe Chiring Marak ar MCCB ren Esdai.

Inạ chaḍa hõ bidesi peṛako modre seṭerko tahẽkana Indonesia ren GSLR protinidhi Jesika, ar Ethiopia ren GSLR Gemechu ar Mthbisi.

Aḍepase peṛako modre seṭerko tahẽkana. 1 no kolma union porisod ren panel Chairman Md. Ziaur Rahman, Dorgadanga High School ren mukhiạ Md. Monirul Kabir, Condonkotha High School ren mukhiạ Md.Anowar Hossain, Dorgadanga High School ren Assi:Mahasoe Md.Ziaur Rahman, Dorgadanga bajar committee ren sabha mukhiạ Md.Shamsudin, Shaheen Academy ren ạyurić Nazim Uddin selet́ lekman hoṛko.

Akhṛare manotanko menkeda, suluk do kạṭić katha kana, menkhan noa reaḱ mane do ạḍi gạhirgea. Nij nij jaega khon sanamkoge suluk jạruṛa. Nit dhạrti sećbon koyoḱ lekhan ạḍi bhiṛ se besto ar gạhir dhạrtibon ńel ńama. Onate aboaḱ nij bodol talate suluk galmarao bon ehoṕ daṛeaḱa.

Akhṛare Amnura Lutheran Mission Haspatal ren Medical dol do sạdhin kạmi hisạb lekate sadharon hoṛkoaḱ mãyãm biḍạu reaḱ sebako emkeda. Mucạt́re juạnkoaḱ eneć sereń, rạskạ ar ạri cạliko talate suluk mãhã manao akhṛa cabayena.

Dare rohoe abon jotoko

Dare begor banuḱ bańcaoḱ,

Emabonae sanam rog reaḱ ran

Muhumre muskilre gidrạ lekae bańcaobona abo.

Baṅbon bujhạueda

Maḱ cabaedabon dare,

Ona karonte abokoaḱ elekare hoe daḱ reaḱ jala

Daḱ bạnuḱ dinre ạḍi setoṅ lolo.

Ona karonte jotoko

Rohoe abon dare,

Pirthibire daḱ komoḱkana

Daḱ bhaph kate baṅ oṭaṅoḱ kana

Onatege daḱ baṅ hijuḱ kana.

Patal reaḱ daḱ hõ latar cabaḱ kana,

Bańcaoabo pirthibi, bańcaoḱabo jotoko

Rohoemabon dare jotoko.

Juluḱ sunum reaḱ dam liṭer re 20 ṭaka ḍherente sor sạṅgiń hor reaḱ bus bhaṛa hõ mit́ kilomiṭar re 17 paesa ḍherena.

20 September ńindạ sarkar joto lekan juluḱ sunum dịgel, kerosine, petrol ar octane reaḱ dame ḍherkeda. Onka leka Moṅgol hiloḱ (22) September Soṛok Poribohon Montronaloe reaḱ mit́ bạisire bus bhaṛa hõ goṭayena.

Noa laha sạṅgiń horre mit́ kilomiṭar re 20 paesa ar Rajdhạni selet́ sohor nagrahare 18 paesa ḍher reaḱ kathae sodorkeda Bangladesh Soṛok Poribohon mukhiạ (BRTC). Inạ tayom noa goṭa kathage montronaloe teko kolkeda.

Aṭhwar hiloḱ sarkar juluḱ sunum reaḱ dam ḍher reaḱ kathae jạhirkeda. Joto juluḱ sunum reaḱ dam liṭer re 20 ṭaka kateć ḍherena. Dịgel reaḱ dam 115 ṭaka khon 135 ṭaka, kerosine reaḱ dam 135 khon 155 ṭaka, octane reaḱ dam 145 khon 165 ṭaka ar petrol reaḱ  dam 140 khon 160 ṭaka kateć ḍherena.