JO

Kanṭhaṛiń joma

Kaerań joma

Arhõń joma ul,

Sanamko mit́kate

Jomabon niạbar

Kamraṅga ar jamrul.

Jojoń joma, pipiạ̃ń joma

Arhõń joma sińjạ,

Sanamko mit́kate jomabon niạbar

Anaros ar nạrkol.

Absalom Reaḱ Hul

Dạvidren hopon Abraham do Isrạyel hoponko modre mońje tahẽkana. Talka khon coṭ bohoḱ dhạbić bae dusạna. Uniren apat ạḍiye dulạṛede tahẽkanre hõ apat bodole rajoḱ lạgidoḱkan tahẽkana. Hor areṛeye teṅgona, ar jãhãe hećente taberkateko ḍoboḱae lạgit́ khan, Absalom do hakopako onko hạṛuṕkateye coḱ daramakoa.

Nonkate uni do Isrạyel hoponko reaḱ mon aćren apat Dạvid khone kombṛoket́a. Uni do Dạvidren sosolhaić Ạhitophel tuluć mit́ sãṭente palṭon phạdante Jerusalem upạrteye hećente, Dạvid do aćren hopon botorte dạṛtege hoyentaea. Ạhitophel Absalome solhawadea apate khudạu saṕ hodea mente, menkhan Dạvidren peṛa Husại do biḱlome solhawadea, ḍher okoć maraṅ phạ̃d ạuriye jomkaoko dhạbić. Probhu Absalomre ghoṭnae paṛao ocoe iạte Ạhitophel reaḱ solha Absalome giḍi ocokedea, onate Ạhitophel senkate aćteye phạsi goćena.

Dạvid batare ńamket́ khan, ḍher ńõḱ palṭon juṭạukate onko cetanre Joab dohokedeteye hukumadea, Iń iạte thoṛa Absalom tuluć jute jutete beboharpe. Mit́ṭeć birre maraṅ lạṛhại hoyena; Absalom do dạṛtege hoyentaea, ar mit́ṭeć ela dare latarre uṕ bedhaoentaeteye aka tahẽyena. Joab do ńir senkate 3 borlomteye soboḱ taṕkedea. Dạvid onae baḍae ńamket́ khan raḱateye hae coḱket́a; Hae Absalom hopontiń! Tayomte Dạvide goćente, Batsebaren hopon Salomone rajena. (2 Sạm.15-18; 1 Raj 1-2.)

Jib Janwaraḱ Golpo

Mit́din Ṭoni aćren gateko são birte daṛane calaoena. Bir reaḱ darekore aema cẽṛẽ ciprut́ko aṕ akan tahẽkana. Ṭoni ren gateko do khilạḍoḱ okte ackage cẽṛẽ sećge bạṭulko tuńkeda. Khange bạṭulte mit́ṭen cẽṛẽ josente ńurena. Uni cẽṛẽ do hasote beret́ hõ bae beret́ daṛeaḱkan tahẽkana.

Ṭoni ar aćren gateko usạra uni cẽṛẽ Ṭoni takoaḱ oṛaḱko ạgukedea. Ṭoni ać baba do uni cẽṛẽ josakan jaegare molhome lagaoadea. Ado Ṭoni ar uniren gateko metat́koa, “Abo lekage jib janwaraḱ hõ jiwi menaḱa. Onko hõ duk kosṭo ko ńama. Abo do aboaḱ duk kosṭo reaḱ kathabon lại sodor daṛeaḱa, menkhan onko do bako lại sodor daṛeaḱa, inạge onko ar abo talare begartet́ do”.

Ṭoni ar uniren gateko akoaḱ bhul ko aṭkarkeda. Onko do Ṭoni ać babako kathawadea tis hõ ar cele cẽṛẽ hõ bako hạnkoa.

Gogowaḱ Pension Ṭaka Rakaṕre Ghus Dạbi, Edrete Benaokeda ‘ghus.site’ Website

Gogowaḱ goć tayom pension ṭaka rakaṕ senkate ghane ghane ghusre paṛaoen khạtirte 17 serma umer ren mit́ṭen juạn koṛa ghus site ńutuman website e benaokeda.

Shahed ać gogo Amena Khatun do Sarkari Primary School Mahasoye tahẽkana. 2022 serma reaḱ December cando goć tayom uniaḱ gharońjrenko Provident fund ar pension ṭaka rakaṕre aema daptorre ghusreko paṛao akana. Aćaḱ passport benao jokhen hõ nonkan ghus ar muskilre paṛao akana. Ona edrete eken bar ghonṭa bhitrite noa website e benaokeda.

Noa website re jãhãe hoṛ apnar ńutum se oporom oko dohokate jãhãlekan sarkari daptor reaḱ ghus dạbi babotko nạlis daṛeaḱa. Ehoṕen thoṛa din bhitritege noare hajar hajar hoṛ akoaḱ nạlisko jomakeda ar goṭa disomre sarsadleyena. Noa reaḱ motlob do Prosasonik seba ńam lạgit́ sadharon hoṛaḱ haron ar durniti sodor.

Gel Mit́ (11) Kilạsre Bhurtiḱ Reaḱ Ardas Ehoṕena

Nes bochor 2026-27 sikhnạt serma reaḱ gel mit́ (11) kilạsre bhurtiḱ reaḱ online ardas teheń Budhbar (2 September) khon ehoṕena. Noa ardas kạmihora do 10 September dhạbić calao idiḱa.

Pạṭhuạko do gel mit́ kilạsre bhurtik reaḱ niṭ akan Website re bolokate ardas emoḱ hoyoḱtakoa. Ardas fee do 220 ṭaka nenḍa akana. Bangladesh Anto:sikha board somonoe komiṭi ren convener ar Dhaka sikhnạt board ren Chairman Professor Syed Aktaruzzaman noa khobore baḍae ocokeda.

2 khon 10 September ńindạ 8:00 baja dhạbić bhurtik ardas calao idiḱa. Jãhãe pạṭhuạkoaḱ nawate bidạu jo sudhrạu se bodol akana, onko pạṭhuạ do 12 khon 13 September ńindạ dhạbićko ardas daṛeaḱa. Inạko okterege pạṭhuạko do akoaḱ kusi ạri bodol reaḱ ạtko ńama.

Noa ardas reaḱ jo sodoroḱa 17 September ńindạ 8:00 baja okte. Inạ tayom pạṭhuạko do 19 September ńindạ 8:00 baja dhạbić bhurtiḱ nisṭan lạgit́ oktoko ńama. Niṭ akan oktore bhutriḱ bako nisṭan daṛeaḱ khan pạṭhuạkoaḱ bachnao ar ardas do bạtiloḱa. Gel Mit́ kilạsre bhurtiḱ reaḱ kạmihora do 20 khon 22 September dhạbić calao idiḱa. Ar bhurtiḱ reaḱ jotowaḱ kạmihora purạukate 23 September khon kilạs ehoboḱa.

Darakan Serma Reaḱ SSC Biḍạu

Darakan serma reaḱ SSC ar ona man reaḱ biḍạure nawa bodol hećena. 31 August (Sombar) Sikha ar Prathomik ar Gonosikha Montri Dr. A.N.M. Ehsanul Hoque Milon hotete nawa gotawaḱ din tạrik do baḍae ocoakana.

Nawa goṭawaḱ lekate, darakan serma metaḱme 2027 reaḱ SSC biḍạu do 14 March khon ehoboḱa. Menkhan biḍạu reaḱ okto ar eṭaḱ eṭaḱ solhako babot tayom daram pusṭạute baḍae ńamoḱa.

Moliaḱ Ul Dare

Moli do ul jom ạḍi kusiaḱkan tahẽkana. Mit́din Moli ać baba hạṭiạ khon ule ạgukeda. Rạskạte Moli do ona ule jomkeda. Ul jom tayom Moli do raḱe ańjomkeda. Raḱ ańjomte hahaṛayena. Ado ńelkeda aćaḱ ti reaḱ jaṅge raḱeda.

Moli jaṅe metadea, “Cedaḱem raḱeda?” Jaṅe menkeda, “Amaḱ bagwanre topakạńme, am cet́em koea onageń emama.” Moli menkeda, “Sạrige!” Onate Moli do guli koekedea. Ado ṭhoḱ ṭhoḱ saḍeyena ar aema guli ńelte ạḍi ãṭe kusiyena. Jaṅe menkeda, “Amaḱ gunṭhi somaniń haralen khan pea sok iń purạutama.

Moli do iskulte calaoena. Iskul khon hećkate jaṅ ńelte disạkeda ar usạra bagwanre topakeda. Thoṛa din tayom Moli ńelkeda darere barea sakam akana, kusite dare beṛha eset́keda ar daḱe dulada.

Ar mit́dine ńelkeda ul dare do gunṭhi soman harayena. Ado dare Moli metadea, “Amaḱ sok lạime.”

Moli menkeda, “Ạḍi lạṭu dare hoyoḱma”. Ar dare do lạṭuyena.

Dare menkeda, “Sok lạime.”

Moli menkeda, “Dare pereć ul jo hoyoḱma.” Ar darere aema ul joyena.

Dare menkeda, “Amaḱ tesar sok purạu lekhange, iń doń senjoṅa.”

Moli menkeda, “Am do ińren gate tahẽnme.” Ar dare do Moliaḱ bagwanrege tahẽyena.

DẠVID REAḰ KẠI

Dạvid palṭonren maraṅ sordar Joab do Amon hoṛko tuluće lạṛhại kan tahẽkanare, Dạvid do mit́din ạyuṕ ber jokheć aćaḱ dolan coṭ khon umoḱkan Uriyạren oṛaḱ hoṛ Batsebae ńel ńamkedea. Khange ạgu ocokedete uni tuluće loṭghuṭiket́a, ar Joab ṭhen ciṭhiye kolket́a, jãhãlekate Uriyạ lạṛhại reaḱ bạṛti mũhĩn ṭhạ̃ireye dohokae, jemon Amon hoṛko reaḱ titeye guroḱ. Joab do aćren kisạ̃ṛ reaḱ kathae bataoket́te Uriyại goć ocokedea. Dạvid ona reaḱ khobor ńamkateye menket́a, Cekaeam, tarwaṛe do jãhãtis baṅ huni, jãhãtis baṅ uniye gugurgea. Homor din cabayen khan, Dạvid do Batsebae saṅghakedea. Menkhan Dạvid oneye kạmilet́aḱ joto do bạṛićge.

Probhu do Nathan nạbi Dạvid ṭhene kolkedea ar uni do Dạvide metadea, E Maharaj! Bar hoṛ mit́ naṅgraharekin tahẽkana; mit́ hoṛ do kisạ̃ṛ ar mit́ hoṛ do reṅgeć. Uni kisạ̃ṛ hoṛren do aema mĩhũ meromko tahẽkana; menkhan uni reṅgeć hoṛren do sadherre mit́ṭaṅ bhiḍi hopone tahẽkantaea, ar uni do aćaḱ piṭhạ reaḱe joma, ar aćaḱ bạṭi reaḱe ńũia, aćaḱ hoborreye gitića, ar hoponera lekae tahẽkantaea. Mit́din mit́ṭaṅ daṛan hoṛ uni kisạ̃ṛ ṭhen hećente, uni kisạ̃ṛ do aćren mĩhũ meromko tahẽ ocoat́kote uni reṅgeć hoṛren sadher bhiḍi hopon ạgukate uni daṛan hoṛ lạgit́e isin aroadea.

Khange Dạvid pit caṛhaoentaeteye menket́a, Uniye nonka akat́ hoṛ do khạṭige gujuḱ sạjạiye ńama ar uni bhiḍi hopon hõ pon ḍobol lagaoaea. Nathane roṛ ruạṛadea, Amge coṅ hoṛtet́ do! Uriyạ do Amon hoṛko reaḱ tarwaṛete com goć oco akade, ar uniren oṛaḱ hoṛ com am rinić akade. Khange Dạvid Probhu samaṅre bạpuṛićenteye menket́a, E, Isor sapha mon baṛe sirjạuańme, ar iń ontorre urić jiu baṛe nawa aroeme; teṅgenoḱaḱ do bam hạ̃saḱ kana, baṅkhan iń emkea; jeredoḱ samaṅaḱaḱ bam khusiaḱ kana. Isor lạgit́ teṅgenoḱaḱko do rạput́ jiuge; rạput́ ar gejer mon, E Isor, bam nĩhạ̃ta. Probhu do Dạvid reaḱ kạiye ikạket́taea; menkhan Betsebae janamade hopon do Dạvid Probhu ạḍiye nehõradere hõe goćena, ar haṛam jivire Dạvid reaḱ ạḍi duk hoyentaea. (2 Sạm.11-12.)

Kạṭić Gidrạ

Kạṭić kạṭić gidrạ pidrạ

Paṛhaoḱako joto.

Iskul calaḱako dinạmdin

Midoḱako joto.

Sapha sạphi tahẽnako

Mońj dohoeako joto.

Paṛhaokate bodolako

Santal somaj joto.

Sapha Sạphi Ar Niropon Hoṛmo Tahẽn

Mit́ atore barea gate koṛakin tahẽkana. Raju do ạḍi coṭkare tahẽkana ar jaoge sapha sạphi tahẽne kusiaḱkan tahẽkana. Ar Joni do ạḍi kuṛhiại tahẽkana. Nunạḱ kuṛhiạ tahẽnkana je tin dhạbić eṅgattet́ ḍạbrạḱ bae metaea un dhạbić bae ḍạbraḱkan tahẽkana.

Mit́din onkinaḱ iskulre piknik ko bondoboskeda. Piknik calaḱ lạgit́ joto hoṛ ạḍi kusi rạskạreko tahẽkana. Onate laha ńindạre piknik reaḱ jotowaḱ kạmi sạitạukateko jạpit́keda. Setaḱre Raju do Joni ṭhene senenre ńelkedea, Joni do lać hasote kạhilakana.

Raju ar Joni eṅgat do usạra harephare ḍaktar ṭhenkin idikedea. Ḍaktar bidạu baṛakateće menkeda, Joni do sapha sạphi bae tahẽnte nonkan ruạre jạbunena.

Ado ḍaktar Joni rane emadea ar sapha sạphi tahẽne metadea. Sãote arhõ pe din jirạure tahẽne metadea. Onate Joni do piknik calaḱ hõ baṅ hoelentaea.