Namḍak gaenaha Shreya Ghosal aḱ aṛaṅ reaḱ jạdute goṭa dhạrti bundena. Kukmuren gaenaha são mit́ stage re sereń reaḱ ạte ńamkeda Baṅgladisomren santal kuṛi Athena Besra.

Calaoen 4 September juktorasṭro Bosṭon reaḱ Agganis Arena re Shreya Ghosal aḱ mit́ṭen sereń durạṅ akhṛa hoyena. Ona akhṛare Shreya Ghosal sãote sereń ạte ńamket́ Athena do kukmu lekae ạikạukeda.

Baṅgladisom reaḱ Rangpur jilạ Pirganj upạjilạre mit́ santal gharońjre Athenawaḱ janam. Uni do Central Connecticut State University reaḱ Social Work bibhạg ren pạṭhuạ kanae. Nit uni do ać gharońjrenko sãote Juktorasṭro reaḱ Menchester nagrahare menaḱkoa.

Gidrạ khonge Athena do ạri-cạli, eneć sereńre ạḍi mon-subạ tahẽkantaea. Dinạm din ạri-cạli beohar ar laṛcaṛ talate sapṛao akana. Ḍig ḍig marsalkote joloḱkan stage re sereńket́ reaḱ katha lại sodorre Athena doe menkeda, Shreya Ghosal lekan nunạḱ gunan gaenaha aṛere teṅgo katećiń sereń daṛeaḱte ạḍi gorobiń aṭkareda.

Onka leka ać gogo baba hõ rạskạte mẽt́daḱ bạkin sambṛao daṛeada. Ạkinren gidrạwaḱ nunạḱ maraṅ hameṭ ńelte ạḍi ãṭkin goroboḱkana. Athena lạgit́ ać gogo baba dhạrtiren hoṛko ṭhen ạsirbadkin koekeda, jemon tayom daram dinre arhõ maraṅaḱe hameṭ daṛeaḱ.

Baṅgladisomren santal kuṛiaḱ noa hameṭ do eken Athena eskaraḱ jit do baṅ kana, bickom Baṅgladisomre tayom akan hoṛko selet́ hajar hajar juạn ar rakaṕ hijuḱkan gaenahako udgạuko reaḱ maraṅ onoṛ kana. Noa doe pormaneda, bud ar kurumuṭu tahẽlenkhan dhạrti reaḱ jãhã jaega se kona khonge kukmu cuṛạrem rakaṕ daṛeaḱa.

Dhaka Narayanganj jilạ Rupgonj upạjilạ reaḱ Murapaṛa union reaḱ Moṅgolkhalire Riya Soren (19) ńutuman mit́ santal kuṛiaḱ mạ̃ṛĩko udhạrkeda. 7 September setaḱ mit́ṭen bhaṛa oṛaḱ khonko udhạrkeda.

Riya Soren do Dinajpur reaḱ Nobabgonj jilạ Kushdoh union Baghdaboṛa atoren kanae. Reṅgeć gharońjren kuṛi Riya do andaj 8 cando khon Rupganj reaḱ ACI Salt Limited-re kạmikan tahẽkana.

Peṛako baḍae ocokeda, Uni do Moṅgolkhalire mit́ṭen ṭin reaḱ bhaṛa oṛaḱre aćren são kạmiạ muslạ sãoe tahẽnkan tahẽkana. Menkhan ghoṭna thoṛadin lahare aćren são kạmiạ do oṛaḱe calao akan tahẽkante ona oṛaḱre Riya eskare tahẽkana. 6 September ńindạ phonte uni sãoe galmarao akada mente Riya ać gogo Ribika Murmu doe baḍae ocokeda. Dosar hiloḱ setaḱre Riyawaḱ mạ̃ṛĩ udhạr tayom pạhilre oṛaḱren gharońjren doko menkeda uni do stroke teye goć akana. Tayomte aḍepase hoṛko uniaḱ hoṭoḱre hạn reaḱ cinhạko ńelkeda menteko baḍae ocokeda. Inạ tayom oṛaḱ mạlik gharońjrenko menkeda, Riya do aćtege goćakana ar pạsi akanko ńamakadea.

Menkhan ạdepase hoṛkoaḱ kukli, Pạsi akan Riyawaḱ mạ̃ṛĩ do okoege bako ńelakada, ghoṭna ṭhạ̃ire uniaḱ mạ̃ṛĩ aṭet́rege tahẽkana. Noa ghoṭna babot oṛaḱ mạlik ar uniaḱ gharońjren hoṛkoaḱ kathate aḍepaseko talare aema lekan kukli ar dighại sirjạu akada. Peṛakoaḱ nạlis, oṛaḱ mạlik Tania Begom do aćaḱ gharońjre Riya ạḍi ãṭe apnarledea ar dhorom bodolkate muslạ dhoromren koṛa são bapla reaḱ katha hõe sodorleda.

Menkhan noa nạlis reaḱ sạriaḱtet́ nit hõ baṅ nisṭan akana. Riyawaḱ phone nit dhạbić baṅ ńamakana mente peṛako baḍae ocokeda. Ghoṭna tayom Rupganj thana pulis mạ̃ṛĩ udhạrkate mạ̃ṛĩ biḍạu lạgit́ko kolkeda. Baḍaeoḱ kana ona gharońjrenko nit hõ bako mamla akada. Gharońj ar aḍepaserenko do mạ̃ṛĩ biḍạu hotete gujuḱ reaḱ sạri karontet́ baḍae lạgit́ ạn lekateko bebostha hatao reaḱko dạbikeda.

Note Riya ać gogo do aćren kuṛi at́ente ạḍi ãṭ dukre paṛaoakana; uniaḱ gujuḱte Dinajpur reaḱ Baghdaboṛa atoren hoṛko dukoḱ kana.

Tumạl: ipnewsbd

Meskoć

Ḍigiṭal nisạ-

Mit́din mit́ṭen gidrạ dinman mobile phone-e ńeńelkan tahẽkana. Ado ać babae metadea-

Baba: Cedaḱ dinman phonem ńeńel kana? Thoṛa puthi paṛhaome, bud ạkil hameṭme.

Gidrạ: E ba, puthi mań paṛhaoḱkange!

Baba: Okor tinrem paṛhaoḱ kana?

Gidrạ: Tinre mobile re charge cabaḱa ar charger sendrate bạń ńama!

Baba: Enḍekhan ạkil do baṅ, amaḱ do eken betạri reaḱ charge-ge ḍheroḱkantama!

Kanṭhaṛiń joma

Kaerań joma

Arhõń joma ul,

Sanamko mit́kate

Jomabon niạbar

Kamraṅga ar jamrul.

Jojoń joma, pipiạ̃ń joma

Arhõń joma sińjạ,

Sanamko mit́kate jomabon niạbar

Anaros ar nạrkol.

Dạvidren hopon Abraham do Isrạyel hoponko modre mońje tahẽkana. Talka khon coṭ bohoḱ dhạbić bae dusạna. Uniren apat ạḍiye dulạṛede tahẽkanre hõ apat bodole rajoḱ lạgidoḱkan tahẽkana. Hor areṛeye teṅgona, ar jãhãe hećente taberkateko ḍoboḱae lạgit́ khan, Absalom do hakopako onko hạṛuṕkateye coḱ daramakoa.

Nonkate uni do Isrạyel hoponko reaḱ mon aćren apat Dạvid khone kombṛoket́a. Uni do Dạvidren sosolhaić Ạhitophel tuluć mit́ sãṭente palṭon phạdante Jerusalem upạrteye hećente, Dạvid do aćren hopon botorte dạṛtege hoyentaea. Ạhitophel Absalome solhawadea apate khudạu saṕ hodea mente, menkhan Dạvidren peṛa Husại do biḱlome solhawadea, ḍher okoć maraṅ phạ̃d ạuriye jomkaoko dhạbić. Probhu Absalomre ghoṭnae paṛao ocoe iạte Ạhitophel reaḱ solha Absalome giḍi ocokedea, onate Ạhitophel senkate aćteye phạsi goćena.

Dạvid batare ńamket́ khan, ḍher ńõḱ palṭon juṭạukate onko cetanre Joab dohokedeteye hukumadea, Iń iạte thoṛa Absalom tuluć jute jutete beboharpe. Mit́ṭeć birre maraṅ lạṛhại hoyena; Absalom do dạṛtege hoyentaea, ar mit́ṭeć ela dare latarre uṕ bedhaoentaeteye aka tahẽyena. Joab do ńir senkate 3 borlomteye soboḱ taṕkedea. Dạvid onae baḍae ńamket́ khan raḱateye hae coḱket́a; Hae Absalom hopontiń! Tayomte Dạvide goćente, Batsebaren hopon Salomone rajena. (2 Sạm.15-18; 1 Raj 1-2.)

Mit́din Ṭoni aćren gateko são birte daṛane calaoena. Bir reaḱ darekore aema cẽṛẽ ciprut́ko aṕ akan tahẽkana. Ṭoni ren gateko do khilạḍoḱ okte ackage cẽṛẽ sećge bạṭulko tuńkeda. Khange bạṭulte mit́ṭen cẽṛẽ josente ńurena. Uni cẽṛẽ do hasote beret́ hõ bae beret́ daṛeaḱkan tahẽkana.

Ṭoni ar aćren gateko usạra uni cẽṛẽ Ṭoni takoaḱ oṛaḱko ạgukedea. Ṭoni ać baba do uni cẽṛẽ josakan jaegare molhome lagaoadea. Ado Ṭoni ar uniren gateko metat́koa, “Abo lekage jib janwaraḱ hõ jiwi menaḱa. Onko hõ duk kosṭo ko ńama. Abo do aboaḱ duk kosṭo reaḱ kathabon lại sodor daṛeaḱa, menkhan onko do bako lại sodor daṛeaḱa, inạge onko ar abo talare begartet́ do”.

Ṭoni ar uniren gateko akoaḱ bhul ko aṭkarkeda. Onko do Ṭoni ać babako kathawadea tis hõ ar cele cẽṛẽ hõ bako hạnkoa.

Gogowaḱ goć tayom pension ṭaka rakaṕ senkate ghane ghane ghusre paṛaoen khạtirte 17 serma umer ren mit́ṭen juạn koṛa ghus site ńutuman website e benaokeda.

Shahed ać gogo Amena Khatun do Sarkari Primary School Mahasoye tahẽkana. 2022 serma reaḱ December cando goć tayom uniaḱ gharońjrenko Provident fund ar pension ṭaka rakaṕre aema daptorre ghusreko paṛao akana. Aćaḱ passport benao jokhen hõ nonkan ghus ar muskilre paṛao akana. Ona edrete eken bar ghonṭa bhitrite noa website e benaokeda.

Noa website re jãhãe hoṛ apnar ńutum se oporom oko dohokate jãhãlekan sarkari daptor reaḱ ghus dạbi babotko nạlis daṛeaḱa. Ehoṕen thoṛa din bhitritege noare hajar hajar hoṛ akoaḱ nạlisko jomakeda ar goṭa disomre sarsadleyena. Noa reaḱ motlob do Prosasonik seba ńam lạgit́ sadharon hoṛaḱ haron ar durniti sodor.

Nes bochor 2026-27 sikhnạt serma reaḱ gel mit́ (11) kilạsre bhurtiḱ reaḱ online ardas teheń Budhbar (2 September) khon ehoṕena. Noa ardas kạmihora do 10 September dhạbić calao idiḱa.

Pạṭhuạko do gel mit́ kilạsre bhurtik reaḱ niṭ akan Website re bolokate ardas emoḱ hoyoḱtakoa. Ardas fee do 220 ṭaka nenḍa akana. Bangladesh Anto:sikha board somonoe komiṭi ren convener ar Dhaka sikhnạt board ren Chairman Professor Syed Aktaruzzaman noa khobore baḍae ocokeda.

2 khon 10 September ńindạ 8:00 baja dhạbić bhurtik ardas calao idiḱa. Jãhãe pạṭhuạkoaḱ nawate bidạu jo sudhrạu se bodol akana, onko pạṭhuạ do 12 khon 13 September ńindạ dhạbićko ardas daṛeaḱa. Inạko okterege  pạṭhuạko do akoaḱ kusi ạri bodol reaḱ ạtko ńama.

Noa ardas reaḱ jo sodoroḱa 17 September ńindạ 8:00 baja okte. Inạ tayom pạṭhuạko do 19 September ńindạ 8:00 baja dhạbić bhurtiḱ nisṭan lạgit́ oktoko ńama. Niṭ akan oktore bhutriḱ bako nisṭan daṛeaḱ khan pạṭhuạkoaḱ bachnao ar ardas do bạtiloḱa. Gel Mit́ kilạsre bhurtiḱ reaḱ kạmihora do 20 khon 22 September dhạbić calao idiḱa. Ar bhurtiḱ reaḱ jotowaḱ kạmihora purạukate 23 September khon kilạs ehoboḱa.

Darakan serma reaḱ SSC ar ona man reaḱ biḍạure nawa bodol hećena. 31 August (Sombar) Sikha ar Prathomik ar Gonosikha Montri Dr. A.N.M. Ehsanul Hoque Milon hotete nawa gotawaḱ din tạrik do baḍae ocoakana.

Nawa goṭawaḱ lekate, darakan serma metaḱme 2027 reaḱ SSC biḍạu do 14 March khon ehoboḱa. Menkhan biḍạu reaḱ okto ar eṭaḱ eṭaḱ solhako babot tayom daram pusṭạute baḍae ńamoḱa.